Tag: Real Madrid

ក្លិប Chelsea ប្រកាសពីការយល់ព្រមទិញ Morata ពីក្លិប Real Madrid
ក្លិបតោខៀវ Chelsea កំពុងតែស្ថិតយ៉ាងប្រកៀកក្នុងការពង្រឹងតំបន់ប្រយុទ្ធរបស់ខ្លួនសម្រាប់យុទ្ធនាការការពារពានក្របខ័ណ្ឌ Premier League របស់ពួកគេ ក្រោយពីបានយល់ព្រមលើតម្លៃខ្លួនជាកំណត់ត្រារបស់ក្លិបក្នុងទឹកប្រាក់58លានផោន (ស្មើនឹង75.5លានដុល្លារអាមេរិក) ជាមួយនឹងក្លិប Real Madrid ដើម្បីទិញខ្សែប្រយុទ្ធអន្តរជាតិអេស្ប៉ាញ Alvaro Morata។
ការពិភាក្សាផ្សេងៗកំពុងតែបន្តជាមួយនឹងក្លិប Real Madrid ចាប់តាំងពីក្លិប Chelsea បានចាញ់ក្រុម Manchester United ក្នុងការប្រជែងទិញខ្សែប្រយុទ្ធ Romelu Lukaku ប៉ុន្តែពួកគេបានទទួលជោគជ័យវិញលើគោលដៅទី2របស់ពួកគេកាលពីថ្ងៃពុធ។ Man United បានចំណាយប្រាក់ជាគោលចំនួន75លានផោនទៅឲ្យក្លិប Everton សម្រាប់ខ្សែប្រយុទ្ធអន្តរជាតិបែលហ្ស៊ិក(Romelu Lukaku )រូបនោះ។
តម្លៃខ្លួនរបស់ Chelsea សម្រាប់ខ្សែប្រយុទ្ធ Morata នឹងមានចំនួនច្រើនជាង50លានផោនដែលពួកគេបានចំណាយទៅឲ្យក្លិប Liverpool ដើម្បីទិញខ្សែប្រយុទ្ធ Fernando Torres កាលពីឆ្នាំ2011 ហើយអាចនឹងកើនដល់70លានផោន បើបូកទាំងប្រាក់ឧបត្ថម្ភផ្សេងៗទៀតផងនោះ។ ក្លិប Chelsea បានឲ្យដឹងក្នុងសេចក្តីថ្លែងការណ៍មួយថា ក្លិបទាំងពីរបានឈានដល់ការព្រមព្រៀងគ្នាមួយសម្រាប់ការផ្ទេរនេះ។ ក្រុមម្ចាស់ជើងឯកក្របខ័ណ្ឌ Premier League មួយនេះបានឲ្យដឹងថា៖ «បច្ចុប្បន្នការផ្ទេរនេះ នឹងត្រូវបំពេញក្រោយពីរូបគេ(Morata )យល់ព្រមលើលក្ខខណ្ឌផ្ទាល់ខ្លួនផ្សេងៗ និងត្រួតពិនិត្យសុខភាពរួចហើយ»។
ប្រាក់បៀវត្សរ៍ត្រូវបានរំពឹងទុកថា នឹងមិនក្លាយជាឧបសគ្គឡើយ ខណៈដែល Morata នឹងត្រូវទទួលបាន15ម៉ឺនផោនក្នុងមួយសប្តាហ៍សម្រាប់កុងត្រារយៈពេល5ឆ្នាំ។ រូបគេកំពុងតែស្ថិតនៅលើទឹកដីសហរដ្ឋអាមេរិកជាមួយនឹងសមាជិក្រុមផ្សេងទៀតរបស់លោក Zinedine Zidane រួចហើយនឹងត្រូវធ្វើដំណើរទៅកាន់ប្រទេសអង់គ្លេស ដើម្បីត្រួតពិនិត្យសុខភាព៕
ប្រភពពី៖ The Guardian
July 20, 2017
Bayern នាំយក James ពីក្លិប Real ក្នុងលក្ខខណ្ខ2
ក្លិបយក្សអាល្លឺម៉ង់ Bayern Munich បានចុះហត្ថលេខាជាមួយនឹងតារាឆ្នើម James Rodriguez របស់ក្លិប Real Madrid ក្នុងកិច្ចសន្យាខ្ចីជើងរយៈពេល2ឆ្នាំ ជាមួយនឹងជម្រើសក្នុងការទិញដាច់តែម្តង។ ក្លិប Manchester United, Paris Saint-Germain, Chelsea និង Juventus សុទ្ធសឹងជាក្លិបដែលបានធ្វើការទាក់ទងចង់បានខ្សែបម្រើប្រយុទ្ធអន្តរជាតិកូឡុំប៊ីវ័យ 25ឆ្នាំរូបនេះ ក្នុងរយៈពេលប៉ុន្មានសប្តាហ៍ចុងក្រោយនេះ ខណៈដែលលោក Florentino Perez ប្រធានក្លិប Real Madrid ចង់បានតម្លៃខ្លួនយ៉ាងហោចណាស់70លានអឺរ៉ូ (ស្មើនឹង80លានដុល្លារអាមេរិក)សម្រាប់កីឡាករម្នាក់នេះ។
ប៉ុន្តែ ទោះបីជាយ៉ាងណា លោក Carlo Ancelotti គ្រូបង្វឹកនៃក្រុម Bayern បានដាក់សំណើដេញថ្លៃដោយជោគជ័យដើម្បីនាំយកអតីតកីឡាករម្នាក់ដែលលោកធ្លាប់បានបង្វឹកក្នុងពេលដឹកនាំនៅក្លិប Real Madrid កាលពីរដូវកាលឆ្នាំ2014-2015 ស្របពេលដែលក្លិបទាំងពីរបានយល់ព្រមលើកិច្ចព្រមព្រៀងខ្ចីជើងរយៈពេល2ឆ្នាំ ជាមួយនឹងជម្រើសក្នុងការទិញយកដាច់នៅខែមិថុនា ឆ្នាំ2019។
លោក Christian Falk អ្នកយកព័ត៌មានឲ្យកាសែត Sport Bild បានបញ្ជាក់ថា ក្លិប Bayern បានយល់ព្រមលើតម្លៃខ្លួនខ្ចីជើងប្រចាំឆ្នាំចំនួន5លានអឺរ៉ូ ហើយអាចនឹងចំណាយក្នុងទឹកប្រាក់35.2លានអឺរ៉ូ ដើម្បីទិញយកដាច់តែម្តង។ លោក Karl-Heinz Rummenigge ប្រធានក្លិបរបស់ Bayern បានឲ្យដឹងថា៖ «យើងពិតជារីករាយណាស់ដែលយើងបានបំពេញការផ្ទេរមួយនេះ។ ការចុះហត្ថលេខាជាមួយនឹង James Rodriguez គឺជាបំណងដ៏ធំមួយពីអ្នកចាត់ការទូទៅរបស់លោកគឺលោក Carlo Ancelotti ក្រោយពីពួកគេទាំងពីរធ្លាប់បានធ្វើការជាមួយគ្នាយ៉ាងជោគជ័យកាលនៅក្លិប Real Madrid»។ James បានជួបទាំងភាពរីករាយ និងខកចិត្តក្នុងរយៈពេល3ឆ្នាំនៅឯក្លិប Real ចាប់តាំងពីផ្ទេរមកពីក្លិប Monaco ក្នុងតម្លៃខ្លួន80លានអឺរ៉ូ ក្រោយពីព្រឹត្តិការណ៍ World Cup ឆ្នាំ2014៕
ប្រភពពី៖ ESPN
July 12, 2017
Chelsea កំពុងចង់ដាក់សំណើដេញថ្លៃ 62លានផោនសម្រាប់ Morata ពីក្លិប Real
ក្លិបតោខៀវ Chelsea នឹងដាក់សំណើដេញថ្លៃក្នុងទឹកប្រាក់ 62លានផោន (ស្មើនឹង 80លានដុល្លារអាមេរិក) ដើម្បីទិញយកខ្សែប្រយុទ្ធ Alvaro Morata ពីក្លិប Real Madrid។
លោក Antonio Conte សង្ឃឹមថា នឹងឈានដល់ការព្រមព្រៀងគ្នាមួយសម្រាប់ Morata ស្របពេលដែលខ្សែប្រយុទ្ធ Diego Costa ត្រូវបានអនុញ្ញាតឲ្យបន្តសម្រាកថ្ងៃវិស្សមកាល មុននឹងផ្ទេរទៅកាន់ក្លិប Atletico Madrid។ Costa ធ្លាប់ចង់ធ្វើការសម្របសម្រួលជាមួយនឹងលោក Conte ប៉ុន្តែគ្រូបង្វឹកសញ្ជាតិអ៊ីតាលីរូបនេះមិនចាប់អារម្មណ៍ក្នុងការអនុញ្ញាតឲ្យរូបគេបន្តនៅជាមួយនឹងក្លិបតោខៀវឡើយ។ តារាឆ្នើមអន្តរជាតិអេស្ប៉ាញ Costa នឹងត្រូវបង្ហាញខ្លួនក្នុងការហ្វឹកហាត់កាលពីថ្ងៃម្សិលមិញនៅឯទីលាន Cobham ប៉ុន្តែត្រូវបានអនុញ្ញាតឲ្យសម្រាករយៈពេល1សប្តាហ៍ទៀត។
សញ្ញាផ្សេងៗទៀតបានបង្ហាញថា រូបគេនឹងត្រូវតែចាកចេញពី Chelsea នៅមុនពេលលោក Conte និងក្រុមរបស់លោកធ្វើដំណើរទៅកាន់សហរដ្ឋអាមេរិកនៅសប្តាហ៍ក្រោយ។ ក្រោយពីបាត់បង់ខ្សែប្រយុទ្ធ Romelu Lukaku វ័យ 24ឆ្នាំ ដោយសារតែរូបគេទៅចូលរួមជាមួយនឹងក្លិប Manchester United និង Chelsea កំពុងតែស្ថិតក្រោមសម្ពាធក្នុងការចុះហត្ថលេខាជាមួយ Morata។
ប៉ុន្តែ សំណើដេញថ្លៃរបស់គេអាចនឹងត្រូវច្រានចោលដោយក្លិប Real Madrid ដែលចង់បានតម្លៃខ្លួនខ្ពស់ជាងនេះ។ លោក Zinedine Zidane គ្រូបង្វឹករបស់ក្លិប Real Madrid ពិតជាចង់ឲ្យខ្សែប្រយុទ្ធវ័យ 24ឆ្នាំរូបនេះបន្តនៅកីឡដ្ឋាន Bernabeu បើទោះបីរូបគេចង់ផ្ទេរទៅកាន់ក្របខ័ណ្ឌ Premier League ក៏ដោយ៕
ប្រភពពី៖ The Sun
July 11, 2017
Man United នឹងបង្កើនសំណើដេញថ្លៃ 75លានអឺរ៉ូដើម្បីទិញ Morata ពី Real

ក្លិបបិសាចក្រហម Manchester United នឹងត្រូវបង្កើនសំណើដេញថ្លៃរបស់ខ្លួនក្នុងទឹកប្រាក់ 75លានអឺរ៉ូ (ស្មើនឹង85លានដុល្លារអាមេរិក) ទៅឲ្យក្លិប Real Madrid ដើម្បីទិញខ្សែប្រយុទ្ធ Alvaro Morata ខណៈដែលលោក Jose Mourinho បោះជំហានឆ្ពោះទៅកាន់ការស្វែងរកអ្នកជំនួសខ្សែប្រយុទ្ធ Zlatan Ibrahimovic នៅរដូវកាលក្រោយ។
ការចរចាផ្សេងៗជាមួយនឹង Real បានដំណើរការអស់រយៈពេលជាច្រើនសប្តាហ៍មកហើយ ខណៈដែល Man United បានទទួលរងការច្រានចោលនូវសំណើរបស់ខ្លួនពីរលើកមកហើយ ពោលគឺក្នុងទឹកប្រាក់ 60លានអឺរ៉ូ និង 70លានអឺរ៉ូជាបន្តបន្ទាប់កាលពីដើមខែមិថុនា ខណៈដែលក្រុមម្ចាស់ជើងឯក Champions League បានដាក់តម្លៃខ្លួនលើ Morata ក្នុងទឹកប្រាក់ច្រើនជាង90លានអឺរ៉ូ។
ក្រោយពីចាត់ទុកខ្សែប្រយុទ្ធអន្តរជាតិអេស្ប៉ាញរូបនេះ ជាកីឡាករទិញចូលជាសក្តានុពល ដើម្បីបើកចំហទ្វារឲ្យ Wayne Rooney ចាកចេញដើម្បីទៅចូលរួមជាមួយនឹងក្លិប Everton លោក Mourinho ត្រូវបានគេយល់ឃើញថា បានខកចិត្តដោយសារតែការមិនសូវបានទិញចូលកីឡាករថ្មី ក្រោយពី Man Utd បានបំពេញការផ្ទេរតែជាមួយខ្សែការពារ Victor Lindelof ម្នាក់គត់ពីក្លិប Benfica ក្នុងតម្លៃខ្លួន30លានផោន។
Man United នឹងត្រូវធ្វើដំណើរដើម្បីធ្វើការប្រកួតមុនបើករដូវកាលរបស់ពួកគេនៅលើទឹកដីអាមេរិក នាថ្ងៃអាទិត្យនេះ ហើយលោក Mourinho សញ្ជាតិព័រទុយហ្គាល់ ពោរពេញដោយការជឿជាក់ថា ការផ្ទេរ Morata អាចត្រូវបានបំពេញឲ្យទាន់ពេលរូបគេអាចចូលរួមជាមួយនឹងមិត្តរួមក្រុមថ្មីរបស់គេបាន៕
ប្រភពពី៖ The Guardian
July 6, 2017
Ronaldo ជួយព័រទុយហ្គាល់ ផ្តួលរុស្ស៊ី ឯម៉ិកស៊ិកទម្លាក់នូវែលសេឡង់
ខ្សែប្រយុទ្ធ Cristiano Ronaldo បានបញ្ជាក់ថា ក្រុមបាល់ទាត់ជម្រើសជាតិព័រទុយហ្គាល់ ពិតជាស័ក្តិសមក្នុងការទទួលបានជ័យជម្នះ ក្រោយពីបានរកគ្រាប់បាល់បញ្ចូលទីជាលើកដំបូងរបស់គេក្នុងព្រឹត្តិការណ៍ Confederations Cup ដើម្បីជួយឲ្យប្រទេសរបស់គេទទួលបានជ័យជម្នះក្នុងលទ្ធផល 1-0 លើក្រុមម្ចាស់ផ្ទះរុស្ស៊ី កាលពីថ្ងៃពុធ។
តារាឆ្នើមរបស់ក្លិប Real Madrid រូបនេះបានជម្នះលើរឿងអាស្រូវទាក់ទងនឹងបញ្ហាបន្លំបង់ពន្ធ ដែលកំពុងក្លាយជាដុំពពកខ្មៅជុំវិញអនាគតរបស់គេ តាមរយៈការរកគ្រាប់បាល់បញ្ចូលទីតែមួយគ្រាប់គត់ក្នុងការប្រកួតនៅទីក្រុងម៉ូស្គូនៅនាទីទី8 ដើម្បីជួយឲ្យក្រុមម្ចាស់ជើងឯក Euro ឆ្នាំ2016 របស់គេ ឡើងទៅឈរពីលើរុស្ស៊ីក្នុងពូល A។
Ronaldo បាននិយាយថា៖ «យើងពិតជារីករាយណាស់។ វាជាលើកទីមួយហើយដែលក្រុមជម្រើសជាតិព័រទុយហ្គាល់បានទទួលជ័យជម្នះនៅរុស្ស៊ី។ ក្រុមយើងលេងបានយ៉ាងល្អនៅពេលដែលត្រូវប្រកួតជាមួយនឹងក្រុមមួយដែលលេងដោយមានការគាំទ្រយ៉ាងកងរំពងពីអ្នកគាំទ្រក្រុមម្ចាស់ផ្ទះ។ ប៉ុន្តែ យើងលេងបានល្អជាង ហើយយើងមានឱកាសច្រើនជាង»។
ខ្សែប្រយុទ្ធវ័យ 32ឆ្នាំ ដែលជាប់ឈ្មោះជាកីឡាករឆ្នើមប្រចាំការប្រកួតជាលើកទី2ក្នុងយុទ្ធនាការនេះរូបនេះ បានបន្ថែមទៀតថា៖ «យើងបានទទួលជ័យជម្នះ។ យើងទទួលបាន4ពិន្ទុ ហើយយើងត្រូវតែអបអរដល់ក្រុមរបស់យើង»។ ស្របពេលជាមួយគ្នានេះដែរ ក្រុមជម្រើសជាតិម៉ិកស៊ិក បានផ្តួលក្រុមជម្រើសជាតិនូវែលសេឡង់ ទាំងប្រផិតប្រផើយក្នុងលទ្ធផល 2-1 ក្នុងការប្រកួតមួយគូផ្សេងទៀតក្នុងពូល A ដូចគ្នា កាលពីយប់ថ្ងៃដដែល។ លទ្ធផលចាញ់នេះ បានធ្វើឲ្យនូវែលសេឡង់ ក្លាយជាក្រុមដំបូងគេដែលត្រូវធ្លាក់ចេញពីយុទ្ធនាការ Confederations Cup ឆ្នាំ2017នេះ។
ក្រុមជម្រើសជាតិព័រទុយហ្គាល់ បានបញ្ជាក់នៅមុនពេលការប្រកួតនេះថា ប្រធានក្រុម (Ronaldo )របស់ពួកគេកំពុងតែផ្តោតអារម្មណ៍តែទៅលើការប្រកួតលើទីលានក្នុងប្រទេសរុស្ស៊ីប៉ុណ្ណោះ បើទោះបីមានការលើកឡើងផ្សេងៗជុំវិញអនាគតរបស់គាត់នៅឯក្លិប Real Madrid យ៉ាងណាក្តី។ Ronaldo ត្រូវបានចោទប្រកាន់ដោយក្រុមអាជ្ញាធរអេស្ប៉ាញពីបទបន្លំមិនបង់ពន្ធក្នុងទឹកប្រាក់ 14.7លានអឺរ៉ូ (ស្មើនឹង16.5លានដុល្លារអាមេរិក) និងត្រូវបានកោះហៅឲ្យធ្វើការបង្ហាញខ្លួនក្នុងតុលាការនៅចុងខែក្រោយនេះនៅទីក្រុងម៉ាឌ្រីដ៕
ប្រភពពី៖ Sky Sport24

June 22, 2017
ប្រធានក្លិប Real ថា Ronaldo អាចទៅបាន បើ Man Utd ហ៊ានឲ្យ 880លានផោន
លោក Florentino Perez បានបញ្ជាក់ថា ខ្សែប្រយុទ្ធ Cristiano Ronaldo មានសេរីភាពក្នុងការចាកចេញពីក្លិប Real Madrid ប្រសិនបើក្លិបមួយណាហ៊ានចំណាយប្រាក់សម្រាប់ការរំលាយកិច្ចសន្យារបស់គេក្នុងទឹកប្រាក់ 880លានផោន (ស្មើនឹង1,120លានដុល្លារអាមេរិក)។
ម្ចាស់ពានរង្វាន់បាល់មាស Ballon d’Or 4សម័យកាល Cristiano Ronaldo ត្រូវបានគេជឿជាក់ថា ចង់ចាកចេញពីកីឡដ្ឋាន Bernabeu ក្រោយពីជួបរឿងរ៉ាវដ៏ខកចិត្តក្នុងប្រទេសអេស្ប៉ាញ។
ក្នុងពេលផ្តល់សម្ភាសជាលើកទី1 បើគិតចាប់តាំងពីពេលផ្ទុះព័ត៌មានថា Ronaldo ចង់ចាកចេញពី Real មក លោក Perez បានប្រាប់វិទ្យុអេស្ប៉ាញ Onda Cero ថា៖ «ខ្ញុំមិនបាននិយាយជាមួយ Cristiano ចាប់តាំងពីការប្រកួតក្របខ័ណ្ឌ Champions League វគ្គផ្តាច់ព្រ័ត្រមកម្ល៉េះ ហើយខ្ញុំបានឮពាក្យចចាមអារ៉ាមជាច្រើនតាមរយៈបណ្តាញសារព័ត៌មាននានា ប៉ុន្តែកិច្ចសន្យារបស់គេគឺមានទឹកប្រាក់ 880លានផោន ហេតុនេះ ប្រសិនបើមិនមានក្លិបណា ត្រៀមដើម្បីចំណាយក្នុងចំនួននេះទេនោះ រូបគេនឹងមិនចាកចេញឡើយ»។
លោក Perez ដែលត្រូវបានបោះឆ្នោតឲ្យជាប់ជាប្រធានក្លិប Real Madrid ក្នុងអាណត្តិថ្មីនេះ បានបញ្ជាក់ថា លោកមានបំណងដោះស្រាយស្ថានការណ៍ជាមួយនឹង Ronaldo។
ខ្សែប្រយុទ្ធវ័យ 32ឆ្នាំរូបនេះ ត្រូវបានចោទប្រកាន់ពីបទបន្លំការបង់ពន្ធរបស់រដ្ឋាភិបាលអេស្ប៉ាញ ក្នុងទឹកប្រាក់ 13លានផោន ហើយរូបគេបានបង្ហាញនូវការមិនពេញចិត្តចំពោះការខ្វះនូវការការពារពីសំណាក់ក្លិបរបស់គេ៕
ប្រភពពី៖ The Sun

June 20, 2017
Real ទទួលការស្វាគមន៍ពីអ្នកគាំទ្រដ៏ច្រើនកុះករ ក្នុងក្បួនដង្ហែការឈ្នះពាន Champions League
អ្នកគាំទ្ររាប់ពាន់នាក់របស់ក្លិប Real Madrid បានប្រមូលផ្តុំគ្នានៅតាមដងវិថីនានានៃរដ្ឋធានីអេស្ប៉ាញ ដើម្បីរង់ចាំទទួលវីរបុរសរបស់ពួកគេគឺ Cristiano Ronaldo និងមិត្តរួមក្រុមរបស់គេកាលពីថ្ងៃអាទិត្យ ខណៈដែលពួកគេបានដង្ហែការឈ្នះពានក្របខ័ណ្ឌ Champions League ជាលើកទី១២។
Ronaldo បានលេងម៉ូតសក់ថ្មីរបស់ខ្លួន ហើយរូបគេ និងប្រធានក្រុម Sergio Ramos បានដឹកនាំកម្មវិធីហែក្បួនជាប្រពៃណីដើម្បីអបអរដល់ក្លិប Real ខណៈដែលកីឡាករទាំងអស់បានទទួលការស្វាគមន៍ពីសំណាក់ប្រធានប្រតិភូរបស់រដ្ឋាភិបាល នៅមុនពេលចាប់ផ្តើមធ្វើពិធីហែក្បួននៃការឈ្នះពានកំពូលអឺរ៉ុបនេះ នៅលើរថយន្តក្រុងដែលគ្មានដំបូលមួយគ្រឿងជុំវិញតំបន់ Cibeles នៃទីក្រុង Madrid។ រថយន្តក្រុងរបស់ Real បានធ្វើដំណើរឆ្ពោះទៅកាន់កីឡដ្ឋាន Santiago Bernabeu របស់ក្លិបនេះ ខណៈដែលអ្នកគាំទ្រប្រមាណជា៨១០០០នាក់កំពុងតែរង់ចាំទទួលពួកគេនៅកីឡដ្ឋាននោះ ដើម្បីធ្វើការអបអរ ក្នុងនោះរាប់បញ្ចូលទាំងការបង្ហាញពីភ្លើងពណ៌ និងការបាញ់កាំជ្រួចផងដែរ។ ការរឹតបន្តឹងផ្នែកសន្តិសុខត្រូវបានធ្វើឡើងក្នុងទីក្រុងនេះ ក្រោយពីមានការវាយប្រហារបែបភេរវកម្មកាលពីពេលថ្មីៗនេះក្នុងទីក្រុងឡុងដ៍ និងទីក្រុង Manchester។
Ronaldo បានស៊ុតបាល់បញ្ចូលទី២គ្រាប់ក្នុងពេលដែលក្រុម Real Madrid ដណ្តើមបានជ័យជម្នះក្នុងលទ្ធផល ៤-១ លើក្រុម Juventus ក្នុងការប្រកួតវគ្គផ្តាច់ព្រ័ត្រ ក្នុងទីក្រុង Cardiff កាលពីថ្ងៃសៅរ៍ ខណៈដែលក្រុមយក្សរបស់អេស្ប៉ាញមួយនេះ បានក្លាយជាក្រុមដំបូងគេក្នុងការការពារពាន Champions League យ៉ាងជោគជ័យ។ លោក Florentino Perez ប្រធានក្លិប Real Madrid ដែលបានផ្តល់ការកោតសរសើរយ៉ាងពិសេសដល់លោក Zinedine Zidane នោះបានឲ្យដឹងថា៖ «កីឡាករទាំងអស់បានចូលក្នុងដំណាក់កាលដ៏អស្ចារ្យបំផុតរបស់ Real Madrid និងកីឡាបាល់ទាត់ ហើយគ្រូបង្វឹករបស់យើងក៏មានភាពអស្ចារ្យផងដែរ»៕

ប្រភពពី៖ Daily Star
June 5, 2017
Juventus ជឿជាក់ខ្ពស់ មុនពេលប៉ះ Real ក្នុង Champions League វគ្គផ្តាច់ព្រ័ត្រ

លោក Massimiliano Allegri ជឿជាក់ថា ក្រុមសេះបង្កង់ Juventus គ្មានអ្វីត្រូវខ្លាចឡើយនៅពេលប្រកួតជាមួយនឹងក្រុម Real Madrid ក្នុងក្របខ័ណ្ឌ Champions League វគ្គផ្តាច់ព្រ័ត្រ នៅថ្ងៃសៅរ៍ខាងមុខនេះ ហើយថា វាមានចំណុចវិជ្ជមានជាច្រើនជុំវិញក្លិបនេះខ្លាំងជាងពេលដែលលោកបានមកចូលរួមជាមួយនឹងក្លិបនេះជាលើកដំបូងកាលពីឆ្នាំ២០១៤ទៅទៀត។ មិនមានក្រុមណាដែលរងបរាជ័យច្រើនជាងគេក្នុងការប្រកួតវគ្គផ្តាច់ព្រ័ត្រនៃយុទ្ធនាការកំពូលរបស់អឺរ៉ុប ដូចក្រុម Juventus ឡើយ ប៉ុន្តែប្រសិនបើអ្វីៗមានភាពវិជ្ជមានខ្លាំងដូចការលើករបស់អ្នកចាត់ការទូទៅរូបនេះថាមែន នោះលោកនឹងអាចបំពេញការងារយ៉ាងល្អឥតខ្ចោះក្នុងការប្រកួតវគ្គផ្តាច់ព្រ័ត្រ ក្នុងទីក្រុង Cardiff មិនខាន។
គ្រូបង្វឹករូបនេះបានឲ្យដឹងថា៖ «វាពិតជាការប្រកួតដ៏សំខាន់មួយ ប៉ុន្តែយើងចាំបាច់ត្រូវតែធ្វើឲ្យបានល្អដូចដែលយើងធ្លាប់បានធ្វើនាពេលកន្លងមក។ ភាពវិជ្ជមានបង្កើតឲ្យមានភាពវិជ្ជមាន អវិជ្ជមានបង្កើតឲ្យមានអវិជ្ជមាន។ នៅពេលដែលខ្ញុំបានមកដល់ក្លិបនេះ ការញៀននៃភាពអវិជ្ជមានស្ថិតនៅជុំវិញក្លិបនេះ»។ ដើម្បីបង្ហាញថា ការលើកឡើងនេះមានភាពពិតប្រាកដ លោក Allegri បានបង្ហាញពីប្រវត្តិរបស់ក្លិបនេះក្នុងក្របខ័ណ្ឌ European Cup ដែលកំពុងតែត្រូវបានគេលើកយកមកពិភាក្សាជាសាមញ្ញ។ គ្រូបង្វឹករូបនេះបានបញ្ជាក់ថា៖ «Juventus បានលេងការប្រកួតវគ្គផ្តាច់ព្រ័ត្រ ដល់ទៅ៨លើក ពួកគេមិនបានរងបរាជ័យ៦លើកក្នុងចំណោម៨លើកនោះដូចដែលមនុស្សជាច្រើនបាននិយាយឡើយ។ ការឈានទៅដល់វគ្គផ្តាច់ព្រ័ត្រ គឺជាសមិទ្ធផលដ៏សំខាន់ណាស់ទៅហើយ។ វាមានការប្រកួតក្របខ័ណ្ឌ Champions League វគ្គផ្តាច់ព្រ័ត្រ តែ១គត់ក្នុងពិភពលោក ហើយយើងកំពុងស្ថិតក្នុងវគ្គនោះ»។
ក្នុងដំណើរឆ្ពោះទៅកាន់វគ្គផ្តាច់ព្រ័ត្រនេះ Juventus បានទម្លាក់ក្រុម Barcelona ក្នុងវគ្គ៨ក្រុមចុងក្រោយ ដោយមិនបណ្តោយឲ្យមានគ្រាប់បាល់ចូលទីរបស់ខ្លួនសូម្បីតែមួយគ្រាប់ មុននឹងពួកគេផ្តួលក្រុម Monaco ក្នុងវគ្គពាក់កណ្តាលផ្តាច់ព្រ័ត្រ។ ដោយឡែក ក្រុម Real Madrid បានទម្លាក់ក្រុម Bayern Munich ក្នុងវគ្គ៨ក្រុមចុងក្រោយ មុននឹងយកឈ្នះលើក្រុម Atletico Madrid ក្នុងវគ្គ១/២ផ្តាច់ព្រ័ត្រ៕
ប្រភពពី៖ The Guardian
June 1, 2017
Real ឈានដល់ការព្រមព្រៀងដើម្បីទទួលយកយុវជនឆ្នើម Vinicius របស់ប្រេស៊ីល
ក្លិបយក្សអេស្ប៉ាញ Real Madrid បានបំពេញការផ្ទេររបស់ពួកគេសម្រាប់ខ្សែប្រយុទ្ធវ័យក្មេងប្រកបដោយទេពកោសល្យ Vinicius Junior របស់ប្រេស៊ីលចេញពីក្លិប Flamengo។ Real បានប្រកាសថា ពួកគេបានចុះហត្ថលេខាជាមួយនឹងខ្សែប្រយុទ្ធវ័យ១៦ឆ្នាំរូបនេះកាលពីថ្ងៃអង្គារ មុននឹងបំពេញការផ្ទេរជាផ្លូវការនៅខែកក្កដា ឆ្នាំ២០១៨ នៅពេលដែលរូបគេឈានចូលវ័យ១៧ឆ្នាំ។
ច្បាប់នៃការទិញចូលកីឡាករយុវជនរបស់ FIFA មិនអនុញ្ញាតឲ្យមានការទិញ-លក់កីឡាករអន្តរជាតិដែលមានវ័យក្រោម១៨ឆ្នាំឡើយ ដោយលើកលែងតែក្នុងករណីពិសេសប៉ុណ្ណោះ។ ហេតុនេះ Vinicius ត្រូវតែបន្តនៅជាមួយនឹងក្លិប Flamengo សម្រាប់រយៈពេល១ឆ្នាំទៀត ឬរហូតដល់ឆ្នាំ២០១៩ ប៉ុន្តែរូបគេអាចផ្ទេរទៅកាន់ក្លិប Real Madrid បានលឿនជាងនេះ ប្រសិនបើភាគទាំងពីរយល់ព្រម។
នេះបើយោងទៅតាមការប្រកាសរបស់ក្លិបយក្សអេស្ប៉ាញក្នុងសេចក្តីថ្លែងការណ៍មួយ។ សេចក្តីលម្អិតនៃការផ្ទេរនេះមិនត្រូវបានប្រកាសឲ្យដឹងភ្លាមៗឡើយ ប៉ុន្តែបណ្តាញសារព័ត៌មានជាច្រើនបានចេញផ្សាយថា តម្លៃខ្លួននៃការផ្ទេរនេះគឺមានចំនួន៤៥លានអឺរ៉ូ (ស្មើនឹង៥០លានដុល្លារអាមេរិក) ដែលតម្លៃខ្លួននេះនឹងធ្វើឲ្យ Vinicius ក្លាយជាកីឡាករមានតម្លៃខ្លួនខ្ពស់ជាងគេបំផុតលំដាប់ពី២ក្នុងប្រវត្តិសាស្ត្រលីករបស់ប្រេស៊ីល ចាប់តាំងពី Neymar ដែលចេញពីក្លិប Santos មកចូលរួមជាមួយនឹងក្លិប Barcelona កាលពីឆ្នាំ២០១៣ ក្នុងតម្លៃខ្លួន៥៧,១លានអឺរ៉ូ ដែលតួលេខនេះកំពុងតែស្ថិតក្នុងការស៊ើបអង្កេតនៅឡើយ។
Vinicius ទើបតែបានបង្ហាញខ្លួនជាកីឡាករអាជីពលើកទី១របស់គេសម្រាប់ក្លិប Flamengo កាលពីដើមខែនេះ ក្រោយពីបានក្លាយជាតារាឆ្នើមសម្រាប់ក្រុមប្រេស៊ីល ក្នុងយុទ្ធនាការ South American Under-17 championship ឆ្នាំ២០១៧ កាលពីខែមីនាកន្លងទៅ។ Real Madrid ចាត់ទុក Vinicius ថា ជាខ្សែប្រយុទ្ធដែលពោរពេញដោយទេពកោសល្យ ដែលអាចអូសបាល់ឆ្លងកាត់កីឡាករជាច្រើន និងមានភាពមុតស្រួចក្នុងការរកគ្រាប់បាល់៕
ប្រភពពី៖ ESPN
May 24, 2017
Real រំពឹងអាចលើកពាន La Liga នៅថ្ងៃអាទិត្យនេះបើឈ្នះ Malaga
ក្រុមយក្ស Real Madrid កំពុងតែត្រៀមលក្ខណៈរួចរាល់ក្នុងការលើកពានក្របខ័ណ្ឌ La Liga ជាលើកទី១របស់ពួកគេក្នុងរយៈពេល៥ឆ្នាំ នៅថ្ងៃអាទិត្យស្អែកនេះ ខណៈដែលក្រុមរបស់លោក Zinedine Zidane នេះកំពុងនាំមុខ៣ពិន្ទុដាច់លើក្រុម Barcelona នៅមុនពេលឈានដល់ថ្ងៃប្រកួតចុងក្រោយនៃរដូវកាលនេះ តែទាំងអស់នេះ Barca ត្រូវតែផ្តួលក្រុម Eibar ក្នុងផ្ទះខ្លួនឯងឱ្យបានជាមុនសិនដើម្បីទទួលបានឱកាសមួយ ក្នុងការលើកពានក្របខ័ណ្ឌកំពូលអេស្ប៉ាញជាលើកទី៣ជាប់ៗគ្នា មុននឹងលោក Luis Enrique ចាកចេញនៅកីឡដ្ឋាន Camp Nou នៅចុងរដូវកាលនេះ។
ឯ Real វិញកំពុងស្ថិតក្នុងទម្រង់លេងយ៉ាងរឹងមាំ ខណៈកំពុងបោះជំហានឆ្ពោះទៅកាន់ការលើកពាន តាមរយៈការផ្តួលក្រុម Sevilla និង Celta Vigo ក្នុងលទ្ធផល ៤-១ ដូចគ្នា កាលពីសប្តាហ៍មុន ស្របពេលដែលខ្សែប្រយុទ្ធ Cristiano Ronaldo បានស៊ុតបាល់បញ្ចូលទី២គ្រាប់។ ក្រោយពីដណ្តើមបានជ័យជម្នះលើក្រុម Celta លោក Zidane បានធ្វើការព្រមានថា៖ «យើងត្រូវតែបន្តនូវអ្វីដែលយើងកំពុងតែធ្វើ ពីព្រោះការប្រកួតលីកនេះមិនទាន់បញ្ចប់នៅឡើយទេ»។ ប៉ុន្តែ ទោះបីជាយ៉ាងណា ក្រោយពីចាញ់ក្នុងការប្រកួតលីកត្រឹមតែ៣លើកនៅរដូវកាលនេះ វានឹងក្លាយជារឿងដ៏គួរឲ្យភ្ញាក់ផ្អើលមួយប្រសិនបើក្រុមស្ថិតក្នុងចំណាត់ថ្នាក់លេខ១១ Malaga បានផ្តល់ការខកចិត្តមួយទៀតដល់ក្រុម Real នៅដំណាក់កាលចុងក្រោយនោះ។
ក្រុម Malaga ក៏កំពុងតែស្ថិតក្នុងទម្រង់លេងយ៉ាងល្អក្នុងក្របខ័ណ្ឌ La Liga នេះផងដែរ ក្រោយពីដណ្តើមបាន១៣ពិន្ទុពីការប្រកួត៥លើកចុងក្រោយរបស់ពួកគេ។ Malaga ក៏បានធ្វើឲ្យក្រុម Real ព្រួយបារម្ភផងដែរ ក្រោយពីបានផ្តួលក្រុម Barcelona ក្នុងលទ្ធផល ២-០ កាលពីខែមុន។ ការប្រកួតនេះនឹងចាប់ផ្តើមនៅម៉ោង២ទៀបភ្លឺ៕
ប្រភពពី៖ Daily Star
May 20, 2017