![Zhang Zetian](https://lareine.com.kh/wp-content/uploads/2022/06/lareine.com.kh-2022-06-20_16-11-34_797833-696x392.jpg)
«ក្នុងចំណោមសញ្ញាទាំងឡាយខាងក្រោម តើលោក អ្នកមានប៉ុន្មានប្រការ?»
១-មនុស្សម្នាក់ដែលមានរូបកាយទាក់ទាញ
សាស្ត្រាចារ្យផ្នែកសេដ្ឋកិច្ចមួយរូបនៅសាកលវិទ្យាល័យ Texas បានរកឃើញថា អ្នកដែលមានរូបរាងទាក់ទាញ ភាគច្រើនមានសមត្ថភាពរកប្រាក់បានច្រើនជាងពី ៣% ទៅ ៤% ធៀបនឹងមនុស្សដែលមានរូបរាងទាក់ទាញក្រោមកម្រិតមធ្យម។
២-មានឈាមជាអ្នករកស៊ីតាំងពីតូច
សេដ្ឋី និងមហាសេដ្ឋីដែលរកស៊ីមានបានពីបាតដៃទទេភាគច្រើននៅលើពិភពលោក សុទ្ធតែមានចំណុចរួមដ៏ពេញនិយមមួយនោះគឺ ចាប់ផ្ដើមរកប្រាក់តាំងតែពីតូច ក្នុងនោះមានទាំង Warren Buffett និង Mark Cuban ជាដើម។
៣-មានទំនាក់ទំនងទូលំទូលាយ
ការស្រាវជ្រាវមួយបង្ហាញថា បើសិនមានមិត្តភក្ដិច្រើននៅពេលរៀននៅសាលាមធ្យមសិក្សា មហាវិទ្យាល័យ និងនៅកន្លែងធ្វើការ ឬដៃគូសហការកន្លែងធ្វើការ បុគ្គលនោះនឹងរកបានប្រាក់ច្រើននាពេលអនាគត ដោយសារតែឱកាសដែលរកបានពីទំនាក់ទំនងខាងលើ។
![](https://i0.wp.com/www.lareine.com.kh/wp-content/uploads/2022/06/lareine.com.kh-2022-06-20_16-18-37_953960.jpg?resize=696%2C464&ssl=1)
៤-សេពគប់អ្នកដែលពូកែជាងខ្លួន
បើសិនចំណាយពេលច្រើនទៅលើមនុស្សដែលនាំមកនូវថាមពលអវិជ្ជមាន ឬមិនមានគោលដៅឆ្ពោះទៅមុខ នោះអ្នកនឹងមិនអាចរីកចម្រើន តែថែមទាំងដើរថយក្រោយទៀតផង។ ប៉ុន្តែ បើសេពគប់បុគ្គលដែលមានចំណេះដឹង និងមនុស្សដែលពូកែជាងខ្លួន នោះយើងនឹងជោគជ័យ ដោយសារតែបានរៀនសូត្រនូវបទពិសោធន៍ដ៏មានតម្លៃពីពួកគេ។
៥-ចេះផឹកស្រាបៀ ប៉ុន្តែមិនជក់បារី
យោងតាមការសិក្សាស្រាវជ្រាវមួយកាលពីឆ្នាំ ២០០៦ បុរសដែលចេះផឹកស្រាបៀ អាចរកប្រាក់បានច្រើនជាង ២១% ធៀបនឹងបុគ្គលដែលតមស្រា។ មូលហេតុគឺដោយសារថា វាអាចជួយបង្កើនទំនាក់ទំនងក្នុងសង្គម។ ការស្រាវជ្រាវមួយផ្សេងទៀតនិយាយថា អ្នកដែលមិនជក់បារី តែងតែមានទ្រព្យច្រើនជាង ៥០% ធៀបនឹងអ្នកដែលជក់បារីតិចតួច និងច្រើនជាងទ្វេដង ធៀបនឹងអ្នកញៀននឹងថ្នាំជក់។
![](https://i0.wp.com/www.lareine.com.kh/wp-content/uploads/2022/06/lareine.com.kh-2022-06-20_16-20-37_151214.jpg?resize=696%2C463&ssl=1)
៦-មិនធ្លាប់ ឬមិនទាន់មានការលែងលះ
ការសិក្សាស្រាវជ្រាវមួយបានឱ្យដឹងថា ការលែងលះអាចធ្វើឱ្យទ្រព្យសម្បត្តិរបស់មនុស្សម្នាក់ថយចុះប្រហែល ៧៧% ធៀបនឹងបុគ្គលដែលនៅលីវ។ ចំណែកការរៀបការវិញ អាចមានលទ្ធភាពបង្កើនទ្រព្យឡើងច្រើនទ្វេដង។
៧-តែងតែប្រឹងប្រែងដើម្បីរីកចម្រើន
សេដ្ឋី និងមហាសេដ្ឋីដែលរកស៊ីមានបានពីបាតដៃទទេជាច្រើនរូប បានឱ្យដឹងថា ពួកគាត់គឺជាប្រភេទមនុស្សដែលមិនចេះពេញចិត្តនឹងលទ្ធផលដែលខ្លួនធ្វើបាន។ ជំនួសឱ្យការត្រេកអរនៅពេលរកបាន ១ លានដុល្លារ ពួកគាត់បែរជារកវិធីដើម្បីរកឱ្យបានច្រើនជាងនេះ។
៨-កំណត់គោលដៅច្បាស់លាស់
ការរកប្រាក់បានរាប់លាន ឬរាប់ពាន់ដុល្លារ មិនមែនជារឿងចៃដន់ឡើយ។ អ្នកមានតែងតែចំណាយពេលច្រើនដើម្បីរិះគិតដើម្បីកំណត់គោលដៅយូរអង្វែង ជាក់លាក់របស់ពួកគេ សម្រាប់អនុវត្តតាម។
![](https://i0.wp.com/www.lareine.com.kh/wp-content/uploads/2022/06/lareine.com.kh-2022-06-20_16-23-37_430764.webp?resize=696%2C464&ssl=1)
៩-មិនខ្លាចបរាជ័យ
បុគ្គលជោគជ័យគឺជាមនុស្សដែលធ្លាប់បានឆ្លងកាត់ការបដិសេធ ភាពបរាជ័យ និងភាពភ័យព្រួយ មុននឹងបានជោគជ័យ។ ដូច្នេះ ប្រការដែលពួកគេយកចិត្តទុកដាក់បំផុតគឺ ការដាក់ថាមពលទៅក្នុងបច្ចុប្បន្នកាល និងអនាគតកាល៕