Tag: ២០២២

ទិញរថយន្តក្នុងក្តីស្រមៃដោយមិនចាំបាច់មានប្រាក់កក់ និងបង់រំលស់គ្មានការប្រាក់ដល់ទៅមួយឆ្នាំ
[ភ្នំពេញ – ថ្ងៃទី ០១ ខែឧសភា ឆ្នាំ២០២៣] ផ្នែករថយន្ត Ford នៃ ក្រុមហ៊ុន អ អិម អេ (ខេមបូឌា) ម.ក បានរៀបចំកម្មវិធី ពិធីចុះអនុស្សរណៈយោគយល់គ្នារវាង ក្រុមហ៊ុន អ អិម អេ (ខេមបូឌា) ម.កដែលជាក្រុមហ៊ុននាំចូល និងចែកចាយផ្តាច់មុខរថយន្ត ហ្វដ ប្រចាំប្រទេសកម្ពុជា និងធនាគារ វីង (ខេមបូឌា) ម.ក ដែលជាធនាគារឈានមុខគេនៅកម្ពុជា។
លោក ហាន ប៉េង ក្វាង អគ្គនាយក ធនាគារ វីង បានមានប្រសាសន៍ថា៖ “យើងពិតជាមានសេចក្តីសោមន្សរីករាយ ដែលបានក្លាយជាដៃគូសហការជាមួយ ក្រុមហ៊ុន អ អិម អេ (ខេមបូឌា) ដើម្បីរួមគ្នាផ្តល់ដំណោះស្រាយដ៏មានសារៈសំខាន់មួយសម្រាប់អតិថិជន” ។
“យើងជឿជាក់ថាគ្រប់គ្នាស័ក្កិសមនឹងទទួលបានឱកាសក្លាយជាម្ចាស់រថយន្តក្នុងក្តីស្រមៃរបស់ពួកគេ។ ហើយយើងចង់ធ្វើឲ្យក្តីស្រមៃនោះក្លាយជាការពិត សម្រាប់អតិថិជនមិនថាជាប្រជាជនកម្ពុជា ឬជនជាតិបរទេសកំពុងរស់នៅប្រទេសកម្ពុជា នោះគឺអតិថិជនមិនបារម្មណ៍លើការចំណាយប្រាក់កក់ ហើយថែមទាំងមិនចំណាយបង់ការប្រាក់រហូតដល់ ១២ ខែ”។
លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) បានមានប្រសាសន៍ថា៖ “ សម្រាប់អតិថិជនដែលមានបំណងចង់ក្លាយជាម្ចាស់រថយន្ត ឥឡូវនេះយើងមានការផ្តល់ជូនពិសេសគឺ ការទិញរថយន្តដោយមិនតម្រូវមានប្រាក់កក់ និងការបង់រំលស់ដោយមិនចំណាយការប្រាក់ពេញមួយឆ្នាំពេញសម្រាប់រថយន្តម៉ូដែល Ford Ranger Wildtrak, Everest, EcoSport, Territory ស៊េរីឆ្នាំ ២០២២ ដែលនេះជាលើកទី១ ដែលមានការសហការបែបនេះកើតឡើងរវាង អ អិម អេ (ខេមបូឌា) ជាមួយធនាគារ វីង ហើយនេះគ្រាន់តែជាការចាប់ផ្តើមតែប៉ុណ្ណោះ ៕
ឆ្លៀតក្នុងឱកាសនេះដែរ លោក លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) ក៏បានបន្ថែមថា “ បច្ចុប្បន្នក្រុមហ៊ុន ហ្វដ បានពង្រីកនូវវិសាលភាពនៃគ្រឿងបន្លាស់ និងសេវាកម្មជួសជុលរថយន្តនៅតាមបណ្តាខេត្តផ្សេងៗដូចជា ខេត្តកំពង់ចាម និងខេត្តសៀមរាប ហើយយើងក៏មានយានដ្ឋានដៃគូសហការជាច្រើននៅទូទាំង២៥ខេត្តក្រុងក្នុងប្រទេសកម្ពុជាផងដែរ។ ជាពិសេស ថ្មីៗនេះយើងក៏បានបង្កើតនូវ ការិយាល័យផ្នែកទំនាក់ទំនងអតិថិជន (Call Center) ដើម្បីផ្តល់នូវសេវាកម្មឆាប់រហ័ស និងផ្តល់ភាពងាយស្រួលដល់អតិថិជនក្នុងការសាកសួរព័ត៌មាន ក៏ដូចជាធ្វើការទំនាក់ទំនងដោយផ្ទាល់ជាមួយអ្នកជំនាញរបស់យើង ។ ”
សម្រាប់អតិថិជនដែលចង់សាកសួរព័ត៌មាន ឬមានបំណងចង់ទិញរថយន្ត Ford អាចធ្វើការទំនាក់ទំនងតាមលេខទូរស័ព្ទ 012 333 975 ឬ 077 666 357 ឬ 078 999 883
សម្រាប់លោកអ្នកដែលមានតម្រូវការកម្ចីឥណទានតាមរយៈធនាគារ វីង សូមធ្វើការទំនាក់ទំនងតាមលេខទូរស័ព្ទ 078 989 767/078 989 511 ឬអញ្ជើញមកកាន់សាខាណាមួយដែលនៅជិតលោកអ្នកបំផុត៕

May 1, 2023
ការនាំចេញ-នាំចូលទំនិញក្នុងឆ្នាំ ២០២២ របស់ វៀតណាម អាចនឹងសម្រេចបាន ៧៥០ ពាន់លានដុល្លារអាម៉េរិក
រយៈពេល ៨ ខែដើមឆ្នាំនេះ ជាធម្យមក្នុងមួយខែ ការនាំចេញ-នាំចូលទូទាំងប្រទេសរបស់ វៀតណាម សម្រេចបានជាង ៦២ ពាន់លានដុល្លារអាម៉េរិក។
យោងតាមព័ត៌មានពីអគ្គនាយកដ្ឋានគយវៀតណាម ក្នុងខែសីហា ២០២២ ការនាំចេញ-នាំចូលទំនិញរបស់ វៀតណាម សម្រេចបាន ៦៥.៩៨ ពាន់លានដុល្លារអាម៉េរិក កើន ៧.៩% (ស្មើនឹង ៤.៨៤ ពាន់លានដុល្លារ) ធៀបនឹងខែកក្កដា។ ក្នុងនោះ ការនាំចេញទំនិញ សម្រេចបាន ៣៤.៩២ ពាន់លានដុល្លារ កើន ១៤.១% (ស្មើនឹង ៤.៣១ ពាន់លានដុល្លារ) និងការនាំចូលសម្រេចបាន ៣១.០៦ ពាន់លានដុល្លារ កើន ១.៧% (ស្មើនឹង ៥២៦ លានដុល្លារ)។
គិតជារួម ក្នុងរយៈពេល ៨ ខែដើមឆ្នាំ ២០២២ ការនាំចេញ-នាំចូលរបស់ វៀតណាម សម្រេចបាន ៤៩៩.៧១ ពាន់លានដុល្លារ កើន ១៥.៩% (ស្មើនឹង ៦៨.៦៩ ពាន់លានដុល្លារ) ធៀបនឹងដំណាក់កាលដូចគ្នាក្នុងឆ្នាំ ២០២១។ ក្នុងនោះ ការនាំចេញសម្រេចបាន ២៥២.៦០ ពាន់លានដុល្លារ កើន ១៨.២% (ស្មើនឹង ៣៨.៨៥ ពាន់លានដុល្លារ) និងការនាំចូលសម្រេចបាន ២៤៧.១១ ពាន់លានដុល្លារ កើន ១៣.៧% (ស្មើនឹង ២៩.៨៤ ពាន់លានដុល្លារ)។
ក្នុងខែសីហាកន្លងទៅ អតិរេកពាណិជ្ជកម្មរបស់ វៀតណាម សម្រេចបាន ៣.៨៦ ពាន់លានដុល្លារអាម៉េរិក។ គិតជារួម ចាប់ពីដើមឆ្នាំដល់ដំណាក់ខែសីហា ២០២២ វៀតណាម សម្រេចបាន អតិរេកពាណិជ្ជកម្ម ចំនួន ៥.៤៩ ពាន់លានដុល្លារ។
ដូច្នេះ ក្នុង ៨ ខែដើមឆ្នាំនេះ ជាមធ្យម ការនាំចេញ-នាំចូលរបស់ វៀតណាម សម្រេចបាន ៦២.៥ ពាន់លានដុល្លារ/ខែ។ បើសិនជានៅតែរក្សាបានកម្រិតធម្យមនេះ ពេញមួយឆ្នាំ ២០២២ ការនាំចេញ-នាំចូលទំនិញរបស់ វៀតណាម នឹងឡើងដល់ ៧៥០ ពាន់លានដុល្លារអាម៉េរិក កើន ៨១ ពាន់លានដុល្លារ ធៀបនឹងឆ្នាំ ២០២១៕
September 8, 2022
ក្រុមមហាសេដ្ឋីនៅ ប្រទេសអ៊ុយក្រែន បាត់បង់ទ្រព្យជិតពាក់កណ្ដាល ចាប់តាំងពី រុស្ស៊ី បើកការឈ្លានពាន
វិបត្តិសង្គ្រាមនៅ អ៊ុយក្រែន បានបណ្ដាលឱ្យទ្រព្យសម្បត្តិរបស់មហាសេដ្ឋី ៧ រូប នៅ អ៊ុយក្រែន ថយចុះ ៩.៧ ពាន់លានដុល្លារអាម៉េរិក នេះបើតាមការគណនារបស់ ទស្សនាវដ្ដីអាម៉េរិក Forbes។
តួលេខខាងលើនេះប្រហាក់ប្រហែលនឹង ៤៥% នៃតម្លៃទ្រព្យសរុបនៅមុនថ្ងៃទី ២៨ កុម្ភៈ។ Forbes ឱ្យដឹងថា មូយក្នុងចំណោមមូលហេតុដែលនាំឱ្យទ្រព្យរបស់ក្រុមមហាសេដ្ឋីនៅ អ៊ុយក្រែន មិនបន្តធ្លាក់ចុះ បើទោះសង្គ្រាមមិនទាន់បញ្ចប់ គឺដោយសារទ្រព្យភាគច្រើនស្ថិតនៅបរទេស។
បច្ចុប្បន្ន អ៊ុយក្រែន មានមហាសេដ្ឋី ៧ រូប ដោយមានទ្រព្យសរុប ១១.៩ ពាន់លានដុល្លារអាម៉េរិក។ បើធៀបទៅនឹងបញ្ជីដែលត្រូវបានប្រកាសកាលពីចុងខែមីនា ២០២១ ទ្រព្យសម្បត្តិរបស់ពួកគេបានបាត់បង់អស់ជាង ៧ ពាន់លានដុល្លារ។ ម្នាក់ក្នុងចំណោមបុគ្គលល្បីឈ្មោះបំផុតនៅ អ៊ុយក្រែន គឺ Petro Poroshenko ដែលធ្លាប់ជាប្រធានាធិបតីរបស់ប្រទេសនេះចាប់ពីឆ្នាំ ២០១៤ ដល់ ២០១៩ ក៏បានបាត់ឈ្មោះពីបញ្ជីចំណាត់ថ្នាក់មហាសេដ្ឋីរបស់ Forbes សម្រាប់ឆ្នាំ ២០២២។
ទ្រព្យសុទ្ធរបស់លោក Petro Poroshenko បានថយចុះជាងពាក់កណ្ដាល ពោលគឺប្រហែល ៧០០ លានដុល្លារអាម៉េរិក ដោយសារតែតម្លៃមូលធនទីផ្សារនៃក្រុមហ៊ុនផលិតនំ Roshen របស់លោក បានបាត់បង់ប្រហែល ៧៥% និងត្រូវបិទទ្វាររោងចក្រចំនួន ២ នៅ ទីក្រុងកៀវ និង បូរីស្ពីល ព្រោះតែសង្គ្រាម។
ខាងក្រោមនេះគឺជាក្រុមមហាសេដ្ឋី របស់ អ៊ុយក្រែន ដែលស្ទើរតែទាំងអស់ បានបាត់បង់ប្រាក់យ៉ាងច្រើន៖
១-Rinat Akhmetov
-ទ្រព្យសុទ្ធ៖ ៤.២ ពាន់លានដុល្លារអាម៉េរិក
-ប្រភពចំណូល៖ ដែក ធ្យូង
-ទ្រព្យដែលបានប្រែប្រួល៖ -៤.៣ ពាន់លានដុល្លារអាម៉េរិក
២-Victor Pinchuk
-ទ្រព្យសុទ្ធ៖ ១.៩ ពាន់លានដុល្លារអាម៉េរិក
-ប្រភពចំណូល៖ បំពង់ដែកថែប, ពហុវិស័យ
-ទ្រព្យដែលបានប្រែប្រួល៖ -៧០០ លានដុល្លារអាម៉េរិក
៣-Vadim Novinsky
-ទ្រព្យសុទ្ធ៖ ១.៣ ពាន់លានដុល្លារអាម៉េរិក
-ប្រភពចំណូល៖ ដែកថែប
-ទ្រព្យដែលបានប្រែប្រួល៖ -២.២ ពាន់លានដុល្លារអាម៉េរិក
៤-Kostyantin Zhevago
-ទ្រព្យសុទ្ធ៖ ១.៣ ពាន់លានដុល្លារអាម៉េរិក
-ប្រភពចំណូល៖ រុករករ៉ែ
-ទ្រព្យដែលបានប្រែប្រួល៖ -៨០០ លានដុល្លារអាម៉េរិក
៥-Henadiy Boholyubov
-ទ្រព្យសុទ្ធ៖ ១.១ ពាន់លានដុល្លារអាម៉េរិក
-ប្រភពចំណូល៖ ធនាគារ, វិនិយោគ
-ទ្រព្យដែលបានប្រែប្រួល៖ -៩០០ លានដុល្លារអាម៉េរិក
៦-Vlad Yatsenko
-ទ្រព្យសុទ្ធ៖ ១.១ ពាន់លានដុល្លារអាម៉េរិក
-ប្រភពចំណូល៖ Fintech
-ទ្រព្យដែលបានប្រែប្រួល៖ មិនមាន
៧-Ihor Kolomoyskyy
-ទ្រព្យសុទ្ធ៖ ១ ពាន់លានដុល្លារអាម៉េរិក
-ប្រភពចំណូល៖ ធនាគារ, វិនិយោគ
-ទ្រព្យដែលបានប្រែប្រួល៖ -៨០០ លានដុល្លារអាម៉េរិក
April 7, 2022
ថ្ងៃនេះ ព្រឹត្តិការណ៍ពិព័រណ៍វប្បធម៌ ទេសចរណ៍ និងកីឡា នៅ ពហុកីឡដ្ឋានជាតិមរតកតេជោ បានចាប់ផ្ដើមបើកទទួលភ្ញៀវហើយ
ព្រឹត្តិការណ៍ពិព័រណ៍វប្បធម៌ ទេសចរណ៍ និងកីឡា នៅ ពហុកីឡដ្ឋានជាតិមរតកតេជោ បើកទ្វារទទួលភ្ញៀវមកទស្សនាកម្សាន្តក្នុងរយៈពេល ៥ ថ្ងៃ ចាប់ពីថ្ងៃនេះរហូតដល់ថ្ងៃទី ១០ ខែមេសា ២០២២។
នៅក្នុងពិព័រណ៍វប្បធម៌ ទេសចរណ៍ និងកីឡានេះ មានការតាំងពិព័រណ៍ផលិតផលផ្សេងៗយ៉ាងសម្បូរបែប ក្នុងនោះមានទាំងផលិតផលដែលជាស្នាដៃរបស់កូនខ្មែរផងដែរ។ ជាងនេះ ពិព័រណ៍នេះក៏មានកម្មវិធីសិល្បៈជាច្រើនទម្រង់ ព្រមទាំងមានការប្រឡងបវរកញ្ញាមជ្ឈិមសម័យ។ល។ ព្រឹត្តិការណ៍នេះ គឺជាងការរៀបចំដើម្បីអបអរបុណ្យចូលឆ្នាំខ្មែរនាពេលខាងមុខ។
ព្រឹត្តិការណ៍ពិព័រណ៍វប្បធម៌ ទេសចរណ៍ និងកីឡា នៅ ពហុកីឡដ្ឋានជាតិមរតកតេជោ ត្រូវបានរៀបចំដោយក្រុមហ៊ុនដៃគូ KHBN សហការជាមួយពហុកីឡដ្ឋានជាតិមរតកតេជោ រដ្ឋបាលរាជធានីភ្នំពេញ ក្រសួងទេសចរណ៍ និងក្រសួង-ស្ថាប័នពាក់ព័ន្ធនានា។

April 6, 2022
មហាសំណាង ព្រោះតែមិនបានស្លាប់នៅក្នុងហេតុការណ៍ធ្លាក់យន្តហោះនៅ ប្រទេសចិន
(ប្រទេសចិន)-Huang អាយុ ២៤ ឆ្នាំ គ្រោងនឹងឡើងជើងហោះហើរ MU៥៧៣៥ ពី Kunming ទៅកាន់ Guangzhou ប៉ុន្តែ មិនមានវត្តមានក្នុងជើងហោះហើរនេះ ដោយសារជើងដំបូងត្រូវបានលុបចោល។
Huang រស់នៅក្នុងតំបន់ Tengchong នាទីក្រុង Baoshan ក្នុងខេត្ត Yunnan ប្រទេសចិន កាលពីថ្ងៃទី ២១ មីនា បានធ្វើឱ្យមានការចាប់អារម្មណ៍ខ្លាំង នៅពេលចែករំលែកអំពីរឿងរ៉ាវប្រកបដោយសំណាងមហាល្អ ព្រោះមិនបានឡើងជិះយន្តហោះដែលមានលេខសម្គាល់ MU៥៧៣៥ របស់ក្រុមហ៊ុនអាកាសចរណ៍ចិន China Eastern Airlines ដែលបានធ្លាក់នៅក្នុងខេត្ត Quangxi មុននោះ។
Huang ឱ្យដឹងថា គាត់មានគម្រោងឡើងជិះយន្តហោះនោះពី Tengchong ទៅកាន់ Kunming របស់ខេត្ត Yunnan ហើយក្រោយមកនឹងហោះទៅកាន់ Guangzhou ជាកន្លែងធ្វើការរបស់គាត់ ដោយជើងហោះហើរ MU៥៧៣។ ប៉ុន្តែ ដោយសារអាកាសធាតុមិនអំណោយផល ជើងហោះហើរពី Tengchong របស់ Huang ក៏ត្រូវបានលុបចោល។
យន្តហោះរបស់ក្រុមហ៊ុនអាកាសចរណ៍ចិន China Eastern Airlines
«ដោយសារតែជើងហោះហើរដំបូងត្រូវបានលុបចោល ដូច្នេះ ខ្ញុំក៏ត្រូវលុបចោលជើងហោះហើរបន្ទាប់ និងមិនបានឡើងជិះយន្តហោះនេះ» Huang បានចែករំលែកក្នុងវីដេអូដែលបានបង្ហោះលើបណ្ដាញសង្គមកាលពីម្សិលមិញ។
យន្តហោះ Boeing ៧៣៧-៨០០ របស់ China Eastern ដឹកអ្នកដំណើរ ១៣២ នាក់ និងបុគ្គលិក ៩ នាក់ ហោះពីព្រលានយន្តហោះអន្តរជាតិ Kunming Changshui នៅវេលាម៉ោង ១៣ និង ១៥ នាទី ហើយគ្រោងនឹងទៅដល់ទីក្រុង Guangzhou នៃខេត្ត Guangdong ម៉ោង ១៥ និង ០៧ នាទី។
យន្តហោះនេះ បានធ្លាក់ទៅលើខ្នងភ្នំមួយនៃទីក្រុង Wuzhou ក្នុងតំបន់ស្វយ័តជនជាតិ Zhuang នៅ Guangxi ភាគខាងត្បូងប្រទេសចិន កាលពីថ្ងៃទី ២១ មីនា។
Huang រស់នៅក្នុងតំបន់ Tengchong នាទីក្រុង Baoshan ក្នុងខេត្ត Yunnan ប្រទេសចិន
ទិន្នន័យពី Flighttradar24 បង្ហាញថា យន្តហោះនេះកំពុងហោះលើកម្ពស់ជិត ៩,០០០ ម៉ែត្រ នៅវេលាម៉ោងប្រហែល ១៤ និង ២០ នាទី ថ្ងៃទី ២១ មីនា ក៏ស្រាប់តែចាប់ផ្ដើមបន្ទាបកម្ពស់ភ្លាមៗ ក្រោយការហោះហើរបានជាង ១ ម៉ោង។ បន្ទាប់ពីហោះងើបឡើងនៅលើកម្ពស់ជាង ២,០០០ ម៉ែត្រ យន្តហោះក៏បន្តដាំក្បាលចុះក្នុងល្បឿនជិត ៦០០ គីឡូម៉ែត្រ/ម៉ោង ក្នុងរយៈប៉ុន្មានវិនាទីចុងក្រោយ៕
March 22, 2022
អង់គ្លេស សហរដ្ឋអាម៉េរិក ចង់ដំឡើងពន្ធចំពោះបណ្ដាក្រុមហ៊ុនប្រេង ដើម្បីជួយដល់អ្នករងផលប៉ះពាល់ពីបញ្ហាប្រេងឡើងថ្លៃ
នៅពេលតម្លៃប្រេងឆៅឡើងខ្ពស់ ប្រាក់ចំណេញរបស់បណ្ដាក្រុមហ៊ុនដូចជា BP ឬ ExxonMobil ជាដើម អាចកើនឡើងរាប់ពាន់លានដុល្លារក្នុងឆ្នាំនេះ។
ក្រុមហ៊ុន ExxonMobil រកបានប្រាក់ចំណេញ ២៣ ពាន់លានដុល្លារក្នុងឆ្នាំ ២០២១ ខ្ពស់បំផុតក្នុងរយៈពេល ៧ ឆ្នាំកន្លងមកនេះ។ នៅពេលតម្លៃប្រេងឆៅឡើងខ្ពស់ដូចបច្ចុប្បន្ន ក្រុមហ៊ុននេះត្រូវបានព្យាករថា នឹងរកបានប្រាក់ចំណេញ ៣៣ ពាន់លានដុល្លារក្នុងឆ្នាំ ២០២២។ ចំណែក BP ដែលរកបានប្រាក់ចំណេញ ១២.៨ ពាន់លានដុល្លារកាលពីឆ្នាំកន្លង នឹងអាចរកបាន ១៥.៦ ពាន់លានដុល្លារនាឆ្នាំនេះ។
អត្រាចំណេញដ៏សម្បើមនេះកំពុងនាំឱ្យក្រុមមន្ត្រីអាម៉េរិក និង អឺរ៉ុប ពិភាក្សាអំពីការដំឡើងពន្ធមិនធម្មតាចំពោះក្រុមហ៊ុនប្រេងទាំងនោះ។ ប្រាក់ដែលបានពីការដំឡើងពន្ធនេះនឹងត្រូវបានប្រើប្រាស់សម្រាប់ផ្ដល់ជំនួយផ្នែកហិរញ្ញវត្ថុផ្ទាល់ដល់អ្នកប្រើប្រាស់ដែលកំពុងជួបការលំបាកដោយសារប្រេងឡើងថ្លៃខ្ពស់។
ស្ថានីយប្រេងសាំងមួយកន្លែងនៅ រុស្ស៊ី របស់ក្រុមហ៊ុន BP
កន្លងមក ទាំង អាម៉េរិក ទាំង អង់គ្លេស សុទ្ធតែធ្លាប់បានដំឡើងពន្ធមិនធម្មតាបែបនេះ ដោយមានការគាំទ្រច្រើនពីសភា។ ក៏ប៉ុន្តែ ក្នុងករណីបច្ចុប្បន្ន ការគាំទ្រហាក់មានសំឡេងតែពីក្រុមមួយតូចប៉ុណ្ណោះ មិនថា នៅ សហរដ្ឋអាម៉េរិក មិនថា នៅ អង់គ្លេស។
March 21, 2022
ប្រទេសហុងគ្រី មានប្រធានាធិបតីជាស្ត្រីភេទលើកដំបូងបង្អស់នៅក្នុងប្រវត្តិសាស្ត្រ
នាថ្ងៃទី ១០ មីនា ២០២២ សភារបស់ ប្រទេសហុងគ្រី បានបោះឆ្នោតជ្រើសរើសអតីតរដ្ឋមន្ត្រីទទួលបន្ទុកកិច្ចការគ្រួសារ លោកស្រី Katalin Novak ឱ្យធ្វើជាប្រធានាធិបតីថ្មីរបស់ប្រទេសនេះ។ នេះគឺជាលើកដំបូងហើយដែល ហុងគ្រី មានប្រធានាធិបតីជាស្ត្រីភេទ។
នៅក្នុងការបោះឆ្នោតនៅសភា លោកស្រី Novak បានទទួលសន្លឹកឆ្នោតគាំទ្រចំនួន ១៣៧ សំឡេង និងប្រឆាំង ៥១ សំឡេង ដូច្នេះលោកបានយកឈ្នះលើគូប្រជែង Peter Rona ដែលជាសេដ្ឋវិទូមួយរូប។ លោកស្រី Novak នឹងឡើងកាន់អំណាចបន្តពីលោក Janos Ader ដែលនឹងត្រូវអស់អាណត្តិទី ២ របស់លោក នៅថ្ងៃទី ១០ ឧសភាខាងមុខ។
លោកស្រី Novak វ័យ ៤៤ ឆ្នាំ នឹងក្លាយជាប្រធានាធិបតីក្មេងបំផុតក្នុងប្រវត្តិសាស្ត្ររបស់ ហុងគ្រី និងជាប្រធានាធិបតីស្រីដំបូងគេនៅក្នុង សហភាពអឺរ៉ុប (EU)។
ការបោះឆ្នោតប្រធានាធិបតីខាងលើ ត្រូវបានធ្វើឡើងនៅក្នុងគ្រាដែលនៅសល់តែប៉ុន្មានសប្ដាហ៍ទៀតប៉ុណ្ណោះ នឹងដល់ថ្ងៃបោះឆ្នោតសភា (៣ មេសា) នៅប្រទេសនេះ។ នាយករដ្ឋមន្ត្រីហុងគ្រី លោក Viktor Orban បានចាប់ផ្ដើមយុទ្ធនាការឃោសនារកសំឡេងឆ្នោត ដោយសង្ឃឹមថា នឹងបានជាប់ឆ្នោតនៅក្នុងអាណត្តិទី ៤ របស់លោក ជាបន្តទៀត៕
March 10, 2022
ណាតូ (NATO) បញ្ចេញទ័ព ៤ ម៉ឺននាក់ជាលើកដំបូងក្នុងប្រវត្តិសាស្ត្រ ទៅកាន់ អឺរ៉ុបខាងកើត
អគ្គលេខាធិការនៃ អង្គការណាតូ Jens Stoltenberg ប្រកាសកាលពីថ្ងៃទី ២៥ កុម្ភៈ ថា ជាលើកដំបូងក្នុងប្រវត្តិសាស្ត្រ ដែល ណាតូ បានបញ្ចេញកម្លាំងប្រតិកម្មរបស់ ណាតូ (NATO Response Force-NRF) ដែលមានទាហាន ៤០,០០០ នាក់។
លោក Jens Stoltenberg និយាយថា យុទ្ធនាការយោធារបស់ រុស្ស៊ី នៅ អ៊ុយក្រែន គឺជា «វិបត្តិសន្តិសុខធ្ងន់ធ្ងរបំផុតដែលយើងត្រូវប្រឈមនៅ អឺរ៉ុប ក្នុងរយៈពេលច្រើនទសវត្សរ៍កន្លងទៅនេះ»។ កម្លាំង NRF នឹងត្រូវបានពង្រាយ «នៅលើដីគោក លើសមុទ្រ និងលើអាកាស» នៅ អឺរ៉ុបខាងកើត ក្នុងបំណងការពារជាលក្ខណៈសមូហភាព។
អគ្គលេខាធិការនៃ អង្គការសន្ធិសញ្ញាអាត្លង់ទិកខាងជើង ក៏បានបន្ថែមថា ណាតូ នឹងផ្ដល់អាវុធ និងប្រព័ន្ធការពារដែនអាកាសបន្ថែមទៀត ដល់ អ៊ុយក្រែន ទៅតាមការស្នើរបស់រដ្ឋាភិបាលប្រទេសនេះ។
បណ្ដាប្រទេសក្នុងសម្ព័ន្ធមិត្តនៅភាគខាងកើតនៃតំបន់ដែលគ្រប់គ្រងដោយ ណាតូ ពិតជាមានការបារម្ភខ្លាំង នៅពេលស្ថិតនៅក្បែរសង្គ្រាមនៅ អ៊ុយក្រែន និងក្បែរព្រំដែនរបស់ រុស្ស៊ី។
«ការវាយប្រហាររបស់ រុស្ស៊ី ទៅលើ អ៊ុយក្រែន មិនត្រឹមតែជាការវាយប្រហារទៅលើតែ អ៊ុយក្រែន មួយមុខនោះទេ ប៉ុន្តែ វាគឺជាការវាយប្រហារទៅលើសណ្ដាប់ធ្នាប់សន្តិសុខនៅ ទ្វីបអឺរ៉ុប ទាំងមូល» អគ្គលេខាធិការនៃ អង្គការណាតូ សង្កត់ធ្ងន់ដូច្នេះ។
ការដែល ណាតូ បញ្ចេញទ័ពប្រតិកម្ម ៤ ម៉ឺននាក់ ជាលើកដំបូងក្នុងប្រវត្តិសាស្ត្រនេះ ត្រូវបានធ្វើឡើងបន្ទាប់ពីក្រុមមេដឹកនាំរបស់អង្គការនេះ បានបើកកិច្ចប្រជុំបន្ទាន់កាលពីថ្ងៃទី ២៥ កុម្ភៈ ដើម្បីពិភាក្សាអំពីសន្តិសុខនៅ អ៊ុយក្រែន។ ក្នុងកិច្ចប្រជុំនេះ ក៏មានវត្តមានរបស់មន្ត្រីមកពី ប្រទេសស្វ៊ីស និង ហ្វាំងឡង់ ដែលមិនមែនជាសមាជិករបស់ ណាតូ ផងដែរ។
ប្រធានាធិបតីអាម៉េរិក ចូ បៃដិន កាលពីថ្ងៃទី ២៤ កុម្ភៈ ក៏បានថ្លែងថា នឹងបញ្ជូនទ័ព ៧,០០០ នាក់ ទៀតទៅកាន់ ទ្វីបអឺរ៉ុប ដើម្បីគាំទ្រដល់ ណាតូ។
February 26, 2022
ប្រធានាធិបតីអ៊ុយក្រែន អំពាវនាវរកជំនួយពីអង្គការ ណាតូ (NATO)
ប្រធានាធិបតី Zelensky របស់ ប្រទេសអ៊ុយក្រែន បានឱ្យដឹងថា លោកបានទូរស័ព្ទពិភាក្សាជាមួយសមសភាគី ប៉ូឡូញ Andrzej Duda នាថ្ងៃនេះ ដើម្បីស្វែងរកជំនួយផ្នែកការពារជាតិពីបណ្ដាសមាជិកនានារបស់ ណាតូ និងបង្ខំឱ្យ រុស្ស៊ី ចូលតុចរចា។
«យើងត្រូវការសម្ព័ន្ធមិត្តមួយដើម្បីប្រឆាំងនឹងសង្គ្រាម» ប្រធានាធិបតីអ៊ុយក្រែន លោក Zelensky បានសរសេរនៅលើ Twitter ដូច្នេះ។
មេដឹកនាំរបស់ អ៊ុយក្រែន យល់ថា «យូរ ឬឆាប់ រុស្ស៊ី ក៏នឹងត្រូវចរចាជាមួយយើងខ្ញុំ។ និយាយអំពីរបៀបនៃការបញ្ចប់សង្គ្រាម និងទប់ស្កាត់ការឈ្លានពាននេះ។ ការចរចាចាប់ផ្ដើមកាន់តែឆាប់ រុស្ស៊ី ក៏នឹងរងការខូចខាតកាន់តែតិច»។
February 25, 2022
អ៊ុយក្រែន ហាមបុរសអាយុពី ១៨ ដល់ ៦០ ឆ្នាំ ចាកចេញពីប្រទេស
អ៊ុយក្រែន បានចេញបញ្ជាឱ្យលើកទឹកចិត្ត និងស្នើបុរសដែលមានអាយុចាប់ពី ១៨ ដល់ ៦០ ឆ្នាំ មិនត្រូវចាកចេញពីប្រទេស ក្នុងពេល រុស្ស៊ី បើកការឈ្លានពាន។
បទបញ្ជាខាងលើត្រូវបានប្រធានាធិបតី Volodymyr Zelensky ចុះហត្ថលេខាកាលពីចុងថ្ងៃទី ២៤ កុម្ភៈ ដើម្បី «ធានាកម្លាំងការពារជាតិ ជួយដល់សមត្ថភាពក្នុងការត្រៀមប្រយុទ្ធ និងការប្រមូលកម្លាំងប្រដាប់អាវុធរបស់ អ៊ុយក្រែន ក៏ដូចជាកងកម្លាំងយោធាផ្សេងទៀត»។
យោងតាមបទបញ្ជាដែលមានសុពលភាព ៩០ ថ្ងៃនេះ ទាហានកាតព្វកិច្ច និងទាហានបម្រុងនៅ អ៊ុយក្រែន នឹងត្រូវបានប្រមូល។
កម្លាំងការពារព្រំដែនរបស់ អ៊ុយក្រែន ឱ្យដឹងថា ពលរដ្ឋដែលមានអាយុពី ១៨ ដល់ ៦០ ឆ្នាំ ត្រូវបានហាមចាកចេញពីប្រទេសក្នុងអំឡុង ៩០ ថ្ងៃខាងលើ។ ប្រធានាធិបតី Zelensky មុននោះក៏បានប្រកាសថា នឹងផ្ដល់អាវុធដល់ ពលរដ្ឋអ៊ុយក្រែន ទាំងអស់ ដែលត្រូវការ។ លោកក៏បានប្រកាសកាត់ផ្ដាច់ទំនាក់ទំនងការទូតជាមួយ រុស្ស៊ី ផងដែរ។
ប្រធានាធិបតីរុស្ស៊ី កាលពីថ្ងៃទី ២៤ កុម្ភៈ បានប្រកាសបើកយុទ្ធនាការយោធាពិសេសនៅ អ៊ុយក្រែន ក្រោមហេតុផលថា «ប្រទេស» នៅតំបន់ភាគខាងកើតរបស់ អ៊ុយក្រែន បានស្នើសុំជំនួយយោធា។
កងទ័ពរុស្ស៊ី បានសម្រុកចូលឈ្លានពានលើ អ៊ុយក្រែន ពីច្រើនទិស ខណៈកងកម្លាំងផ្ដាច់ខ្លួននៅភាគខាងកើតអ៊ុយក្រែន ក៏បើកការវាយប្រហារសំដៅតំបន់ដែលកំពុងគ្រប់គ្រងដោយអាជ្ញាធររដ្ឋាភិបាលអ៊ុយក្រែន និងដណ្ដើមបានទីរួមស្រុកចំនួន ២ នៅ Luhansk។
អ៊ុយក្រែនប្រកាសថា មនុស្ស ១៣៧ នាក់បានស្លាប់ និង ៣១៦ នាក់ រងរបួង បន្ទាប់ពី រុស្ស៊ី បានបើកការវាយលុក។ ជនភៀសខ្លួនរបស់ អ៊ុយក្រែន កំពុងរត់ទៅប្រទេសជិតខាង ហើយ អាម៉េរិក ក៏បានប្រកាសទទួលយកជនភៀសខ្លួនទាំងនោះ។

February 25, 2022