Bangkok - La Reine Media

ខ្សែរថភ្លើងដែលតភ្ជាប់រាជធានីរបស់ថៃ និងរដ្ឋធានីរបស់ឡាវ នឹងដំណើរការសាកល្បងនៅក្នុងខែកុម្ភៈខាងមុខ

ក្រុមហ៊ុនផ្លូវដែករដ្ឋថៃ (SRT) មានគម្រោងពង្រីកខ្សែរថភ្លើង Bangkok-Nong Khai ទៅកាន់រដ្ឋធានីវៀងចន្ទន៍របស់ប្រទេសឡាវ ចាប់ពីខែមេសាឆ្នាំ 2024។ នេះបើតាមការចុះផ្សាយរបស់ Thaitrainguide។

ប្រធាននាយកដ្ឋានដឹកជញ្ជូនតាមផ្លូវដែកនៃក្រសួងដឹកជញ្ជូនថៃ លោក Pichet Kunadhamraks ឱ្យដឹងថា គិតមកដល់បច្ចុប្បន្ន SRT បានដំណើរការខ្សែរថភ្លើងពី Nong Khai នៅភាគពាយព្យប្រទេសថៃ ទៅកាន់ស្ថានីយ Thanaleng របស់ឡាវ។

ចាប់ពីខែកុម្ភៈខាងមុខ SRT នឹងដំណើរការសាកល្បងខ្សែរថភ្លើងពីស្ថានីយ Nong Khai ឆ្លងកាត់ Thanaleng ទៅកាន់ស្ថានីយ Khamasavath ថ្មី នៅវៀងចន្ទន៍ ដើម្បីត្រៀមដំណើរការជាផ្លូវការចាប់ពីខែមេសា ឆ្នាំ 2024។

ស្ថានីយ Nong Khai មានចម្ងាយពីស្ថានីយ Khamsavath ប្រហែល 13 គីឡូម៉ែត្រ។ សំបុត្រសម្រាប់ការធ្វើដំណើរតាមរថភ្លើងប្រហែល 20 នាទីនេះ នឹងមានតម្លៃប្រហែលពី 60 – 70 បាត (1.68 – 1.96 ដុល្លារអាម៉េរិក)។

នៅពេលដំណើរការជាផ្លូវការ ខ្សែរថភ្លើង Bangkok-Nong Khai ដែលចេញដំណើរពីស្ថានីយ Krung Thep Aphiwat (ប្រទេសថៃ) នឹងត្រូវបានប្ដូរឈ្មោះទៅជា Bangkok-Vientiane (Khamsavath)៕

January 26, 2024

អាជ្ញាធរថៃ ចាប់ខ្លួនអ្នកសុំទានច្រើននាក់នៅសណ្ឋាគារ ដែលរកចំណូលបានរាប់លានរៀល/ថ្ងៃ

ប៉ូលិសថៃ បានប្រកាសឱ្យត្រួតពិនិត្យម៉ត់ចត់ចំពោះទេសចរចិនទាំងឡាយណាដែលមានមុខមាត់ខុសប្រក្រតី និងរាងកាយមានសភាពប្រែប្រួល ដោយសង្ស័យថា ពួកគេមកដើម្បីប្រកបរបរសុំទាន។

យោងតាមទំព័រ Bangkok Post កាលពីថ្ងៃទី 22 វិច្ឆិកា 2023 អាជ្ញាធរថៃ បានឱ្យដឹងថា ចាប់ពីថ្ងៃទី 10 ដល់ 20 វិច្ឆិកា សមត្ថកិច្ចបានចាប់ខ្លួនអ្នកសុំទានចំនួន 6 នាក់ ដែលជាពលរដ្ឋចិន។ អ្នកសុំទានទាំងនេះសុទ្ធតែមានមុខមាត់ខុសធម្មតា។

ក្រោយពីត្រូវបានចាប់ខ្លួន បីនាក់ក្នុងចំណោមនេះត្រូវបានពិន័យពី 100 ដល់ 500 បាត។ ក្រៅពីនេះ អាជ្ញាធរថៃ ក៏បានដាក់ពលរដ្ឋចិន 6 នាក់នេះចូលក្នុងបញ្ជីខ្មៅ ដោយហាមមិនឱ្យចូលទឹកដីថៃក្នុងរយៈពេល 10 ឆ្នាំ។

ប៉ូលិសនិយាយថា អ្នកសុំទានខ្លះជួលអ្នកបកប្រែថៃរួមគ្នា។ ពីរនាក់ក្នុងចំណោមអ្នកសុំទានចិន 6 នាក់ ស្នាក់នៅជាមួយគ្នាក្នុងបន្ទប់សណ្ឋាគារមួយក្នុងខណ្ឌ Wang Thonglang នៅទីក្រុងបាងកក ខណៈ 4 នាក់ផ្សេងទៀត ស្នាក់នៅក្នុងសណ្ឋាគារផ្សេងៗក្នុងរាជធានី។

ប៉ូលិសថៃ សង្ស័យថា អ្នកសុំទានជនជាតិចិនទាំង 6 នាក់នេះ គឺជាសមាជិករបស់ក្រុមមួយដែលគ្រប់គ្រងដោយជនជាតិថៃ។ ពួកគេសុំទាននៅទីប្រជុំជន និងតំបន់ទេសចរណ៍។ ពួកគេម្នាក់ៗរកបានប្រាក់ប្រហែល 10,000 បាត (ប្រមាណជាង 1,000,000 រៀល) ក្នុងមួយថ្ងៃ។

យោងតាមក្រសួងអភិវឌ្ឍសង្គម និងសន្តិសុខមនុស្សជាតិថៃ បច្ចុប្បន្នប្រទេសនេះមានអ្នកសុំទានជាង 7,000 នាក់ ក្នុងនោះមានជិត 4,700 នាក់ជាជនជាតិថៃ និងជិត 2,500 នាក់ជាជនបរទេស ក្នុងនោះភាគច្រើនជាពលរដ្ឋកម្ពុជា និងមីយ៉ាន់ម៉ា។ ពួកគេគឺជាសមាជិករបស់បណ្ដាក្រុមដែលមានអង្គការចាត់តាំង៕

November 24, 2023

ក្រុមហ៊ុនចិន GAC Aion នឹងផលិតរថយន្តអគ្គិសនីនៅប្រទេសថៃ

GAC Aion ជាយីហោរថយន្តអគ្គិសនីរបស់សាជីវកម្មរថយន្តក្វាងចូវ (Guangzhou Automobile Corporation – GAC) ដែលជាអ្នកផ្គត់ផ្គង់រថយន្តអគ្គិសនីធំជាងគេលំដាប់ទីពីររបស់ប្រទេសចិន មានគម្រោងចាប់ផ្ដើមដំឡើងរថយន្តអគ្គិសនីដំបូងៗរបស់ខ្លួននៅខែមិថុនា 2024។ ការផលិតរថយន្តអគ្គិសនីនេះនឹងធ្វើឡើងនៅរោងចក្ររបស់ GAC Aion ក្នុងច្រករបៀងសេដ្ឋកិច្ចភាគខាងកើត (EEC) របស់ប្រទេសថៃ។

នាយកប្រតិបត្តិរបស់ GAC Aion លោក Gu Huinan ឱ្យដឹងថា ក្រុមហ៊ុននេះគ្រោងនឹងផលិត Aion Y Plus ជារថយន្តអគ្គិសនីមួយប្រភេទដែលត្រូវបានបង្ហាញខ្លួននៅបាងកកកាលពីថ្ងៃទី 09 កញ្ញា 2023។ លោក Guinan និយាយថា ក្រុមហ៊ុនបានស្វែងយល់អំពី EEC និងជិតជ្រើសរើសខេត្តដើម្បីសាងសង់រោងចក្ររបស់ខ្លួន។

យោងតាម Bangkok Post ថៃគឺជាប្រទេសដំបូងដែលក្រុមហ៊ុនចិន GAC Aion ជ្រើសរើសជាទីតាំងដើម្បីវាយលុកទីផ្សារបរទេស។ លោក Huinan ដកស្រង់កត្តាសំខាន់បីដែលជាមូលហេតុនៅពីក្រោយការសម្រេចនេះ៖ រោងចក្រផលិតរថយន្តសំខាន់របស់អាស៊ាន ទីផ្សាររថយន្តអគ្គិសនីកំពុងរីកចម្រើន និងការជំរុញវិស័យរថយន្តអគ្គិសនីរបស់រាជរដ្ឋាភិបាល៕

September 12, 2023

តារាហុងកុង Ray Lui គ្រងតំណែងពានរង្វាន់មាសសម្ព័ន្ធភាពល្អថៃ-ចិន នៅទីក្រុងបាងកក

តារាឯកប្រុសហុងកុង Ray Lui បានបង្ហាញវត្តមាននៅលើកម្រាលព្រំក្រហមក្នុងឱកាសទទួលពានរង្វាន់មាស Thailand Headlines Person Of The Year Award 2017 ជាពានរង្វាន់សម្ព័ន្ធភាពល្អថៃ-ចិន នៅទីក្រុងបាងកក ប្រទេសថៃ។ ដោយឡែកតារារូបនេះបានធ្វើឱ្យនារីៗអ្នកគាំទ្រជនជាតិថៃស្រឡាញ់ និងស្វាគមន៍រូបលោកយ៉ាងកក់ក្ដៅបំផុត ដោយសារតែពួកគេធ្លាប់បានទស្សនាការសម្ដែងរបស់លោក ដែលភាគច្រើនជាតួអង្គអ្នកលេងបងធំនៅសៀងហៃ និងមានឈុតឆាកក្ដៅសាច់មួយចំនួនទៀតនៅក្នុងរឿងទៀតផង។

ពីធីជាមហាកិតិ្តយសនេះបានរៀបចំឡើងនៅក្នុងបរិវេណសាលប្រជុំ Bangkok Convention Center ជាន់ទី 22 នៃសណ្ឋាគារ Centara Grand Bangkok ក្នុងទីក្រុងបាងកក ប្រទេសថៃ ដែលមានការដើរបង្ហាញម៉ូដលើកម្រាលព្រំក្រហមជាពិសេស និងមានវត្តមានតារាហុងកុងដូចជា Tain Boy Band NCT , Henry SJ , តារាស្រីថៃ Esther និងតារាជាច្រើនដួងទៀតផងដែរ។

ជាចុងក្រោយ នៅពេលដែលតារាឯកប្រុស Ray Lui បានបង្ហាញវត្តមានលើកម្រាលព្រំក្រហមភ្លាម ស្រាប់តែមានសំឡេងហ៊ោកញ្ច្រៀវលាន់ឡើងពេញសាលប្រជុំនោះ ដោយគេសង្កេតឃើញថា មានសុទ្ធតែអ្នកគាំទ្រនារីៗបានចេញមកស្វាគមន៍លោកដោយការសែលហ្វ៊ី និងចាប់ដៃគ្នា។ គួរបញ្ជាក់ផងដែរថា តារាប្រុសវ័យ 60 ឆ្នាំរូបនេះបានបង្កបរិយាកាសនាថ្ងៃនោះយ៉ាងសប្បាយរីករាយ ដោយមានការថតរូបជុំគ្នាជាពិសេសជាមួយអ្នកគាំទ្រ និងតារាថៃ ព្រមទាំងមានការសម្ដែងឈុតឆាកបងធំ និងបង្ហាញក្បាច់គុនលាយឡំនឹងទឹកមុខដ៏សង្ហារបស់លោក ដែលធ្វើឱ្យទស្សនិកជនចូលរួមកម្មវិធីនោះនឹកស្ងើចសរសើចំពោះសមត្ថភាពសម្ដែងរបស់លោកមិនដាច់ពីមាត់ឡើយ៕

July 5, 2017

Tag: Bangkok

អាជ្ញាធរ​ថៃ​ ចាប់​ខ្លួន​អ្នក​សុំ​ទាន​​ច្រើន​នាក់​នៅ​សណ្ឋាគារ​ ដែល​រក​ចំណូលបាន​​រាប់​​លាន​រៀល/ថ្ងៃ

ក្រុម​ហ៊ុន​ចិន GAC Aion នឹង​ផលិត​រថយន្ត​អគ្គិសនី​នៅ​ប្រទេស​ថៃ​

តារាហុងកុង Ray Lui គ្រងតំណែងពានរង្វាន់មាសសម្ព័ន្ធភាពល្អថៃ-ចិន នៅទីក្រុងបាងកក

អាជ្ញាធរថៃ ចាប់ខ្លួនអ្នកសុំទានច្រើននាក់នៅសណ្ឋាគារ ដែលរកចំណូលបានរាប់លានរៀល/ថ្ងៃ

ក្រុមហ៊ុនចិន GAC Aion នឹងផលិតរថយន្តអគ្គិសនីនៅប្រទេសថៃ