ភ្នំពេញៈ ខណៈពេលមហាជនជាអ្នកគាំទ្ររបស់តារាចម្រៀងស្រីសម្បុរស្រអែម កញ្ញា ខេមរៈ ស្រីពៅ ដែលជាប្អូនស្រីបង្កើតរបស់កំពូលតារាចម្រៀងប្រុសនៅទ្រនំផលិតកម្មសាន់ដេ លោក ខេមរៈ សិរីមន្ត មានការត្រេកអរ និងភ្ញាក់ផ្អើលខ្លាំងពេលបានឃើញវត្តមាននាងចូលរួមនៅក្នុងពិធីរៀបចំមង្គលការកាលពីថ្ងៃទី៧ ខែឧសភា ឆ្នាំ២០១៧កន្លងមកនេះក្តី តែពន្លឺនៃការវិលចូលទៅកាន់សង្វៀនសិល្បៈវិញគឺនៅមិនទាន់ដឹងច្បាស់លាស់នោះឡើយ។
![](https://scontent.fpnh3-1.fna.fbcdn.net/v/t1.0-9/18275091_429412630756096_5428465594761121070_n.jpg?oh=ae30698675642721173c84ae44d383dc&oe=59BDC145)
បើតាមការអះអាងរបស់លោក ខេមរៈ ភារុណ ដែលជាបងប្រុសច្បងបង្កើត អ្នកនាំពាក្យ និងជាអ្នកនិពន្ធទំនុកច្រៀងប្រចាំផលិតកម្មសាន់ដេផង បានបង្ហើបប្រាប់ឡារ៉ែនអំពីវត្តមានរបស់ប្អូនស្រីដែលបានមកដល់ស្រុកខ្មែរវិញ និងប្រាប់ពីមូលហេតុមិនទាន់ច្បាស់លាស់នៃការវិលចូលអាជីពសិល្បៈវិញនោះថា៖ «អូ!ប្អូនស្រីខ្ញុំ នាងបានវិលមកស្រុកខ្មែរវិញប្រហែលជាពីរបីខែហើយ។ ការដែលនាងបង្ហាញខ្លួនក្នុងពិធីមង្គលការមុននេះគឺនាងទៅចូលរួមពិធីមង្គលការបងប្អូននៅខេត្តកំពង់ចាម។ សភាពជំងឺរបស់នាងបានធូរគ្រាន់បើច្រើនហើយមកទល់ពេលនេះ។ ចំពោះពេលវេលានៃការវិលមកប្រកបអាជីពសិល្បៈចម្រៀងវិញនោះ ទោះបីជាខ្ញុំជាបងបង្កើតមែន តែរឿងនេះក៏នៅមិនទាន់ដឹងច្បាស់ដែរ ដោយយើងទុកការសម្រេចចិត្តនេះទៅលើរូបគាត់គិតចុះ»។
![](https://scontent.fpnh3-1.fna.fbcdn.net/v/t1.0-9/18403377_429370797426946_7997337079503601863_n.jpg?oh=e51e472b8675ab7b845435edd0902c11&oe=5974DCEC)
ទោះជាយ៉ាងណាក្តី បើយោងតាមសារដែលកញ្ញាខេមរៈ ស្រីពៅ បានបង្ហោះផ្តាំផ្ញើសួរសុខទុក្ខដល់អ្នកគាំទ្រនាង នាពេលចូលរួមពិធីមង្គលការកាលពីថ្ងៃទី៧ ខែឧសភា កន្លងទៅនោះ ស្រីពៅបានសរសេរថា៖ «នឹកFan សំណព្វចិត្តណាស់! នឹកចេញពីបេះដូងពិតៗ ថតបានចេះតែថតទៅហិហិហិ» និងសារមួយទៀតសរសេរថា៖«សួស្តីបងប្អូនទាំងអស់គ្នា នាងខ្ញុំចង់សួរថា សុខសប្បាយជាទេបងប្អូន?» ។
![](https://scontent.fpnh3-1.fna.fbcdn.net/v/t1.0-9/18301551_429370660760293_5728979246587563674_n.jpg?oh=9f5682c619e6ff0af400243788a6c1c9&oe=59764F34)
ទាំងអស់នេះគឺជាការបញ្ជាក់ថា តារាស្រីរូបនេះកំពុងតែមានការនឹករឮកដល់មហាជនណាស់ និងប្រាកដជាមិនអាចបោះបង់ចោលអាជីពខ្លួននោះឡើយ។ ម្យ៉ាងទៀត នាពេលកន្លងទៅថ្មីៗនេះ គឺមុនថ្ងៃបុណ្យចូលឆ្នាំថ្មីប្រពៃណីខ្មែរ ក៏ត្រូវបានគេដឹងដែរថា កញ្ញាខេមរៈ ស្រីពៅ បានបង្កើតស្នាដៃមួយដំបូងគេក្នុងការចាប់ផ្តើមវិលមករកទ្រនំសិល្បៈរួចទៅហើយដែរ គឺនាងបាននិពន្ធទំនុកច្រៀង និង Melody បទចម្រៀងថ្មីមានចំណងជើងថា «ស្រុកខ្ញុំគេរាំតែអញ្ចឹង» ឲ្យបងប្រុសបង្កើតគឺលោក ខេមរៈ សិរីមន្ត នាឱកាសមុនចូលឆ្នាំថ្មីកន្លងទៅ និងទទួលបានការគាំទ្រយ៉ាងខ្លាំងទៀតផង៕
![](https://scontent.fpnh3-1.fna.fbcdn.net/v/t1.0-9/18301957_429370540760305_2403985279842589714_n.jpg?oh=6c7dc4c50645e5905bf8e6b08ba5f1de&oe=59B4C6B0)
![](https://scontent.fpnh3-1.fna.fbcdn.net/v/t1.0-9/18342669_429360520761307_8623310912832507409_n.jpg?oh=5237b7fb0ef62cfa966f59d7d603ffcb&oe=5977A5E9)
![](https://scontent.fpnh3-1.fna.fbcdn.net/v/t1.0-9/18403593_429349524095740_5234848567664534484_n.jpg?oh=74aaa63ae69c44b4f1f7566d3236e4b5&oe=59BE30FE)