Tag: Mark Zuckerberg

Mark Zuckerberg ពោលសរសើរក្រុមអ្នកជំនាញជួយសង្គ្រោះក្មេងៗនៅក្នុងរូងភ្នំថាំលួង
តាមរយៈសារព័ត៌មាន Teenee ដែលចេញផ្សាយមុននេះបន្ដិច បានឱ្យដឹងថា នៅទីបំផុតបន្ទាប់ពីទំព័រហ្វេសប៊ុក Thai NavySEALបានបង្ហោះសារថា បាននាំក្រុមជ្រូកព្រៃបាន 8នាក់ចេញពីរូងភ្នំថាំលួងក្នុងរយៈពេល 2ថ្ងៃដោយសុវត្ថិភាព និងសម្រេចភារកិច្ចផ្សេងទៀតបានយ៉ាងរលូនរួចមក តាមរយៈហេតុការណ៍នេះបានធ្វើឱ្យបិតាហ្វេសប៊ុកលោក Mark Zuckerberg ចូលមកបញ្ចេញមតិ និងសម្ដែងក្ដីរីករាយចំពោះក្រុមជួយសង្គ្រោះក្មេងៗកីឡាករបាល់ទាត់ ក្រុមជ្រូកព្រៃ នេះដែរ។
លោក Mark Zuckerberg បាននិយាយថា «ពីអ្នកទាំងគ្នានៅលើបណ្ដាញសង្គមហ្វេសប៊ុក ខ្ញុំសូមចូលសម្ដែងក្ដីត្រេកអរ និងស្ងើចសរសើរចំពោះភាពក្លាហានរបស់ក្រុមជួយសង្គ្រោះយ៉ាងអស្ចារ្យ ដែលសម្រេចបាននូវការនាំក្រុមជ្រូកព្រៃ 8នាក់ចេញពីរូងភ្នំប្រកបដោយសុវត្ថិភាព។ សូមឱ្យសំណាងល្អ ចំពោះដំណើរការប្រតិបត្តិការរបស់អ្នកទាំងអស់គ្នា ដែលនៅសល់ក្មេងៗកីឡាករ 4រូប និងគ្រូបង្វឹកមួយរូបទៀត សូមឱ្យបានចាកចេញមកទាំងអស់គ្នាដោយសុខសុវត្ថិភាព»។
សូមជម្រាបបន្ថែមថា ខណៈនេះគ្រូពេទ្យនៅក្នុងមន្ទីរពេទ្យធំក្នុងខេត្តឈៀងរ៉ាយ បានអនុញ្ញាតឱ្យអាណាព្យាបាលរបស់ក្មេងៗក្រុមជ្រូកព្រៃ បានឃើញមុខកូនៗឆ្លងកាត់តាមផ្ទាំងកញ្ចក់សិន នៅមិនទាន់បានបើកឱ្យចូលទៅកាន់គ្រែសម្រាកព្យាបាលនៅឡើយទេ៕
July 10, 2018
Facebook ធ្វើកំណែទម្រង់ថ្មី ដោយផ្ដោតសំខាន់លើប្រភពព័ត៌មាន «គួរឱ្យជឿទុកចិត្តបាន»
អាមេរិក៖ សហស្ថាបនិក និងជានាយកប្រតិបត្តិក្រុមហ៊ុន Facebook លោក Mark Zuckerberg បានប្រកាសឱ្យដឹងថា Facebook នឹងធ្វើកំណែទម្រង់ថ្មីមួយទាក់ទងទៅនឹងការបង្ហោះអត្ថបទនានា ជាពិសេសនឹងធ្វើការវាយតម្លៃទៅលើអត្ថបទទាំងនោះថា «គួរឱ្យជឿទុកចិត្តបាន ឬក៏ជាព័ត៌មានមិនត្រឹមត្រូវ» ដោយការវាយតម្លៃនេះនឹងត្រូវធ្វើឡើងដោយមានការចូលរួមពីអ្នកប្រើប្រាស់។
សារព័ត៌មាន The Guardian បានចេញផ្សាយថា កន្លងមកមានព័ត៌មានជាច្រើនត្រូវបានចែកចាយតាមបណ្ដាញសង្គម Facebook ដោយព័ត៌មានួទាំងនោះ មានខ្លះជាព័ត៌មានពិត និងខ្លះទៀតជាព័ត៌មានមិនពិត ដូច្នេះហើយ ក្រុមហ៊ុន Facebook នឹងធ្វើការស្ទង់មតិទៅលើ «ប្រភពព័ត៌មាន» ដោយឱ្យអ្នកប្រើប្រាស់បញ្ជាក់ថា «ស្គាល់ ឬមិនស្គាល់» ដើម្បីងាយស្រួលបញ្ជាក់ថា ប្រភពព័ត៌មានមួយនេះគឺផ្សព្វផ្សាយនូវព័ត៌មានជាក់លាក់ និងត្រឹមត្រូវ ឬប្រភពព័ត៌មានមួយនេះ ផ្សព្វផ្សាយព័ត៌មានមិនត្រឹមត្រូវ។
លោក Mark Zuckerberg បានបញ្ជាក់បន្ថែមទៀតថា ក្រោយពីធ្វើការស្ទង់មតិរួចរាល់ហើយ ក្រុមការងារ Facebook នឹងផ្ដល់ចំណាត់ថ្នាក់សម្រាប់ប្រភពព័ត៌មានទាំងនោះ តាមរយៈទិន្នន័យដែលស្ទង់មតិបាន ដើម្បីផ្ដល់អាទិភាពក្នុងការបង្ហាញព័ត៌មាននៅក្នុង News Feed៕
January 22, 2018
បិតា Facebook លោក Mark Zuckerberg បដិសេធ គ្មានគម្រោងមកប្រទេសថៃទេ
តាមរយៈសារព័ត៌មាន BBThai ដែលបានចេញផ្សាយនៅថ្ងៃទី20 ខែតុលា ឆ្នាំ2017នេះបានឱ្យដឹងថា បិតាFacebook លោក Mark Zuckerberg បានចេញសេចក្ដីថ្លែងការណ៍ជាផ្លូវការមួយនៅលើ Facebook ផ្ទាល់របស់លោក ដើម្បីច្រានចោលដំណឹងនៃដំណើរទស្សនកិច្ចរបស់លោកទៅកាន់ប្រទេសថៃ ក្រោយពីនាយករដ្ឋមន្ត្រីប្រទេសនេះ លោកប្រាក់យុទ្ធ ចាន់អូឆា បានថ្លែងប្រកាសជាសាធារណៈថា បិតា Facebook រូបនេះនឹងធ្វើដំណើរមកកាន់ប្រទេសថៃ ហើយគ្រោងនឹងជួបសំណេះសំណាលជាមួយលោក។
ដោយទទួលបានដំណឹងពីការប្រកាសជាសាធារណៈរបស់លោកប្រាក់យុទ្ធរួចហើយ បិតា Facebook រូបនេះបានបង្ហោះសារច្រានចោលភ្លាមៗថា “There are no plans currently for any of our senior leaders to visit Thailand. ” ។
គួរបញ្ជាក់ផងដែរថា ការបដិសេធរបស់ Mark Zuckerberg ហាក់បីដូចជាបំបាក់មុខលោកនាយករដ្ឋមន្ត្រីថៃ ដូច្នោះហើយទើបលោកនាយករដ្ឋមន្ត្រីថៃរូបនេះបានចេញសេចក្ដីប្រកាសបកស្រាយមួយទៀតដោយពោលថា “ការធ្វើដំណើរទស្សនកិច្ច និងជួបពិភាក្សាអាចចាត់ទុកថា ជារឿងធម្មតា ហើយក៏ជាការធ្វើដំណើរកម្សាន្តផ្ទាល់ខ្លួនរបស់លោក ក៏ប៉ុន្ដែការសហការ ការពារសន្តិសុខ សុវត្ថិភាព គឺជាការងាររួមគ្នាជាមួយប្រទេសដែលបានឆ្លងកាត់ ដើម្បីឱ្យប្រាកដថា គ្មានបញ្ហា និងផលប៉ះពាល់អ្វីកើតឡើង”៕
October 20, 2017
Mark Zuckerberg ៖ គ្រប់គ្នាគួរជួយប្រទេសរបស់ខ្លួន ទោះបីជាអ្នកមានតួនាទីជាអ្វីក៏ដោយ
លោក Mark Zuckerberg ត្រូវបានគេស្គាល់ថា ជាមនុស្សដែលមានឥទ្ធិពលម្នាក់ក្នុងពិភពលោក ព្រោះបណ្តាញសង្គមដែលគាត់បានបង្កើតជាបណ្តាញដែលជួយដល់មនុស្សច្រើនបំផុតលើលោកយើងនេះ។
ផ្តើមចេញពីនិស្សិតនៃសាកលវិទ្យាល័យ Harward លោកបានបង្កើតបណ្តាញសង្គម Facebook ដែលធ្វើឱ្យពិភពលោកភ្ញាក់ផ្អើលខណៈរូបលោកផ្ទាល់សន្យាក្នុងចិត្តថា លោកនឹងបញ្ចប់សញ្ញាបត្រពីសាកលវិទ្យាល័យល្បីនេះឱ្យបានបើទោះបីជាលោកបានចាកឆ្ងាយសាលាអស់រយៈពេលជាច្រើនឆ្នាំក៏ដោយ។
គំនិត និងគំរូល្អរបស់សហគ្រិនលំដាប់ពិភពលោករូបនេះ បានធ្វើឱ្យមនុស្សជាច្រើនកត់ត្រាទុក រហូតអ្នកខ្លះយកមកសរសរជាសៀវភៅ អ្នកខ្លះយកជាក្បួនធ្វើអាជីវកម្ម ជាក្បួនសម្រាប់ការរស់នៅ និងមានស្ថាប័នអប់រំខ្លះក៏បានអញ្ជើញរូបគាត់ឱ្យទៅចែករំលែកគំនិតដល់និស្សិតរបស់ខ្លួនផងដែរ។
ថ្មីៗនេះ លោក Mark Zuckerberg បានសរសេរនៅក្នុងបណ្តាញសង្គមរបស់លោកថា៖ «អ្នកគ្រប់គ្នាគួរជួយសង្គមរបស់ខ្លួន ទោះបីជាអ្នកមានតួនាទីជាអ្វីក៏ដោយ (Everyone should be able to serve their country — no matter who they are.)»។
គំនិតមួយនេះ ជាចំណុចមួយដែលអាចដាស់មនុស្សលើពិភពលោកឱ្យបានឃើញពីតម្លៃខ្លួនឯង ក្នុងនាមជាប្រជាជននៃប្រទេសមួយ។ មិនថាលក្ខខណ្ឌណាក៏ដោយ ឬអ្នកជាអ្នកណាក៏ដោយ ជានិស្សិត ជាបុគ្គលិកធម្មតា ជាអ្នកជំនួញ ជាអ្នកធ្វើការក្នុងស្ថាប័នសំខាន់ៗ ឬជាអ្នកសម្រេចចិត្តក្នុងសង្គមនោះទេ អ្នកគួរតែប្រើគ្រប់លទ្ធភាពរបស់ខ្លួនដើម្បីជួយដល់សង្គមរបស់ខ្លួន ព្រោះថាទោះបីជាអ្នកស្ថិតនៅទីណាក៏ដោយ អ្នកនៅតែអាចជួយប្រទេសរបស់ខ្លួនបាន ប្រសិនបើអ្នកចង់ជួយ។
ការជួយសង្គម មិនមែនទាល់តែជួយដល់មនុស្សច្រើន ឬជួយការពារសង្គមទាំងមូលទើបរាប់ថាជាការជួយសង្គមនោះទេ។ ការគោរពច្បាប់ ការខិតខំអភិវឌ្ឍសមត្ថភាពរបស់ខ្លួនឱ្យក្លាយជាធនធានមនុស្សខ្លាំងក្នុងសង្គម ការផ្សព្វផ្សាយពីអំពើល្អ ការបង្កើតសមិទ្ធផលថ្មីៗ និងការជួយក្នុងកិច្ចការងារសង្គមនានា សុទ្ធតែជាសកម្មភាពដែលគ្រប់គ្នាអាចធ្វើបាន។ ហេតុនេះការចាប់ផ្តើមជួយខ្លួនឯងឱ្យបានល្អបំផុត ក៏រាប់ថាជាការជួយសង្គមបានដែរ ហើយមិនចាំបាច់រង់ចាំថ្ងៃណានោះទេ សូមចាប់ផ្តើមពីថ្ងៃនេះ ដើម្បីត្រៀមខ្លួនជាប្រជាជនល្អរបស់ប្រទេសរបស់ខ្លួន និងជាសមាជិកល្អម្នាក់របស់ពិភពលោក៕
July 27, 2017
ទីបំផុតលោក Mark Zuckerberg ទទួលបានសញ្ញាបត្រហើយ បន្ទាប់ពីបោះបង់ការសិក្សាជាង 12ឆ្នាំ
ទីបំផុតស្ថាបនិក Facebook លោក Mark Zuckerberg បានទទួលសញ្ញាបត្រពីសាកលវិទ្យាល័យ Harvard ដែលលោកបានបោះបង់ចោលការសិក្សាកាលពីជាង 12ឆ្នាំមុន រហូតក្លាយជាមហាសេដ្ឋីបន្ទាប់ពីបានបង្កើតក្រុមហ៊ុនបច្ចេកវិទ្យាមួយ នេះបើយោងតាមគេហទំព័រ Telegrapth។
លោក Mark Zuckerberg បានបង្កើត Facebook នៅក្នុងបន្ទប់អន្តេវាសិកដ្ឋាននៅឆ្នាំ 2004 ហើយភាពជោគជ័យរបស់លោកក៏ចាប់ផ្តើមចេញពី Harvard ផងដែរ។ ដំបូងឡើយ Facebook ត្រូវបានដាក់ឱ្យប្រើប្រាស់តែក្នុងសាកលវិទ្យាល័យ Harvard តែប៉ុណ្ណោះ បន្ទាប់មកក៏ពង្រីកទៅកាន់សាកលវិទ្យាល័យ Ivy League University មុននឹងក្លាយជាបណ្តាញសង្គមដ៏មានប្រជាប្រិយភាពបំផុតក្នុងពិភពលោក។
រយៈពេល ១២ឆ្នាំបន្ទាប់ពីបានចាកចេញពីសាកលវិទ្យាល័យ Harvard ដើម្បីធ្វើការងារពេញម៉ោងនៅក្រុមហ៊ុន Facebook លោក Mark Zuckerberg មិនដែលបោះបង់ចោលគោលបំណងរបស់លោកក្នុងការត្រឡប់មកទទួលយកសញ្ញាបត្ររបស់លោកនោះឡើយ។ នៅពេលដែលលោកបានសិក្សានៅសាកលវិទ្យាល័យ Harvard ក្រុមហ៊ុន Facebook បានផ្លាស់ប្តូរទីតាំងនៃការិយាល័យកណ្តាលរបស់ខ្លួនទៅកាន់រដ្ឋកាលីហ្វ័រនីញ៉ា តែ Zuckerberg នៅតែបន្តព្យាយាមចុះឈ្មោះចូលរៀន រហូតដល់ពេលដែលលោកត្រូវបង្ខំចិត្តចាកចេញពីសាលាតែម្តងនៅខែវិច្ឆិកា ឆ្នាំ2015។
ការទទួលសញ្ញាបត្ររបស់លោក Mark Zuckerberg នៅពេលនេះគឺហាក់មានរយៈពេលលឿនជាងលោក Bill Gates ដែលបានបោះបង់ចោលការសិក្សានៅឆ្នាំ 1975 ហើយរង់ចាំអស់រយៈពេលដល់ទៅ 32ឆ្នាំ ទម្រាំទទួលបានសញ្ញាបត្រពីសាកលវិទ្យាល័យមួយនេះ បើគិតចាប់ពីថ្ងៃដែលលោកចាកចេញពី Harvard នៅឆ្នាំ 1975 ហើយទទួលបានសញ្ញាបត្រនៅឆ្នាំ 2007។
នៅក្នុងកម្មវិធីទទួលសញ្ញាបត្រនេះ លោក Mark Zuckerberg ក៏ត្រូវបានអញ្ជើញឱ្យឡើងថ្លែងសុន្ទរកថាដូចដែលមានខ្លឹមសារនៅក្នុងខ្សែវីដេអូខាងក្រោមនេះ ៖
May 26, 2017
WOW! ចំនួនអ្នកប្រើ Facebook បានកើនដល់ ១.៩ពាន់លាននាក់
កាន់តែធំទៅៗហើយ នៅពេលនេះ ចំនួនអ្នកប្រើប្រាស់បណ្ដាញសង្គម Facebook បានកើនឡើងដល់ ១.៩ពាន់លាននាក់ ខណៈដែលមានមនុស្ស ១.៣ពាន់លាននាក់ បានប្រើប្រាស់ Facebook រាល់ថ្ងៃ។
នៅថ្ងៃនេះ លោក Mark Zuckerberg ស្ថាបនិក និងជានាយកប្រតិបត្តិ Facebook បានប្រកាសនៅលើ Facebook Page ផ្ទាល់ខ្លួនរបស់លោកថា គិតត្រឹមថ្ងៃនេះ ចំនួនអ្នកអ្នកប្រើ Facebook បានកើនដល់ ១.៩ពាន់លាននាក់ ខណៈដែលអ្នកប្រើ Facebook Messenger មានចំនួន ១.២ពាន់លាននាក់។
ជាមួយគ្នានោះផងដែរ មហាសេដ្ឋីវ័យក្មេងរូបនេះ ក៏បានទម្លាយឱ្យដឹងផងដែរថា ចំនួនអ្នកប្រើកម្មវិធីជជែកកម្សាន្ត WhatsApp បានកើនដល់ ១.២ពាន់លាននាក់៕
May 4, 2017