Michelle Yeoh បានក្លាយជាតារាសិល្បៈអាស៊ីដំបូងគេដែលបានឈ្នះពានរង្វាន់តួឯកស្រីឆ្នើមជាងគេនៅក្នុងព្រឹត្តិការណ៍ Oscar 2023។
ពិធីប្រគល់ពានរង្វាន់ Oscar លើកទី 95 ត្រូវបានធ្វើឡើងនាព្រឹកថ្ងៃទី 13 មីនា (ម៉ោងនៅកម្ពុជា) ក្នុងនោះ ខ្សែភាពយន្តរឿង «Everything everywhere all at once» បាននាំមុខគេក្នុងបញ្ជីចំណាត់ថ្នាក់ ដោយមាន 11 បេក្ខភាព។
ដោយការសម្ដែងបានយ៉ាងល្អនៅក្នុងខ្សែភាពយន្តខាងលើ Michelle Yeoh ក៏បានក្លាយជាអ្នកសិល្បដើមកំណើតអាស៊ីដំបូងគេដែលបានឈ្នះពានរង្វាន់ Oscar ស្ដីពីតារាស្រីសម្ដែងជាតួឯកឆ្នើមបំផុត។ Michelle Yeoh បានយកឈ្នះលើ Cate Blanchett នៅក្នុងការដណ្ដើមយកពានរង្វាន់នេះ។
![](https://i0.wp.com/lareine.com.kh/wp-content/uploads/2023/03/lareine.com.kh-2023-03-13_12-15-37_531600.jpg?resize=696%2C435&ssl=1)
នៅលើវេទិកា Michelle Yeoh រំភើបខ្លាំងរហូតដល់ហូរទឹកភ្នែក ពេលទទួលពានរង្វាន់ Oscar 2023 ដ៏មានតម្លៃនេះ។ Michelle Yeoh គឺជាតារាសម្ដែងស្រីអាស៊ីដំបូងគេ និងជាតារាសម្ដែងស្រីសញ្ជាតិម៉ាឡេស៊ីដំបូងគេដែលបានក្លាយជាបេក្ខភាពសម្រាប់តំណែងតួឯកស្រីឆ្នើមជាងគេនៅ Oscar។
![](https://i0.wp.com/lareine.com.kh/wp-content/uploads/2023/03/lareine.com.kh-2023-03-13_12-18-09_830824.jpg?resize=696%2C435&ssl=1)
ក្នុងខ្សែភាពយន្ត «Everthing everywhere all at once» Michelle Yeoh សម្ដែងជាតួអង្គជនអន្តោប្រវេសន៍ចិនមួយរូបឈ្មោះ Evelyn Wang ជាម្ចាស់ហាងបោកអ៊ុតសម្លៀកបំពាក់មួយកន្លែងដែលជួបបញ្ហាច្រើនក្នុងជីវភាព។ ក្នុងរឿងនេះ Ke Huy Quan សម្ដែងជាតួអង្គប្ដីដ៏ល្ងង់ខ្សោយរបស់ Evelyn Wang។ ពួកគេរួមដៃគ្នាអនុវត្តភារកិច្ចសង្គ្រោះ។
![](https://i0.wp.com/lareine.com.kh/wp-content/uploads/2023/03/lareine.com.kh-2023-03-13_12-21-23_485476.jpg?resize=696%2C392&ssl=1)
មុននោះ ដោយសារសម្ដែងជាតួអង្គ Evelyn Wang តារាសម្ដែងជនជាតិម៉ាឡេស៊ីដើមកំណើតចិន Michelle Yeoh ក៏បានឈ្នះពានរង្វាន់តារាសម្ដែងស្រីឆ្នើមបំផុតនៅក្នុងពិធីប្រគល់ពានរង្វាន់របស់សមាគមតារាភាពយន្តអាម៉េរិក (SAG Awards) លើកទី 29 ផងដែរ។
អ្នកស្រី Michelle Yeoh សម្ដែងជាតួអង្គ Evelyn Wang ក្នុងភាពយន្តរឿង «Everthing everywhere all at once»
Michelle Yeoh កើតឆ្នាំ 1962 បានឈានជើងចូលក្នុងវិស័យសិល្បៈ បន្ទាប់ពីបានគ្រងមកុដបវរកញ្ញាឯកម៉ាឡេស៊ីឆ្នាំ 1983។ អ្នកស្រីធ្លាប់ចូលរួមសម្ដែងក្នុងខ្សែភាពយន្តល្បីៗរាប់សិបរឿង មានជាអាទិ៍ Police Story 3: Supercop, Holy Weapon, Yes, Madam ។ល។ អ្នកស្រី Michelle Yeoh ក៏នឹងមានវត្តមាននៅក្នុងរឿង Avatar 3, Avatar 4, Avatar 5។ល។
Michelle Yeoh ក្នុងរឿង «Tomorrow never dies»
Michelle Yeoh ចាប់ផ្ដើមល្បីឈ្មោះនៅសហរដ្ឋអាម៉េរិក បន្ទាប់ពីបានសម្ដែងជាតួអង្គ «Bond girl» ជាគូនឹង James Bond របស់ Pierce Brosnan ក្នុងរឿង «Tomorrow never dies» កាលពីឆ្នាំ 1997។ ខ្សែភាពយន្តបន្តបន្ទាប់មកទៀតក៏បានជួយឱ្យ Michelle Yeoh ល្បីឈ្មោះទូទាំងពិភពលោក។ អ្នកស្រីទទួលបានការគាំទ្រច្រើនក៏ព្រោះតែសមត្ថភាពក្នុងការប្រើប្រាស់ក្បាច់គុន៕