Real Madrid - La Reine Media

លោក Allegri ជំរុញឲ្យ Juventus ដណ្តើមយកពាន Serie A ថ្ងៃអាទិត្យនេះឱ្យបាន

លោក Massimiliano Allegri បានជំរុញឲ្យក្រុមដែលកំពុងប្រមាញ់រកការឈ្នះពាន៣ Juventus របស់លោក លុបចោលនូវការភិតភ័យផ្សេងៗ នៅមុនពេលការប្រកួតក្របខ័ណ្ឌ Champions League វគ្គផ្តាច់ព្រ័ត្រជាមួយនឹងក្រុម Real Madrid នាខែក្រោយ តាមរយៈការឈ្នះពានក្របខ័ណ្ឌ Serie A នៅថ្ងៃអាទិត្យនេះឱ្យបាន ក្រោយពីបានលើកពាន Italian Cup បានមួយហើយ។

ក្រោយពីបានឈ្នះពានក្របខ័ណ្ឌ Champions League ត្រឹមតែ២លើកគត់ក្នុងចំណោមការឈានទៅដល់វគ្គផ្តាច់ព្រ័ត្រ៨លើក ក្រុមយក្សដែលមានមូលដ្ឋាននៅទីក្រុង Turin មួយនេះ កំពុងតែប្តេជ្ញាចិត្តថា នឹងធ្វើការស្តារមុខមាត់សម្រាប់ការចាញ់យ៉ាងអាម៉ាស់ក្នុងលទ្ធផល ៣-១ ក្រោមស្នាដៃក្រុម Barcelona កាលពីឆ្នាំ២០១៥ នៅពេលដែលពួកគេត្រូវជួបជាមួយនឹងក្រុមម្ចាស់ជើងឯក១១សម័យកាល Real Madrid ក្នុងទីក្រុង Cardiff នៅថ្ងៃទី៣ ខែមិថុនា ខាងមុខនេះ។

ក្រុមសេះបង្កង់ Juventus បានបោះជំហានឆ្ពោះទៅកាន់ការឈ្នះទាំងពានលីក និងពាន Italian Cup ក្នុងរដូវកាលតែមួយជាលើកទី៣ជាប់ៗគ្នា កាលពីថ្ងៃពុធ ក្រោយពីបានកត់ត្រាជ័យជម្នះក្នុងលទ្ធផល ២-០ លើក្រុម Lazio ក្នុងការប្រកួតពាន Italian Cup វគ្គផ្តាច់ព្រ័ត្រ ខណៈដែលខ្សែការពារ Dani Alves និង Leonardo Bonucci សុទ្ធសឹងរកបានគ្រាប់បាល់បញ្ចូលទី ព្រមទាំងបានបង្ហាញពីទម្រង់លេងយ៉ាងរឹងមាំនៅកីឡដ្ឋាន Stadio Olimpico។ ប៉ុន្តែ ការរងបរាជ័យរបស់ក្រុម Juventus នៅលើទឹកដីក្រុម Roma កាលពីសប្តាហ៍មុន ដែលកាលនោះពួកគេបានចាញ់ក្នុងលទ្ធផល ៣-១ បានរារាំងមិនឲ្យក្រុមរបស់លោក Allegri លើកពានកំពូល(serie A)របស់អ៊ីតាលី ជាបណ្តោះអាសន្ន។

ដោយសារតែក្រុម Juventus ត្រូវប្រកួតជាមួយនឹងក្រុមស្ថិតក្នុងតំបន់កាត់ចោល Crotone នោះមានន័យថា ក្រុមម្ចាស់ផ្ទះកំពុងតែមានប្រៀបក្នុងការឈ្នះនៅថ្ងៃអាទិត្យនេះ។ Juventus នឹងធ្វើដំណើរទៅកាន់ការប្រកួតនេះ ដោយដឹងថា ការដណ្តើមបានជ័យជម្នះនឹងធ្វើឲ្យពួកគេលើកពាន Serie A ក្រោយពីពួកគេបាននាំមុខដល់ទៅ៤ពិន្ទុដាច់នៅលើកំពូលតារាង ខណៈដែលនៅសល់ត្រឹមតែ២ប្រកួតទៀតប៉ុណ្ណោះ នៅរដូវកាលនេះ។ ក្រុម Juventus មិនស្គាល់ចាញ់សោះពីការប្រកួតលីកក្នុងផ្ទះខ្លួនឯង៥លើកចុងក្រោយរបស់ពួកគេ ដោយឈ្នះដល់ទៅ៤លើក និងស្មើ១លើក។ ការប្រកួតនេះនឹងចាប់ផ្តើមនៅម៉ោង៩យប់៕
ប្រភពពី៖ Daily Star

May 19, 2017

Isco ជួយឲ្យ Real ទម្លាក់ Atletico ជាលើកទី៤ ដើម្បីទៅវគ្គផ្តាច់ព្រ័ត្រនៃ Champions League

ក្រុម Real Madrid របស់លោក Zinedine Zidance បានសង្គ្រោះការប្រកួតរបស់ខ្លួនយ៉ាងល្អដោយធ្វើឲ្យទាំងក្រុម Atletico Madrid និងលោក Diego Simeone ជួបនឹងការខកចិត្តដ៏ធំមួយ ក្រោយពីក្រុម Real បានរងបរាជ័យក្នុងលទ្ធផល ២-១ ក្នុងការប្រកួតជើងទី២នៃវគ្គពាក់កណ្តាលផ្តាច់ព្រ័ត្រ កាលពីថ្ងៃពុធម្សិលមិញនេះ ប៉ុន្តែ ទោះជាក្រុមរបស់លោក Zinedine Zidance ចាញ់ក្នុងការប្រកួតជើងទីពីរនេះក៏ដោយ ក៏នៅតែបានឈានទៅវគ្គផ្តាច់ព្រ័ត្រដដែល ជាមួយនឹងលទ្ធផលរួមទាំងពីរជើងគឺ ៤-២។

កីឡាករ Saul Niguez និង Antoine Griezmann របស់ Atletico បានធ្វើឲ្យក្រុម Real ស្ថិតក្នុងការភិតភ័យ តាមរយៈការស៊ុតបាល់បញ្ចូលទី២គ្រាប់នៅត្រឹមតែនាទី ទី១៦។ ប៉ុន្តែ សុបិនអាក្រក់របស់ Real បានបញ្ចប់ត្រឹមតែនាទី ទី៤២ ប៉ុណ្ណោះ ដោយនៅពេលនោះខ្សែប្រយុទ្ធ Karim Benzema បានអូសបាល់ផុតខ្សែការពារ៣នាក់របស់ក្រុម Atletico ដើម្បីបញ្ជូនបាល់យ៉ាងល្អទៅឲ្យ Toni Kroos ដែលបានបង្ខំឲ្យអ្នកចាំទី Jan Oblak ត្រូវធ្វើការសង្គ្រោះបាល់ទាំងលំបាកមួយ ប៉ុន្តែ Isco បានបន្ថែមបាល់ផ្លាតចេញពីដៃអ្នកចាំទីចូលទីតែម្តង។

ក្រុមរបស់លោក Simeone ស្ទើរតែធ្វើការស្រោចស្រង់ជ័យជម្នះដ៏អស្ចារ្យមួយបានទៅហើយ ប៉ុន្តែការរងបរាជ័យដ៏ធ្ងន់ធ្ងររបស់ពួកគេក្នុងលទ្ធផល ៣-០ កាលពីការប្រកួតជើងទី១ នាសប្តាហ៍មុន បានបង្ហាញថា ជាការរងបរាជ័យដ៏ធំមួយ ខណៈដែលពួកគេបានធ្លាក់ចេញក្រោមស្នាដៃក្រុម Real ក្នុងការប្រកួតក្របខ័ណ្ឌ Champions League នេះជាលើកទី៤ជាប់ៗគ្នាហើយ។

ក្រុម Real ដែលជាម្ចាស់ការពារតំណែងជើងឯកក្របខ័ណ្ឌ Champions League នឹងធ្វើដំណើរទៅកាន់ទីក្រុង Cardiff នាថ្ងៃទី ៣ ខែមិថុនា ដើម្បីជួបជាមួយនឹងក្រុម Juventus ដោយសម្លឹងរកការក្លាយជាក្រុមដំបូងគេក្នុងការការពារពានរង្វាន់នេះយ៉ាងជោគជ័យក្នុងរយៈពេល២៥ឆ្នាំ ក្រោមរូបមន្តថ្មីនៃយុទ្ធនាការរបស់ UEFA។

លោក Zidane គ្រូបង្វឹករបស់ក្រុម Real បានឲ្យដឹងថា៖ «ខ្ញុំពិតជារីករាយណាស់ក្នុងការឈានទៅវគ្គផ្តាច់ព្រ័ត្រនេះ។ វាគឺជាដំណើរផ្លូវដ៏វែងឆ្ងាយមួយក្នុងការទៅកាន់ទីនោះ ហើយវាក៏ជាផ្លូវដ៏វែងឆ្ងាយផងដែរក្នុងការឈានទៅដល់វគ្គនោះក្នុងរយៈពេល២ឆ្នាំជាប់ៗគ្នា។ ខ្ញុំត្រូវតែអបអរចំពោះក្រុមមួយនេះ»៕

https://www.youtube.com/watch?v=zoVKLQ-VSd0
ប្រភពពី៖ The Sun

May 11, 2017

Man City និង Real ប្រជែងគ្នាទិញ Mbappe ពី Monaco ក្នុងតម្លៃខ្លួន១១០លានផោន

ក្លិប Manchester City កំពុងតែស្ថិតក្នុងការប្រជែងទិញខ្សែប្រយុទ្ធវ័យក្មេងដ៏ឆ្នើម Kylian Mbappe ពីក្លិប Monaco ក្នុងតម្លៃខ្លួន១១០លានផោន (ស្មើនឹង១៤២លានដុល្លារអាមេរិក)។ Man City និង Real Madrid គឺជាក្លិបដែលបានបង្ហាញពីការចាប់អារម្មណ៍ជាផ្លូវការទៅលើខ្សែប្រយុទ្ធវ័យ១៨ឆ្នាំរូបនេះ។

តម្លៃខ្លួនរបស់កីឡាករវ័យក្មេងរូបនេះនឹងត្រូវបំបែកកំណត់ត្រានៃតម្លៃខ្លួន៨៩លានផោន ដែលក្លិប Manchester United បានចំណាយទៅឲ្យក្លិប Juventus ដើម្បីទិញយកខ្សែបម្រើដ៏មានឥទ្ធិពល Paul Pogba កាលពីរដូវក្តៅមុន។ ក្លិប Man United និង Paris Saint-Germain ក៏កំពុងតែចាប់អារម្មណ៍ទៅលើការផ្ទេរនេះផងដែរ។ ទាំង Man City និង Real បានចាប់ផ្តើមធ្វើការប្រជែងគ្នាដើម្បីនាំយកខ្សែប្រយុទ្ធវ័យក្មេងដ៏មានទេពកោសល្យរូបនេះ ខណៈដែលការប្រជែងនឹងកាន់តែក្តៅគគុកក្នុងពេលបិទរដូវកាល។

Mbappe បានស៊ុតបាល់បញ្ចូលទីក្នុងការប្រកួតទាំងពីរលើកពេលជួបជាមួយនឹងក្រុម Man City ខណៈដែលក្រុម Monaco បានទម្លាក់ក្រុមរបស់លោក Pep Guardiola ឲ្យធ្លាក់ចេញពីក្របខ័ណ្ឌ Champions League វគ្គ១៦ក្រុមចុងក្រោយ។ បំណងរបស់ Mbappe គឺការចូលរួមជាមួយនឹងក្លិប Real Madrid ហើយបើទោះបី Man City ស្ទាក់ស្ទើរក្នុងការចំណាយតម្លៃខ្លួនជាកំណត់ត្រាទៅលើកីឡាករវ័យ១៨ឆ្នាំរូបនេះ ក៏ដោយ ប៉ុន្តែ ពួកគេហាក់មានឱកាសតែមួយក្នុងការនាំយករូបគេ លុះត្រាតែ Real បោះបង់ការប្រជែងទិញ៕

ប្រភពព័ត៌មាន៖ The Sun

May 3, 2017

Ronaldo ធ្វើឲ្យ Atletico ត្រូវការអព្ភូតហេតុ ដើម្បីសង្គ្រោះការធ្លាក់ចេញ

កំណត់ត្រានៃការរកគ្រាប់បាល់បញ្ចូលទីរបស់ខ្សែប្រយុទ្ធ Cristiano Ronaldo ត្រូវបានចាត់ទុកថា ជាកំណត់ត្រាពិសេសតែមួយ ដោយលោកគ្រូបង្វឹក Zinedine Zidane ខណៈដែលការរកគ្រាប់បាល់បញ្ចូលទី៣គ្រាប់របស់គេ បានជួយឲ្យក្រុម Real Madrid ស្ថិតយ៉ាងប្រកៀកក្នុងការឈានទៅវគ្គផ្តាច់ព្រ័ត្រមួយផ្សេងទៀតនៃក្របខ័ណ្ឌ Champions League តាមរយៈការផ្តួលក្រុម Atletico Madrid ៣-០ កាលពីថ្ងៃអង្គារ។

ការស៊ុតបាល់បញ្ចូលទី៣គ្រាប់របស់ Ronaldo គឺជាការរកបានជាលើកទី២នៅពេលប្រកួតជាមួយនឹងក្រុម Atletico នៅរដូវកាលនេះ និងជាលើកទី២ជាប់ៗគ្នាក្នុងក្របខ័ណ្ឌ Champions League ក្រោយពីក៏បានស៊ុតបាល់បញ្ចូលទី៣គ្រាប់ផងដែរដើម្បីផ្តួលក្រុម Bayern Munich ក្នុងការប្រកួតវគ្គ៨ក្រុមចុងក្រោយ។ លោក Zidane បានឲ្យដឹងថា៖ «ការរកគ្រាប់បាល់បញ្ចូលទីគឺជាសមត្ថភាពដែលរូបគេមានខ្លាំងជាងកីឡាករផ្សេងៗ ដែលធ្វើឲ្យរូបគេមានលក្ខណៈយ៉ាងពិសេសតែមួយ»។ ការទទួលជ័យជម្នះនេះបានធ្វើឲ្យក្រុម Real បន្តធ្វើការគ្រប់គ្រងលើក្រុម Atletico ក្នុងក្របខ័ណ្ឌ Champions League ក្នុងរយៈពេលបួនរដូវកាលចុងក្រោយនេះ។

Real បានទម្លាក់ក្រុមរបស់លោក Diego Simeone រាល់ការជួបគ្នាទាំង៣លើកក្នុងក្របខ័ណ្ឌកំពូលអឺរ៉ុបរយៈពេល៣រដូវកាលចុងក្រោយនេះ ក្នុងនោះរាប់បញ្ចូលទាំងក្នុងវគ្គផ្តាច់ព្រ័ត្រកាលពីឆ្នាំ២០១៤ និងឆ្នាំ២០១៥ ផងដែរ។ Ronaldo បានធ្វើឲ្យក្រុម Real Madrid ចាប់ផ្តើមយ៉ាងល្អតាមរយៈការរកគ្រាប់បាល់បើកឆាកនៅទីនាទី ទី១០ មុននឹងស៊ុតបាល់បញ្ចូលទី២គ្រាប់ទៀតនៅរយៈពេល២០នាទីចុងក្រោយ។ Ronaldo បានឲ្យដឹងថា៖ «ក្រុមនេះពិតជាអស្ចារ្យណាស់។ ខ្ញុំបានរកគ្រាប់បាល់បញ្ចូលទី ប៉ុន្តែ ក្រុមនេះ លេងបានយ៉ាងអស្ចារ្យតាំងពីចាប់ផ្តើមប្រកួត»។ ការទទួលជ័យជម្នះក៏បានជួយឲ្យ Real ស្ថិតនៅផ្លូវក្នុងការក្លាយជាក្រុមដំបូងគេក្នុងការការពារពាន Champions League យ៉ាងជោគជ័យក្នុងរយៈពេល២៧ឆ្នាំ៕

ប្រភពពី៖ worldsoccertalk

May 3, 2017

ការជួបគ្នា៤លើកកាលពីមុនរវាងក្រុម Real និង Atletico ក្នុងក្របខ័ណ្ឌអឺរ៉ុប

Real Madrid និង Atletico Madrid នឹងត្រូវជួបគ្នាជាលើកទី៥ក្នុងការប្រកួតក្របខ័ណ្ឌកំពូលអឺរ៉ុប នៅពេលដែលក្រុម Atletico ធ្វើដំណើរទៅកាន់កីឡដ្ឋាន Santiago Bernabeu ដើម្បីធ្វើការប្រកួតជើងទី១ នៃក្របខ័ណ្ឌ Champions League វគ្គពាក់កណ្តាលផ្តាច់ព្រ័ត្រ នៅរាត្រីនេះ។ រាល់ការជួបគ្នា៤លើកកាលពីមុន បានបញ្ចប់ទាំងការខកចិត្តសម្រាប់ក្រុម Atletico ខណៈដែលក្រុម Real នឹងសម្លឹងរកការឈ្នះពានជាលើកទី៣ក្នុងរយៈពេល៤ឆ្នាំតាមរយៈការផ្តួលគូប្រជែងស្ថិតក្នុងទីក្រុងតែមួយរបស់ពួគគេ។ ខាងក្រោមនេះគឺការជួបគ្នា៤លើកកាលពីមុននៃក្របខ័ណ្ឌកំពូលអឺរ៉ុប។

ការប្រកួត European Cup វគ្គពាក់កណ្តាលផ្តាច់ព្រ័ត្រកាលពីឆ្នាំ១៩៥៩

ក្រុម Atletico បានជួបសំណាងអាក្រក់ បើទោះបីបានទទួលលទ្ធផលស្មើទាំងពីរជើងក៏ដោយ ក្នុងការប្រកួតកាលពីឆ្នាំ១៩៥៩។ ក្រុម Real បានទទួលជ័យជម្នះក្នុងការប្រកួតជើងទី១ក្នុងលទ្ធផល ២-០ នៅមុនពេលក្រុម Atletico បានតាមស្មើវិញក្នុងរយៈពេល២សប្តាហ៍ក្រោយមក បន្ទាប់ពីឈ្នះ ១-០។ ប៉ុន្តែ កាលនោះ ច្បាប់គ្រាប់បាល់ក្រៅដីមិនទាន់ត្រូវបានអនុវត្តឡើយ ហេតុនេះ ក្រុមទាំងពីរត្រូវធ្វើការប្រកួតវគ្គ Playoff។ Real បានទទួលជ័យជម្នះ ២-១ ក្នុងការប្រកួតវគ្គ Playoff នោះដែលត្រូវបានរៀបចំឡើងនៅទីក្រុង Zaragoza។

ការប្រកួត Champions League វគ្គផ្តាច់ព្រ័ត្រ កាលពីឆ្នាំ២០១៤

Atletico បានជួបការខកចិត្តដ៏ធំ ក្រោយពីពួកគេមានគ្រាប់បាល់នាំមុខរហូតដល់ទៅនាទី ទី៩៣ នៅមុនពេលក្រុម Real បានវាយបកតាមស្មើវិញ ហើយក្រុម Real បានបន្តលើកពាន Champions League ក្រោយពីបានផ្តួលក្រុម Atletico ក្នុងលទ្ធផល ៤-១ នៅនាទីបន្ថែម១៥នាទីពីរដង។

ការប្រកួត Champions League វគ្គ៨ក្រុមចុងក្រោយ កាលពីឆ្នាំ២០១៥

ក្រោយពីបានបញ្ចប់ក្នុងលទ្ធផលស្មើ ០-០ ក្នុងផ្ទះខ្លួនឯងពីការប្រកួតជើងទី១ Atletico បានជួបសំណាងអាក្រក់ក្នុងជើងទី២ ក្រោយពីខ្សែប្រយុទ្ធ Javier Hernandez បានរកគ្រាប់បាល់ឈ្នះនៅចុងម៉ោងដើម្បីជួយឲ្យ Real ដណ្តើមបានជ័យជម្នះទាំងពីរជើង ១-០។

ការប្រកួត Champions League វគ្គផ្តាច់ព្រ័ត្រ កាលពីឆ្នាំ២០១៦

ការប្រកួតនេះ បានស្ថិតក្នុងភាពស្វិតស្វាញយ៉ាងខ្លាំង ខណៈដែល Real បានរកគ្រាប់បាល់នាំមុខមុន មុននឹងក្រុម Atletico បានធ្វើការវាយបកតាមស្មើវិញនៅរយៈពេល១១នាទីចុងក្រោយ ដើម្បីបញ្ចប់ក្នុងលទ្ធផលស្មើ ១-១។ ក្រោយពីលទ្ធផលនៅតែរក្សា ១-១ បន្ទាប់ពីនាទីបន្ថែម១៥នាទីពីរដង ក្រុម Real នៅតែជួបសំណាងល្អ ដោយពួកគេបានយកឈ្នះក្នុងការស៊ុតបាល់ប៉េណាល់ទី ៥-៣ ដើម្បីលើកពានជាលើកទី១១របស់ពួកគេ៕

May 2, 2017

Atletico សម្លឹងរកការសងសឹក Real នៅរាត្រីនេះ

Atletico Madrid និងលោក Diego Simeone ដែលជាគ្រូបង្វឹករបស់ពួកគេ នឹងស្រេកឃ្លានក្នុងការសងសឹកនៅកីឡដ្ឋាន Santiago Bernabeu ពេលជួបក្រុម Real Madrid ក្នុងការប្រកួតវគ្គ១/២ផ្តាច់ព្រ័ត្រ ជើងទី១ នៃក្របខ័ណ្ឌ Champions League នៅរាត្រីនេះ ស្របពេលដែលក្រុមភ្ញៀវមានខ្សែប្រយុទ្ធដ៏មុតស្រួចបំផុតគឺខ្សែប្រយុទ្ធ Antoine Griezmann។

ក្រុម Atletico សង្ឃឹមថា នឹងលុបចោលនូវការខកចិត្តផ្សេងៗទាក់ទងនឹងការរងបរាជ័យក្នុងការប្រកួតក្របខ័ណ្ឌ Champions League វគ្គផ្តាច់ព្រ័ត្រ កាលពីឆ្នាំ២០១៤ និងឆ្នាំ២០១៦ ក្រោមស្នាដៃ Real។ ក្រុម Atletico បានបាត់បង់ Jose Maria Gimenez ដោយសារតែបញ្ហារបួសក្រលៀន ដែលមានន័យថា ក្រុមភ្ញៀវ នឹងត្រូវអវត្តមានខ្សែការពារដ៏សំខាន់បីនាក់របស់ពួកគេ។ ស្របពេលដែលក្រុមរបស់លោក Simeone មានកេរិ៍្តឈ្មោះទៅលើការមានតំបន់ការពារយ៉ាងរឹងមាំ ពួកគេក៏មានតំបន់ប្រយុទ្ធយ៉ាងមុតស្រួចផងដែរ ខណៈដែលពួកគេទើបតែបានផ្តួលក្រុម Las Palmas ក្នុងលទ្ធផល ៥-០ កាលពីចុងសប្តាហ៍មុននេះ ដោយខ្សែប្រយុទ្ធ Kevin Gameiro បានស៊ុតបាល់បញ្ចូលទី២គ្រាប់។

ទោះបីជាយ៉ាងណា ក្រុម Real របស់លោក Zinedine Zidane កំពុងតែសម្លឹងរកការធ្វើឲ្យពួកគេក្លាយជាក្រុមដំបូងគេក្នុងការការពារពាន Champions League យ៉ាងជោគជ័យ ក៏ដូចជាបញ្ចប់ការគ្រប់គ្រងរបស់ក្រុម Barcelona ក្នុងការប្រកួតក្របខ័ណ្ឌ La Liga។ លោក Zidane បានបង្ហាញឲ្យឃើញពីបំណងរបស់លោកក្នុងការប្រជែងដណ្តើមពានពីរក្នុងរដូវកាលតែមួយរួចជាស្រេច។ កីឡាករសំខាន់ៗជាច្រើនដូចជា Ronaldo, Gareth Bale, Karim Benzema, Luka Modric ឬ Toni Kroos សុទ្ធសឹងបានអវត្តមានក្នុងការប្រកួតលីក៣លើកចុងក្រោយរបស់ក្រុម Real។ ក្នុងពេលអវត្តមានកីឡាករឆ្នើមៗទាំងនេះ កីឡាករមួយចំនួនដូចជា Isco, Alvaro Morata និង Marco Asensio បានបង្ហាញពីទម្រង់លេងយ៉ាងល្អ ហើយ Real បានឈ្នះរាល់ការប្រកួតទាំង៣លើកនោះ តាមរយៈការស៊ុតបាល់បញ្ចូលទីសរុបដល់ទៅ១៣គ្រាប់។ ក្រុម Real បានកម្តៅសាច់ដុំសម្រាប់ការប្រកួតនេះ តាមរយៈការផ្តួលក្រុម Valencia ក្នុងលទ្ធផល ២-១ កាលពីចុងសប្តាហ៍ថ្មីៗនេះ។ ការប្រកួតនេះនឹងចាប់ផ្តើមនៅម៉ោង១:៤៥ទៀបភ្លឺ៕

ប្រភពពី៖ sports.yahoo

May 2, 2017

Real ផ្តួល Deportivo ខណៈ Barcelona បញ្ជូន Osasuna ឲ្យទៅលេងក្នុងក្របខ័ណ្ឌទី២

James Rodriguez បានបញ្ហាពីភាពអស្ចារ្យក្នុងពេលចូលជំនួសកន្លែងរបស់ខ្សែប្រយុទ្ធ Cristiano Ronaldo ខណៈដែលគ្រាប់បាល់ស៊ុតបញ្ចូលទី២គ្រាប់បាល់របស់គេ បានជួយឲ្យក្រុម Real Madrid បំបាក់ក្រុម Deportivo La Coruna យ៉ាងចាស់ក្នុងលទ្ធផល ៦-២ កាលពីថ្ងៃពុធ។

ខ្សែបម្រើប្រយុទ្ធអន្តរជាតិកូឡុំប៊ីរូបនេះ បានរកគ្រាប់បាល់បើកឆាករបស់គេនៅនាទី ទី១៤ មុននឹងរកគ្រាប់បាល់ទី២នៅនាទី ទី៦៦ ខណៈដែលគ្រាប់បាល់ស៊ុតបញ្ចូលទីពីសំណាក់កីឡាករ Alvaro Morata, Lucas Vazquez, Isco និង Casemiro រក្សាមានពិន្ទុស្មើជាមួយនឹងក្រុម Barcelona នៅលើកំពូលតារាងនៃក្របខ័ណ្ឌ La Liga។ ក្រុមម្ចាស់ផ្ទះបានវាយ២គ្រាប់វិញតាមរយៈកីឡាករ Florin Andone និង Joselu នៅក្នុងតង់នីមួយៗ ប៉ុន្តែ មិនបានបង្កើតឲ្យមានការប្រែប្រួលឡើយ។ ក្រុម Barcelona និង Real Madrid កំពុងតែមាន៧៨ពិន្ទុស្មើគ្នា ប៉ុន្តែ Barca នាំមុខដោយសារតែមានកំណត់ត្រាល្អប្រសើរជាងពីការជួបគ្នារវាងក្រុមទាំងពីរ។

ស្របពេលជាមួយគ្នានេះ ក្រុម ខ្សែប្រយុទ្ធ Lionel Messi បានស៊ុតបាល់បញ្ចូលទី២គ្រាប់ ដើម្បីជួយឲ្យក្រុមខ្លួនកត់ត្រាជ័យជម្នះយ៉ាងកក់ក្តៅក្នុងលទ្ធផល ៧-១ និងដើម្បីធ្វើឲ្យក្រុម Osasuna ត្រូវកាត់ចេញពីក្របខ័ណ្ឌកំពូល។ លោក Zinedine Zidane គ្រូបង្វឹករបស់ក្រុម Real Madrid បានផ្លាស់ប្តូរកីឡាករ៩នាក់ទៅលើក្រុមដែលបានរងបរាជ័យក្នុងលទ្ធផល ៣-២ កាលពីថ្ងៃអាទិត្យ ក្រោមស្នាដៃក្រុម Barca ដែលបានធ្វើឲ្យការប្រជែងពាន La Liga កាន់តែមានលក្ខណៈបើកចំហរ។ Ronaldo, Karim Benzema និងខ្សែប្រយុទ្ធមានរបួស Gareth Bale សុទ្ធសឹងអវត្តមានពីក្រុម Real ក្នុងការប្រកួតលីកជាលើកទី៣ជាប់ៗគ្នា ប៉ុន្តែ ការអវត្តមានរបស់ពួកគេ មិនបានជះឥទ្ធិពលអាក្រក់ដល់លទ្ធផលឡើយ៕

ទស្សនាវីដេអូ Highlights ការប្រកួតរវាង Deportivo La Coruna vs Real Madrid 2-6 – All Goals

ទស្សនាវីដេអូ Highlights ការប្រកួតរវាង FC Barcelona 7-1 Osasuna | All Goals

ប្រភពពី៖ Mirror

April 27, 2017

មិនគួរឲ្យជឿ! អ្នករត់តុមានមុខមាត់ដូច Messi កំពុងធ្វើឱ្យកក្រើកបណ្តាញអនឡាញ

តើលោកអ្នកនឹងមានអារម្មណ៍បែបណា ក្នុងពេលដែលអ្នកដើរទៅកាន់ហាងលក់បង្អែមដែលអ្នកចូលចិត្តជាងគេ និងត្រូវបានស្វាគមន៍ដោយតារាបាល់ទាត់ដ៏ល្បីគឺ Lionel Messi ដែលរង់ចាំបម្រើលោកអ្នកនូវត្រដាប់ស្ត្របឺរី?

លោក Alejandro Pereira Negreiros

ប៉ុន្តែ ការស្រមៃគិតនេះ ស្ទើរតែបានក្លាយជាការពិតទៅហើយសម្រាប់អ្នកដែលបានធ្វើដំណើរទៅកាន់ហាងមួយក្នុងទីក្រុង Sau Paulo ប្រទេសប្រេស៊ីល ខណៈដែលអ្នករត់តុម្នាក់ មានមុខមាត់ និងរាងរូវដូចទៅនឹងតារាឆ្នើមអន្តរជាតិអាហ្សង់ទីនរបស់ក្លិប Barcelona អ៊ីចឹង។ លោក Alejandro Pereira Negreiros បច្ចុប្បន្នកំពុងតែធ្វើឱ្យមនុស្សជាច្រើនមានការយល់ច្រឡំ ក្រោយពីរូបគេកំពុងតែស្ថិតក្នុងយ៉ាងចាប់អារម្មណ៍យ៉ាងខ្លាំងនៅលើបណ្តាញសង្គម។

កីឡាករ Lionel Messi

បុរសវ័យ ២១ឆ្នាំរូបនេះ ដឹងតិចតួចប៉ុណ្ណោះអំពីរឿងរ៉ាវទាក់ទងនឹងតារាឆ្នើមរបស់ Barca ដែលទើបតែបានរកគ្រាប់បាលឈ្នះនៅពេលជួបជាមួយនឹងក្រុម Real Madrid ក្នុងការប្រកួត El Clasico កាលពីថ្ងៃអាទិត្យ ហើយរូបគេបានទទួលស្គាល់ថា គេបានភ្ញាក់ផ្អើលយ៉ាងខ្លាំង ក្រោយពីសហការីរបស់គេបានបង្ហោះរូបគេ និង Messi នៅលើបណ្តាញសង្គម Twitter។ រូបថតរបស់គេបានទទួលការចាប់អារម្មណ៍ភ្លាមៗ ខណៈដែលត្រឹមតែរយៈពេល២ថ្ងៃប៉ុណ្ណោះ រូបថតរបស់គេទទួលបានការ Like ដ៏ច្រើន។ បច្ចុប្បន្ន Alejandro កំពុងតែទទួលបានការចាប់អារម្មណ៍ខ្លាំងពីសំណាក់អ្នកគាំទ្រកីឡាបាល់ទាត់ទូរទាំងពិភពលោក ដែលបានភ្ញាក់ផ្អើលទៅនឹងភាពស្រដៀងរបស់អ្នកទាំងពីរ៕

ប្រភពព័ត៌មាន៖ The Sun

April 25, 2017

Messi ជួយឲ្យ Barca ស្តារមុខមាត់លើទឹកដី Real ក្នុងជំនួប El Clasico

ខ្សែប្រយុទ្ធ Lionel Messi បានស៊ុតបាល់បញ្ចូលទី២គ្រាប់ ដើម្បីជួយឲ្យក្រុម Barcelona ដណ្តើមបានជ័យជម្នះដ៏សំខាន់ក្នុងលទ្ធផល ៣-២ លើគូប្រជែងដ៏ខ្លាំងរបស់ពួកគេ Real Madrid កាលពីថ្ងៃអាទិត្យ ខណៈដែលគ្រាប់បាល់ទី២របស់គេ ដែលជាគ្រាប់លើកទី៥០០របស់គេសម្រាប់ក្លិប បានកើតឡើងនៅនាទីចុងក្រោយនៃនាទីបន្ថែម។

គ្រាប់បាល់ស៊ុតបញ្ចូលទីរបស់ Messi បានកើតឡើងមនៅជិតបញ្ចប់នៃការប្រកួតដ៏រំភើបមួយ ដែលចាប់ផ្តើមយ៉ាងស្វិតស្វាញ ខណៈដែលខ្សែការពារ Samuel Umtiti បានប្រព្រឹត្តកំហុសទៅលើខ្សែប្រយុទ្ធ Cristiano Ronaldo ក្នុងតំបន់គ្រោះថ្នាក់ ប៉ុន្តែ មិនមានការផ្តល់ការស៊ុតបាល់ប៉េណាល់ទីឡើយ ខណៈដែលខ្សែការពារ Marcelo ក៏មិនបានរងពិន័យផងដែរ សម្រាប់ការឲ្យកែងទៅលើ Messi។ ខ្សែបម្រើ Casemiro បានជួយឲ្យក្រុមម្ចាស់ផ្ទះរកគ្រាប់បាល់បើកឆាកនៅនាទី ទី២៨ នៅមុនពេល Messi បានរកគ្រាប់បាល់តាមស្មើវិញនៅនាទី ទី៣៣ ហើយខ្សែបម្រើ Ivan Rakitic បានជួយឲ្យក្រុម Barcelona មានគ្រាប់បាល់នាំមុខវិញជាមួយនឹងការស៊ុតបាល់ពីចម្ងាយបញ្ចូលទីយ៉ាងល្អ ខណៈដែលនៅសល់រយៈពេលតិចជាង២០នាទីទៀត។

ការរងពិន័យកាតក្រហមរបស់ខ្សែការពារ Sergio Ramos សម្រាប់ការប្រើប្រាស់ជើងទាំងពីរដើម្បីឈូសដណ្តើមបាល់ទៅលើ Messi ហាក់ដូចជាធ្វើឲ្យក្រុម Barca ស្ថិតនៅលើផ្លូវឆ្ពោះទៅកាន់ការទទួលជ័យជម្នះដោយងាយទៅហើយ ប៉ុន្តែ ខ្សែប្រយុទ្ធបម្រុង James Rodriguez បានរកគ្រាប់បាល់បំប៉ោងសំណាញ់នៅនាទី ទី៨៦ ក្រោយពីការបញ្ជូនបាល់របស់ Marcelo ដើម្បីរកក្រាប់បាល់តាមស្មើវិញ។ បន្ទាប់មក Messi បានរកគ្រាប់បាល់ឈ្នះនៅជិតបញ្ចប់ការប្រកួតដើម្បីជួយឲ្យក្រុម Barcelona ដណ្តើមបានជ័យជម្នះមួយដែលជួយឲ្យពួកគេតាមស្មើពិន្ទុក្រុម Real Madrid ដែលមាន៧៥ពិន្ទុដូចគ្នា បើទោះបីក្រុម Real នៅសល់មួយប្រកួតក្នុងដៃក៏ដោយ។ ជ័យជម្នះនេះ ធ្វើឲ្យក្រុម Barcelona បំពេញការស្តារមុខមាត់មួយ ក្រោយពីធ្លាក់ចេញពីក្របខ័ណ្ឌ Champions League វគ្គ៨ក្រុមចុងក្រោយ ក្រោមស្នាដៃក្រុម Juventus កាលពីពាក់កណ្តាលសប្តាហ៍មុន៕

ប្រភពព័ត៌មាន៖ The Mirror

April 24, 2017

Tag: Real Madrid