ប្រទេសចិន បានសាងសង់មូលដ្ឋានស្រាវជ្រាវមួយដែលធ្វើត្រាប់តាមស្ថានភាពទំនាញទាបនៅលើឋានព្រះចន្ទ ដោយយោងទៅតាមការពិសោធ «កង្កែបហោះ» ដោយសារមេដែករបស់អ្នកវិទ្យាសាស្ត្រជនជាតិរុស្ស៊ី។
យោងតាមអ្នកវិទ្យាសាស្ត្រដែលបានចូលរួមអនុវត្តគម្រោងនេះ មូលដ្ឋានព្រះចន្ទសិប្បនិម្មិតរបស់ ចិន នឹងផ្ដល់អត្ថប្រយោជន៍ដល់ការស្រាវជ្រាវឋានព្រះចន្ទពិត។ ស្ថិតនៅភាគខាងកើតនៃទីក្រុង Xuzhou ក្នុងខេត្ត Jiangsu ប្រព័ន្ធធ្វើត្រាប់តាមព្រះចន្ទនេះ គ្រោងនឹងបង្ហាញខ្លួននៅប៉ុន្មានខែខាងមុខ។
អ្នកវិទ្យាសាស្ត្រ Li Ruilin មកពីសាកលវិទ្យាល័យអណ្ដូងរ៉ែ និងបច្ចេកវិទ្យាចិន បានឱ្យដឹងថា ប្រព័ន្ធត្រាប់តាមព្រះចន្ទរបស់ពួកគេគឺជាផលិតផលដំបូងក្នុងពិភពលោក ហើយថា នឹងអភិវឌ្ឍបច្ចេកវិទ្យានេះថែមមួយកម្រិតទៀត។
ក្នុងកិច្ចសម្ភាសជាមួយសារព័ត៌មាន SCMP កាលពីថ្ងៃទី ១១ មករា លោក Li Ruilin បានថ្លែងថា ប្រព័ន្ធត្រាប់តាមព្រះចន្ទនេះអាចធ្វើឱ្យទំនាញបាត់បង់។ ស្ថានភាពទម្ងន់អាចឈានដល់កម្រិតទាប នៅពេលយន្តហោះកំពុងធ្លាក់ ប៉ុន្តែ វាកើតឡើងក្នុងរយៈពេលខ្លី។ ដោយឡែក ចំពោះប្រព័ន្ធត្រាប់តាមថ្មីរបស់ ចិន នេះវិញ បាតុភូតនេះអាចត្រូវបានអូសបន្លាយពេលតាមចិត្តចង់។
នៅក្នុងស្នូលកណ្ដាលរបស់ប្រព័ន្ធថ្មីរបស់ ចិន គឺជាលំហមួយដែលផ្ទុក «ព្រះចន្ទ» តូចមួយ មានអង្កត់ផ្ចិត ៦០ សម។ ស្រទាប់របស់ព្រះចន្ទសិប្បនិម្មិតនេះ ត្រូវបានធ្វើអំពីថ្ម និងធូលីស្រាល ដូចទៅនឹងព្រះចន្ទពិត។ ទំនាញនៅលើឋានព្រះចន្ទ ស្មើនឹង ១/៦ នៃទំនាញលើផែនដី មួយផ្នែកគឺដោយសារដែនម៉ាញេទិក។
នៅពេលដែនម៉ាញេទិកខ្លាំងគ្រប់គ្រាន់ វានឹងរុញច្រានគ្រប់យ៉ាង (ចាប់ពីកង្កែបរស់ រហូតដល់គ្រាប់ធញ្ញជាតិ) ឱ្យប្រឆាំងនឹងដែនទំនាញ។ លោក Li ឱ្យដឹងថា គំនិតនេះយកតម្រាប់តាមការពិសោធនានារបស់អ្នកវិទ្យាសាស្ត្រជនជាតិរុស្ស៊ី Andre Geim ដែលបានធ្វើឱ្យកង្កែប «អណ្ដែត» ដោយប្រើប្រាស់មេដែក។ ការពិសោធខាងលើបានជួយឱ្យលោក Geim ទទួលបានពានរង្វាន់ Nobel កាលពីឆ្នាំ ២០០០។
លោក Li ឱ្យដឹងថា មូលដ្ឋាននៃប្រព័ន្ធត្រាប់តាមព្រះចន្ទរបស់ ប្រទេសចិន នឹងបើកទ្វារទទួលអ្នកវិទ្យាសាស្ត្រមកពីគ្រប់ទិសទីក្នុងពិភពលោក នាពេលដ៏ខ្លីខាងមុខ៕
