យុវជនភាគច្រើននាពេលបច្ចុប្បន្នចាប់ផ្តើមចាប់អារម្មណ៍ខ្លាំងលើសហគ្រិនភាព តែអ្វីដែលជាកត្តាប្រឈមនោះ គឺអាជីវកម្មដែលជារបស់យុវវ័យនាពេលថ្មីៗនេះមានការបើក-បិទមិនសូវជាប្រាកដប្រជាឡើយ រហូតដល់ពេលខ្លះអាចធ្វើឱ្យពួកគេបាក់ស្បាត ឬលែងចង់ធ្វើអាជីវកម្មទៀតផងក៏មាន។
ពាក់ព័ន្ធជាមួយនឹងបញ្ហានេះ លោក ឃន ឈុនដារ៉ា ម្ចាស់ហាងកាហ្វេ KOI និង Tube Café បានលើកឡើងថា យុវវ័យមួយចំនួនមិនសូវមានការតស៊ូ ឬមានបញ្ហាបរាជ័យដោយសារតែពួកគេមិនសូវស្គាល់ពីភាពពិតជាក់ស្តែងនៃការរស់នៅ និងការធ្វើអាជីវកម្ម។ លោកថា សិស្ស និស្សិត នៅក្នុងសាលាគឺគេតែងតែជំរុញលើកទឹកចិត្ត និងប្រើភាសាជំរុញទឹកចិត្តច្រើន ដែលធ្វើឱ្យគាត់គិតថា ការធ្វើអាជីវកម្មមានភាពងាយស្រួល ចំណុចនេះហើយដែលអាចធ្វើឱ្យពួកគេងាយនឹងបើកអាជីវកម្ម ឬធ្វើការរកស៊ីអ្វីមួយ។
លោក ឃន ឈុនដារ៉ា បាននិយាយថា៖ «នៅពេលដែលសិស្សធ្វើខុស ឬមិនទាន់បានទទួលពិន្ទុល្អ យើងតែងតែលើកទឹកចិត្តឱ្យគាត់ខំប្រឹង ឬមិនអីទេ ខុសហើយអាចខំឡើងវិញបាន តែក្នុងជីវិតជាក់ស្តែងវាមិនមែនងាយបែបហ្នឹងទេ។ នៅពេលដែលយើងធ្វើការងារ ឬអាជីវកម្ម បើយើងធ្វើខុស បរាជ័យ ឬមានបញ្ហាធ្ងន់ធ្ងរណាមួយ យើងត្រូវតែប្រឈមមុខដោះស្រាយវាដោយខ្លួនឯង»។
សហគ្រិនវ័យក្មេងខាងលើបានលើកឡើងផងដែរថា ការតស៊ូជារឿងចាំបាច់បំផុត ព្រោះអាជីវកម្មមួយអាចកើតឡើងដោយរលូនទៅបាន លុះត្រាតែម្ចាស់អាជីវកម្មនោះត្រូវឆ្លងកាត់ដំណាក់កាលលំបាកៗ និងឧបសគ្គជាច្រើន ហើយមានពេលខ្លះ បញ្ហាអាចនឹងកើតឡើងភ្លាមៗហួសពីការនឹកស្មានទៀតផង។ ផ្ទុយពីនេះ ដោយសារតែយុវជនមានគំនិតចង់ធ្វើអ្វីស្រួលៗពេក ឬមើលឃើញច្រើនតែពីផលចំណេញ ក៏ដូចជាលទ្ធផលល្អភ្លាមៗ ទើបអាចធ្វើឱ្យពួកគាត់ងាយនឹងប្រថុយប្រថានក្នុងការបង្កើតអាជីវកម្ម ដែលពេលជួបបញ្ហាជាក់ស្តែង ពួកគាត់ងាយនឹងបោះបង់វាចោល ដែលធ្វើឱ្យគាត់ខាតបង់ច្រើន។
លោក ឈុនដារ៉ា បញ្ចាក់ផងដែរថា ការធ្វើការងារក៏អាចជាកត្តាសំខាន់មួយក្នុងការលត់ដំខ្លួនឯងឱ្យមានការតស៊ូ ព្រោះពិភពការងារជាក់ស្តែង អាចធ្វើឱ្យយើងរៀនសូត្របានច្រើន ហើយមានឱកាសហ្វឹកហាត់ខ្លួនឯងនៅក្នុងបញ្ហាប្រឈមជាច្រើនដែលទាមទារឱ្យយើងត្រូវចេះតស៊ូ រហូតទទួលបានជោគជ័យ៕
