world - La Reine Media

ទ្រព្យរបស់លោក Trump កើនឡើងទ្វេដងក្នុងមួយថ្ងៃ

ករណី Trump Media សម្រេចបានកិច្ចព្រមព្រៀងច្របាច់បញ្ចូលគ្នាជាមួយនឹងក្រុមហ៊ុនដទៃមួយផ្សេងទៀត ដើម្បីឡើងផ្សារហ៊ុន បានជួយឱ្យអតីតប្រធានាធិបតីអាម៉េរិក ជាលើកដំបូង មានឈ្មោះក្នុង top 500 នៃអ្នកមានជាងគេលើពិភពលោក។

កាលពីថ្ងៃទី 25 មីនា Trump Media ដែលជាក្រុមហ៊ុនប្រព័ន្ធផ្សព្វផ្សាយរបស់លោក Donald Trump បានប្រកាសថា សម្រេចបានកិច្ចព្រមព្រៀងច្របាច់បញ្ចូលគ្នាជាមួយនឹង Digital World Acquisition Corp។ ក្រុមហ៊ុនថ្មីនឹងមានឈ្មោះថា Trump Media & Technology Group នឹងគ្រប់គ្រងបណ្ដាញសង្គម Truth Social ដែលបង្កើតឡើងដោយលោក Trump កាលពីប៉ុន្មានឆ្នាំមុន។ ភាគហ៊ុនរបស់ពួកគេចាប់ផ្ដើមដាក់ឱ្យជួញដូរចាប់ពីថ្ងៃទី 26 មីនា 2024។

ព័ត៌មានខាងលើបានជួយឱ្យភាគហ៊ុន Digital World កើន 35% កាលពីថ្ងៃទី 25 មីនា។ បើគិតទៅតាមតម្លៃបច្ចុប្បន្ន ភាគហ៊ុនរបស់លោក Trump នៅក្នុងក្រុមហ៊ុនថ្មី នឹងមានតម្លៃ 4 ពាន់លានដុល្លារអាម៉េរិក។

ប្រការនេះ ជួយឱ្យលោក Trump មានឈ្មោះក្នុងបញ្ជីស្ដីពីអ្នកមានជាងគេទាំង 500 នាក់ នៅលើពិភពលោក របស់ Bloomberg។ Bloomberg គណនាឃើញថា ទ្រព្យរបស់លោក Trump បានកើនឡើង 4 ពាន់លានដុល្លារបន្ថែមទៀតនៅក្នុងថ្ងៃទី 25 មីនា។ បច្ចុប្បន្ន អតីតប្រធានាធិបតីអាម៉េរិករូបនេះ មានទ្រព្យចំនួន 6.5 ពាន់លានដុល្លារ។

March 26, 2024

ឌូបៃ សាងសង់អាកាសយានដ្ឋានធំជាងគេលើពិភពលោកនៅលើសមុទ្រខ្សាច់

ដំណើរការសាងសង់ព្រលានយន្តហោះអន្តរជាតិ AI Maktoum ដែលអាចទទួលអ្នកដំណើរបាន 160 លាននាក់/ឆ្នាំ នឹងត្រូវអូសបន្លាយពេលនៃការស្ថាបនារាប់សិបឆ្នាំ នៅលើសមុទ្រខ្សាច់ជិតទីក្រុងឌូបៃ។

កាលពីជាង 10 ឆ្នាំមុន ព្រលានយន្តហោះអន្តរជាតិ AI Maktoum ឬហៅថា Dubai World Central (DWC) ដែលមានចម្ងាយពីចំណុចកណ្ដាលរបស់ទីក្រុងឌូបៃប្រហែល 32 គីឡូម៉ែត្រ ទៅទិសនិរតី ត្រូវបានរចនាឡើងដើម្បីក្លាយជាអាកាសយានដ្ឋានធំ និងមមាញឹកបំផុតលើពិភពលោក សម្រាប់អនាគតដ៏ខ្លីខាងមុខ។

Dubai Airports ដែលជាស្ថាប័នគ្រប់គ្រងអាកាសយានដ្ឋានអន្តរជាតិឌូបៃ (DXB) និងព្រលានយន្តហោះថ្មី ឱ្យដឹងថា នៅពេល DWC ត្រូវបានសាងសង់រួចរាល់ វានឹងអាចទទួលអ្នកដំណើរបានជាង 160 លាននាក់ រួមនឹងទំនិញ 12 លានតោន ជារៀងរាល់ឆ្នាំ។

យោងតាមការផ្សាយរបស់ CNN តួលេខខាងលើនេះច្រើនជាងជិត 63 លាននាក់ បើធៀបនឹង Hartsfield – Jackson Atlanta International ដែលជាព្រលានយន្តហោះធំបំផុតនាបច្ចុប្បន្ន និងច្រើនជាងជិត 100 លាននាក់ បើធៀបនឹងព្រលានយន្តហោះអន្តរជាតិឌូបៃ។

March 1, 2024

ក្រុមហ៊ុនទូរស័ព្ទចិន បង្ហាញរថយន្តអគ្គិសនី SU7 EV រត់បានឆ្ងាយជាងរាល់រថយន្តអគ្គិសនីបច្ចុប្បន្ន

ក្រុមហ៊ុនចិន Xiaomi បានធ្វើឱ្យមានចំណាប់អារម្មណ៍ខ្លាំងនៅក្នុងព្រឹត្តិការណ៍ Mobile World Congress នៅ Barcelona គ្រាដែលតាំងបង្ហាញ SU7 ដែលជារថយន្តអគ្គិសនីដំបូងរបស់ខ្លួន។ នេះគឺជាលើកដំបូងហើយដែល SU7 ត្រូវបានបង្ហាញដោយផ្ទាល់ បន្ទាប់ពីត្រូវបានប្រកាសព័ត៌មានជាលើកដំបូងនៅប្រទេសចិន កាលពីចុងឆ្នាំមុន។

SU7 គឺជាម៉ូដែលសេដានកីឡា ដែលមានពណ៌ខៀវខ្ចីដ៏ទាក់ទាញ។ រថយន្តនេះបើប្រាស់ម៉ូទ័រអគ្គិសនីរបស់ Xiaomi និងអាចបង្កើនល្បឿនពី 0 ទៅ 100 គីឡូម៉ែត្រ/ម៉ោង ដោយប្រើពេលតែ 2.78 វិនាទី។

Xiaomi SU7 នឹងបំពាក់ថ្មផ្ទុកថាមពល 101 kWh ដែលអាចធ្វើដំណើរបានជាង 800 គីឡូម៉ែត្រ ឆ្ងាយជាងច្រើនបើធៀបនឹងបណ្ដារថយន្តអគ្គិសនីនាបច្ចុប្បន្ន។ រថយន្តនេះក៏មានបំពាក់មុខងារបញ្ចូលថាមពលលឿន ដែលអាចធ្វើដំណើរបាន 500 គីឡូម៉ែត្រ ក្រោយពីសាកថ្មបាន 15 នាទី។

អំពីបច្ចេកវិទ្យាវិញ SU7 ត្រូវបានបំពាក់ប្រព័ន្ធអង្គញាណដែលអនុញ្ញាតឱ្យវាបើកបរដោយស្វ័យប្រវត្ត រួមនឹងអេក្រង់កម្សាន្ត 16 អ៊ិញ និងអេក្រង់បង្ហាញព័ត៌មានសម្រាប់អ្នកបើកបរ ក៏ដូចជាប្រព័ន្ធបញ្ជាដែលអាចបង្វិលបានផងដែរ។

យោងតាម Absolute Geeks បើទោះ Xiaomi មិនទាន់បង្ហើបឱ្យដឹងអំពីតម្លៃ ឬថ្ងៃដាក់លក់ជាផ្លូវការ ប៉ុន្តែពួកគេកំពុងឆ្ពោះទៅរកគោលដៅក្លាយជាអ្នកផលិតរថយន្តនៅក្នុង top 5 របស់ពិភពលោក។ ប្រការនេះមានន័យថា Xiaomi SU7 អាចត្រូវបាននាំចេញទៅលក់ក្នុងទីផ្សារបរទេស បើទោះតម្លៃរបស់វាទំនងជាខ្ពស់៕

February 27, 2024

គម្រោងព្រះពុទ្ធប្បដិមាខ្ពស់ជាងគេនៅកម្ពុជា ទទួលបានការនិមន្តមកទតពីព្រះប្រធានកិត្តិយសនៃសម្ព័ន្ធពុទ្ធសាសនិកពិភពលោក

ព្រះប្រធានកិត្តិយសសម្ព័ន្ធពុទ្ធសាសនិកពិភពលោក World Alliance of Buddhists – WAB កាលពីពេលថ្មីៗនេះ បាននិមន្តមកពីប្រទេសភូមា ដើម្បីទតការដ្ឋានសាងសង់សំណង់ ព្រះពុទ្ធប្បដិមា ដែលខ្ពស់ជាងគេបង្អស់នៅកម្ពុជា។

យោងតាមសមាគមឧកញ៉ាកម្ពុជា អ្នកឧកញ៉ា សុខ គង់ ទីប្រឹក្សាជាន់ខ្ពស់នៃសមាគមឧកញ៉ាកម្ពុជា រួមនឹងឧកញ៉ា និងបុគ្គលល្បីឈ្មោះមួយចំនួនទៀត បានអញ្ជើញទទួលបដិសណ្ឋារកិច្ចចំពោះការនិមន្តមកដល់របស់សម្តេចសង្ឃព្រះនាម Ven. Sayadaw Pandawontha (Aungzabu) Mahasadhamajotikadaja ព្រះប្រធានកិត្តិយសសម្ព័ន្ធពុទ្ធសាសនិកពិភពលោក World Alliance of Buddhists – WAB និមន្តមកពីប្រទេសភូមា (មីយ៉ាន់ម៉ា) ដើម្បីទតការដ្ឋានសាងសង់សំណង់ ព្រះពុទ្ធប្បដិមាកម្ពស់ 108 ម៉ែត្រ នៅលើភ្នំបូកគោ។

គម្រោងសាងសង់ព្រះពុទ្ធប្បដិមាកម្ពស់ 108 ម៉ែត្រ នៅលើខ្នងភ្នំបូកគោ ស្ថិតនៅក្នុងឧទ្យានជាតិព្រះមុនីវង្ស «បូកគោ» នេះ ជាគំនិតផ្តួចផ្តើមរបស់អ្នកឧកញ៉ា សុខ គង់។ ព្រះពុទ្ធប្បដិមានេះ នឹងខ្ពស់ជាងគេនៅកម្ពុជាហើយក៏នឹងស្ថិតក្នុងចំណោមព្រះពុទ្ធប្បដិមាខ្ពស់ៗនៅលើពិភពលោក។ នេះបើតាមទំព័រ Preahputhpadima108monbokor។

ទំព័រ Preahputhpadima108monbokor ឱ្យដឹងថា ព្រះពុទ្ធប្បដិមានេះមានទម្រង់ជា ព្រះពុទ្ធមារវិជ័យ ឬ ផ្ចាញ់មារនៃរចនាប័ទ្មបាយ័ន ដែលជារចនាប័ទ្មកំពូលនៃព្រះពុទ្ធសាសនាក្នុងរជ្ជកាលព្រះបាទជ័យវ័រ្មនទី 7 នាសតវត្សរ៍ទី 13។

ព្រះពុទ្ធប្បដិមានេះ នឹងសាងសង់អំពីបេតុងអាម៉េ មានពណ៌មាស បែរព្រះភក្រ្តទៅទិសខាងកើត មានកម្ពស់108 ម៉ែត្រ ពីនីវ៉ូសូន្យនៃខឿនផ្ទាល់ដីដល់កំពូលព្រះមោលី ដែលតំណាងមង្គលទាំង 108 របស់ព្រះអង្គ ទ្រង់គង់ភ្នែននៅលើបល្ល័ងផ្កាឈូករាងរង្វង់(វដ្តសង្ខារ) ដែលទម្រង់ក្បាច់រចនាបល្ល័ងនេះ យកលំនាំតាមផ្នែកមួយរបស់សសរពេជ្រប្រាសាទដំរីក្រាបនៃរចនាប័ទ្មគូលែន ក្នុងរជ្ជកាលព្រះបាទជ័យវ័រ្មនទី 2 នាសតវត្សរ៍ទី 9។

ចំពោះខឿនជាន់ទី 1 មានក្តារបែន ឬ រានហាលនៅចំពីមុខ សម្រាប់ប្រារព្ធពិធីសាសនា ហើយមានព្រះពុទ្ធរូប 7 អង្គ ព្រះអសីតិសាវ័ក 5 អង្គ និងព្រះ 2 អង្គទៀត សរុបចំនួន 12 អង្គ (តំណាងឱ្យខែឆ្នាំទាំង 12) គង់ក្នុងបុស្បុក តម្កល់ជុំវិញព្រះពុទ្ធប្បដិមាអង្គធំ និងមានជណ្តើរចំនួន 8 (តំណាងឱ្យទិសទាំង 8 និងអរិយមគ្គទាំង 8) សម្រាប់ឡើងឆ្ពោះទៅកាន់ទីសក្ការៈនៃព្រះពុទ្ធប្បដិមា។

ជារួម គម្រោងសាងសង់ព្រះពុទ្ធប្បដិមាដែលនឹងត្រូវចំណាយពេលវេលាសាងសង់ប្រមាណ 4 ឆ្នាំនេះ គឺជាការរក្សានូវអត្តសញ្ញាណជាតិនៃវប្បធម៌សាសនា ដោយឈរលើមូលដ្ឋានរក្សាចាស់ បង្កើតថ្មី៕

January 30, 2024

អង្គការរបស់អង់គ្លេស ព្យាករថា វៀតណាមនឹងក្លាយជាប្រទេសមានចំណូលខ្ពស់នៅឆ្នាំ 2045

ដោយមានប្រជាជនច្រើន និងក្មេង វៀតណាមមានឱកាសយកឈ្នះលើប្រទេសស្ទើរតែទាំងអស់នៅក្នុងសមាគមប្រជាជាតិអាស៊ីអាគ្នេយ៍ (ASEAN) ស្ដីពីសេដ្ឋកិច្ច មានដូចជា សិង្ហបុរី ថៃ និងម៉ាឡេស៊ីជាដើម ហើយក្លាយជាប្រទេសមានចំណូលខ្ពស់ចាប់ពីឆ្នាំ 2045។

ថ្មីៗនេះ ជម្ឈមណ្ឌលព្យាករ វិភាគសេដ្ឋកិច្ចឯករាជ្យរបស់អង់គ្លេស (CEBR) បានប្រកាសរបាយការណ៍ទស្សនវិស័យសេដ្ឋកិច្ចពិភពលោកប្រចាំឆ្នាំលើកទី 14 និងបញ្ជីចំណាត់ថ្នាក់សម្ព័ន្ធសេដ្ឋកិច្ចពិភពលោក (World Economic League Table – WELT)។ ក្នុងរបាយការណ៍នេះ CEBR ព្យាករថា វៀតណាមនឹងបោះជំហានយ៉ាងធំនៅ 14 ឆ្នាំទៀត។

ក្នុងឆ្នាំ 2023 កំណើនសេដ្ឋកិច្ចរបស់វៀតណាមមានការកើនឡើង។ ក្នុងនោះ ផលិតផលក្នុងស្រុកសរុប (GDP) កើន 5.05% និងអតិផរណាកើនតែ 3.25%។ GDP របស់ប្រទេសនេះ សម្រេចបានប្រមាណ 430 ពាន់លានដុល្លារអាម៉េរិក ត្រូវជាប់ចំណាត់ថ្នាក់ទី 34 នៅក្នុងបញ្ជីចំណាត់ថ្នាក់របស់ CEBR ក្នុងឆ្នាំ 2023។

សម្រាប់ឆ្នាំ 2024 CEBR ព្យាករថា វៀតណាមអាចនឹងជាប់ចំណាត់ថ្នាក់ទី 33 ក្នុងបញ្ជីចំណាត់ថ្នាក់ WELT ដោយកើនឡើងមួយថ្នាក់ បើធៀបនឹងរបាយការណ៍ឆ្នាំ 2023។ GDP ឆ្នាំ 2024 របស់ប្រទេសនេះ នឹងសម្រេចបាន 462 ពាន់លានដុល្លារអាម៉េរិក (គិតក្នុងតម្លៃបច្ចុប្បន្ន)។

របាយការណ៍របស់ CEBR បានវាយតម្លៃថា ចំណាត់ថ្នាក់នៃទំហំសេដ្ឋកិច្ចរបស់វៀតណាម អាចកើនឡើងខ្ពស់យ៉ាងលឿនក្នុងអនាគត។ វៀតណាមនឹងជាប់ចំណាត់ថ្នាក់ទី 24 នៅក្នុងឆ្នាំ 2033 ដោយទំហំសេដ្ឋកិច្ចនឹងសម្រេចបាន 1,050 ពាន់លានដុល្លារ។

ដល់ឆ្នាំ 2038 GDP របស់ប្រទេសជិតខាងកម្ពុជាមួយនេះ គ្រោងនឹងសម្រេចបាន 1,559 ពាន់លានដុល្លារអាម៉េរិក ត្រូវជាប់ចំណាត់ថ្នាក់ទី 21 ដែលយកឈ្នះលើខឿនសេដ្ឋកិច្ចធំៗនៅអាស៊ាន មានដូចជា ថៃ (1,313 ពាន់លានដុល្លារ), សិង្ហបុរី (896 ពាន់លានដុល្លារ), ហ្វ៊ីលីពីន (1,536 ពាន់លានដុល្លារ) ហើយឡើងដល់ក្រុមប្រទេសទាំង 25 ដែលមានសេដ្ឋកិច្ចធំជាងគេលើពិភពលោក។

យោងតាម CEBR វៀតណាម ដែលមានប្រជាជនច្រើន និងក្មេង នឹងមានឱកាសយកឈ្នះលើប្រទេសស្ទើរតែទាំងអស់នៅក្នុងសមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន (ASEAN) ស្ដីពីទំហំសេដ្ឋកិច្ច មានដូចជា ប្រទេសសិង្ហបុរី ថៃ និងម៉ាឡេស៊ីជាដើម ហើយក្លាយជាប្រទេសមានចំណូលខ្ពស់ចាប់ពីឆ្នាំ 2045៕

January 3, 2024

ចិនឈ្នះអាម៉េរិក «ក្លាយជាទីផ្សារកាហ្វេប្រេនធំជាងគេលើពិភពលោក»

ថ្វីបើត្រូវបានគេស្គាល់ថាជា «ប្រទេសផឹកតែ» ប៉ុន្តែ បច្ចុប្បន្ន ចិន បានឈ្នះ អាម៉េរិក ក្នុងទីផ្សារកាហ្វេដែលមានយីហោ ឬប្រេន ធំជាងគេលើពិភពលោក។

ព័ត៌មានខាងលើនេះ ទើបតែត្រូវបានប្រកាសនៅលើបណ្ដាញព័ត៌មានកាហ្វេ World Coffee Portal នាពេលថ្មីៗនេះ។ ក្រុមហ៊ុនស្រាវជ្រាវនេះបានឱ្យដឹងថា ចំនួនហាងកាហ្វេប្រេន (branded coffee shop) នៅក្នុងទីផ្សារចិន បានកើន 58% ក្នុង 12 ខែកន្លង ពោលគឺ 49,691 ហាង។ ចំណែកហាងកាហ្វេប្រភេទនេះនៅ សហរដ្ឋអាម៉េរិក បច្ចុប្បន្នមានតែ 40,062 ហាង។

ហាងកាហ្វេប្រេនត្រូវបានគេស្គាល់ថា ជាហាងកាហ្វេដែលមានឈ្មោះល្បី និងជាកម្មសិទ្ធិរបស់បណ្ដាក្រុមហ៊ុនធំៗ។ ចំណុចពិសេសរបស់ហាងប្រភេទនេះ គឺការធ្វើជំនួញទៅតាមបណ្ដាញ មានការរចនាគ្រឿងសង្ហារិម បញ្ជីមុខភេសជ្ជៈដូចគ្នា និងតែងតែផ្គត់ផ្គង់ផលិតផលពិសេសប្រចាំប្រេន។

ការកើនឡើងនៃហាងកាហ្វេប្រេននៅប្រទេសចិនកាលពីឆ្នាំកន្លង ត្រូវបានដឹកមុខដោយការពង្រីកទីផ្សារយ៉ាងឆាប់រហ័សនៃរូបមន្តហាងខ្នាតតូច និងផ្ដោតទៅលើការប្រគល់ទំនិញរបស់ Luckin Coffee ដែលពង្រីកបានជាង 5,000 ហាង និង Cotti Coffee ពង្រីកបានជាង 6,000 ហាង ក្នុងឆ្នាំ 2022។

បច្ចុប្បន្ន ប្រេនកាហ្វេដែលធំជាងគេបង្អស់នៅប្រទេសចិន គឺ Luckin Coffee ដោយមាន 13,273 ហាង។ ចំណាត់ថ្នាក់ទីពីរបានទៅលើ Starbucks របស់ អាម៉េរិក ដោយមាន 6,806 ហាង។ ចំណាត់ថ្នាក់ទីបីគឺ Luckin Coffee ដែលមាន 6,061 ហាង៕

December 15, 2023

វិស័យទេសចរណ៍កម្ពុជាងើបឡើងវិញ គ្រាដែលភ្ញៀវបរទេសវិលមកជាបណ្ដើរៗ

កម្ពុជារំពឹងខ្ពស់ទៅលើកំណើនទេសចរអន្តរជាតិនៅក្នុងរដូវបុណ្យនាចុងឆ្នាំនេះ និងបានត្រៀមខ្លួនរួចរាល់សម្រាប់ការធ្វើបដិសណ្ឋារកិច្ចចំពោះភ្ញៀវដែលមកទស្សនាតំបន់ទេសចរណ៍ល្បីៗ ពិសេសគឺអង្គរវត្ត។

លោក ហុង ប៉ូលីន ដែលមានបទពិសោធន៍ជាមគ្គុទេសក៍ទេសចរណ៍ជាងមួយទសវត្សរ៍ ហើយបច្ចុប្បន្នជាមគ្គុទេសក៍ទេសចរណ៍នៅតំបន់អង្គរ បានសម្ដែងការសប្បាយរីករាយនៅពេលឃើញទេសចរបរទេសជាច្រើនវិលត្រលប់មកវិញ។ យោងតាមមគ្គុទេសក៍ទេសចរណ៍រូបនេះ វិស័យទេសចរណ៍កម្ពុជាកំពុងតែបង្ហាញសញ្ញាវិជ្ជមានច្រើន បន្ទាប់ពីរងផលប៉ះពាល់ដោយសារកូវីដ-19។

លោក ប៉ូលីន និយាយថា «ក្រោយពីកូវីដ-19 ត្រូវបានគ្រប់គ្រង ទេសចរក៏ចាប់ផ្ដើមវិលត្រលប់មកកាន់អង្គរវត្តក្នុងចំនួនកើនឡើងពីមួយថ្ងៃទៅមួយថ្ងៃ។ ពិសេសគឺនៅខែតុលា និងខែវិច្ឆិកា ខ្ញុំឃើញថា ចំនួនភ្ញៀវបរទេសដែលវិលត្រលប់មកកម្ពុជា ពិតជាច្រើន»។

លោក ហុង ប៉ូលីន បច្ចុប្បន្នជាមគ្គុទេសក៍ទេសចរណ៍នៅតំបន់អង្គរ

លោក ស៊ិន ច័ន្ទសិរីវុត្ថា អនុរដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិលកម្ពុជា បានឱ្យដឹងថា ក្នុងសប្ដាហ៍កន្លង ចំនួនភ្ញៀវទេសចរណ៍អន្តរជាតិមកដល់ព្រលានយន្តហោះសៀមរាប បានកើនជាមធ្យមប្រហែល 2,700 នាក់/ថ្ងៃ។ ភាគច្រើនពួកគេមកពីបណ្ដាប្រទេសក្នុងតំបន់អាស៊ីអាគ្នេយ៍ (75%) និងអឺរ៉ុប (25%)។ តួលេខនេះបានបង្ហាញអំពីការងើបឡើងវិញយ៉ាងខ្លាំងក្លារបស់វិស័យទេសចរណ៍របស់កម្ពុជា។

ក្នុង 9 ខែដំបូងនៃឆ្នាំ 2023 កម្ពុជាទាក់ទាញទេសចរបរទេសបាន 3.92 លាននាក់ កើន 211% បើធៀបនឹងដំណាក់កាលដូចគ្នាក្នុងឆ្នាំ 2022។ ភ្ញៀវថៃឈរលំដាប់លេខមួយក្នុងចំណោមភ្ញៀវបរទេសដែលបានមកទស្សនាកម្ពុជា ខណៈដែលវៀតណាម និងចិនឈរលំដាប់លេខពីរ និងលេខបី។

អ្នកនាំពាក្យអាកាសចរណ៍ស៊ីវិលកម្ពុជា អះអាងថា ចាប់ពីចុងខែតុលាឆ្នាំ 2023 ដល់ខែមីនាឆ្នាំ 2024 ចំនួនជើងហោះហើរមកកាន់ព្រលានយន្តហោះសៀមរាបនឹងកើនឡើងដល់ 40 ជើងជារៀងរាល់សប្ដាហ៍ ខណៈចំនួនក្រុមហ៊ុនអាកាសចរណ៍នឹងកើនពី 9 ឡើងដល់ 10 ក្រុមហ៊ុន។ យោងតាមលោក ស៊ិន ច័ន្ទសិរីវុត្ថា វិស័យទេសចរណ៍កម្ពុជាបានត្រៀមខ្លួនរួចរាល់ និងបានធ្វើគ្រប់យ៉ាងដើម្បីត្រៀមសម្រាប់ការវិលត្រលប់របស់ភ្ញៀវអន្តរជាតិ។

កាលពីថ្ងៃទី 02 វិច្ឆិកា 2023 ក្រសួងទេសចរណ៍កម្ពុជា ក៏បានចេញសេចក្តីជូនដំណឹងស្តីពី «កម្ពុជាជាគោលដៅទេសចរណ៍ឈានមុខគេលើពិភពលោក ផ្នែកទេសចរណ៍វប្បធម៌ និងដំណើរកម្សាន្តរបស់យុវជន ឆ្នាំ 2023» បន្ទាប់ពីមានកម្មវិធីបោះឆ្នោតជ្រើសរើសតាមអ៊ីនធើរណិត ដោយក្រុមអ្នកជំនាញ និងសាធារណជនពីជុំវិញពិភពលោក ដែលរៀបចំដោយក្រុមហ៊ុន World Travel Awards នៅចក្រភពអង់គ្លេស។

នៅព្រឹកថ្ងៃទី 04 ខែវិច្ឆិកា ឆ្នាំ 2023 កម្ពុជាក៏បានទទួលភ្ញៀវបរទេសចូលមកកម្សាន្តនៅខេត្តព្រះសីហនុ តាមនាវាទេសចរណ៍មួយគ្រឿង ឈ្មោះ VIKING ORION របស់ប្រទេសន័រវែស ដែលដឹកមនុស្សសរុប 1,337 នាក់ ផងដែរ៕

November 7, 2023

WB ថា អត្រានៃភាពក្រីក្រនៅកម្ពុជា អាចនឹងកើន 6% នៅឆ្នាំ 2040

របាយការណ៍ស្តីពីអាកាសធាតុ និងការអភិវឌ្ឍន៍សម្រាប់ប្រទេសកម្ពុជា (CCDR) របស់ធនាគារពិភពលោក (World Bank – WB) ដែលត្រូវបានចេញផ្សាយកាលពីថ្ងៃទី 16 តុលា 2023 បានបញ្ជាក់អំពីភាពបន្ទាន់នៃការដោះស្រាយបញ្ហាអាកាសធាតុ ការបំភាយឧស្ម័នផ្ទះកញ្ចក់ និងផ្ដល់អនុសាសន៍សម្រាប់ការដោះស្រាយបញ្ហានេះផងដែរ។

របាយការណ៍នេះរបស់ WB បានអះអាងថា សមិទ្ធផលសេដ្ឋកិច្ចរីកចម្រើនដែលកម្ពុជាសម្រេចបានកន្លងមក កំពុងមានការគំរាមកំហែងពីបញ្ហាអាកាសធាតុ។ គោលដៅរបស់កម្ពុជាដែលចង់ក្លាយជាប្រទេសចំណូលមធ្យមកម្រិតខ្ពស់នៅឆ្នាំ 2030 អាចនឹងនៅតែមិនទាន់សម្រេចបាន ប្រសិនបើមិនមានវិធានការតឹងរ៉ឹង និងគ្រប់គ្រាន់ នៅក្នុងការដោះស្រាយបញ្ហាអាកាសធាតុ។

របាយការណ៍នេះក៏បានព្រមានអំពីការធ្លាក់ចុះនៃផលិតផលក្នុងស្រុកសរុបរបស់កម្ពុជា រហូតដល់ 9% នៅឆ្នាំ 2050 និងការកើនឡើងរបស់អត្រានៃភាពក្រីក្ររហូតដល់ 6% នៅឆ្នាំ 2040។

WB បានរៀបរាប់អំពីកត្តាជាច្រើនដែលជាមូលហេតុនាំឱ្យមានការព្រួយបារម្ភខាងលើ ក្នុងនោះក៏មានទាំងឧបសគ្គផ្នែកច្បាប់ដែលទាក់ទងនឹងពាណិជ្ជកម្ម ហេដ្ឋារចនាសម្ព័ន្ធពាណិជ្ជកម្ម ការវិនិយោគក្នុងស្រុកនៅតិច និងការកើនឡើងបំណុលឯកជនជាដើម។ ក្រៅពីនេះ កត្តាម៉ាក្រូសេដ្ឋកិច្ចពីខាងក្រៅ ដែលមានដូចជាបញ្ហាទីផ្សារ ឬប្រភពហិរញ្ញប្បទាននៅមានកម្រិតជាដើម ក៏អាចនឹងធ្វើឱ្យសេដ្ឋកិច្ចកម្ពុជានៅតែប្រឈមនឹងការប៉ះពាល់។

លើសពីនេះ “ភាពងាយរងគ្រោះផ្នែកសេដ្ឋកិច្ចរបស់កម្ពុជា កើនឡើងបន្ថែមទៀត ដោយសារបញ្ហាអាកាសធាតុ ដែលបន្ថែមភាពស្មុគស្មាញដល់ការអភិវឌ្ឍន៍» លោក Mariam Sherman នាយកធនាគារពិភពលោកប្រចាំប្រទេសមីយ៉ាន់ម៉ា កម្ពុជា និងឡាវ បញ្ជាក់ដូច្នេះ។

លោក Manuela V Ferro អនុប្រធានធនាគារពិភពលោកប្រចាំតំបន់អាស៊ីបូព៌ា និងប៉ាស៊ីហ្វិក និយាយថា កម្ពុជាត្រូវដោះស្រាយផលប៉ះពាល់ធ្ងន់ធ្ងរនៃការប្រែប្រួលអាកាសធាតុមកលើសេដ្ឋកិច្ច និងដាក់វិធានការតឹងរ៉ឹងក្នុងការកាត់បន្ថយការបំភាយកាបូន។

ការប្រែប្រួលអាកាសធាតុគឺជាដើមហេតុនៃគ្រោះធម្មជាតិនានា។ ឧទាហរណ៍ គិតពីឆ្នាំ 2019 មកនេះ កម្ពុជា បានខាតបង់គិតជាតម្លៃសេដ្ឋកិច្ចប្រហែល 100 លានដុល្លារក្នុងផលិតកម្មស្រូវ ដែលបណ្តាលមកពីគ្រោះរាំងស្ងួតបង្កឡើងដោយបាតុភូតអាកាសធាតុ El Nino។ ក្រៅពីនេះ ក្នុងខែកញ្ញា ឆ្នាំ 2022 ប្រទេសកម្ពុជា ក៏បានជួបនឹងជំនន់ទឹកភ្លៀងខ្លាំងបំផុតក្នុងអំឡុងបីឆ្នាំ ប៉ះពាល់ដល់គ្រួសាររាប់ម៉ឺនគ្រួ។

ធនាគារពិភពលោក ក៏បានលើកទឹកចិត្តឱ្យវិស័យឯកជន បញ្ជូលវិធានការឆ្លើយតបនឹងបញ្ហាអាកាសធាតុ ទៅក្នុងការវិនិយោគផងដែរ៕

November 6, 2023

«អ៊ីស្រាអែលទទួលបានការទទួលស្គាល់ពីអាម៉េរិកក្រោយពីរពាន់ឆ្នាំ» ព្រោះតែមនោសញ្ចេតនា

Eddie Jacobson មិនធ្លាប់ស្នើសូមជំនួយពីមិត្តជិតស្និទ្ធដែលជាប្រធានាធិបតីអាម៉េរិក Harry Truman ម្ដងណាឡើយ ប៉ុន្តែនៅខែមីនា 1948 លោក Eddie បានសូមជំនួយបន្ទាន់ជាលើកដំបូង។

ក្នុងកិច្ចប្រជុំនៅឯការិយាល័យរាងពងក្រពើ (The Oval Office) ក្នុងសេតវិមាន កាលពីព្រឹកថ្ងៃទី 13 មីនា 1948 លោក Eddie Jacobson បានស្នើសូមឱ្យប្រធានាធិបតីអាម៉េរិក Truman ជួបពិភាក្សាជាមួយនឹង លោក Chaim Weizmann ដែលជាអតីតមេដឹកនាំរបស់អង្គការហ្ស៊ីយ៉ូនពិភពលោក (World Zionist Organization) និងជាមេដឹកនាំផ្នែកស្មារតីរបស់ចលនានេះ ដើម្បីទទួលស្គាល់រដ្ឋជ្វីហ្វ (អ៊ីស្រាអែល) ជាលើកដំបូងក្រោយរយៈពេលជិត 2,000 ឆ្នាំ។

«លោកត្រូវតែជួបបណ្ឌិត Weizmann។ លោកត្រូវតែគាំទ្ររដ្ឋជ្វីហ្វមួយដែលឯករាជ» លោក Jacobson ដែលជាអ្នកជំនួញអាម៉េរិកដើមកំណើតជ្វីហ្វ បាននិយាយដូច្នេះជាមួយលោក Truman ដែលជាប្រធានាធិបតីទី 33 របស់សហរដ្ឋអាម៉េរិក។

សំណើនេះធ្វើឱ្យប្រធានាធិបតី Truman មិនសប្បាយចិត្ត និងខឹងសម្បា។ យោងតាមប្រវត្តិវិទូនានា លោក Truman ធ្លាប់រិះគន់ជនជាតិជ្វីហ្វនៅក្នុងការពិភាក្សាលក្ខណៈបុគ្គលជាច្រើនលើក។ ក្រោយមក លោក Jacobson ក៏សម្លឹងឃើញរូបសំណាកមួយដែលឆ្លាក់រូបប្រធានាធិបតី Andrew Jackson នៅលើខ្នងសេះ ដែលដាក់តាំងក្នុងបន្ទប់ ហើយក៏សម្រេចចិត្តស្នើសូមម្ដងទៀត។

«Harry លោកមានវីរបុរសមួយរូប គឺ Andrew Jackson។ ខ្ញុំក៏មានវីរបុរសមួយរូបដែរ នោះគឺ Chaim Weizmann» លោក Jacobson និយាយដូច្នេះ និងបន្តថា «គាត់គឺជាជនជាតិជ្វីហ្វដ៏អស្ចារ្យបំផុតក្នុងសម័យរបស់គាត់។ Weizmann មានវ័យចំណាស់ និងរាងកាយស្គមខ្សោយ ប៉ុន្តែបានធ្វើដំណើរផ្លូវឆ្ងាយដើម្បីជួបលោក បែបនេះហើយ តើលោកមិនយល់ព្រមជួបគាត់ទៀតទេអី? ប្រការនេះមិនដូចលោកបន្តិចទាល់តែសោះ»។

លោក Truman យកម្រាមដៃគោះលើតុ រួចបង្វិលកៅអីមកវិញ។ លោកក៏បានផ្លាស់ប្ដូរការសម្រេចចិត្ត។ «បានហើយ លោកទំពែកក្បាលរឹង។ លោកឈ្នះ។ ខ្ញុំនឹងជួប Weizmann»។

ការយល់ព្រមខាងលើបាននាំឱ្យមានជំនួបជាសម្ងាត់វាងលោក Truman និង Weizmann នាប៉ុន្មានថ្ងៃក្រោយមក ក្នុងនោះ ប្រធានាធិបតីអាម៉េរិកបានសន្យាថា នឹងគាំទ្រដល់កិច្ចខិតខំបង្កើតរដ្ឋអ៊ីស្រាអែល។

ប្រធានាធិបតីអាម៉េរិក Harry S. Truman (ឆ្វេង) និងលោក Eddie Jacobson នៅ Kansas រដ្ឋ Missouri កាលពីខែធ្នូ ឆ្នាំ 1947

មនោសញ្ចេតនាមរវាងលោក Truman និង Jacobson បានចាប់ផ្ដើមនៅឯទីក្រុង Kansa រដ្ឋ Missouri ។ Jacobson កើតឆ្នាំ 1891 ហើយធំដឹងក្ដីនៅតំបន់ Lower East Side ក្នុងទីក្រុង New York City មុនពេលរើទៅរស់នៅក្នុងទីក្រុង Kansas។ ឪពុកម្ដាយរបស់លោក Jacobson គឺជាជនជាតិជ្វីហ្វដ៏ក្រីក្រ មកពីលីទុយអានី (Lithuania)។

ឆ្នាំ 1906 Jacobson ដែលមានវ័យ 15 ឆ្នាំ និងបានឈប់រៀន កំពុងតែផ្ញើវិក្កយបត្រទូទាត់ប្រាក់ទៅឱ្យហាងទំនិញមួយនៅក្បែរធនាគារជាតិ Union ក៏បានជួប Truman ដែលពេលនោះជាបុគ្គលិកឃ្លាំងប្រាក់ និងមានអាយុ 22 ឆ្នាំ។ ពួកគេបានភ្ជាប់ទំនាក់ទំនងនឹងគ្នាជាថ្មីនៅឆ្នាំ 1917 ក្នុងតំបន់ Fort Sill រដ្ឋ Oklahoma ជាទីដែលពួកគេត្រូវបានបង្វឹកដើម្បីចូលរួមធ្វើសកម្មភាពក្នុងសង្គ្រាមលោកលើកទីមួយ។ ពួកគេបានក្លាយជាមិត្ត និងរួមគ្នាគ្រប់គ្រងអាហារដ្ឋានមួយក្នុងបន្ទាយ ដើម្បីរៃអង្គាសប្រាក់សម្រាប់ទិញសម្ភារៈប្រើប្រាស់ឱ្យមិត្តរួមក្រុម។

ក្រោយសង្គ្រាម ពួកគេក៏បានសហការគ្នារកស៊ី។ នៅឆ្នាំ 1919 លោក Truman និងលោក Jacobson ក៏បានសម្រេចចិត្តបើកហាងលក់សម្លៀកបំពាក់មួយនៅកណ្ដាលក្រុង Kansas។

ឆ្នាំ 1935 លោក Truman បានក្លាយជាតំណាងរាស្ត្រនៅសភាជាន់ខ្ពស់របស់រដ្ឋ Missouri សហរដ្ឋអាម៉េរិក។ Truman និង Jacobson នៅតែរក្សាទំនាក់ទំនងនឹងគ្នា។ Jacobson បបួល Truman ទៅបរបាញ់ និងស្ទួចត្រីក្នុងទន្លេ Missouri ជាញឹកញាប់។

ក្រោយមក Harry Truman ក៏ក្លាយជាអនុប្រធានាធិបតីអាម៉េរិក នៅក្នុងរដ្ឋការលោក Franklin D. Roosevelt នៅឆ្នាំ 1945។ ក្នុងខែមេសា 1945 លោក Truman ក៏ក្លាយជាប្រធានាធិបតី ពេលលោក Roosevelt បានទទួលមរណភាព។

រាជាណាចក្រអ៊ីស្រាអែលរបស់ជនជាតិជ្វីហ្វ ត្រូវបានបង្កើតឡើងកាលពីសតវត្សរ៍ទី 11 មុនគ្រិស្តសករាជ។ ឆ្នាំ 586 មុនគ្រិស្តសករាជ ចក្រភពបាប៊ីឡូន (Babylon) ដណ្ដើមបានដែនដីនេះ ហើយតំបន់នេះក្រោយមកក៏ស្ថិតក្រោមការគ្រប់គ្រងរបស់ចក្រភពពែរ្ស (អ៊ីរ៉ង់) និងចក្រភពរ៉ូម។ ចាប់ពីឆ្នាំ 641 ជនជាតិអារ៉ាប់ក៏គ្រប់គ្រងដែនដីនេះក្នុងរយៈពេល 1,300 ឆ្នាំ។ វត្តមានរបស់ជនជាតិជ្វីហ្វលើទឹកដីនេះក៏ថយចុះច្រើន ខណៈដែលពួកគេមួយចំនួនរត់ទៅរស់នៅក្នុងដែនដីដទៃ មានដូចជា អឺរ៉ុបជាដើម។ ឆ្នាំ 1516 ចក្រភពអូតូម៉ង់ (Ottoman) ក៏វាយយកបានដែនដីនេះ និងបានហៅវាថា ប៉ាលេស្ទីនអាតូម៉ង់។

ចលនាហ្ស៊ីយ៉ូននិយម (Zionist Movement) បានងើបឡើងចាប់ពីឆ្នាំ 1881 គ្រាដែលសហគមន៍ទាំងឡាយរបស់ជនជាតិជ្វីហ្វដែលរស់នៅឆ្ងាយពីទឹកដី មានបំណងវិលត្រលប់ចូល «ដែនដីអ៊ីស្រាអែល» និងមានបំណងបង្កើតរដ្ឋជ្វីហ្វ។ ជនជាតិជ្វីហ្វពីអឺរ៉ុប និងរុស្ស៊ីជាដើម បានត្រលប់ទៅរស់នៅក្នុងអតីតទឹកដីរបស់ខ្លួនដែលប៉ាលេស្ទីនរបស់អូតូម៉ង់កំពុងគ្រប់គ្រង។

ផែនទីរបស់ប្រទេសអ៊ីស្រាអែល និងប៉ាលេស្ទីន ចាប់ពីឆ្នាំ 1947ដល់បច្ចុប្បន្ន

ក្រោយសង្គ្រាមលើកទីមួយបានបញ្ចប់ អង់គ្លេសបានផ្ដួលអាតូម៉ង់ និងដណ្ដើមបានតំបន់ខាងលើ ហើយហៅវាថា ដែនដីគ្រប់គ្រងមានកាលកំណត់ប៉ាលេស្ទីន។ ក្រោយសង្គ្រាមលោកលើកទីពីរ ជនជាតិជ្វីហ្វនៅលើដែនដីនេះមានកាន់តែច្រើន ធ្វើឱ្យក្ដីស្រមៃស្ដីពីការបង្កើតរដ្ឋជ្វីហ្វ ត្រូវបានជំរុញបន្ថែម។

ថ្ងៃទី 29 វិច្ឆិកា 1947 អង្គការសហប្រជាជាតិបានអនុម័តផែនការបែងចែកទឹកដីប៉ាលេស្ទីនជាប្រទេសពីរដាច់ពីគ្នា គឺប្រទេសជ្វីហ្វ (អ៊ីស្រាអែល) និងអារ៉ាប់ (ប៉ាលេស្ទីន)។ អង្គការសហប្រជាជាតិប្រគល់របបអន្តរជាតិពិសេសទៅឱ្យទីក្រុង Jerusalem។ ភាគីខាងជ្វីហ្វបានយល់ព្រមតាមផែនការនេះ ខណៈអារ៉ាប់បានបដិសេធ។

ដើម្បីទាក់ទាញការគាំទ្ររបស់សហរដ្ឋអាម៉េរិក ក្រុមមេដឹកនាំចលនាហ្ស៊ីយ៉ូននិយម ក៏បានទាក់ទងលោក Jacobson ដើម្បីពឹងឱ្យលោកបញ្ចុះបញ្ចូល ស្នើសូមឱ្យប្រធានាធិបតី Truman ជួប Weizmann។

ក្រសួងការបរទេសអាម៉េរិក កាលនោះកំពុងរងសម្ពាធពីក្រុមអ្នកគាំទ្រអារ៉ាប់ និងមានគម្រោងដកថយពីផែនការបែងចែកទឹកដីរបស់អង្គការសហប្រជាជាតិ។ ក៏ប៉ុន្តែ ចុងក្រោយ លោក Truman ក៏បានសម្រេចចិត្តគាំទ្រទាំងស្រុងទៅវិញ បន្ទាប់ពីបានជួបលោក Weizmann។

ថ្ងៃទី 14 ឧសភា 1948 អ៊ីស្រាអែល ក៏ប្រកាសឯករាជ។ 11 នាទីក្រោយ ប្រធានាធិបតី Truman ក៏ប្រកាសទទួលស្គាល់ប្រទេសអ៊ីស្រាអែល។ លោក Weizmann បានក្លាយជាប្រធានាធិបតីដំបូងរបស់ប្រទេសអ៊ីស្រាអែល៕

October 30, 2023

រថយន្តប្រើអគ្គិសនីពីព្រះអាទិត្យឈ្នះពានរង្វាន់ក្នុងការប្រកួតចម្ងាយបីពាន់គីឡូម៉ែត្រ

(អូស្ត្រាលី) – ដោយសារមានរូបរាងពិសេស រថយន្តដំណើរការដោយអគ្គិសនីពីព្រះអាទិត្យរបស់ក្រុមប្រណាំងមួយរបស់បែលហ្ស៊ិក ដណ្ដើមបានជ័យជំនះក្នុងការប្រកួតរយៈចម្ងាយ 3,000 គីឡូម៉ែត្រ បើទោះអាកាសធាតុមិនអំណោយផល។

នេះជាលើកទីពីរជាប់ៗគ្នាហើយដែលក្រុមប្រណាំងឡានមកពីបែលហ្ស៊ិក ដណ្ដើមបានចំណាត់ថ្នាក់លេខមួយនៅពានរង្វាន់ Bridgestone World Solar Challenge (BWSC) ជាការប្រកួតប្រណាំងឡានមួយនៅអូស្ត្រាលី ដែលមានការចូលរួមពីរថយន្តដំណើរការដោយថាមពលព្រះអាទិត្យទំនើបៗរាប់សិបគ្រឿង រួមនឹងវិស្វករ និងនិស្សិតជាច្រើនក្រុមមកពីជុំវិញពិភពលោក។ ការប្រកួតរថយន្តនេះមានរយៈចម្ងាយ 3,000 គីឡូម៉ែត្រ ចាប់ផ្ដើមពី Darwin ទៅកាន់ Adelaide។

ការប្រកួតខាងលើនេះចាប់ផ្ដើមពីម៉ោង 8 ព្រឹក ដល់ម៉ោង 5 ល្ងាច ហើយក្រុមនីមួយៗត្រូវតែផ្គត់ផ្គង់គ្រប់យ៉ាងដោយខ្លួនឯង។

ក្នុងព្រឹត្តិការណ៍ប្រកួតក្នុងឆ្នាំ 2019 ក្រុមរបស់បែលហ្ស៊ិកបានឈ្នះ ក្រោយពីរថយន្តនាំមុខគេដែលជារបស់ប្រទេសហូឡង់បានឆេះ។ ក្នុងការប្រណាំងឆ្នាំនេះ ក្រុមរបស់បែលហ្ស៊ិកដែលមានឈ្មោះថា Innoptus រក្សាគម្លាត់ពីក្រុមហូឡង់ស្ទើរតែពេញមួយប្រកួត និងទទួលបានជោគជ័យក្នុងការប្រកួត 34 ម៉ោង 4 នាទី និង 41 វិនាទី លឿនជាងជិត 5 នាទី បើធៀបនឹងឆ្នាំ 2019។

ចំណាត់ថ្នាក់លេខពីរគឺបានទៅលើក្រុមរបស់ហូឡង់ Twente ដោយប្រើប្រាស់ពេលវេលា 34 ម៉ោង 24 នាទី និង 58 វិនាទី។

October 28, 2023

Tag: world