គិតត្រឹមថ្ងៃទី ២៥ ខែកក្កដា ឆ្នាំ ២០២២ គម្រោងសាងសង់ផ្លូវក្រវាត់ក្រុងខ្សែទី៣ (ផ្លូវជាតិលេខ ៤ – ផ្លូវជាតិលេខ ១) ដែលមានប្រវែងសរុបជិត ៥៣ គីឡូម៉ែត្រ សម្រេចបាន ៧៦,៨៧% និងគ្រោងបញ្ចប់នៅដើមខែកញ្ញាខាងមុខ។
ក្នុងចំណោមសមិទ្ធផលថ្មីដែលសម្រេចបានខាងលើ ការងារផ្លូវសម្រេចបាន ៧២,៤៦%, ការងារស្ពានរំលង (Flyover) សម្រេចបាន ៦៩,៩០% និងការងារស្ពានសម្រេចបាន ៩៥,៩៨%។ នេះបើតាម របាយការណ៍វឌ្ឍនភាពការងាររបស់អង្គភាពអនុវត្តគម្រោង (PIU) សម្រាប់ផ្លូវក្រវាត់ក្រុងខ្សែទី។
ចាប់ផ្តើមពីផ្លូវជាតិលេខ៤ ត្រង់ចំណុចគីឡូម៉ែត្រលេខ១៤+១០៥ ស្ថិតក្នុងភូមិជម្ពូវ័ន្ត សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ផ្លូវក្រវាត់ក្រុងមួយខ្សែនេះភ្ជាប់ទៅកាន់ផ្លូវទំនប់កប់ស្រូវ ផ្លូវជាតិលេខ៥ ស្ពានឈ្នះឈ្នះ មហាវិថីឈ្នះឈ្នះ និងផ្លូវជាតិលេខ។
គម្រោងផ្លូវក្រវាត់ក្រុងខ្សែទី៣ នឹងក្លាយទៅជាផ្លូវក្រវាត់ក្រុងដ៏ធំ និងទំនើបថ្មីមួយសម្រាប់បម្រើឱ្យវិស័យដឹកជញ្ជូនរវាង រាជធានីភ្នំពេញ តភ្ជាប់ទៅកាន់ផ្លូវជាតិលេខ៦ លេខ៥ លេខ៤ លេខ៣ លេខ២ និងផ្លូវជាតិលេខ២១ ដោយឆ្លងកាត់ទន្លេបាសាក់ និងកោះអន្លង់ចិន មកបញ្ចប់ត្រឹមផ្លូវជាតិលេខ១ ត្រង់ចំណុចគីឡូម៉ែត្រលេខ ២៤+៨៤០ ស្ថិតក្នុងភូមិស្តៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្តាល (ផ្លូវមេ)។
ជាងនេះ ផ្លូវក្រវាត់ក្រុងខ្សែទី៣ ក៏ភ្ជាប់ទៅចំណតផែកុងតឺន័រថ្មី របស់កំពង់ផែស្វ័យតភ្នំពេញ នៅក្នុងស្រុកកៀនស្វាយ ក៏ដូចជាបំពេញឱ្យការតភ្ជាប់ផ្លូវអាស៊ានហាយវ៉េយ (AH1 និងAH11) និងផ្លូវរបៀងសំខាន់ៗនៃមហាអនុតំបន់មេគង្គ។
គម្រោងផ្លូវក្រវាត់ក្រុងខ្សែទី៣ ដែលត្រូវបានបើកការដ្ឋានសាងសង់កាលពីខែមករា ២០១៩ អនុវត្តការងារសាងសង់ដោយក្រុមហ៊ុនចិន Shanghai Construction Group Co., Ltd. ក្នុងតម្លៃ ២៦៧.៦៧ លានដុល្លារអាមេរិក និងត្រួតពិនិត្យគម្រោងដោយក្រុមហ៊ុនចិន Guangzhou Wanan Construction Supervision Co., Ltd. ក្នុងតម្លៃ ៥.៣៨ លានដុល្លារសហរដ្ឋអាមេរិក ក្រោមហិរញ្ញប្បទានសម្បទានពីរដ្ឋាភិបាលនៃសាធារណរដ្ឋប្រជាមានិតចិន និងថវិកាបដិភាគរបស់រាជរដ្ឋាភិបាលកម្ពុជា៕
