នៅថ្ងៃម្សិលមិញនេះ ខាងផលិតកម្មរស្មីហង្សមាស បានរៀបចំធ្វើកម្មវិធីសន្និសីទសារព័ត៌មានស្វាគមន៍តារាចម្រៀងថ្មីវ័យក្មេង និងជាអនាគតកំពូលតារាចម្រៀងប្រចាំទ្រនំរស្មីហង្សមាស គឺកូនប្រុសទាំង 3 រូបរបស់កំពូលតារាចម្រៀង ព្រាប សុវត្ថិ រួមមាន សុវត្ថិ មុនីវណ្ណ , សុវត្ថិ មុនីនាត និងសុវត្ថិ សិរីវឌ្ឍ ដែលត្រូវបានចុះកុងត្រាក្លាយជាតារាចម្រៀងរបស់រស្មីហង្សមាសក្នុងពេលតែមួយ។
![](https://scontent.fpnh3-1.fna.fbcdn.net/v/t1.0-9/26804521_10155037538901891_1687189384431579739_n.jpg?oh=02f0beb6c1146386041edc3f65ce7315&oe=5AB3973D)
ទន្ទឹមនឹងមានការស្វាគមន៍យ៉ាងកក់ក្ដៅពីសំណាក់ផលិតកម្មខាងលើ ចំពោះកូនប្រុសរបស់លោក ព្រាប សុវត្ថិ នៅក្នុងនោះមហាជនសង្កេតឃើញថា ផលិតកម្មដែលនាំមុខគេខាងផ្នែកកម្សាន្ដទី1 នៅប្រទេសកម្ពុជាមួយនេះ ពុំធ្លាប់ធ្វើកម្មវិធីសន្និសីទសារព័ត៌មានស្វាគមន៍តារាចម្រៀងថ្មីណាមួយឡើយ សូម្បីតែវត្តមានរបស់កំពូលតារាចម្រៀងដែលទាក់ទាញចិត្តយុវវ័យបំផុតគឺ លោក ខេមរៈ សិរីមន្ដ ដែលបានឈានជើងចូលមករួមទ្រនំគ្រួសារហង្សមាសនោះ ក៏គ្មានការរៀបចំធ្វើសន្និសីទសារព័ត៌មានស្វាគមន៍វត្តមានរបស់រូបលោកដែរ។ ចុះហេតុអ្វីបានជា ហង្សមាស ដូចជារាក់ទាក់ និងលើកតម្កើងចំពោះក្រុមគ្រួសាររបស់ ព្រាប សុវត្ថិ យ៉ាងនេះ?
ស្របគ្នានោះដែរ អគ្គនាយករងផលិតកម្មហង្សមាសលោកស្រី អ៊ឹង គឹមលាង បានប្រាប់អ្នកសារព័ត៌មាន ឡារ៉ែនថា «កន្លងមកខាងផលិតកម្មរស្មីហង្សមាសមានការជ្រើសរើស និងស្វែងរកតារាចម្រៀងថ្មីមកចូលរួមជាសមាជិកគ្រួសារហង្សមាស តាមបែបផែនខុសគ្នា នៅក្នុងនោះយើងក៏មានរៀបចំកម្មវិធីប្រឡងចម្រៀងជាច្រើន ដូចជា The Voice Cambodia , The Voice Kid Cambodia , Cambodian Idol និង Cambodian’s got Talent ជាដើម តែយ៉ាងណាមិញ ខាងផលិតកម្មក៏មិនបានផ្អែកទៅលើការប្រឡងចម្រៀងតែមួយមុខក្នុងការស្វែងរកតារាចម្រៀងដែលមានទេពកោសល្យនោះដែរ ពោលគឺចំពោះតារាចម្រៀងដទៃទៀត ក៏មានការរៀបចំពីសំណាក់ក្រុមការងាររបស់ផលិតកម្ម រស្មីហង្សមាស មួយក្រុមផ្សេងទៀតដែរ»។
![](https://scontent.fpnh3-1.fna.fbcdn.net/v/t1.0-9/26220111_10155037538896891_8279901446620551633_n.jpg?oh=ed5b4381ce36783993bf299156f8bf14&oe=5AEA628F)
ជាចុងក្រោយ អគ្គនាយករងផលិតកម្មហង្សមាសក៏បានបញ្ជាក់បន្ថែមទៀតដែរថា ដោយហេតុសង្កេតឃើញថា តារាចម្រៀង ព្រាប សុវត្ថិ ត្រូវបានប្រជាជនខ្មែរចាត់ទុកលោកជាកំពូលតារាចម្រៀងនៅក្នុងដួងចិត្ត ជាកំពូលតារាចម្រៀងប្រចាំព្រះរាជាណាចក្រកម្ពុជា និងពិសេសជាងនេះគឺលោកជាតារាចម្រៀងប្រចាំផលិតកម្មរស្មីហង្សមាសផ្ទាល់ ការដែលរៀបចំធ្វើកម្មវិធីសន្និសីទសារព័ត៌មាន គឺជាការស្វាគមន៍ឈាមជ័ររបស់លោក ព្រាប សុវត្ថិ ទាំងមូល ដែលជាតារាចម្រៀងប្រកបដោយទេពកោសល្យ ដែលនឹងផ្ដល់រសជាតិថ្មីសម្រាប់ប្រជាជនខ្មែរទាំងបច្ចុប្បន្ន និងនាពេលខាងមុខនេះ៕
![](https://scontent.fpnh3-1.fna.fbcdn.net/v/t1.0-9/26195971_1990704064501517_1731899888991880101_n.jpg?oh=7b760a7aad7a82235649079e5e619e81&oe=5AE9718E)
![](https://scontent-sin6-1.xx.fbcdn.net/v/t34.0-12/26753954_1520907344653070_1641372394_n.jpg?oh=9555670ddb9396b78caadf41f1fbf909&oe=5A54BA18)
![](https://scontent-sin6-1.xx.fbcdn.net/v/t34.0-12/26647967_1520907581319713_1210875189_n.jpg?oh=e53e5eb519bcfda8b6f8a02269ee55ac&oe=5A55CA15)
![](https://scontent-sin6-1.xx.fbcdn.net/v/t34.0-12/26648422_1520907331319738_1705788943_n.jpg?oh=90207923c1e186be2d655b7eb51c8f29&oe=5A54D0F6)
![](https://scontent-sin6-1.xx.fbcdn.net/v/t34.0-12/26696905_1520907247986413_1530122544_n.jpg?oh=4114c0877f1f95a5a560219c543ce0be&oe=5A55F992)