ក្រុមហ៊ុនធានារ៉ាប់រងអាយុជីវិតដ៏ធំលំដាប់ទី2 នៅលើពិភពលោក AIA បានឈានជើងចូលទីផ្សារកម្ពុជាហើយ បន្ទាប់ពីទទួលបានជោគជ័យក្នុងការវិនិយោគនៅ18ទីផ្សារក្នុងតំបន់អាស៊ីប៉ាស៊ីហ្វិក ដែលផ្តោតសំខាន់ទៅលើការផ្តល់សេវាធានារ៉ាប់រងអាយុជីវិតនៃផលិតផលផ្នែកជំងឺមហារីក ដោយមានកិច្ចសហការជាមួយធនាគារកម្ពុជាសាធារណៈ និងក្រុមហ៊ុន Smart Axiata។
លោក Richard Bates អគ្គនាយកក្រុមហ៊ុន អេ អាយ អេ ខេមបូឌា (AIA Cambodia) បានប្រាប់ថា កាលពីអំឡុង2ឆ្នាំកន្លងទៅ លោកបានមកប្រទេសកម្ពុជាដើម្បីសិក្សាស្វែងយល់ពីវិស័យធានារ៉ាប់រងក្នុងទីផ្សារនេះ ហើយលោកបានសង្កេតឃើញថាកម្ពុជាមានការអភិវឌ្ឍជឿនលឿន និងមានសេដ្ឋកិច្ចលូតលាស់យ៉ាងឆាប់រហ័សនារយៈពេលប៉ុន្មានឆ្នាំចុងក្រោយនេះ។ កត្តាទាំងអស់នេះបានជំរុញឱ្យក្រុមហ៊ុន AIA សម្រេចចិត្តចូលមកបើកទីស្នាក់ការនៅក្នុងទីផ្សារនេះ ដោយមានផលិតផលប្លែកពីក្រុមហ៊ុនធានារ៉ាប់រងដទៃទៀតដែលកំពុងមានវត្តមានស្រាប់នៅលើទីផ្សារកម្ពុជា ក្នុងនោះគឺផលិតផលធានារ៉ាប់រងលើជំងឺមហារីក។
លោក Richard បានបញ្ជាក់ថា៖“ផលិតផលនេះក្រុមហ៊ុនយើងផ្តល់កញ្ចប់ជា3ដំណាក់កាល ដោយដំណាក់កាលដំបូងយើងផ្តល់កញ្ចប់ដល់អតិថិជនជាប្រាក់សម្រាប់ថ្លៃព្យាបាលទៅតាមទំហំកញ្ចប់ដែលគាត់បានទិញ ដូចជាកញ្ចប់ថ្លៃព្យាបាលក្នុងស្រុក កញ្ចប់ថ្លៃព្យាបាលនៅក្រៅស្រុក ឬបើសិនជាអកុសលអ្នកជំងឺមិនជាហើយបាត់បង់ជីវិតយើងមានកញ្ចប់ធំមួយទៀតដែលនឹងផ្តល់ជូនអ្នកនៅរស់ជាគ្រួសារសាច់ញាតិរបស់គាត់”។
លោកបានបន្តថា ក្រុមហ៊ុននឹងផ្តល់សេវាប្រកបទៅដោយគុណភាពខ្ពស់សម្រាប់អតិថិជន ដោយប្រកាន់ភ្ជាប់នូវគុណតម្លៃ ការតស៊ូ និងប្រាថ្នាចង់លើកកម្ពស់គុណភាពជីវិតក្រុមគ្រួសាររបស់ខ្លួនដែលជាធនធានជំនាន់ក្រោយនៃកម្ពុជា។
លោក Ng Keng Hooi អគ្គនាយកប្រតិបត្តិ និងជាប្រធានចាត់តាំងនៃក្រុមហ៊ុន AIA Group Limited បានលើកឡើងថា នៅសល់អំឡុងពេលតែ2ឆ្នាំទៀតប៉ុណ្ណោះ AIA នឹងប្រារព្ធខួបគម្រប់100ឆ្នាំរបស់ខ្លួន គឺនៅឆ្នាំ2019 ខាងមុខ។ ក្នុងអំឡុងពេលប៉ុន្មានឆ្នាំមកនេះចាប់តាំងពីក្រុមហ៊ុនបានបោះផ្សាយលក់មូលបត្រកម្មសិទ្ធិជាសាធារណៈលើកដំបូង (IPO) ក៏បានធ្វើឱ្យក្រុមហ៊ុនដ៏មានសក្តានុពលមួយនេះបំបែកឯតទគ្គកម្មនៅឆ្នាំ2010 រួចមកក្រុមហ៊ុនក៏បានវិវឌ្ឍន៍ក្លាយទៅជាក្រុមហ៊ុនធានារ៉ាប់រងធំជាងគេទី2 នៅលើពិភពលោក។
លោកបានបន្តថា ក្រុមហ៊ុន AIA មានស្នាក់ការកណ្តាលនៅក្នុងទីក្រុងហុងកុង ហើយបានពង្រីកខ្លួនយ៉ាងលឿននៅលើទីផ្សារសំខាន់ៗចំនួន18នៅតំបន់អាស៊ីប៉ាស៊ីហ្វិក។ ដោយសារបម្រែបម្រួលសេដ្ឋកិច្ច សង្គម និងប្រជាសាស្ត្រនៅទូទាំងតំបន់ វាពិតជាបានផ្តល់ឱកាសសម្រាប់ឧស្សាហកម្មធានារ៉ាប់រង។ កំណើនសេដ្ឋកិច្ចនៅអាស៊ី នៅតែមានភាពខ្លាំងក្លា និងមានស្ថិរភាព ហើយក្រុមហ៊ុនជឿជាក់ថា AIA មានធនធានមនុស្សដែលស័ក្តិសម និងមានយុទ្ធសាស្ត្រដ៏ត្រឹមត្រូវដើម្បីឱ្យប្រាកដបានថា ខ្លួនមានតួនាទីសំខាន់នៅក្នុងកំណើន និងការអភិវឌ្ឍយ៉ាងសកម្មនៅអាស៊ីរួមមានការកសាង និងបណ្តុះអាជីវកម្មនៅកម្ពុជា។
លោកជំទាវ ងួន សុខា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ដែលអញ្ជើញចូលរួមជាគណៈ អធិបតីក្នុងពិធីសម្ពោធការិយាល័យ (AIA Cambodia) បានមានប្រសាសន៍ថា ទោះជាកំណើនសេដ្ឋកិច្ចកម្ពុជារីកលូតលាស់លឿនក៏ដោយក៏ប៉ុន្តែវិស័យធានារ៉ាប់រងហាក់នៅមានលក្ខណៈក្មេងខ្ចីនៅឡើយ។ ពិតមែនហើយដែលការធានារ៉ាប់រងទូទៅបានចាប់ផ្តើមតាំងពីទសវត្សរ៍ឆ្នាំ50 មកម៉្លេះក្នុងសម័យសង្គមរាស្ត្រនិយម ប៉ុន្តែវាត្រូវបានអាក់ខានជាអន្លើៗដោយមូលហេតុសង្គ្រាម ហើយកម្ពុជាបានចាប់ផ្តើមជាថ្មីក្នុងឆ្នាំ1993 ជាមួយក្រុមហ៊ុនកាមិនកូ។ ដោយឡែកការធានារ៉ាប់រងអាយុជីវិតទើបតែចាប់ផ្តើមនៅលើទីផ្សារកម្ពុជានៅក្នុងឆ្នាំ2012។ គិតត្រឹមឆ្នាំ2016 កន្លងទៅនេះអត្រាជ្រាបចូលទីផ្សារនៃវិស័យធានារ៉ាប់រងទាំងអស់ មានកម្រិតត្រឹមតែ 0.62% នៃផលិតផលក្នុងស្រុកសរុប ដែលនេះជាអត្រាដ៏ទាបមួយធៀបនឹងបណ្តាប្រទេសជិតខាងក្នុងតំបន់។ អ្វីដែលគួរឱ្យកត់សម្គាល់ និងគួរជាទីមោទនភាពបំផុតនោះគឺការធានារ៉ាប់រងអាយុជីវិតនៅកម្ពុជា ដែលទើបតែមានអាយុកាលនៅក្មេងខ្ចីនៅឡើយនោះបានរីកលូតលាស់ជាមួយនឹងសន្ទុះយ៉ាងខ្លាំងជារៀងរាល់ឆ្នាំ។
គួរបញ្ជាក់ថា វិស័យធានារ៉ាប់រងអាយុជីវិតបានពង្រីកវិសាលភាពរបស់ខ្លួនដោយមានកំណើនរហូតដល់ 95% កាលពីឆ្នាំ2016 ធៀបនឹងឆ្នាំកន្លងទៅ។ ការកើនឡើងយ៉ាងលឿននេះត្រូវគេមើលឃើញថា ប្រជាពលរដ្ឋខ្មែរមានការយល់ដឹងយ៉ាងច្រើនពីសារសំខាន់ក៏ដូចជាអត្ថប្រយោជន៍នៃវិស័យធានារ៉ាប់រងអាយុជីវិត៕
