GDP - La Reine Media

សេដ្ឋកិច្ចចិនមានកំណើនលឿនជាងការព្យាករ នៅក្នុងត្រីមាសទីបីនៃឆ្នាំនេះ

ទិន្នន័យរបស់អគ្គនាយកដ្ឋានស្ថិតិចិន បង្ហាញថា ផលិតផលក្នុងស្រុកសរុប (GDP) របស់ប្រទេសនេះ ក្នុងត្រីមាសទីបីនៃឆ្នាំ 2023 កើន 4.9% ធៀបនឹងដំណាក់កាលដូចគ្នានៃឆ្នាំ 2022។

យោងតាមទិន្នន័យផ្លូវការដែលត្រូវបានអគ្គនាយកដ្ឋានស្ថិតិចិន (NBS) ប្រកាសនាថ្ងៃទី 18 តុលា 2023 សេដ្ឋកិច្ចប្រទេសចិនក្នុងត្រីមាសទីបីរបស់ឆ្នាំនេះ កើនលឿនជាងការព្យាករ ដែលនេះទំនងជាអាចជួយឱ្យរដ្ឋាភិបាលចិនសម្រេចបានគោលដៅសេដ្ឋកិច្ចពេញមួយឆ្នាំដែលបានដាក់ចេញ។

ទិន្នន័យរបស់ NBS បង្ហាញថា ផលិតផលក្នុងស្រុកសរុប (GDP) របស់ប្រទេសនេះ ក្នុងត្រីមាសទីបីនៃឆ្នាំ 2023 កើន 4.9% ធៀបនឹងដំណាក់កាលដូចគ្នានៃឆ្នាំ 2022 និងខ្ពស់ជាងការវាយតម្លៃ (4.4%) របស់ក្រុមអ្នកជំនាញ នៅក្នុងការស្ទង់មតិរបស់ទីភ្នាក់ងារសារព័ត៌មាន Reuters នាពេលកន្លង។

GDP ក្នុងត្រីមាសទីបី កើន 1.3% ខ្ពស់ជាងឆ្ងាយបើធៀបនឹងកំណើន 0.5% ក្នុងត្រីមាសទីពីរ ហើយខ្ពស់ជាងការព្យាករ (1%) ផងដែរ។

កំណើន GDP របស់ប្រទេសចិនត្រូវបានព្យាករថា នឹងសម្រេចបាន 4.9% ក្នុងត្រីមាសទីបួន។ រដ្ឋាភិបាលចិនបានកំណត់គោលដៅប្រហែល 5% សម្រាប់កំណើនសេដ្ឋកិច្ចពេញមួយឆ្នាំ 2023។

បើទោះទិន្នន័យខាងលើបង្ហាញថា សេដ្ឋកិច្ចចិនចាប់ផ្ដើមមានស្ថិរភាពជាងមុន ក្រោយពីមានចំណាត់ការជាច្រើន ប៉ុន្តែក្រុមអ្នកជំនាញជឿថា រដ្ឋាភិបាលប្រទេសនេះគួរតែធ្វើកិច្ចការច្រើនបន្ថែមទៀត ដើម្បីជំរុញកំណើនសេដ្ឋកិច្ច។

សេដ្ឋកិច្ចចិនមានកំណើន 3% ក្នុងឆ្នាំ 2022 ទាបជាងបើធៀបនឹងការកំណត់គោលដៅរបស់រដ្ឋាភិបាល ដោយសារតែការរឹតបន្តឹងនានាដើម្បីទប់ស្កាត់កូវីដ-19។

October 18, 2023

IMF ព្យាករថា សេដ្ឋកិច្ចសកលអាចងើបឡើងបែប «ថ្នមៗ»

មូលនិធិរូបិយវត្ថុអន្តរជាតិ (IMF) បានបញ្ជាក់អំពីលទ្ធភាពដែលបណ្ដាធនាគារកណ្ដាលគ្រប់គ្រងបាននូវបញ្ហាអតិផរណា ដោយមិនរុញច្រានពិភពលោកធ្លាក់ក្នុងឱនភាពសេដ្ឋកិច្ច។

ក្នុងកិច្ចប្រជុំនាថ្ងៃទី 10 តុលា IMF យល់ថា សេដ្ឋកិច្ចពិភពលោកអាចមានកំណើន 3% ក្នុងឆ្នាំនេះ ដោយមូលហេតុថា ល្បឿននៃកំណើនខ្ពស់ជាងគេរបស់សហរដ្ឋអាម៉េរិក នឹងប៉ះប៉ូវការរំពឹងថានឹងធ្លាក់ចុះនៃសេដ្ឋកិច្ចរបស់ចិន និងអឺរ៉ុប។

រំលឹកឡើងវិញអំពីការអះអាងកាលពីខែកក្កដា IMF សង្កត់ធ្ងន់ថា សេដ្ឋកិច្ចសកលនៅតែមានជំហររឹងមាំនៅចំពោះមុខវិបត្តិសុខភាពសកល និងសង្គ្រាមនៅអ៊ុយក្រែន។ IMF អះអាងថា កំណើនសេដ្ឋកិច្ច និងអតិផរណាបច្ចុប្បន្ន កាន់តែសមស្របនឹងសេណារីយោ «ងើបឡើងដោយថ្នមៗ» ពិសេសគឺសហរដ្ឋអាម៉េរិក។

សេដ្ឋកិច្ចរបស់សហរដ្ឋអាម៉េរិកត្រូវបានព្យាករថា មានកំណើនលឿនជាងគេក្នុងចំណោមប្រទេសមហាអំណាចសេដ្ឋកិច្ច ដោយនឹងមាន GDP (ផលិតផលក្នុងស្រុកសរុប) កើនឡើង 2.1% ក្នុងឆ្នាំនេះ។

GDP របស់អឺរ៉ុប និងចិន បច្ចុប្បន្នត្រូវបានព្យាករថា អន់ជាងបើធៀបនឹងបីខែមុន ស្របពេលដែលតំបន់នានារបស់ពិភពលោកមានកំណើន GDP មិនស្មើគ្នា៕

October 11, 2023

IMF ព្រមានអំពីហានិភ័យធ្លាក់ចុះនៃទិន្នផលសេដ្ឋកិច្ចទូទាំងពិភពលោក

មូលនិធិរូបិយវត្ថុអន្តរជាតិ (IMF) កាលពីថ្ងៃទី 28 កញ្ញា បានសង្កត់ធ្ងន់អំពីហានិភ័យពាណិជ្ជកម្មទូទាំងពិភពលោកត្រូវបានបំបែកជាតំបន់ដាច់ដោយឡែក ហើយថា ការវិវត្តបែបនេះអាចធ្វើឱ្យទិន្នផលសេដ្ឋកិច្ចទូទាំងពិភពលោកត្រូវថយចុះរហូតដល់ 7%។

«យើងជឿថា ប្រការនោះនឹងបង្កការខាតបង់ដល់សេដ្ឋកិច្ចសកល…។ លទ្ធផលនៃការវិភាគរបស់យើងបង្ហាញថា ការបំបែកនោះអាចធ្វើឱ្យផលិតផលក្នុងស្រុកសរុប (GDP) ទូទាំងសកលលោក ថយចុះ 7% ស្មើនឹងទំហំសេដ្ឋកិច្ចរបស់ប្រទេសអាល្លឺម៉ង់ និងជប៉ុន» អ្នកនាំពាក្យរបស់ IMF លោកស្រី Julie Kozack បានសង្កត់ធ្ងន់ដូច្នេះនៅក្នុងសន្និសីទសារព័ត៌មានកាលពីថ្ងៃទី 28 កញ្ញា។

នៅក្នុងការសម្រេចចិត្តដោយឡែកមួយនៅក្នុងថ្ងៃ 28 កញ្ញាដដែល ក្រុមប្រឹក្សាភិបាល IMF បានអនុម័តខ្ទង់ប្រាក់កម្ចី 1.3 ពាន់លានដុល្លារអាម៉េរិកសម្រាប់ប្រទេសម៉ារ៉ុកផងដែរ ដើម្បីបង្កើនសមត្ថភាពស្ដារប្រទេសនេះឡើងវិញ ក្រោយពីបានរងគ្រោះមហន្តរាយធម្មជាតិដែលទាក់ទងនឹងអាកាសធាតុ៕

September 30, 2023

វិស័យទេសចរណ៍ថៃនឹងទទួលភ្ញៀវចិនរាប់រយយន្តហោះជារៀងរាល់ថ្ងៃ

ចាប់ពីថ្ងៃទី 13 កញ្ញា 2023 រដ្ឋាភិបាលថ្មីរបស់ប្រទេសថៃបានអនុម័តវិធានការមួយចំនួនដើម្បីជំរុញវិស័យទេសចរណ៍ ក្នុងនោះក៏មានកម្មវិធីលើកលែងទិដ្ឋាការដើម្បីទាក់ទាញភ្ញៀវទេសចរណ៍ចិន។

ភ្ញៀវទេសចរណ៍ដែលមកពីប្រទេសចិន និងប្រទេសកាហ្សាក់ស្ថាន នឹងទទួលបានការលើកលែងទិដ្ឋាការនៅពេលមកទស្សនាប្រទេសថៃចាប់ពីថ្ងៃទី 25 កញ្ញា 2023 ដល់ 29 កុម្ភៈ 2024។

គោលនយោបាយថ្មីដែលអូសបន្លាយពេលតែប៉ុន្មានខែនេះគឺដើម្បីវាយតម្លៃលើឥទ្ធិពលទៅលើសេដ្ឋកិច្ចជាតិ ប៉ុន្តែនេះក៏បង្ហាញថា អាជ្ញាធរថៃមានយុទ្ធសាស្ត្រច្បាស់លាស់ដើម្បីអភិវឌ្ឍវិស័យទេសចរណ៍។

ទេសចរណ៍គឺជាវិស័យមួយដ៏សំខាន់ដែលជួយជំរុញវឌ្ឍនភាពនៃកំណើនសេដ្ឋកិច្ចរបស់ប្រទេសថៃ ដោយវារួមចំណែកប្រមាណ 12% នៃផលិតផលក្នុងស្រុកសរុប (GDP)។ ប្រទេសនេះធ្លាប់បានទទួលភ្ញៀវអន្តរជាតិប្រហែល 40 លាននាក់កាលពីឆ្នាំ 2019 នាំមកនូវប្រាក់ចំណូល 53.2 ពាន់លានដុល្លារអាម៉េរិក។

ចាប់ពីដើមឆ្នាំ 2023 មកដល់បច្ចុប្បន្ន ប្រទេសថៃបានទទួលភ្ញៀវបរទេសជាង 18.5 លាននាក់។ តាមការព្យាករ គិតដល់ដំណាច់ឆ្នាំ តួលេខនេះនឹងកើនដល់ 28 លាននាក់។ ក្រសួងទេសចរណ៍ថៃឱ្យដឹងថា ប្រាក់ចំណូលដែលបានពីភ្ញៀវអន្តរជាតិ គិតត្រឹមថ្ងៃទី 18 កញ្ញា គឺ 795 ពាន់លានបាត (22 ពាន់លានដុល្លារអាម៉េរិក)។

រដ្ឋាភិបាលថៃសង្ឃឹមថា គោលនយោបាយលើកលែងទិដ្ឋាការខាងលើនឹងជួយទាក់ទាញអ្នកទេសចរណ៍ចិន និងកាហ្សាក់ស្ថានបានច្រើនជាងមុន។ ដោយឡែក អាជ្ញាធរគ្រប់គ្រងអាកាសយានដ្ឋានប្រទេសថៃ (AOT) ក៏រំពឹងថា ភ្ញៀវចិនជាង 120,000 នាក់ នឹងចុះចតនៅអាកាសយានដ្ឋាន Don Mueang និង Suvarnabhumi នៅក្នុងសប្ដាហ៍ដំបូងនៃការអនុវត្តគោលនយោបាយលើកលែងទិដ្ឋាការចាប់ពីថ្ងៃទី 25 កញ្ញា ដល់ 01 តុលា 2023។

AOT ឱ្យដឹងថា នឹងមានជើងហោះហើរប្រហែល 674 ជើងពីប្រទេសចិនមកកាន់អាកាសយានដ្ឋាន Suvarnabhumi ក្នុងអំឡុងពេលខាងលើ ពោលគឺប្រហាក់ប្រហែលនឹង 96 ជើងជារៀងរាល់ថ្ងៃ៕

September 23, 2023

ពេលយកពន្ធលើទ្រព្យអ្នកមាន តំបន់នេះនឹងប្រមូលបានជិត 230 ពាន់លានដុល្លារអាម៉េរិក/ឆ្នាំ

បើសិនយកពន្ធលើទ្រព្យរបស់ពលរដ្ឋ 0.5% ដែលជាអ្នកមានជាងគេនៅតាមបណ្ដាប្រទេសជាសមាជិក សហភាពអឺរ៉ុបនឹងអាចប្រមូលថវិកាបានជាង 227 ពាន់លានដុល្លារអាម៉េរិក។

គំនិតខាងលើនេះត្រូវបានលើកឡើងក្នុងការសិក្សាស្រាវជ្រាវមួយនៃក្រុមសម្ព័ន្ធសេរីភាពរបស់សភាអឺរ៉ុបដែលទើបតែត្រូវបានប្រកាសបន្ទាប់ពីអ្នកសេដ្ឋកិច្ច និងនយោបាយ នៅក្នុងកិច្ចប្រជុំកំពូល G20 នៅញូវដែលីប្រទេសឥណ្ឌាកាលពីពីរសប្ដាហ៍មុននោះ បានអំពាវនាវឱ្យមានការយកពន្ធលើក្រុមអ្នកមានកំពូលៗ។

យោងតាមការសិក្សាស្រាវជ្រាវខាងលើ បើសិនរដ្ឋយកពន្ធលើទ្រព្យរបស់ពលរដ្ឋ 0.5% ដែលជាអ្នកមានបំផុតនៅក្នុងបណ្ដាប្រទេសនៅអឺរ៉ុប សហភាពនេះនឹងប្រមូលប្រាក់បានជាង 213 ពាន់លានអឺរ៉ូ (ជាង 227 ពាន់លានដុល្លារអាម៉េរិក) ជារៀងរាល់ឆ្នាំ។ ក្រុមមនុស្ស 0.5% នេះ កំពុងកាន់កាប់ទ្រព្យសម្បត្តិជិត 20% របស់អឺរ៉ុប ច្រើនជាងឆ្ងាយបើធៀបនឹងទ្រព្យ 3.5% របស់ក្រុមពលរដ្ឋប្រហែលពាក់កណ្ដាលដែលក្រីក្របំផុត។ ជាងនេះ ទ្រព្យរបស់ក្រុមអ្នកមាន 0.5% ក៏បានកើន 35% ក្នុងដប់ឆ្នាំកន្លង។ ការសិក្សាស្រាវជ្រាវនេះទទួលបានសិទ្ធិចាត់ចែងដោយអង្គការមិនមែនរដ្ឋាភិបាល បណ្ដាញយុត្តិធម៌ពន្ធដារ។

ប្រទេសអាល្លឺម៉ង់ និងបារាំងនឹងប្រមូលប្រាក់បានច្រើនជាងគេបើសិនយកពន្ធលើទ្រព្យអ្នកមាន ក្នុងនោះ អាល្លឺម៉ង់នឹងទទួលបានជាង 65 ពាន់លានអឺរ៉ូ (69.3 ពាន់លានដុល្លារអាម៉េរិក) ចំណែកបារាំងនឹងទទួលបានជាង 46 ពាន់លានអឺរ៉ូ (49 ពាន់លានដុល្លារអាម៉េរិក)។ នៅអឺរ៉ុបខាងត្បូង ប្រទេសអ៊ីតាលីនឹងប្រមូលប្រាក់ពន្ធនេះបាន 27.2 ពាន់លានអឺរ៉ូ (28.9 ពាន់លានដុល្លារអាម៉េរិក) ស្របពេលដែលព័រទុយហ្កាល់នឹងប្រមូលបាន 3.7 ពាន់លានអឺរ៉ូ និងក្រិកប្រមូលបាន 1.4 ពាន់លានអឺរ៉ូ (1.49 ពាន់លានដុល្លារអាម៉េរិក)។

រូបមន្តនៃការយកពន្ធលើអ្នកមានដែលត្រូវបានស្នើដោយក្រុមសម្ព័ន្ធសេរីខាងលើ មិនដូចទៅនឹងរូបមន្តយកពន្ធលើអ្នកមាននៅអេស្ប៉ាញ ឬពន្ធអចលនទ្រព្យរបស់បារាំងនោះឡើយ។ សំណើពន្ធនេះនឹងអនុវត្តចំពោះទ្រព្យសម្បត្តិគ្រប់ប្រភេទ តាំងពីអចលនទ្រព្យ ប្រាក់ផ្ញើនៅធនាគារ ភាគហ៊ុននៅក្នុងក្រុមហ៊ុន រហូតដល់ស្នាដៃសិល្បៈ។

បើសិនជាត្រូវបានអនុវត្ត ខ្ទង់ប្រាក់ដែលបានពីពន្ធទ្រព្យអ្នកមាននេះនឹងរួមចំណែក 1.35% នៃ GDP របស់សហភាពអឺរ៉ុប។ នេះមិនទាន់និយាយដល់ឥទ្ធិពលបន្ថែមដែលកើតឡើងក្នុងពេលដោះស្រាយបញ្ហាគេចពន្ធរបស់បុគ្គលអ្នកមាននៅក្នុងបណ្ដាប្រទេសដែលមិនយកពន្ធ ឬយកពន្ធតិចតួចលើទ្រព្យសម្បត្តិ៕

September 22, 2023

OECD ព្រមានថា សេដ្ឋកិច្ចរបស់ពិភពលោកនឹងបន្តពើបប្រទះការលំបាក

ថ្វីបើបានព្យាករថា GDP ឆ្នាំនេះកើនឡើង ប៉ុន្តែ OECD ព្រមានថា សេដ្ឋកិច្ចពិភពលោកមានហានិភ័យបន្ថយល្បឿន ព្រោះតែសម្ពាធការប្រាក់ និងសេដ្ឋកិច្ចចិនងើបឡើងប្រកបដោយភាពទន់ខ្សោយ។

អង្គការសហប្រតិបត្តិការ និងអភិវឌ្ឍសេដ្ឋកិច្ច (OECD) ទើបតែបានបញ្ចេញការព្យាករថ្មីបំផុតស្ដីពី GDP ទូទាំងសកលលោកឆ្នាំ 2023 ដែលអះអាងថា មានកំណើន 3% កើន 0.3 ពិន្ទុភាគរយធៀបនឹងការព្យាករមុននោះ។ ក៏ប៉ុន្តែ នេះនៅតែជាកម្រិតក្រោមធម្យមភាគ ហើយក៏ជាកំណើនប្រចាំឆ្នាំទាបបំផុតរាប់ចាប់ពីវិបត្តិហិរញ្ញវត្ថុសកល (2008 – 2009) លើកលែងតែឆ្នាំ 2020 ដែលរងផលប៉ះពាល់ពីកូវីដ។

អង្គការដែលមានទីស្នាក់ការកណ្ដាលនៅប៉ារីស ក៏បានទម្លាក់ការព្យាករកំណើនសេដ្ឋកិច្ចឆ្នាំក្រោយ 0.2 ពិន្ទុភាគរយ មកនៅត្រឹម 2.7%។ Clare Lombardelli ប្រធានផ្នែកសេដ្ឋកិច្ចរបស់ OECD វាយតម្លៃថា អតិផរណាបន្តថយចុះ ប៉ុន្តែសេដ្ឋកិច្ចពិភពលោកនៅតែស្ថិតក្នុងស្ថានភាពលំបាក។ លោកនិយាយកាលពីថ្ងៃទី 19 កញ្ញាថា «យើងកំពុងប្រឈមនឹងឧបសគ្គពីរត្រួត នោះគឺអតិផរណា និងកំណើនទាប»។

OECD យល់ថា ហានិភ័យគឺថា ការព្យាករកំពុងតែមានទំនោរទៅរកភាពអវិជ្ជមាន ព្រោះតែការដំឡើងការប្រាក់កាលពីអតីតកាលអាចប៉ះពាល់ធ្ងន់ធ្ងរជាងការរំពឹងទុក ហើយអតិផរណាក៏មានហានិភ័យអាក្រក់ក្នុងរយៈពេលយូរ ទាមទារឱ្យមានការរឹតបន្តឹងនយោបាយរូបិយវត្ថុបន្ថែមទៀត។ ពួកគេចាត់ទុកថា ការលំបាករបស់ចិនគឺជាហានិភ័យសម្រាប់ទិន្នផលទូទាំងសកលលោក។

OECD ព្យាករថា កំណើនសេដ្ឋកិច្ចនៅតំបន់ចាយប្រាក់អឺរ៉ូឆ្នាំនេះគឺ 0.6% និងឆ្នាំក្រោយគឺ 1.1%។ កំណើននេះនៅសហរដ្ឋអាម៉េរិកនឹងបន្ថយល្បឿនមកនៅត្រឹម 1.3% ក្នុងឆ្នាំ 2024 ទាបជាងធៀបនឹង 2.2% ក្នុងឆ្នាំនេះ។

កំណើនសេដ្ឋកិច្ចប្រទេសចិននៅឆ្នាំក្រោយក៏ធ្លាក់ចុះមកនៅត្រឹម 4.6% ដោយសារតម្រូវការក្នុងស្រុកថយចុះ និងភាពតានតឹងក្នុងទីផ្សារអចលនទ្រព្យ។ កំណើន GDP របស់ប្រទេសចិនក្នុងឆ្នាំ 2023 អាចឡើនដល់ 5.1% ថយចុះ 0.3 ពិន្ទុភាគរយបើធៀបនឹងការព្យាករមុនរបស់ OECD។

OECD យល់ថា រដ្ឋាភិបាលនានាមិនគួរធ្វើអន្តរាគមន៍ដោយការបង្កើនការចំណាយបន្ថែមដើម្បីជំរុញកំណើនសេដ្ឋកិច្ច។ ជំនួសមកវិញ គួរតែកាត់បន្ថយការឧបត្ថម្ភ ដើម្បីសម្រួលឱ្យមានការវិនិយោគជាថ្មីនៅពេលអនាគត និងចៀសវាងកំណើនអតិផរណា។

អង្គការខាងលើក៏បានព្រមានដែរថា មិនគួរបន្ធូរបន្ថយការរឹតបន្តឹងនយោបាយរូបិយវត្ថុ ដោយសារតែអតិផរណានៅតែមាន។ យោងតាម OECD រដ្ឋាភិបាលនានាពុំមានលទ្ធភាពច្រើនក្នុងការទម្លាក់ការប្រាក់រហូតដល់ចុងឆ្នាំ 2024។

September 20, 2023

កុលសម្ព័ន្ធដែលមានទ្រព្យធនច្រើនជាងគេបំផុតនៅទ្វីបអាហ្វ្រិក៖ មេកុលសម្ព័ន្ធអាចយកប្រពន្ធ 80 នាក់

នៅពេលនិយាយដល់ទ្វីបអាហ្វ្រិក មនុស្សស្ទើរតែទាំងអស់គិតថា នេះគឺជាទ្វីបដ៏ក្រក្រី សេដ្ឋកិច្ចអន់ថយ គ្មានការរីកចម្រើន។ ក៏ប៉ុន្តែ ជាក់ស្ដែង នេះគឺជាទ្វីបដែលសម្បូរធនធានធម្មជាតិ។

មកដល់បច្ចុប្បន្ន មានមនុស្សតិចតួចណាស់ដែលបានដឹងថា នៅទ្វីបអាហ្វ្រិកមានកុលសម្ព័ន្ធមួយដែលសម្បូរទ្រព្យធន។ កុលសម្ព័ន្ធនេះមានមាសច្រើនដល់ថ្នាក់ប្រើប្រាស់មិនអស់។ នោះគឺកុលសម្ព័ន្ធ Ashanti ដែលរស់នៅក្នុងភាគខាងត្បូងនៃប្រទេសហ្កាណា ស្ថិតក្នុងតំបន់អាហ្វ្រិកខាងលិច។ ហ្កាណាគឺជាប្រទេសតូចមួយដែលកំពុងអភិវឌ្ឍ។ ឆ្នាំ 2022 ផលិតផលក្នុងស្រុកសរុប (GDP) របស់ហ្កាណាមានត្រឹមតែ 85.96 ពាន់លានដុល្លារអាម៉េរិកប៉ុណ្ណោះ។

ក៏ប៉ុន្តែហ្កាណាគឺជាប្រទេសដែលសម្បូរធនធានរ៉ែធម្មជាតិ ក្នុងនោះក៏មានរ៉ែមាសដ៏ច្រើន ឈរលំដាប់ទីពីរក្នុងទ្វីបអាហ្វ្រិក និងមានរ៉ែត្បូងពេជ្រច្រើនជាងគេលំដាប់ទីបួនក្នុងពិភពលោក។ ក្រៅពីនេះ ហ្កាណាក៏មានរ៉ែប្រេង និងដែក។ល។

ដោយសារតែសម្បូរធនធានរ៉ែធម្មជាតិ ហ្កាណាគឺជាទឹកដីដែលអាចទិញដូរមាសក្នុងតម្លៃទាបយ៉ាងងាយស្រួល។ មាសនៅហ្កាណាពិតជាងាយស្រួលរកនៅគ្រប់កន្លែង រហូតដល់ថ្នាក់គេនិយាយថា ឱ្យតែអ្នកមើលឃើញទន្លេ អ្នកអាចស្រង់បានមាស។

តាមការសិក្សាស្រាវជ្រាវ អណ្ដូងរ៉ែមាសនៅប្រទេសហ្កាណាត្រូវបានទាញយកតាំងពីជាង 500 ឆ្នាំមកហើយ ប៉ុន្តែតាមការវាយតម្លៃអំពីធនធានរ៉ែធម្មជាតិបច្ចុប្បន្ន ប្រជាជនហ្កាណាអាចទាញយករ៉ែមាសបាន 700 ឆ្នាំទៀត។

កុលសម្ព័ន្ធសម្បូរទ្រព្យធន ពាក់មាសរាប់គីឡូនៅលើខ្លួន

នៅលើទឹកដីហ្កាណា កុលសម្ព័ន្ធ Ashanti ល្បីឈ្មោះខ្លាំងដោយសារតែមានអណ្ដូងរ៉ែមាសធំជាងគេ។ ប្រជាជនក្នុងកុលសម្ព័ន្ធមានជីវភាពល្អប្រសើរ ក្នុងនោះគេឃើញស្ត្រីជាច្រើនពាក់មាសរាប់គីឡូ។ កុលសម្ព័ន្ធ Ashanti មានប្រជាជនប្រហែល 3 លាននាក់ និងមានអង្គការចាត់តាំង រស់នៅដូចប្រទេសឯករាជ្យមួយ។

កុលសម្ព័ន្ធនេះសម្បូរទ្រព្យធនខ្លាំងណាស់។ ពួកគេមានកៅអីខ្នាតធំមួយដែលផលិតអំពីមាសសុទ្ធ។ ប៉ុន្តែកៅអីមាសនេះទុកសម្រាប់ប្រើប្រាស់ក្នុងពិធីសែនព្រេនក្នុងព្រឹត្តិការណ៍ធំៗប៉ុណ្ណោះ ដោយមិនអនុញ្ញាតឱ្យអង្គុយឡើយ។ ជនជាតិ Ashanti ចូលចិត្តប្រើប្រាស់គ្រឿងអលង្ការធ្វើពីមាស។ សូម្បីតែក្រចកដៃរបស់ពួកគេក៏គ្របដណ្ដប់ពេញដោយមាស។

ដូចទៅនឹងកុលសម្ព័ន្ធដទៃនៅទ្វីបអាហ្វ្រិក ជនជាតិ Ashanti ក៏មានទម្លាប់យកប្រពន្ធច្រើន។ ពិសេស មេកុលសម្ព័ន្ធ Ashanti មានភរិយារហូតដល់ 80 នាក់។ ប្រការដែលគួរឱ្យភ្ញាក់ផ្អើលគឺថា ភរិយាទាំងអស់របស់មេកុលសម្ព័ន្ធ សុទ្ធតែរស់នៅចុះសម្រុងនឹងគ្នា ដោយពួកគេចាត់ទុកគ្នាដូចទៅនឹងបងប្អូនបង្កើតនៅក្នុងគ្រួសារ និងរួមគ្នាបម្រើស្វាមី។

កុលសម្ព័ន្ធ Ashanti ក៏អនុវត្តរបប «ផ្ទេរអំណាចតត្រកូល»។ អ្នកស្នងតំណែងប្រធានកុលសម្ព័ន្ធនឹងទទួលមរតកទាំងអស់របស់អតីតមេកុលសម្ព័ន្ធ បូករួមទាំងភរិយា និង «ស្នំ» ទាំងអស់ផងដែរ។

ពិសេសជាងនេះ រាល់ពេលដែលមេកុលសម្ព័ន្ធចេញទៅធ្វើទស្សនកិច្ចខាងក្រៅនឹងមានទិដ្ឋភាពពិសេស ដូចទៅនឹងមហាក្សត្រកាលពីសម័យបុរាណ ដោយសារមានអ្នកបម្រើ រួមនឹងភរិយារាប់សិបនាក់តាមហែហមអមដំណើរ៕

September 1, 2023

អបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ជូនដល់កាកបាទក្រហមកម្ពុជា សាខាខេត្តពោធិ៍សាត់

[ភ្នំពេញ – ថ្ងៃទី ១៣ ខែកក្កដា ឆ្នាំ២០២៣] ក្រុមហ៊ុន RMA (Cambodia) PLC ដែលជាក្រុមហ៊ុននាំចូល និងចែកចាយផ្តាច់មុខរថយន្ត Ford ក្នុងទីផ្សារប្រទេសកម្ពុជាបានប្រារព្ធពិធីប្រគល់-ទទួលអំណោយរថយន្តគិលានសង្គ្រោះចំនួន ២ គ្រឿង ជូនទៅដល់កាកបាទក្រហមកម្ពុជា សាខាខេត្តពោធិ៍សាត់ ដែលកម្មវិធីនេះត្រូវបានប្រារព្ធឡើង ក្រោមអធិបតីភាពរបស់ ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា និងលោកអភិបាលនៃគណៈអភិបាលខេត្តពោធិ៍សាត់ ព្រមទាំងថ្នាក់ដឹកនាំក្រុមហ៊ុន Ford Motor Company ថ្នាក់ដឹកនាំក្រុមហ៊ុន RMA Group និងក្រុមហ៊ុន RMA (Cambodia) PLC រួមទាំងភ្ញៀវកិត្តិយសជាតិ និងអន្តរជាតិប្រមាណជាង ២០០ នាក់។ កម្មវិធីនេះបានប្រារព្ធឡើងនៅក្នុងបរិវេនរោងចក្រដំឡើងរថយន្ត Ford ក្នុងភូមិសារវ័ន ឃុំស្នាអន្សារ ស្រុកក្រគរ ខេត្តពោធិ៍សាត់ នៅថ្ងៃទី ១១ ខែកក្កដា ឆ្នាំ ២០២៣ ។

ក្នុងឱកាសនៃពីធីអបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ចំនួន ២ គ្រឿង ជូនដល់កាកបាទក្រហមកម្ពុជា សាខាខេត្តពោធិ៍សាត់ លោក ងន សាំង អគ្គនាយកក្រុមហ៊ុន RMA (Cambodia) PLC បានមានប្រសាសន៍ថា៖ “ យើងខ្ញុំមានមោទភាពជាពន់ពេកដែលទទួលបានសេចក្ដីទុកចិត្តពីក្រុមហ៊ុន FORD MOTOR COMPANY ក្នុងការដំឡើងរថយន្ត FORD RANGER និង FORD EVEREST ជំនាន់ថ្មីនៅ លើទឹកដីនៃព្រះរាជាណាចក្រកម្ពុជា ស្របតាមស្តង់ដាររបស់ក្រុមហ៊ុន FORD ។ យើងខ្ញុំជឿជាក់ថា ការបោះជំហានវិនិយោគក្នុងវិស័យយានយន្តរបស់ក្រុមហ៊ុនយើងខ្ញុំ ចូលរួមចំណែកយ៉ាងសំខាន់ ក្នុងការអភិវឌ្ឍវិស័យឧសហ្សាកម្មយានយន្តនៅកម្ពុជា និងជាសក្ខីភាពនៃទំនុកចិត្តលើកិច្ចខិតខំប្រឹង ប្រែងរបស់រដ្ឋាភិបាលក្នុងការធ្វើឱ្យប្រសើរឡើង នូវបរិយាកាសធុរកិច្ច និងវិនិយោគ។ វត្តមានរបស់ រោងចក្រយើងខ្ញុំក៏បានចូលរួមចំណែកការកាត់បន្ថយការធ្វើចំណាកស្រុកទៅធ្វើការនៅក្រៅប្រទេស របស់ប្រជាពលរដ្ឋ និងលើកកម្ពស់សេដ្ឋកិច្ចក្នុងតំបន់តាមរយៈការជំរុញសន្ទុះអាជីវកម្មសហគ្រាស ធុនតូច និងមធ្យម ការបង្កើតឱកាសការងារដោយផ្ទាល់និងដោយប្រយោល ក៏ដូចជាការអភិវឌ្ឍន៍ ធនធានមនុស្សនៅក្នុងទឹកដី ខេត្តពោធិ៍សាត់នេះផ្ទាល់ផងដែរ។ ”

មិនតែប៉ុណ្ណោះ លោកក៏បានបន្ថែមទៀតថា៖ “ ក្រុមហ៊ុនយើងខ្ញុំនឹងបន្តប្តេជ្ញាគាំទ្រ និង ជំរុញវិស័យឧស្សាហកម្មយានយន្តនៅកម្ពុជា ដើម្បីឱ្យកម្ពុជា ផ្លាស់ប្ដូរមុខមាត់ថ្មី ពីប្រទេសដែលដំឡើងរថយន្ត ទៅជាប្រទេសដែលផលិតរថយន្ត ក្នុងពេលអនាគត។ ក្រុមហ៊ុននឹងពង្រីកការវិនិយោគគម្រោងដំឡើងរថយន្ត Ford ដោយបង្កើនការនាំចូលនៃចំនួន គ្រឿងបង្គុំច្រើនជាងមុន បង្កើនចំនួនការងារក្នុងស្រុក ជំរុញការប្រើប្រាស់ធាតុផ្សំក្នុងស្រុក និងបង្កើន ដើមទុនវិនិយោគបន្ថែមទៀត។ យើងខ្ញុំជឿជាក់ថា ការវិនិយោគនេះនឹងបន្តផ្តល់អត្ថប្រយោជន៍ជាច្រើនបន្ថែមទៀតជូនប្រទេសកម្ពុជា ជាពិសេសការអភិវឌ្ឍន៍ខ្សែសង្វាក់ផ្គត់ផ្គង់ និងធ្វើឱ្យប្រសើរ ឡើងនូវខ្សែចង្វាក់ដែលគាំទ្រគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។ ការវិនិយោគនេះ នឹងនាំមកនូវផលិតផលថ្មី បច្ចេកវិទ្យាថ្មី ដើម្បីផ្គត់ ផ្គង់តម្រូវការប្រើប្រាស់រថយន្តថ្មីក្នុងស្រុក ជាមួយនឹងមោទភាពផលិតកម្មក្នុងស្រុក រោងចក្រ ដំឡើងរថយន្ត Ford នឹងបន្តទាក់ទាញវិនិយោគិនផ្សេងៗជាច្រើនទៀតមកវិនិយោគនៅកម្ពុជា ជា ពិសេស អ្នកវិនិយោគដែល ពាក់ព័ន្ធនឹងការផលិត និងដំឡើងរថយន្ត ដូចជា៖ សំបកកង់ កង់ឡាន ខ្សែភ្លើងឡាន អាគុយឡាន និងអាជីវកម្មផ្សេងៗទៀត។”

ឆ្លៀតក្នុងឱកាសនេះដែរ លោកស្រី Kay Hart ប្រធានគ្រប់គ្រងទីផ្សារអន្តរជាតិនៃក្រុមហ៊ុន Ford Motor Company បានមានប្រសាសន៍ថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នេះ បានបំពាក់មកជាមួយនូវបច្ចេកវិទ្យា និងប្រព័ន្ធសុវត្ថិភាពទំនើបជំនាន់ចុងក្រោយដែលធ្វើឱ្យរថយន្តនេះក្លាយជារថយន្តមួយដែលមានលក្ខណៈ ធន់ រឹងមាំ និងមានសមត្ថភាពក្នុងការចល័ត និងដឹកជញ្ជូនអ្នកជំងឺដោយសុវត្ថិភាព។ ”

លោកស្រីក៏បានបន្តទៀតថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នឹងចូលរួមចំណែកយ៉ាងសំខាន់សម្រាប់កាកបាទក្រហមកម្ពុជាក្នុងខេត្តពោធិ៍សាត់ ក្នុងការគាំពារ សង្គ្រោះបន្ទាន់ និងជាជំនួយការដ៏សំខាន់ក្នុងការជួយដល់សកម្មភាពសប្បុរសធម៌ផ្សេងៗដល់ប្រជាពលរដ្ឋ និងអ្នកជំងឺដើម្បីទទួលបាននូវសេវាកម្មសង្គ្រោះបន្ទាន់មួយដែលមាន គុណភាព សុវត្ថិភាព និងប្រសិទ្ធភាព។ ”

ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា បានមានប្រសាសន៍ថា៖ “ ការសាងសង់រោងចក្រដំឡើងរថយន្ត Ford ក្នុងខេត្តពោធិ៍សាត់ គឺជាសក្ខីភាពមួយដែលបានបង្ហាញពីទំនុកចិត្តរបស់ក្រុមហ៊ុន RMA Cambodia មកលើរាជរដ្ឋាភិបាលកម្ពុជា ហើយការផ្តល់ជូននូវរថយន្តគិលានសង្គ្រោះ ២ គ្រឿងក្នុងថ្ងៃនេះនឹងជាការចូលរួមចំណែកដ៏សំខាន់មួយក្នុងការពង្រឹងសមត្ថភាពមូលដ្ឋានសុខាភិបាលបន្ថែមទៀត ក្នុងការឆ្លើយតបទៅនឹងតម្រូវការសេវាថែទាំសុខភាពអោយកាន់តែមានគុណភាព ប្រសិទ្ធភាព និងសុវត្ថិភាព។ ភាពជាដៃគូរវាង RMA Cambodia និងវិទ្យាស្ថានបច្ចេកទេសក្នុងស្រុករបស់យើង បានដើរតួរនាទីយ៉ាងសំខាន់ក្នុងការលើកកម្ពស់ធនធានមនុស្ស តាមរយៈការបង្កើតកម្មវិធីបណ្តុះបណ្តាលដោយផ្ទាល់ពីអ្នកជំនាញដែលគ្រឹះមួយដ៏សំខាន់សម្រាប់យុវជន ក៏ដូចជាយុវនារីក្នុងការត្រៀមខ្លួនរួចជាស្រេចសម្រាប់ភាពជោគជ័យនាពេលខាងមុខ។ ”

គួរបញ្ជាក់ផងដែរថា ក្រុមហ៊ុន RMA (CAMBODIA) PLC ជាក្រុមហ៊ុនដំបូងគេបំផុត ដែលទទួលបានការទទួលស្គាល់ពី វិទ្យាស្ថានស្ដង់ដារកម្ពុជា នៃ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងនាមជាអ្នក អនុវត្តស្តង់ដារសុវត្ថិភាពយានយន្ត និងស្តង់ដារសុវត្ថិភាពគ្រឿងបង្គុំយានយន្តបានខ្ពស់បំផុត។ ក្នុងឆ្នាំ ២០២០ ក្រុមហ៊ុន RMA (CAMBODIA) PLC បានចុះបញ្ជីលក់មូលបត្រ បំណុលចំនួន ៨០ ពាន់លានរៀល ដែលស្មើនឹង ២០ លានដុល្លារអាមេរិក ក្នុងផ្សារមូលបត្រកម្ពុជា ហើយក្លាយជាក្រុមហ៊ុនមិនមែនស្ថាប័នហិរញ្ញវត្ថុដែលបានបោះផ្សាយមូលបត្របំណុលដំបូងគេបង្អស់នៅប្រទេសកម្ពុជា។ ការបោះផ្សាយមូលបត្របំណុលនេះ បង្ហាញពីកិច្ចខិតខំប្រឹងប្រែងរបស់ក្រុមហ៊ុនយើងខ្ញុំក្នុងការលើកកម្ពស់ទីផ្សារមូលបត្រកម្ពុជា និងចូលរួមចំណែកអភិវឌ្ឍទីផ្សារហិរញ្ញវត្ថុនៅប្រទេសកម្ពុជា។

តាមរយៈកំណើនសេដ្ឋកិច្ច និងកំរិត GDP របស់ប្រជាជនកម្ពុជាកើនឡើងខ្ពស់ជាបន្តបន្ទាប់ បានធ្វើឱ្យប្រជាជនកម្ពុជាងាកមកប្រើប្រាស់រថយន្តថ្មីមានការកើនឡើងជាលំដាប់។ ក្នុងនោះការប្រើប្រាស់ រថយន្តថ្មីម៉ាក FORD មានកំណើនកាន់តែច្រើនឡើង និងបានក្លាយជាជម្រើសឈានមុខរបស់អតិថិជននៅកម្ពុជា។ ដូច្នេះ ក្រុមហ៊ុនបានសម្រេចចិត្តបង្កើតរោងចក្រដំឡើងរថយន្ត FORD ដែលទទួលបានសិទ្ធិពេញលេញក្នុងការផ្គុំ និងដំឡើងរថយន្តពីក្រុមហ៊ុនម្ចាស់ដើម FORD MOTOR COMPANY។ រោងចក្រនេះ ត្រូវបានសាងសង់ឡើងនៅលើផ្ទៃដីសរុបប្រមាណជាង ៥ ហិកតា ស្ថិតក្នុងភូមិសារវ័ន ឃុំស្នាអន្សា ស្រុកក្រគរ ខេត្តពោធិ៍សាត់ ជាមួយនឹងទុនវិនិយោគចំនួន ២១ លានដុល្លារសហរដ្ឋអាមេរិក ដែលអាចបង្កើតការងារជំនាញបានជាង ៥០០ កន្លែង និងមានសមត្ថភាពអាចដំឡើងរថយន្តបានចំនួនប្រមាណ ៩,០០០ គ្រឿងក្នុងមួយឆ្នាំ។

រហូតមកដល់ពេលនេះ ក្រុមហ៊ុនបានដំឡើងរថយន្ត Ford Ranger Wildtrak និងរថយន្ត Ford Everest បានចំនួន ៣,០០០ គ្រឿងដើម្បីបម្រើតម្រូវការទីផ្សារក្នុងស្រុក។ ក្រុមហ៊ុនបន្តសហការ ជាមួយនឹងវិទ្យាស្ថានពហុបច្ចេកទេសខេត្តពោធិ៍សាត់ក្នុងការបណ្តុះបណ្តាលអភិវឌ្ឍជំនាញបច្ចេកទេសដល់បុគ្គលិកក្រុមហ៊ុនដើម្បីធានាឱ្យបាននូវធនធានមនុស្សប្រកបដោយគុណភាព។ ថ្មីៗនេះ ក្រុមហ៊ុនបានបញ្ជូនបុគ្គលិកទៅប្រទេស Australia ដើម្បីសិក្សាអំពីបច្ចេកវិទ្យាដំឡើងរថយន្ត ក្នុងគោលបំណងបង្កើនកម្រិតបច្ចេកទេសបុគ្គលិកក៏ដូចជាពាំនាំចំណេះដឹងថ្មី និង បច្ចេកវិទ្យាថ្មីមកប្រទេសកម្ពុជា។ ដើម្បីបន្តចូលរួមលើកកម្ពស់វិស័យយានយន្ត ក្រុមហ៊ុននឹងបង្កើតមជ្ឈមណ្ឌលអប់រំបណ្ដុះបណ្ដាលបច្ចេកទេស និងវិជ្ជាជីវៈដើម្បីផ្ដល់ឱកាសឱ្យប្រជាពលរដ្ឋកម្ពុជាទទួលបានការបណ្តុះបណ្តាលជំនាញបច្ចេកទេសប្រកបដោយគុណភាពដើម្បីចូលរួមចំណែកអភិវឌ្ឍធនធាន មនុស្សនៅកម្ពុជាស្របតាមគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។

July 14, 2023

Tesla ធ្វើឱ្យបែកធ្លាយទិន្នន័យ 100 GB ក្នុងនោះក៏មានទិន្នន័យរបស់ Elon Musk

សារព័ត៌មាន Handelsblatt របស់អាល្លឺម៉ង់ ឱ្យដឹងថា បានទទួលទិន្នន័យទំហំ 100 GB របស់ Tesla ពីប្រភពអនាមិក ក្នុងនោះមានផ្ទុកព័ត៌មានរបស់មនុស្សចំនួន 100,000 នាក់។

ឯកសារដែលមានផ្ទុកបញ្ជីឈ្មោះរបស់បុគ្គលិកចាស់ និងបច្ចុប្បន្នប្រហែល 100,000 នាក់របស់ Tesla ក្នុងនោះក៏មាន CEO Elon Musk អមនឹងលេខរបបសន្តិសុខសង្គម អាស័យដ្ឋានសារអេឡិចត្រូវនិច លេខទូរស័ព្ទ ប្រាក់ខែបុគ្គលិក ព័ត៌មានធនាគាររបស់អតិថិជន និងទិន្នន័យសម្ងាត់ស្ដីពីការផលិត ការតវ៉ាពីអតិថិជន។ល។

រឿងដែល Tesla បណ្ដោយឱ្យមានករណីបែកធ្លាយព័ត៌មាននេះគឺជាការរំលោភលើការកំណត់ស្ដីពីការការពារទិន្នន័យរួមរបស់ទ្វីបអឺរ៉ុប (GDPR) ហើយអាចនាំឱ្យ Tesla រងការដាក់ពិន័យធ្ងន់ធ្ងរ។ យោងតាមទំព័រ Handelsblatt មេធាវីរបស់ Tesla និយាយថា បញ្ហានេះកើតឡើងដោយសារតែទង្វើរបស់អតីតបុគ្គលិកម្នាក់ដែលមិនពេញចិត្តនឹងចំណាត់ការក្រុមហ៊ុននេះ។

Dagmar Hartge មេដឹកនាំមួយរូបនៅការិយាល័យការពារទិន្នន័យនៅ Brandenburg ជាទីតាំងនៃរោងចក្រ Gigafactory របស់ Tesla បានអះអាងថា ការបែកធ្លាយនេះគឺមានទ្រង់ទ្រាយធំណាស់។

ជាផ្លូវការ ភាគីខាងក្រុមហ៊ុនផលិតរថយន្តអគ្គិសនី Tesla និងមហាសេដ្ឋីដើមកំណើតអាហ្វ្រិកខាងត្បូង លោក Elon Musk មិនទាន់មានប្រតិកម្មអ្វីនៅឡើយ ទាក់ទងនឹងបញ្ហាខាងលើ៕

May 29, 2023

ផលទុនជាតិសរុប (GDP) របស់កម្ពុជានឹងកើនឡើងក្នុងឆ្នាំ2019 នេះ

ផលទុនជាតិសរុប (GDP) របស់កម្ពុជានៅក្នុងឆ្នាំ2019 នេះនឹងកើនឡើងដល់ជាង 27ពាន់លានដុល្លារអាមេរិក ខណៈចំណូលសម្រាប់មនុស្សម្នាក់ៗត្រូវបានរំពឹងថា នឹងកើនឡើងដល់ 1,706ដុល្លារ ធៀបនឹងឆ្នាំ2018 ដែលមានចំនួន 1,563ដុល្លារ។ នេះបើតាមការឱ្យដឹងពីមន្រ្តីជាន់ខ្ពស់នៃក្រសួងពាណិជ្ជកម្ម។

ឯកឧត្តម ឱក ប៊ុង រដ្ឋលេខាធិការក្រសួងពាណិជ្ជកម្មបានលើកឡើងនៅក្នុងពិធីបើកវគ្គបណ្តុះបណ្តាលស្តីពីមជ្ឈត្តការពាណិជ្ជកម្មនៅកម្ពុជាថា៖“នៅក្នុងឆ្នាំ2019 នេះ ផលិតផលក្នុងស្រុកសរុប(ផ.ស.ស ឬ GDP)របស់កម្ពុជា នឹងកើនឡើងដល់ជាង 27,22ពាន់លានដុល្លារ ខណៈដែលចំណូលក្នុងមនុស្សម្នាក់ៗត្រូវបានរំពឹងថា នឹងកើនឡើងដល់1,706ដុល្លារ ធៀបនឹង1,563ដុល្លារក្នុងឆ្នាំ2018”។ ឯកឧត្តមបានមានប្រសាសន៍ថា៖ “ទាក់ទិននឹងកំណើនដែលត្រូវបានរំពឹងទុកនេះ គឺផ្តោតសំខាន់លើវិស័យសំខាន់ៗចំនួន3 គឺរួមមាន វិស័យឧស្សាហកម្ម វិស័យសេវាកម្ម និងវិស័យកសិកម្ម។

1- កំណើននៃវិស័យឧស្សាហកម្មនឹងនៅបន្តរក្សាភាពរឹងមាំក្នុងអត្រាកំណើនប្រចាំឆ្នាំក្នុងរង្វង់10% ដែលគាំទ្រដោយភាពរឹងមាំនៃវិស័យសំណង់។ 2-វិស័យសេវាកម្មនឹងនៅបន្តកំណើនប្រមាណ 7% ដែលគាំទ្រដោយកំណើននៃអនុវិស័យសណ្ឋាគារ និងភោជនីយដ្ឋាន និងទី3-គឺ វិស័យកសិកម្មអាចសម្រេចបានកំណើនក្នុងរង្វង់ 1.8% ដែលទ្រទ្រង់ដោយអនុវិស័យដំណាំ និងជលផល”។

ឯកឧត្តមរដ្ឋលេខាធិការបានបន្តលើកឡើងថា៖ “ទន្ទឹមនឹងមានការរីកចម្រើននៃសេដ្ឋកិច្ចជាតិដូចបានរៀបរាប់ខាងលើ វិវាទពាណិជ្ជកម្មក៏បានកើនឡើងដែរ។ ដូច្នេះការរៀបចំឱ្យមានវគ្គបណ្តុះបណ្តាលខាងលើ ពិតជាមានសារៈសំខាន់ណាស់ក្នុងការប្រើប្រាស់យន្តការមជ្ឈត្តការពាណិជ្ជកម្ម ដើម្បីដោះស្រាយវិវាទពាណិជ្ជកម្មដែលបាន និងកំពុងកើនឡើង”។

ឯកឧត្តមបានបន្ថែមថា មិនត្រឹមតែជាការបង្កើនប្រសិទ្ធភាពនៃការដោះស្រាយវិវាទប៉ុណ្ណោះទេ ប៉ុន្តែថែមទាំងផ្តល់នូវគុណសម្បតិ្តដល់ប្រពន្ធ័យុត្តិធម៌នៅកម្ពុជា ដើម្បីការពារសិទ្ធិស្របច្បាប់របស់ភាគីវិវាទឱ្យបានត្រឹមត្រូវទៀតផង។ សូមបញ្ជាក់ដែរថា ផលទុនជាតិសរុបក្នុងស្រុកសំដៅដល់ផលចំណូលរបស់ប្រជាជនដែលរកបានប្រចាំឆ្នាំនៅទូទាំងប្រទេស បូកនឹងប្រាក់ចំណូលរបស់រដ្ឋាភិបាលដែលយកពន្ធបានពីវិស័យផ្សេងៗនៅកម្ពុជា។ ផលទុនជាតិសរុបកាលពីឆ្នាំ2018 កន្លងមកនេះ មានប្រមាណ 23ពាន់លានដុល្លារអាមេរិក។

ជាមួយគ្នានេះដែរ ខណៈសេដ្ឋកិច្ចកម្ពុជាត្រូវបានព្យាករពីកំណើនខុសៗគ្នាកន្លងមក ពេលនេះការវាយតម្លៃចុងក្រោយដោយស្ថាប័នអន្តរជាតិបានបង្ហាញថា សេដ្ឋកិច្ចកម្ពុជាសម្រេចបានកំណើន7.5% កាលពីឆ្នាំ2018។ សម្តេចតេជោហ៊ុន សែន នាយករដ្ឋមន្ត្រីកម្ពុជាបានមានប្រសាសន៍ក្នុងពិធីបិទសន្និបាតការងារក្រសួងមហាផ្ទៃកាលពីថ្ងៃទី14 កុម្ភៈថា មូលនិធិរូបិយប័ណ្ណអន្តរជាតិ IMF សហការជាមួយស្ថាប័នជំនាញរបស់កម្ពុជាបានវាយតម្លៃថា កំណើនសេដ្ឋកិច្ចកម្ពុជា ក្នុងឆ្នាំ2018 មានកំណើនរហូតដល់7.5%។ ជាមួយនឹងលទ្ធផលដ៏ប្រសើរនេះ សម្តេចក៏បានស្នើឱ្យក្រុមប្រឹក្សាអភិវឌ្ឍន៍កម្ពុជា រៀបចំវេទិការវាងរាជរដ្ឋាភិបាល និងវិស័យឯកជននៅខែមីនាខាងមុខនេះ ដើម្បីពិភាក្សាជំរុញល្បឿនសេដ្ឋកិច្ចកម្ពុជាបន្ថែមទៀត។

លោកបណ្ឌិតម៉ី កល្យាណទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិបានថ្លែងថា សេដ្ឋកិច្ចកម្ពុជា និងប្រាក់ចំណូលរបស់ប្រជាពលរដ្ឋបាននិងកំពុងកើនឡើង ហើយការព្យាកររបស់សេដ្ឋវិទូនៅក្រសួងសេដ្ឋកិច្ច និងហិរញ្ញវត្ថុ គឺលោកយល់ស្រប ដោយសារពួកគេមានសមត្ថភាព ហើយការវិភាគរបស់ពួកគេប្រកបដោយលក្ខណៈវិទ្យាសាស្រ្ត៕

February 26, 2019

Tag: GDP