ភ្នំពេញៈ ខណៈជិតដល់ពេលប្រារព្ធពិធីបុណ្យចូលឆ្នាំថ្មីប្រពៃណីជាតិខ្មែររៀងរាល់ឆ្នាំ ក្រុមតារាចម្រៀងទាំងប្រុសទាំងស្រីលំដាប់កំពូលប្រចាំផលិតកម្មល្បីៗតែងសម្បូរបទចម្រៀងថ្មីៗ ដើម្បីបង្ហើរសំនៀងបំពេអារម្មណ៍ប្រិយមិត្តអ្នកស្តាប់របស់ខ្លួនណាស់ តែចម្លែកអ្វីនៅឆ្នាំ២០១៧នេះ តារាចម្រៀងស្រីសំឡេងស្រទន់ ឈរលំដាប់កំពូលនៃទ្រនំផលិតកម្មថោនកញ្ញា មាស សុខសោភា បែរជាមានចេញបទចម្រៀងតិចខុសប្លែកពីពេលឆ្នាំមុនៗ បង្កឲ្យមានការងឿងឆ្ងល់យ៉ាងខ្លាំងពីគាំទ្រ។
![](https://i0.wp.com/www.lareine.com.kh/wp-content/uploads/2017/04/t-1024x737.jpg?resize=696%2C501&ssl=1)
![](https://i0.wp.com/www.lareine.com.kh/wp-content/uploads/2017/04/Meas-Soksophea4.jpg?resize=696%2C757&ssl=1)
កាន់តែមានការសង្ស័យបន្ថែមទៀតនោះ គឺនាពេលថ្មីៗក្រោយពិធីបុណ្យចូលឆ្នាំ ខណៈវត្តមានរបស់តារាស្រីរូបនេះបានចូលរួមក្នុងកម្មវិធីប្រគំតន្រ្តីមួយរបស់ស្ថានីយ៍ទូរទស្សន៍ក្នុងស្រុក ក៏ធ្លាប់បានព្រលយចេញថា នាងពិតជាមានបទចម្រៀងបំពេអារម្មណ៍អ្នកគាំទ្រតិចមែនសម្រាប់ឆ្នាំនេះផងដែរ។ ដំណឹងនេះក៏រឹតតែធ្វើមហាជនអន្ទះសារចង់ដឹងពីមូលហេតុ និងមានមន្ទិលថា កញ្ញា មាស សុខសោភា និងផលិតកម្មអ្វីរកាំរកូសនឹងគ្នាមែនឬ?
![](https://i0.wp.com/www.lareine.com.kh/wp-content/uploads/2017/04/Meas-Soksophea1.jpg?resize=696%2C464&ssl=1)
![](https://i0.wp.com/www.lareine.com.kh/wp-content/uploads/2017/04/Meas-Soksophea3.jpg?resize=696%2C522&ssl=1)
លោក ករុណា ពេជ្រ អ្នកចាត់ការថ្មីនៅផលិតកម្មថោន ថ្លែងប្រាប់ពីមូលហេតុ ដែលនាំឲ្យតារាចម្រៀងស្រីសំឡេងរៃកន្តឹង និងនិយមច្រៀងតែប្រភេទបទអូរីជីណល់ ឬបទមិនចម្លងគេនោះថា៖ « តាមពិតទៅ កញ្ញា មាស សុខសោភា មិនមែនផលិតកម្ម មានបទចម្រៀងតិចសម្រាប់គាត់នោះទេ ក្នុងការចេញបទចម្រៀងនៅរដូវកាលចូលឆ្នាំថ្មីនេះ។ បើនិយាយទៅគឺមានជិត ១០ បទដែរ តែពេលចេញមុនចូលឆ្នាំគឺមានតែបីបួនបទ ខណៈប៉ុន្មានបទទៀតផលិតកម្មក៏បានចេញបន្តបន្ទាប់រួចហើយដែរ»។
![](https://i0.wp.com/www.lareine.com.kh/wp-content/uploads/2017/04/t1-1024x683.jpg?resize=696%2C464&ssl=1)
![](https://i0.wp.com/www.lareine.com.kh/wp-content/uploads/2017/04/Meas-Soksophea.jpg?resize=696%2C516&ssl=1)
តារាចម្រៀងដែលជាអ្នកចាត់ការ នៅផលិតកម្មថោនរូបនេះបន្តថា៖ «ផលិតកម្មតែផ្តល់អាទិភាពជូនទៅគាត់ [មាស សុខសោភា] ជានិច្ចព្រោះគាត់ជាតារាចម្រៀងរបស់ផលិតកម្មតាំងពីដំបូង។ សម្រាប់ឆ្នាំនេះ ផលិតកម្មក៏បានផ្តល់ជម្រើសបទចំនួនប្រហែលជា ១០ បទដែរដើម្បីឲ្យគាត់ជ្រើស។ តែគាត់ក៏ប្រាប់ដែរថា ចង់ច្រៀងតែបទណាមានគុណភាពប៉ុណ្ណោះ ខណៈយើងក៏សម្រេចជូនគាត់ប៉ុន្មានពីរបីបទដែលបានចេញនោះឯង។ ម្យ៉ាងទៀត បទចម្រៀងប៉ុន្មានបទក្រោយ ដែលចេញក្រោយចូលឆ្នាំនោះ គឺមានមូលហេតុ ដោយសារមានអ្នកដឹកនាំសម្តែងម្នាក់គាត់បានអះអាងថា នឹងខំធ្វើឲ្យបទនោះមានស្ពុនស័រ ហើយក្រុមហ៊ុនក៏ទុកពេលឲ្យគាត់ដល់ពាក់កណ្តាលខែមីនា តែលុះដល់ចុងខែមីនាឯណោះទើបតបថា មិនមានស្ពុនស័រ។ ដូច្នេះយើងមិនអាចធ្វើឲ្យបទក្រោយរបស់ មាស សុខសោភា ចេញទាន់នឹងបទមុនរបស់នាងនោះឡើយ»៕