Tag: សហរដ្ឋអាមេរិក

កម្ពុជា នាំចេញអង្ករបានជិត 6 សែនតោន ក្នុង 11 ខែដំបូងនៃឆ្នាំ 2023
11 ខែដំបូងក្នុងឆ្នាំនេះ កម្ពុជា នាំចេញអង្ករបាន 85% បើធៀបនឹងផែនការ 700 ពាន់តោន ដែលបានដាក់ចេញសម្រាប់ឆ្នាំ 2023។
យោងតាម សហព័ន្ធស្រូវអង្ករកម្ពុជា រយៈពេល 11 ខែនៃ 2023 កម្ពុជា នាំចេញអង្ករបានចំនួន 595,630 តោន ដែលស្មើនឹងទឹកប្រាក់ចំនួន 420.81 លានដុល្លារសហរដ្ឋអាមេរិក។ តួលេខនេះស្មើនឹង 85% នៃផែនការ 700 ពាន់តោននៅក្នុងឆ្នាំនេះ។
ទីផ្សារដែលបានទទួលទិញអង្ករកម្ពុជា នៅក្នុង 11 ខែដំបូងនៃឆ្នាំ 2023 រួមមាន ប្រទេសចិន និងតំបន់ស្វយ័ត (198,761 តោន), តំបន់អឺរ៉ុប (240,751 តោន), តំបន់អាស៊ាន (76,514 តោន) និងប្រទេសជាច្រើនផ្សេងទៀតនៅទ្វីបអាហ្វ្រិក និងមជ្ឈិមបូព៌ាជាដើម (79,604 តោន)។
ប្រភេទអង្ករដែល កម្ពុជា បាននាំចេញ រួមមាន អង្ករក្រអូបគ្រប់ប្រភេទ (82.20%), អង្ករសគ្រាប់វែង (13.13%), អង្ករសគ្រាប់ខ្លី (0.02%), អង្ករចំហ៊ុយ (3.04%) និងអង្ករសរីរាង្គ (1.61%)។ នេះបើយោងតាមទិន្នន័យពី អគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ ក៏ដូចជា អគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុ និងអគ្គនាយកដ្ឋានសេវាពាណិជ្ជកម្ម នៃក្រសួងពាណិជ្ជកម្មកម្ពុជា៕
December 6, 2023
មន្ត្រីយោធាអាម៉េរិកថា អ៊ុយក្រែនរំដោះទឹកដីបានជាងពាក់កណ្ដាល ពីកងទ័ពរុស្ស៊ី
ឧត្តមសេនីយ៍ Milley អះអាងថា អ៊ុយក្រែនបានវាយបក និងដណ្ដើមមកវិញបានជាង 54% នៃទឹកដីដែលកងទ័ពរុស្ស៊ីបានវាយយកតាំងពីសង្គ្រាមបានផ្ទុះឡើង។
ក្នុងសន្និសីទសារព័ត៌មាននៅប្រទេសអាល្លឺម៉ង់ កាលពីថ្ងៃទី 19 កញ្ញា ឧត្តមសេនីយ៍ Mark Milley នាយអគ្គសេនាធិការចម្រុះសហរដ្ឋអាមេរិក បានអះអាងថា កងទ័ពអ៊ុយក្រែនបន្តសម្រេចបានគោលដៅក្នុងល្បឿនយឺត ប៉ុន្តែមានស្ថិរភាព នៅពេលរុញច្រានកងកម្លាំងរុស្ស៊ីចេញពីតំបន់កំពុងគ្រប់គ្រង។
«មកដល់ពេលនេះ អ៊ុយក្រែនរំដោះបានជាង 54% នៃទឹកដីរបស់ខ្លួនដែលរុស្ស៊ីគ្រប់គ្រង និងបន្តរក្សាភាពម្ចាស់ការក្នុងយុទ្ធសាស្ត្រ» ឧត្ដមសេនីយ៍ Milley ឱ្យដឹងដូច្នេះ។
Dave Butler អ្នកនាំពាក្យរបស់លោក Milley ក្រោយមកបានបកស្រាយថា តួលេខ 54% គឺទាក់ទងនឹងតំបន់នានាដែលអ៊ុយក្រែនរំដោះបាន រាប់ចាប់តាំងពីរុស្ស៊ីបានបើកយុទ្ធនាការយោធានៅអ៊ុយក្រែនកាលពីខែកុម្ភៈ 2022។
ការអះអាងរបស់លោក Milley ត្រូវបានលើកឡើងក្នុងពេលតំណាងយោធាជាង 50 ប្រទេស ដែលស្ថិតក្នុងក្រុមទំនាក់ទំនងការពារជាតិអ៊ុយក្រែន ជួបប្រជុំនៅប្រទេសអាល្លឺម៉ង់ដើម្បីពិភាក្សាអំពីការជួយគាំទ្រដល់ទីក្រុងកៀវ។
សហរដ្ឋអាម៉េរិកគឺជាភាគីផ្ដល់ជំនួយយោធាដល់អ៊ុយក្រែនច្រើនជាងគេ ដោយបានសន្យាថា ការផ្ដល់ជំនួយនេះនឹងមានរហូតដល់ 43.7 ពាន់លានដុល្លារអាម៉េរិក។ ដំបូងឡើយ អាម៉េរិកផ្ដល់អាវុធធុនស្រាល ហើយបន្ទាប់មកក៏ផ្ដល់កាំជ្រួចហ្វូង HIMARS, ប្រព័ន្ធមីស៊ីលការពារដែនអាកាស Patriot, រថក្រោះធុនធ្ងន់ M2 Bradley, រថក្រោះ M1 Abrams ហើយថ្មីៗនេះក៏បានសន្យាថា នឹងបណ្ដុះបណ្ដាលពីឡុត F-16 ដល់អ៊ុយក្រែនទៀតផង៕
September 20, 2023
អបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ជូនដល់កាកបាទក្រហមកម្ពុជា សាខាខេត្តពោធិ៍សាត់
[ភ្នំពេញ – ថ្ងៃទី ១៣ ខែកក្កដា ឆ្នាំ២០២៣] ក្រុមហ៊ុន RMA (Cambodia) PLC ដែលជាក្រុមហ៊ុននាំចូល និងចែកចាយផ្តាច់មុខរថយន្ត Ford ក្នុងទីផ្សារប្រទេសកម្ពុជាបានប្រារព្ធពិធីប្រគល់-ទទួលអំណោយរថយន្តគិលានសង្គ្រោះចំនួន ២ គ្រឿង ជូនទៅដល់កាកបាទក្រហមកម្ពុជា សាខាខេត្តពោធិ៍សាត់ ដែលកម្មវិធីនេះត្រូវបានប្រារព្ធឡើង ក្រោមអធិបតីភាពរបស់ ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា និងលោកអភិបាលនៃគណៈអភិបាលខេត្តពោធិ៍សាត់ ព្រមទាំងថ្នាក់ដឹកនាំក្រុមហ៊ុន Ford Motor Company ថ្នាក់ដឹកនាំក្រុមហ៊ុន RMA Group និងក្រុមហ៊ុន RMA (Cambodia) PLC រួមទាំងភ្ញៀវកិត្តិយសជាតិ និងអន្តរជាតិប្រមាណជាង ២០០ នាក់។ កម្មវិធីនេះបានប្រារព្ធឡើងនៅក្នុងបរិវេនរោងចក្រដំឡើងរថយន្ត Ford ក្នុងភូមិសារវ័ន ឃុំស្នាអន្សារ ស្រុកក្រគរ ខេត្តពោធិ៍សាត់ នៅថ្ងៃទី ១១ ខែកក្កដា ឆ្នាំ ២០២៣ ។
ក្នុងឱកាសនៃពីធីអបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ចំនួន ២ គ្រឿង ជូនដល់កាកបាទក្រហមកម្ពុជា សាខាខេត្តពោធិ៍សាត់ លោក ងន សាំង អគ្គនាយកក្រុមហ៊ុន RMA (Cambodia) PLC បានមានប្រសាសន៍ថា៖ “ យើងខ្ញុំមានមោទភាពជាពន់ពេកដែលទទួលបានសេចក្ដីទុកចិត្តពីក្រុមហ៊ុន FORD MOTOR COMPANY ក្នុងការដំឡើងរថយន្ត FORD RANGER និង FORD EVEREST ជំនាន់ថ្មីនៅ លើទឹកដីនៃព្រះរាជាណាចក្រកម្ពុជា ស្របតាមស្តង់ដាររបស់ក្រុមហ៊ុន FORD ។ យើងខ្ញុំជឿជាក់ថា ការបោះជំហានវិនិយោគក្នុងវិស័យយានយន្តរបស់ក្រុមហ៊ុនយើងខ្ញុំ ចូលរួមចំណែកយ៉ាងសំខាន់ ក្នុងការអភិវឌ្ឍវិស័យឧសហ្សាកម្មយានយន្តនៅកម្ពុជា និងជាសក្ខីភាពនៃទំនុកចិត្តលើកិច្ចខិតខំប្រឹង ប្រែងរបស់រដ្ឋាភិបាលក្នុងការធ្វើឱ្យប្រសើរឡើង នូវបរិយាកាសធុរកិច្ច និងវិនិយោគ។ វត្តមានរបស់ រោងចក្រយើងខ្ញុំក៏បានចូលរួមចំណែកការកាត់បន្ថយការធ្វើចំណាកស្រុកទៅធ្វើការនៅក្រៅប្រទេស របស់ប្រជាពលរដ្ឋ និងលើកកម្ពស់សេដ្ឋកិច្ចក្នុងតំបន់តាមរយៈការជំរុញសន្ទុះអាជីវកម្មសហគ្រាស ធុនតូច និងមធ្យម ការបង្កើតឱកាសការងារដោយផ្ទាល់និងដោយប្រយោល ក៏ដូចជាការអភិវឌ្ឍន៍ ធនធានមនុស្សនៅក្នុងទឹកដី ខេត្តពោធិ៍សាត់នេះផ្ទាល់ផងដែរ។ ”
មិនតែប៉ុណ្ណោះ លោកក៏បានបន្ថែមទៀតថា៖ “ ក្រុមហ៊ុនយើងខ្ញុំនឹងបន្តប្តេជ្ញាគាំទ្រ និង ជំរុញវិស័យឧស្សាហកម្មយានយន្តនៅកម្ពុជា ដើម្បីឱ្យកម្ពុជា ផ្លាស់ប្ដូរមុខមាត់ថ្មី ពីប្រទេសដែលដំឡើងរថយន្ត ទៅជាប្រទេសដែលផលិតរថយន្ត ក្នុងពេលអនាគត។ ក្រុមហ៊ុននឹងពង្រីកការវិនិយោគគម្រោងដំឡើងរថយន្ត Ford ដោយបង្កើនការនាំចូលនៃចំនួន គ្រឿងបង្គុំច្រើនជាងមុន បង្កើនចំនួនការងារក្នុងស្រុក ជំរុញការប្រើប្រាស់ធាតុផ្សំក្នុងស្រុក និងបង្កើន ដើមទុនវិនិយោគបន្ថែមទៀត។ យើងខ្ញុំជឿជាក់ថា ការវិនិយោគនេះនឹងបន្តផ្តល់អត្ថប្រយោជន៍ជាច្រើនបន្ថែមទៀតជូនប្រទេសកម្ពុជា ជាពិសេសការអភិវឌ្ឍន៍ខ្សែសង្វាក់ផ្គត់ផ្គង់ និងធ្វើឱ្យប្រសើរ ឡើងនូវខ្សែចង្វាក់ដែលគាំទ្រគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។ ការវិនិយោគនេះ នឹងនាំមកនូវផលិតផលថ្មី បច្ចេកវិទ្យាថ្មី ដើម្បីផ្គត់ ផ្គង់តម្រូវការប្រើប្រាស់រថយន្តថ្មីក្នុងស្រុក ជាមួយនឹងមោទភាពផលិតកម្មក្នុងស្រុក រោងចក្រ ដំឡើងរថយន្ត Ford នឹងបន្តទាក់ទាញវិនិយោគិនផ្សេងៗជាច្រើនទៀតមកវិនិយោគនៅកម្ពុជា ជា ពិសេស អ្នកវិនិយោគដែល ពាក់ព័ន្ធនឹងការផលិត និងដំឡើងរថយន្ត ដូចជា៖ សំបកកង់ កង់ឡាន ខ្សែភ្លើងឡាន អាគុយឡាន និងអាជីវកម្មផ្សេងៗទៀត។”

ឆ្លៀតក្នុងឱកាសនេះដែរ លោកស្រី Kay Hart ប្រធានគ្រប់គ្រងទីផ្សារអន្តរជាតិនៃក្រុមហ៊ុន Ford Motor Company បានមានប្រសាសន៍ថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នេះ បានបំពាក់មកជាមួយនូវបច្ចេកវិទ្យា និងប្រព័ន្ធសុវត្ថិភាពទំនើបជំនាន់ចុងក្រោយដែលធ្វើឱ្យរថយន្តនេះក្លាយជារថយន្តមួយដែលមានលក្ខណៈ ធន់ រឹងមាំ និងមានសមត្ថភាពក្នុងការចល័ត និងដឹកជញ្ជូនអ្នកជំងឺដោយសុវត្ថិភាព។ ”
លោកស្រីក៏បានបន្តទៀតថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នឹងចូលរួមចំណែកយ៉ាងសំខាន់សម្រាប់កាកបាទក្រហមកម្ពុជាក្នុងខេត្តពោធិ៍សាត់ ក្នុងការគាំពារ សង្គ្រោះបន្ទាន់ និងជាជំនួយការដ៏សំខាន់ក្នុងការជួយដល់សកម្មភាពសប្បុរសធម៌ផ្សេងៗដល់ប្រជាពលរដ្ឋ និងអ្នកជំងឺដើម្បីទទួលបាននូវសេវាកម្មសង្គ្រោះបន្ទាន់មួយដែលមាន គុណភាព សុវត្ថិភាព និងប្រសិទ្ធភាព។ ”
ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា បានមានប្រសាសន៍ថា៖ “ ការសាងសង់រោងចក្រដំឡើងរថយន្ត Ford ក្នុងខេត្តពោធិ៍សាត់ គឺជាសក្ខីភាពមួយដែលបានបង្ហាញពីទំនុកចិត្តរបស់ក្រុមហ៊ុន RMA Cambodia មកលើរាជរដ្ឋាភិបាលកម្ពុជា ហើយការផ្តល់ជូននូវរថយន្តគិលានសង្គ្រោះ ២ គ្រឿងក្នុងថ្ងៃនេះនឹងជាការចូលរួមចំណែកដ៏សំខាន់មួយក្នុងការពង្រឹងសមត្ថភាពមូលដ្ឋានសុខាភិបាលបន្ថែមទៀត ក្នុងការឆ្លើយតបទៅនឹងតម្រូវការសេវាថែទាំសុខភាពអោយកាន់តែមានគុណភាព ប្រសិទ្ធភាព និងសុវត្ថិភាព។ ភាពជាដៃគូរវាង RMA Cambodia និងវិទ្យាស្ថានបច្ចេកទេសក្នុងស្រុករបស់យើង បានដើរតួរនាទីយ៉ាងសំខាន់ក្នុងការលើកកម្ពស់ធនធានមនុស្ស តាមរយៈការបង្កើតកម្មវិធីបណ្តុះបណ្តាលដោយផ្ទាល់ពីអ្នកជំនាញដែលគ្រឹះមួយដ៏សំខាន់សម្រាប់យុវជន ក៏ដូចជាយុវនារីក្នុងការត្រៀមខ្លួនរួចជាស្រេចសម្រាប់ភាពជោគជ័យនាពេលខាងមុខ។ ”
គួរបញ្ជាក់ផងដែរថា ក្រុមហ៊ុន RMA (CAMBODIA) PLC ជាក្រុមហ៊ុនដំបូងគេបំផុត ដែលទទួលបានការទទួលស្គាល់ពី វិទ្យាស្ថានស្ដង់ដារកម្ពុជា នៃ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងនាមជាអ្នក អនុវត្តស្តង់ដារសុវត្ថិភាពយានយន្ត និងស្តង់ដារសុវត្ថិភាពគ្រឿងបង្គុំយានយន្តបានខ្ពស់បំផុត។ ក្នុងឆ្នាំ ២០២០ ក្រុមហ៊ុន RMA (CAMBODIA) PLC បានចុះបញ្ជីលក់មូលបត្រ បំណុលចំនួន ៨០ ពាន់លានរៀល ដែលស្មើនឹង ២០ លានដុល្លារអាមេរិក ក្នុងផ្សារមូលបត្រកម្ពុជា ហើយក្លាយជាក្រុមហ៊ុនមិនមែនស្ថាប័នហិរញ្ញវត្ថុដែលបានបោះផ្សាយមូលបត្របំណុលដំបូងគេបង្អស់នៅប្រទេសកម្ពុជា។ ការបោះផ្សាយមូលបត្របំណុលនេះ បង្ហាញពីកិច្ចខិតខំប្រឹងប្រែងរបស់ក្រុមហ៊ុនយើងខ្ញុំក្នុងការលើកកម្ពស់ទីផ្សារមូលបត្រកម្ពុជា និងចូលរួមចំណែកអភិវឌ្ឍទីផ្សារហិរញ្ញវត្ថុនៅប្រទេសកម្ពុជា។
តាមរយៈកំណើនសេដ្ឋកិច្ច និងកំរិត GDP របស់ប្រជាជនកម្ពុជាកើនឡើងខ្ពស់ជាបន្តបន្ទាប់ បានធ្វើឱ្យប្រជាជនកម្ពុជាងាកមកប្រើប្រាស់រថយន្តថ្មីមានការកើនឡើងជាលំដាប់។ ក្នុងនោះការប្រើប្រាស់ រថយន្តថ្មីម៉ាក FORD មានកំណើនកាន់តែច្រើនឡើង និងបានក្លាយជាជម្រើសឈានមុខរបស់អតិថិជននៅកម្ពុជា។ ដូច្នេះ ក្រុមហ៊ុនបានសម្រេចចិត្តបង្កើតរោងចក្រដំឡើងរថយន្ត FORD ដែលទទួលបានសិទ្ធិពេញលេញក្នុងការផ្គុំ និងដំឡើងរថយន្តពីក្រុមហ៊ុនម្ចាស់ដើម FORD MOTOR COMPANY។ រោងចក្រនេះ ត្រូវបានសាងសង់ឡើងនៅលើផ្ទៃដីសរុបប្រមាណជាង ៥ ហិកតា ស្ថិតក្នុងភូមិសារវ័ន ឃុំស្នាអន្សា ស្រុកក្រគរ ខេត្តពោធិ៍សាត់ ជាមួយនឹងទុនវិនិយោគចំនួន ២១ លានដុល្លារសហរដ្ឋអាមេរិក ដែលអាចបង្កើតការងារជំនាញបានជាង ៥០០ កន្លែង និងមានសមត្ថភាពអាចដំឡើងរថយន្តបានចំនួនប្រមាណ ៩,០០០ គ្រឿងក្នុងមួយឆ្នាំ។
រហូតមកដល់ពេលនេះ ក្រុមហ៊ុនបានដំឡើងរថយន្ត Ford Ranger Wildtrak និងរថយន្ត Ford Everest បានចំនួន ៣,០០០ គ្រឿងដើម្បីបម្រើតម្រូវការទីផ្សារក្នុងស្រុក។ ក្រុមហ៊ុនបន្តសហការ ជាមួយនឹងវិទ្យាស្ថានពហុបច្ចេកទេសខេត្តពោធិ៍សាត់ក្នុងការបណ្តុះបណ្តាលអភិវឌ្ឍជំនាញបច្ចេកទេសដល់បុគ្គលិកក្រុមហ៊ុនដើម្បីធានាឱ្យបាននូវធនធានមនុស្សប្រកបដោយគុណភាព។ ថ្មីៗនេះ ក្រុមហ៊ុនបានបញ្ជូនបុគ្គលិកទៅប្រទេស Australia ដើម្បីសិក្សាអំពីបច្ចេកវិទ្យាដំឡើងរថយន្ត ក្នុងគោលបំណងបង្កើនកម្រិតបច្ចេកទេសបុគ្គលិកក៏ដូចជាពាំនាំចំណេះដឹងថ្មី និង បច្ចេកវិទ្យាថ្មីមកប្រទេសកម្ពុជា។ ដើម្បីបន្តចូលរួមលើកកម្ពស់វិស័យយានយន្ត ក្រុមហ៊ុននឹងបង្កើតមជ្ឈមណ្ឌលអប់រំបណ្ដុះបណ្ដាលបច្ចេកទេស និងវិជ្ជាជីវៈដើម្បីផ្ដល់ឱកាសឱ្យប្រជាពលរដ្ឋកម្ពុជាទទួលបានការបណ្តុះបណ្តាលជំនាញបច្ចេកទេសប្រកបដោយគុណភាពដើម្បីចូលរួមចំណែកអភិវឌ្ឍធនធាន មនុស្សនៅកម្ពុជាស្របតាមគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។

July 14, 2023
អាមេរិក ត្រូវការបុគ្គលិកផ្នែកសំណង់ 1 លាននាក់ ៖ ប្រាក់ខែខ្ពស់ តែពិបាករកកម្មករ
ការងាររាប់លានកន្លែងកំពុងរង់ចាំបុគ្គលិក ប៉ុន្តែ បែរជាខ្វះអ្នកមកដាក់ពាក្យធ្វើការ នោះគឺជាសេដ្ឋកិច្ចថ្មីនៅ សហរដ្ឋអាមេរិក នៅពេលដែលជីវភាពបានត្រលប់មករកសភាពដើមបន្តិចម្ដងៗ ក្រោយការវាយប្រហាររបស់វីរុស COVID-19។
Matthew Messer ជញ្ជូនផ្ទាំងសូឡានៅលើដំបូលផ្ទះមួយកន្លែងរបស់អតិថិជន នៅឯ Long Island នៃទីក្រុង New York ក្រោមកំដៅថ្ងៃ 38 អង្សា ក្នុងខែមិថុនា។ Messer គឺជាថៅកែនៃក្រុមហ៊ុន New York Solar Maintenance (ជំនាញជួសជុលផ្ទាំងសូឡា) ប៉ុន្តែ បច្ចុប្បន្ន គាត់ត្រូវចេញទៅធ្វើការជាមួយក្រុមបច្ចេកទេសរបស់ខ្លួនជារៀងរាល់ថ្ងៃ នៅពេលអាជីវកម្មចាប់ផ្ដើមកក្រើនជាថ្មី។
ក្រោយរលក COVID-19 តម្រូវការកម្លាំងពលកម្ម កើនឡើងឆាប់រហ័ស
«នេះមិនមែនជាវិធីល្អបំផុតក្នុងការប្រើប្រាស់ពេលវេលារបស់ខ្ញុំ។ ប៉ុន្តែ នោះគឺជាអ្វីដែលចាំបាច់ត្រូវធ្វើ» លោក Messer និយាយអំពីថ្ងៃដែលគាត់ត្រូវធ្វើការនៅលើដំបូលផ្ទះ។ នេះក៏ព្រោះតែម្ចាស់អាជីវកម្មរូបនេះ រកបុគ្គលិកមិនបាន។ ក្រុមហ៊ុនរបស់លោក ជួលបុគ្គលិកចំនួន 3 កម្រិត ក្នុងនោះក៏មានផ្នែកបច្ចេកទេសផងដែរ ប៉ុន្តែ ក្រុមហ៊ុនកំពុងប្រឈមនឹងបញ្ហារួមនៅក្នុងវិស័យសំណង់ នោះគឺបញ្ហាខ្វះបុគ្គលិក ដោយសារតែតម្រូវការរើសបុគ្គលិកក្នុងវិស័យនេះ កំពុងកក្រើកឡើងវិញ បន្ទាប់ពីការវាយប្រហាររបស់ COVID-19។
ការងាររាប់លានកន្លែងកំពុងរង់ចាំបុគ្គលិក ប៉ុន្តែ បែរជាខ្វះអ្នកមកដាក់ពាក្យធ្វើការទៅវិញ។ នោះគឺជាសេដ្ឋកិច្ចថ្មីនៅ សហរដ្ឋអាមេរិក នៅពេលដែលជីវភាពបានត្រលប់មករកសភាពដើមបន្តិចម្ដង។
តម្រូវការផ្នែកសាងសង់ និងជួសជុលផ្ទះ កំពុងកើនឡើង នៅពេលទីផ្សារលំនៅឋាន ងើបឡើងវិញ ចំណែកមនុស្សជាច្រើន ត្រូវធ្វើការនៅផ្ទះ។ យោងតាមសមាគមកម្មករនិងអ្នកម៉ៅការសំណង់ របស់ សហរដ្ឋអាមេរិក «ក្នុងវិស័យមួយដែលធ្លាប់តែខ្វះកម្លាំងពលកម្មតាំងពីមុន COVID-19 បណ្ដាក្រុមហ៊ុនសំណង់ នឹងត្រូវការបុគ្គលិកចំនួន 430,000 នាក់ ក្នុងឆ្នាំនេះ និង 1 លាននាក់ទៀតនៅក្នុងរយៈពេល 2 ឆ្នាំខាងមុខ ដើម្បីឆ្លើយតបនឹងតម្រូវការទីផ្សារការងារ»។
ដំណោះស្រាយ៖ ផ្ដល់ប្រាក់ខែច្រើនជាងមុន ដើម្បីទាក់ទាញបុគ្គលិក
នៅពេល Matthew Messer ចាប់ផ្ដើមដឹងថា មានបញ្ហាខ្វះបុគ្គលិក គាត់ក៏យល់ថា ខ្លួនត្រូវតែប្រញាប់ដំឡើងឈ្នួល ដើម្បីរក្សាកម្លាំងប្រកួតប្រជែង។ បុគ្គលិកដែលនៅសេះសល់របស់លោក កំពុងត្រូវក្រុមហ៊ុនផ្សេងៗ តាម «ចែចង់»។ ក្នុងអំឡុង 4 ខែកន្លង លោក Messer បានដំឡើងប្រាក់ឈ្នួលរហូតដល់ 40% ធៀបនឹងប្រាក់ឈ្នួលមុននេះ។
Messer និយាយថា៖ «ខ្ញុំឱ្យប្រាក់ឈ្នួលចាប់ពី 18 ដល់ 22 ដុល្លារ ក្នុង 1 ម៉ោង ប៉ុន្តែ ពុំមានអ្នកណាមកដាក់ពាក្យធ្វើការទាល់តែសោះ។ ខ្ញុំក៏ដំឡើងថ្លៃឈ្នួលដល់ 23 ដុល្លារ តែ នៅតែមិនអាចរកបានបុគ្គលិក។ ខ្ញុំបន្តដំឡើងរហូតដល់ 25 ដុល្លារ ទើបឃើញមានអ្នកមកដាក់ពាក្យខ្លះ។ នេះគឺជាការដំឡើងថ្លៃឈ្នួលខ្ពស់គួរសម ប៉ុន្តែ ដើម្បីអាជីវកម្មរីកចម្រើន ខ្ញុំចាំបាច់ត្រូវការជ្រើសរើសបុគ្គលិកឱ្យបាន»។
យោងតាមនាយកដ្ឋានស្ថិតិកម្លាំងពលកម្មរបស់ សហរដ្ឋអាមេរិក បុគ្គលិកនៅភោជនីយដ្ឋានម្នាក់ អាចរកប្រាក់បាន 18.23 ដុល្លារ/ម៉ោង ខណៈដែលបុគ្គលិកសំណង់ម្នាក់ អាចរកបាន 32.86 ដុល្លារ/ម៉ោង៕
ប្រភព៖ CNN
ប្រែសម្រួល៖ បុត្រា
July 13, 2021
ការផ្ទេរវ៉ាលីគ្រាប់បែកនុយក្លេអែរពី Trump ទៅឱ្យ Biden ត្រូវធ្វើឡើងយ៉ាងដូចម្ដេច?
Trump និង Biden នឹងកាន់កាប់វ៉ាលីគ្រាប់បែកនុយក្លែចំនួនពីរផ្សេងគ្នា និងមានលេខកូដសម្រាប់ធ្វើសកម្មភាពដោយឡែក ក្នុងនោះ លេខកូដរបស់ប្រធានាធិបតីជាប់ឆ្នោត Joe Biden នឹងដំណើរការនៅវេលាម៉ោង 12 ថ្ងៃទី 20 មករា ស្របពេលដែលលេខកូដរបស់លោក Trump ត្រូវអស់សុពលភាព។
ការដែលប្រធានាធិបតីអាមេរិក Donald Trump មិនចូលរួមក្នុងពិធីស្បថចូលកាន់តំណែងរបស់លោក Joe Biden នឹងមិនប៉ះពាល់ដល់ពិធីនេះ ប៉ុន្តែនឹងធ្វើឱ្យមានការផ្លាស់ប្ដូរដ៏សំខាន់មួយនៅក្នុងកាលៈទេសៈនេះ នោះគឺដំណើរការនៃការផ្ទេរ «គ្រាប់បាល់នុយក្លេអែ/nuclear football» ជាពាក្យដែលត្រូវបានប្រើសំដៅលើវ៉ាលីដែលមានផ្ទុកលេខកូដសម្រាប់ការចេញបញ្ជាឱ្យវាយប្រហារដោយគ្រាប់បែកនុយក្លេអែរ ដែលតែងតែត្រូវបានយកទៅតាមប្រធានាធិបតីអាមេរិក។
យោងតាមគោលការណ៍ វ៉ាលីពណ៌ខ្មៅនេះនឹងត្រូវបានជំនួយការផ្នែកយោធាម្នាក់ យកតាមខ្លួនដើម្បីអមដំណើរប្រធានាធិបតីនៅគ្រប់ទីកន្លែង និងគ្រប់ពេលវេលា រហូតដល់ប្រធានាធិបតីត្រូវផុតអាណត្តិនៅម៉ោង 12 ថ្ងៃត្រង់នៃថ្ងៃទី 20 មករា (ម៉ោងនៅអាមេរិក)។ ប្រការនេះមានន័យថា ជំនួយការយោធារួមនឹងវ៉ាលីនុយក្លេអែរនឹងត្រូវឡើងយន្តហោះរបស់កងទ័ព នាំលោក Trump ចាកចេញពីរដ្ឋធានីវ៉ាស៊ីងតោន ទៅកាន់ Florida នៅព្រឹកថ្ងៃទី 20 មករា ខណៈដែលលោក Biden មិនទាន់ដល់ពេលឡើងកាន់អំណាច។
កន្លងមក នៅក្នុងពិធីស្បថចូលកាន់តំណែង អ្នកជំនួយការជាន់ខ្ពស់ផ្នែកយោធា នឹងនាំយកវ៉ាលីនុយក្លេអែរទៅតាមប្រធានាធិបតីជិតផុតអាណត្តិ ដើម្បីប្រគល់អំណាចនេះជូនប្រធានាធិបតីថ្មី នៅក្នុងអគារសភាជាតិនាទីក្រុងវ៉ាស៊ីងតោន។
ដំណើរការនៃផ្ទេរវ៉ាលីនុយក្លេអែរដែល «មិនមានចន្លោះប្រហោង» នេះគឺដើម្បីទប់ស្កាត់មិនឱ្យសត្រូវរបស់សហរដ្ឋអាមេរិក ឆ្លៀតយកឱកាសដ៏រសើបនេះ ធ្វើការវាយប្រហារដោយគ្រាប់បែកនុយក្លេអែរប្រឆាំងនឹងអាមេរិក។
ច្បាប់រដ្ឋធម្មនុញអាមេរិកបានប្រគល់សិទ្ធិទាំងស្រុងក្នុងការប្រើប្រាស់គ្រាប់បែកនុយក្លេអែរ ទៅឱ្យប្រធានាធិបតី ដែលនេះក៏ជាពេលដែលវ៉ាលីនុយក្លេអែរត្រូវបានចាប់កំណើតដើម្បីធានាឱ្យបានប្រាកដថា អគ្គបញ្ជាការដ្ឋាននៃកងទ័ពសហរដ្ឋអាមេរិកអាចអនុវត្តទៅតាមការបញ្ជារបស់ប្រធានាធិបតីបានគ្រប់ពេល និងគ្រប់កាលៈទេសៈ។
ការដែលលោក Trump មិនចូលរួមពិធីស្បថចូលកាន់តំណែងរបស់លោក Biden នឹងនាំឱ្យសិទ្ធិប្រើប្រាស់អាវុធនុយក្លេអែរត្រូវផ្ទេរពីចម្ងាយជាលើកដំបូងក្នុងប្រវត្តិសាស្ត្រ ដែលនេះក៏ត្រូវការកិច្ចសហការយ៉ាងម៉ត់ចត់របស់ប្រព័ន្ធយោធា ទាក់ទងនឹង «គ្រាប់បាល់នុយក្លេអែរ» ក៏ដូចជាប្រព័ន្ធបញ្ជាក់អំពីបទបញ្ជាប្រើប្រាស់គ្រាប់បែកនុយក្លេអែរ មានរហ័សនាមថា «នំខូឃីស» ដែលមាននៅក្នុងវ៉ាលីទាំងពីរ។
Scott Sagan ជាសាស្ត្រាចារ្យម្នាក់នៅសាកលវិទ្យាល័យ Stanford និង Stephen Schwartz អ្នកស្រាវជ្រាវប្រចាំសារព័ត៌មាន BAS នៅសហរដ្ឋអាមេរិក យល់ថា ការដែល Trump មិនចូលរួមពិធីស្បថចូលកាន់តំណែងរបស់លោក Biden នឹងធ្វើឱ្យបញ្ហាមិនចាំបាច់មួយចំនួនកើតឡើង ហើយថានឹងមានការលំបាកច្រើនធៀបនឹងឆ្នាំមុន។ ប៉ុន្តែ អ្នកវិភាគខាងលើបានបញ្ជាក់ថា កងទ័ពអាមេរិកនៅតែមានវិធានការបម្រុងដើម្បីធានាថា ដំណើរការនៃការប្រគល់អំណាចប្រព្រឹត្តិដោយរលូន និងសុវត្ថិភាពបើទោះជាមានបញ្ហាអ្វីកើតឡើងក៏ដោយ។
Schwartz បានឱ្យដឹងថា៖ «មានគ្រាប់បាល់នុយក្លេអែរដូចគ្នាយ៉ាងតិចចាប់ពី 3-4 គ្រាប់។ 1 គ្រាប់តែងតែធ្វើដំណើរតាមប្រធានាធិបតី 1 គ្រាប់ទៀតសម្រាប់អនុប្រធានាធិបតី ចំណែក 1 គ្រាប់ផ្សេងទៀតគឺសម្រាប់អ្នកដែលនៅរស់រានមានជីវិតនៅក្នុងព្រឹត្តិការណ៍ធំៗដូចជា ពិធីទទួលតំណែងប្រធានាធិបតី ឬអ្នកអានសាររបស់ជាតិ»។ អ្នកវិភាគរូបនេះបន្ថែមថា ស្ថានភាពឆ្នាំនេះអាចបង្ខំឱ្យការិយាល័យយោធារបស់សេតវិមាន ត្រូវត្រៀមវ៉ាលីនុយក្លេអែរបម្រុងមួយទៀតសម្រាប់លោក Biden។
លោក Joe Biden និងភរិយា
នៅក្នុងវ៉ាលីនុយក្លេអែរនេះ មិនមានគ្រាប់ចុច ឬលេខកូដដើម្បីឱ្យប្រធានាធិបតីអាចបញ្ជាឱ្យធ្វើការវាយប្រហារដោយគ្រាប់បែកនុយក្លេអែរបានភ្លាមៗនោះទេ។ ក្នុងវ៉ាលីនេះមានទូរស័ព្ទមួយគ្រឿង កាត «នំខូឃីស» មួយបន្ទះដែលមានផ្ទុកលេខកូដសម្ងាត់ដែលអនុញ្ញាតឱ្យប្រធានាធិបតីចេញបញ្ជាឱ្យវាយប្រហារដោយអាវុធនុយក្លេអែរ និងបញ្ជីឈ្មោះគោលដៅដែលបានជ្រើសរើសពីមុនជាស្រេច។
Schwartz បញ្ជាក់ថា៖ «Trump នៅតែជាប្រធានាធិបតីអាមេរិករហូតដល់ម៉ោង 11 59នាទី និង 59 វិនាទី ថ្ងៃទី 20 ខែមករានេះ។ Trump ជាមនុស្សតែម្នាក់គត់ដែលមានសិទ្ធិចេញបញ្ជាឱ្យប្រើប្រាស់អាវុធនុយក្លេអែររបស់សហរដ្ឋអាមេរិក គិតត្រឹមអំឡុងពេលខាងលើ។ បើសិនជាជំនួយការផ្នែកយោធា នាំវ៉ាលីនុយក្លេអែរនេះអមដំណើរ Trump ទៅកាន់ Florida នោះជំនួយការរូបនេះនឹងត្រូវចាកចេញពី Trump នៅវេលាថ្ងៃត្រង់ និងនាំយកវ៉ាលីនោះមកកាន់វ៉ាស៊ីងតោន»។
នៅម៉ោង 12 ថ្ងៃទី 20 មករា Trump នឹងលែងមានសិទ្ធិក្នុងការធ្វើសង្គ្រាមនុយក្លេអែរ ហើយវ៉ាលីនុយក្លេអែរដែលអមដំណើរលោកក៏នឹងត្រូវអស់សុពលភាព។ ក្នុងករណី Trump ចេញបញ្ជាឱ្យវាយប្រហារដោយអាវុធនុយក្លេអែរនៅវេលាលើសពីម៉ោង 12 នោះបទបញ្ជានេះនឹងត្រូវបានចាត់ទុកថាខុសច្បាប់ ហើយក្រុមមន្ត្រីគ្រប់គ្រងអាវុធនុយក្លេអែរនឹងបដិសេធបទបញ្ជានេះ។
លោក Biden ទំនងជានឹងបានទទួល «នំខូឃីស» នៅព្រឹកថ្ងៃទី 20 មករា (ម៉ោងនៅអាមេរិក) ក្នុងគ្រាដែលលោក និងអនុប្រធានាធិបតីជាប់ឆ្នោត Kamala Harris មានកិច្ចប្រជុំសម្ងាត់មួយដើម្បីទទួលការណែនាំអំពីវិធីប្រើប្រាស់វ៉ាលីនុយក្លេអែរ។ ក៏ប៉ុន្តែ ប្រព័ន្ធលេខកូដសម្ងាត់របស់លោក Biden នឹងមិនទាន់មានសុពលភាពនៅឡើយ រហូតដល់ម៉ោង 12 និង 00 នាទី ក្នុងអំឡុងពេលដែលលេខកូដរបស់លោក Trump អស់សុពលភាព៕
ប្រភព៖ CNN
January 20, 2021
ការចិញ្ចឹម និងថែទាំដែលកាចសាហាវ នឹងធ្វើឱ្យកុមារធំឡើងក្លាយជាមនុស្សឈឺច្រើន
យើងធ្លាប់បានឮតែពាក្យថា កុមារដែលត្រូវបានចិញ្ចឹមមើលថែយ៉ាងយកចិត្តទុកដាក់ ធំឡើងនឹងក្លាយជាមនុស្សល្អនៅថ្ងៃខាងមុខ តែលទ្ធផលនៃការវិភាគថ្មីៗបំផុតរបស់មហាវិទ្យាល័យ UCLA សហរដ្ឋអាមេរិក ធ្វើយើងអាចបន្ថែមពាក្យចូលទៅទៀតថា ការមើលថែទាំ និងការផ្ដល់នូវសេចក្តីស្រឡាញ់ដល់កុមារយ៉ាងល្អល្អះ នឹងធ្វើឱ្យគេធំឡើងក្លាយជាមនុស្សដែលមានសុខភាពល្អ និងផ្ទុយទៅវិញ កុមារដែលត្រូវបានចិញ្ចឹមមើលថែបែបខ្វះភាពកក់ក្តៅ និងទទួលរងដោយអំពើហិង្សា នឹងក្លាយជាមនុស្សធំដែលឈឺច្រើន ថែមទាំងប្រថុយនឹងការកើតជម្ងឺបេះដូង និងសរសៃឈាមច្រើនជាងអ្នកផ្សេងទៀតផង។
ការស្រាវជ្រាវវិភាគបានធ្វើឡើងក្នុងរូបបែបនៃការសាកសួរពីអ្នកចូលរួមចំនួន 756នាក់ក្នុងប្រធានបទរឿងភាពប្រថុយប្រថានក្នុងការកើតជម្ងឺបេះដូងខ្វះឈាមនៅក្នុងវ័យកំលោះ-ក្រមុំ ដោយវាយតម្លៃតាមរយ:សញ្ញាដែលបញ្ជាក់ពីសុខភាពទូទាំងរាងកាយ 18ប្រការដែលមានជាអាទិ សម្ពាធឈាម កម្រិតកូលេស្តេរ៉ូលនៅក្នុងសរសៃឈាម ទំហំចង្កេះ និងទម្ងន់ខ្លួនជាដើម។ បន្ទាប់ពីនោះទើបយកព័ត៌មានដែលទទួលបានមកសរុបលទ្ធផលថា តើមនុស្សម្នាក់ៗមានភាពប្រថុយប្រថានដល់ការវិវឌ្ឍឆ្ពោះទៅរកជំងឺបេះដូងខ្វះឈាមខ្លាំងប៉ុនណា?។
ប៉ុន្តែក្រៅពីការវាយតម្លៃតាមបែបបទសុខភាពទាំងនោះហើយ អ្នកធ្វើការស្រាវជ្រាវនៅបានរកឃើញទៀតថា ប្រវត្តិនៃការចិញ្ចឹមមើលថែដែលបានមកពីការសាកសួរអ្នកចូលរួមធ្វើការស្រាវជ្រាវវិភាគទាំងនោះ នៅបានហុចលទ្ធផលដ៏មានអត្ថន័យសំខាន់ដល់សុខភាពមនុស្សម្នាក់ៗទៀតផង នោះគឺមនុស្សដែលធំឡើងជាមួយនឹងការចិញ្ចឹមថែទាំបែបឱ្យតែរួចៗពីដៃតាំងពីវ័យទារកមកនោះ គឺជាក្រុមមនុស្សដែលមានកម្រិតសុខភាពអន់ខ្សោយ ដូចជាទំហំចង្កេះក្រាស់ធំ មានកូលេស្តេរ៉ូលច្រើន សម្ពាធឈាមខ្ពស់-ល- ខុសប្លែកពីក្រុមមនុស្សដែលធំឡើងនៅក្នុងក្រុមគ្រួសារដែលមើលថែចិញ្ចឹមបីបាច់យ៉ាងយកចិត្តទុកដាក់ យ៉ាងគួរឱ្យចាប់អារម្មណ៍។

ដូច្នេះហើយទើបយើងអាចមើលឃើញបានថា បទពិសោធនៃការដែលត្រូវបានចិញ្ចឹមនៅក្នុងវ័យកុមារ មានផលប៉ះពាល់ដល់ការធ្វើការងាររបស់ប្រព័ន្ធផ្សេងៗទូទាំងរាងកាយ។ ក្រុមមនុស្សដែលត្រូវបានចិញ្ចឹមឱ្យធំឡើងយ៉ាងខ្ជីខ្ជា គ្មានការយកចិត្តទុកដាក់ ឬអាចដល់ថ្នាក់ប្រើអំពើហិង្សា មិនថាតែខាងផ្លូវកាយ និងផ្លូវចិត្តផងនោះ នឹងធ្វើឱ្យការធ្វើការងាររបស់ប្រព័ន្ធផ្សេងៗខុសពីធម្មតា ហុចផលឱ្យពេលធំឡើងក្លាយជាមនុស្សឈឺច្រើន ឬឆាប់ធ្លាក់ខ្លួនឈឺដោយងាយ និងមានអ្នកខ្លះចូលក្នុងលក្ខណៈប្រថុយប្រថាននឹងរោគបេះដូង និងសរសៃឈាមទៀតផង។ ខុសគ្នាស្រឡះពីក្រុមមនុស្សដែលត្រូវបានចិញ្ចឹមមើលថែទាំមកយ៉ាងល្អ បានទទួលភាពកក់ក្តៅពេញទំហឹង គឺច្រើនតែមានសុខភាពរឹងប៉ឹងល្អ មានប្រព័ន្ធស៊ាំនឹងជំងឺផ្សេងៗរឹងមាំល្អទៀតផង។
លោកស្រីវេជ្ជបណ្ឌិត ថេរេហ្សា ស៊ីមែន សាស្រ្តាចារ្យផ្នែកវិជ្ជាវេជ្ជសាស្រ្តមនុស្សចាស់ ដែលជាមនុស្សម្នាក់ក្នុងចំណោមអ្នកដឹកនាំការវិភាគស្រាវជ្រាវនេះ បានរៀបរាប់ថា លោកស្រីសង្ឃឹមថា លទ្ធផលនៃការស្រាវជ្រាវវិភាគដែលទទួលបានក្នុងគ្រានេះ នឹងជួយជំរុញឱ្យមនុស្សសង្កេតឃើញពីភាពពាក់ព័ន្ធគ្នារបស់បញ្ហាថា ការចិញ្ចឹមមើលថែទាំកូននៅក្នុងវ័យកុមារនឹងហុចផលដល់សុខភាពនៅក្នុងវ័យមនុស្សធំយ៉ាងដូចម្ដេចខ្លះ? និងមានការកែបញ្ហានេះយ៉ាងមានប្រសិទ្ធភាព។ ការជំរុញ និងបំផុសឱ្យឪពុកម្តាយ ឬអ្នកមើលថែទាំក្មេងបានដឹង បានយល់ពីការមើលថែ និងចិញ្ចឹមកុមារយ៉ាងត្រឹមត្រូវ ទាំងក្នុងរឿងការហូបចុក ការរស់នៅ សុខភាពផ្លូវកាយ និងផ្លូវចិត្ត រួមទាំងការបានទទួលនូវភាពកក់ក្តៅ ការមើលថែទាំយកចិត្តទុកដាក់យ៉ាងពេញទំហឹងនោះ វានឹងជួយកាត់បន្ថយបរិមាណមនុស្សធំដែលក្លាយជាអ្នកមានជំងឺមួយថ្ងៃកាត់មួយថ្ងៃកោរបានយ៉ាងងាយនាពេលអនាគត និងកាត់បន្ថយបញ្ហាពាក់ព័ន្ធនឹងការមើលថែទាំអ្នកជំងឺបេះដូង និងសរសៃឈាម ដែលជាជំងឺមួយក្នុងចំណោមជំងឺដ៏កាចសាហាវបានទៀតផង៕
December 3, 2020
វិធីបង្ហាត់កុមារឱ្យរៀនយល់ដឹងបានយ៉ាងចម្រើន និងបណ្ដុះគំនឹតយ៉ាងត្រឹមត្រូវដែលអាណាព្យាបាលចាំបាច់ត្រូវតែដឹង…
លោកសាស្រ្តចារ្យវេជ្ជបណ្ឌិត Filkenstein និងអ្នកស្រី Lisa filkenstein ជាអ្នកជំនាញការខាងការអប់រំកុមារមកពីសហរដ្ឋអាមេរិក ទាំង 2នាក់សុទ្ធតែជាអ្នកដែលមានបទពិសោធក្នុងការរៀបចំកម្មវិធីសិក្សារៀនសូត្រសម្រាប់កុមារជាង 30ឆ្នាំមកហើយនោះ បានផ្តល់នូវផ្នត់គំនឹតដល់លោកគ្រូ អ្នកគ្រូ និងអាណាព្យាបាលក្នុងរឿងការវិវឌ្ឍរបស់កុមារឆ្លាត ឬកុមារពូកែជាច្រើនចំណុចដូចខាងក្រោម ៖
អ្នកណាគឺ មនុស្សពូកែ? អ្នកណាគឺ ក្មេងឆ្លាត?
យើងគ្រប់គ្នាជាមនុស្សពូកែ ពូកែគ្រប់រូបបែប អ្នកខ្លះពូកែច្រៀង អ្នកខ្លះពូកែគូររូប ពូកែប្រដាល់ ពូកែទាត់បាល់ ពូកែគឹត ពូកែនិយាយ ពូកែរាំ ជាដើម-ល- អ្នកខ្លះពូកែច្រើនយ៉ាង អ្នកខ្លះពូកែរតែម្យ៉ាងៗ។ កុមារពូកែ ឬកុមារឆ្លាត ភាគច្រើនៗតែមានភាពចង់ដឹង ចង់ឃើញ មានការស្រមើស្រមៃ និងមានគំនឹតច្នៃប្រឌឹតខ្ពស់ និងថែមទាំងមានចំណាប់អារម្មណ៍ធំទូលាយ តែសាលារៀនជាច្រើនមិនសូវជួយជំរុញកុមារក្នុងរឿងនេះឡើយ។ អ្នកគ្រូច្រើនតែនិយាយថា “កុំសួរច្រើនណា អង្គុយឱ្យស្ងៀមៗ” កុមារទាំងនោះក៏អង្គុយសម្លឹងស្លឺចេញទៅក្រៅបង្អួច សម្លឹងមើលមេឃ មើលដើមឈើ អណ្តែតអណ្តូង។ ហើយអ្នកគ្រូនឹងនិយាយថា “កុមារបែបនេះមានបញ្ហា មិនតាំងចិត្តរៀន អារម្មណ៍រវើរវាយ មិនស្តាប់គ្រូបង្រៀន”។ នៅពេលគ្រូគិតថា មានបញ្ហា ក៏ធ្វើឱ្យមិនអាចសម្លឹងឃើញពីលក្ខណ:ផ្សេងទៀតច្រើនជាង “បញ្ហា” ឡើយ។ បើគ្រូគឹតថា មានបញ្ហា ក៏គួរតែរិះរកវិធីកែបញ្ហានេះយ៉ាងរីកចម្រើន យ៉ាងបណ្តុះគំនឹត ដែលវាជារឿងមួយពិបាកណាស់ តែក៏ជារឿងមួយដែលគួរឱ្យសាកល្បងដែរ បើគ្រូចង់ជួយកុមារៗទាំងនោះយ៉ាងពិតប្រាកដមែននោះ។
ធ្វើយ៉ាងណាទើបក្លាយជាការកែបញ្ហាយ៉ាងចម្រើន និងបណ្តុះគំនឹត
ក្នុងការកែបញ្ហាយ៉ាងចម្រើន និងបណ្តុះគំនឹតនេះ លោកអ្នកត្រូវបង្ហាត់ខួរក្បាលរបស់លោកអ្នកឱ្យគិត ហើយក្នុងការគិតកែបញ្ហាយ៉ាងចម្រើន និងបណ្តុះគំនឹតនោះ ចម្លើយដែលត្រឹមត្រូវ គឺមានច្រើនលើសពី1 ទៅទៀត។ នៅពេលជួបបញ្ហាជំហានដំបូង យើងត្រូវដឹងថា តើបញ្ហានោះគឺជាអ្វីពិតប្រាកដ?។
ជំហានបន្តទៅទៀតគឺ ការស្វែងរកធាតុពិត។ យើងត្រូវរកមើលថា តើយើងត្រូវស្វែងរកព័ត៌មានដោយវិធីណា? ពីនរណា? ចម្លើយដែលអាចទៅរួចគឺ ប្រភពនៃព័ត៌មានផ្សេងៗដែលអាចរកបាន គឺនៅក្នុងបណ្ណាល័យ សារព័ត៌មាន ទូរទស្សន៍ អ្នកជំនាញការ ឬព័ត៌មានពីបរទេស-ល- ដែលវានឹងជួយឱ្យយើងទទួលបាននូវផ្នត់គំនឹតល្អៗជាច្រើន។ ជំហានបន្តទៅទៀតក៏គឺ ការប្រមែប្រមូលព័ត៌មានដែលទទួលបាននោះ…គឺជាការប្រមូលផ្នត់គំនឹតទាំងអស់មកដោយមិនទាន់សម្រេចចិត្ត។
ជារឿងមួយដែលគួរឱ្យសង្កេតថា នៅក្នុងបន្ទប់រៀន ពេលមានកិច្ចការខ្លះដែលត្រូវឱ្យកូនសិស្សឡើងឆ្លើយ គ្រូមួយចំនួនពេលកូនសិស្សឆ្លើយហើយ គ្រូប្រាប់ថា ខុស! សិស្សឯទៀតនឹងសើចគឹលឡើងតែម្ដង។ ពេលនោះ ក្មេងម្នាក់នោះនឹងលែងហ៊ានឆ្លើយទៀតជាមិនខាន។ ក្នុងលក្ខណ:បែបនេះមិនមែនជាការបណ្តុះគំនឹតរបស់កុមារបែបចម្រើនឡើយ។
នៅពេលប្រមូលព័ត៌មានបានមកហើយ និងបានយល់ច្បាស់ពីបញ្ហាហើយ ជំហានបន្ទាប់ទៅទៀត គឺការរិះរកវិធី ឬគំនឹតល្អៗ ចម្រើនៗក្នុងការកែបញ្ហា ដូចជា នៅពេលយើងរួបរួមបញ្ហា ឬចំណុចខ្សោយនៅក្នុងរឿងណាមួយមកបានហើយ តើយើងនឹង
កែបញ្ហានេះរបៀបយ៉ាងម៉េច?។ គ្រូអាចបែងចែកកូនសិស្សជាក្រុមឱ្យធ្ចើការរួមគ្នា ដោយប្រមូលផ្តុំគំនឹតក្នុងការកែបញ្ហា។ បន្ទាប់ពីនោះ គឺជាការដំណើរការកែបញ្ហា និងសិក្សាពីលទ្ធផល រហូតដល់កែសម្រួលបាន។
រូបបែបនៃការរៀនយល់ដឹង
ជាទូទៅ មនុស្សយើងមានវិធីរៀនយល់ដឹងច្រើនបែប។ ការដែលយើងត្រូវរៀនយ៉ាងដូចម្តេចនោះ វាកើតចេញពីការដែលយើងយល់ដឹងបែបណា ។ លោកវេជ្ជបណ្ឌិត David Kolb បានធ្វើការសិក្សាពីការរៀនយល់ដឹងរបស់ខ្លួន ដោយវាយតម្លៃពីមេរៀនគ្រឹះដែលបានមកពីទ្រឹស្តីរបស់ John Dewey , Kurt lewin និង Jean Piaget ហើយសរុបបានរូបបែបរបស់អ្នករៀន(សិស្ស) ចេញជា 4បែបគឺ ៖
1 . អ្នកដែលប្រើប្រាស់អារម្មណ៍ (Feeler) បុគ្គលប្រភេទនេះនឹងទទួលយល់ដឹងតាមរយ:បទពិសោធដោយត្រង់ ដោយប្រើសតិសម្បជញ្ញៈ និងអារម្មណ៍ដែលបានមកពីការសង្កេត។ កុមារប្រភេទនេះនឹងរៀនសូត្របានល្អជាទីបំផុត នៅពេលមានការបញ្ចេញមតិ ការតវ៉ា ការបានស្តាប់ បានឮ និងការផ្លាស់ប្តូរគំនឹតយោបល់គ្នា។
2 . អ្នកគិតវិភាគ (Thinker) ជាអ្នករៀនយល់ដឹងតាមរយ:ការប្រើគំនឹត ត្រិះរិះពិចារណា រួចបង្កើតគំនឹតរួមបែប
ទ្រឹស្តី និងតាមរយ:ការសង្កេត។ កុមារប្រភេទនេះនឹងរៀនសូត្របានល្អបំផុតតាមរយ:ការស្តាប់ការបរិយាយ និងការសាកល្បងព័ត៌មានដោយខ្លួនឯង។
3 . អ្នកសម្រេចចិត្ត (Dicider) ជាអ្នកទទួលយល់ដឹងដោយអាស្រ័យការគឹត និងការសាកល្បងធ្វើអ្វីមួយ។ កុមារប្រភេទនេះ នឹងរៀនសូត្របានល្អ នៅពេលណាដែលមានការប្រត្តិបត្តិ(អនុវត្ត)។
4 . អ្នកគិតស្រាវជ្រាវ ច្នៃប្រឌិត (Imagination) ជាអ្នកដែលទទួលយល់ដឹងតាមរយ:បទពិសោធពិតដោយប្រើសតិសម្បជញ្ញៈ និងអារម្មណ៍ដែលបានទទួលពីការសាកល្បងយ៉ាងពិតប្រាកដ ហើយនិងការបានធ្វើដោយផ្ទាល់។ កុមារប្រភេទនេះនឹងរៀនយល់ដឹងបានល្អតាមរយ:វិធីបង្រៀនបែបសិក្សាដោយខ្លួនឯង។
យ៉ាងណាក៏ដោយ វាជាការណ៍មួយដែលលំបាកនឹងបែងចែកឱ្យច្បាស់យ៉ាងដាច់ខាតណាស់ថា តើអ្នកណាបែបណា? ។ កុមារក្នុងបែបទី1 និងទី4 មានលក្ខណ:ស្រដៀងគ្នា។ ដូចគ្នានឹងកុមារប្រភេទទី2 និងទី3 ដែរ ដូច្នេះទើបគ្រូៗចាំបាច់ត្រូវតែបង្រៀនកុមារដោយប្រើវិធីការបង្រៀនក្នុងរូបបែបផ្សេងៗយ៉ាងស្មើភាគគ្នា ដើម្បីផ្តល់ឱកាសដល់កុមារគ្រប់គ្នាបានរៀនយល់ដឹង និងបញ្ចេញសមត្ថភាពទៅតាមអ្វីដែលគេថ្នឹក លើកលែងតែគ្រូបានដឹងថា “ក្មេង” ដែលនៅក្រោមការគ្រប់គ្រងរបស់ខ្លួនជាក្មេងបែបណា ទើបត្រូវបង្រៀនឱ្យត្រូវនឹងលក្ខណៈការទទួលយល់ដឹងរបស់ក្មេងនោះឱ្យបានច្រើនបំផុត៕
November 25, 2020
ញ៉ាំបាយល្ងាចជុំគ្នា អាចធ្វើឲ្យកូនក្លាយជាក្មេងពូកែ
មិនគួរឲ្យជឿសោះ!!!
កូននឹងរៀនពូកែ ប្រើប្រាស់ភាសានិងសំដីសំដៅល្អឥតខ្ចោះ ជាអ្នកអានដ៏ប៉ឹនប្រសប់ ថែមទាំងចេះសំរបខ្លួនបានគ្រប់ស្ថានការណ៏ សមត្ថភាពទាំងអស់នេះអាចកើតឡើងបានយ៉ាងងាយ ដោយគ្រាន់តែឲ្យកូនបានញ៉ាំបាយពេលល្ងាចនៅក្នុងផ្ទះជុំគ្នាជាមួយលោកឪពុកអ្នកម្តាយប៉ុណ្ណោះ…តើពឹតមែនឬ?
គឺជារឿងពឹត…លទ្ធផលនៃការសឹក្សាវិភាគ 5យ៉ាងនៅក្នុងប្រទេសសហរដ្ឋអាមេរិក បានរកឃើញថា ៖
1. កុមារដែលមកពីក្រុមគ្រួសារដែលតែងតែទទួលទានបាយជុំគ្នាជាញឹកញាប់នោះ នៅពេលធំឡើងច្រើនតែមិនសូវមានបញ្ហារឿងជក់បារី ផឹកស្រា សេពគ្រឿងញៀន មានសម្ព័ន្ធភាពផ្លូវភេទមុនវ័យ ឬកើតរោគស្រពាប់ស្រពោន គិតខ្លីចង់ធ្វើអត្ថឃាតដូចកុមារដែលមិនដែលញ៉ាំបាយជុំគ្នាជាមួយឪពុកម្តាយនោះឡើយ ។
2. កុមារដែលបានញ៉ាំបាយជួបជុំគ្នា ដោយមានលោកប៉ាជាអ្នកអង្គុយនៅក្បាលតុ នឹងធ្វើឲ្យក្រុមគ្រួសារមានភាពកក់ក្តៅកាន់តែខ្លាំងឡើង មានការនិយាយពិគ្រោះគ្នា ផ្តល់នូវការណែនាំពីទង្វើនៃការហូបចុកដែលល្អត្រឹមត្រូវ ធ្វើឲ្យមានសុជីវធម៌ក្នុងការបរិភោគ ពេលធំឡើងកុមារថែមទាំងមានសញ្ញាថាអាចនឹងក្លាយជាអ្នកអានដ៏ពូកែម្នាក់ទៀតផង ។
3. កុមារដែលលោកឪពុកអ្នកម្តាយបានចូលរួមទទួលទានបាយជាមួយ នឹងមានលទ្ធផលការរៀន និងជំនាញការប្រើភាសាទំនាក់ទំនងល្អជាងកុមារដែលមិនបានញ៉ាំបាយរួមជាមួយឪពុកម្តាយ និងថែមទាំងមិនសូវមានបញ្ហារឿងកើតរោគធាត់ដែលបណ្តាលឲ្យមានផលប៉ះពាល់ដល់ការវិវឌ្ឍទៀតផង ។
4. ពេលឈានចូលទៅរកវ័យត្រៀមជំទង់(ជិតស្ទាវ) កុមារនឹងមិនសូវមានបញ្ហារឿងសុខភាព ឬប្រថុយប្រថាននឹងទង្វើខុសប្រក្រតីខាងការហូបចុក ដូចជា មិនញ៉ាំអាហារ ញ៉ាំកាន់តែតិច ព្យាយាមសំរកទម្ងន់ដោយថ្នាំ(ចំពោះកូនស្រី) ពឹងបារីបញ្ចុះទម្ងន់ ឬក្អួតក្រោយពេលបាយជាដើម ព្រោះការទទួលទានអាហារជុំគ្នានឹងធ្វើឲ្យកើតមានការយកចិត្តទុកដាក់ក្នុងរឿងបរិភោគ អាចសង្កេតឃើញបានឆាប់រហ័ស បើកូនមានអាការខុសប្រក្រតីណាមួយ លោកឪពុកអ្នកម្តាយនឹងកែបញ្ហាបានទាន់ពេលវេលា ។
5. កុមារនឹងចេះសំរបខ្លួនតាមស្ថានភាពជុំវិញខ្លួនបានយ៉ាងល្អ បានឃើញភាពជាធ្លុងមួយ បាននៅជាក្រុមជុំគ្នាកុមារនឹងគិតបែបនេះរហូតដល់ធំក្លាយជាមនុស្សចាស់ ដូច្នេះហើយទើបបងប្អូនដែលធ្លាប់អង្គុយញ៉ាំបាយរួមតុជាមួយគ្នានៅតែមានទំនាក់ទំនងនឹងគ្នា ហើយជិតដឹត ស្និទ្ធស្នាលនឹងគ្នារហូតដល់ពេលធំឡើងហ្នឹងឯង ។
ចុះបើមិនបានទទួលទានបាយជុំគ្នាវិញនោះ…?
កុមារអាចមានបញ្ហាក្នុងការរសនៅទាំងនៅផ្ទះ និងនៅសាលារៀន អាចចេះផឹកស្រាមុនអាយុ សេពគ្រឿងញៀន ឬអាចមានទង្វើខាងការបរិភោគដែលខុសពីប្រក្រតី ។ អ្នកស្រី បារ៏បារ៉ា ហ្វ៊ីស អ្នកវីភាគ និងជាសាស្ត្រាចារ្យមហាវិទ្យាល័យ អ៊ីលលីណយស៏ បានចង្អុលបង្ហាញថា ទោះជាមិនមានពេលវេលាទទួលទានអាហារជុំគ្នាបានរាល់ថ្ងៃក៏ដោយ តែយ៉ាងហោចណាស់គួររៀបចំឲ្យបាន 3ដងក្នុងមួយសប្តាហ៏ សុខភាពដ៏ល្អទាំងកាយ និងចិត្តរបស់កុមារក៏អាចកើតមានឡើងបានដែរ ៕
November 13, 2020
14 ចំណុចហាមឃាត់ ដែលស្រ្តីមានគភ៌ត្រូវតែធ្វើតាម
ខណៈតាំងគភ៌ ជាពិសេសតាំងគភ៌លើកដំបូង ស្រ្តីមានគភ៌អាចនៅមិនទាន់ដឹង ឬដឹងមិនអស់សេចក្ដីពាក់ព័ន្ធនឹងទង្វើដែលមិនស័ក្តិសម ឬចំណុចហាមឃាត់ផ្សេងៗដែលគ្រូពេទ្យជំនាញបានហាម ឬអនុញ្ញាតឱ្យធ្វើដែរ តែត្រូវធ្វើឱ្យតិចបំផុតដើម្បីសុខភាពរបស់ទាំងម្ដាយ និងកូនក្នុងគភ៌។ ចំណុចហាមឃាត់ទាំងនោះមានហេតុផលត្រឹមត្រូវច្បាស់លាស់ខាងវិទ្យាសាស្រ្ត មិនមែនជាជំនឿតៗគ្នានោះឡើយ។
1 . ហាមមួម៉ៅ ធុញថប់ តានតឹងអារម្មណ៍
ខណៈដែលរាងកាយមានភាពធុញថប់តានតឹង ខួរក្បាលនឹងបញ្ជាទៅក្រពេញ អាឌ្រីណាលីន ដែលស្ថិតនៅខាងលើក្រលៀនឱ្យបញ្ចេញអ័រម៉ូននៃភាពធុញថប់តានតឹងអារម្មណ៍មួយប្រភេទចេញមក ហុចផលឱ្យរាងកាយមានអារម្មណ៍ចង់ញ៉ាំអាហារ ធ្វើឱ្យស្រ្តីមានគភ៌ត្រូវតែញ៉ាំអាហារចូលទៅច្រើន។ ធុញថប់តានតឹងច្រើន ញ៉ាំច្រើន ធាត់ច្រើន ធ្វើឱ្យស្រ្តីមានគភ៌ឡើងទម្ងន់ព្រឹបៗដែលជារឿងមិនល្អឡើយសម្រាប់ស្រ្តីមានគភ៌ និងក្រៅពីនោះ ស្រ្តីមានគភ៌ដែលមានអារម្មណ៍មួម៉ៅធុញថប់តានតឹងច្រើន ទារកក្នុងផ្ទៃក៏នឹងទទួលផលប៉ះពាល់ដូចគ្នា ដែលក្រោយពេលប្រសូតចេញមក ទារកច្រើនតែមានទង្វើពិបាកចិញ្ចឹម និងយំរករឿងច្រើន។

2 . ហាមហាត់ប្រាណបង្ខំ និងហាត់ខ្លាំង
គ្រប់ត្រីមាសរបស់ការតាំងគភ៌ គួរហាត់ប្រាណតែល្មមសមរម្យបានហើយ។ ក្នុងត្រីមាសដំបូង បើប្រឹងហាត់ប្រាណខ្លាំង និងហក់លោតពេក នឹងកើតកម្លាំងញ័ររញ្ជួយខ្លាំង មានផលប៉ះពាល់តួកំណើត អាចបណ្ដាលឱ្យរលូតបាន។ សម្រាប់ត្រីមាសទី2 និងទី3 វិញ បើសិនហាត់ប្រាណខ្លាំងក្លាពេក រាងកាយនឹងប្ដូរផ្លាស់ហ្គាសអុកស៊ីហ្ស៊ែនមិនទាន់ ធ្វើឱ្យទារកកើតមានសភាវខ្វះអុកស៊ីហ្ស៊ែនបាន។
3 . ហាមពាក់ស្បែកជើងកែងចោត
ស្រ្តីមានគភ៌ច្រើនតែមកជួបគ្រូពេទ្យដោយអាការឈឺខ្នងជាញឹកញាប់ តើនរណាទៅនឹកឃើញថា មូលហេតុគឺមកពីស្បែកជើង?។ ការដែលស្រ្តីមានគភ៌ពាក់ស្បែកជើងកែងចោតខ្ពស់ៗ ធ្វើឱ្យសាច់ដុំនៅម្ដុំកំភួនជើង ភ្លៅ ចង្កេះ និងខ្នង កើតភាពតានតឹង និងអាការឈឺចាប់តាមមក។ ក្រៅពីនេះនៅជួបប្រទះទៀតថា ស្បែកជើងកែងចោតបានធ្វើឱ្យចំណុចរួមនៃទម្ងន់ខ្លួនរបស់ស្រ្តីមានគភ៌បាត់បង់តុល្យភាព អាចធ្វើឱ្យដួល និងបណ្ដាលឱ្យរលូតបុត្របាន។
4 . ហាមញ៉ាំថ្នាំផ្ដេសផ្ដាស់
ចំណុចនេះសំខាន់ខ្លាំងណាស់ ជាពិសេស 12សប្ដាហ៍ដំបូង ព្រោះជាអំឡុងពេលកកំណើត សាងអវយវៈដែលសំខាន់ៗរបស់តួកំណើត។ បើញ៉ាំថ្នាំដែលបង្កអន្តរាយ នឹងមានភាពប៉ះពាល់បណ្ដាលឱ្យមានពិការភាពដល់ទារកក្នុងគភ៌បាន ដូចជា ពិការដៃជើង ឆែបមាត់ ជាដើម ជាពិសេសពពួកថ្នាំបំបាត់មុន និងនៅឱ្យឆ្ងាយពីសារធាតុគីមីផ្សេងៗ ដូចជា ថ្នាំបាញ់មូស។ល។ បើមានអាការជំងឺធ្ងន់ធ្ងរគួរទៅជួបគ្រូពេទ្យជំនាញ។
5 . ហាមចូលគេងយប់ជ្រៅ
ស្រ្តីមានគភ៌ត្រូវគេងលក់សម្រាកឱ្យបានគ្រប់គ្រាន់យ៉ាងតិច 8ម៉ោងក្នុងមួយយប់។ បើគេងពេលយប់មិនគ្រប់គ្រាន់ ក្នុងអំឡុងពេលថ្ងៃចូរស្រ្តីមានគភ៌គេងលក់សម្រាកមួយស្រឡេត ជាពិសេសបំផុតក្នុងរយៈពេល 14សប្ដាហ៍ដំបូងនៃការតាំងគភ៌។ មានការសិក្សាស្រាវជ្រាវនៅប្រទេសសហរដ្ឋអាមេរិកមួយបានរកឃើញថា ស្រ្តីមានគភ៌ដែលគេងបានតិចជាងមួយយប់ 5ម៉ោង នឹងប្រថុយនឹងការត្រូវជំងឺផ្សេងៗយាយីរហូតពេលមួយរយៈកាលនៃការតាំងគភ៌ ដែលអាចបង្កគ្រោះថ្នាក់ទៅដល់ទារកក្នុងគភ៌នៅទីបំផុត។
6 . ហាមអត់អាហារ និងសម្រកទម្ងន់
បើស្រីមានគភ៌គ្មានចំណុចកម្រិតខាងវេជ្ជសាស្រ្តថា ត្រូវកម្រិតអាហារទេនោះ គួរទទួលទាមអាហារឱ្យគ្រប់ និងសមល្មមទៅតាមតម្រូវការរបស់រាងកាយ ព្រោះការសិក្សាស្រាវជ្រាវដដែលនោះបានរកឃើញថា ស្រ្តីមានគភ៌ដែលតម ឬអត់អាហារ ធ្វើឱ្យទារកមានអត្រាក្នុងការប្រសូតមុនកាលកំណត់ខ្ពស់ និងអាចពិការខួរក្បាល ដោយសារតែនៅក្នុងអាហារទាំង 5ប្រភេទក្រុមមានសារធាតុអាហារដែលសំខាន់ដល់ការបំប៉នខួរក្បាលទារក ដូចជា សារធាតុហ្វូលេតដែលបានពីបន្លែផ្លែឈើ និងវីតាមីនផ្សេងៗដែលជួយក្នុងការសាងអវយវៈសំខាន់ៗ។ សម្រាប់ស្រ្តីមានគភ៌ដែលបារម្ភខ្លាចធាត់នោះ ក្រោយពេលប្រសូត ឡារ៉ែន សូមណែនាំ ឱ្យចិញ្ចឹមកូនដោយទឹកដោះខ្លួនឯងតែម្យ៉ាងគត់ នោះធានាថា ទម្ងន់នឹងស្រកចុះយ៉ាងឆាប់រហ័សមិនខាន។
7 . ហាមរំលង ឬខកខានការណាត់ពិនិត្យគភ៌
ស្រ្តីមានគភ៌ត្រូវតែដឹងខ្លួនជាប់ជានិច្ចអំពីភាពសំខាន់នៃការពិនិត្យគភ៌ ព្រោះរាងកាយរបស់ម្ដាយ និងកូនក្នុងផ្ទៃមានការប្រែប្រួលគ្រប់ពេលវេលា បើរកឃើញភាពខុសប្រក្រតីណាមួយរបស់ម្ដាយ ឬទារកក្នុងគភ៌ គ្រូពេទ្យនឹងបានផ្ដល់ការជួយសង្រ្គោះទាន់ពេលវេលា តែបើសិនជាខកខាន ឬរំលងការណាត់ពិនិត្យគភ៌នៅថ្ងៃនោះ គួរតែទៅជួបគ្រូពេទ្យនៅថ្ងៃបន្ទាប់កុំរំលងឱ្យសោះ។
(នៅមានត)
October 8, 2020
Apple នឹងរើរោងចក្រពីប្រទេសចិនទៅកាន់ប្រទេសឥណ្ឌា
ក្រុមហ៊ុន Apple ត្រូវបានគេជឿថា កំពុងរៀបចំផែនការដើម្បីរើរោងចក្រផលិតឧបករណ៍បច្ចេកវិទ្យារបស់ខ្លួនចំនួន20% ចេញពីប្រទេសចិន ទៅកាន់ប្រទេសឥណ្ឌា ដែលក្នុងនោះក៏មាន iPhone ផងដែរ។
យោងតាម Economic Times នាយកប្រតិបត្តិមួយចំនួនរបស់ក្រុមហ៊ុន Apple បានពិភាក្សាជាមួយបណ្ដាមន្ត្រីជាន់ខ្ពស់ឥណ្ឌាកាលពីប៉ុន្មានថ្ងៃកន្លងទៅនេះ ទាក់ទងទៅនឹងក្រុមហ៊ុនអាមេរិកាំងនេះ ចង់បានការ “បើកផ្លូវ” ដើម្បីអាចបង្កើនចង្វាក់ផលិតកម្មរបស់ខ្លួននៅក្នុងប្រទេសឥណ្ឌា រួមទាំងការរើកម្លាំងផលិតកម្មចំនួន1/5ពីប្រទេសចិន មកកាន់ឥណ្ឌា។
បើសិនជាការផ្លាស់ទីនេះក្លាយជាការពិត Apple ក៏នឹងអាចក្លាយជាក្រុមហ៊ុននាំចេញធំជាងគេនៅឥណ្ឌា។
មន្ត្រីរដ្ឋាភិបាលមួយរូបបានបង្ហើបឱ្យដឹងថាឥណ្ឌាសង្ឃឹមថានឹងផលិតស្មាតហ្វូនដែលមានទំហំទឹកប្រាក់ដល់ទៅ40ពាន់លានដុល្លារអាមេរិកនៅក្នុងប្រទេសនេះក្នុងរយៈពេល5ឆ្នាំខាងមុខ ដែលភាគច្រើនគឺដើម្បីនាំចេញ។ ការផលិតនេះ ភាគច្រើនត្រូវបានធ្វើឡើងដោយក្រុមហ៊ុន Wistron និងក្រុមហ៊ុន Foxconn ដោយយោងទៅលើផលប្រយោជន៍ពីកម្មវិធីលើកទឹកចិត្តទាក់ទាញការផលិត PLI។
PLI (Production Linked Incentive Scheme) គឺជាកម្មវិធីដែលត្រូវបានឥណ្ឌាបង្កើតឡើងក្នុងបំណងលើកទឹកចិត្តដល់ការផលិតក្នុងស្រុក ទាក់ទាញការវិនិយោគ និងការផលិតពីបណ្ដាក្រុមហ៊ុនបរទេស។ Apple នឹងក្លាយជាក្រុមហ៊ុនមួយក្នុងចំណោមបណ្ដាក្រុមហ៊ុនដំបូងគេដែលទទួលបានផលប្រយោជន៍ពីគោលនយោបាយនេះ បន្ទាប់ពីមាត្រាមួយចំនួនត្រូវបានផ្ដើមអនុវត្តចាប់ពីសប្ដាហ៍ក្រោយ មុនពេលអនុវត្តពេញលេញចាប់ពីថ្ងៃទី1សីហា។
ទាក់ទិននឹងរឿងរ៉ាវខាងលើ ភាគីក្រុមហ៊ុន Apple មិនទាន់មានការបញ្ចេញមតិអ្វីនៅឡើយ។
ប្រទេសឥណ្ឌាមិនមែនជាទីផ្សារធំរបស់ Apple នោះទេ ព្រោះថាក្រុមហ៊ុននេះរកបានចំណូលត្រឹមតែ1.5ពាន់លានដុល្លារប៉ុណ្ណោះពីការលក់ iPhone នៅក្នុងប្រទេសនេះ រាប់ចាប់ពីឆ្នាំ2018ដល់2019 ពោលគឺកាន់កាប់ចំណែកទីផ្សារប្រមាណពី2ទៅ3%ប៉ុណ្ណោះ គឺមិនដល់0.5ពាន់លានដុល្លារនៃតម្លៃឧបករណ៍ដែលត្រូវបានផលិតក្នុងប្រទេសនេះ។ ផ្ទុយទៅវិញ Apple កំពុងតែពឹងផ្អែកច្រើនទៅលើប្រទេសចិន ទាំងការផលិត ទាំងទីផ្សារ។ នៅក្នុងអំឡុងពេលដូចគ្នា បើធៀបជាមួយប្រទេសឥណ្ឌា ក្រុមហ៊ុន Apple នៅប្រទេសចិនបានផលិតឧបករណ៍ដែលមានទំហំទឹកប្រាក់ដល់ដល់220ពាន់លានដុល្លារ ក្នុងនោះមាន185ពាន់លានដុល្លារបានមកពីការនាំចេញ។ ក្រៅពីនេះ Apple ក៏ប្រើប្រាស់កម្មករប្រមាណជា4.8លាននាក់នៅប្រទេសចិន ទាំងការផលិតផ្ទាល់ និងទាំងប្រយោល៕
ប្រភព៖ សារព័ត៌មានបរទេស
May 13, 2020