TikTok - La Reine Media

TikTok ជិតបង្ហាញវត្តមាន TikTok Photos ដែលជាអែបចែករំលែករូបថតដាច់ដោយឡែក

ថ្មីៗនេះ អ្នកស្រាវជ្រាវផ្នែកបច្ចេកវិទ្យាម្នាក់ដែលមានគណនី X ឈ្មោះ @AssembleDebug បានរកឃើញកូដអាថ៌កំបាំង ដែលណែនាំអំពីកម្មវិធីថ្មីមួយមានឈ្មោះថា «TikTok Photos» គ្រាដែលកំពុងបកស្រាយកូដកំណែបន្ទាន់សម័យ TikTok ថ្មីបំផុត។ ប្រការនេះបង្ហាញថា TikTok ទំនងជាកំពុងត្រៀមបង្ហាញវត្តមាន អែបចែករំលែករូបថតដាច់ដោយឡែក។

ព័ត៌មានលម្អិតអំពីការបង្ហាញវត្តមាន និងប្រសិទ្ធភាពរបស់ អែប អាថ៌កំបាំងនេះ ត្រូវបាន TikTok រក្សាការសម្ងាត់។ ក៏ប៉ុន្តែ ការវិភាគទៅលើហ្វាល APK បង្ហាញថា បណ្ដាកូដដែលមានដូចជា «បើក TikTok Photos» ឬ «ចែករំលែកទៅកាន់ TikTok Photos» ជាដើម បានបញ្ជាក់ថា អ្នកប្រើប្រាស់អាចធ្វើសមកាលកម្មបណ្ដាអត្ថបទ រូបថតដែលបានបង្ហោះបច្ចុប្បន្នពី TikTok ជាមួយនឹង TikTok Photos ក្នុងក្របខណ្ឌមានជម្រើស។

បច្ចុប្បន្ន TikTok គឺជាបណ្ដាញសង្គមចែករំលែកវីដេអូដ៏ធំមួយ ហើយវាក៏អនុញ្ញាតឱ្យអ្នកប្រើប្រាស់ចែករំលែករូបថតបែបវីដេអូ ឬរូបដែលបញ្ចូលចម្រៀងផងដែរ។

ការបង្ហាញវត្តមានរបស់ TikTok Photos បង្ហាញថា បុត្រសម្ព័ន្ធរបស់ក្រុមហ៊ុនចិន Bytedance កំពុងឆ្ពោះទៅ រកការប្រកួតប្រជែងជាមួយនឹង Instagram របស់ក្រុមហ៊ុនអាម៉េរិក Meta។

March 13, 2024

មហាសេដ្ឋីរូបណាដែលមានទ្រព្យច្រើនជាងគេនៅប្រទេសចិន ក្នុងឆ្នាំ 2023?

ក្នុងបញ្ជីចំណាត់ថ្នាក់មហាសេដ្ឋីកំពូលៗនៅប្រទេសចិន ដែលគិតត្រឹមថ្ងៃទី 11 ធ្នូ ឆ្នាំ 2023 របស់ទស្សនាវដ្ដី Forbes មានមហាសេដ្ឋីបច្ចេកវិទ្យាចំនួន 5 រូប និង 3 រូបក្នុងវិស័យរថយន្ត។

នៅក្នុងឆ្នាំ 2023 នេះ មហាសេដ្ឋីដែលធ្លាប់ជាអ្នកមានជាងគេនៅប្រទេសចិន គឺលោក Jack Ma បានស្ថិតក្នុងចំណាត់ថ្នាក់ទី 6 ដោយមានទ្រព្យសរុប 24.4 ពាន់លានដុល្លារអាម៉េរិក។

លោក Ma ដែលធ្លាប់ជាគ្រូបង្រៀនភាសាអង់គ្លេស បច្ចុប្បន្នមានអាយុ 58 ឆ្នាំ។ លោកគឺជាសហស្ថាបនិកនៃក្រុមហ៊ុន Alibaba ដែលបច្ចុប្បន្នគឺជាមួយក្នុងចំណោមក្រុមហ៊ុនគ្រប់គ្រងផ្សារអនឡាញធំជាងគេនៅប្រទេសចិន។

លោក Ma បានលាឈប់ពីតំណែងនាយកប្រតិបត្តិរបស់ Alibaba កាលពីឆ្នាំ 2019។ ក្រោយការរស់នៅឯបរទេសប្រហែលមួយឆ្នាំ លោកក៏ត្រលប់ទៅកាន់ប្រទេសចិន កាលពីខែមីនា 2023 ក្នុងពេល Alibaba បង្ហើបឱ្យដឹងអំពីគម្រោងបំបែកខ្លួនជា 6 ក្រុមហ៊ុន។ លោក Ma មានភាគហ៊ុនចំនួន 3.9% នៅក្នុង Alibaba និងភាគហ៊ុននៅក្នុងបណ្ដាក្រុមហ៊ុនកម្សាន្តមួយចំនួន មានដូចជា Beijing Enlight Media និង Huayi Brothers ជាដើម។

ក្រុមហ៊ុន Alibaba បានចាប់ផ្ដើមធ្លាក់ដុនដាប បន្ទាប់ពីលោក Ma បាននិយាយរិះគន់គោលនយោបាយខ្លះរបស់រដ្ឋាភិបាលចិន ដែលដឹកនាំដោយប្រធានាធិបតី Xi Jinping។

ចំណែកមហាសេដ្ឋីដែលមានទ្រព្យច្រើនជាងគេនៅប្រទេសចិន ប្រចាំឆ្នាំ 2023 គឺលោក Zhong Shanshan។ លោកគឺជាស្ថាបនិកនៃក្រុមហ៊ុនផលិតទឹកសុទ្ធ Nongfu Spring។ លោក Shanshan កើតឆ្នាំ 1954 នៅទីក្រុង Hangzhou ខេត្ត Zhejiang ប្រទេសចិន និងបានឈប់រៀនពេលមានអាយុ 12 ឆ្នាំ ព្រោះតែបញ្ហាគ្រួសារ។ ពេញមួយទសវត្សរ៍ក្រោយមក លោកធ្វើជាកម្មករសំណង់ និងសិក្សារហូតដល់បានចូលរៀននៅមហាវិទ្យាល័យ ក្រោយពីប្រឡងធ្លាក់ពីរលើក។

ចំណាត់ថ្នាក់ទីពីរក្នុងបញ្ជីនេះ គឺមហាសេដ្ឋី Colin Huang អាយុ 43 ឆ្នាំ ដោយមានទ្រព្យ 49 ពាន់លានដុល្លារអាម៉េរិក។ លោកគឺជាស្ថាបនិករបស់ PDD Holdings ដែលនៅពីក្រោយផ្សារអនឡាញ Pinduoduo។

ចំណាត់ថ្នាក់ទីបី បានទៅលើ Zhang Yiming អាយុ 40 ឆ្នាំ ជាស្ថាបនិករបស់ ByteDance ដែលជាក្រុមហ៊ុនមេរបស់ TikTok។ លោក Yiming មានទ្រព្យ 43.4 ពាន់លានដុល្លារអាម៉េរិក។

ចំណាត់ថ្នាក់ទីបួន បានទៅលើ Ma Huateng (Pony Ma) អាយុ 51 ឆ្នាំ ជាប្រធានក្រុមហ៊ុនអ៊ីនធើណិតចិន Tencent Holdings។

ខាងក្រោមនេះគឺជាមហាសេដ្ឋីដែលមានឈ្មោះក្នុងបញ្ជីចំណាត់ថ្នាក់មហាសេដ្ឋី 10 រូបនៅប្រទេស របស់ Forbes ៖

5 – William Ding

ទ្រព្យ៖ 33.1 ពាន់លានដុល្លារអាម៉េរិក
វិស័យជំនួញ៖ បច្ចេកវិទ្យា

7 – Robin Zeng

ទ្រព្យ៖ 24.1 ពាន់លានដុល្លារអាម៉េរិក
វិស័យ៖ រថយន្ត

8 – He Xiangjian និងគ្រួសារ

ទ្រព្យ៖ 21.2 ពាន់លានដុល្លារអាម៉េរិក
វិស័យ៖ ផលិតសម្ភារៈប្រើប្រាស់ក្នុងផ្ទះ

9 – Wang Chuanfu

ទ្រព្យ៖ 15.1 ពាន់លានដុល្លារអាម៉េរិក
វិស័យ៖ រថយន្ត

10 – Eric Li

ទ្រព្យ៖ 15.1 ពាន់លានដុល្លារអាម៉េរិក
វិស័យ៖ រថយន្ត

December 13, 2023

រឿង TikToker បន្ថែមទង់ជាតិថៃទៅក្នុងវីដេអូថតនៅអង្គរវត្ត ខាង «វៀតណាមកំពុងមានចំណាត់ការ»

តំណាងមន្ទីរវប្បធម៌ និងកីឡានៃទីក្រុងហូជីមិញ ឱ្យដឹងថា បានក្ដាប់បានព័ត៌មាន និងកំពុងសហការជាមួយនឹងភាគីពាក់ព័ន្ធ ដើម្បីមានចំណាត់ការលើ TikToker វៀតណាម ហឿ ក្វុកអាញ់ (Hua Quoc Anh) ដែលបានបង្ហោះវីដេអូបង្ហាញពីទិដ្ឋភាពអង្គរបស់កម្ពុជា ប៉ុន្តែបន្ថែមរូបភាពស្ដេចថៃ និងទង់ជាតិថៃ។

ការបញ្ជាក់ខាងលើនេះត្រូវបានធ្វើឡើងកាលពីថ្ងៃទី 16 វិច្ឆិកា 2023 ដោយលោក ឡាំ ង៉ូហ្វាំងអាញ់ ប្រធានមន្ទីរវប្បធម៌ និងកីឡា នៃទីក្រុងហូជីមិញ ជាទីដែល TikToker ហឿ ក្វុកអាញ់ រស់នៅ។

ប្រធានមន្ទីររូបនេះឱ្យដឹងថា ក្រោយពីមានរបាយការណ៍ផ្លូវការ មន្ទីរវប្បធម៌ និងកីឡារបស់ទីក្រុងហូជីមិញ នឹងសហការ ក៏ដូចជាមានមិតសមស្របចំពោះបញ្ហាដែលពាក់ព័ន្ធ។

ចំណែកលោក ហ្វាំ ង៉ុក អនុប្រធានមន្ទីរខាងលើក៏បានឱ្យដឹងថា ដោយសារតែការរំលោភបំពានច្បាប់របស់ TikToker វៀតណាម ហឿ ក្វុកអាញ់ កើតឡើងនៅខាងក្រៅប្រទេសវៀតណាម ទើបអាជ្ញាធរវៀតណាមត្រូវការការបញ្ជាក់ឱ្យបានច្បាស់លាស់ មុននឹងមានចំណាត់ការ។

លោក ង៉ូ ឡាំហ្វាងអាញ់ ប្រធានការិយាល័យនៃមន្ទីរវប្បធម៌ និងកីឡាទីក្រុងហូជីមិញ បានឆ្លើយតបអ្នកសារព័ត៌មានអំពីហេតុការណ៍ដែលពាក់ព័ន្ធនឹង TikToker ហឿ ក្វុកអាញ់ (Hua Quoc Anh)

មុននោះ នៅលើទំព័រ TikTok របស់ខ្លួន ហឿ ក្វុកអាញ់ បានបង្ហោះវីដេអូមួយបង្ហាញពីនារីម្នាក់ស្លៀកឈុតពណ៌ផ្កាឈូក កាន់ដំបង ដើរក្នុងបរិវេណប្រាសាទអង្គរវត្តរបស់កម្ពុជា។ វីដេអូនេះបានធ្វើឱ្យមានការរិះគន់យ៉ាងខ្លាំងក្លាពីអ្នកលេងបណ្ដាញសង្គម ពិសេសគឺប្រជាជនកម្ពុជា ព្រោះថា ក្នុងវីដេអូដែលថតទិដ្ឋភាពអង្គរវត្ត បែរជាត្រូវបានបញ្ចូលរូបភាពទង់ជាតិថៃ ក៏ដូចជាស្ដេចថៃ និងសំឡេងនិយាយ «Hello Thailand» ជាបន្តបន្ទាប់។

ក្រោយមក នៅថ្ងៃទី 12 វិច្ឆិកា អាជ្ញាធរជាតិអប្សរា ក៏ប្រកាសថា វីដេអូដែលបាននិយាយខាងលើនេះគឺប៉ះពាល់ដល់វប្បធម៌ និងបេតិកភណ្ឌរបស់កម្ពុជា។

ក្រោយពីត្រូវបានមហាជនរិះគន់ខ្លាំងក្លានៅលើបណ្ដាញសង្គម ជនជាតិវៀតណាម ហឿ ក្វុកអាញ់ ក៏បានបង្ហោះវីដេអូសូមអភ័យទោសកាលពីព្រឹកថ្ងៃទី 14 វិច្ឆិកា។

ជនបង្កភាពហេតុ ហឿ ក្វុកអាញ់ (Hứa Quốc Anh)

បន្ទាប់មក TikToker រូបនេះក៏បានលុបវីដេអូនេះលើ Facebook, TikTok។ ទំព័រ TikTok របស់ជននេះដែលមានអ្នកតាមដានជាង 700,000 នាក់ក៏ត្រូវបានបិទ ក្រោយពីមានបញ្ហានេះ។ ក៏ប៉ុន្តែ ទោះជាយ៉ាងណាក៏ដោយ កំហឹងរបស់មហាជន ពិសេសគឺជនជាតិខ្មែរ នៅតែមិនអាចរសាយ។

នេះមិនមែនជាលើកដំបូងឡើយដែល TikToker ម្នាក់នេះ បង្កឱ្យមានការរិះគន់លើបណ្ដាញសង្គម។ កន្លងមក ជននេះក៏ធ្លាប់បានបញ្ចេញមតិខុសឆ្គងទាក់ទងនឹងរឿងសាសនា វប្បធម៌របស់ជនជាតិមួយចំនួនផងដែរ៕

November 17, 2023

TikTok ឈប់លក់ទំនិញអនឡាញនៅឥណ្ឌូណេស៊ី បន្ទាប់ពីរដ្ឋបានហាមឃាត់

TikTok សម្រេចចិត្តឈប់លក់ទំនិញតាមអនឡាញនៅប្រទេសឥណ្ឌូណេស៊ី ក្រោយពីរដ្ឋាភិបាលប្រទេសនេះបានប្រកាសហាមឃាត់ ដើម្បីការពារអាជីវកម្មខ្នាតតូច។

កាលពីថ្ងៃទី 03 តុលា 2023 TikTok ដែលជាបណ្ដាញសង្គមរបស់ក្រុមហ៊ុនចិន ByteDance បានប្រកាសថា នឹងបញ្ឈប់សកម្មភាពពាណិជ្ជកម្មនៅលើឧបករណ៍ទិញដូរទំនិញរបស់ខ្លួននៅប្រទេសឥណ្ឌូណេស៊ី ចាប់ពីថ្ងៃទី 04 តុលា 2023 នេះ។

ការសម្រេចចិត្តខាងលើរបស់បណ្ដាញសង្គមចិន TikTok ត្រូវបានធ្វើឡើងក្រោយពីរដ្ឋាភិបាលឥណ្ឌូណេស៊ីបានប្រកាសហាមឃាត់សកម្មភាពលក់ទំនិញផ្ទាល់នៅលើទំព័របណ្ដាញសង្គមនានា ដើម្បីការពារអាជីវកម្មខ្នាតតូចរបស់ខ្លួន។

ក្នុងប្រកាសថ្មីបំផុតរបស់ខ្លួន TikTok Indonesia សង្កត់ធ្ងន់ថា អាទិភាពដំបូងគេគឺការគោរពច្បាប់ និងការសម្រេចរបស់ប្រទេសដែល TikTok កំពុងធ្វើសកម្មភាព។ ក្នុងនោះ ពួកគេនឹងឈប់ធ្វើពាណិជ្ជកម្មអនឡាញនៅលើឧបករណ៍លក់ដូរទំនិញ TikTok Shop Inodnesia។

ក៏ប៉ុន្តែ TikTok ក៏យល់ថា បទបញ្ជាខាងលើរបស់រដ្ឋាភិបាលឥណ្ឌូណេស៊ី នឹងប៉ះពាល់ដល់អាជីវកររាប់លាននាក់ដែលប្រើប្រាស់ TikTok Shop ក្នុងប្រទេសដែលមានប្រជាជនច្រើនជាងគេនៅអាស៊ីអាគ្នេយ៍នេះផងដែរ។

រដ្ឋមន្ត្រីក្រសួងពាណិជ្ជកម្មឥណ្ឌូណេស៊ី Zulkifli Hasan ឱ្យដឹងថា បណ្ដាក្រុមហ៊ុនដែលមិនគោរពតាមបទបញ្ជាហាមលក់ទំនិញលើបណ្ដាញសង្គម នឹងត្រូវបានព្រមាន។ បើសិននៅតែរំលោភបំពានជាថ្មី ពួកគេនឹងត្រូវបានដកហូតអាជ្ញាប័ណ្ណអាជីវកម្មនៅឥណ្ឌូណេស៊ី។

មុននោះ រដ្ឋមន្ត្រីខាងលើយល់ថា ពាណិជ្ជកម្មអនឡាញត្រូវការបែងចែកឱ្យដាច់ពីបណ្ដាញសង្គម។ បណ្ដាញសង្គមអាចផ្សព្វផ្សាយផលិតផល ប៉ុន្តែមិនត្រូវបង្កលក្ខណៈងាយស្រួលក្នុងការលក់ដូរផលិតផលនៅលើថ្នាលបច្ចេកវិទ្យារបស់ពួកគេ។ លោក Hasan សង្កត់ធ្ងន់ថា បទបញ្ជាថ្មីនេះត្រូវបានធ្វើឡើងក្នុងបំណងការពារសហគ្រាស អាជីវកម្មខ្នាតមធ្យម និងតូច។

យោងតាមទិន្នន័យរបស់ TikTok ប្រទេសឥណ្ឌូណេស៊ីដែលមានអ្នកប្រើប្រាស់ 125 លាននាក់ គឺជាទីផ្សារធំជាងគេលំដាប់ទីពីរក្នុងពិភពលោករបស់ TikTok បន្ទាប់ពីសហរដ្ឋអាម៉េរិក។ ប៉ុន្តែ ប៉ុន្មានខែចុងក្រោយនេះ មានមតិកាន់តែច្រើនដែលអំពាវនាវឱ្យរដ្ឋគ្រប់គ្រងបណ្ដាញសង្គម និងពាណិជ្ជកម្មអនឡាញ ពេលដែលអ្នកលក់តាមបែបបុរាណយល់ឃើញថា ការលក់ទំនិញក្នុងតម្លៃទាបខ្លាំងនៅលើ TikTok Shop និងបណ្ដាញសង្គមនានា កំពុងគំរាមកំហែងដល់ «ឆ្នាំងបាយ» របស់ពួកគេ៕

October 4, 2023

ឥណ្ឌូណេស៊ីហាមលក់ទំនិញតាមបណ្ដាញសង្គមដើម្បីការពារពាណិជ្ជកម្មបែបបុរាណ

វាសនារបស់ TikTok Shop នៅប្រទេសឥណ្ឌូណេស៊ីអាចនឹងត្រូវបានសម្រេចនៅក្នុងសប្ដាហ៍នេះ ពេលដែលរដ្ឋាភិបាលរបស់ប្រទេសដែលមានប្រជាជនច្រើនជាងគេនៅអាស៊ីអាគ្នេយ៍ បានកំណត់គោលការណ៍ស្ដីពីការលក់ទំនិញតាមអនឡាញ។

លោក Oktavianus មានមុខរបរលក់សម្លៀកបំពាក់កូនក្មេងរយៈពេល 10 ឆ្នាំ នៅឯផ្សារ Tanah Abang (ហ្សាការតា) ប៉ុន្តែ ទើបតែបានងាកទៅលក់តាមអនឡាញកាលពីឆ្នាំ 2017។ អាជីវករវ័យ 37 ឆ្នាំរូបនេះ ឱ្យដឹងថា តាំងពីពេលនោះមក គាត់លក់ដាច់ជាងមុនឆ្ងាយ។ «TikTok Shop បានជួយខ្ញុំ។ ខ្ញុំបានឃើញល្បឿនរង្វិលជុំនៃទំនិញកើនពី 30% ទៅ 40%» លោក Oktavianus បានប្រាប់សារព័ត៌មាន Strait Times ដូច្នេះ។

ក៏ប៉ុន្តែ អាជីវករដូចលោក Oktavianus ទំនងជានឹងលែងបានសប្បាយចិត្តបែបនេះទៀតហើយ នៅពេលរដ្ឋាភិបាលឥណ្ឌូណេស៊ីអំពាវនាវ និងចាត់វិធានការ បង្ខំឱ្យថ្នាលបច្ចេកវិទ្យាទាំងអស់ត្រូវបែងចែកឱ្យបានច្បាស់រវាងបណ្ដាញសង្គម និងពាណិជ្ជកម្មអេឡិចត្រូនិច (ecommerce)។

ឥរិយាបថនេះធ្វើឡើងសំដៅលើបណ្ដាក្រុមហ៊ុនដូច TikTok ជាដើម ដោយក្រុមមន្ត្រីឥណ្ឌូណេស៊ីយល់ថា សកម្មភាពពាណិជ្ជកម្មនៅលើបណ្ដាញសង្គម (social commerce) គឺមិនយុត្តិធម៌ គំរាមកំហែងដល់បណ្ដាសហគ្រាសខ្នាតតូចក្នុងស្រុក។

ចំណែកភាគីតំណាង TikTok ប្រចាំប្រទេសឥណ្ឌូណេស៊ី ឱ្យដឹងថា ពាណិជ្ជកម្មសង្គម ត្រូវបានបង្កើតឡើងដើម្បីដោះស្រាយបញ្ហាជាក់ស្ដែងរបស់អាជីវករតូចតាចនៅក្នុងស្រុកដែលលក់ដូរបែបបុរាណ ដោយការតភ្ជាប់ពួកគេជាមួយនឹងក្រុមអ្នកច្នៃប្រឌិតក្នុងស្រុក ជាមនុស្សដែលអាចជួយបង្កើនការចូលមើលហាងអនឡាញរបស់អាជីវករ។

ទោះយ៉ាងណាក៏ដោយ ថ្មីៗនេះ រដ្ឋមន្ត្រីក្រសួងសហករណ៍សហគ្រាសធុនតូច និងមធ្យមឥណ្ឌូនេស៊ី Teten Masduki លើកឡើងថា សហគ្រាសលើបណ្ដាញសង្គមលក់ផលិតផលនាំចូលក្នុងតម្លៃទាបខុសធម្មតា ទាបជាងការចំណាយក្នុងការផលិតទំនិញក្នុងស្រុក និងប៉ះពាល់ដល់សហគ្រាសក្នុងស្រុក។

ក៏ប៉ុន្តែ លោកស្រី Weihan Chen ប្រធានក្រុម Insights របស់ Momentum Works ឱ្យដឹងថា ការហាមឃាត់លក់ដូរលើបណ្ដាញសង្គមអាចលុបបំបាត់រាល់ផលប្រយោជន៍ដែលបានពីបណ្ដាញសង្គម។ ប្រការនេះប្រាកដជាបង្កឱ្យមានឧបសគ្គដល់អាជីវករតូចតាច ជាក្រុមដែលមានបទពិសោធន៍តិចតួច និងមានធនធានតិចជាងគេ នាំឱ្យកំណើននៃការចាប់ផ្ដើមអាជីវកម្មយូរអង្វេងមានភាពយឺតយ៉ាវ៕

September 26, 2023

ចំណេញភ្លាមៗពី Samsung Galaxy A ស៊េរី ជាមួយការផ្ដល់ជូនដ៏ពិសេស…!

គ្រាន់តែទិញស្មាតហ្វូន Galaxy A ស៊េរីណាមួយពីសាមសុងនឹងទទួលបានប្រាក់ត្រលប់មកវិញភ្លាមៗ…!

(ភ្នំពេញ) ថ្ងៃទី 16 ខែមិថុនា ឆ្នាំ 2023 ៖ បើអតិថិជនត្រូវទិញ…ទិញឱ្យហើយទៅ…កុំនៅឡើយបង្អង់យូរ… ប្រយ័ត្នប្រម៉ូសិនអស់ធ្វើមុខជូរ…ស្មាតហ្វូនល្អលក់ដាច់មិនយូរ…ទិញប្រើភ្លាមជាប់ចិត្តភ្លែត…! អតិថិជនទាំង អស់នឹងទទួលបានប្រាក់ត្រលប់មកវិញភ្លាមៗ ព្រមទាំងរង្វាន់ម៉ាគាប់ចិត្តតែម្ដង…ចាប់ពីថ្ងៃទី 16 រហូតដល់ ថ្ងៃទី 30 មិថុនា 2023 ដោយគ្រាន់តែទិញស្មាតហ្វូន Galaxy A ស៊េរីណាមួយដូចក្រោម៖

*Galaxy A34 | A54 5G

– បានប្រាក់ត្រលប់មកវិញចំនួន 81,000៛

– កៅអីបត់ពិចនិក

– កាបូបរក្សាសីតុណ្ហភាពដ៏ស្រស់ស្អាត

*Galaxy A24

– បានប្រាក់ត្រលប់មកវិញចំនួន 61,000៛

– ស្រោមទូរស័ព្ទថ្លា និងកញ្ចក់ការពារអេក្រង់

– ឆ្នាំងសាកល្បឿនលឿនរហូតដល់ 15W

*Galaxy A14 | A14 5G

– បានប្រាក់ត្រលប់មកវិញចំនួន 61,000៛

– ឆ្នាំងសាកល្បឿនលឿនរហូតដល់ 15W

*ចំណែក Galaxy A04s

– បានប្រាក់ត្រលប់មកវិញចំនួន 61,000៛

អ៊ែមណាស់…! ឡូយណាស់…! នៅចាំអីទៀត…ប្រញាប់រួសរាន់ឡើងណាហ្វេនៗ! ទិញទូរស័ព្ទបាន ទាំងរង្វាន់…បានទាំងប្រាក់ត្រលប់មកវិញ…រកឯណាទៀត! មានតែក្រុមហ៊ុន សាមសុង ប៉ុណ្ណោះ…!

សូមបញ្ជាក់ផងដែរថាក្នុងចំណោមស្មាតហ្វូនស៊េរី A ខាងលើដែលក្រុមហ៊ុន សាមសុង ផ្តល់ប្រូម៉ូសិនជូន អតិថិជននាពេលនេះគឺសុទ្ធសឹងជាស្មាតហ្វូនដែលអាចឆក់យកបេះដូងអ្នកប្រើប្រាស់លើទីផ្សារទាំងអស់ដែលមានតម្លៃប្រហាក់ប្រហែលគ្នា…និងទទួលបានការពេញនិយមគាំទ្រយ៉ាងខ្លាំងនឹកស្មានមិនដល់! តើមានអ្វីដែលពិសេសសម្រាប់ជោគជ័យដ៏អស្ចារ្យនេះ? ព្រោះថាស្មាតហ្វូន A34 5G, A54 5G, A24 , A14, A14 5G, ឬ A04s ត្រូវបានផលិតឡើងជាមួយនឹងគុណភាពខ្ពស់…បំពាក់បច្ចេកវិទ្យាចុងក្រោយនិងមានតម្លៃ សមរម្យបំផុតស្ទើរមិនគួរឱ្យជឿ…!

សូមរំលឹកថា ក្រុមហ៊ុន សាមសុង គឺជាសមាជិកសកម្មក្នុងវិស័យឯកជនដែលធ្វើសកម្មភាពគាំទ្រដល់ទីក្រុង ប៊ូសាន នៃប្រទេសកូរ៉េ ក្លាយជាម្ចាស់ផ្ទះនៃព្រឹត្តិការណ៍ពិព័រណ៍ពិភពលោក World Expo 2030 នាពេលខាង មុខផងដែរ។

សម្រាប់ព័ត៌មានលម្អិតបន្ថែមសូមអញ្ជើញមកទស្សនាផលិតផលដោយផ្ទាល់ ឬតេស្តដោយផ្ទាល់ដៃនៅតាម ហាងទំនើបចែកចាយផលិតផល សាមសុង ទាំងអស់ដែលនៅជិតលោកអ្នកបំផុតទូទាំងប្រទេស ឬក៏អាច ចូលទៅកាន់ Facebook: SamsungCambodia, IG: samsungcambodia, TikTok: samsungcambodia ឬ ក៏អាចធ្វើការទំនាក់ទំនងទៅកាន់ផ្នែកសេវាបម្រើ អតិថិជន 24/7 ឥតគិតថ្លៃតាម រយៈទូរស័ព្ទលេខ៖ 1800-20 32 32!

*លក្ខខណ្ឌផ្សេងៗត្រូវបានអនុវត្ត…!!

June 16, 2023

រដ្ឋដំបូងគេរបស់សហរដ្ឋអាម៉េរិកដែលហាមឃាត់ TikTok ជាផ្លូវការ

អភិបាលរដ្ឋ Montana លោក Greg Gianforte បានចុះហត្ថលេខាលើច្បាប់ហាមឃាត់សកម្មភាពរបស់ TikTok ធ្វើឱ្យតំបន់មួយនេះក្លាយជារដ្ឋដំបូងគេនៅសហរដ្ឋអាម៉េរិក ដែលទប់ស្កាត់ការទាញយកកម្មវិធីវីដេអូខ្លីដែលកំពុងពេញនិយមជាងគេលើពិភពលោក។

យោងតាមទីភ្នាក់ងារសារព័ត៌មាន Reuters បទបញ្ជាហាមឃាត់នេះមានសុពលភាពចាប់ពីថ្ងៃទី 01 មករា ឆ្នាំ 2024។ រដ្ឋ Montana បានកំណត់ថា ការដែលផ្សារកម្មវិធី Google Play និង App Store អនុញ្ញាតឱ្យទាញយក TikTok នៅក្នុងរដ្ឋនេះ គឺជារឿងខុសច្បាប់។

បណ្ដាញសង្គម TikTok ដែលមានអ្នកប្រើប្រាស់ជាង 150 លាននាក់នៅសហរដ្ឋអាម៉េរិក កំពុងតែប្រឈមមុខនឹងហានិភ័យត្រូវបាត់ខ្លួនពីសហរដ្ឋអាម៉េរិក ដោយសារតែក្រុមអ្នកតាក់តែងច្បាប់នាំគ្នាជំរុញឱ្យមានការបិទខ្ទប់ ព្រោះតែការបារម្ភអំពីសន្តិសុខជាតិ។

អាជ្ញាធររដ្ឋ Montana ជាទីដែលមានប្រជាជនតែជាងមួយលាននាក់ បានឱ្យដឹងថា TikTok អាចនឹងត្រូវបានពិន័យចំពោះការរំលោភច្បាប់រៀងរាល់លើក និងពិន័យជាប្រាក់បន្ថែម 10,000 ដុល្លារ/ថ្ងៃ បើសិនមិនគោរពតាម។ Apple និង Google ក៏អាចត្រូវបង់ប្រាក់ 10,000 ដុល្លារ/ថ្ងៃ ចំពោះការមិនគោរពច្បាប់ខាងលើ។

ក៏ប៉ុន្តែ បទបញ្ជានេះទំនងជានឹងត្រូវជួបឧបសគ្គច្រើនទាក់ទងនឹងច្បាប់ស្ដីពីសិទ្ធិក្នុងការបញ្ចេញមតិរបស់អ្នកប្រើប្រាស់។ ទោះជាយ៉ាងណាក៏ដោយ កាលពីចុងខែមីនាកន្លងទៅ CEO របស់ TikTok លោក Shou Chew ត្រូវបានកោះហៅឱ្យចូលសភាជាន់ទាបអាម៉េរិក ដោយសារតែមានការសង្ស័យថា TikTok មានទំនាក់ទំនងជាមួយរដ្ឋចិន និងបានស្នើឱ្យ Bytedance ដែលជាក្រុមហ៊ុនមេរបស់ TikTok ដកទុនចេញពីបណ្ដាញសង្គមនេះ មិនដូច្នេះទេ នឹងត្រូវហាមឃាត់ទាំងស្រុង។

TikTok បានឱ្យដឹងថា ពួកគេកំពុងអនុវត្តគម្រោង Project Texas ដើម្បីបង្កើតស្ថាប័នឯករាជ្យមួយសម្រាប់ការរក្សាទិន្នន័យអ្នកប្រើប្រាស់អាម៉េរិក នៅលើម៉ាស៊ីនមេដែលគ្រប់គ្រងដោយក្រុមហ៊ុនបច្ចេកវិទ្យាអាម៉េរិក Oracle៕

May 18, 2023

អ្នកគាំទ្ររៀបចំខ្លួនដូចគ្រូបង្វឹក Honda របស់ U-22 កម្ពុជា បង្កការភ្ញាក់ផ្អើលលើវេទិកាទស្សនិកជននៅស៊ីហ្គេម

អ្នកគាំទ្រពិសេសមួយរូបមកពីប្រទេសជប៉ុន ដែលមានរូបរាងមុខមាត់ និងស្លៀកពាក់ដូចទៅនឹងគ្រូបង្វឹក Keisuke Honda របស់ U-22 កម្ពុជា បានធ្វើឱ្យមានការភ្ញាក់ផ្អើលខ្លាំងពេលបង្ហាញវត្តមាននៅឯកីឡដ្ឋានជាតិអូឡាំពិកកម្ពុជាក្នុងព្រឹត្តិការណ៍ស៊ីហ្គេមលើកទី 32។

ការប្រកួតពីរលើករបស់ U-22 កម្ពុជា មានវត្តមានអ្នកគាំទ្រពិសេសម្នាក់នៅលើវេទិកាសម្រាប់ទស្សនិកជនក្នុងកីឡដ្ឋានជាតិអូឡាំពិក។ អ្នកគាំទ្រដែលមកពីប្រទេសជប៉ុននេះ មានរូបរាងមុខមាត់ដូចទៅនឹងគ្រូបង្វឹក Keisuke Honda នៃក្រុមបាល់ទាត់បុរសវ័យក្រោម 22 ឆ្នាំ (U-22) របស់កម្ពុជា។

ពេលបង្ហាញខ្លួននៅលើវេទិកាទស្សនិកជនភ្លាម «Honda ក្លែងក្លាយ» ក៏ទទួលបានចំណាប់អារម្មណ៍ច្រើនពីអ្នកគាំទ្រកម្ពុជា។ អ្នកគាំទ្រកម្ពុជាក៏ចូលចិត្តអ្នកគាំទ្រពិសេសរូបនេះ។

បុរសសង្ហាម្នាក់នេះ តាមពិតគឺជា Makihika ដែលជា KOL (Key Opinion Leader ឬអ្នកផ្ដល់យោបល់ដែលមានឥទ្ធិពល) ជនជាតិជប៉ុនមួយរូប។ Makihika ត្រូវបានគេស្គាល់ច្រើននៅលើបណ្ដាញសង្គម ដោយមានឆានែល TikTok និង YouTube មានអ្នកតាមដានជាង 600,000 នាក់។

Makihika កំពុងតែល្បីឈ្មោះខ្លាំង ដោយសារមានរូបរាងមុខមាត់ដូចទៅនឹងគ្រូបង្វឹក Keisuke Honda។ Makihika និយាយថា «ខ្ញុំគាំទ្រ Honda ទើបបានជាតាមដានដំណើររបស់គាត់។ ខ្ញុំបានស្វែងយល់អំពីឥរិយាបថ ការស្លៀកពាក់ ការធ្វើខ្លួនរបស់ Honda ដើម្បី «សំដែង» ជារូបគាត់»។

Makihika តែងតែមកកាន់កម្ពុជានៅពេលមានព្រឹត្តិការណ៍ប្រកួតធំៗរបស់ក្រុមបាល់ទាត់កម្ពុជា។ Makihika និយាយថា គាត់មកកាន់កម្ពុជាច្រើនថ្ងៃមកហើយ និងមានវត្តមាននៅលើវេទិកាទស្សនិកជនរបស់កីឡដ្ឋានជាតិអូឡាំពិកដើម្បីផ្ដល់កម្លាំងចិត្តដល់ U-22 កម្ពុជា។

Makihika នឹងធ្វើដំណើរជាមួយក្រុម U-22 កម្ពុជា ក៏ដូចជានិមិត្តរូប Honda របស់គាត់ នៅក្នុងការប្រកួតទាំងឡាយនាពេលខាងមុខនៅស៊ីហ្គេមលើកទី 32 នេះ៕

May 3, 2023

TikTok បានជួយឱ្យអ្នកលេងវ័យ 20ឆ្នាំម្នាក់ ក្លាយជាសេដ្ឋី

TikTok គឺជាបណ្ដាញសង្គមមួយក្នុងចំណោមបណ្ដាញសង្គមដែលមានអ្នកប្រើប្រាស់ច្រើនជាងគេបង្អស់នាបច្ចុប្បន្ន ហើយវាកំពុងតែក្លាយជាឱកាសសម្រាប់ការរកប្រាក់របស់យុវវ័យ តាមរយៈចំណង់ចំណូលចិត្តផ្ទាល់ខ្លួន។

យោងតាមស្ថិតិពី TikTok ក្នុងចំណោមជនជាតិអាមេរិកាំង3នាក់ដែលប្រើស្មាតហ្វូន គឺមានម្នាក់ប្រើប្រាស់បណ្ដាញសង្គម TikTok។ ដោយសារមូលហេតុនេះហើយ បើទោះជាមានការព្រមានទាក់ទងនឹងសន្តិសុខជាតិនៅសហរដ្ឋអាមេរិក ក្រុមហ៊ុនផ្សាយពាណិជ្ជកម្មជាច្រើននៅតែចាត់ទុក TikTok ជាកន្លែងដ៏ល្អដើម្បីធ្វើការឃោសនាផលិតផល។

ជាមួយនឹងអ្នកប្រើប្រាស់ប្រចាំខែប្រមាណជា 690លាននាក់នៅទូទាំងពិភពលោក បណ្ដាញសង្គម TokTok ត្រូវបានក្រុមអ្នកផលិតវីដេអូវាយតម្លៃថា មិនមានគូប្រជែងនៅលើទីផ្សារ បើគេពិនិត្យទៅលើលទ្ធភាពនៃការ «សាយភាយ» តួលេខអ្នកតាមដាន និងឱកាសអភិវឌ្ឍអាជីព។ TikTok ក្លាយជាផ្ទះថ្មីដែលបើកផ្លូវឱ្យក្រុមមនុស្សដែលមានឥទ្ធិពលបានរីកចម្រើន ពិសេសគឺក្រុមមនុស្សដែលមានឈ្មោះល្បីនៅលើ Youtube និង Instagram។

Michael Le អាយុ 20ឆ្នាំ ដែលចូលចិត្តបង្ហោះវីដេអូរាំកំសាន្តនៅលើ TikTok ទទួលបានការតាមដានពីអ្នកលេងបណ្ដាញសង្គមនេះចំនួន 42.5លាននាក់ និងមានអ្នកចុចចូលចិត្តជាង 1.2ពាន់លានលើក។ ថ្មីៗនេះ Michael Le បានទិញផ្ទះមួយខ្នងនៅ Los Angeles បន្ទាប់ពីបានរើមកពី Florida។

បច្ចុប្បន្ន Michael Le រស់នៅ និងធ្វើការជាមួយសមាជិក 7នាក់ផ្សេងទៀតនៅក្នុងក្រុមរបស់ខ្លួន រួមមាន ម្ដាយ និងប្អូនៗរបស់គាត់។ Michael Le ប្រាប់ថា៖ «ខ្ញុំមានអារម្មណ៍ថា មានសុវត្ថិភាពផ្នែកហិរញ្ញវត្ថុ។ ខ្ញុំគិតថា ខ្លួនបានជ្រើសរើសផ្លូវដែលឆ្លាតវៃ។ បច្ចុប្បន្ន ប្រាក់របស់ខ្ញុំបានឡើងដល់ 7ខ្ទង់»។

ប្រភពចំណូលចម្បងរបស់ Michael Le គឺបានមកពីទំនាក់ទំនងជាដៃគូនៅលើ TikTok ជាមួយនឹងចំណូលចាប់ពី 20,000 ដល់ 50,000ដុល្លារអាមេរិកសម្រាប់ការបង្ហោះអត្ថបទផ្សាយពាណិជ្ជកម្មមួយនៅលើទំព័រ TikTok។ Michael Le ធ្លាប់បានសហការជាមួយក្រុមហ៊ុនមួយចំនួន ដូចជា Amazon Prime Video, Bliss Skincare, Bang Energy, Postmate, Safeguard Soap និង Tums ផងដែរ។

Michael Le និយាយថា៖ «នោះពិតជារឿងដ៏ចៃដន់ សម្រាប់ក្រុមហ៊ុនណាដែលសម្រេចចិត្តសហការជាមួយខ្ញុំ។ ខ្ញុំពិតជាមានទឹកចិត្តបើកទូលាយជាមួយនឹងគ្រប់យ៉ាង។ ក្រុមហ៊ុនមួយដែលចង់ផ្សាយពាណិជ្ជកម្ម ខ្ញុំតែងផ្ដល់យោបល់ដល់ពួកគេ។ បើពួកគេនៅតែសម្រេចចិត្តជ្រើសរើសតាមផែនការដំបូង ពេលនោះ ខ្ញុំអាចនឹងយកថ្លៃខ្ពស់ជាងធម្មតា។ ក៏ប៉ុន្តែ បើសិនជាមានប្រការអ្វីមួយដែលមានលក្ខណបង្ខិតបង្ខំខ្លាំងពេកចំពោះខ្ញុំ ពេលនោះខ្ញុំនឹងមិនធ្វើឡើយ»។

ចំនួនអ្នកតាមដានកាន់តែច្រើន ប្រាក់ដែលរកបានពីការផ្សាយពាណិជ្ជកម្មក៏កាន់តែខ្ពស់។ ទំនាក់ទំនងរវាងក្រុមអ្នកផលិតវីដេអូ និងក្រុមហ៊ុនផ្សាយពាណិជ្ជកម្ម នាំមកនូវប្រយោជន៍រួម ពិសេស ចំពោះក្រុមហ៊ុន ឬយីហោចាស់។ ក្នុងករណីនេះ Michael Le បានឧទ្ធេសនាមក្រុមហ៊ុនផលិតភេសជ្ជប៉ូវកម្លាំង Bang Energy នៅលើបណ្ដាញសង្គម TikTok ក្រោយការធ្វើសកម្មភាពជាច្រើនឆ្នាំនៅលើបណ្ដាញសង្គម Youtube។

Evan Horowitz នាយកក្រុមហ៊ុនច្នៃប្រឌិត Movers + Shakers ដែលមានទីស្នាក់ការកណ្ដាលនៅទីក្រុង Los Angeles សហរដ្ឋអាមេរិក ឱ្យដឹងថា៖ «TikTok គឺជាបណ្ដាញសង្គមសម្រាប់មនុស្សជំនាន់ Z ដោយអ្នកលេងភាគច្រើនគឺមានអាយុក្រោម 18ឆ្នាំ។ ដូច្នេះហើយ ឱកាសធ្វើការជាមួយនឹងយីហោមួយជាលើកដំបូង គឺពិតជានឹងគួរឱ្យចងចាំ»។

បច្ចុប្បន្ន Michael Le មិនមែនជាម្ចាស់គណនី TikTok ដែលមានអ្នកតាមដានច្រើនជាងគេនៅក្នុងបណ្ដាញសង្គមរបស់ចិននេះទេ។ នារីចំទង់ វ័យ 16ឆ្នាំ ឈ្មោះ Charli D’Amelio ដែលមានទីលំនៅនៅ Los Angeles ទើបជាម្ចាស់គណនី TikTok ដែលមានអ្នកតាមដានច្រើនជាងគេបង្អស់៕

ប្រភព៖ Yahoo Finance

December 8, 2020

TikTok ត្រូវតែសុំច្បាប់ចិន បើសិនជាចង់លក់ទៅឱ្យក្រុមហ៊ុនណាមួយ

ប្រទេសចិនទើបតែបានចេញច្បាប់កំណត់ថ្មីមួយអំពីការនាំចេញផលិតផលបច្ចេកវិទ្យា នាំឱ្យក្រុមហ៊ុន ByteDance ជួបការលំបាកធ្ងន់ធ្ងរនៅពេលត្រូវសុំការអនុញ្ញាតពីរដ្ឋាភិបាលចិន ទើបមានសិទ្ធិលក់ TikTok។

យោងតាមប្រភពព័ត៌មានរបស់ Bloomberg បច្ចេកវិទ្យា AI interface technology ដូចជាបច្ចេកវិទ្យាកំណត់សម្គាល់សំឡេង និងកំណត់សម្គាល់អក្សរ ក៏ដូចជាបណ្ដាបច្ចេកវិទ្យាវិភាគទិន្នន័យដើម្បីបង្ហាញអំពីខ្លឹមសារដែលត្រូវបានធ្វើឱ្យទៅជាឯកជនភាព (personalized) ត្រូវបានដាក់បញ្ចូលទៅក្នុងបញ្ជីនៃបណ្ដាផលិតផលដែលត្រូវត្រួតពិនិត្យ មុននឹងនាំចេញ។ នេះគឺជាសេចក្ដីប្រកាសរបស់ក្រសួងពាណិជ្ជកម្មចិន ដែលបានចេញផ្សាយកាលពីថ្ងៃទី21សីហា។ ច្បាប់នេះបានកំណត់ថា ការលក់ផលិតផលដែលប្រើប្រាស់បច្ចេកវិទ្យាដូចបានរៀបរាប់ខាងដើម ទៅឱ្យបរទេស គឺត្រូវតែមានការអនុញ្ញាតពីអាជ្ញាធរចិន ដើម្បី “ការពារសន្តិសុខសេដ្ឋកិច្ចជាតិ”។

ដូច្នេះ ការកំណត់ថ្មីខាងលើនេះ រួមបញ្ចូលទាំងបណ្ដាក្រុមហ៊ុនបុត្រសម្ព័ន្ធផ្នែកបច្ចេកវិទ្យាដែល ByteDance កំពុងប្រើប្រាស់នៅក្នុង TikTok នឹងត្រូវបានបង្គាប់ឱ្យសុំច្បាប់រដ្ឋាភិបាល បើសិនជាចង់លក់ទៅឱ្យក្រុមហ៊ុនដទៃ។ Bloomgerg បានឱ្យដឹងថា ការកំណត់ថ្មីនេះ គឺក្នុងបំណងពន្យារពេលការលក់ ពោលគឺមិនមែនហាមទាំងស្រុងនោះឡើយ។

កន្លងមក រដ្ឋាភិបាលរបស់លោក Donald Trump បានឱ្យដឹងថា ByteDance ត្រូវតែលក់ TikTok នៅសហរដ្ឋអាមេរិក ព្រោះតែព្រួយបារម្ភអំពីបញ្ហាសន្តិសុខជាតិ។ ក្រុមហ៊ុន Microsoft និង Oracle ថ្មីៗនេះ ក៏បានផ្ញើឯកសារចុះឈ្មោះចូលរួមដេញថ្លៃទិញ TikTok នៅសហរដ្ឋអាមរិកផងដែរ។ ជាងនេះ ក្រុមហ៊ុន Centricus Asset Management និង ក្រុមហ៊ុន Triller ក៏បានបង្ហើបអំពីបំណងទិញយក TikTok នៅប្រទេសមួយចំនួន ក្នុងតម្លៃ20ពាន់លានដុល្លារអាមេរិក។

លោក Chang Yiming ស្ថាបនិកនៃក្រុមហ៊ុន ByteDance ដែលជាម្ចាស់កម្មសិទ្ធិរបស់ TikTok

ក្រុមហ៊ុន ByteDance បានឱ្យដឹងថា ខ្លួនបានទទួលដំណឹងស្ដីអំពីការកំណត់ថ្មីរបស់រដ្ឋាភិបាលចិនរួចហើយ។ ភាគី ByteDance បញ្ជាក់ថា ក្រុមហ៊ុននេះនឹង “គោរពតាមដោយពេញលេញ” ចំពោះការកំណត់ថ្មីនេះ។

អ្នកជំនាញការទាក់ទិននឹងបញ្ហាខាងលើដែលសុំមិនបញ្ចេញឈ្មោះ យល់ថា ការកំណត់ថ្មីរបស់ទីក្រុងប៉េកាំង នឹងធ្វើឱ្យមានភាពយឺតយ៉ាវ ហើយអាចបំផ្លាញរាល់ការជួញដូរទាំងអស់របស់ក្រុមហ៊ុនបច្ចេកវិទ្យារបស់ចិន។ ដំណើរការនៃការត្រួតពិនិត្យ និងស្រាវជ្រាវទៅលើករណីសុំច្បាប់សម្រាប់ការជួញដូរដែលពាក់ព័ន្ធនឹងច្បាប់កំណត់ថ្មីនេះ ក៏នឹងត្រូវចំណាយពេលច្រើន ដូច្នេះ កិច្ចព្រមព្រៀងរបស់ TikTok ជាមួយនឹងក្រុមហ៊ុនដទៃនឹងអាចត្រូវពន្យារពេលរហូតដល់ក្រោយការបោះឆ្នោតសកលក្នុងខែវិច្ឆិកានៅសហរដ្ឋអាមេរិក៕

ប្រភព៖ Bloomberg

August 31, 2020

Tag: TikTok