World Cup - La Reine Media

អនាគតបេក្ខភាពប្រធាន FAT របស់ថៃ៖ «បើថៃមិនបានចូលរួម World Cup ខ្ញុំនឹងលាលែងពីតំណែង»

អតីតកីឡាករឆ្នើម Piyapong Pew On ធ្វើឱ្យមានការចាប់អារម្មណ៍បន្ទាប់ពីបានប្រកាសឈរឈ្មោះជាបេក្ខភាពសម្រាប់តំណែងប្រធានសហព័ន្ធកីឡាបាល់ទាត់របស់ប្រទេសថៃ។

យោងតាមប្រព័ន្ធផ្សព្វផ្សាយថៃ បើទោះជាការបោះឆ្នោតជ្រើសរើសប្រធានសហព័ន្ធបាល់ទាត់ថៃ (FAT) ត្រូវធ្វើឡើងនៅខែមេសា ឆ្នាំ 2024 ប៉ុន្តែស្ថានការណ៍ប្រែប្រួលនៅមុនការបោះឆ្នោតនេះ កំពុងតែឡើង «កម្ដៅ»។ Piyapong Pew On ដែលជាអតីតកីឡាករឆ្នើមរបស់បាល់ទាត់ថៃ នឹងក្លាយជាបេក្ខភាពសម្រាប់តំណែងនេះ។

ចែករំលែកអំពីការសម្រេចចិត្តខាងលើ លោក Piyapong Pew On បានបង្កការចាប់អារម្មណ៍ខ្លាំងនៅពេលប្រកាសថា នឹងលាលែងពីតំណែង បើសិនមិនអាចជួយឱ្យបាល់ទាត់ថៃបានចូលរួមប្រកួតនៅ World Cup។

«… ខ្ញុំបានត្រៀមខ្លួនរួចហើយសម្រាប់ការកាន់តំណែងប្រធាន FAT។ បើសិនសមាជិក សមាជិកាគាំទ្រ ខ្ញុំសន្យាចំពោះគ្រប់គ្នាថា នឹងបំពេញកាតព្វកិច្ចក្នុងរង្វង់បួនឆ្នាំ។ បើសិនក្រុមជម្រើសជាតិថៃមិនបានចូលរួម World Cup ខ្ញុំនឹងលាលែងពីតំណែង ហើយធ្វើកិច្ចការក្នុងវិស័យបាល់ទាត់ជាមួយនឹងតួនាទីផ្សេង» អតីតកីឡាករឆ្នើមរបស់ប្រទេសថៃ លោក Piyapong Pew On អះអាងដូច្នេះ។

លោក Piyapong Pew On បញ្ជាក់ថា លោកមិនប្រជែងដើម្បីមុខតំណែង ប៉ុន្តែលោកមានភាពម៉ឺងម៉ាត់ដោយរំពឹងថានឹងអភិវឌ្ឍ និងបង្កើតវប្បធម៌បាល់ទាត់ថៃទៅតាមស្មារតី «ភាពត្រឹមត្រូវ ភាពស្មោះត្រង់ តម្លាភាព និងមានការផ្ទៀងផ្ទាត់»។

លោក Piyapong Pew On ក៏ជាអ្នកដែលបានរិះគន់ទៅលើក្រុមគ្រូបង្វឹករបស់ក្រុមបាល់ទាត់ U22 ថៃ នៅក្នុងករណីវាយតប់គ្នាក្នុងការប្រកួតវគ្គផ្ដាច់ព្រ័ត្រនៅស៊ីហ្គេមលើកទី 32 រវាង U22 ថៃ និង U22 ឥណ្ឌូណេស៊ី កាលពីថ្ងៃ 16 ខែឧសភា 2023។

«ករណីហិង្សាកើតឡើងក្នុងវគ្គផ្ដាច់ព្រ័ត្ររវាង U22 ថៃ និង U22 ឥណ្ឌូណេស៊ី។ នោះគឺជារឿងដែលកីឡាករថៃត្រូវរៀនសូត្រ ពិសេសគឺការគ្រប់គ្រងកំហឹង។ ប៉ុន្តែ នោះគឺជាបញ្ហាដែលមិនគួរកើតឡើង និងមិនអាចលើកលែងទោស នៅពេលក្រុមគ្រូបង្វឹកទាំងមូលសម្រុកចូលបង្កហេតុជាមួយឥណ្ឌូណេស៊ី។ ពួកគេគួរណាស់តែរារាំងកីឡាករក្មេងៗ តែបែរជាធ្វើឱ្យមានកំហុសដោយខ្លួនឯងទៅវិញ» លោក Piyapong Pew On ថ្លែងដូច្នេះ។

លោក Piyapong Pew On បន្ថែមថា «ទោះជាយ៉ាងណាក៏ដោយ គេត្រូវតែផ្លាស់ប្ដូរគ្រូបង្វឹក ថៃត្រូវការមនុស្សហ្មត់ចត់ជាងដើម្បីដឹកនាំក្រុមកីឡាករក្មេង មិនដូច្នេះទេ យើងនឹងត្រូវបានបំផ្លាញដូចនៅក្នុងការប្រកួតផ្ដាច់ព្រ័ត្រនៅស៊ីហ្គេមលើកនេះ»។

លោក Piyapong Pew On អាចនឹងត្រូវប្រកួតប្រជែងដណ្ដើមតំណែងប្រធានសហព័ន្ធបាល់ទាត់ថៃ ជាមួយនឹងអតីតប្រធាន FAT លោក Worawee Makudi អាយុ 72 ឆ្នាំ។ កន្លងមក លោក Worawee Makudi ក៏បានបញ្ជាក់ថា នឹងឈរឈ្មោះជាបេក្ខភាពសម្រាប់តំណែងនេះជាថ្មី បើទោះផ្ទុយពីការកំណត់ដែលហាមបេក្ខភាពដែលមានអាយុលើសពី 70 ឆ្នាំ។ ប្រធាន FAT បច្ចុប្បន្នដែលត្រូវចប់អាណត្តិនៅខែកុម្ភៈ ឆ្នាំ 2024 គឺលោក Somyot Poompanmoung៕

May 23, 2023

ក្រុមបាល់ទាត់នារីដែលបានមេដាយមាសនៅស៊ីហ្គេមលើកទី 32 ទទួលបានប្រាក់រង្វាន់ប៉ុន្មានរៀល?

កូនសិស្ស និងគ្រូបង្វឹករបស់ក្រុមបាល់ទាត់នារីជម្រើសជាតិវៀតណាម ទទួលប្រាក់រង្វាន់ចំនួន 3.6 ពាន់លានដុង (ប្រហែល 633,000,000 រៀល ឬ 153,000 ដុល្លារអាម៉េរិក) ពីសហព័ន្ធកីឡាបាល់ទាត់វៀតណាម រួមនឹងប្រាក់រង្វាន់ផ្សេងទៀត បន្ទាប់ពីដណ្ដើមបានមេដាយមាសនៅស៊ីហ្គេមលើកទី 32។

ក្រុមនារីជម្រើសជាតិវៀតណាម បានផ្ដួលមីយ៉ាន់ម៉ា 2-0 ក្នុងវគ្គផ្ដាច់ព្រ័ត្រនៅភ្នំពេញកាលពីព្រលប់ថ្ងៃទី 15 ឧសភា 2023។ លទ្ធផលនេះបានជួយឱ្យក្រុមនារីវៀតណាមក្លាយជាក្រុមនារីដំបូងគេក្នុងប្រវត្តិសាស្ត្រស៊ីហ្គេម ដែលដណ្ដើមបានមេដាយមាសចំនួនបួនរដូវកាលជាប់ៗគ្នា ហើយក៏ជាក្រុមដំបូងគេបង្អស់ដែលដណ្ដើមបានមេដាយមាស 8 លើកនៅស៊ីហ្គេម។

បន្ទាប់ពីការប្រកួតផ្ដាច់ព្រ័ត្រ ប្រធានសហព័ន្ធកីឡាបាល់ទាត់វៀតណាម (VFF) ក៏បានប្រកាសផ្ដល់ប្រាក់រង្វាន់ 2 ពាន់លានដុង ដល់ក្រុមបាល់ទាត់នារីវៀតណាម។ មុននោះ VFF ក៏បានផ្ដល់ប្រាក់រង្វាន់ 1.6 ពាន់លានដុងសម្រាប់បីប្រកួតនៅវគ្គចែកពូល និងវគ្គពាក់កណ្ដាលផ្ដាច់ព្រ័ត្រដែលវៀតណាមបានឈ្នះកម្ពុជា 4-0។ ក្រៅពីនេះ ក៏មានក្រុមហ៊ុនមួយ ប្រកាសផ្ដល់ប្រាក់រង្វាន់ 200 លានដុង (ប្រហែល 8,500 ដុល្លារអាម៉េរិក) ដល់ក្រុមនារីវៀតណាមផងដែរ ក្រោយវគ្គផ្ដាច់ព្រ័ត្រ។ ដូច្នេះ ប្រាក់រង្វាន់សរុបដែលក្រុមបាល់ទាត់នារីវៀតណាមទទួលបានគឺ 3.8 ពាន់លានដុង (ប្រហែល 668,000,000 រៀល ឬ 162,000 ដុល្លារអាម៉េរិក)។

ថ្ងៃទី 16 ឧសភានេះ ក្រុមបាល់ទាត់នារីវៀតណាម ត្រូវត្រលប់ទៅប្រទេសវិញ។ ក្រុមនេះនឹងសម្រាកយកកម្លាំងមួយសប្ដាហ៍ មុននឹងចូលហ្វឹកហាត់ដើម្បីត្រៀមសម្រាប់ការប្រកួតនៅ World Cup ដែលនឹងចាប់ផ្ដើមពីខែកក្កដាខាងមុខ៕

May 16, 2023

ក្រុមបាល់ទាត់នារីវៀតណាមមានឱកាសជម្រះបញ្ជីចាស់ដែលចាញ់ហ្វ៊ីលីពីន 0-4 ក្នុងវគ្គពាក់កណ្ដាលផ្ដាច់ព្រ័ត្រនៅ AFF ឆ្នាំមុន

នៅស៊ីហ្គេមបីរដូវកាលជាប់ៗគ្នា ក្រុមបាល់ទាត់នារីជម្រើសជាតិវៀតណាម សុទ្ធតែគ្រប់គ្រងតំណែងជើងឯក ហើយបច្ចុប្បន្ន ហ្វ៊ីលីពីនកំពុងតែក្លាយជាគូប្រជែងធំបំផុតរបស់វៀតណាម។ ក្រុមបាល់ទាត់មួយគូដែលទើបតែដណ្ដើមបានសិទ្ធិឡើងទៅប្រកួតនៅ World Cup នារី 2023 នេះ នឹងបន្ថែមកម្ដៅដល់ស៊ីហ្គេមនៅកម្ពុជាជាក់ជាមិនខាន។

ក្រោយពីការប្រកួតពីរជើងនៅពូល A ក្រុមបាល់ទាត់នារីជម្រើសជាតិវៀតណាម កំពុងនាំមុខគេក្នុងគម្លាត 3 ពិន្ទុ ធៀបនឹងគូប្រជែងពីរក្រុមផ្សេងទៀត។ វៀតណាមត្រូវការស្មើមួយប្រកួតទៀតប៉ុណ្ណោះនឹងបានឡើងដល់វគ្គពាក់កណ្ដាលផ្ដាច់ព្រ័ត្រ ប៉ុន្តែ វៀតណាមប្រាកដជាត្រូវជម្រះបញ្ជីចាស់ដែលខ្លួនបានចាញ់ហ្វ៊ីលីពីន 0-4 ក្នុងវគ្គពាក់កណ្ដាលផ្ដាច់ព្រ័ត្រនៅ AFF Cup នារី ដែលធ្វើឡើងនៅហ្វ៊ីលីពីនកាលពីឆ្នាំកន្លង។

បច្ចុប្បន្ន វៀតណាមកំពុងមានប្រៀបជាងហ្វ៊ីលីពីន។ ក្រោយការប្រកួតពីរជើង ហ្វ៊ីលីពីនរកបានតែមួយគ្រាប់ និងចាញ់មួយគ្រាប់ ខណៈដែលវៀតណាមរកបាន 6 គ្រាប់។

ថ្វីបើហ្វ៊ីលីពី បច្ចុប្បន្នហាក់បានចុះខ្សោយ ប៉ុន្តែវៀតណាមក៏ត្រូវតែមានការប្រុសប្រយ័ត្ន ព្រោះថា ក្រុមបាល់ទាត់នារីរបស់វៀតណាម ធ្លាប់ចាញ់ក្រុមបាល់ទាត់នារីហ្វ៊ីលីពីន 0-4 កាលពីឆ្នាំកន្លង ហើយហ្វ៊ីលីពីនក៏មានកីឡាការិនីច្រើនរូបដែលកំពុងលេងឱ្យបរទេស។

ការប៉ះគ្នារវាងក្រុមដែលនឹងមានវត្តមាននៅ World Cup នារី 2023 នេះ ប្រាកដជានឹងធ្វើឱ្យកក្រើកទីលានបាល់ទាត់នៅកម្ពុជានាពេលខាងមុខមិនខាន។

May 9, 2023

ដំណឹងល្អ !! Fifa អញ្ជើញក្មេងៗក្រុមកីឡាបាល់ទាត់និងគ្រូបង្វឹកទាំង 13 រូបទៅចូលរួមទស្សនា World Cup វគ្គផ្ដាច់ព្រ័ត្រ

តាមរយៈទំព័រផ្លូវការ Fa Thailand បានប្រកាសឱ្យដឹងថា លោក Gianni Infantino ប្រធានសហព័ន្ធកីឡាបាល់ទាត់ពិភពលោក Fifa បានផ្ញើលិខិតមកកាន់ លោក ស៊ុមយុធ ផុមផាន់មួង នាយកពុហកីឡដ្ឋានប្រចាំប្រទេសថៃ ដើម្បីសម្ដែងក្ដីរីករាយចំពោះការរកឃើញក្រុមកីឡាករបាល់ទាត់ជ្រូកព្រៃទាំង 12 រូប និងគ្រូបង្វឹក ទាំងអស់ 13 នាក់ ដែលបានជាប់នៅក្នុងរូងភ្នំថាំលួង-ឃុនណ៉ាមណាងណន ខេត្ត ឈៀងរ៉ាយ អស់រយៈពេលជាងមួយសប្ដាហ៍។

ដោយក្រុមកីឡាករទាំង 12 រូប និងគ្រូបង្វឹកម្នាក់នៃក្រុមជ្រូកព្រៃ បានបាត់ខ្លួននៅបរិវេណតំបន់ទេសចរណ៍ដែលពោលខាងលើនៅថ្ងៃទី 23 ខែមិថុនា ឆ្នាំ 2018 រហូតបានដឹងដំណឹងរកឃើញវិញនៅយប់ថ្ងៃទី 2 ខែកក្កដា ឆ្នាំ 2018 នេះ ទើបហេតុរន្ធត់ចិត្តមួយនេះ បានអង្រួនដួងចិត្តមនុស្សទូទាំងពិភពលោក បានចូលរួមបួងសួងដល់ការស្វែងរក រួមទាំងបានជ្រាបដល់ក្រុមកីឡា Fifa ដូចគ្នា និងផ្នែកខាងប្រធានសហព័ន្ធកីឡាបាល់ទាត់ពិភពលោក Fifa ក៏បានចូលរួមសម្ដែងក្ដីរីករាយ។

គួរបញ្ជាក់ផងដែរ ដើម្បីជាក្ដីសម្ដែងការស្វាគមន៍ និងជាកម្លាំងចិត្តនៃការវិលត្រឡប់របស់ក្រុមកីឡាករបាល់ទាល់ក្រុមជ្រូកព្រៃ Fifa បានធ្វើការអញ្ជើញអ្នកទាំង 13 ឱ្យទៅចូលរួមទស្សនា World Cup វគ្គផ្ដាច់ព្រ័ត្រ ខណៈដែលពួកគេបានត្រឡប់មកវិញដោយសុខសវត្ថិភាពទាន់ពេលវេលា ៕

July 6, 2018

ក្រុមខ្លាំងៗ ត្រៀមរួចរាល់សម្រាប់ការប្រកួតវគ្គ 1/4 ផ្តាច់ព្រ័ត្រនៃ World Cup

ព្រឹត្តិការណ៍ World Cup បានផ្អាកការប្រកួតកាលពីថ្ងៃពុធ ខណៈដែលក្រុមដែលនៅតែមានវត្តមានចំនួន 8ក្រុម ត្រៀមសម្រាប់ការប្រកួតវគ្គ1/4ផ្តាច់ព្រ័ត្រ ក្រោយពីអង់គ្លេស បានក្លាយជាក្រុមចុងក្រោយគេ ក្នុងការឈ្នះសិទ្ធិទៅវគ្គបន្ត ក្រោយពីការយកឈ្នះដោយការស៊ុតបាល់ប៉េណាល់ទី លើក្រុមជម្រើសជាតិកូឡុំប៊ី។

ក្រុមជម្រើសជាតិប្រេស៊ីល របស់តារាឆ្នើម Neymar គឺជាក្រុមមានក្តីសង្ឃឹមច្រើនជាងគេក្នុងការលើកពាន World Cup ជាលើកទី6 របស់ពួកគេនាកីឡដ្ឋាន Luzhniki ក្នុងទីក្រុងម៉ូស្គូ នាថ្ងៃទី15 ខែកក្កដា ប៉ុន្តែ ក្រុមបាល់ទាត់ជម្រើសជាតិបារាំង បែលហ្ស៊ិក និងអ៊ុយរូហ្គាយ នឹងក្លាយជាឧបសគ្គរបស់ពួកគេ ក្នុងការប្រជែងយកកៅអីទៅវគ្គផ្តាច់ព្រ័ត្រ។

ក្រុមជម្រើសជាតិអង់គ្លេសរបស់លោក Gareth Southgate គឺជាអតីតម្ចាស់ជើងឯកតែមួយដែលស្ថិតក្នុងបណ្តុំនៃការចាប់ឆ្នោតមួយទៀត រួមជាមួយនឹងក្រុមម្ចាស់ផ្ទះរុស្ស៊ី ក្រូអាស៊ី និងស៊ុយអែត។ ការដណ្តើមបានជ័យជម្នះរបស់អង់គ្លេស លើក្រុមជម្រើសជាតិកូឡុំប៊ី កាលពីថ្ងៃអង្គារ បានធ្វើឱ្យក្រុមរបស់លោក Southgate ត្រូវប៉ះជាមួយនឹងក្រុមជម្រើសជាតិស៊ុយអែត ដែលបានទម្លាក់ក្រុមជម្រើសជាតិស្វ៊ីស ក្នុងលទ្ធផល 1-០ ក្នុងវគ្គ 16ក្រុមចុងក្រោយ។

លោក Southgate បានបញ្ជាក់ថា លោកបានផ្តោតអារម្មណ៍រួចជាស្រេចចំពោះការប្រកួតវគ្គ 8ក្រុមចុងក្រោយនៅថ្ងៃសៅរ៍នេះ ជាមួយនឹងក្រុមជម្រើសជាតិស្វ៊ីស ក្នុងទីក្រុង Samara ដើម្បីប្រជែងយកកៅអីទៅកាន់វគ្គពាក់កណ្តាលផ្តាច់ព្រ័ត្រ ពោលគឺដើម្បីជួបជាមួយនឹងក្រុមជម្រើសជាតិក្រូអាស៊ី ឬរុស្ស៊ី។

លោក Southgate ដែលការស៊ុតបាល់ប៉េណាល់មិនចូលទីផ្ទាល់របស់លោក បានធ្វើឱ្យអង់គ្លេស ចាញ់ក្រុមអាល្លឺម៉ង់ ក្នុងវគ្គ1/2ផ្តាច់ព្រ័ត្រ ក្នុង Euro ឆ្នាំ1996 នាកីឡដ្ឋាន Wembley នោះ បានឱ្យដឹងថា៖ «នេះពិតជាពិសេសណាស់ ប៉ុន្តែ ខ្ញុំចង់ឱ្យយើងបន្តដំណើរទៅមុខ»៕

ប្រភពពី៖ Channel News Asia

July 5, 2018

ស៊ុយអែត ទម្លាក់ស្វ៊ីសទាំងប្រផិតប្រផើយ ដើម្បីឈានទៅវគ្គ 8ក្រុមនៃ World Cup

ការស៊ុតបាល់ប្លាត 1គ្រាប់ពីសំណាក់ខ្សែបម្រើ Emil Forsberg បានជួយឱ្យក្រុមបាល់ទាត់ជម្រើសជាតិស៊ុយអែត ដណ្តើមបានជ័យជម្នះក្នុងលទ្ធផល 1-០ លើក្រុមជ្រើសជាតិស្វ៊ីស ក្នុងការប្រកួតវគ្គ 16ក្រុមចុងក្រោយកាលពីថ្ងៃអង្គារ ខណៈដែលជ័យជម្នះនេះ បានជួយឱ្យពួកគេឈានទៅប្រកួត World Cup វគ្គ8ក្រុមចុងក្រោយ ជាលើកទី1 ក្នុងរយៈពេល 24ឆ្នាំ។

ការជួបជាមួយនឹងក្រុមជម្រើសជាតិអង់គ្លេស កំពុងតែរង់ចាំក្រុមរបស់លោក JanneAndersson នៅវគ្គបន្ទាប់ នៅថ្ងៃសៅរ៍ ខាងមុខនេះ។ ខ្សែការពារអន្តរជាតិស្វ៊ីស Michael Lang បានរងពិន័យកាតក្រហម នៅពេលជិតបញ្ចប់ការប្រកួត សម្រាប់ការរុញកីឡាករ Martin Olsson ហើយលោកអាជ្ញាកណ្តាល DamirSkomina បានលុបចោលការផ្តល់ការពិន័យប៉េណាល់ទី ទៅជាការស៊ុតបាល់ពិន័យ Free-kick នៅក្បែរប្រអប់គ្រោះថ្នាក់។

ប៉ុន្តែ ការប្រកួតនេះ បានកាត់សេចក្តីរួចស្រេចទៅហើយ។ គ្រាប់បាល់បញ្ចូលទីក្នុងតង់ទី2 របស់ Forsberg ដែលបានប្លាតចេញពីខ្សែការពារ Manuel Akanji មានន័យថា ក្រុមជម្រើសជាតិស៊ុយអែត នឹងត្រូវឈានទៅវគ្គ 8ក្រុមចុងក្រោយនៃ World Cup ជាលើកទី1 ចាប់តាំងពីឆ្នាំ1994 នៅសហរដ្ឋអាមេរិក។

លោក Andersson គ្រូបង្វឹកនៃក្រុមជម្រើសជាតិស៊ុយអែត បានឱ្យដឹងថា៖ «វាជារឿងដ៏គួរឱ្យភ្ញាក់ផ្អើល ក្នុងការឈរនៅលើទីលានប្រកួត ដោយឮអ្នកគាំទ្រហៅឈ្មោះរបស់ខ្ញុំ ប៉ុន្តែ កីឡាបាល់ទាត់ គឺជាកីឡាជាក្រុម ហើយក្រុមនេះគឺជាតួអង្គនោះ។ យើងទាំងអស់គ្នា ខិតខំព្យាយាមយ៉ាងខ្លាំងទាំងនៅក្នុង និងក្រៅទីលាន»៕

ប្រភពពី៖ Channel News Asia

July 4, 2018

អាល្លឺម៉ង់ ផ្តួលស៊ីលី ដើម្បីលើកពាន Confed Cup ខណៈព័រទុយហ្គាល់បានលេខ3

ខ្សែបម្រើ Lars Stindl បានស៊ុតបាល់បញ្ចូលទីតែ1គ្រាប់គត់ក្នុងការប្រកួតនៅតង់ទី1 និងជាគ្រាប់ដែលក្រុមជម្រើសជាតិអាល្លឺម៉ង់ប្រជុំដោយតារាវ័យក្មេងឆ្នើមៗ បានផ្តួលក្រុមពោរពេញដោយបទពិសោធ ស៊ីលី ក្នុងលទ្ធផល 1-0 ក្នុងការប្រកួតពាន Confederations Cup វគ្គផ្តាច់ព្រ័ត្រ កាលពីថ្ងៃអាទិត្យម្សិលមិញ។

នេះគឺជាលើកទីមួយហើយដែលអាល្លឺម៉ង់ ដែលជាម្ចាស់ការពារតំណែងជើងឯក World Cup បានឈ្នះពាន Confederations Cup ក្នុងយុទ្ធនាការទី8នៃព្រឹត្តិការណ៍មុនការប្រកួត World Cup មួយនេះ។ ការធ្វេសប្រហែសរបស់ខ្សែការពារ Marcelo Diaz បានបណ្តោយឲ្យបាល់ធ្លាក់ទៅលើជើងរបស់ខ្សែប្រយុទ្ធ Timo Werner ខណៈដែលរូបគេបានអូសបាល់ផុតអ្នកចាំទី មុននឹងបញ្ជូនទៅឲ្យ Stindl ដែលបានស៊ុតបាល់បញ្ចូលទីយ៉ាងងាយស្រួលនៅនាទីទី20 ក្នុងការប្រកួតវគ្គផ្តាច់ព្រ័ត្រនៅទីក្រុង Saint Petersburg ប្រទេសរុស្ស៊ី។

ប្រធានក្រុមនៃក្រុមជម្រើសជាតិអាល្លឺម៉ង់ Julian Draxler ដែលបានឈ្នះពានបាល់មាសសម្រាប់ការជាប់ជាកីឡាកឆ្នើមប្រចាំយុទ្ធនាការនោះ បាននិយាយទាំងញញឹមថា៖ «វាពិតជារឿងមិនគួរឲ្យជឿឡើយ។ យើងបានវាយសម្រុកយ៉ាងល្អ និងស័ក្តិសមក្នុងការទទួលបានជ័យជម្នះ»។

ខ្សែបម្រើស្លាបរូបនេះបានប្រាប់បន្តថា៖ «យើងមិនដែលបានលេងជាមួយគ្នាឡើយនៅមុនពេលយុទ្ធនាការនេះ ដែលវាធ្វើឲ្យជ័យជម្នះនេះកាន់តែមានតម្លៃឡើង»។

ស្របពេលជាមួយគ្នានេះ ក្រុមបាល់ទាត់ជម្រើសជាតិព័រទុយហ្គាល់ ដែលជាម្ចាស់ជើងឯក Euro ឆ្នាំ2016 បានធ្វើការវាយបកដើម្បីយកឈ្នះលើក្រុមជម្រើសជាតិម៉ិកស៊ិក ក្នុងលទ្ធផល 2-1 ក្នុងការប្រកួតដណ្តើមចំណាត់ថ្នាក់លេខ3នៃយុទ្ធនាការ Confederations Cup ក្នុងទីក្រុង Moscow កាលពីថ្ងៃដដែលនោះ។

ក្រោយពីការប្រកួតបានបញ្ចប់ក្នុងលទ្ធផលស្មើ 1-1 នៅត្រឹមនាទីទី90 ហើយខ្សែបម្រើ Adrien Silva បានរកគ្រាប់បាល់ឈ្នះដោយការស៊ុតបាល់ប៉េណាល់ទី នៅនាទីបន្ថែម15នាទី2ដង ដើម្បីផ្តល់ជ័យជម្នះដល់ក្រុមខ្លួនតែម្តង៕
ប្រភពពី៖ BBC

July 3, 2017

តារាឆ្នើមក្មេងៗរបស់អាល្លឺម៉ង់ នឹងបង្ហាញសមត្ថភាព ពេលប៉ះជើងខ្លាំងស៊ីលី រាត្រីនេះ

ស្របពេលដែលសមាជិកដែលឈ្នះពាន World Cup របស់ពួកគេអវត្តមានសម្រាប់យុទ្ធនាការនៅរុស្ស៊ី ក្រុមតារាឆ្នើមក្មេងៗទើបតែរះថ្មីរបស់អាល្លឺម៉ង់ កំពុងតែសប្បាយចិត្តចំពោះឱកាសរបស់ពួកគេក្នុងការបានបង្ហាញសមត្ថភាពក្នុងព្រឹត្តិកាណ៍ Confederations Cup មុនពេលប៉ះជាមួយនឹងក្រុមជើងខ្លាំង ស៊ីលី ក្នុងការប្រកួតពូល B នៅរាត្រីនេះ។

មិនមានសមាជិករូបណាម្នាក់ដែលបានឈ្នះពាន World Cup ឆ្នាំ2014 ក្នុងវគ្គផ្តាច់ព្រ័ត្រ នៅប្រទេសប្រេស៊ីល មានវត្តមានក្នុងក្រុមរបស់លោក Joachim Loew ក្នុងប្រទេសរុស្ស៊ីពេលនេះឡើយ ដោយសារកីឡាករខ្លះចូលនិវត្តន៍ ខ្លះរបួស និងខ្លះទៀតត្រូវអនុញ្ញាតឲ្យសម្រាក។ ក្រោយពីជួបភាពត្រដាបត្រដួសក្នុងក្រុម Schalke ខ្សែបម្រើកណ្តាល Leon Goretzka គឺជាកីឡាករម្នាក់ក្នុងចំណោមកីឡាករដែលទទួលបានឱកាសចូលលេង ក្នុងពេលក្រុមខ្លួនទទួលជ័យជម្នះ 3-2 លើក្រុមជម្រើសជាតិអូស្ត្រាលី។ រូបគេបានរកគ្រាប់បាល់បញ្ចូលទី ទី3 ក្នុងការប្រកួតពូល B ក្រោយពីការបញ្ជូនបាល់ឱ្យយ៉ាងល្អពីសំណាក់កីឡាករ Joshua Kimmich ក្រោយពីប្រធានក្រុម Julian Draxler បានរកគ្រាប់បាល់ទី2 ដោយការស៊ុតបាល់ប៉េណាល់ទីក្នុងទីក្រុងសូជី។

ប៉ុន្តែ ទោះបីជាយ៉ាងណា ក្រុមដែលប្រជុំដោយកីឡាករវ័យក្មេងរបស់អាល្លឺម៉ង់នេះបានដឹងយ៉ាងច្បាស់ហើយថា ពួកគេត្រូវតែបង្កើនទម្រង់លេងបន្ថែមទៀត ខណៈដែលពួកគេត្រូវត្រៀមជួបជាមួយនឹងជើងខ្លាំងស៊ីលី នៅរាត្រីនេះ ក្នុងទីក្រុង Kazan។ ខ្សែការពារស្លាបស្តាំ Kimmich វ័យ 22ឆ្នាំរបស់ក្លិប Bayern Munich បានឲ្យដឹងថា៖ «យើងមិនអាចធ្វើឲ្យមានកំហុសនៅពេលប្រកួតជាមួយនឹងក្រុមស៊ីលីបានឡើយ ហើយយើងត្រូវតែមានប្រសិទ្ធភាពក្នុងតំបន់ប្រយុទ្ធ»។

ស្របពេលមួយគ្នានេះដែរ លោក Loew បានធ្វើការព្រមានដល់ក្រុមកីឡាករវ័យក្មេងរបស់ខ្លួនថា ពួកគេត្រូវតែផ្តោតអារម្មណ៍ឲ្យបានរយៈពេល90នាទី មិនមែន 60នាទី ដូចដែលពួកគេបានធ្វើនៅពេលប្រកួតជាមួយនឹងក្រុមអូស្ត្រាលីនោះទេ។ស៊ីលី ឈានទៅកាន់ការប្រកួតនេះ ក្រោយពីបានយកឈ្នះលើក្រុមជម្រើសជាតិកាមេរូន 2-0 ក្នុងការប្រកួតបើកឆាកនៃពូល B។

គួររំឭកដែរថា ក្រុមជម្រើសជាតិអាល្លឺម៉ង់ បានទទួលជ័យជម្នះរាល់ការជួបគ្នាទាំង4លើករវាងក្រុមទាំងពីរក្នុងរយៈពេល40ឆ្នាំចុងក្រោយនេះ។ ការជួបគ្នាចុងក្រោយបំផុតរវាងក្រុមទាំងពីរបានកើតឡើងកាលពីឆ្នាំ2014 ដែលនៅពេលនោះគ្រាប់បាល់របស់ខ្សែប្រយុទ្ធ Mario Goetze បានជួយឲ្យអាល្លឺម៉ង់ទទួលជ័យជម្នះ 1-0 ក្នុងការប្រកួតមិត្តភាពនៅទីក្រុង Stuttgart។ ការប្រកួតដ៏គួរឱ្យរំភើបនេះ នឹងចាប់ផ្តើមនៅម៉ោង1រំលងអធាត្ររាត្រីនេះ៕
ប្រភពពី៖ Sports.yahoo

June 22, 2017

អ៉ីរ៉ង់ ចូលរួមជាមួយ ប្រេស៊ីល ក្នុងការឈ្នះកៅអីទៅ World Cup ឆ្នាំ 2018

ក្រុមបាល់ទាត់ជម្រើសជាតិអ៊ីរ៉ង់ បានក្លាយជាក្រុមទី2ក្នុងការឈ្នះសិទ្ធិទៅប្រកួតក្នុងព្រឹត្តិការណ៍ World Cup ជុំផ្តាច់ព្រ័ត្រនៅឆ្នាំក្រោយ បន្ទាប់ពីពួកគេបានផ្តួលក្រុមជម្រើសជាតិអ៊ូសបេគីស្ថាន ក្នុងលទ្ធផល 2-០ ក្រោយពីមានគ្រាប់បាល់ស៊ុតបញ្ចូលទីពីសំណាក់ខ្សែប្រយុទ្ធ Sardar Azmoun និង Mehdi Taremi នាកីឡដ្ឋាន Azadi កាលពីថ្ងៃចន្ទ។

គ្រាប់បាល់ស៊ុតបញ្ចូលទីនៅពាក់កណ្តាលតង់ទី1របស់ Azmoun បានជួយឲ្យក្រុមជម្រើសជាតិអ៊ីរ៉ង់ ស្ថិតនៅលើផ្លូវឆ្ពោះទៅកាន់ការឈ្នះសិទ្ធិទៅលេងក្នុងព្រឹត្តិការណ៍ World Cup ឆ្នាំ2018 ក្នុងប្រទេសរុស្ស៊ី នៅមុនពេល Taremi បានបន្ថែមគ្រាប់បាល់ទី2នៅរយៈពេល2នាទីចុងក្រោយ ធ្វើឱ្យអ៊ីរ៉ង់ បានឈានទៅកាន់យុទ្ធនាការ World Cup ពីរលើកជាប់ៗគ្នាជាលើកទីមួយ។ ក្រុមម្ចាស់ជើងឯកទ្វីបអាស៊ី3សម័យកាលមួយនេះ ដែលបានស៊ុតបាល់ប៉េណាល់ទីមិនចូលទី1គ្រាប់ផងដែរនោះ នឹងចូលរួមជាមួយនឹងក្រុមជម្រើសជាតិប្រេស៊ីល ក្នុងនាមជាក្រុមដែលឈ្នះសិទ្ធិទៅប្រកួតមកទល់ពេលនេះ ក្រោយពីអ៊ីរ៉ង់ បានឈ្នះកៅអីទៅលេងក្នុងយុទ្ធនាការ World Cup ជាលើកទី5របស់ខ្លួន។ ជ័យជម្នះនេះមានន័យថា ក្រុមអ៊ីរ៉ង់របស់លោកគ្រូបង្វឹកសញ្ជាតិព័រទុយហ្គាល់ Carlos Queiroz នឹងបញ្ចប់ក្នុងចំណាត់ថ្នាក់លេខ1 ឬលេខ2ក្នុងពូល A នៃការប្រកួតជម្រុះជុំចុងក្រោយក្នុងតំបន់អាស៊ី។

ក្រុមជម្រើសជាតិអ៊ូសបេគីស្ថាន កំពុងតែដេញតាមពីក្រោយក្រុមកំពុងនាំមុខមួយនេះ8ពិន្ទុ ក្នុងចំណាត់ថ្នាក់លេខ3 ខណៈដែលនៅសល់ការប្រកួតត្រឹមតែ2លើកទៀតប៉ុណ្ណោះ។ ក្រុមឈរលេខ1 និងលេខ2 ពីពូលទាំងពីរនេះក្នុងវគ្គជម្រុះនៅអាស៊ី នឹងឈានទៅប្រកួត World Cup ដោយស្វ័យប្រវត្តិ ខណៈដែលក្រុមឈរលេខ3 នឹងត្រូវធ្វើការប្រកួតវគ្គ Playoff៕

ប្រភពពី៖ Eurosport.com

June 13, 2017

Tag: World Cup