ក្រុមហ៊ុន Berkshire Hathaway របស់មហាសេដ្ឋីអាម៉េរិក Warren Buffett បានទិញភាគហ៊ុនយ៉ាងច្រើននៅក្នុងក្រុមហ៊ុនប្រេងឥន្ធនៈ នៅពេលដែលតម្លៃប្រេងពិភពលោកកំពុងកើនឡើងខ្ពស់ជាបន្តបន្ទាប់។
Berkshire Hathaway បានចំណាយប្រាក់ប្រហែល ៥២៩ លានដុល្លារ ដើម្បីទិញភាគហ៊ុនជិត ៩.៦ លានហ៊ុនរបស់ក្រុមហ៊ុនប្រេង Occidental Petroleum កាលពីសប្ដាហ៍កន្លង។ ក្រោយការទិញភាគហ៊ុននេះ Berkshire Hathaway បច្ចុប្បន្នកាន់កាប់ភាគហ៊ុន ១៦.៣% និងក្លាយជាភាគហ៊ុនិកធំជាងគេបង្អស់របស់ Occidental Petroleum។
Occidental Petroleum គឺជាក្រុមហ៊ុនដែលមានភាគហ៊ុនមានវិវត្តន៍ល្អបំផុតនៅក្នុងសន្ទស្សន៍ S&P 500 ក្នុងឆ្នាំនេះ ដោយកើន ៩២% ព្រោះតែតម្លៃប្រេងឆៅកើនឡើងខ្ពស់ខ្លាំង។ Berkshire Hathaway ក៏កំពុងកាន់កាប់ភាគហ៊ុនតម្លៃ ១០ ពាន់លានដុល្លារជាប្រភេទអនុគ្រោះរបស់ Occidental Petroleum ផងដែរ ដោយសារតែ Berkshire Hathaway ធ្លាប់បានផ្ដល់ប្រាក់កម្ចីដល់ Occidental Petroleum ក្នុងការទិញយកក្រុមហ៊ុន Anadarko Petroleum កាលពីឆ្នាំ ២០១៩។
នេះមិនមែនជាក្រុមហ៊ុនប្រេងឥន្ធនៈតែមួយគត់ដែល Berkshire Hathaway ចូលចិត្តនោះទេ។ Chevron ក៏ជាក្រុមហ៊ុនដែលមហាសេដ្ឋី Warren Buffett និងក្រុមវិនិយោគរបស់គាត់ចូលចិត្តខ្លាំងផងដែរ។ Berkshire Hathaway កំពុងកាន់កាប់ភាគហ៊ុនជិត ២៦ ពាន់លានដុល្លារនៅក្នុងក្រុមហ៊ុន Chevron។ កាលពីចុងត្រីមាសទី ១ ឆ្នាំ ២០២២ តួលេខនេះឈរលំដាប់ទី ៤ ធៀបនឹងបណ្ដាភាគហ៊ុនដែល Berkshire កំពុងកាន់កាប់នៅក្នុងក្រុមហ៊ុន Apple, Bank of America និង American Express។
ប្រេងធម្មជាតិ និងថាមពលក៏ជាវិស័យ និងជាផ្នែកដ៏សំខាន់នៅក្នុងមុខជំនួញរបស់ក្រុមហ៊ុន Berkshire Hathaway។ Berkshire Hathaway ក៏មានក្រុមហ៊ុនបុត្រសម្ព័ន្ធចំនួន ២ ដែលកំពុងរកស៊ីក្នុងវិស័យនេះ នោះគឺ PacifiCorp និង MidAmerican។
លោក Warren Buffett បានឱ្យដឹងថា ក្នុងរយៈពេលប៉ុន្មានឆ្នាំមកនេះ ក្រុមអ្នកវិនិយោគជាច្រើនបានផ្ដោតទៅលើតែបណ្ដា «ភាគហ៊ុនល្អមើល តែមិនល្អស៊ី» ធ្វើឱ្យទីផ្សារពេលខ្លះដូចទៅនឹងបនល្បែង។ ដូច្នេះ Berkshire Hathaway សម្រេចចិត្តវិនិយោគយ៉ាងឆាប់រហ័សទៅលើ «ក្រុមហ៊ុនមួយដែលមានវត្តមានរាប់ទសវត្សរ៍»។ ទាំង Occidental Petroleum ទាំង Chevron សុទ្ធតែមានប្រវត្តិ «កកើត» និងរីកចម្រើនរាប់ទសវត្សរ៍មកហើយ៕
