មន្ត្រីប៉ូលិសជិះសេះដេញតាមរថយន្ត និងប្រាប់ឱ្យឈប់ បន្ទាប់ពីបានឃើញម្ចាស់រថយន្តបើកបរបណ្ដើរនិយាយទូរស័ព្ទបណ្ដើរ រួចក៏បានពិន័យ និងដកពិន្ទុប័ណ្ណបើកបរ។
កាលពីថ្ងៃទី 16 មីនា ទំព័រ Guardian ដកស្រង់វីដេអូពីទំព័របណ្ដាញសង្គមរបស់ក្រុមប៉ូលិសចរាចរណ៍ Avon និង Somerset (RPU) បង្ហាញថា មន្ត្រីប៉ូលិសពីររូបជិះសេះដេញតាមរថយន្តមួយគ្រឿង ក្រោយពីមើលឃើញថា ម្ចាស់ឡាននិយាយទូរស័ព្ទពេលកំពុងបើកបរ។ RPU ឱ្យដឹងថា វីដេអូនេះត្រូវបានថតដោយកាម៉េរិកដែលបំពាក់លើខ្លួនប៉ូលិស និងកាម៉េរិកសុវត្ថិភាពចរាចរណ៍កាលពីថ្ងៃទី 07 មីនា។
«លោកដឹងហើយថា មិនត្រូវប្រើប្រាស់ទូរស័ព្ទក្នុងពេលបើកបរ» ស្ត្រីជាមន្ត្រីប៉ូលិសល្បាតនិយាយនៅពេលឡានឈប់លើដងផ្លូវមួយនៅក្នុងទីរួមស្រុក Tauton, Somerset។
![](https://i0.wp.com/lareine.com.kh/wp-content/uploads/2023/03/lareine.com.kh-2023-03-17_16-03-22_341926.jpg?resize=696%2C392&ssl=1)
អ្នកបើកបរត្រូវបានប៉ូលិសធ្វើកំណត់ហេតុ និងពិន័យជាប្រាក់ 200 ផោន (242 ដុល្លារអាម៉េរិក) ទន្ទឹមនឹងការដក 6 ពិន្ទុនៅលើប័ណ្ណបើកបរ។ RPU ឱ្យដឹងថា ចាប់ពីដើមឆ្នាំ 2021 មកដល់បច្ចុប្បន្ន តំបន់ Avon និង Somerset មានគ្រោះថ្នាក់ចរាចរណ៍ជាង 4,500 ករណី។
![](https://i0.wp.com/lareine.com.kh/wp-content/uploads/2023/03/lareine.com.kh-2023-03-17_16-03-18_793836.jpg?resize=696%2C1357&ssl=1)
ចាប់ពីខែមីនា 2022 ការប្រើប្រាស់ទូរស័ព្ទចល័ត កុំព្យូទ័រ ឬឧបករណ៍ទាំងឡាយណាដែលអាចផ្ញើ និងទទួលទិន្នន័យ ពេលកំពុងបើកបររថយន្ត ឬម៉ូតូនៅប្រទេសអង់គ្លេស សុទ្ធតែត្រូវបានចាត់ទុកថាខុសច្បាប់។
អ្នកដែលល្មើសនឹងច្បាប់ខាងលើអាចត្រូវបានពិន័យជាប្រាក់ឡើងដល់ 1,000 ផោន ទន្ទឹមនឹងការដក 6 ពិន្ទុ ឬត្រូវដកហូតប័ណ្ណបើកបរ៕