2023 - La Reine Media

ម្ចាស់ក្រុមហ៊ុន LVMH ដណ្ដើមបានតំណែងមហាសេដ្ឋីលេខមួយជាថ្មី

Forbes បានឱ្យដឹងថា ម្ចាស់ LVMH លោក Bernard Arnault កាលពីថ្ងៃទី 26 មករា 2024 ដណ្ដើមបានតំណែងមហាសេដ្ឋីលំដាប់លេខមួយលើពិភពលោក ពីមហាសេដ្ឋី Elon Musk។

បញ្ជីចំណាត់ថ្នាក់មហាសេដ្ឋីទៅតាមពេលវេលាជាក់ស្ដែងរបស់ Forbes បង្ហាញថា ទ្រព្យសម្បត្តិរបស់មហាសេដ្ឋីបារាំង Arnault បច្ចុប្បន្នគឺ 207.8 ពាន់លានដុល្លារអាម៉េរិក បន្ទាប់ពីបានកើនជាង 23 ពាន់លានដុល្លារកាលពីថ្ងៃទី 26 មករា។ ក្នុងគ្រានោះដែរ មហាសេដ្ឋីអាម៉េរិក លោក Elon Musk មានទ្រព្យត្រឹមតែ 204.5 ពាន់លានដុល្លារ។ ប្រការនេះជួយឱ្យលោក Arnault ឈ្នះលោក Musk ដើម្បីក្លាយជាអ្នកមានជាងគេលើពិភពលោក។

នៅមុនរឿងនេះកើតឡើង ភាគហ៊ុន Tesla របស់លោក Musk បានធ្លាក់ចុះរហូតដល់ 13% កាលពីថ្ងៃទី 25 មករា ក្រោយពីលោកបានព្រមានថា ប្រាក់ចំណូលរបស់ក្រុមហ៊ុននេះអាចនឹងមានកំណើនយឺតមកវិញនៅក្នុងឆ្នាំ 2024 ព្រោះតែក្រុមហ៊ុនផ្ដោតលើការផលិតរថយន្តអគ្គិសនីជំនាន់ថ្មី តម្លៃទាបជាងមុនដែលនឹងត្រូវបានផលិតចាប់ពីពាក់កណ្ដាលឆ្នាំក្រោយ។ រឿងនេះក៏បានធ្វើឱ្យទ្រព្យរបស់លោក Musk ថយចុះរហូតដល់ 18 ពាន់លានដុល្លារក្នុងមួយថ្ងៃ។

ផ្ទុយទៅវិញ ភាគហ៊ុន LVMH បានកើន 12.8% កាលពីថ្ងៃទី 26 មករា។ មូលហេតុគឺដោយសារក្រុមហ៊ុននេះប្រកាសថា ប្រាក់ចំណូលក្នុងឆ្នាំ 2023 ខ្ពស់ជាងការព្យាករ ពោលគឺ 93.3 ពាន់លានដុល្លារអាម៉េរិក ព្រមទាំងប្រកាសដំឡើងភាគលាភប្រចាំឆ្នាំ៕

January 27, 2024

មហាសេដ្ឋីលេខមួយនៅសហរដ្ឋអាម៉េរិក៖ រថយន្តអគ្គិសនីចិនផ្ដួលគូប្រជែងរួចទៅហើយ បើសិនគ្មានរនាំងពាណិជ្ជកម្ម

នាយកប្រតិបត្តិរបស់ក្រុមហ៊ុនផលិតរថយន្តអគ្គិសនីអាម៉េរិក Tesla បានកោតសរសើរចំពោះបណ្ដាក្រុមហ៊ុនផលិតរថយន្តចិន ហើយយល់ថា ពួកគេអាចដណ្ដើមបានជោគជ័យធំធេងក្នុងទីផ្សារអន្តរជាតិ។

កាលពីថ្ងៃទី 24 មករា 2024 បន្ទាប់ពីការប្រកាសរបាយការណ៍ហិរញ្ញវត្ថុនៃត្រីមាសទីបួនក្នុងឆ្នាំ 2023 CEO របស់ក្រុមហ៊ុនរថយន្តអគ្គិសនី Tesla គឺមហាសេដ្ឋី Elon Musk បានលើកសរសើរដល់បណ្ដាក្រុមហ៊ុនផលិតរថយន្តចិន។ លោកនិយាយថា ពួកគេគឺជាបណ្ដាក្រុមហ៊ុនដែលមានការប្រកួតប្រជែងបំផុត ហើយថា នឹងជោគជ័យធំធេងនៅខាងក្រៅប្រទេសចិន អាស្រ័យលើកម្រិតនៃការទទួលរងសម្ពាធពីអត្រាពន្ធ និងរនាំងពាណិជ្ជកម្ម។

លោក Musk និយាយថា «បើសិនមិនមានរនាំងពាណិជ្ជកម្ម ពួកគេនឹងជាន់ពន្លិចក្រុមហ៊ុនស្ទើរតែទាំងអស់នៅលើពិភពលោក។ ពួកគេពូកែខ្លាំងណាស់»។

យោបល់នេះបញ្ជាក់ថា ក្រុមហ៊ុនផលិតរថយន្តអគ្គិសនីអាម៉េរិក Tesla កំពុងប្រឈមនឹងសម្ពាធនៃការប្រកួតប្រជែងដ៏សម្បើមពីបណ្ដាគូបដិបក្ខមកពីប្រទេសចិន ដែលមានដូចជា BYD ជាដើម៕

January 25, 2024

ផលិតផលរូបនាគកំពុងទាក់ទាញអតិថិជននៅប្រទេសចិន

ជិតដល់រដូវបុណ្យចូលឆ្នាំប្រពៃណីជាតិចិន គេឃើញថា គ្រឿងអលង្ការមាស ឬផ្ទាំងរូបភាពបិទទូរស័ព្ទដែលមានរូបនាគនៅប្រទេសចិន កំពុងតែលក់ដាច់ខ្លាំង។

តួលេខរបស់ផ្សារអនឡាញ Taobao (ចិន) បង្ហាញថា ចំនួនលើកនៃការស្វែងរកបណ្ដាផលិតផលដែលទាក់ទងនឹងរូបនាគនៅលើថ្នាលនេះ បានកើនឡើងច្រើនជាងមុន 640 ដង រាប់ចាប់ពីថ្ងៃទី 27 ធ្នូ 2023 ដល់ 02 មករា 2024។ ក្នុងនោះ ចំនួនលើកនៃការស្វែងរកគ្រឿងអលង្ការមានរូបនាគ បានកើនឡើងច្រើនជាងមុនរហូតដល់ 500 ដង។

«នាគត្រូវបានចាត់ទុកថាជានិមិត្តរូបនៃអំណាច និងឋានៈក្នុងវប្បធម៌ចិន។ ចំណែកមាសគឺជាគ្រឿងអលង្ការផង និងជាឧបករណ៍សម្រាប់ទុនដាក់ទ្រព្យសម្បត្តិផង តែងតែត្រូវបានទិញជារៀងរាល់រដូវបុណ្យចូលឆ្នាំប្រពៃណីជាតិចិន។ ដូច្នេះហើយ ទើបមានមនុស្សជាច្រើនទិញគ្រឿងអលង្ការធ្វើពីមាសមានរូបនាគ ដើម្បីបួងសួងសូមភាភជ័យក្នុងឆ្នាំថ្មី» Xie Zhihui អនុប្រធានទទួលបន្ទុកផ្នែកលក់នៅហាងមាស Chow Tai Seng បានប្រាប់ China Daily ដូច្នេះ។

មិនមែនតែនៅប្រទេសចិននោះទេ បណ្ដាយីហោល្បីៗលើពិភពលោកក៏កំពុងចាប់យកនិន្នាការខាងលើផងដែរ។ ក្រុមហ៊ុនគ្រឿងសម្អាង Shu Uemura (ជប៉ុន) ក៏បានដាក់លក់ប្រភេទក្រែមលាបបបូរមាត់មាន ពិសេសមួយដែលមានកំណត់បរិមាណ ក្នុងនោះ សម្បករបស់ផលិតផលនេះមានរូបនាគពណ៌លឿង។ ចំណែក Fila ក៏ដាក់លក់អាវប៉ាក់រូបនាគ ខណៈ Shanghai Disney Resort ចេញលក់របស់លេងកម្សាន្តធ្វើពីក្រណាត់មានរូបនាគផងដែរ៕

January 22, 2024

យានអវកាសជប៉ុនឈប់ដំណើរការក្រោយការចុះចតលើឋានព្រះចន្ទបានបីម៉ោង

ជិតបីម៉ោងបន្ទាប់ពីការចុះចតលើឋានរណបតែមួយគត់របស់ផែនដី យានអវកាសរបស់ជប៉ុនក៏ឈប់ដំណើរការ និងកំពុងរង់ចាំពន្លឺព្រះអាទិត្យចាំងទៅលើផ្ទាំងសូឡារបស់វា។ នេះបើតាមអង្គការអវកាសជប៉ុន (JAXA)។

យានអវកាស SLIM ឬហៅថា Moon Sniper បានចុះចតលើឋានព្រះចន្ទដោយជោគជ័យកាលពីវេលាម៉ោង 22 និង 20 នាទី ថ្ងៃទី 19 មករា 2024 ជួយឱ្យជប៉ុនក្លាយជាប្រទេសទីប្រាំដែលមានយានធ្វើសកម្មភាពនៅលើទីឋានរណបធម្មជាតិរបស់ផែនដី។ ក៏ប៉ុន្តែ បន្ទាប់ពី SLIM បានចុះចត JAXA មិនអាចដឹងបានថា ផ្ទាំងសូឡារបស់យាននេះកំពុងផលិតអគ្គិសនី ឬអត់។

ក្រោយការចុះចតបានជិតបីម៉ោង JAXA ក៏បានផ្អាកដំណើរការរបស់ SLIM ដើម្បីឱ្យវាអាចដំណើរការឡើងវិញនៅពេលព្រះអាទិត្យជះពន្លឺលើផ្ទាំងសូឡា។ នៅមុនពេលបិទដំណើរការពីចម្ងាយ ស្ថានីយគ្រប់គ្រងបេសកកម្មក៏បានទទួលទិន្នន័យពីដំណើរការចុះចត និងពីផ្ទៃព្រះចន្ទ។

SLIM (Smart Lander for Investigating Moon) ត្រូវបានបាញ់បង្ហោះជាមួយនឹងកែវយឹតអវកាស XRISM។ XRISM ត្រូវបានដាក់ឱ្យដំណើរការនៅលើគន្លងគោចរកម្រិតទាបរបស់ផែនដី បន្ទាប់ពីត្រូវបានបាញ់បង្ហោះ ខណៈដែល SLIM បន្តហោះទៅកាន់ឋានព្រះចន្ទ។ SLIM បានហោះទៅដល់គន្លងតារាវិថីព្រះចន្ទកាលពីថ្ងៃទី 25 ធ្នូ 2023។

January 22, 2024

យានអវកាសជប៉ុន អាចនឹងឈប់ដំណើរការ ក្រោយពីបានចុះចតលើផ្ទៃព្រះចន្ទ

យានស្រាវជ្រាវ SLIM របស់ប្រទេសជប៉ុន បានចុះចតលើឋានព្រះចន្ទដោយជោគជ័យនៅវេលាម៉ោង 21 និង 20 នាទី ថ្ងៃទី 19 មករា 2024 ប៉ុន្តែបញ្ហាផ្ទាំងសូឡាមិនផលិតអគ្គិសនីដូចការគ្រោងទុក អាចនាំឱ្យយាននេះឈប់ដំណើរការឆាប់ៗខាងមុខ។

យានអវកាសស្វ័យប្រវត្ត SLIM របស់អង្គការស្រាវជ្រាវអវកាសជប៉ុន (ចាសា – JAXA) បានចុះចតលើផ្ទៃព្រះចន្ទកាលពីថ្ងៃទី 19 មករា ជួយឱ្យជប៉ុនក្លាយជាប្រទេសទីប្រាំដែលបានបញ្ជូនយានទៅចុះចតដោយជោគជ័យលើឋានរណបធម្មជាតិរបស់ផែនដី។ យោងតាមទំព័រ Space បណ្ដាប្រទេសដែលធ្លាប់មានយានស្រាវជ្រាវនៅលើឋានព្រះចន្ទមុនជប៉ុន រួមមាន អតីតសូវៀត (រុស្ស៊ី) សហរដ្ឋអាម៉េរិក ប្រទេសចិន និងឥណ្ឌា។

ផ្ទាំងសូឡាលើយាន SLIM របស់ប្រទេសជប៉ុន ដែលកំពុងស្ថិតនៅលើផ្ទៃព្រះចន្ទ មិនអាចផលិតអគ្គិសនីដូចការគ្រោងទុក បន្ទាប់ពីបានចុះចត។ បើសិនបញ្ហានេះមិនត្រូវបានដោះស្រាយទាន់ពេល SLIM អាចនឹងត្រូវអស់ថាមពល និងឈប់ដំណើរការជារៀងរហូត ដោយសារតែប្រព័ន្ធថ្មផ្ទុកថាមពលអាចជួយឱ្យវាដំណើរការបានតែប៉ុន្មានម៉ោងប៉ុណ្ណោះ។

SLIM (Smart Lander for Investigating Moon) ត្រូវបានបាញ់បង្ហោះជាមួយនឹងកែវយឹតអវកាស XRISM។ XRISM ត្រូវបានដាក់ឱ្យដំណើរការនៅលើគន្លងគោចរកម្រិតទាបរបស់ផែនដី បន្ទាប់ពីត្រូវបានបាញ់បង្ហោះ ខណៈដែល SLIM បន្តហោះទៅកាន់ឋានព្រះចន្ទ។ SLIM បានហោះទៅដល់គន្លងតារាវិថីព្រះចន្ទកាលពីថ្ងៃទី 25 ធ្នូ 2023។

យានអវកាសនេះបានចាប់ផ្ដើមដំណើរការចុះចតនៅវេលាម៉ោង 21 នៃថ្ងៃទី 19 មករា 2024 ម៉ោងនៅកម្ពុជា ហើយ 20 នាទីក្រោយមក វាក៏បានចុះចតលើផ្ទៃព្រះចន្ទដោយជោគជ័យ៕

January 20, 2024

BYD បង្ហាញរថយន្តអគ្គិសនីបីម៉ូដែលនៅឥណ្ឌូណេស៊ី

កាលពីថ្ងៃទី 18 មករា 2024 ក្រុមហ៊ុនចិន BYD បានបង្ហាញរថយន្តអគ្គិសនីចំនួនបីម៉ូដែលនៅឥណ្ឌូណេស៊ី គ្រាដែលក្រុមហ៊ុននេះកំពុងរកវិធីពង្រីកវត្តមានរបស់ខ្លួននៅក្នុងទីផ្សារធំជាងគេក្នុងតំបន់អាស៊ីអាគ្នេយ៍។

BYD បានឈ្នះ Tesla ក្នុងការក្លាយជាក្រុមហ៊ុនផលិតរថយន្តអគ្គិសនីធំជាងគេលើពិភពលោក នៅក្នុងត្រីមាសទីបួននៃឆ្នាំ 2023។ ក្នុងដំណាក់កាលនោះ រថយន្តអគ្គិសនី BYD ប្រមាណ 526,000 គ្រឿងត្រូវបានលក់ចេញ ក្នុងនោះ ភាគច្រើនបានលក់ក្នុងទីផ្សារចិន។

ក្នុងឆ្នាំ 2023 ក្រុមហ៊ុន BYD លក់រថយន្តអគ្គិសនីបានប្រមាណ 3 លានគ្រឿង ដោយបូករួមទាំងរថយន្តដំណើរការដោយថ្មផ្ទុកអគ្គិសនី និងរថយន្តកូនកាត់អគ្គិសនី (hybrid)។

នៅក្នុងតំបន់អាស៊ីអាគ្នេយ៍ BYD មានភាពលេចធ្លោជាងគេ បើធៀបនឹងបណ្ដាក្រុមហ៊ុនដទៃ ដោយរថយន្តដែលត្រូវបានលក់ចេញមានចំនួនច្រើនជាងគេ ក្នុងនោះ ភាគច្រើនគឺជារថយន្តអគ្គិសនីតម្លៃទាប។

BYD ឱ្យដឹងថា ពួកគេនឹងចាប់ផ្ដើមលក់រថយន្តអគ្គិសនី Dolphin, Atto 3 និង Seal នៅប្រទេសឥណ្ឌូណេស៊ី ដើម្បីពង្រីកវត្តមានរបស់ខ្លួនក្នុងទីផ្សារធំជាងគេនៅតំបន់អាស៊ីអាគ្នេយ៍៕

January 19, 2024

ការសាកល្បងបាញ់បញ្ជូនអគ្គិសនីពីអវកាសមកកាន់ផែនដីរបស់អាម៉េរិក បានទទួលជោគជ័យ

ផ្កាយរណបលើគន្លងតារាវិថីដែលធ្វើការសាកល្បងលទ្ធភាពនៃបច្ចេកវិទ្យាទាញយក និងបាញ់បញ្ជូនថាមពលព្រះអាទិត្យមកកាន់ផែនដី បានបញ្ចប់បេសកកម្មមួយឆ្នាំរបស់ខ្លួនប្រកបដោយជោគជ័យ។

វិទ្យាស្ថានបច្ចេកវិទ្យា California (Caltech) ប្រកាសកាលពីថ្ងៃទី 16 មករាថា ក្រុមវិស្វករនៃគម្រោង Solar Space Power Demonstrator (SSPD-1) បានវាយតម្លៃថា ឧបករណ៍ទាំងបីដែលដាក់នៅលើផ្កាយរណបទម្ងន់ 50 គីឡូក្រាម សុទ្ធតែដំណើរការដោយជោគជ័យ ហើយជឿជាក់ថា គម្រោងនេះ «នឹងបើកផ្លូវសម្រាប់អនាគតរបស់ថាមពលព្រះអាទិត្យក្នុងទីអវកាស» នេះបើតាម Popular Science។

SSPD-1 ដែលត្រូវបានបាញ់បង្ហោះតាមរយៈរ៉ុក្កែត Falcon 9 របស់ SpaceX កាលពីដើមខែមករា 2023 បានធ្វើការពិសោធចំនួនបី រួមមាន ការធ្វើតេស្តភាពធន់ និងប្រសិទ្ធភាពរបស់ផ្ទាំងសូឡាមហាស្ដើង, ការធ្វើតេស្ត និងជ្រើសរើសប្រភេទផ្ទាំងសូឡាដែលសមស្របបំផុតសម្រាប់អវកាស រួមនឹងការធ្វើតេស្តបាញ់បញ្ជូនរលកមីក្រូវ៉េវដែលប្រមូលបានពីកម្ដៅព្រះអាទិត្យក្នុងទីអវកាស មកកាន់ផែនដី៕

January 18, 2024

សេដ្ឋកិច្ចចិនក្នុងឆ្នាំ 2023 មានកំណើនជាងប្រាំភាគរយ

បើទោះជាជួបឧបសគ្គច្រើន ប៉ុន្តែផលិតផលក្នុងស្រុកសរុបរបស់ប្រទេសចិន ដែលជាខឿនសេដ្ឋកិច្ចធំជាងគេលំដាប់ទីពីរក្នុងពិភពលោក នៅតែមានកំណើនជាង 5% នៅក្នុងឆ្នាំ 2023 ស្របនឹងគោលដៅដែលបានកំណត់។

តួលេខខាងលើត្រូវបាននាយកដ្ឋានជាតិស្ថិតិចិន ប្រកាសកាលពីព្រឹកថ្ងៃទី 17 មករានេះ។ គោលដៅកំណើនសេដ្ឋកិច្ចក្នុងឆ្នាំ 2023 ដែលប្រទេសនេះបានដាក់ចេញគឺក្នុងរង្វង់ 5%។

កាលពីថ្ងៃទី 16 មករា 2024 នាយករដ្ឋមន្ត្រីចិន លោក Li Qiang ក៏បាននិយាយថា សេដ្ឋកិច្ចប្រទេសចិនក្នុងឆ្នាំកន្លង មានកំណើន 5.2%។ កំណើននេះស្របទៅនឹងការព្យាករនានារបស់ធនាគារធំៗនៅលើពិភពលោក ក្នុងនោះមានទាំង Goldman Sachs និង Morgan Stanley ផងដែរ។

កាលពីឆ្នាំ 2022 សេដ្ឋកិច្ចរបស់ចិន មានកំណើនតែ 3% ដោយសារតែគោលនយោបាយរឹតបន្តឹងការគ្រប់គ្រងកូវីដ-19។ ល្បឿននៃកំណើននេះមិនសម្រេចបានគោលដៅ 5.5% ដែលបានដាក់ចេញក្នុងឆ្នាំនោះ៕

January 17, 2024

ចំនួនរថយន្តអគ្គិសនីដែលបានលក់ចេញនៅទូទាំងពិភពលោក កើន 31% ក្នុងឆ្នាំ 2023

បរិមាណរថយន្តអគ្គិសនីសុទ្ធ និងរថយន្តកូនកាត់អគ្គិសនី ដែលត្រូវបានលក់ចេញនៅទូទាំងសកលលោកក្នុងឆ្នាំកន្លង សម្រេចបានជាង 13.6 លានគ្រឿង កើន 31% បើធៀបនឹងឆ្នាំ 2022។ នេះបើតាមក្រុមហ៊ុនស្រាវជ្រាវទីផ្សារ Rho Motion។

ក្នុងចំណោមនោះ រថយន្តអគ្គិសនីសុទ្ធមានប្រមាណ 9.5 លានគ្រឿង និងរថយន្តកូនកាត់អគ្គិសនី (hybrid) មានប្រមាណ 4.1 លានគ្រឿង។ ក្រុមហ៊ុន Rho Motion ឱ្យដឹង នៅក្នុងខែធ្នូ ឆ្នាំ 2023 រថយន្តអគ្គិសនីត្រូវបានលក់ដាច់ជាងគេក្នុងប្រវត្តិសាស្ត្រ ដោយមានប្រមាណ 1.5 លានគ្រឿងត្រូវបានទិញ។

ក៏ប៉ុន្តែ កំណើននៃរថយន្តអគ្គិសនីដែលត្រូវបានលក់ចេញនៅទូទាំងពិភពលោកក្នុងឆ្នាំ 2023 មានល្បឿនយឺតជាងបើធៀបនឹង 60% របស់ឆ្នាំ 2022។

ទីផ្សាររថយន្តអគ្គិសនីទូទាំងពិភពលោកក្នុងឆ្នាំ 2024 ត្រូវបានព្យាករថា នឹងជួបឧបសគ្គមួយចំនួន ពិសេសគឺតម្រូវការអាចទាបជាងមុន ដោយសារតែអតិថិជនពន្យារពេលក្នុងការសម្រេចចិត្ត ដើម្បីរង់ចាំរថយន្តម៉ូដែលថ្មី ស៊េរីថ្មីដែលល្អជាង តូចជាង និងថោកជាងបច្ចុប្បន្ន ដែលអាចនឹងត្រូវបានដាក់លក់ក្នុងរង្វង់ពីពីរទៅបីឆ្នាំខាងមុខ៕

January 12, 2024

«សេដ្ឋកិច្ចរាត្រី» បានជួយទាញវិស័យទេសចរណ៍ថៃឱ្យងើបឡើងវិញ

កំណើននៃប្រាក់ចំណូលបានពីវិស័យទេសចរណ៍ ក៏ដូចជាកំណើននៃការចំណាយរបស់ទេសចរ នៅក្នុងរដូវបុណ្យចូលឆ្នាំថ្មីនៅប្រទេសថៃ ត្រូវបានជំរុញដោយសកម្មភាពកម្សាន្តនាពេលរាត្រី បន្ទាប់ពីរាជរដ្ឋាភិបាលប្រទេសនេះ បានអូសបន្លាយពេលវេលាសម្រាប់អ្នករកស៊ីនៅពេលយប់។

ចាប់ពីថ្ងៃទី 15 ធ្នូ 2023 គណៈរដ្ឋមន្ត្រីថៃ បានអនុម័តសំណើមួយដែលអនុញ្ញាតឱ្យក្លឹបរាត្រី បារ និងទីតាំងកម្សាន្តផ្សេងៗ បើកទ្វាររហូតដល់ម៉ោង 4 ទៀបភ្លឺ ជំនួសឱ្យម៉ោង 2 ទៀបភ្លឺ ដើម្បីជំរុញឱ្យទេសចរចាយលុយច្រើនជាងមុននៅពេលរាត្រី។

ការបន្ធូរបន្ថយពេលវេលាសម្រាប់ការកម្សាន្តនៅពេលរាត្រី បាននាំឱ្យភ្ញៀវទេសចរណ៍ស្នាក់នៅក្នុងប្រទេសថៃយូរជាងមុន និងចំណាយប្រាក់ច្រើនជាងមុន។

កាលពីពេលថ្មីៗនេះ ក្រសួងទេសចរណ៍ និងកីឡាថៃ បានឱ្យដឹងថា ប្រទេសនេះរកចំណូលបានរហូតដល់ 1.6 ពាន់លានដុល្លារអាម៉េរិក ពីវិស័យទេសចរណ៍ ត្រឹមតែនៅក្នុងខែធ្នូ 2023 ដែលនេះបានកើន 44% បើធៀបនឹងមួយឆ្នាំមុននោះ។ ជោគជ័យនេះ សម្រេចបានក៏ដោយសារការបន្ធូរបន្ថយការរឹតត្បិតលើវិស័យកម្សាន្តនៅពេលយប់៕

January 11, 2024

Tag: 2023