គ្រូបង្វឹក Mano Polking មិនចង់ឃើញកីឡាករក្រុមជម្រើសជាតិរបស់ ថៃ ភ្លេចខ្លួនព្រោះតែត្រូវបានវាយតម្លៃខ្ពស់ជាងក្រុមរបស់ កម្ពុជា នៅពេលប៉ះគ្នាក្នុងជុំចុងក្រោយនៃពូល A នៅ AFF Cup 2022 នាព្រលប់នេះ។
ក្រុមជម្រើសជាតិថៃ បច្ចុប្បន្ន នាំមុខគេនៅ ពូល A ដោយមាន 7 ពិន្ទុ ក្រោយទាត់បាន 3 ប្រកួត ស្មើនឹង ឥណ្ឌូណេស៊ី ប៉ុន្តែត្រូវនៅពីលើ ដោយសារគ្រាប់បាល់ចំណេញ (goal difference) របស់ ថៃ +9 ចំណែក ឥណ្ឌូណេស៊ី +8។ នៅជុំចុងក្រោយដែលត្រូវប្រកួតនៅម៉ោង 19 និង 30 នាទីថ្ងៃនេះ កម្ពុជា ដែលជាក្រុមនៅ មានឱកាសឡើងទៅវគ្គពាក់កណ្ដាលផ្ដាច់ព្រ័ត្រ ដោយឈរលំដាប់ទី 3 និងមាន 6 ពិន្ទុ នឹងត្រូវធ្វើជាភ្ញៀវនៅទីលានរបស់ថៃ។
«គ្រប់គ្នាគិតថា យើងនឹងយកឈ្នះលើ កម្ពុជា ប៉ុន្តែ ថៃ មិនត្រូវធ្វេសប្រហែសឡើយ។ កម្ពុជា កំពុងលេងបានល្អពីមួយថ្ងៃទៅមួយថ្ងៃ ក្រោមការដឹកនាំរបស់ Keisuke Honda» គ្រូបង្វឹករបស់ ថៃ Polking ថ្លែងដូច្នេះ។
លោក Polking បន្តថា ក្រុមកីឡាករថៃ មានប្រៀបដោយសារជាម្ចាស់ផ្ទះ ហើយកីឡាករមានភាពជឿជាក់ និងត្រៀមយកឈ្នះលើ កម្ពុជា។
នៅក្នុងម៉ោងដូចគ្នានេះដែរ ឥណ្ឌូណេស៊ី នឹងធ្វើជាភ្ញៀវរបស់ ហ្វ៊ីលីពីន។ ក្រុមដែលដណ្ដើមបានតំណែងកំពូលតារាងទំនងជានឹងអាចគេចបានពីការប្រកួតនឹង វៀតណាម នៅវគ្គពាក់កណ្ដាលផ្ដាច់ព្រ័ត្រ៕
