Tag: អាមេរិក

“ត្រាំ” វាយប្រហារ “ចិន” អាចមិនមែនត្រឹមតែសង្ឃឹម បិទបាំងកំហុសរបស់ខ្លួនឯង ក្នុងការទប់ទល់នឹងកូវីដ-19 ប៉ុណ្ណោះទេ
មើលតាមរយៈលទ្ធផលនៃសម្រង់ការយល់ឃើញរបស់ពលរដ្ឋអាមេរិកាំង ឃើញថា លោកប្រធានាធិបតី ដូណាល់ ត្រាំ ដូចជាមិនចាំបាច់ត្រូវអាស្រ័យលើការវាយប្រហារចិន ដើម្បីបង្វែរចំណាប់អារម្មណ៍ចេញពីកំហុសឆ្គងរបស់លោកក្នុងការទប់ទល់នឹងមេរោគកូវីដ-19 នោះទេ តែវាមើលឃើញច្បាស់ខ្លាំងណាស់ថា លោកត្រាំបាននឹករំពឹងសង្ឃឹម អាស្រ័យលើការតាមដេញបាញ់ចិនឥតឈប់នេះ គឺដើម្បីឱ្យខ្លួនឯងឈ្នះការបោះឆ្នោតក្នុងខែវិច្ឆិកាខាងមុខ ដោយលោក ចូ បៃដេន គូប្រជែងរបស់លោក ក៏មានគោលបំណងក្នុងទំនងដូចគ្នានេះដែរ។
លោកប្រធានាធិបតី ដូណាល់ ត្រាំ នៃសហរដ្ឋអាមេរិក កំពុងចងខ្លួនឯង និងអ្នកទស្សនា(អ្នកគាំទ្រ)ទាំងឡាយដោយមុខចំណងដែលចងច្រើនជាន់ទ្វេឡើងជារឿយៗ ដោយការថ្លែងបង្ហាញពីការយល់ឃើញក្នុងអំឡុងប៉ុន្មានសប្ដាហ៍ក្រោយៗនេះ ដែលពេលខ្លះលើកតម្កើង សរសើរចិន តែពេលខ្លះ ក៏វាយប្រហាររិះគន់ចិន ឆ្លាស់ទៅឆ្លាស់មកដែរ។ ទាំងអស់នេះ ប្រហែលជាមានតែខ្លួនលោកម្នាក់គត់ប៉ុណ្ណោះ ដែលអាចស្រាយមុខចំណងដ៏ច្របូកច្របល់ ដែលលោកខ្លួនឯងបានចងទុកនេះ ហើយលោកនឹងស្ថិតក្នុងឋានៈដែលនឹងធ្វើដូច្នេះបាន ក៏ប្រហែលជាត្រូវរង់ចាំរហូតទាល់តែដល់ខែវិច្ឆិកា នៅពេលដែលការទម្លាក់បណ្ណបោះឆ្នោតជ្រើសតាំងប្រធានាធិបតីសហរដ្ឋអាមេរិក កន្លងផុតទៅហើយតែប៉ុណ្ណោះ។
តើហេតុអី បានលោកត្រាំ ខំបញ្ចេញកម្លាំងប្រើពាក្យសម្ដី វោហារស័ព្ទគាបសង្កត់ចិនកាន់តែខ្លាំងឡើងក្នុងអំឡុងពេលនេះ? រឿងនេះអាចនឹងវាយតម្លៃបានច្រើនយ៉ាងខុសប្លែកពីគ្នា តែការអធិប្បាយដែលលេចធ្លោជាងគេ និងមានថាមពលគួរឱ្យជឿបាននោះ មាន 3ប្រការ។ មុនគេបង្អស់ គឺជាការវាយតម្លៃបែបដែលចិនចង់ឱ្យយើងជឿផងដែរនោះ បានបញ្ជាក់ថា អាចទៅរួចដែលលោកត្រាំបានពង្រីកការវិភាគរិះគន់ចិនរបស់លោក គឺដើម្បីបង្វែរចំណាប់អារម្មណ៍ចេញពីភាពបរាជ័យរបស់ក្រុមគណៈគ្រប់គ្រងរបស់លោកខ្លួនឯង ក្នុងការទប់ទល់ចាត់ការជាមួយជំងឺរាតត្បាតដ៏ធំដោយសារមេរោគវីរុសកូរ៉ូណានៅក្នុងសហរដ្ឋអាមេរិក។
មានរបាយការណ៍មួយដែលផ្សព្វផ្សាយខាងនីវយ៉ក ថាមស៍ កាលពីខែមេសា បានបញ្ជាក់ថា “ការពិនិត្យមើល បានបង្ហាញឱ្យឃើញថា លោកប្រធានាធិបតី បានទទួលពាក្យដាស់តឿន ពាក់ព័ន្ធនឹងភាពអាចទៅរួចក្នុងការកើតជំងឺរាតត្បាតដ៏ធំនេះ តែដោយសារតែការបែកបាក់គ្នាផ្ទៃក្នុង ការខ្វះខាតការរៀបចំផែនការ និងជំនឿទុកចិត្តរបស់លោកដែលមានចំពោះសញ្ជាតិញាណរបស់ខ្លួនឯង បាននាំឆ្ពោះទៅរកការឆ្លើយតប និងការទប់ទល់បែបមានចន្លោះប្រហោង ឆេវឆាវ និងតតាក់តតុប”។ របាយការណ៍នេះបានបន្តទៀតថា “ទីស្ដីការសភាសន្តិសុខជាតិ(National Security Council) ដែលទទួលខុសត្រូវរឿងការតាមដាន ការពារទប់ទល់នឹងជំងឺរាតត្បាតដ៏ធំទាំងឡាយ បានទទួលរបាយការណ៍ព័ត៌មានតាំងតែពីដើមខែមករា ដែលបានទស្សន៍ទាយពីការឆ្លងសាយភាយរបស់វីរុសនេះចូលមកក្នុងសហរដ្ឋអាមេរិក ហើយក្នុងអំឡុងពេលប៉ុន្មានសប្ដាហ៍បន្ទាប់ពីនោះ ក៏កំពុងតែមានការលើកឡើងពីសំណើ និងជម្រើសផ្សេងៗ ដែលស្រដៀងគ្នានឹងការទាមទារឱ្យពលរដ្ឋអាមេរិកាំងធ្វើការងារពីផ្ទះ និងការបិទទីក្រុងធំៗផងដែរ តែលោកប្រធានាធិបតី ត្រាំ បានទាត់ចោល មិនព្រមប្រើប្រាស់ដំណើរការទាំងនោះ រហូតទាល់តែមកដល់ខែមីនា”។
លោក Joe Biden អតីតអនុប្រធានាធិបតីសហរដ្ឋអាមេរិក
ដូច្នេះលទ្ធផល ក៏គឺ លោកត្រាំបានបំផ្លាញពេលវេលាដ៏សំខាន់បំផុតនោះយ៉ាងខ្ចះខ្ជាយ ខណៈដែលចំនួនអ្នកឆ្លងមេរោគបានចាប់ផ្ដើមស្ទុះហក់ឡើងពេញ 1ខែកុម្ភៈ និងដើមខែមីនាជាប់រហូត… “ពីថ្ងៃទី26 កុម្ភៈ រហូតមកដល់ថ្ងៃទី16 មីនា ចំនួនករណីអះអាងថា ឆ្លងមេរោគកូវីដ-19 ក្នុងសហរដ្ឋអាមេរិក បានកើនឡើងពី 15 ទៅជា 4,226នាក់…(សម្រាប់ចំនួនអ្នកឆ្លងមេរោគកូវីដ-19សរុប ក្នុងខណៈពេលនេះ មានជាង 1លាននាក់ហើយ)។ មិនត្រឹមតែប៉ុណ្ណោះ ក្រុមមន្ត្រីដែលទទួលខុសត្រូវបានប្រាប់ផងដែរថា នៅមានទៀតជាច្រើនសែននាក់ដែលនៅមិនទាន់បានត្រួតពិនិត្យ ដែលក៏ប្រហែលជាមានឆ្លងមេរោគដូចគ្នា” និងខណៈនេះ ចំនួនអ្នកស្លាប់កំពុងស្ថិតក្នុងកម្រិតក្បែរៗ 80,000នាក់ហើយ រហូតមកដល់ថ្ងៃទី9 ឧសភា។
ដេញតាមបន្ទោសអ្នកដទៃ ដើម្បីបង្វែរចំណាប់អារម្មណ៍
អាចនាំគ្នាប៉ាន់ស្មានបានថា ការដើរតែថ្កោលទោស បន្ទោស និងថាឱ្យអ្នកដទៃ ដើម្បីបង្វែរចំណាប់អារម្មណ៍ បានក្លាយជាទីពឹងចុងក្រោយសម្រាប់គណៈរដ្ឋបាលរបស់លោកដូណាល់ ត្រាំ ក្នុងការបិទបាំងការខ្វះសមត្ថភាពរបស់ខ្លួនឯង។ លោកត្រាំ បានប្រើឥរិយាបថបែបចាំតែចោមរោមវាយប្រហាររហូតពេញមួយអំឡុងពាក់កណ្ដាលខែមីនា…មានការលើកសរសើរលោកប្រធានាធិបតី ស៊ី ជីន ភីង របស់ចិនថា កំពុងតែធ្វើបានល្អក្នុងការទប់ទល់នឹងការឆ្លងរាលដាលរបស់កូវីដ-19 តែរួចហើយសំឡេងបែបនេះ ក៏ផ្លាស់ប្ដូរបែបភ្លាមៗតែម្ដង នៅពេលដែលលោកងាកមកស្រែកប្រកាសពីប្រធានបទថ្មី ដោយបានហៅមេរោគវីរុសកូរ៉ូណាប្រភេទថ្មីនេះថា “វីរុសចិន”។
យ៉ាងណាក៏ដោយ ពេលតាមដាន ត្រួតពិនិត្យមើលយ៉ាងជិតស្និទ្ធដិតដល់ខ្លាំងឡើង បែរជារកឃើញថា លោកត្រាំ ដែលមានខ្សែភ្នែកមុតស្រួចខ្លាំងក្នុងរឿងវឌ្ឍចក្ររបស់ព័ត៌មាននោះ មិនមានភាពចាំបាច់ពិតប្រាកដអ្វីសោះឡើយ ក្នុងការត្រូវបែរមកពឹងលើវិធីដើរតែបន្ទោសអ្នកដទៃនោះ។ អត្រាការទទួលស្គាល់ស្នាដៃរបស់លោក នៅក្នុងផូលសម្រង់របស់ស្ថាប័ន Gallup poll ដែលបានផ្សព្វផ្សាយកាលពីថ្ងៃទី30 មេសា ស្ថិតក្នុងកម្រិតមិនគួរឱ្យជឿ គឺ 49%…ច្បាស់លាស់តែម្ដងថា ពិន្ទុទទួលស្គាល់លទ្ធផលការងាររបស់លោកជារួម គឺស្ថិតក្នុងកម្រិតអាច “រស់បាន” ជាពិសេសបំផុត មាន 50% ទៀតបានប្រាប់ថា ពួកគេទទួលស្គាល់ និងចូលចិត្តការចាត់ការជំងឺឆ្លងរាតត្បាតរបស់លោកត្រាំ។
លទ្ធផលនៃការសម្រង់ការយល់ឃើញរបស់ពលរដ្ឋអាមេរិកាំងជាថ្មី ដែលធ្វើឡើងដោយមជ្ឈមណ្ឌល Pew Research Center ក្នុងខែមីនាកន្លងទៅ បានបង្ហាញឱ្យឃើញថា “យើងអាចប៉ាន់ប្រមាណយ៉ាងត្រួសៗថា ប្រមាណជា 2ភាគ3នៃពលរដ្ឋអាមេរិក ក្នុងពេលនេះប្រាប់ថា ពួកគេមានការយល់ឃើញក្នុងទស្សនៈមិនចូលចិត្តប្រទេសចិន ដែលអាចរាប់ថា ជាភាគរយនៃអារម្មណ៍អវិជ្ជមានចំពោះប្រទេសមួយនេះ(ចិន)ដែលខ្ពស់បំផុត រាប់ចាប់ពីស្ថាប័នមួយនេះចាប់ផ្ដើមសួរសំណួរនេះក្នុងឆ្នាំ2005 និងកើនឡើងជិត 20% រាប់ចាប់តាំងពីគណៈគ្រប់គ្រងរបស់លោកប្រធានាធិបតី ដូណាល់ ត្រាំ ចាប់ផ្ដើមគ្រប់គ្រងសហរដ្ឋអាមេរិកក្នុងឆ្នាំ2017”។
រឿងដែលគួរឱ្យចម្លែកចិត្តបំផុត ក៏គឺ របាយការណ៍លទ្ធផលការសម្រង់ការយល់ឃើញរបស់ពលរដ្ឋអាមេរិកាំងក្នុងគ្រានេះ របស់ Pew Research Center បានឱ្យដឹងថា ពេលនេះមានពលរដ្ឋអាមេរិកាំង កើនឡើងច្រើន ដែលមើលឃើញថា សហរដ្ឋអាមេរិកជាមហាអំណាចខាងសេដ្ឋកិច្ច ដែលនាំមុខគេ លើសអ្នកណាៗទាំងអស់នៅក្នុងពិភពលោក ដែលលទ្ធផលនេះអាចរាប់បានថា ខ្ពស់ជាងការធ្វើសម្រង់ក្នុងគ្រាណាៗទាំងអស់ពេញមួយរយៈពេល 12ឆ្នាំកន្លងមក និងពួកគេបាននាំគ្នាជឿយ៉ាងខ្លាំងលើសលប់ដូចគ្នាថា ប្រទេសរបស់ពួកគេ គឺជាអ្នកនាំមុខផ្នែកយោធារបស់ពិភពលោក និងជឿទៀតថា ពិភពលោកនេះបានល្អប្រសើរឡើង ដោយសារតែការមានសហរដ្ឋអាមេរិកជាអ្នកដឹកនាំ ពេលប្រៀបធៀបនឹងការឱ្យ ចិនធ្វើជាអ្នកដឹកនាំ។
ខ្លាំងជាងនោះទៅទៀត “មានត្រឹមតែ 1ភាគ4” នៃប្រជាជនអាមេរិកប៉ុណ្ណោះ ដែលធ្វើសម្រង់ដោយស្ថាប័នដដែល បានប្រាប់ថា “ពួកគេមានទស្សនគតិនិយមពេញចិត្ត” ប្រទេសចិន។
សូមរង់ចាំអាន វគ្គបន្ត…
ប្រភព៖ សាព័ត៌មានបរទេស
ប្រែសម្រួលដោយ តាវ៉ែនតា
May 12, 2020
សហរដ្ឋអាមេរិក “ទាមទារ” ឱ្យចិនលុបចោលបំណុលដើម្បីជាសំណងសម្រាប់ការខាតបង់ដោយសារ COVID-19
ក្រុមមន្ត្រីសេតវិមានបានពិនិត្យទៅលើគំនិតមួយដែលថា នឹងទាមទារឱ្យមានការលុបចោលទាំងស្រុង ឬមួយផ្នែកនៃបំណុលដែលមានទំហំ1.1លានលានដុល្លារដែលអាមេរិកាំងបានខ្ចីពីចិន។
ក្រុមអ្នកវិភាគបានឱ្យដឹងថា ប្រទេសចិនអាចនឹងកាត់បន្ថយបរិមាណនៃការក្ដោបក្ដាប់ភាគហ៊ុននៅក្នុងរតនាគារជាតិនៃសហរដ្ឋអាមេរិកក្នុងអំឡុងប៉ុន្មានខែខាងមុខ ដើម្បីទប់ទល់នឹងភាពតានតឹងនៃសង្គ្រាមពាណិជ្ជកម្មដែលកំពុងកើនកម្ដៅ និងសង្គ្រាមពាក្យសម្ដីរវាងប្រទេសទាំងពីរទាក់ទិននឹងប្រភពរបស់វីរុសCOVID-19។
របាយករណ៍សារព័ត៌មានរបស់សហរដ្ឋអាមេរិកបានឱ្យដឹងថា ក្រុមមន្ត្រីនៅសេតវិមាន កំពុងតែពិភាក្សាគ្នាអំពីវិធានការសំខាន់មួយចំនួន ដើម្បីប៉ះប៉ូវទៅលើប្រាក់ចំណាយសម្រាប់ទប់ទល់នឹងវិបត្តិសុខភាព ក្នុងនោះមានវិធានការលុបចោលទាំងស្រុង ឬមួយផ្នែកនៃបំណុលសរុបប្រមាណជាជិត1.1លានលានដុល្លារ ដែលរដ្ឋាភិបាលអាមេរិកាំងកំពុងជំពាក់ប្រទេសចិន។
ក្រុមអ្នកវិភាគយល់ថា សហរដ្ឋអាមេរិកពិបាកក្នុងការលើកឡើង “ជម្រើសធ្ងន់ធ្ងរ” បែបនេះ ព្រោះថា ជាក់ស្ដែងគំនិតនេះអាចជំរុញឱ្យទីក្រុងប៉េកាំងស្វែងរកវិធីការពារខ្លួនពីហានិភ័យ ដោយធ្វើការកាត់បន្ថយប្រាក់កម្ចីសម្រាប់រដ្ឋាភិបាលអាមេរិកាំង។
ប្រការខាងលើអាចបង្កបញ្ហាធំដល់ទីផ្សារមូលបត្ររបស់រដ្ឋាភិបាលអាមេរិកាំងនៅក្នុងអំឡុងពេលបច្ចុប្បន្ន ខណៈដែលទីក្រុងវ៉ាស៊ីងតោនកំពុងបង្កើនការបោះពុម្ភផ្សាយមូលបត្រថ្មីដើម្បីយកប្រាក់មកប្រើប្រាស់ក្នុងសកម្មភាពទប់ទល់នឹងវីរុសកូរ៉ូណា និងប៉ះប៉ូវការខូចខាតផ្នែកសេដ្ឋកិច្ចដែលបង្កឡើងដោយមេរោគរាតត្បាតនេះ។
កិច្ចពិភាក្សាទាក់ទិននឹងបញ្ហាហិរញ្ញវត្ថុរវាងប្រទេសចិន និងសហរដ្ឋអាមេរិក ត្រូវបានក្រុមមន្ត្រីអាមេរិកាំងធ្វើឡើងស្របពេលដែលប្រធានាធិបតី Donald Trump និងក្រុមមន្ត្រីរដ្ឋាភិបាលជាច្រើនរូបផ្សេងទៀត បានរិះគន់ទីក្រុងប៉េកាំងដែលបានបណ្ដោយឱ្យវីរុសCOVID-19 ផ្ទុះឆ្លងរាលដាល និងព្រមានថានឹងយកពន្ធនាំចូលថ្មី ដើម្បីដាក់ទណ្ឌកម្មប្រទេសចិន។
ក្រុមអ្នកវិភាគបានព្រមានថា “រាល់សកម្មភាពដែលធ្វើឡើងដើម្បីលុបបំណុលរបស់ចិន នឹងធ្វើឱ្យមានប្រតិកម្មផ្ទុយពីការចង់បានរបស់សហរដ្ឋអាមេរិក។ ព្រោះថា ប្រការនោះអាចបំផ្លាញទំនុកចិត្តរបស់អ្នកវិនិយោគទៅលើសមត្ថភាពផ្នែកហិរញ្ញវត្ថុរបស់សហរដ្ឋអាមេរិក ហើយពួកគេនឹងយល់ថា ប្រទេសនេះមិនអាចទូទាត់ការចំណាយរបស់ខ្លួនបាន ដោយត្រូវពឹងផ្អែកទៅលើការលុបបំណុលរបស់ចិន”។
ក្រសួងរតនាគារជាតិសហរដ្ឋអាមេរិក(United States Department of the Treasury)
បញ្ហាខាងលើក៏នឹងរុញច្រានអត្រាការប្រាក់ឱ្យឡើងខ្ពស់ បណ្ដាលឱ្យមានការខាតបង់ច្រើននៅពេលរដ្ឋាភិបាល ក៏ដូចជាក្រុមហ៊ុន និងអ្នកប្រើប្រាស់នៅសហរដ្ឋអាមេរិកត្រូវការប្រាក់កម្ចី ហើយពេលនោះ បញ្ហាទាក់ទិនទាំងឡាយក៏នឹងកើតឡើង ក្លាយជាបន្ទុកដ៏ធ្ងន់ធ្ងរទៅលើខឿនសេដ្ឋកិច្ចសហរដ្ឋអាមេរិកថែមមួយកម្រិតទៀត ខណៈដែលវាកំពុងតែខ្សោយស្រាប់។
ដំណឹងខាងលើនេះ ប្រហែលជាធ្វើឱ្យថ្នាក់ដឹកនាំប្រទេសចិន មានការព្រួយបារម្ភអំពីហានិភ័យកាន់តែមានច្រើនឡើងទាក់ទិននឹងការដែលប្រទេសចិនកំពុងកាន់កាប់ខ្ទង់បំណុលដ៏ធំរបស់រដ្ឋាភិបាលអាមេរិកាំងក្នុងអំឡុងទំនាក់ទំនងរបស់ប្រទេសទាំងពីរ ហាក់កំពុងល្អក់កករយ៉ាងឆាប់រហ័ស នេះបើតាមមតិរបស់ក្រុមអ្នកវិភាគ។
នៅក្នុងទសវត្សរ៍កន្លងទៅ មានការអំពាវនាវជាច្រើនដែលស្នើឱ្យប្រទេសចិនលុបខ្ទង់បំណុលដ៏ធំដែលចិនបាន និងកំពុងកាន់កាប់នៅក្នុងរតនាគារជាតិអាមេរិកាំង។
ប្រទេសចិនអាចសងសឹកចំពោះការគំរាមរបស់សហរដ្ឋអាមេរិក ដោយការបង្កឱ្យមានវិបត្តិទាក់ទិននឹងតម្លៃរូបិយប័ណ្ណដុល្លារអាមេរិក និងទីផ្សារហិរញ្ញវត្ថុ ដោយការបញ្ចេញលក់មូលបត្ររបស់ខ្លួននៅក្នុងរតនាគារជាតិអាមេរិកាំង។ កត្តានេះនឹងរុញច្រានតម្លៃមូលបត្ររបស់រដ្ឋាភិបាលអាមេរិកាំងឱ្យធ្លាក់ចុះ និងបង្កើតបានជាមហន្តរាយហិរញ្ញវត្ថុជាសកល។
កន្លងមក ធ្លាប់មានការអំពាវនាវដល់ប្រទេសចិន ឱ្យធ្វើពិពិធកម្មទៅលើទុនបម្រុងនៅបរទេសរបស់ខ្លួនដើម្បីចៀសវាងហានិភ័យអាក្រក់កើតឡើង។ បច្ចុប្បន្ន ក្នុងចំណោមទុនបម្រុងអន្តរជាតិចំនួន3លានលានដុល្លាររបស់ចិន នៅបរទេស គឺមានដល់ទៅ1ភាគ3ឯណោះដែលនៅក្នុងរតនាគារជាតិនៃសហរដ្ឋអាមេរិក។
របាយការណ៍ថ្មីបំផុតរបស់ក្រសួងហិរញ្ញវត្ថុសហរដ្ឋអាមេរិកបានឱ្យដឹងថា ចំនួនមូលបត្រនៃរដ្ឋាភិបាលអាមេរិកាំងដែលកំពុងត្រូវបានកាន់កាប់ដោយប្រទេសចិន បានថយចុះមកនៅត្រឹម1.09លានលានដុល្លារក្នុងខែកុម្ភៈ គឺតិចជាងបើធៀបនឹង1.32លានលានដុល្លារកាលពីខែវិច្ឆិកា ឆ្នាំ2013។ ប្រទេសចិន ធ្លាប់ត្រូវបានប្រទេសជប៉ុននាំមុខកាលពីឆ្នាំមុន ក្នុងនាមជាម្ចាស់បរទេសធំបំផុតរបស់រតនាគារជាតិនៃសហរដ្ឋអាមេរិក៕
ប្រភព៖ សារព័ត៌មានបរទេស
May 9, 2020
សហរដ្ឋអាមេរិក៖ អ្នកឆ្លងCOVID-19 កើនដល់ជិត1,159,000នាក់ ខណៈរដ្ឋខ្លះបើកដំណើរការសេដ្ឋកិច្ចឡើងវិញស្ទើរតែ100%
សហរដ្ឋអាមេរិកគឺជាសម្បុកមេរោគCOVID-19 ធំជាងគេបង្អស់ក្នុងពិភពលោក ដោយមានអ្នកជំងឺសរុប 1,158,881នាក់ កើន27,851ធៀបនឹងម្សិលមិញ។ អ្នកជំងឺដែលបានបាត់បង់ជីវិតនៅក្នុងប្រទេសនេះ បានកើនឡើងដល់ 67,293នាក់ ក្នុងនោះមានអ្នកស្លាប់ថ្មី1,540នាក់បន្ថែមទៀត។ អ្នកជំងឺដែលបានជាសះស្បើយ មានចំនួន160,705នាក់។
New York គឺជារដ្ឋដែលទទួលរងផលប៉ះពាល់ច្រើនបំផុតពីCOVID-19នៅសហរដ្ឋអាមេរិក។ រដ្ឋនេះ មានអ្នកជំងឺសរុប319,213នាក់ កើន3,991នាក់បើធៀបនឹងម្សិលមិញ(2ឧសភា) ចំណែកអ្នកស្លាប់ថ្មីដោយសារវីរុសកូរ៉ូណានៅ New York មានចំនួន299នាក់ នាំឱ្យអ្នកស្លាប់សរុបក្នុងរដ្ឋនេះកើនដល់24,368នាក់។
រដ្ឋនៅសហរដ្ឋអាមេរិកប្រមាណជាពាក់កណ្ដាល បានបន្ធូរបន្ថយការរឹតត្បិតលើកការដើរហើរចាប់ពីថ្ងៃទី1ឧសភា ខណៈដែលតួលេខនៃករណីឆ្លងវីរុសបានថយចុះ ឬនៅថេរ។ រដ្ឋ Texas បានអនុញ្ញាតឱ្យក្រុមហ៊ុន អាជីវកម្មនានាដំណើរការឡើងវិញទៅតាមផ្នែកដែលអាចធ្វើបាន ក្នុងពេលដែលហាងលក់រាយ និងមជ្ឈមណ្ឌលពាណិជ្ជកម្មបានបើកឡើងវិញក្នុងទំហំ25%នៃលទ្ធភាព។ នៅឯរដ្ឋ Georgia ក្រុមហ៊ុន អាជីវកម្មស្ទើរតែទាំងអស់ត្រូវបានអនុញ្ញាតឱ្យបើកដំណើរការឡើងវិញ៕
ប្រភព៖ សារព័ត៌មានបរទេស
May 3, 2020
លោកត្រាំ លេងមែនទែន!! បញ្ជាកងទ័ពជើងទឹកឱ្យបាញ់ពន្លិចនាវាប្រដេញរបស់អ៊ីរ៉ង់ បើចូលមករំខាននាវាចម្បាំងរបស់សហរដ្ឋអាមេរិក…
ទីភ្នាក់ងារព័ត៌មាន CNN បានរាយការណ៍ថា លោកប្រធានាធិបតី ដូណាល់ ត្រាំ បានសរសេរនៅក្នុងធ្វីតធើរកាលពីចុងសប្ដាហ៍កន្លងទៅ ដោយបានបញ្ជាក់ថា លោកបានបញ្ជាឱ្យកងទ័ពជើងទឹកនៃសហរដ្ឋអាមេរិក បាញ់ និងកម្ទេចនាវាណាក៏ដោយរបស់អ៊ីរ៉ង់ បើសិននាវាទាំងនោះចូលមករំខាន ឬរករឿងនាវារបស់សហរដ្ឋអាមេរិកនៅក្នុងដែនសមុទ្រ។
សំណេររបស់លោកត្រាំនៅក្នុងធ្វីតធើរនេះ បានកើតមានឡើងបន្ទាប់ពីកងទ័ពជើងទឹកសហរដ្ឋអាមេរិក បានផ្សព្វផ្សាយឃ្លីបវីដេអូមួយដែលបង្ហាញឱ្យឃើញនាវាប្រដេញចំនួន 11គ្រឿងរបស់កងកម្លាំងការពារការបដិវត្តអ៊ីរ៉ង់ ឬIRGC បានបើកចូលមកក្បែរនាវារបស់កងទ័ពសហរដ្ឋអាមេរិក និងអង្គភាពការពារដែនសមុទ្រក្នុងរយៈចម្ងាយដ៏គ្រោះថ្នាក់បំផុត ខណៈកំពុងធ្វើដំណើរនៅក្នុងឈូងសមុទ្រពែក្ស៍ ធ្វើឱ្យសហរដ្ឋអាមេរិក ថ្លែងថ្កោលទោសថា ជាទង្វើដែលបង្កគ្រោះថ្នាក់ និងពន្យុះសង្គ្រាម។
យ៉ាងណាក៏ដោយ នៅមិនទាន់ច្បាស់ប្រាកដថា បញ្ជាចុងក្រោយបំផុតរបស់លោកប្រធានាធិបតី ត្រាំ នឹងក្លាយជាច្បាប់ដែលត្រូវតម្កល់ទុកប្រចាំកងទ័ពជើងទឹក ឬយ៉ាងណានោះទេ និងថែមទាំងមិនទាន់ប្រាកដច្បាស់ថា ទីបញ្ជាការជាន់ខ្ពស់ ដែលមានតួនាទីគ្រប់គ្រងប្រតិបត្តិការនៅក្នុងតំបន់មជ្ឈិមបូព៌ា នឹងបញ្ជាឱ្យបាញ់នាវារបស់អ៊ីរ៉ង់ ឬយ៉ាងណានៅឡើយដែរ។ តែបញ្ជាបែបនេះ អាចធ្វើឱ្យភាពតានតឹងរវាងសហរដ្ឋអាមេរិក នឹងអ៊ីរ៉ង់ ដែលប៊ិះនឹងកើតមានសង្គ្រាមកាលពីអំឡុងដើមឆ្នាំនោះ កាន់តែអាក្រក់ឡើងទៅទៀត។
Caption រូបភាពដែលផ្សព្វផ្សាយដោយកងទ័ពជើងទឹកសហរដ្ឋអាមេរិក បានបង្ហាញឱ្យឃើញនាវាប្រដេញរបស់កងទ័ពអ៊ីរ៉ង់បើកមកប្រកៀកនាវាចម្បាំង USS Paul Hamilton និងនាវាផ្សេងៗទៀតរបស់សហរដ្ឋអាមេរិក ក្នុងរយៈចម្ងាយអសុវត្ថិភាព កាលពីថ្ងៃទី15 មេសាកន្លងទៅ…
ចំណែកអ្នកនាំពាក្យរបស់ IRGC បានចេញមកឆ្លើយតបធ្វីតធើររបស់លោកត្រាំថា “ជំនួសឱ្យការ ចង់មករំលោភអ្នកដទៃដូចថ្ងៃនេះហើយ ពួកអាមេរិកាំង គួរតែខំប្រឹងព្យាយាមដើម្បីជួយបុគ្គលិកកងទ័ពរបស់ខ្លួនឯងដែលឆ្លងមេរោគវីរុសកូរ៉ូណាឱ្យជាសះស្បើយវិញ ប្រសើរជាង”៕
ប្រភព៖ សារព័ត៌មានបរទេស
April 29, 2020
អាមេរិកាំងបញ្ចេញផែនទីភូមិសាស្ត្រពេញលេញនៃឋានព្រះចន្ទ
ជាលើកដំបូងហើយដែលផ្ទៃដីទាំងមូលរបស់ព្រះចន្ទត្រូវបានគូរឡើងវិញដោយមជ្ឈមណ្ឌលតារាសាស្ត្រនៃទីភ្នាក់ងារអង្កេតភូមិសាស្ត្រសហរដ្ឋអាមេរិក USGS (United States Geological Survey)។
ផែនទីថ្មីនេះ ត្រូវបានបង្កើតឡើងដោយការបូកផ្សំគ្នារវាងផែនទីភូមិសាស្ត្រចំនួន6ផ្សេងទៀតនៃកម្មវិធី Apollo និងទិន្នន័យដែលបានមកពីផ្កាយរណបនានាក្នុងពេលថ្មីៗនេះ បានបង្ហាញអំពីរចនាសម្ព័ន្ធផ្ទៃខាងលើយ៉ាងច្បាស់របស់ឋានព្រះចន្ទ ជាមួយនឹងភាពលម្អិតដែលមិនធ្លាប់មានពីមុនមក។
ចំពោះសហគមន៍អ្នកវិទ្យាសាស្ត្រ ផែនទីនេះគឺជាឯកសារដែលកាត់ថ្លៃមិនបាន សម្រាប់បេសកកម្មនៅលើព្រះចន្ទនាពេលអនាគត ដែលជួយដល់ការសិក្សាស្រាវជ្រាវប្រវត្តិ4.5ពាន់លានឆ្នាំរបស់ភពរណបធម្មជាតិតែមួយគត់ដែលគោចរជុំវិញភពផែនដីមួយនេះ។
Corey Fortezzo មកពី USGS ដែលជាប្រធាននៃការសិក្សាស្រាវជ្រាវនេះបានឱ្យដឹងថា “ផែនទីនេះគឺជាចំណុចកំពូលនៃគម្រោងដែលអូសបន្លាយរាប់ទសវត្សរ៍។ វាផ្ដល់ព័ត៌មានសំខាន់ៗសម្រាប់ការស្រាវជ្រាវផ្នែកវិទ្យាសាស្ត្រថ្មីៗផ្សេងទៀត”។
ដើម្បីអាចបង្កើតបានផែនទីភូមិសាស្ត្រទូទាំងឋានព្រះចន្ទ ទីភ្នាក់ងារ USGS បានសហការជាមួយ NASA និងវិទ្យាស្ថានស្រាវជ្រាវភព និងព្រះចន្ទ(LPI) របស់សហរដ្ឋអាមេរិក រួមនឹងទីភ្នាក់ងាររុករកអវកាសជប៉ុន(JAXA)។ អ្នកវិទ្យាសាស្ត្របានប្រើប្រាស់កាមេរ៉ាភូមិសាស្ត្រពីយានអវកាស SELENE របស់ជប៉ុន ដើម្បីប្រមូលទិន្នន័យនៅតំបន់អេក្វាទ័រ និងប្រើប្រាស់ម៉ាស៊ីនឡាហ្សែរវាស់កម្ពស់នៅលើយានអវកាស Lunar Reconnaissance Orbiter របស់ NASA ដើម្បីបន្ថែមផែនទីភូមិសាស្ត្រនៅប៉ូលខាងជើង និងខាងត្បូង។
“ព្រះចន្ទតែងមានកម្លាំងទាក់ទាញយ៉ាងខ្លាំងសម្រាប់មនុស្ស ហើយយើងក៏តែងតែរង់ចាំថ្ងៃមួយដែលអាចវិលត្រឡប់ទៅកាន់ទីនោះ។ ពិតជាអស្ចារ្យណាស់នៅពេលបានឃើញ USGS បង្កើតបានប្រភពធនធានដែលអាចជួយឱ្យ NASA រៀបគម្រោងសម្រាប់បេសកកម្មនាពេលអនាគត” នេះបើតាមសម្ដីរបស់ Jim Reilly ដែលជាប្រធានទីភ្នាក់ងារ USGS និងជាអតីតអវកាសចររបស់ NASA៕
https://www.youtube.com/watch?v=lTKbXpIqGtY
ប្រភព៖ សារព័ត៌មានបរទេស
April 25, 2020
សហរដ្ឋអាមេរិកមានអ្នកស្លាប់ជិត52,000នាក់ដោយសារCOVID-19 លោក Trump ថ្លែងថា “អាមេរិកធ្វើបានល្អ”
ប្រធានាធិបតីសហរដ្ឋអាមរិក លោក Donald Trump បានថ្លែងថា រដ្ឋាភិបាលអាមេរិកាំងទប់ទល់នឹងរោគរាតត្បាតCOVID-19 បានយ៉ាងល្អ និងបានសង្ឃឹមថា តួលេខនៃអ្នកស្លាប់ដោយសារវីរុសកូរ៉ូណានេះនឹងទាបជាងច្រើន ធៀបនឹងការព្យាករ100,000នាក់ពីសំណាក់ក្រុមអ្នកជំនាញការ។
គិតត្រឹមបច្ចុប្បន្ន សហរដ្ឋអាមេរិកមានអ្នកស្លាប់ដោយសារវីរុសCOVID-19 សរុបឡើងដល់ 52,092នាក់ កើនជាង1,800នាក់ បើធៀបនឹងមុននេះមួយថ្ងៃ។ អ្នកជំងឺថ្មីក្នុងប្រទេសនេះមានជាង3,700នាក់ ធ្វើឱ្យចំនួនអ្នកជំងឺសរុបកើនដល់923,612នាក់។
ឆ្លើយតបនឹងសំណួររបស់អ្នកយកព័ត៌មាន ស្ដីអំពីការទទួលខុសត្រូវក្នុងការទប់ស្កាត់របស់រដ្ឋាភិបាល ខណៈដែលមានអ្នកស្លាប់ជាង50,000នាក់ដោយសារCOVID-19 លោក Trump បានឆ្លើយថា “ខ្ញុំគិតថា យើងធ្វើបានយ៉ាងល្អហើយ”។ លោកក៏បានលើកឡើងអំពីការព្យាករកន្លងមករបស់ក្រុមអ្នកជំនាញដែលថា តួលេខនៃអ្នកស្លាប់ដោយសារវីរុសCOVID-19 នៅសហរដ្ឋអាមេរិក អាចមានយ៉ាងតិច100,000នាក់។ លោក Trump ថ្លែងថា “យើងសង្ឃឹមថា តួលេខជាក់ស្ដែងនឹងទាបជាងនេះ”។
លោក Trump បានប្រកាសថា “ការរឹតបន្តឹងការដើរហើរ” អាចអូសបន្លាយដល់ក្រោយថ្ងៃទី1ឧសភា។ សភាជាន់ទាបអាមេរិកាំង កាលពីម្សិលមិញក៏បានអនុម័តយល់ព្រមទម្លាក់កញ្ចប់ថវិកាជំនួយសេដ្ឋកិច្ច ដែលមានទំហំទឹកប្រាក់ 480ពាន់លានដុល្លារដើម្បីជួយដល់អាជីវកម្មខ្នាតតូច មន្ទីរពេទ្យ និងការធ្វើតេស្តរកមេរោគ COVID-19៕
ប្រភព៖ សារព័ត៌មានបរទេស
April 25, 2020
ខឹងខ្លាំងណាស់! លោកត្រាំ ប្រកាសផ្អាកលុយគាំទ្រWHO កណ្ដាលស្ថានការណ៍វិបត្តិកូវីដ-19
លោកប្រធានាធិបតីនៃសហរដ្ឋអាមេរិក ដូណាល់ ត្រាំ កាលពីថ្ងៃអង្គារ(ទី14 មេសា)ម្សិលមិញ បានប្រកាសផ្អាកលុយឧបត្ថម្ភរបស់សហរដ្ឋអាមេរិក ដែលបានផ្ដល់ទៅឱ្យអង្គការសុខភាពពិភពលោក(WHO) ដោយបានឱ្យហេតុផលថា អង្គការមួយនេះ បានលាក់បាំងភាពធ្ងន់ធ្ងរក្នុងការឆ្លងរាលដាលរបស់មេរោគកូវីដ-19 នៅក្នុងប្រទេសចិន មុនពេលវាឆ្លងសាយភាយពាសពេញពិភពលោក។
លោក ត្រាំ បានថ្លែងនៅក្នុងសេចក្ដីថ្លែងការណ៍ថា លោកបានបញ្ជាឱ្យគណៈគ្រប់គ្រងរបស់លោក ធ្វើការផ្អាកលុយគាំទ្រអង្គការនោះ ខណៈពេលជាមួយគ្នា ក៏នឹងមានពិនិត្យវាយតម្លៃពីតួនាទីរបស់អង្គការសុខភាពពិភពលោក លើផ្នែកគ្រប់គ្រងចាត់ការ ដែលខុសឆ្គងយ៉ាងធ្ងន់ធ្ងរ និងលាក់បាំងការឆ្លងរាលដាលរបស់វីរុសកូរ៉ូណាប្រភេទថ្មី។
នៅក្នុងសេចក្ដីថ្លែងការណ៍របស់លោកត្រាំ បានបញ្ជាក់ថា អង្គការសុខភាពពិភពលោក បានរារាំងភាពច្បាស់លាស់របស់ព័ត៌មាន នៃការឆ្លងរាលដាល ហើយសហរដ្ឋអាមេរិក ដែលអ្នកឧបត្ថម្ភធំជាងគេរបស់អង្គភាពផ្នែកសុខាភិបាល របស់អង្គការសហប្រជាជាតិមួយនេះ ដោយចំនួនទឹកប្រាក់ 400លានដុល្លារអាមេរិកកាលពីឆ្នាំកន្លងទៅ ពេលនេះនឹងពិចារណាថា តើនឹងត្រូវធ្វើយ៉ាងណាតទៅទៀត ជាមួយប្រាក់ទាំងអស់ដែលបានប្រគល់ទៅឱ្យអង្គការសុខភាពពិភពលោក។
លោកត្រាំថ្លែងថា “ដោយការឆ្លងរាលដាលរបស់ជំងឺឆ្លងដ៏ធំកូវីដ-19 យើងមានក្ដីកង្វល់យ៉ាងធំសម្បើមថា ភាពអនុគ្រោះរបស់សហរដ្ឋអាមេរិក ត្រូវបានប្រើប្រាស់យ៉ាងល្អបំផុត តាមដែលអាចទៅរួចហើយ ឬទេ?”។
កាលពីសប្ដាហ៍មុន លោកត្រាំ បានគំរាមកាត់ប្រាក់ឧបត្ថម្ភគាំទ្រអង្គការសុខភាពពិភពលោក ពីបទលម្អៀង ដោយបានផ្ដល់ភាពសំខាន់ទៅលើប្រទេសចិនខ្លាំងជ្រុលពេក និងថែមទាំងផ្ដល់ការណែនាំដែលគ្មានប្រសិទ្ធភាព រហូតធ្វើឱ្យមេរោគកូរ៉ូណាប្រភេទថ្មី ឆ្លងរាលដាលទូទាំងពិភពលោក។
“ពួកគេចេញសេចក្ដីប្រកាសដាស់តឿនខុសឆ្គង” លោកត្រាំ បានបញ្ជាក់ដោយបានចោទថា WHO សម្រេចចិត្តយឺតយ៉ាវ ទម្រាំតែចេញការប្រកាសដាស់តឿនឱ្យប្រយ័ត្នលើការធ្វើដំណើរទៅប្រទេសចិន។ លោកថា “ពួកគេគួរតែប្រកាស តាំងតែពីចុងខែមុននោះ”
តមកទៀត លោក ថេដ្រូស អ៊ែដហាណូម កេប្រេយេស៊ុស ប្រធានអង្គការសុខភាពពិភពលោក បានអំពាវនាវឱ្យបណ្ដាមេដឹកនាំទូទាំងពិភពលោក បញ្ឈប់ការលេងល្បែងនយោបាយកណ្ដាលវិបត្តិជំងឺរាតត្បាតដ៏ធំ នៃវីរុសកូរ៉ូណាប្រភេទថ្មី(កូវីដ-19) ក្រោយពីអង្គការមួយនេះត្រូវរងការរិះគន់យ៉ាងខ្លាំងក្លាពីលោកប្រធាធិបតី ដូណាល់ ត្រាំ។
តែយ៉ាងណាក៏ដោយ សង្គ្រាមពាក្យសម្ដីរវាងទាំង 2ខាងនេះ មិនបញ្ចប់ត្រឹមតែប៉ុនហ្នឹងទេ ព្រោះកាលពី 1ថ្ងៃបន្ទាប់ពីនោះមក សហរដ្ឋអាមេរិក បានចេញសេចក្ដីប្រកាសចោទថា ជារឿងរបស់អង្គការសុខភាពពិភពលោកទៀត ដែលផ្ដល់ភាពសំខាន់ទៅលើប្រធានបទខាងនយោបាយមុនគេបង្អស់ ដោយធ្វើព្រងើយកន្តើយចំពោះការព្រមានរបស់ប្រទេសតៃវ៉ាន់ ពាក់ព័ន្ធនឹងការឆ្លងរាលដាលរបស់មេរោគវីរុសកូរ៉ូណាប្រភេទថ្មី ឬកូវីដ-19 នៅក្នុងប្រទេសចិន រហូតដល់ស្ថានការណ៍រាលដាលទូទាំងពិភពលោក។
ការចោទប្រកាន់ទាំងនោះ បានជំរុញឱ្យអង្គការសុខភាពពិភពលោក ប្រញាប់ឆ្លើយតប 1ដងទៀត ដោយបានបដិសេធការចោទប្រកាន់របស់សហរដ្ឋអាមេរិក និងបានអះអាងថា ព័ត៌មានដែលបានទទួលតាមរយៈអ៊ីមែលពីតៃវ៉ាន់នៅថ្ងៃនោះ មិនធ្លាប់យោងទៅលើករណីការឆ្លងពីមនុស្សទៅមនុស្សនោះឡើយ ដែលការឆ្លើយតបនេះហើយ ជាប្រភពនៃការគំរាមកាត់ប្រាក់ឧបត្ថម្ភគាំទ្ររបស់លោកត្រាំ៕
ប្រភព៖ សារព័ត៌មានបរទេស
April 15, 2020
រន្ធត់រដ្ឋនីវយ៉ក! ឆ្លងកូវីដ-19 ជាង 1.6សែននាក់ គ្រងស្ថិតិរដ្ឋតែមួយ មានអ្នកឆ្លងមេរោគ វ៉ាដាច់ប្រទេសអេស្ប៉ាញទាំងមូល
រដ្ឋនីវយ៉ក រងវិបត្តិធ្ងន់ធ្ងរ ចំនួនអ្នកឆ្លងមេរោគកូវីដ-19 នៅតែហក់ឡើងឥតឈប់ ដល់ជាង 1.6សែននាក់ហើយ គ្រងស្ថិតិជារដ្ឋតែមួយគត់ដែលមានអ្នកឆ្លងមេរោគច្រើនជាងប្រទេសអេស្ប៉ាញ និងអ៊ីតាលីទាំងមូលទៅទៀត។
នៅថ្ងៃទី10 មេសានេះ វេបសាយ ដឹ សាន់ បានឱ្យដឹងថា មហាវិទ្យាល័យ ចន ហប់គីនស៍ នៅក្នុងសហរដ្ឋអាមេរិក បានរាយការណ៍ពីស្ថានការណ៍មេរោគវីរុសកូរ៉ូណាប្រភេទថ្មី ឬកូវីដ-19 រាតត្បាត ដែលនៅក្នុងរដ្ឋនីវយ៉ក កំពុងរងវិបត្តិកាន់តែធ្ងន់ធ្ងរឡើង គ្រងស្ថិតិជារដ្ឋតែមួយ ដែលមានចំនួនអ្នកឆ្លងមេរោគច្រើនជាងប្រទេសណាៗទាំងអស់លើពិភពលោក ព្រោះរហូតមកដល់ខណៈពេលនេះ បានរកឃើញអ្នកឆ្លងមេរោគក្នុងរដ្ឋមួយនេះរួចហើយដល់ទៅ 160,000នាក់ និងស្លាប់ជាង 7,000នាក់ ដែលនៅពេលប្រៀបធៀបជាមួយនឹងប្រទេសអេស្ប៉ាញ ជាប្រទេសដែលមានអ្នកឆ្លងមេរោគច្រើនបំផុតលំដាប់លេខ2 របស់ពិភពលោក មានអ្នកឆ្លងមេរោគប្រមាណ 150,000នាក់ និងអ៊ីតាលី មានអ្នកឆ្លងមេរោគកូវីដ-19 ច្រើនលំដាប់លេខ3 ក្នុងពិភពលោក ក្នុងចំនួនប្រមាណជា 140,000នាក់។
លោក អ៊ែនឌ្រូវ៍ ខូអូម៉ូ អភិបាលរដ្ឋនីវយ៉ក ដែលកំពុងធ្វើការយ៉ាងធ្ងន់ធ្ងរ ដើម្បីរិះរកវិធីទប់ទល់នឹងការរាតត្បាតរបស់មេរោគកូវីដ-19 ក្នុងរដ្ឋនីវយ៉ក បានថ្លែងកាលពីថ្ងៃព្រហស្បតិ៍កន្លងទៅ ដោយបានរិះគន់លោកប្រធានាធិបតី ដូណាល់ ត្រាំ នៃសហរដ្ឋអាមេរិក និងលោក ប៊ីល ដឹ ប្លាស៊ីអូ អភិបាលទីក្រុងនីវយ៉ក ដែលប្រកាសក្នុងថាមឡាញ អំពីការវិលត្រឡប់មកបើកមហានគរនីវយ៉កឡើងជាថ្មីម្ដងទៀត។
លោក អ៊ែនឌ្រូវ៍ ខូអូម៉ូ អភិបាលរដ្ឋនីវយ៉ក“ហេតុអ្វីបានជាពួកគេទស្សន៍ទាយថា ពលរដ្ឋនីវយ៉ក អាចបញ្ឈប់ការឆ្លងរាតត្បាតរបស់មេរោគកូវីដ-19បាននៅពេលណានោះ? ខណៈដែលប្រធានាធិបតី ត្រាំ ថែមទាំងទស្សន៍ទាយថា ប្រទេសអាមេរិក នឹងអាចវិលមកដំណើរការធុរកិច្ចបានដូចកាលពីដើម ក្នុងអំឡុងពិធីបុណ្យអ៊ីស្ទើរ៍ទៀតផង…ហេតុអីបានពួកលោកនិយាយបែបហ្នឹង?” លោក ខូអូម៉ូ ថ្លែងរិះគន់លោកប្រធានាធិបតី ត្រាំ និងបានចង្អុលបង្ហាញថា សូម្បីតែអ្នកជំនាញការផ្នែករោគឆ្លង ក៏នៅមិនទាន់ហ៊ានទស្សន៍ទាយបានផងថា តើការឆ្លងរាតត្បាតរបស់កូវីដ-19 នឹងចប់នៅពេលណានោះ?! តើអ្នកណាអាចនៅរង់ចាំមើលស្ថានការណ៍ និងនិយាយបានថា ពួកយើងកំពុងតែឆ្ពោះទៅកាន់ចំណុចណានោះ?។
ក្រៅពីនោះ លោកខូអូម៉ូ អភិបាលរដ្ឋនីវយ៉ក នៅបានថ្លែងយ៉ាងត្រង់ទៅត្រង់មកទៀតផងថា សម្រាប់ខ្លួនលោក គ្មានការគិតថា ការរាតត្បាតរបស់មេរោគកូវីដ-19 នឹងចប់នៅពេលណាឡើយ…មិនដឹងថា ក្រាហ្វិករបស់អ្នកឆ្លងមេរោគថ្មីក្នុងរដ្ឋនីវយ៉ក នឹងនៅតែហក់ឡើងខ្ពស់តទៅទៀត ឬក៏ចាប់ផ្ដើមថយចុះ ឬយ៉ាងណានោះឡើយ? ព្រោះពេលនេះ ពួកយើងនឹងដឹង ក៏នៅពេលដែលទៅដល់ចំណុចនោះហើយប៉ុណ្ណោះ។ ពួកយើងតាមដានព័ត៌មានតួលេខរៀងរាល់ថ្ងៃ។ លោកខូអូម៉ូ នៅបានថ្លែងអះអាងពីចំនួនអ្នកស្លាប់ដោយសារមេរោគកូវីដ-19 ក្នុងរដ្ឋនីវយ៉ក ថា មានចំនួន 7,067ហើយ ដែលនេះគឺជាចំនួនដែលច្រើនជាងចំនួនអ្នកស្លាប់ដោយសារហេតុការណ៍វិនាសកម្ម 9/11(យន្តហោះភេរវករបើកបំបុកអគារ វើល ថ្រេត សេនធើរ កាលពីឆ្នាំ2001) ក្រៅពីនោះ តួលេខនៃអ្នកស្លាប់ថ្មីៗ ក្នុងអំឡុង 24ម៉ោង នៅតែកើនឡើងខ្ពស់ដល់ទៅ 799នាក់ម្ដងទៀតដដែល កាលពីថ្ងៃទី8 មេសា កន្លងទៅ។
ទាំងអស់នេះ ចំនួនសរុបនៃអ្នកឆ្លងមេរោគវីរុសកូវីដ-19 នៅក្នុងសហរដ្ឋអាមេរិក បានកើនឡើងដល់ចំនួន 452,135នាក់ និងមានអ្នកស្លាប់ 16,513នាក់ រហូតជាប់លំដាប់ជាប្រទេសដែលមានអ្នកឆ្លងមេរោគកូវីដ-19 ច្រើនបំផុតលំដាប់លេខ1 របស់ពិភពលោក រួមទាំងមានចំនួនអ្នកស្លាប់ច្រើនជាងគេបំផុត លំដាប់លេខ2 ក្នុងពិភពលោក បន្ទាប់ពីអ៊ីតាលី ដែលមានអ្នកឆ្លងមេរោគ 143,626នាក់ និងស្លាប់ 18,279នាក់៕
ប្រភព៖ សារព័ត៌មានបរទេស
April 10, 2020
Trump ចុះហត្ថលេខាលើកញ្ចប់ថវិកាជំនួយ ទំហំ2.2លានលានដុល្លារអាមេរិក
ប្រធានាធិបតីសហរដ្ឋអាមេរិក បានចុះហត្ថលេខាលើកញ្ចប់ថវិកាជំនួយសេដ្ឋកិច្ចទំហំ2.2លានលានដុល្លារ ដើម្បីជួយដល់បណ្ដាក្រុមហ៊ុន និងកម្មករអាមេរិកាំងដែលជួបការលំបាកដោយសារវីរុសCOVID-19។
“ខ្ញុំសូមថ្លែងអំណរគុណចំពោះតំណាងរាស្ត្រមកពីគណបក្សប្រជាធិបតេយ្យ និងគណបក្សសាធារណរដ្ឋ ដែលបានសាមគ្គីគ្នា និងយកប្រទេសជាតិជាធំ” ប្រធានាធីបតីសហរដ្ឋអាមេរិក Donald Trump មានប្រសាសន៍កាលពីថ្ងៃទី27មីនាកន្លងទៅ បន្ទាប់ពីបានចុះហត្ថលេខាលើកញ្ចប់ថវិកាជំនួយខាងលើ។ លោកបន្ថែមថា “យើងត្រូវបានវាយប្រហារយ៉ាងខ្លាំងក្លាដោយសត្រូវលាក់មុខ។ ក៏ប៉ុន្តែ ខ្ញុំគិតថា យើងនឹងងើបឡើងវិញបានយ៉ាងឆាប់រហ័ស”។
នៅមុនពេលចុះហត្ថលេខា លោក Trump បានលើកតម្កើងអំពីទំហំនៃកញ្ចប់ជំនួយដែលមានទឹកប្រាក់ជាង2លានលានដុល្លារនេះ។ “កន្លងមក ខ្ញុំមិនដែលបានចុះហត្ថលេខាលើអ្វីមួយដែលមានអក្សរលានលានដូច្នេះនោះទេ”។
មុននេះ កញ្ចប់ថវិកាជំនួយសេដ្ឋកិច្ចដែលមានទំហំទឹកប្រាក់ធំជាងគេបង្អស់់ក្នុងប្រវត្តិសាស្ត្រសហរដ្ឋអាមេរិកនាសម័យនេះ ក៏ត្រូវបានអនុម័តយល់ព្រមដោយសភាជាន់ខ្ពស់អាមេរិកាំងរួចហើយ។ កញ្ចប់ថវិកានេះនឹងផ្ដល់ជំនួយរាប់ពាន់លានដុល្លារ ទៅឱ្យបណ្ដាក្រុមហ៊ុនឧស្សាហកម្មដែលកំពុងជួបការលំបាក និងជួយកាត់បន្ថយអត្រាបាត់បង់ការងារ ព្រមទាំងផ្ដល់ជំនួយជាសាច់ប្រាក់សុទ្ធដល់ពលរដ្ឋដែលត្រូវរងគ្រោះព្រោះវីរុសCOVID-19។
អ្វីដែលពលរដ្ឋអាមេរិកាំងមានការសប្បាយចិត្តជាងគេនោះគឺ គម្រោងជំនួយផ្ទាល់ដល់ប្រជាជន។ ក្នុងគម្រោងជំនួយនេះ ពលរដ្ឋណាដែលមានចំណូលទាបជាង75,000ដុល្លារក្នុង1ឆ្នាំ នឹងទទួលបានប្រាក់សុទ្ធ 1,200ដុល្លារក្នុងមនុស្សម្នាក់។
មន្ទីរពេទ្យនានានឹងទទួលបានជំនួយសរុប 100ពាន់លានដុល្លារពីកញ្ចប់ជំនួយខាងលើ។ ចំណែកក្រុមហ៊ុនតូចៗនឹងទទួលបានទឹកប្រាក់សរុប 350ពាន់លានដុល្លារ។ ក្រុមហ៊ុនធំៗដែលរួមទាំងក្រុមហ៊ុនអាកាសចរណ៍ និងក្រុមហ៊ុននាវាទេសចរណ៍ នឹងទទួលបានជំនួយសរុប 500ពាន់លានដុល្លារ។ ចំណែក150ពាន់លានដុល្លារផ្សេងទៀតទុកសម្រាប់ជួយជំរុញសេដ្ឋកិច្ចរបស់រដ្ឋនីមួយៗ រួមនឹងតំបន់មូលដ្ឋានផងដែរ។
យោងតាមស្ថិតិរបស់សាកលវិទ្យាល័យ Johns Hopskins ចំនួនអ្នកឆ្លងវីរុសCOVID-19 នៅសហរដ្ឋអាមេរិកកាលពីថ្ងៃទី27មីនាបានកើន16,961ករណីបន្ថែមទៀត ដែលធ្វើឱ្យចំនួនអ្នកឆ្លងមេរោគសរុបឡើងដល់ 102,936ករណី ក្នុងនោះអ្នកស្លាប់សរុបបានកើនដល់ 1,607ករណី ពោលគឺកើន312ករណី បើធៀបនឹងមុននេះមួយថ្ងៃ។ បច្ចុប្បន្ន សហរដ្ឋអាមេរិក បានក្លាយជាសម្បុកមេរោគCOVID-19 ធំជាងគេបង្អស់នៅទូទាំងពិភពលោក៕
ប្រភព៖ សារព័ត៌មានបរទេស
March 28, 2020
COVID-19! ចំនួនអ្នកជំងឺកូរ៉ូណាប្រភេទថ្មីនៅសហរដ្ឋអាមេរិក កើនលើស100,000នាក់
សហរដ្ឋអាមេរិក បច្ចុប្បន្នជាសម្បុកមេរោគCOVID-19 ធំជាងគេបង្អស់ក្នុងពិភពលោក ដោយមានអ្នកឆ្លងវីរុសCOVID-19 ជាង100,000នាក់ កើនជិត17,000នាក់ បើធៀបនឹងមុននេះ1ថ្ងៃ។
យោងតាមស្ថិតិរបស់សាកលវិទ្យាល័យ Johns Hopskins បានឱ្យដឹងថា តួលេខនៃអ្នកបានឆ្លងវីរុសCOVID-19 នៅសហរដ្ឋអាមេរិកកាលពីថ្ងៃទី27មីនា បានកើន16,961ករណីបន្ថែមទៀត នាំឱ្យចំនួនអ្នកជំងឺសរុបទូទាំងប្រទេសឡើងដល់102,936នាក់។ ចំនួនអ្នកស្លាប់ថ្មីដោយសារវីរុសកូរ៉ូណានេះ កើន312នាក់បន្ថែមទៀត ដូច្នេះចំនួនអ្នកស្លាប់សរុបនៅសហរដ្ឋអាមេរិក ឡើងដល់1,607នាក់។
នៅទូទាំងពិភពលោក មានអ្នកឆ្លងវីរុសCOVID-19 សរុប593,952នាក់ ក្នុងនោះមាន27,341នាក់បានបាត់បង់ជីវិត និង133,057នាក់ (ស្មើនឹង22.3% នៃចំនួនអ្នកឆ្លងមេរោគសរុប) បានជាសះស្បើយ។ ចំណែកអ្នកជំងឺដែលកំពុងប្រឈមនឹងការស្លាប់ មានចំនួនដល់ទៅ 23,519នាក់៕
ប្រភព៖ សារព័ត៌មានបរទេស
March 28, 2020