US - La Reine Media

ផ្កាយរណបរ៉ាដារបស់វៀតណាម នឹងហោះឡើងទៅកាន់គន្លងគោចរនៅដើមឆ្នាំ 2025

LOTUSat-1 ដែលជាផ្កាយរណបបច្ចេកវិទ្យារ៉ាដាដំបូងរបស់វៀតណាម គ្រោងនឹងអភិវឌ្ឍរួចរាល់នៅក្នុងខែមីនា និងត្រូវបាញ់បង្ហោះឡើងទៅកាន់គន្លងគោចរនៅដើមឆ្នាំ 2024។ នេះបើតាមអគ្គនាយករងនៃមជ្ឈមណ្ឌលអវកាសវៀតណាម។

ផ្កាយរណប LOTUSat-1 មានទម្ងន់ 600 គីឡូក្រាម ប្រើប្រាស់បច្ចេកវិទ្យារ៉ាដាថ្មីបំផុត អាចមើលឃើញវត្ថុទំហំចាប់ពីមួយម៉ែត្រនៅលើដី ព្រមទាំងមានសមត្ថភាពសង្កេតមើលទាំងថ្ងៃទាំងយប់។ LOTUSat-1 នឹងផ្ដិតយករូបភាព និងផ្ដល់ទិន្នន័យច្បាស់ការណ៍ដើម្បីកាត់បន្ថយផលប៉ះពាល់នៃគ្រោះធម្មជាតិ ការប្រែប្រួលអាកាសធាតុ ការគ្រប់គ្រងធនធានធម្មជាតិ និងបរិស្ថាន។

ក្រុមហ៊ុន NEC គឺជាអ្នកអភិវឌ្ឍ ផលិតផ្កាយរណប LOTUSat-1 និងបណ្ដុះបណ្ដាលធនធានមនុស្សដល់វៀតណាម នៅប្រទេសជប៉ុន។ ការបណ្ដុះបណ្ដាលធនធានមនុស្សនេះគឺក្នុងបំណងផ្ទេរបច្ចេកវិទ្យានៃការអភិវឌ្ឍ ការដឹកជញ្ជូន និងការប្រើប្រាស់រូបភាពពីផ្កាយរណប។

យោងតាមមជ្ឈមណ្ឌលអវកាសវៀតណាម ផ្កាយរណប LOTUSat-1 ស្ថិតក្នុងគម្រោង «បង្ការ ទប់ទល់គ្រោះធម្មជាតិ និងការប្រែប្រួលអាកាសធាតុ ដោយប្រើប្រាស់ផ្កាយរណបសង្កេតផែនដី»។ គម្រោងនេះត្រូវបានបើកដំណើរការនៅហាណូយ ចាប់ពីខែកញ្ញា 2012 ដោយប្រើប្រាស់ទុន ODA របស់ជប៉ុន និងទុនបដិភាគរបស់វៀតណាម។

ការអភិវឌ្ឍផ្កាយរណប LOTUSat-1 គ្រោងនឹងរួចរាល់ជាស្ថាពរនៅក្នុងខែមីនា ឆ្នាំ 2024 ហើយអាចបាញ់បង្ហោះឡើងទៅកាន់គន្លងតារាវិថីក្នុងរង្វង់ពីខែធ្នូឆ្នាំ 2024 ដល់ខែកុម្ភៈ 2025។

សូមបញ្ជាក់ថា ផ្កាយរណបរ៉ាដាអាចថតរូបភាពនៅក្នុងស្ថានភាពអាកាសធាតុគ្រប់ប្រភេទ សូម្បីតែពេលមានពពក សន្សើម អ័ព្វ និងពន្លឺមិនគ្រប់គ្រាន់ជាដើម។

វៀតណាម និងជប៉ុន បានចាប់ផ្ដើមសហការគ្នាក្នុងវិស័យបច្ចេកវិទ្យាអវកាសចាប់ពីឆ្នាំ 2006។ កន្លងមក ក្រោមការជួយជ្រោមជ្រែងរបស់អង្គការអវកាសជប៉ុន (JAXA) បណ្ឌិត្យសភាវិទ្យាសាស្ត្រ និងបច្ចេកវិទ្យាវៀតណាម (VAST) បានស្រាវជ្រាវ អភិវឌ្ឍ និងផលិតផ្កាយរណបខ្នាតតូចចំនួនបីគ្រឿង រួមមាន PicoDragon, Nano Dragon និង MicroDragon ហើយត្រូវបានបាញ់បង្ហោះឡើងទៅកាន់គន្លងគោចរដោយជោគជ័យ ក្រោមជំនួយពី JAXA របស់ប្រទេសជប៉ុន៕

January 22, 2024

ប្រាំពាន់លាននាក់កំពុងតែក្រទៅៗ ខណៈអ្នកមានជាងគេប្រាំនាក់កាន់តែមានឡើង

របាយការណ៍ថ្មីបំផុតរបស់ Oxfam International បានឱ្យដឹងថា មនុស្សប្រមាណ 5 ពាន់លាននាក់នៅលើពិភពលោកកំពុងតែក្រទៅៗ ស្របពេលដែលកំពូលមហាសេដ្ឋី 5 រូប បែរជាមានជាងមុនទ្វេដងក្នុងរង្វង់ 3 ឆ្នាំចុងក្រោយនេះ។

អង្គការមនុស្សធម៌ Oxfam International ដែលជាសម្ព័ន្ធអន្តរជាតិមានអង្គការចំនួន 21 ជាសមាជិក និងធ្វើសកម្មភាពនៅក្នុងប្រទេសជាង 80 កាលពីថ្ងៃទី 14 មករា 2024 បានបញ្ចេញរបាយការណ៍ប្រចាំឆ្នាំស្ដីពីគម្លាតរវាងអ្នកមាន និងអ្នកក្រ។ របាយការណ៍នេះបង្ហាញថា ចាប់ពីឆ្នាំ 2020 ទ្រព្យសម្បត្តិរបស់កំពូលមហាសេដ្ឋី 5 រូបរបស់ពិភពលោក បានកើន 114% ឡើងដល់ 869 ពាន់លានដុល្លារអាម៉េរិក។

បុគ្គលទាំង 5 រូបខាងលើនេះ រួមមាន នាយកប្រតិបត្តិ Tesla លោក Elon Musk, ម្ចាស់ LVMH លោក Bernard Arnault, លោក Jeff Bezos ស្ថាបនិករបស់ Amazon, សហស្ថាបនិករបស់ Oracle លោក Larry Ellison និងមហាសេដ្ឋី Warren Buffett។

Oxfam យល់ថា បើសិនទំនោរនេះចេះតែបន្ត ពិភពលោកអាចនឹងមានមនុស្សដែលមានទ្រព្យសម្បត្តិខ្ទង់លានលាន (ទ្រីលាន) ដុល្លារអាម៉េរិកដំបូងគេ នៅក្នុងមួយទសវត្សរ៍ទៀត។

ចំណែកមនុស្សជិត 5 ពាន់លាននាក់នៅលើពិភពលោកបែរជាក្រទៅៗ ដោយសារអតិផរណា សង្គ្រាម និងការប្រែប្រួលអាកាសធាតុ។ ជាមួយនឹងល្បឿនដូចបច្ចុប្បន្ន ពិភពលោកនឹងត្រូវការពេលវេលាជិត 230 ឆ្នាំទៀត ទើបអាចលុបបំបាត់អស់ភាពក្រីក្រ។ យោងតាម Oxfam ពលករពិភពលោកជិត 800 លាននាក់ ទទួលបានប្រាក់ខែក្នុងអំឡុងពីរឆ្នាំកន្លង «មិនអាចតាមទាន់អតិផរណា»។

របាយការណ៍របស់ Oxfam ត្រូវបានធ្វើឡើងដោយយោងទៅតាមអង្គការពលកម្មអន្តរជាតិ (ILO), ធនាគារពិភពលោក (WB), Wealth-X និង Forbes។ ពួកគេឱ្យដឹងថា មនុស្ស 1% ដែលមានបំផុតនៅលើពិភពលោក បច្ចុប្បន្នក្ដោបក្ដាប់ 43% នៃហិរញ្ញវត្ថុទូទាំងសកលលោក។ នៅសហរដ្ឋអាម៉េរិក អត្រានេះគឺ 32% ខណៈនៅអឺរ៉ុបគឺ 47% និងអាស៊ីគឺ 50%៕

January 15, 2024

រ៉ុក្កែតពាណិជ្ជកម្មកម្លាំងខ្លាំងបំផុតរបស់ចិន បាញ់បង្ហោះបានជោគជ័យ

ប្រទេសចិន កាលពីថ្ងៃទី 11 មករា 2024 បានបាញ់បង្ហោះរ៉ុក្កែតឥន្ធនៈរឹង Gravity-1 ដែលមានកម្លាំងរុញច្រាន 600 តោន ចេញពីតំបន់សមុទ្ររបស់ខេត្តសានទុង (Shandong) ដោយជោគជ័យ។

ក្នុងជើងហោះហើរដំបូង រ៉ុក្កែត Gravity-1 ដែលអភិវឌ្ឍដោយក្រុមហ៊ុនអវកាសពាណិជ្ជកម្មចិន Orienspace បាននាំយកផ្កាយរណបឧតុនិយម Yunyao-1 ចំនួន 3 គ្រឿង ឡើងទៅកាន់គន្លងតារាវិថីដោយជោគជ័យ។ ការសម្រេចបាននេះបានជួយឱ្យ Gravity-1 ក្លាយជារ៉ុក្កែតពាណិជ្ជកម្មដែលមានកម្លាំងខ្លាំងបំផុតរបស់ប្រទេសចិន និងជារ៉ុក្កែតដែលប្រើប្រាស់ឥន្ធនៈរឹងដែលមានកម្លាំងខ្លាំងបំផុតដែលធ្លាប់បានទទួលជោគជ័យក្នុងបេសកកម្មអវកាស។

រ៉ុក្កែតនេះមានកម្ពស់ប្រហែល 30 ម៉ែត្រ ខណៈដែលទម្ងន់គឺប្រហែល 400 តោន និងមានសមត្ថភាពរុញច្រាន 600 តោន។ វាអាចនាំយកបន្ទុកប្រហែល 6,500 គីឡូក្រាមឡើងទៅកាន់គន្លងតារាវិថីផែនដីកម្រិតទាប (LEO) ឬ 4,200 គីឡូក្រាមឡើងទៅកាន់គន្លងតារាវិថីសមកាលកម្មព្រះអាទិត្យ (Sun Synchronous Orbit – SSO) ដែលមានកម្ពស់ពីផែនដីប្រហែល 500 គីឡូម៉ែត្រ។

ប្រភេទគន្លងតារាវិថីជុំវិញផែនដី

Gravity-1 អាចនាំយកផ្កាយរណប 30 គ្រឿង ដែលក្នុងមួយគ្រឿងៗមានទម្ងន់ 100 គីឡូក្រាម ឡើងទៅកាន់គន្លងតារាវិថីកម្រិតទាប និងមធ្យម។

យោងតាម Orienspace រ៉ុក្កែតនេះមានបីជាន់សំខាន់ៗ និងប្រព័ន្ធរុញច្រានចំនួនបួន ដែលទាំងអស់សុទ្ធតែទទួលបានថាមពលពីម៉ូទ័រឥន្ធនៈរឹង។ ក្រុមហ៊ុនផលិតនិយាយថា ម៉ូទ័ររបស់ជាន់ទីបីអាចត្រូវបានផ្លាស់ប្ដូរដោយម៉ាស៊ីនម៉ាស៊ូត kerosene និងអុកស៊ីសែន ដើម្បីបង្កើនកម្លាំងដឹកជញ្ជូន៕

January 13, 2024

យានជំនិះអគ្គិសនីហោះឡើងនិងចុះចតបញ្ឈរត្រង់ដំបូងដែលប្រើប្រាស់អ៊ីដ្រូសែនរាវ

(ប្រទេសស្វ៊ីស) – យន្តហោះអគ្គិសនី Sirius Jet បំពាក់ស្លាបកង្ហារប្រហែល 20 គ្រឿង ដើម្បីអាចហោះឡើងត្រង់ទៅលើ និងប្រើប្រាស់ឥន្ធនៈអ៊ីដ្រូសែនរាវសម្រាប់ការហោះហើររយៈចម្ងាយឆ្ងាយ។

ក្រុមហ៊ុនធុរកិច្ចថ្មីរបស់ស្វ៊ីស Sirius Aviation AG អភិវឌ្ឍ Sirius Jet ដែលជាយានជំនិះអគ្គិសនីហោះឡើង-ចុះចតដោយបញ្ឈរត្រង់ និងអាចប្រតិបត្តិការបានចម្ងាយ 1,850 គីឡូម៉ែត្រ ហើយអាចធ្វើដំណើរក្នុងល្បឿន 520 គីឡូម៉ែត្រ/ម៉ោង ដោយប្រើប្រាស់ប្រព័ន្ធអ៊ីដ្រូសែនរាវស្អាត។ នេះបើតាម New Atlas ចុះផ្សាយកាលពីថ្ងៃទី 10 មករា 2024។

Sirius Jet ដែលត្រូវបានចាប់ផ្ដើមអភិវឌ្ឍពីឆ្នាំ 2021 អាចហោះឡើង និងចុះចតបញ្ឈរត្រង់ គឺដោយសារប្រើប្រាស់ស្លាបកង្ហារអគ្គិនីប្រហែល 20 គ្រឿង។ ក្នុងនោះ ស្លាបកង្ហារនីមួយៗមានអង្កត់ផ្ចិតតែ 30 សង់ទីម៉ែត្រប៉ុណ្ណោះ។

ក្រុមហ៊ុនខាងលើឱ្យដឹងថា ពួកគេកំពុងស្ថិតក្នុងដំណាក់កាលស្នើសូមវិញ្ញាបនបត្រពីនាយកដ្ឋានអាកាសចរណ៍អាម៉េរិក (FAA)។ បើសិនគ្រប់យ៉ាងដំណើរការដោយរលូន កំណែគំរូសម្រាប់ធ្វើតេស្តនឹងអាចហោះហើរជាលើកដំបូងក្នុងឆ្នាំ 2025 និងចាប់ផ្ដើមហោះហើរបែបពាណិជ្ជកម្មនៅឆ្នាំ 2028៕

January 12, 2024

ធាតុរបស់បុគ្គលរូបណាដែលត្រូវបានបញ្ចុះលើឋានព្រះចន្ទដំបូងគេ?

ភូគព្ភវិទូ Eugene Shoemaker ធ្វើការឱ្យណាសា បានក្លាយជាមនុស្សដំបូងគេដែលត្រូវបានបញ្ចុះធាតុនៅលើផ្ទៃរបស់ឋានព្រះចន្ទកាលពីឆ្នាំ 1998។

ថ្មីៗនេះ ក្រុមហ៊ុន Celestis ដែលផ្ដល់សេវាកម្មបញ្ចុះធាតុក្នុងទីអវកាស បានទទួលធាតុរបស់បុគ្គលល្បីឈ្មោះជាច្រើនរូប ដាក់លើយានចុះចត Peregrine របស់ Astrobotic ហោះឡើងទៅកាន់ឋានព្រះចន្ទ។ ក៏ប៉ុន្តែ នេះមិនមែនជាបេសកកម្មពាណិជ្ជកម្មដំបូងគេដែលនាំយកធាតុមនុស្សឡើងទៅបញ្ចុះលើផ្ទៃព្រះចន្ទនោះទេ។ មុននោះ ធាតុទម្ងន់ 28 ក្រាមរបស់អ្នកវិទ្យាសាស្ត្រ Shoemaker ត្រូវបានក្រុមហ៊ុន Celestis ដាក់លើយាន Lunar Prospector របស់ណាសា និងត្រូវបាននាំយកទៅបញ្ចុះលើឋានព្រះចន្ទកាលពីថ្ងៃទី 06 មករា 1998។

លោក Shoemaker គឺជាភូគព្ភវិទូភពដ៏ល្បីល្បាញ។ ជំនាញរបស់លោករួមមាន ការជ្រើសរើស និងបង្ហាត់បង្រៀនអ្នកអវកាស Apollo អំពីភូគព្ភសាស្ត្រ និងរណ្ដៅលើឋានព្រះចន្ទ រួមនឹងការដឹកនាំក្រុមស្រាវជ្រាវស្វែងរកទឹកលើឋានព្រះចន្ទ។ល។

ក្រោយពីបេសកកម្ម Apollo លោក Shoemaker ក៏បន្តធ្វើការក្នុងបេសកកម្ម Voyager ក៏ដូចជា Clementine របស់ណាសា ដើម្បីស្វែងរកទឹកលើឋានព្រះចន្ទ។ លោកបានក្លាយជាប្រធានដំបូងនៃកម្មវិធីស្រាវជ្រាវភូគព្ភសាស្ត្រអវកាសរបស់នាយកដ្ឋានស្រាវជ្រាវភគព្ភសាស្ត្រអាម៉េរិក (USGS)។ មិនត្រឹមតែប៉ុណ្ណោះ លោកក៏តែងតែចង់ក្លាយជាអ្នកអវកាស ប៉ុន្តែមិនអាចធ្វើបាន ដោយសារតែមានជំងឺប្រចាំកាយ។

ដើម្បីជាការតបស្នងសងគុណដល់លោក Shoemaker ទីភ្នាក់ងារអវកាសអាម៉េរិក ក៏បានសម្រេចចិត្តបញ្ចុះធាតុរបស់លោក នៅលើផ្ទៃរបស់ឋានព្រះចន្ទ។

ជើងហោះហើរទីពីររបស់ក្រុមហ៊ុន Celestis ដែលមានឈ្មោះថា Tranquility កំពុងតែត្រូវបានធ្វើឡើង នៅពេលយាន Peregrine ដឹកធាតុ និង DNA របស់បុគ្គលល្បីឈ្មោះចំនួន 66 រូប ក្នុងនោះក៏មានអតីតប្រធានាធិបតីអាម៉េរិកជាច្រើនរូប ឡើងទៅបញ្ចុះលើឋានព្រះចន្ទ៕

January 9, 2024

ទិដ្ឋភាព «ដូចឋាននរក» ក្នុងយន្តហោះជប៉ុនដែលកំពុងឆាបឆេះ

អ្នកដំណើរឱ្យដឹងថា គ្រប់គ្នារន្ធត់ខ្លាំងណាស់ នៅពេលផ្សែងចូលដល់ខាងក្នុងយន្តហោះរបស់ Japan Airlines មុនពេលត្រូវបានណែនាំឱ្យរត់ចេញពីអគ្គិភ័យដោយទោងរំអិល។

យន្តហោះ Airbus A350-900 របស់ក្រុមហ៊ុនអាកាសចរណ៍ជប៉ុន Japan Airlines (JAL) កាលពីថ្ងៃទី 02 មករា 2024 បានឆាបឆេះយ៉ាងសន្ធោសន្ធៅ នៅពេលប៉ះទង្គិចនឹងយន្តហោះរបស់កងកម្លាំងល្បាតសមុទ្រជប៉ុន (JCG) នៅលើផ្លូវរត់ក្នុងព្រលានយន្តហោះ Haneda នៅរាជធានីតូក្យូ។

វីដេអូដែលអ្នកដំណើរថតបានពីក្នុងយន្តហោះបង្ហាញថា អណ្ដាតភ្លើងឆាបឆេះនៅចំហៀងខាងឆ្វេងរបស់យន្តហោះ នៅពេលវាត្រៀមចុះចត ហើយក៏ប៉ះទង្គិចជាមួយយន្តហោះរបស់ JCG ដែលកំពុងរត់លើផ្លូវដើម្បីត្រៀមហោះឡើង។ ហេតុការណ៍ប៉ះគ្នានេះទំនងជាបានបណ្ដាលឱ្យបំពង់ឥន្ធនៈរបស់យន្តហោះត្រូវដាច់ នាំឱ្យអគ្គិភ័យកើតឡើង។

អ្នកដំណើរឱ្យដឹងថា សំឡេងផ្ទុះបានលាន់ឡើងក្នុងពេលយន្តហោះចុះចត។ «ក្នុងកាប៊ីនយន្តហោះពេញដោយផ្សែង…ដូចទៅនឹងឋាននរក» Anton Deibe អ្នកដំណើរជនជាតិស៊ុយអែត វ័យ 17 ឆ្នាំ រៀបរាប់ដូច្នេះក្រោយពីបានឆ្លងកាត់ហេតុការណ៍ខាងលើ។

ពេលនោះ ស្ថានភាពច្របូកច្របល់នាំឱ្យអ្នកដំណើរភ័យរន្ធត់ខ្លាំង។ អ្នកខ្លះចាប់យកម៉ាសមកពាក់ អ្នកខ្លះយកក្រណាត់បិទច្រមុះដើម្បីទប់ទល់នឹងផ្សែង គ្រាដែលអ្នកខ្លះស្រែកឡើងក្នុងភាពភ័យខ្លាច។ អ្នកបម្រើលើយន្តនៅតែមានស្មារតីនឹងនរ និងណែនាំឱ្យអ្នកដំណើរឱនចុះ បិទច្រមុះ និងមាត់ ក្នុងពេលរង់ចាំដល់ពេលយន្តហោះឈប់នៅមួយកន្លែង។

ខាងក្រៅយន្តហោះ កងកម្លាំងពន្លត់អគ្គិភ័យក៏បានមកដល់កន្លែងកើតហេតុ និងចាប់ផ្ដើមការសង្គ្រោះ។

អ្នកដំណើរម្នាក់ឈ្មោះ Satoshi Yamake អាយុ 59 ឆ្នាំ បានឱ្យដឹងថា ពេលយន្តហោះឈប់នៅមួយកន្លែងភ្លាម អ្នកបម្រើលើយន្តហោះក៏ប្រញាប់ទម្លាក់ទោងរំអិលដើម្បីឱ្យអ្នកដំណើរទម្លាក់ខ្លួនមកក្រៅ ក្នុងគ្រាអណ្ដាតភ្លើងកំពុងឆាបឆេះនៅចំហៀងខាងឆ្វេងរបស់យន្តហោះ។

អ្នកដំណើរ 367 នាក់ និងសមាជិកក្រុមហោះហើរចំនួន 12 នាក់ បានជម្លៀសខ្លួនដោយជោគជ័យ មុនពេលអណ្ដាតភ្លើងលេបត្របាក់យន្តហោះទាំងមូល ប៉ុន្តែមានមនុស្ស 17 នាក់បានរងរបួស។

សាស្ត្រាចារ្យ Graham Braithwaite អ្នកជំនាញផ្នែកស៊ើបអង្កេតគ្រោះថ្នាក់ នៅសាកលវិទ្យាល័យ Cranfield របស់អង់គ្លេស ឱ្យដឹងថា ករណីឆេះយន្តហោះនេះកើតឡើងដោយសារការលេចធ្លាយឥន្ធនៈ។

ក្រុមមន្ត្រីជប៉ុន និងអ្នកជំនាញនៅប្រទេសអង់គ្លេស បញ្ជាក់ថា ក្រុមហោះហើរបំពេញភារកិច្ចបានល្អ និងត្រូវតាមវិធីសាស្ត្រ។

ចំណែក JCG វិញ ឱ្យដឹងថា មនុស្ស 5 នាក់ក្នុងចំណោម 6 នាក់ ដែលនៅលើយន្តហោះរបស់ពួកគេ បានបាត់បង់ជីវិត នៅក្នុងហេតុការណ៍ប៉ះគ្នានេះ ខណៈប្រធានក្រុមនៅមានជីវិត ប៉ុន្តែរងរបួសធ្ងន់ធ្ងរ។

សារព័ត៌មានជប៉ុនបានផ្សាយថា JCG បានជួបគ្រោះថ្នាក់នៅពេលត្រៀមហោះឡើងដើម្បីទៅជួយជនរងគ្រោះក្នុងហេតុការណ៍រញ្ជួយដីកម្លាំង 7.6 រិចទ័រ ដែលកើតឡើងនៅភាគកណ្ដាលប្រទេសជប៉ុន កាលពីថ្ងៃទី 01 មករា ឆ្នាំ 2024៕

January 3, 2024

រ៉ុក្កែតរបស់ SpaceX នាំយក «យានមហាសម្ងាត់» របស់អាម៉េរិក ឡើងទៅទីអវកាសខ្ពស់ជាងមុន

យន្តហោះអវកាសដ៏អាថ៌កំបាំង X-37B ត្រូវបានបាញ់បង្ហោះតាមរ៉ុក្កែត Falcon Heavy ពី Florida ចាប់ផ្ដើមបេសកកម្មទី 7 នៅលើគន្លងតារាវិថីខ្ពស់ជាង បើធៀបនឹងបេសកកម្មមុនៗ។

យានអវកាសស្វ័យប្រវត្ត X-37B របស់កងទ័ពអាម៉េរិក ហោះទៅកាន់ទីអវកាសតាមរយៈរ៉ុក្កែត Falcon Heavy របស់ក្រុមហ៊ុនអាម៉េរិក SpaceX ពីមជ្ឈមណ្ឌលអវកាស Kennedy (KSC) របស់ទីភ្នាក់ងារអវកាសអាម៉េរិក (ណាសា – NASA) កាលពីវេលាម៉ោង 20 និង 07 នាទី ថ្ងៃទី 28 ធ្នូកន្លងទៅ ដែលត្រូវនឹងម៉ោង 07 និង 07 នាទី ថ្ងៃទី 29 ធ្នូ នៅកម្ពុជា ក្រោយពីបានពន្យារពេលច្រើនសប្ដាហ៍ ដោយសារអាកាសធាតុមិនល្អ។

ការបាញ់បង្ហោះកាលពីថ្ងៃទី 28 ធ្នូ គឺជាជើងហោះហើរទី 7 របស់ X-37B និងជាជើងហោះហើរដំបូងដែលធ្វើឡើងជាមួយនឹងរ៉ុក្កែត Falcon Heavy ដែលជារ៉ុក្កែតកម្លាំងខ្លាំងជាងគេលំដាប់ទីពីរលើពិភពលោក បន្ទាប់ពីប្រព័ន្ធបាញ់បង្ហោះអវកាសរបស់ណាសា។ នេះក៏ជាការបាញ់បង្ហោះរ៉ុក្កែតលើកទី 95 របស់ SaceX នៅក្នុងឆ្នាំ 2023។

បេសកកម្មថ្មីរបស់ X-37B នេះ មានឈ្មោះថា OTV-7 (Orbital Test Vehicle-7) ឬហៅថា USSF-52។ គោលដៅសំខាន់របស់ជើងហោះហើរនេះគឺធ្វើឡើងដើម្បី «ដំណើរការយន្តហោះរអវកាសដែលអាចប្រើប្រាស់ឡើងវិញ នៅលើគន្លងតារាវិថីថ្មី»។

X-37B មានរូបរាងស្រដៀងនឹងយានអវកាស Shuttle ដែលបានចូលនិវត្តន៍របស់ណាសា ប៉ុន្តែតូចជាងឆ្ងាយ។ យានដែលគ្មានមនុស្សបើកបរ X-37B មានបណ្ដោយ 8.8 ម៉ែត្រ និងស្លាបប្រវែង 4.6 ម៉ែត្រ ខណៈដែល Shuttle មានបណ្ដោយ 37 ម៉ែត្រ និងស្លាបប្រវែងជាង 24 ម៉ែត្រ។ កងកម្លាំងអវកាសអាម៉េរិក មានយាន X-37B ចំនួនពីរគ្រឿងដែលសុទ្ធតែផលិតដោយក្រុមហ៊ុន Boeing។

ព័ត៌មានលម្អិតស្ដីពីបេសកកម្ម OTV-7 មិនត្រូវបានបង្ហើបឱ្យដឹងជាសាធារណៈនោះទេ ប៉ុន្តែបេសកកម្មចំនួន 6 នាពេលកន្លងរបស់ X-37B សុទ្ធតែអូសបន្លាយពេលជាង 7 ខែ និងហោះក្នុងគន្លងគោចរកម្រិតទាប ត្រឹមតែប៉ុន្មានរយគីឡូម៉ែត្រប៉ុណ្ណោះ។ យោងតាមទំព័រសារព័ត៌មាន Space រ៉ុក្កែត Falcon Heavy អាចនាំ X-37B ឡើងទៅកាន់កម្ពស់ 35,000 គីឡូម៉ែត្រ៕

December 29, 2023

តំបន់សេដ្ឋកិច្ចពិសេសកម្ពុជា – ជប៉ុន អាចនឹងបង្ហាញវត្តមាននៅកម្ពុជា នាពេលខាងមុខ

តំបន់សេដ្ឋកិច្ចពិសេសកម្ពុជា – ជប៉ុន កំពុងត្រូវបាន កម្ពុជា និងជប៉ុន រៀបគម្រោងសិក្សា និងអាចត្រូវបានបង្កើតឡើងនាពេលខាងមុខ ដើម្បីលើកទឹកចិត្ត និងទាក់ទាញអ្នកវិនិយោគជប៉ុន មកបណ្ដាក់ទុនរកស៊ីនៅកម្ពុជាបន្ថែមទៀត។

កាលពីថ្ងៃទី 25 ធ្នូ 2023 នៅក្នុងកិច្ចប្រជុំមួយដែលដឹកនាំដោយឯកឧត្ដម ស៊ុន ចាន់ថុល ឧបនាយករដ្ឋមន្ត្រី អនុប្រធានទីមួយនៃក្រុមប្រឹក្សាអភិវឌ្ឍន៍កម្ពុជា និងគណៈប្រតិភូនៃប្រទេសជប៉ុន ដែលដឹកនាំដោយលោក Ueno Atsushi ឯកអគ្គរាជទូតជប៉ុនប្រចាំនៅកម្ពុជា បានពិភាក្សាគ្នាអំពីការងារភស្ដុភារកម្ម ហេដ្ឋារចនាសម្ព័ន្ធដឹកជញ្ជូន និងកំពង់ផែនៅកម្ពុជា។

ជំនួបខាងលើនេះ ពិភាក្សាគ្នាដោយផ្ដោតលើ «ការពង្រីកវិសាលភាពកំពង់ផេស្វយ័តក្រុងព្រះសីហនុ» និងគម្រោងសិក្សា រៀបចំបង្កើតតំបន់សេដ្ឋកិច្ចពិសេសកម្ពុជា-ជប៉ុន» (Cambodia-Japan Special Economic Zone) ដើម្បីប្រែក្លាយកំពង់ផែស្វយ័តក្រុងព្រះសីហនុឱ្យក្លាយជាកំពង់ផែតំបន់។ នេះបើតាម ក្រុមប្រឹក្សាអភិវឌ្ឍន៍កម្ពុជា ចេញផ្សាយកាលពីថ្ងៃទី 25 ធ្នូ 2023៕

December 27, 2023

របកគំហើញថ្មីស្ដីពី «បទពិសោធន៍ជិតស្លាប់»៖ ខួរក្បាលនៅតែដំណើរការបានរហូតដល់ 60 នាទី ក្រោយពីបេះដូងឈប់ដើរ

ក្រុមអ្នកវិទ្យាសាស្ត្របានរកឃើញថា ខួរក្បាលរបស់មនុស្សនៅតែអាចដំណើរការបានរហូតដល់មួយម៉ោង ក្រោយពីបេះដូងរបស់ពួកគេលែងដើរ។

រលកសញ្ញាខួរក្បាល រួមនឹងការស្រមៃអំពីជីវិតរបស់អ្នកជំងឺ អាចបកស្រាយបាននូវអ្វីដែលហៅថា «បទពិសោធន៍ជិតស្លាប់»។ លទ្ធផលនៃការសិក្សាស្រាវជ្រាវកាលពីពេលថ្មីៗនេះបង្ហាញថា ក្នុងចំណោម 10 នាក់ដែលបានចូលរួមពិសោធន៍ គឺមានមនុស្ស 4 នាក់អាចរៀបរាប់ឡើងវិញនូវអ្វីដែលកើតឡើងនៅក្នុងអារម្មណ៍ បន្ទាប់ពីពួកគេបានជួបនឹងស្ថានភាពជិតស្លាប់។

ក្រុមអ្នកស្រាវជ្រាវឱ្យដឹងថា ជារៀងរាល់ឆ្នាំ មានមនុស្សពី 350,000 នាក់ ដល់ 750,000 នាក់នៅ សហរដ្ឋអាម៉េរិក ជួបករណីបេះដូងឈប់ដើរ ពោលគឺប្រហែលពី 1,000 ទៅ 2,000 នាក់/ថ្ងៃ ហើយអត្រានៃការរួចពីការស្លាប់គឺ 10% ដែលប្រហែលនឹងពី 100 ទៅ 200 នាក់។

ការសិក្សាស្រាវជ្រាវត្រូវបានធ្វើឡើងតាំងពីឆ្នាំ 2015 និងប្រកាសកាលពីដើមឆ្នាំ 2023 នៅលើទស្សនាវដ្ដី Resuscitation។

ក្នុងរយៈពេលប្រហែល 3 ឆ្នាំនៃការស្រាវជ្រាវ ក្រុមអ្នកវិទ្យាសាស្ត្របានធ្វើការតាមដានអ្នកជំងឺដែលជួបបញ្ហាបេះដូងឈប់ដើរចំនួន 567 ករណី ក្នុងនោះមាន 53 ករណីត្រូវបានសង្គ្រោះ ហើយក្នុងចំណោមនេះមាន 28 នាក់អាចឆ្លើយសំណួរសម្រាប់ការសិក្សាស្រាវជ្រាវ។

ក្នុងចំណោមមនុស្ស 28 នាក់ខាងលើ មាន 11 នាក់ឱ្យដឹងថា ពួកគេទទួលបានបទពិសោធន៍ ឬអារម្មណ៍ដូចទៅនឹងអ្វីដែលបានកើតឡើងក្នុងពេលបេះដូងឈប់ដើរ, 6 នាក់ឱ្យដឹងថា បានឆ្លងកាត់បទពិសោធន៍ផុតពីការស្លាប់ និង 3 នាក់និយាយថា មានអារម្មណ៍ដូចជាសុបិន។

ខួរក្បាលនៅតែដំណើរការបានរហូតដល់ 60 នាទី ក្រោយពីបេះដូងឈប់ដើរ

ពួកគេទាំងនេះ គ្មានអ្នកណាម្នាក់ពិតជាដឹងច្បាស់ថា បានឆ្លងកាត់បទពិសោធន៍ជាក់ស្ដែងឡើយ។ អ្នកជឺងឺម្នាក់ៗ សុទ្ធតែមានអារម្មណ៍ ឬបានឆ្លងកាត់បទពិសោធន៍ដោយឡែករបស់ខ្លួនក្នុងពេលបេះដូងឈប់ដើរ រួមមានដូចជា បានជួបសាច់ញាតិដែលបានស្លាប់ និងទទួលបានការណែនាំថា «ចូរត្រឡប់ទៅវិញ»។ អ្នកខ្លះក៏ស្រមៃឃើញថា ព្រលឹងរបស់ពួកគេចេញផុតពីរាងកាយ និងឈរមើលវេជ្ជបណ្ឌិតកំពុងជួយសង្គ្រោះ ឬនឹកឃើញដល់អតីតកាល។ល។

ជារួម លទ្ធផលនៃការសិក្សាស្រាវជ្រាវនេះបានបង្ហាញថា សកម្មភាពរបស់ខួរក្បាលអ្នកជំងឺនៅតែដំណើរការបានរហូតដល់ 60 នាទី ក្រោយពីបេះដូងបានចាប់ផ្ដើមឈប់ដើរ និងចាប់ផ្ដើមត្រូវបានជួយសង្គ្រោះពីវេជ្ជបណ្ឌិត៕

December 27, 2023

គេចផុតពីក្ស័យធន ដោយសារគំនិតចិញ្ចឹមអយស្ទើរលើគោក

(ជប៉ុន) – វិះក្ស័យធនព្រោះតែជនជាតិជប៉ុនមិនហ៊ានបរិភោគអយស្ទើរនៅក្នុងវិបត្តិសុខភាពកាលពីឆ្នាំ 2006 ក្រុមហ៊ុន General Oyster ក៏នឹកឃើញ និងងាកទៅចិញ្ចឹមសត្វសមុទ្រនេះនៅលើដីគោក ដើម្បីផ្ដាច់ចេញពីប្រភពជំងឺ។

យោងតាម Le Monde នៅលើកោះ Kumejima ដែលស្ថិតនៅភាគខាងត្បូងប្រទេសជប៉ុន «បដិវត្តន៍នៃការចិញ្ចឹមអយស្ទើរ» មួយកំពុងកើតឡើង។ នៅមិនឆ្ងាយពីឆ្នេរសមុទ្រ មានបណ្ដុំអគារគ្រោងដែក ផ្ទះកញ្ចក់ដែលមានអាងទឹក និងសំណង់បេតុងដ៏ចម្លែកជាច្រើន។

បណ្ដុំហេត្ថារចនាសម្ព័ន្ធនេះគឺជាកម្មសិទ្ធិរបស់ GO Farm ដែលជាក្រុមហ៊ុនបុត្រសម្ព័ន្ធរបស់ General Oyster (GO)។ ពួកគេកំពុងប្រើប្រាស់ទឹកសមុទ្រជ្រៅដើម្បីចិញ្ចឹមអយស្ទើរនៅលើដីគោក ជំនួសឱ្យការចិញ្ចឹមនៅលើសមុទ្រដូចប្រពៃណី។

GO ឱ្យដឹងថា ពួកគេត្រូវចំណាយពេល 10 ឆ្នាំ ដើម្បីរកបច្ចេកទេសចិញ្ចឹមអយស្ទើរលើដីគោក ដែលហៅថា «អយស្ទើរទី 8 2.0»។ យោងតាមក្រុមហ៊ុន ឧបសគ្គធំរបស់វិធីសាស្ត្រនេះគឺការផ្គត់ផ្គង់ទឹក និងចំណីឱ្យបានគ្រប់គ្រាន់ និងគ្រប់គ្រងសីតុណ្ហភាពឱ្យបានល្អ ប៉ុន្តែត្រូវចំណាយទាប។ នៅប្រទេសជប៉ុន និងសហរដ្ឋអាម៉េរិក វិធីចិញ្ចឹមអយស្ទើរលើដីគោករបស់ពួកគេ មានប័ណ្ណប៉ាតង់រួចទៅហើយ។

គំនិតស្ដីពីការចិញ្ចឹមអយស្ទើរលើដីគោកបានកើតឡើងនៅពេល General Oyster ស្ថិតនៅក្បែរមាត់ជ្រោះនៃការដួលរលំ។ ឆ្នាំ 2003 ពួកគេបើកហាងអយស្ទើរនៅក្នុងខណ្ឌ Akasaka នៃរាជធានីតូក្យូ។ ពួកគេជោគជ័យដល់ថ្នាក់បានពង្រីកសាខានៅពាសពេញផ្ទៃប្រទេសជប៉ុន ហើយមកដល់បច្ចុប្បន្នក៏នៅសល់ 26 ហាង។

ក៏ប៉ុន្តែ មកដល់ឆ្នាំ 2006 បណ្ដាកសិដ្ឋានចិញ្ចឹមអយស្ទើរនៅជប៉ុន ត្រូវរងផលប៉ះពាល់ដោយសាររោគរាតត្បាត norovirus។ អតិថិជនដែលបានបរិភោគអយស្ទើរត្រូវធ្លាក់ខ្លួនឈឺ ធ្វើឱ្យហាងរបស់ GO ស្ងាត់ជ្រងំ។ ពុំមានហាងណាមួយជាប់ទាក់ទិននឹងរោគរាតត្បាត ប៉ុន្តែប្រាក់ចំណូលរបស់ GO នៅតែថយចុះ បណ្ដាលឱ្យក្រុមហ៊ុននេះមានហានិភ័យត្រូវក្ស័យធន។

ជំនួសឱ្យការបោះបង់អាហារធ្វើពីអយស្ទើរ GO ខំរកវិធីដើម្បីមានប្រភពផ្គត់ផ្គង់ប្រកបដោយភាពម្ចាស់ការផ្នែកសុវត្ថិភាព។ Kyoko Washiashi បច្ចុប្បន្នជាអ្នកគ្រប់គ្រងរបស់ GO នៅ Kumejima ឱ្យដឹងថា កាលពីឆ្នាំ 2006 «យើងពឹងផ្អែកលើអ្នកផលិត។ យើងមិនអាចធ្វើអ្វីបាន ដូច្នេះក៏សម្រេចចិត្តចិញ្ចឹមអយស្ទើរដោយខ្លួនឯង»។

នៅជប៉ុន អយស្ទើរត្រូវបានចិញ្ចឹមផ្ទាល់នៅឈូងសមុទ្រ ដោយការប្រើប្រាស់ទ្រុងមានពោងបណ្ដែតជាដើម។ ពួកវាអាចត្រូវបានបាញ់ពន្លឺអ៊ុលត្រាវីយូឡេ ឬបាញ់ពពុះទឹកដើម្បីកម្ចាត់កាកសំណល់អាក្រក់។ ប៉ុន្តែ វិធីនេះមិនអាចធានាបានទាំងស្រុងនូវសុវត្ថិភាព ដូច្នេះហើយទើបមេរោគ ពេលខ្លះនៅតែអាចមានក្នុងសាច់អយស្ទើរ។

ដូច្នេះ GO ក៏សម្រេចចិត្តចិញ្ចឹមនៅលើដីគោក ដើម្បីគេចពីមេរោគនៅក្នុងទឹកសមុទ្ររាក់ៗ។ ពួកគេអភិវឌ្ឍវិធីសាស្ត្រចិញ្ចឹមមួយដែលមានពីរជំហាន។ ដំណាក់កាលដំបូង និងដំណាក់កាលអាចលក់បាន គឺជាអយស្ទើរត្រាំក្នុងទឹកសមុទ្រជ្រៅនៅលើដីគោក ក្នុងរយៈពេលខ្លី ហៅថា «អយស្ទើរសមុទ្រទី 8 1.0»។

ចាប់ពីខែកក្កដា 2014 GO យកទឹកសមុទ្រពីជម្រៅជាង 200 ម៉ែត្រ ជាទីដែលកម្រមានវីរុស មកកាន់អាង។ អយស្ទើរនឹងត្រូវបានត្រាំក្នុងអាងទឹកសមុទ្រនេះក្នុងរយៈពេល 48 ម៉ោង ដើម្បីកម្ចាត់បាក់តេរី ដូចជា E. coli និង Vibrio ទៅតាមស្ដង់ដារបស់ក្រុមហ៊ុន ដែលតឹងរ៉ឹងជាងច្បាប់របស់ជប៉ុន។

វិធីសាស្ត្រខាងលើបានជួយឱ្យ GO អាចប្រើប្រាស់អយស្ទើរជាង 6 លានក្បាលជារៀងរាល់ឆ្នាំ។ Hidenori Yoshida អគ្គនាយកក្រុមហ៊ុន GO ឱ្យដឹងថា ឆ្នាំសារពើពន្ធចុងក្រោយបំផុត ក្រុមហ៊ុននេះរកចំណូលបាន 3.7 ពាន់លានយ៉េន (ជិត 26 លានដុល្លារអាម៉េរិក) ក្នុងនោះពួកគេចំណេញ 128 លានយ៉េន (900,000 ដុល្លារអាម៉េរិក)។

ជំហានធំបន្ទាប់ ដែលត្រូវបានធ្វើឡើងក្នុងរដូវក្ដៅឆ្នាំនេះ គឺការចិញ្ចឹមអយស្ទើរនៅលើដីគោកទាំងស្រុង។ អយស្ទើរជំនាន់ថ្មីដែលត្រូវបានហៅថា «អយស្ទើរទី 8 2.0» នេះ ត្រូវបានអ្នកជំនាញវាយតម្លៃថា មានរសជាតិ «ស្រួលបរិភោគខ្លាំងណាស់»។

យោងតាមលោក Yoshida ក្រុមហ៊ុនបានដាក់គោលដៅលក់អយស្ទើរដែលចិញ្ចឹមក្នុងវិធីសាស្ត្រថ្មីបំផុតនេះ តម្លៃ 6.89 ដុល្លារអាម៉េរិក/ក្បាល នៅតាមភោជនីយដ្ឋាន ដែលនេះគឺខ្ពស់ជាងប្រហែល 50% បើធៀបនឹងតម្លៃធម្មតា៕

December 27, 2023

Tag: US