ភ្នំពេញៈ តារាចម្រៀងស្រី ចេះកំប្លុកកំប្លែងមានទេពកោសល្យច្រើនស្ទីល នៅក្នុងវិស័យសិល្បៈទាំងប្រពៃណី និងទំនើបសម័យ អ្នកនាង ខាត់ សុឃីម ជារៀមច្បងត្រកូលខាត់ ដែលបច្ចុប្បន្នកំពុងតែកាក់កបខ្លាំងនឹងអាជីពសិល្បៈ និងអាជីវកម្មផ្ទាល់ខ្លួនផងនោះ ស្រាប់តែប្រកាសក្តែងៗថា ចង់បានកូនច្រើនសម្រាប់បង្កើនសមាជិកគ្រួសារខ្លួនទៅថ្ងៃខាងមុខ។
![](https://i0.wp.com/www.lareine.com.kh/wp-content/uploads/2017/05/sokhim.jpg?resize=696%2C404&ssl=1)
ការស់នៅក្នុងសង្គមនាសម័យទំនើបនេះ ជាពិសេសចំពោះសង្គមក្រុមគ្រួសារដែល មានជីវភាពមធ្យមឡើងទៅ មិនសូវប្រាថ្នាចង់បានកូនចៅច្រើនឡើយ តែចម្លែកអីបានជាតារាចម្រៀងស្រីត្រកូលខាត់ គឺអ្នកនាង ខាត់ សុឃីម ដែលមហាជនបានដឹងថា អ្នកនាងមានកូនពីររួចទៅហើយសម្រាប់សង្គមគ្រួសាររបស់អ្នកនាងនោះ ចុះហេតុអ្វីបានជាថ្មីៗនេះអ្នកនាងបែរជាប្រកាសថា ចង់បានកូនថែម និងថែមទាំងចង់បានកូនភ្លោះទៀតផង?
![](https://scontent-hkg3-1.xx.fbcdn.net/v/t1.0-9/18557397_127991917751789_8020745444981149406_n.jpg?oh=2656b270343cb010dea4f856f7f7ffe3&oe=59786D24)
ក្នុងជំនួបកិច្ចសម្ភាសជាមួយឡារ៉ែន តារាចម្រៀងស្រីវ័យជ្រេ តែសម្រស់នៅស្អាតផូរផង់ រាងតូចច្រឡឹងគួរឲ្យខ្នាញ់ មានចំណងស្នេហ៍អាពាហ៍ពិពាហ៍ជាមួយនឹងតារាសម្តែងប្រុសវ័យក្មេងជាងខ្លួន ដែលបច្ចុប្បន្នជាស្វាមីរបស់នាងគឺលោក អ៊ិន សុបញ្ញា ហៅ សុផាណូ បានប្រាប់ដោយឥតលាក់លៀមពីក្តីប្រាថ្នាចង់បានកូនភ្លោះថា៖ «ចា៎ស! ខ្ញុំមិននិយាយលេងទេ គឺពិតជាបានប្រាប់ថា ចង់បានកូនភ្លោះមែន។ មូលហេតុមាន ៣ យ៉ាង ដែលជំរុញឲ្យចង់បាន ដំបូងគឺមកពីនាងខ្ញុំមានវ័យច្រើនគឺ ៣៨ ឆ្នាំទៅហើយ ឱកាសមានកូននៅសល់តិច។ បន្ទាប់មកទៀត ដោយសារតែនាងខ្ញុំទម្លាប់រស់នៅក្នុងគ្រួសារដែលមានសមាជិកច្រើន ដូច្នេះទើបចង់ឲ្យគ្រួសារជំនាន់ខ្ញុំមានច្រើនដែរ។ ចំណែកឯចំណុចចុងក្រោយ គឺដោយសារតែមើលឃើញអ្នកសិល្បៈដូចគ្នាគេទៅរកសេវាកម្មប្រឹក្សាជួយឲ្យមានកូនភ្លោះតាមបច្ចេកទេសទំនើបពីគ្រូពេទ្យជំនាញបានជោគជ័យ ក៏នឹកចង់បានដែរទៅ ខណៈដើមខែ៦ ខាងមុខនេះ នាងខ្ញុំនឹងទៅពិគ្រោះយោបល់ហើយ។ បើពិនិត្យទៅហើយបានសម្រេចតាមក្តីប្រាថ្នានោះ មិនបង្អង់យូរទេ នឹងប្រញាប់យកកូនភ្លោះនោះឲ្យបាននៅក្នុងឆ្នាំចតែម្តង»៕
![](https://scontent-hkg3-1.xx.fbcdn.net/v/t1.0-9/18446778_127574651126849_4876669116702694168_n.jpg?oh=e5d6fcbf6d9ba6cd3188a02d266dced9&oe=59A47FAD)
![](https://scontent-hkg3-1.xx.fbcdn.net/v/t1.0-9/18424061_127461214471526_1044709596235111854_n.jpg?oh=d6d55691eda191d8114780e844f9ec0c&oe=5978DF9D)
![](https://i0.wp.com/cdn.sabay.com/cdn/media.sabay.com/uploads/2015/07/11535842_468288826664120_5512938400058308787_n.jpg?resize=696%2C522&ssl=1)