UN - La Reine Media

ក្រុមថៃត្រូវក្រុមតៃវ៉ាន់តាមទាន់ 2-2 បើទោះគ្រប់គ្រងបាល់បាល់ 76%

(តៃវ៉ាន់) – ខ្សែការពាររបស់ក្រុមបាល់ទាត់ជម្រើសជាតិថៃធ្វើឱ្យមានកំហុស នាំឱ្យម្ចាស់ផ្ទះតៃវ៉ាន់ តាមទាន់ 2-2 បើទោះជាគ្រប់គ្រងសាច់បាល់បានច្រើនលើសលុបនៅក្នុងការប្រកួតមិត្តភាពកាលពីព្រលប់ថ្ងៃទី 16 មិថុនា។

Theerathon Bunmathan អវត្តមាននៅក្នុងការប្រកួតនេះ ប៉ុន្តែក្រុមជម្រើសជាតិថៃនៅមានជើងខ្លាំងច្រើនរូបទៀត មានដូចជា Chanathip Songkrasin, Supachok Sarachat ជាដើម នៅពេលធ្វើជាភ្ញៀវនៅឯកីឡដ្ឋាន Kaohsiung កោះតៃវ៉ាន់។ ម្ចាស់ពានរង្វាន់លេខពីរនៅស៊ីហ្គេមលើកទី 32 ដែលបច្ចុប្បន្នឈរលំដាប់លេខ 114 នៅ FIFA គ្រប់គ្រងបាល់បានច្រើលើសលុបនៅចំពោះមុខក្រុមម្ចាស់ផ្ទះតៃវ៉ាន់ ដែលទាបជាង 42 ថ្នាក់ ធៀបនឹងថៃនៅ FIFA ។

ក្នុងការប្រកួតដែលមានលទ្ធផល 2-2 នេះ Kritsada របស់ថៃ ទាត់ចូលទីខ្លួនឯងនៅនាទីទី 48, Teerasil Dangda របស់ថៃ រកបានមួយគ្រាប់នៅនាទីទី 62, Chen Ting-yang របស់តៃវ៉ាន់ រកបានមួយគ្រាប់នៅនាទីទី 87, Wang Ruei ទាត់ចូលទីខ្លួនឯងនៅនាទីទី 84។

https://www.youtube.com/watch?v=uIIP9iIJbdc

ក្រោយការប្រកួតនេះ ក្រុមដំរីប្រយុទ្ធរបស់ថៃ នឹងធ្វើដំណើរទៅកាន់ហុងកុងដើម្បីទាត់មិត្តភាពលើកទីពីនៅថ្ងៃទី 19 មិថុនា។

June 17, 2023

ចំណេញភ្លាមៗពី Samsung Galaxy A ស៊េរី ជាមួយការផ្ដល់ជូនដ៏ពិសេស…!

គ្រាន់តែទិញស្មាតហ្វូន Galaxy A ស៊េរីណាមួយពីសាមសុងនឹងទទួលបានប្រាក់ត្រលប់មកវិញភ្លាមៗ…!

(ភ្នំពេញ) ថ្ងៃទី 16 ខែមិថុនា ឆ្នាំ 2023 ៖ បើអតិថិជនត្រូវទិញ…ទិញឱ្យហើយទៅ…កុំនៅឡើយបង្អង់យូរ… ប្រយ័ត្នប្រម៉ូសិនអស់ធ្វើមុខជូរ…ស្មាតហ្វូនល្អលក់ដាច់មិនយូរ…ទិញប្រើភ្លាមជាប់ចិត្តភ្លែត…! អតិថិជនទាំង អស់នឹងទទួលបានប្រាក់ត្រលប់មកវិញភ្លាមៗ ព្រមទាំងរង្វាន់ម៉ាគាប់ចិត្តតែម្ដង…ចាប់ពីថ្ងៃទី 16 រហូតដល់ ថ្ងៃទី 30 មិថុនា 2023 ដោយគ្រាន់តែទិញស្មាតហ្វូន Galaxy A ស៊េរីណាមួយដូចក្រោម៖

*Galaxy A34 | A54 5G

– បានប្រាក់ត្រលប់មកវិញចំនួន 81,000៛

– កៅអីបត់ពិចនិក

– កាបូបរក្សាសីតុណ្ហភាពដ៏ស្រស់ស្អាត

*Galaxy A24

– បានប្រាក់ត្រលប់មកវិញចំនួន 61,000៛

– ស្រោមទូរស័ព្ទថ្លា និងកញ្ចក់ការពារអេក្រង់

– ឆ្នាំងសាកល្បឿនលឿនរហូតដល់ 15W

*Galaxy A14 | A14 5G

– បានប្រាក់ត្រលប់មកវិញចំនួន 61,000៛

– ឆ្នាំងសាកល្បឿនលឿនរហូតដល់ 15W

*ចំណែក Galaxy A04s

– បានប្រាក់ត្រលប់មកវិញចំនួន 61,000៛

អ៊ែមណាស់…! ឡូយណាស់…! នៅចាំអីទៀត…ប្រញាប់រួសរាន់ឡើងណាហ្វេនៗ! ទិញទូរស័ព្ទបាន ទាំងរង្វាន់…បានទាំងប្រាក់ត្រលប់មកវិញ…រកឯណាទៀត! មានតែក្រុមហ៊ុន សាមសុង ប៉ុណ្ណោះ…!

សូមបញ្ជាក់ផងដែរថាក្នុងចំណោមស្មាតហ្វូនស៊េរី A ខាងលើដែលក្រុមហ៊ុន សាមសុង ផ្តល់ប្រូម៉ូសិនជូន អតិថិជននាពេលនេះគឺសុទ្ធសឹងជាស្មាតហ្វូនដែលអាចឆក់យកបេះដូងអ្នកប្រើប្រាស់លើទីផ្សារទាំងអស់ដែលមានតម្លៃប្រហាក់ប្រហែលគ្នា…និងទទួលបានការពេញនិយមគាំទ្រយ៉ាងខ្លាំងនឹកស្មានមិនដល់! តើមានអ្វីដែលពិសេសសម្រាប់ជោគជ័យដ៏អស្ចារ្យនេះ? ព្រោះថាស្មាតហ្វូន A34 5G, A54 5G, A24 , A14, A14 5G, ឬ A04s ត្រូវបានផលិតឡើងជាមួយនឹងគុណភាពខ្ពស់…បំពាក់បច្ចេកវិទ្យាចុងក្រោយនិងមានតម្លៃ សមរម្យបំផុតស្ទើរមិនគួរឱ្យជឿ…!

សូមរំលឹកថា ក្រុមហ៊ុន សាមសុង គឺជាសមាជិកសកម្មក្នុងវិស័យឯកជនដែលធ្វើសកម្មភាពគាំទ្រដល់ទីក្រុង ប៊ូសាន នៃប្រទេសកូរ៉េ ក្លាយជាម្ចាស់ផ្ទះនៃព្រឹត្តិការណ៍ពិព័រណ៍ពិភពលោក World Expo 2030 នាពេលខាង មុខផងដែរ។

សម្រាប់ព័ត៌មានលម្អិតបន្ថែមសូមអញ្ជើញមកទស្សនាផលិតផលដោយផ្ទាល់ ឬតេស្តដោយផ្ទាល់ដៃនៅតាម ហាងទំនើបចែកចាយផលិតផល សាមសុង ទាំងអស់ដែលនៅជិតលោកអ្នកបំផុតទូទាំងប្រទេស ឬក៏អាច ចូលទៅកាន់ Facebook: SamsungCambodia, IG: samsungcambodia, TikTok: samsungcambodia ឬ ក៏អាចធ្វើការទំនាក់ទំនងទៅកាន់ផ្នែកសេវាបម្រើ អតិថិជន 24/7 ឥតគិតថ្លៃតាម រយៈទូរស័ព្ទលេខ៖ 1800-20 32 32!

*លក្ខខណ្ឌផ្សេងៗត្រូវបានអនុវត្ត…!!

June 16, 2023

ការពិតនៅពីក្រោយ «ជោគជ័យក្នុងការទិញដូរក្លឹប Man United» របស់ Sheikh Jassim

ព័ត៌មានកាលពីថ្ងៃទី 13 មិថុនា ឱ្យដឹងថា ការទិញដូរក្លឹបបាល់ទាត់ Man United ពីគ្រួសារត្រកូល Glazer របស់មហាសេដ្ឋីនៅកាតា ហាក់ទទួលបានជោគជ័យ។ ក៏ប៉ុន្តែ នៅពីក្រោយដំណឹងនេះ នៅមានបញ្ហាជាច្រើនទៀតដែលកំពុងរារាំងអ្នកវិនិយោគនៅកាតា ក្នុងដំណើរចូលមកកាន់កាប់ក្លឹបបីសាចក្រហមជាផ្លូវការ។

ក្រោយរយៈពេល 8 ខែនៃការដណ្ដើមទិញ Man United រវាង មហាសេដ្ឋីអង់គ្លេស Jim Ratcliffe និង Sheikh Jassim bin Hamad Al Thani សារព័ត៌មានកាតា កាលពីម្សិលមិញថា មហាសេដ្ឋីនៅប្រទេសកាតា ទទួលបានការយល់ព្រមពីគ្រួសារត្រកូល Glazer ដែលជាម្ចាស់ក្លឹប នៅក្នុងការទិញដូរនេះ។

ក៏ប៉ុន្តែ ព័ត៌មាននេះហាក់មិនទាន់ត្រឹមត្រូវ ច្បាស់ការណ៍នៅឡើយ។ សារព័ត៌មាន Qatari ដែលបានបាយរាយការណ៍ដំណឹងខាងលើ ថ្មីៗនេះក៏បានដកអត្ថបទនោះមកវិញ ក្រោយការចុះផ្សាយបានជិត 12 ម៉ោង។

យ៉ាងណាក៏ដោយ ព័ត៌មានដំបូងបានជួយឱ្យភាគហ៊ុនរបស់ក្លឹប Man United ហក់ឡើងខ្ពស់ ប៉ុន្តែក៏ធ្លាក់ចុះមកវិញនៅពេលមានដំណឹងថា ព័ត៌មានដំបូងមិនទាន់ច្បាស់ការណ៍។

មកដល់បច្ចុប្បន្ន មិនទាន់មានព័ត៌មាន ឬសេចក្ដីបញ្ជាក់ជាផ្លូវការណាមួយពី Avram, Joel Glazer ឬ Raine Group (ធនាគារអាម៉េរិកដែលជាតំណាងរបស់ម្ចាស់ក្លឹប Man United សម្រាប់ការទិញដូរក្លឹបនេះ) នៅឡើយ ទាក់ទងនឹងស្ថានការណ៍ក្នុងរឿងទិញដូរក្លឹបបាល់ទាត់មួយនេះ៕

June 14, 2023

ករណីទិញដូរក្លឹប Man Utd ចាត់ទុកថា «បានសម្រេច» បន្ទាប់ពីគ្រួសារត្រកូល Glazer យល់ព្រម

យោងតាមសារព័ត៌មានរបស់កាតា Sheikh Jassim បានទទួលជោគជ័យក្នុងការប្រជែងទិញក្លឹបបាល់ទាត់អង់គ្លេស Manchester United។

ក្នុងមួយរយៈពេលកន្លង Qatari Sheikh Jassim bin Hamad al-Thani បានប្រកួតប្រជែងជាមួយនឹង Sir Jim Ratcliffe ដើម្បីទិញយកបីសាចក្រហម Man Utd។

សម្រាប់ Ineos (ក្រុមហ៊ុនវិនិយោគអង់គ្លេស) ការដែល Jim Ratcliffe ចង់ទិញភាគហ៊ុន 60% របស់ Man United គឺនៅតែអនុញ្ញាតឱ្យគ្រួសារត្រកូល Glazer បន្តដើរតួជាអ្នកគ្រប់គ្រងនៅ Old Trafford។ ប៉ុន្តែ បើតាមសារព័ត៌មាន Al-Watan ដែលជាកម្មសិទ្ធិរបស់ឪពុកលោក Sheikh Jassim ករណីទិញដូរក្លឹប Man United គឺបានជោគជ័យទៅហើយ។

ប្រភពព័ត៌មានខាងលើបានឱ្យដឹងថា សេចក្ដីប្រកាសមួយស្ដីពីការចូលកាន់កាប់របស់ Sheikh Jassim នឹងត្រូវបានធ្វើឡើងឆាប់ៗនេះ។ សំណើថ្មីបំផុតរបស់អ្នកជំនួញជនជាតិកាតា គឺការទិញភាគហ៊ុន 100% របស់ក្លឹប Man Utd ក្នុងតម្លៃប្រហែល 5 ពាន់លានផោនអង់គ្លេស។

បើសិនជាសេចក្ដីរាយការណ៍នៅកាតាត្រូវបានទទួលស្គាល់ នោះ Ratcliffe នឹងបាត់បង់ឱកាសក្នុងការទិញក្លឹបបាល់ទាត់ដែលលោកស្រឡាញ់ចូលចិត្តតាំងពីវ័យកុមារ។

មូលនិធិ Qatari របស់អ្នកវិនិយោគនៅកាតាបានសន្យាថា នឹងប្រគល់ប្រាក់ជាមុន ព្រមទាំងជួយសងបំណុលទាំងអស់ដែលបីសាចក្រហមកំពុងជំពាក់ ហើយថា នឹងស្ថាបនាឡើងវិញនូវមជ្ឈមណ្ឌលហ្វឹកហាត់ រួមនឹងហេដ្ឋារចនាសម្ព័ន្ធនានាដែលទាក់ទងផងដែរ៕

June 13, 2023

យន្តហោះល្បឿនលឿនជាងសំឡេង 7 ដង អាចហោះហើរចាប់ពីឆ្នាំក្រោយ

យន្តហោះល្បឿនលឿនជាងសំឡេងដែលត្រូវបានអភិវឌ្ឍដោយក្រុមហ៊ុន Hypersonix Launch Systems កំពុងឆ្ពោះទៅជិតដល់ដំណាក់កាលហោះហើរសាកល្បងដោយស្វ័យប្រវត្ត ទៅតាមកម្មវិធីរបស់ស្ថាប័នគំនិតផ្ដួចផ្ដើមការពារជាតិអាម៉េរិក (DIU)។

យន្តហោះសាកល្បងល្បឿនលឿន Dart AE កំពុងត្រូវបានអភិវឌ្ឍដោយក្រុមហ៊ុនអូស្ត្រាលី Hypersonix Launch Systems បន្ទាប់ពីបានសហការជាមួយ DIU។ នេះគឺជាយន្តហោះគំរូសម្រាប់បង្ហាញបច្ចេកវិទ្យា។ Dart AE ដែលមានប្រវែង 3 ម៉ែត្រ និងទម្ងន់ 300 គីឡូក្រាម អាចហោះក្នុងល្បឿន Mach 7 (8,643 គីឡូម៉ែត្រ/ម៉ោង)។ នេះបើតាម Space ចុះផ្សាយកាលពីថ្ងៃទី 11 មិថុនា។ យន្តហោះនេះអាចហោះបានចម្ងាយ 1,000 គីឡូម៉ែត្របន្ទាប់ពីចាក់ឥន្ធនៈមួយពេញ។

DART AE ប្រើប្រាស់ម៉ាស៊ីនប្រតិកម្មប្រភេទត្រង់ជំនាន់ទីប្រាំ Spartan របស់ Hypersonix និងអាចត្រូវបានបាញ់បង្ហោះឡើងទៅលើអាកាសដោយរ៉ុក្កែតគ្មានមនុស្សបើក។

Dart AE ស្ថិតក្នុងកម្មវិធីអភិវឌ្ឍបច្ចេកវិទ្យាល្បឿនលឿនជាងសំឡេងរបស់សហរដ្ឋអាម៉េរិក។ យន្តហោះនេះ អាចត្រៀមខ្លួនរួចរាល់សម្រាប់ការហោះហើរសាកល្បងលើកដំបូងនៅដើមរដូវក្ដៅឆ្នាំក្រោយ៕

June 13, 2023

រកបាល់បានជាង 10 គ្រាប់ឱ្យ Al-Nassr ប៉ុន្តែ CR7 នៅតែមិនអាចសប្បាយនៅអារ៉ាប៊ីសាអូឌីត

Cristiano Ronaldo មិនមានឈ្មោះក្នុងក្រុមកីឡាករឆ្នើមរបស់ពានរង្វាន់ Saudi Pro League ក្នុងរដូវកាល 2022-2023 បើទោះទាត់បញ្ចូលទីបាន 14 គ្រាប់ឱ្យ Al-Nassr។

Ronaldo មកទាត់ឱ្យក្លឹប Al-Nassr កាលពីខែមករាឆ្នាំនេះ តែមិនមានឈ្មោះក្នុងក្រុមកីឡាករឆ្នើមបំផុតនៅពានរង្វាន់លំដាប់កំពូលរបស់ប្រទេសអារ៉ាប៊ីសាអូឌីត នារដូវកាល 2022-2023។ ជំនួសមកវិញ កីឡាករដែលត្រូវបានជ្រើសរើសជាកំពូលកីឡាករឆ្នើមគឺ Odion Ighalo របស់ក្លឹប Al-Hilal ក្រោយពីរកបាន 19 គ្រាប់នៅក្នុង 27 ប្រកួត រួមនឹងកីឡាករដទៃទៀត។

ក្លឹប Al-Nassr អូសទាញបាន CR7 ក្រៅពីកីឡាករព័រទុយហ្កាល់រូបនេះបញ្ចប់កិច្ចព្រមព្រៀងជាមួយ Manchester United។ បន្ទាប់មក Ronaldo បានចូលរួមប្រកួតឱ្យក្លឹបថ្មីបាន 16 ប្រកួត និងរកបាន 14 គ្រាប់។ ប៉ុន្តែ ទោះជាមានវត្តមានរបស់ CR7 ក្លឹបនៅរាជធានីរីយ៉ាដ នៅតែមិនអាចដណ្ដើមបានតំណែងជើងឯក ដោយបានត្រឹមតែលេខពីរបន្ទាប់ពី Al-Ittihad។

បើសិនជាគិតរកមធ្យមភាគនៃចំនួនគ្រាប់បាល់ដែល Odion Ighalo និង Cristiano Ronaldo រកបាននៅក្នុងមួយប្រកួត ឃើញថា Ighalo រកបាន 0.703 គ្រាប់/ប្រកួត តិចជាង 0.172 គ្រាប់/ប្រកួត ធៀបនឹង 0.875 គ្រាប់/ប្រកួតរបស់ CR7។

ការដែលម្ចាស់គ្រាប់បាល់មាស 5 គ្រាប់មិនមានឈ្មោះនៅក្នុងក្រុមកីឡាករឆ្នើមរបស់ Saudi Pro League បានធ្វើឱ្យអ្នកគាំទ្រមួយចំនួនមិនសប្បាយចិត្ត។

កីឡាករឆ្នើមជាងគេប្រចាំ Saudi Pro League រដូវកាល 2022-2023

Ronaldo ប្រាកដជានឹងស្ដារសមិទ្ធផលរបស់ខ្លួននៅរដូវកាលក្រោយ និងអាចជួយឱ្យ Al-Nassr លើកពាននៅអារ៉ាប៊ីសាអូឌីតនៅឆ្នាំ 2023-2024។ ក៏ប៉ុន្តែ ពួកគេនឹងត្រូវប៉ះជើងខ្លាំងរបស់ Al-Ittihad ជាថ្មី ដោយនៅទីនោះនឹងមានវត្តមានរបស់ Karim Benzema និង Kante ផងដែរ៕

June 9, 2023

ថាសហោះ (UFO) អគ្គិសនីនេះ អាចហើរក្នុងល្បឿន 50 គីឡូម៉ែត្រ/ម៉ោង

(ប្រទេសចិន) – ក្រុមអ្នកវិទ្យាសាស្ត្រមកពីសាកលវិទ្យាល័យពហុបច្ចេកទេសតំបន់ភាគពាយព្យ បង្កើតបានយានដែលមានរូបរាងដូចថាសហោះ អាចហើរបាន 15 នាទី និងមានល្បឿន 50 គីឡូម៉ែត្រ/ម៉ោង។

យានហោះឡើង ចុះចតដោយបញ្ឈរត្រង់ និងប្រើប្រាស់អគ្គិសនី (eVTOL) អាចជាបដិវត្តន៍ក្នុងវិស័យគមនាគមន៍ស្ថិរភាព និងមិនបំភាយឧស្ម័នពុលរបស់ពិភពលោក។ គម្រោង eVTOL រាងដូចថាសហោះ (UFO) គឺជាលទ្ធផលនៃការអភិវឌ្ឍរយៈពេលបីឆ្នាំរបស់ក្រុមអ្នកជំនាញនៅសាកលវិទ្យាល័យពហុបច្ចេកទេសតំបន់ពាយព្យ (Northwestern Polytechnical University) នៅប្រទេសចិន។

យាន eVTOL គំរូរបស់ក្រុមអ្នកស្រាវជ្រាវខាងលើ សម្រេចបានជើងហោះហើរសាកល្បងដំបូងនៅក្នុងព្រឹត្តិការណ៍ពិព័រណ៍មួយនៅខេត្ត Shenzhen ភាគអាគ្នេយ៍ប្រទេសចិន។ នេះបើតាមការចុះផ្សាយកាលពីថ្ងៃទី 07 មិថុនា របស់ទំព័រ Interesting Engineering។

យានដូចទៅនឹង UFO ដែលត្រូវបានផលិតឡើងដោយក្រុមហ៊ុនបច្ចេកវិទ្យាថាសហោះ Shenzhen UFO Power Technology អាចហោះហើរបាន 15 នាទី ឡើងដល់កម្ពស់ 200 ម៉ែត្រ និងល្បឿន 50 គីឡូម៉ែត្រ/ម៉ោង ព្រមទាំងបំពាក់មុខងារហោះហើរស្វ័យប្រវត្តផងដែរ។

June 8, 2023

ក្រោយសម្រេចជ្រើសយកក្លឹប Inter Miami កំពូលតារាបាល់ទាត់អាហ្សង់ទីន បង្ហើបពីការពិតស្ដីពី PSG

ក្រោយពីបានបញ្ជាក់ថានឹងទៅលេងឱ្យក្លឹបអាម៉េរិក Inter Miami តារាបាល់ទាត់ពិភពលោក Lionel Messi ក៏បានទទួលស្គាល់ថា ខ្លួនមិនទទួលបានសុភមង្គលក្នុងរង្វង់ពីរឆ្នាំដែលលេងឱ្យ Paris Saint-Germain។

Messi ចាកចេញពី PSG ក្នុងនាមជាកីឡាករសេរីក្នុងស្ថានភាពភាគីទាំងពីរសុទ្ធតែមិនចង់បន្តកិច្ចព្រមព្រៀងជាមួយគ្នា ក្រោយរយៈពេលពីរឆ្នាំកន្លងទៅ។ ពេលវេលានៅជាមួយគ្នារវាង M10 និង PSG បានបញ្ចប់ក្នុងរយៈពេលពីរម៉ោង នៅពេល Messi ត្រូវបាន «ព្យួរជើងក្នុងក្រុម» ព្រោះតែបានធ្វើដំណើរចាកចេញពីប្រទេសបារាំងដោយមិនមានការអនុញ្ញាតពីក្លឹប។ ចាប់ពីពេលនោះមក Messi បានយល់ព្រមទៅលេងឱ្យក្លឹបអាម៉េរិក Inter Miami បើទោះចិត្តចង់ទាត់ឱ្យ Barcelona នៅអេស្ប៉ាញ។

«ពីរឆ្នាំកន្លងនៅ PSG គឺជាពេលវេលាដែលខ្ញុំមានអារម្មណ៍ថា មិនមានសុភមង្គល។ ខ្ញុំមិនអាចទទួលបានជីវភាពជារបស់ខ្លួនឯង។ ហើយបញ្ហានេះបានប៉ះពាល់ដល់ការរស់នៅរបស់គ្រួសារខ្ញុំ។ ពីរឆ្នាំកន្លង ខ្ញុំពិតជាបានបាត់បង់ពេលវេលាជាច្រើនដែលអាចនៅជាមួយកូនៗ…» Messi បានថ្លែងដូច្នេះ នៅក្នុងកិច្ចសម្ភាសជាមួយបណ្ដាញសារព័ត៌មានអេស្ប៉ាញ និងត្រូវបានចុះផ្សាយដោយទំព័រ Mundo Deportivo និង Sport កាលពីពេលថ្មីៗនេះ។

Messi និង PSG ទំនងជាពិបាករក្សាទំនាក់ទំនងល្អនឹងគ្នា បន្ទាប់ពី M10 ចាកចេញ និងក្រោយពីកិច្ចសម្ភាសខាងលើ។ ចំណែកអ្នកគាំទ្ររបស់ Barcelona វិញក៏កំពុងអន់ចិត្តព្រោះតែស្ថានភាពហិរញ្ញវត្ថុរបស់ក្លឹបនេះមិនអនុញ្ញាតឱ្យនាំយក Messi មកចូលជាសមាជិកជាថ្មី។

រឿងរ៉ាវម្ចាស់ជើងឯក World Cup 2022 សម្រេចចិត្តទាត់ឱ្យក្លឹប Inter Miami ត្រូវបានបញ្ជាក់រួចហើយ។ បើតាមគម្រោង M10 នឹងទៅចូលរួមជាមួយក្រុមនេះចាប់ពីខែកក្កដាខាងមុខ៕

June 8, 2023

បីទម្លាប់ជួយឱ្យនាយករដ្ឋមន្ត្រីអង់គ្លេសមានរាងកាយមាំមួនក្នុងវ័យ U50

ដើម្បីបានរាងកាយមាំមួនក្នុងមជ្ឈិមវ័យ លោក Sunak ដែលជានាយករដ្ឋមន្ត្រីអង់គ្លេសដើមកំណើតឥណ្ឌា តែងបោះបង់អាហារយូរៗម្ដង និងបោះបង់ទម្លាប់ពិសាភេសជ្ជៈផ្អែម។ល។

កាលពីចុងខែឧសភា នាយករដ្ឋមន្ត្រីអង់គ្លេស លោក Rishi Sunak រួមនឹងអត្តពលិកជាង 100 នាក់បានចូលរួមព្រឹត្តិការណ៍រត់ប្រណាំងដែលត្រូវបានធ្វើឡើងនៅ Northallerton ក្នុងតំបន់ North Yorkshire។ ក្នុងវ័យ 43 ឆ្នាំ លោករត់បានចម្ងាយ 10 គីឡូម៉ែត្រ ក្នុងរយៈពេល 47 នាទីនិង 41 វិនាទី។ ក្នុងវ័យកណ្ដាលនេះ លោក Sunak នៅតែរក្សាបានរាងកាយមាំមួន និងសុខភាពល្អ ដោយសារតែ «ទម្លាប់បីយ៉ាង» ខាងក្រោម។

ទីមួយ៖ បោះបង់ការញៀននឹងភេសជ្ជៈកំប៉ុង

កាលពីឆ្នាំ 2019 លោក Sunak ធ្លាប់បានសារភាពថា លោកជាមនុស្សញៀននឹងភេសជ្ជៈកំប៉ុង។ ទម្លាប់នេះបានធ្វើឱ្យលោកមានបញ្ហាធ្មេញ និងត្រូវដាក់ការកំណត់ពិសាតែមួយកំប៉ុង/សប្ដាហ៍។ អ្នកវិទ្យាសាស្ត្រថា ភេសជ្ជៈផ្អែមមួយកំប៉ុងមានផ្ទុកថាមពលប្រហែល 139 កាឡូរី រួមនឹងស្ករ 35 ក្រាម។ ជាតិស្ករនេះស្មើនឹងស្ករឆុងកាហ្វេចំនួន 22 កញ្ចប់តូច។ ដូច្នេះ ការពិសាភេសជ្ជៈផ្អែមក្នុងរយៈពេលយូរនឹងធ្វើឱ្យឡើងទម្ងន់ ធាត់ជ្រុល ឬអាចលើសជាតិស្ករ។ ការបោះបង់ទម្លាប់នេះនឹងជួយឱ្យជៀសផុតពីជំងឺទឹកនោមផ្អែម លើសសម្ពាធឈាម ជំងឺបេះដូង ជំងឺដាច់សរសៃឈាមខួរក្បាលជាដើម។

ទីពីរ៖ តមអាហារបណ្ដោះអាសន្ន

យោងតាមប្រភពជិតស្និទ្ធ នាយករដ្ឋមន្ត្រី Sunak តែងតែបោះបង់អាហារមួយ ឬពីរពេលជារៀងរាល់សប្ដាហ៍។ ប្រការនេះមានប្រយោជន៍ច្រើនដល់សុខភាព ព្រោះផ្ដល់ពេលវេលាគ្រប់គ្រាន់សម្រាប់រាងកាយរំលាយអាហារ និងស្រូបយកជីវជាតិក្នុងអាហារ និងកាត់បន្ថយជាតិស្ករ។

ទីបី៖ ហាត់ប្រាណ

«ខ្ញុំពិនិត្យមើលព័ត៌មាន ដំណឹងក្នុងទូរស័ព្ទ រួចហើយខ្ញុំនឹងរត់លើម៉ាស៊ីន ជិះកង់ ឬចូលរួមថ្នាក់លំហាត់ប្រាណ» លោក Sunak ធ្លាប់ឱ្យដឹងដូច្នេះ។

នាយករដ្ឋមន្ត្រីអង់គ្លេសព្យាយាមហាត់ប្រាណប្រើកម្លាំងខ្លាំង (HIIT) មួយដង និងរត់មួយដងក្នុងមួយសប្ដាហ៍។ យោងតាមអ្នកជំនាញ ការរត់ជាញឹកញាប់នឹងជួយដល់សុខភាពបេះដូង និងសរសៃឈាម ជួយឱ្យសម្ពាធឈាម និងខ្លាញ់អាក្រក់ស្ថិតក្នុងបរិមាណល្អ។ ទម្លាប់នេះក៏ជួយកែលំអប្រព័ន្ធការពាររាងកាយ និងបង្កើនកម្លាំងសាច់ដុំផងដែរ៕

June 7, 2023

«លោតរំលង» Real ក្រុមបាល់ទាត់មួយនេះក្លាយជាក្លឹបមានតម្លៃខ្ពស់ជាងគេលើពិភពលោក

ដោយបានជោគជ័យច្រើនឆ្នាំបន្តបន្ទាប់ ពិសេសគឺនៅរដូវកាល 2022/2023 នេះ តម្លៃរបស់ក្រុមបាល់ទាត់អង់គ្លេសមួយនេះបានកើន 15% និងក្លាយជាក្លឹបបាល់ទាត់ដែលមានតម្លៃខ្ពស់ជាងគេលើពិភពលោកនាបច្ចុប្បន្ន។

បន្ទាប់ពីដណ្ដើមបានពានរង្វាន់ជើងឯក English Premier League និងជ័យជម្នះក្នុងវគ្គផ្ដាច់ព្រ័ត្រនៅ FA Cup 2023 ក្លឹប Manchester City កំពុងស្ថិតនៅចំពោះមុខឱកាសធំដែលអាចនាំទៅរកការលើកពានទាំងបីក្នុងប្រវត្តិសាស្ត្រនារដូវកាលនេះ។ ការប្រកួតផ្ដាច់ព្រ័ត្រជាមួយនឹង Inter Milan នៅពានរង្វាន់ Champions League នាថ្ងៃទី 11 មិថុនាខាងមុខ នឹងជារនាំងចុងក្រោយដែលកូនសិស្ស និងគ្រូបង្វឹក Pep Guardiola របស់ Man City ត្រូវឆ្លងឱ្យផុត ដើម្បីក្លាយជាម្ចាស់ជើងឯកបីពាន់រង្វាន់ក្នុងមួយរដូវកាល។

ថ្មីៗនេះ អង្គការ Brand Finance បានប្រកាសបញ្ជីឈ្មោះស្ដីពីបណ្ដាក្លឹបបាល់ទាត់ដែលមានតម្លៃខ្ពស់ជាងគេលើពិភពលោក ក្នុងនោះ Man City ស្ថិតនៅលើកំពូលតារាងចំណាត់ថ្នាក់ ដោយសារប្រាក់ចំណូលកើន នាំឱ្យតម្លៃយីហោក៏កើនបន្ថែម 13% ជួយឱ្យតម្លៃសរុបរបស់ក្លឹបនេះលោតឡើងដល់ 1.51 ពាន់លានអឺរ៉ូក្នុងឆ្នាំ 2023។

តារាងចំណាត់ថ្នាក់របស់ Brand Finance

ចំណែកក្លឹបដែលមានតម្លៃខ្ពស់ជាងគេលំដាប់ទីពីរលើពិភពលោក បានទៅលើ Real Madrid ព្រោះតែតម្លៃយីហោបានធ្លាក់អស់ 4% មកនៅត្រឹម 1.46 ពាន់លានអឺរ៉ូ។

បណ្ដាក្លឹបរបស់អេស្ប៉ាញ បន្តរីកចម្រើនខ្លាំងក្នុងឆ្នាំនេះ ក្នុងនោះ Barcelona ជាប់លេខបី, Atletico Madrid លេខ 12, Sevilla លេខ 25, Real Betis លេខ 34, Villareal លេខ 36 និង Real Sociedad លេខ 37។

Man United ជាប់លេខបួន ដោយមានតម្លៃ 1.4 ពាន់លានអឺរ៉ូ និងនៅពីលើ Liverpool ដែលមានតម្លៃ 1.4 ពាន់លានអឺរ៉ូដូច ប៉ុន្តែ Man United កើន 9% ខណៈ Liverpool កើនតែ 7%។ Arsenal ជាប់ចំណាត់ថ្នាក់លេខដប់ ខណៈ PSG ក៏មានឈ្មោះក្នុង Top 50៕

June 6, 2023

Tag: UN