(រុស្ស៊ី) – ឧទ្ធម្ភាគចក្រ Mi-26 អាចដឹកទំនិញទម្ងន់ 20 តោន និងអាចហោះបានចម្ងាយ 750 គីឡូម៉ែត្រ ត្រូវបានប្រើប្រាស់ទាំងក្នុងវិស័យយោធា ទាំងវិស័យស៊ីវិល។
ពិភពលោកបច្ចុប្បន្ន មានឧទ្ធម្ភាគចក្រមួយប្រភេទដែលអាចដឹកទាំងយន្តហោះចម្បាំង។ យោងតាមរបាយការណ៍របស់ណាតូ (NATO) Mi-26 របស់រុស្ស៊ី គឺជាឧទ្ធម្ភាគចក្រធំជាងគេបង្អស់លើសកលលោក។ ឧទ្ធម្ភាគចក្រនេះ មានតួនាទីដឹករថក្រោះ រថពាសដែកទម្ងន់ 13 តោន និងមីស៊ីលប្លោងជាដើម ទៅកាន់មូលដ្ឋានទ័ពនៅឆ្ងាយៗ។
ជាក់ស្ដែង Mi-26 គឺជាឧទ្ធម្ភាគចក្រដែលធ្ងន់ជាងគេលើពិភពលោក ក្រៅពីគំរូដំបូង V-12 ដែលបានបង្ហាញខ្លួនមុននោះ។ ដំណើរការអភិវឌ្ឍ Mi-26 ត្រូវបានធ្វើឡើងនៅដើមទសវត្សរ៍ឆ្នាំ 1970 បន្ទាប់ពីដឹងច្បាស់ថា V-12 មិនអាចដឹកទំនិញធុនធ្ងន់បាន។
![](https://i0.wp.com/lareine.com.kh/wp-content/uploads/2023/04/lareine.com.kh-2023-04-18_10-42-11_435587.jpg?resize=696%2C464&ssl=1)
Mi-26 ដែលមានបណ្ដោយ 40 ម៉ែត្រ ទម្ងន់ហោះហើរ 56 តោន កាប៊ីនផ្ទុកទំនិញទំហំ 3.2 ម៉ែត្រ និងមានចំណុះ 110 ម៉ែត្រគូប ត្រូវបានផលិតដោយរោងចក្រផលិតឧទ្ធម្ភាគចក្រ Mil Moscow របស់ប្រទេសរុស្ស៊ី។ ជើងហោះហើរដំបូងរបស់ Mi-26 ត្រូវបានធ្វើឡើងកាលពីខែធ្នូ 1977។ គិតត្រឹមឆ្នាំ 2015 Mil Moscow ផលិត Mi-26 បាន 316 គ្រឿង។
![](https://i0.wp.com/lareine.com.kh/wp-content/uploads/2023/04/lareine.com.kh-2023-04-18_10-34-41_855433.jpg?resize=696%2C392&ssl=1)
ឧទ្ធម្ភាគចក្រនេះអាចដឹកទំនិញបាន 20 តោន បើទោះវាមានទម្ងន់ទទេជិតស្មើនឹង Mi-6។ Mi-26 ដែលផ្ទុកទំនិញពេញអាចហោះបានចម្ងាយ 750 គីឡូម៉ែត្រ។ វាក៏អាចហោះហើរជាបន្តបន្ទាប់ក្នុងល្បឿនពី 240-270 គីឡូម៉ែត្រ/ម៉ោង។ បើមិនមានទំនិញ Mi-26 អាចហោះបានចម្ងាយ 2,350 គីឡូម៉ែត្រ។