ថ្ងៃទី26 ខែឧសភាកន្លងទៅ Jeff Bezos ដែលជាមហាសេដ្ឋីលំដាប់លេខមួយរបស់ពិភពលោក បានប្រកាសលាលែងពីតំណែងនាយកប្រតិបត្តិ (CEO) នៃក្រុមហ៊ុន Amazon ចាប់ពីដើមខែកក្កដាឆ្នាំ2021នេះ។
សារព័ត៌មាន Texas Times ដកស្រង់សេចក្ដីថ្លែងការណ៍របស់មហាសេដ្ឋីអាមេរិក Jeff Bezos នៅក្នុងកិច្ចប្រជុំក្រុមប្រឹក្សាភាគហ៊ុនិកប្រចាំឆ្នាំរបស់ក្រុមហ៊ុន Amazon កាលពីថ្ងៃទី26 ខែឧសភា បានឱ្យដឹងថា លោកនឹងដកខ្លួនចេញពីតួនាទីជា CEO របស់ Amazon ចាប់ពីថ្ងៃទី5 ខែកក្កដាខាងមុខ។
![](https://i0.wp.com/www.lareine.com.kh/wp-content/uploads/2021/05/Andy-Jassy.jpg?resize=696%2C522&ssl=1)
អ្នកដែលនឹងចូលមកកាន់តំណែងនេះជំនួសលោក នោះគឺនាយកប្រតិបត្តិរបស់ក្រុមហ៊ុនបុត្រសម្ព័ន្ធ Amazon Web Services ឈ្មោះ Andy Jassy។
បើទោះជាលាលែងពីតំណែង CEO ប៉ុន្តែ មហាសេដ្ឋីដែលមានទ្រព្យចំនួន 190ពាន់លានដុល្លារនេះ នឹងនៅតែកាន់កាប់តំណែងប្រធានប្រតិបត្តិនៃក្រុមប្រឹក្សាភិបាលរបស់ក្រុមហ៊ុន Amazon ដដែល៕
ប្រភព៖ Texas Times, Bloomberg
ប្រែសម្រួល៖ បុត្រា