SWIFT - La Reine Media

Taylor Swift ក្លាយជាមហាសេដ្ឋិនីថ្មី និងល្បីឈ្មោះជាងគេក្នុងឆ្នាំនេះ

តារាចម្រៀង Taylor Swift មានឈ្មោះក្នុងបញ្ជីចំណាត់ថ្នាក់មហាសេដ្ឋីរបស់ Forbes សម្រាប់ឆ្នាំ 2024 នេះ។

កាលពីថ្ងៃទី 2 មេសា ទស្សនាវដ្ដី Forbes បានប្រកាសបញ្ជីឈ្មោះស្ដីពីក្រុមអ្នកមានជាងគេលើពិភពលោក សម្រាប់ឆ្នាំ 2024។ Forbes ឱ្យដឹងថា ពិភពលោកបច្ចុប្បន្នមានមហាសេដ្ឋីថ្មីចំនួន 265 នាក់បន្ថែមទៀត ដោយសារទីផ្សារមូលបត្រកាលពីឆ្នាំកន្លង។ ពួកគេមកពីប្រទេសចំនួន 32 និងមានទ្រព្យសរុប 510 ពាន់លានដុល្លារអាម៉េរិក។

មហាសេដ្ឋិនីដែលល្បីឈ្មោះជាងគេក្នុងឆ្នាំនេះ គឺតារាចម្រៀងស្រីអាម៉េរិក Taylor Swift។ ដំណើរសម្ដែងជុំវិញពិភពលោក Eras Tour របស់នាង បានក្លាយជាដំណើរសម្ដែងដំបូងលើពិភពលោក ដែលរកចំណូលបាន 1,000 លានដុល្លារ។

បច្ចុប្បន្ន Taylor Swift មានទ្រព្យប្រមាណ 1.1 ពាន់លានដុល្លារអាម៉េរិក។ Swift ក៏ជាអ្នកចម្រៀងដំបូងគេដែលរកបានទ្រព្យពាន់លានដុល្លារ ដោយសារតែការនិពន្ធ និងការសម្ដែង។

April 5, 2024

សេដ្ឋកិច្ចសិង្ហបុរី ទទួលបានរាប់រយលានដុល្លារពីការប្រគំតន្ត្រី Taylor Swift

ការសម្ដែង និងច្រៀងរបស់តារាចម្រៀង Taylor Swift ត្រូវបានរំពឹងថា នឹងនាំមកនូវផលប្រយោជន៍ផ្នែកសេដ្ឋកិច្ចជិត 400 លានដុល្លារអាម៉េរិក សម្រាប់សិង្ហបុរី នៅពេលសេវាកម្មជាច្រើនផ្ទុះការពេញនិយម។

នាថ្ងៃទី 04 មីនា រដ្ឋមន្ត្រីក្រសួងវប្បធម៌ សហគមន៍ និងយុវជនសិង្ហបុរី Edwin Tong បានថ្លែងចំពោះមុខសភាប្រទេសនេះថា សេដ្ឋកិច្ចនឹងទទួលផលធំពីការប្រគំតន្ត្រីរបស់តារាចម្រៀងស្រី Taylor Swift នៅទីនេះ។ «ខ្ញុំអាចធានាបានថា ផលប្រយោជន៍ផ្នែកសេដ្ឋកិច្ចសម្រាប់សិង្ហបុរីគឺពិតជាធំណាស់ ហើយលើសពីទឹកប្រាក់ដែលបានចំណាយសម្រាប់ Taylor Swift មកសម្ដែងនៅទីនេះ» លោកថ្លែងដូច្នេះ។

លោករដ្ឋមន្ត្រីក៏មិនភ្លេចលើឡើងអំពីផលប្រយោជន៍ផ្ទាល់ផ្នែកសេដ្ឋកិច្ច ដែលរួមមាន ចំនួនភ្ញៀវទេសចរណ៍ ប្រាក់ចំណូលពីសំបុត្រយន្តហោះ សំបុត្រចូលទស្សនាការសម្ដែង កន្លែងស្នាក់នៅ ក៏ដូចជាប្រាក់ចំណូលដែលបានពីសេវាកម្សាន្ត ការទិញដូរទំនិញ និងការហូបចុកនៅសិង្ហបុរីជាដើម។ មន្ត្រីនៅធានាគារ Maybank ឱ្យដឹងថា ប្រមាណ 70% នៃភ្ញៀវដែលមកទស្សនាការសម្ដែងនេះគឺជាជនបរទេស។

កាលពីខែកន្លង Strait Times ចេញផ្សាយថា អ្នកសេដ្ឋកិច្ចប៉ាន់ស្មានថា ការប្រគំតន្ត្រីរបស់ Taylor Swift នាំមកនូវប្រាក់ចំណូលពី 350 ដល់ 500 លានដុល្លារសិង្ហបុរី (ពី 260 ដល់ 371.9 លានដុល្លារអាម៉េរិក) សម្រាប់សេដ្ឋកិច្ចសិង្ហបុរី។

តួលេខពីក្រុមហ៊ុនទិន្នន័យសណ្ឋាគារ Smith Travel Research ឱ្យដឹងថា បន្ទាប់ពី Swift បានប្រកាសកាលបរិច្ឆេទសម្ដែងភ្លាម ចំនួនភ្ញៀវដែលបានកក់បន្ទប់សណ្ឋាគារនានានៅសិង្ហបុរី ក្នុងខែមីនា 2024 បានកើន 10%។

លើទំព័រ CNBC ក្រុមហ៊ុនអាកាសចរណ៍ Singapore Airlines និង Scoot ឱ្យដឹងថា តម្រូវការហោះហើរទៅកាន់សិង្ហបុរី ក្នុងខែមីនា កើនឡើងខ្ពស់ខ្លាំង ពិសេសអ្នកដំណើរពីតំបន់អាស៊ីអាគ្នេយ៍។ Jetstar Asia ក៏បង្ហើបឱ្យដឹងដែរថា តម្រូវការហោះហើរកើន 20% ចំពោះបណ្ដាជើងហោះហើរពីបាងកក ម៉ានីល និងហ្សាការតា ទៅកាន់សិង្ហបុរី។

ដំណើរសម្ដែងរបស់ Taylor swift នៅសិង្ហបុរី នឹងអូសបន្លាយពេល 6 ថ្ងៃ ចាប់ពីថ្ងៃទី 02 ដល់ទី 09 ខែមីនា ឆ្នាំ 2024។ សំបុត្រទាំង 300,000 សន្លឹកសម្រាប់ទស្សនាការសម្ដែង 6 យប់ ត្រូវបានលក់អស់គ្មានសល់។ តម្លៃសំបុត្រពិសេស (VIP) គឺជាង 900 ដុល្លារអាម៉េរិក។

Eras Tour របស់ Taylor បានចាប់ផ្ដើមពីខែមីនាឆ្នាំ 2023 ហើយគ្រោងនឹងបញ្ចប់នៅក្នុងខែធ្នូឆ្នាំ 2024 ក្នុងនោះមានការសម្ដែងចំនួន 151 យប់។ ក្នុងការសម្ដែងមួយយប់ មានទស្សនិកជនប្រហែល 72,000 នាក់ ដែលគ្រោងនឹងរកបានចំណូល 17 លានដុល្លារអាម៉េរិក៕

March 4, 2024

សិង្ហបុរី បង្ហើបឱ្យដឹងពីវិធីអញ្ជើញ Taylor Swift មកបើកខនសឺតផ្ដាច់មុខនៅអាស៊ីអាគ្នេយ៍

សិង្ហបុរីចំណាយប្រាក់យ៉ាងច្រើនដើម្បីបញ្ចុះបញ្ចូលកំពូលតារាចម្រៀង Taylor Swift មកបើកខនសឺននៅប្រទេសនេះ ដែលក្លាយជាទីសំចតតែមួយគត់របស់នាងនៅតំបន់អាស៊ីអាគ្នេយ៍។

«ដំណើរសម្ដែងនេះអាចនាំមកនូវផលប្រយោជន៍ច្រើនដល់សេដ្ឋកិច្ចសិង្ហបុរី…។ នេះគឺជាអ្វីដែលបានកើតឡើងនៅតាមបណ្ដាទីក្រុងដែល Taylor Swift ធ្លាប់បានទៅសម្ដែង» ក្រសួងវប្បធម៌ និងទេសចរណ៍សិង្ហបុរី ប្រកាលកាលពីថ្ងៃទី 20 កុម្ភៈដូច្នេះ។

ក្រសួងនេះបានឱ្យដឹងថា បានធ្វើការជាមួយ AEG Presents ដែលជាស្ថាប័នប្រារព្ធកម្មវិធី Eras Tour របស់ Taylor Swift ដើម្បីបញ្ចុះបញ្ចូលតារាចម្រៀងនេះមកសម្ដែងនៅសិង្ហបុរី។ ក្រសួងនេះបានឱ្យដឹងថា បានចំណាយប្រាក់ឧបត្ថម្ភសម្រាប់ Taylor Swift ប៉ុន្តែមិនបានបង្ហើបឱ្យដឹងអំពីតួលេខជាក់លាក់។

កាលពីសប្ដាហ៍កន្លង នាយករដ្ឋមន្ត្រីថៃ លោក Srettha Thavisin បានថ្លែងនៅក្នុងវេទិកាជំនួញថា សិង្ហបុរីបានចំណាយប្រាក់សម្រាប់ Taylor 100 លានបាត (ជាង 2.7 លានដុល្លារអាម៉េរិក) សម្រាប់ការសម្ដែងមួយយប់នៅប្រទេសនេះ អមនឹងលក្ខខណ្ឌ «សិង្ហបុរីត្រូវតែជាទីសំចតតែមួយគត់របស់តារាចម្រៀងស្រីរូបនេះនៅអាស៊ីអាគ្នេយ៍»។ ក៏ប៉ុន្តែ រដ្ឋាភិបាលសិង្ហបុរីមិនទាន់មានការអធិប្បាយអ្វីនៅឡើយ ទាក់ទងនឹងការលើកឡើងរបស់នាយករដ្ឋមន្ត្រីថៃ។

ដំណើរសម្ដែងរបស់ Taylor swift នៅសិង្ហបុរី នឹងអូសបន្លាយពេល 6 ថ្ងៃ ចាប់ពីថ្ងៃទី 02 ដល់ទី 09 ខែមីនា ឆ្នាំ 2024។ សំបុត្រទាំង 300,000 សន្លឹកសម្រាប់ទស្សនាការសម្ដែង 6 យប់ ត្រូវបានលក់អស់គ្មានសល់។ តម្លៃសំបុត្រពិសេស (VIP) គឺជាង 900 ដុល្លារអាម៉េរិក។

Eras Tour របស់ Taylor បានចាប់ផ្ដើមពីខែមីនាឆ្នាំ 2023 ហើយគ្រោងនឹងបញ្ចប់នៅក្នុងខែធ្នូឆ្នាំ 2024 ក្នុងនោះមានការសម្ដែងចំនួន 151 យប់។ ក្នុងការសម្ដែងមួយយប់ មានទស្សនិកជនប្រហែល 72,000 នាក់ ដែលគ្រោងនឹងរកបានចំណូល 17 លានដុល្លារអាម៉េរិក៕

February 21, 2024

Taylor Swift ចំណាយជាង 50 លានដុល្លារសម្រាប់ជាអំណោយជូនក្រុមការងារ

កំពូលតារាចម្រៀងប៉ប់ Taylor Swift បានចំណាយប្រាក់ចំនួន 55 លានដុល្លារ សម្រាប់ជារង្វាន់ជូនក្រុមការងារបើកឡាន អ្នករៀបចំអាហារហូបចុច អ្នកដំឡើងឆាក និងក្រុមអ្នករាំជាដើម ដែលធ្វើការនៅក្នុងដំណើរសំដែង Eras Tour របស់នាងនៅសហរដ្ឋអាម៉េរិក។

យោងតាមប្រភពព័ត៌មាននានាដែលបានប្រាប់ទំព័រ People កំពូលតារាចម្រៀងស្រី Taylor Swift ថ្មីៗនេះបានប្រគល់ប្រាក់រង្វាន់ជូនដល់បុគ្គលិកទាំងអស់ដែលបម្រើការនៅក្នុងដំណើរសំដែងជុំវិញសហរដ្ឋអាម៉េរិករបស់នាងនៅក្នុងរយៈពេល 5 ខែកន្លង។

ទំព័រ TMZ ក៏បានផ្សាយថា កំពូលតារាចម្រៀងវ័យ 33 ឆ្នាំរូបនេះ បានផ្ដល់រង្វាន់ជូនដល់អ្នកបើកបររថយន្តម្នាក់ៗ 100,000 ដុល្លារ។ អ្នកបើកបររថយន្តដឹកសម្ភារៈសម្រាប់ការសម្ដែងរបស់ Taylor Swift មានប្រហែល 50 នាក់ ដែលនេះមានន័យថា គ្រាន់តែអ្នកបើកបររថយន្តមួយមុខ Taylor ត្រូវចំណាយប្រាក់អស់ 5 លានដុល្លារបាត់ទៅហើយ។

ទិន្នន័យរបស់ Pollstar បង្ហាញថា Eras Tour រកប្រាក់ពីការលក់សំបុត្របាន 300.8 លានដុល្លារអាម៉េរិក រាប់ចាប់តាំងពីខែមីនារហូតដល់បច្ចុប្បន្ន។ តម្លៃជាមធ្យមរបស់សំបុត្រចូលទស្សនាខន់ស៊ើតរបស់ Taylor Swift គឺ 253 ដុល្លារ។ បន្ទាប់ពីការសម្ដែងនៅក្នុង 22 ទីតាំងបានបញ្ចប់ Eras Tour លក់សំបុត្របានជាងមួយលានសន្លឹក។

តាមគម្រោង Taylor Swift នឹងបញ្ចប់រដូវកាលសម្ដែងរបស់ខ្លួននៅសហរដ្ឋអាម៉េរិកត្រឹមពាក់កណ្ដាលខែសីហានេះ។ ចាប់ពីចុងខែនេះ Taylor Swift នឹងចាប់ផ្ដើមដំណើរសម្ដែងរបស់ខ្លួននៅអាម៉េរិកឡាទីន បន្ទាប់មកគឺនៅអាស៊ី អឺរ៉ុប និងអូស្ត្រាលីនាឆ្នាំក្រោយ។

កម្មវិធីដំណើរសម្ដែង Eras Tour របស់ Taylor Swift ត្រូវបានគេព្យាករថា នឹងជាព្រឹត្តិការណ៍សម្ដែងដែលរកបានប្រាក់ចំណូលច្រើនជាងគេបង្អស់នៅគ្រប់សម័យកាល។

យោងតាមស្ថិតិរបស់ទស្សនាវដ្ដី Forbes ដែលបានចុះផ្សាយកាលពីខែមិថុនា 2023 Taylor Swift គឺជាអ្នកចម្រៀងរកស៊ីមានបានដោយខ្លួនឯងមានទ្រព្យច្រើនជាងគេលំដាប់ទីពីរក្នុងវិស័យចម្រៀង បន្ទាប់ពី Rihanna។ នាងក៏ជាប់ចំណាត់ថ្នាក់ទី 34 នៅក្នុងតារាងចំណាត់ថ្នាក់ស្ដីពី «ស្ត្រីរកស៊ីមានបានដោយខ្លួនឯងដែលមានទ្រព្យច្រើនបំផុតនៅសហរដ្ឋអាម៉េរិក»។ ទ្រព្យសរុបរបស់ Taylor Swift ត្រូវបានគណនាឃើញថា មានរហូតដល់ 740 លានដុល្លារអាម៉េរិក៕

August 4, 2023

អ្នកវិទ្យាសាស្ត្រកំពុង «គយគន់» ទិដ្ឋភាពប្រហោងខ្មៅហែកស៊ីផ្កាយ កាលពី 10 ពាន់លានឆ្នាំមុន

វត្ថុអវកាសដែលមានឈ្មោះថា J221951 គឺជាមួយក្នុងចំណោមវត្ថុអវកាសដែលភ្លឺចែងចាំងជាងគេដែលអ្នកវិទ្យាសាស្ត្រធ្លាប់បានរកឃើញ។ វាមានចម្ងាយពីផែនដីរហូតដល់ 10 ពាន់លានឆ្នាំពន្លឺ។ នេះបើយោងតាម Live Science។

នៅក្នុងការសិក្សាស្រាវជ្រាវថ្មីបំផុត ក្រុមអ្នកវិទ្យាសាស្ត្រមកពីសាកលវិទ្យាល័យ Queen’s Belfast (អង់គ្លេស) បានព្យាយាមរកប្រភពរបស់ពន្លឺចែងចាំងខ្លាំង ដែលតេឡេស្កុប Hubble និង Neil Gehrels Swift របស់ណាសាបានរកឃើញ។

ដំបូងឡើយ អ្នកវិទ្យាសាស្ត្រយល់ច្រឡំថា J221951 គឺជាបាតុភូតផ្ទុះដែលបង្កឡើងដោយការបុកគ្នារបស់ផ្កាយពីរដួង។ ក្រោយមក ទិន្នន័យបន្ថែមពី Hubble និង Neil Gehrels Swift បានបង្ហាញថា J221951 ស្ថិតនៅត្រង់ជួរជាមួយនឹងកាឡាក់ស៊ីមួយដែលមានចម្ងាយពីផែនដីរហូតដល់ 10 ពាន់លានឆ្នាំពន្លឺ។

និយាយឱ្យស្រួលស្ដាប់ គឺថា មនុស្សកំពុងតែមើលទៅកាន់អតីតកាលរបស់កាឡាក់ស៊ីមួយដែលមានវត្តមាននៅពេលចក្រវាលទើបមានអាយុត្រឹមតែជាង ¼ នៃអាយុកាលបច្ចុប្បន្ន និងគយគន់ព្រឹត្តិការណ៍ជះពន្លឺដ៏មហិមាមួយកើតឡើងកាលពី 10 ពាន់លានឆ្នាំមុន។

វត្ថុអវកាសខាងលើត្រូវបានកំណត់អត្តសញ្ញាណថាជាប្រហោងខ្មៅខ្នាតយក្ស ដែលទើបបញ្ចេញសកម្មភាពនៅក្នុងហេតុការណ៍ផ្ទុះដ៏ខ្លាំងក្លាមួយ ទើបវាបញ្ចេញពន្លឺជាទម្រង់ quasar (quasar គឺជាស្នូលកាឡាក់ស៊ីសកម្មដែលមានពន្លឺខ្លាំង)។ ប្រហោងខ្មៅតែងតែបញ្ចេញពន្លឺបែបនេះនៅពេលវាកំពុងហែកស៊ីផ្កាយណាមួយដែលចូលមកក្បែរ។

បើទោះជាវត្ថុអវកាសខាងលើកើតឡើងដោយមូលហេតុអ្វីក៏ដោយ ទិដ្ឋភាពពាន់ឆ្នាំមានម្ដងមួយនេះនៅតែជាឱកាសដ៏សែនល្អ ជួយឱ្យអ្នកវិទ្យាសាស្ត្រមើលឃើញប្រហោងខ្មៅ ព្រោះនៅពេលអសកម្ម ប្រហោងខ្មៅនឹងងងឹតសូន្យសុង ហើយមនុស្សមិនអាចមើលឃើញ៕

July 12, 2023

ធនាគារជាតិ បើកសិក្ខាសាលាស្តីពីកម្មវិធីរក្សាសុវត្ថិភាពសម្រាប់អតិថិជន

ភ្នំពេញ៖ ដើម្បីផ្តល់សុវត្ថិភាពដល់អតិថិជនក្នុងគ្រឹះស្ថានធនាគារក៏ដួចជាគ្រឹះស្ថានមីក្រូហិរញ្ញវត្ថុដែរនោះ ធនាគារជាតិនៃកម្ពុជា (NBC) បានសហការជាមួយក្រុមហ៊ុន SWIFT បើកសិក្ខាសាលាស្តីពី “កម្មវិធីរក្សាសុវត្ថិភាពសម្រាប់អតិថិជន” (Customer Security Program)។

លោកជំទាវ ជា សេរី អគ្គនាយិកាបច្ចេកទេសនៃធនាគារជាតិនៃកម្ពុជាដែលបានអញ្ជើញជាអធិបតីភាពក្នុងពិធីបើកសិក្ខាសាលានេះបានមានប្រសាសន៍ថា សិក្ខាសាលានេះមានគោលបំណងចែករំលែកអំពីក្របខ័ណ្ឌរក្សាសុវត្ថិភាព ការពិនិត្យលើប្រព័ន្ធគ្រប់គ្រងសុវត្ថិភាព និងផ្នែកផ្សេងទៀតពាក់ព័ន្ធនឹងការរក្សាសុវត្ថិភាពសម្រាប់អតិថិជន។

លោកជំទាវបានបញ្ជាក់ថា ការផ្តោតការយកចិត្តទុកដាក់លើ Cybersecurity ពិតជាមានសារៈសំខាន់ណាស់ ដោយកម្មវិធីនេះបានផ្តល់ប្រយោជន៍ជាច្រើនក្នុងនោះមានៈ 1.Cybersecurity គឺជាការទទួលខុសត្រូវរបស់គ្រឹះស្ថានផ្ទាល់ ពីព្រោះគ្រឹះស្ថានតូចឬធំអាចត្រូវរងគ្រោះដោយការរុករកទិន្នន័យ(Hack)ពីខាងក្រៅគ្រប់ពេល។ 2.ការគំរាមកំហែងពីខាងក្រៅ គឺជាហានិភ័យដែលអាចបង្កឱ្យមានចំណាយប្រតិបត្តិការ និងអាចប៉ះពាល់ដល់កេរ្តិ៍ឈ្មោះរបស់គ្រឹះស្ថាន និង 3.រក្សាកេរ្តិ៍ឈ្មោះប្រទេសផងដែរ។

គួរបញ្ជាក់ផងដែរថា Cybersecurity បានក្លាយជាប្រធានបទដ៏សំខាន់សម្រាប់វិស័យហិរញ្ញវត្ថុសកល ដោយសារតែមានបញ្ហាជាច្រើនបានកើតមានឡើងកាលពីឆ្នាំកន្លងទៅដែលតម្រូវឱ្យគ្រប់គ្រឹះស្ថានមីក្រូហិរញ្ញវត្ថុទាំងអស់ត្រូវមានការយកចិត្តទុកដាក់ជាសំខាន់ក្នុងការការពារសុវត្ថិភាពរបស់ខ្លួនក៏ដូចជាអតិថិជនរបស់ខ្លួនដែរ៕

July 6, 2017

Tag: SWIFT

Taylor Swift ក្លាយ​ជា​មហាសេដ្ឋិនី​ថ្មី​ និង​ល្បី​ឈ្មោះ​ជាង​គេ​​ក្នុង​​ឆ្នាំ​នេះ

សេដ្ឋកិច្ច​សិង្ហបុរី​ ទទួល​បាន​រាប់​រយ​លាន​ដុល្លារ​ពី​​ការ​ប្រគំ​តន្ត្រី​ Taylor Swift

​សិង្ហបុរី​ បង្ហើប​ឱ្យ​ដឹង​ពី​វិធី​អញ្ជើញ Taylor Swift មក​បើក​ខនសឺត​ផ្ដាច់​មុខ​នៅ​អាស៊ី​អាគ្នេយ៍​

Taylor Swift ចំណាយ​ជាង 50 លាន​ដុល្លារ​សម្រាប់​ជា​អំណោយ​ជូន​ក្រុមការងារ

អ្នក​វិទ្យា​សាស្ត្រ​កំពុង​ «គយគន់» ទិដ្ឋភាព​ប្រហោង​ខ្មៅ​ហែក​ស៊ី​ផ្កាយ​​ កាល​ពី​ 10 ពាន់​លាន​ឆ្នាំ​មុន​