នៅពេលដែលសម្ព័ន្ធភាពរវាងមនុស្ស 2នាក់ ឈានផុតពាក្យថា មិត្តភាព និងក្លាយមកជាមនុស្សពិសេស សម្រាប់គ្នាទៅវិញទៅមកហើយនោះ វាប្រាកដណាស់ថា ទាំងពាក្យសម្ដី និងទង្វើ ពិតជាខុសប្លែកទៅតាមនោះដែរមិនខាន។ ជាពិសេសអាការប្រចែប្រចណ្ឌ ហួងហែងគូស្នេហ៍ ដែលមិនថាអ្នកណា ក៏ធ្លាប់កើតមានអារម្មណ៍នេះដែរ នៅពេលមានអ្នកផ្សេង ចូលមកពាក់ព័ន្ធជាមួយគូស្នេហ៍របស់ខ្លួន។ បើជាការប្រចណ្ឌ ហួងហែងយ៉ាងមានព្រំដែន ក៏ល្មមអាចទទួលយកបាន តែបើសនជាសម្តែងអាការប្រចែប្រចណ្ឌគូស្នេហ៍ ខ្លាំងជ្រុលហួសហេតុពេកនោះ វាច្បាស់ជាមានបញ្ហាកើតឡើងមិនខាន ដូច្នេះជាដំបូងនេះ អ្នកគួររៀនយល់ដឹងពីវិធីទប់ទល់នឹងចិត្តខ្លួនឯង នៅពេលណា ដែលខ្លួនចាប់ផ្តើមមានអារម្មណ៍ប្រចណ្ឌគូស្នេហ៍ជ្រុលពេក ជាមុនសិន ល្អជាង…។
-ប្រឹក្សាគ្នា និងនិយាយគ្នាយ៉ាងត្រង់ទៅត្រង់មក
វាជារឿងធម្មតាទេ ដែលអ្នកមានអារម្មណ៍ហួងហែង ប្រចណ្ឌនឹងគូស្នេហ៍ នៅពេលមើលឃើញថា សម្ព័ន្ធភាពស្នេហ៍របស់អ្នក មានអ្នកផ្សេងចូលមកពាក់ព័ន្ធ តែអារម្មណ៍នេះ អាចចាត់ការបានយ៉ាងងាយ ដោយគ្រាន់តែយើងប្រឹក្សាគ្នា និងជជែកគ្នាជាមួយគូស្នេហ៍របស់ខ្លួន យ៉ាងត្រង់ទៅត្រង់មកប៉ុណ្ណោះ។ ព្រោះវិធីនេះ គឺជាវិធីដែលជួយឱ្យគេ (ស្វាមី)បានយល់ពីមូលហេតុដែលថា តើអ្នកប្រចណ្ឌរូបគេ ដោយសាររឿងអ្វី? និងតើខ្លួនគេគួរតែចាត់ការ ចំពោះហេតុការណ៍នេះ យ៉ាងម៉េចតទៅទៀត?។ ខណ:ពេលជាមួយគ្នា វាក៏ជាវិធីដែលធ្វើឱ្យអ្នក បានយល់ពីចិត្តរបស់គេ កាន់តែច្រើនឡើងដែរ។
-មិនគួរគិតច្រើនតែម្នាក់ឯងពេកទេ
មានច្រើនលើកណាស់ ដែលគេសង្កេតឃើញថា អាការហួងហែង ប្រចណ្ឌគូស្នេហ៍នេះ កើតឡើងដោយសារតែការគិតច្រើនតែឯង ដោយការនាំយកហេតុការណ៍ផ្សេងៗនោះ មកតភ្ជាប់គ្នា រហូតក្លាយជារឿងរ៉ាវ ទាំងខ្លួនឯងនៅមិនទាន់ដឹងពីការពិតសូម្បីតែបន្តិចផងនៅឡើយ។ ការពិតទៅការគិតច្រើនតែម្នាក់ឯង គឺជាអារម្មណ៍ប្រក្រតីរបស់មនុស្សស្រីទូទៅ គ្រាន់តែនៅពេលដែលវាកើតឡើងហើយ អ្នកគួរតែកម្ចាត់គំនិតទាំងអស់នោះចោល ហើយបែរមកចាប់អារម្មណ៍ពីវិធីការ ដែលនឹងធ្វើឱ្យស្នេហារបស់អ្នកទាំង2 ល្អប្រសើរឡើងវិញ ទើបវាប្រសើរជាង។
-មិនគួរសង្ស័យលើគូស្នេហ៍
អារម្មណ៍ប្រចែប្រចណ្ឌ ច្រើនតែកើតឡើង នៅពេលមានអ្នកដទៃ ព្យាយាមចូលមកស្និទ្ធស្នាល ជាមួយគូស្នេហ៍របស់ខ្លួន ដែលវាក៏មិនមែនជារឿងចម្លែកអ្វីដែរ បើសិនជាអ្នកកើតក្តីសង្ស័យថា តើពួកគេ 2នាក់នោះ មានអារម្មណ៍អ្វីពិសេសរវាងគ្នា ឬក៏អត់នោះ តែវាប្រហែលជារឹតតែល្អជាងទៅទៀត បើសឹនជាអ្នកបញ្ឈប់ការសង្ស័យលើទង្វើនេះ ហើយសាកសួរនាំរឿងរ៉ាវទាំងនោះ អំពីគូស្នេហ៍របស់អ្នក ដោយត្រង់ៗវិញនោះ។
-ជឿជាក់លើខ្លួនឯង
ចាប់ផ្តើមដោយការនិយាយជាមួយខ្លួនឯង និងប្រាប់ខ្លួនឯងថា ការប្រចែប្រចណ្ឌ វាគ្រាន់តែជាអារម្មណ៍មួយ ដែលគួរតែលុបវាចោលទៅ និងមិនគួរឱ្យមានអារម្មណ៍បែបនេះ កើតមានឡើងទៀតឡើយ។ វិធីនេះ ក្រៅពីជួយឱ្យអ្នកមានអារម្មណ៍ជឿជាក់លើខ្លួនឯងថា ខ្លួនអ្នកមានតម្លៃចំពោះសេចក្តីស្នេហា ដែលគេ (ស្វាមី)ប្រគល់ឱ្យហើយនោះ នៅជួយឱ្យសម្ព័ន្ធភាពស្នេហ៍របស់អ្នកមានភាពរឹងមាំស្ថិតស្ថេរ និងផ្អែមល្ហែមឡើងទៀតផង។
-បញ្ឈប់អារម្មណ៍ប្រចណ្ឌហួងហែង
ក្រៅពីនេះ អារម្មណ៍ប្រចណ្ឌ ថែមទាំងនាំមកនូវទង្វើ និងពាក្យសម្ដីក្រេវក្រោធ ដែលចេញមកពីអារម្មណ៍ដែលពេញដោយទោស: និងកំហឹង និងមានជាច្រើនដងណាស់ ដែលវានឹងដឹកនាំយើង ឆ្ពោះទៅរកការឈ្លោះទាស់ទែងគ្នា។ ដូច្នេះ បើសិនជាអាចទៅរួច គួរបញ្ឈប់អារម្មណ៍នេះ តាំងពីដើមទីតែម្ដង ទើបជាការប្រសើរ។
ឡារ៉ែន ជឿថា មានមនុស្សចំនួនមិនតិចទេ ដែលមានអារម្មណ៍សប្បាយចិត្ត នៅពេលដែលបានដឹងថា គូស្នេហ៍មានអារម្មណ៍ប្រចណ្ឌ ហួងហែងចំពោះខ្លួនយើង ព្រោះវាជាការសម្តែងឱ្យដឹងថា គេនៅតែស្រឡាញ់យើងជានិច្ច តែអ្វីៗទាំងអស់នេះ ទាំងការគិត ទាំងទង្វើ និងពាក្យសម្ដី គួរតែស្ថិតក្នុងរង្វង់នៃភាពសមល្មម មិនសម្តែងអាការហួងហែង ប្រចណ្ឌជ្រុលហួសហេតុពេក រហូតធ្វើឱ្យគូស្នេហ៍មានអារម្មណ៍ថា ដូចជាកំពុងរងសម្ពាធ ឬសាងនូវភាពទើសទាល់ ធុញទ្រាន់ដល់រូបគេ រហូតដល់ក្លាយជារឿងរ៉ាវធំដុំ លែងអាចដោះស្រាយបាននោះឡើយ៕
