សុខភាព - La Reine Media

អង្គរសង្ក្រាន្តឆ្នាំនេះនឹងត្រូវបានផ្អាក ខណៈ Covid-19 ចាប់ផ្ដើមបង្កការភ័យខ្លាចនៅខេត្តសៀមរាប

នៅរសៀលថ្ងៃនេះ (7មីនា) កម្ពុជាបានប្រកាសថា បានរកឃើញអ្នកផ្ទុកមេរោគកូរ៉ូណាម្នាក់បន្ថែមទៀត បន្ទាប់ពីបានដាក់មនុស្សចំនួនជាង 40នាក់ ឱ្យនៅក្រោមការតាមដានពិសេស នៅឯខេត្តសៀមរាប។

លោកសាស្ត្រាចារ្យវេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាលកម្ពុជា បានឱ្យដឹងថា ការរកឃើញអ្នកផ្ទុកមេរោគ Covid-19 ទី2នេះ បានធ្វើឱ្យសម្តេចតេជោ ហ៊ុន សែន សម្រេចចិត្តចេញបញ្ជាឱ្យបិទសាលារៀននៅក្នុងទីរួមខេត្តសៀមរាបជាបណ្ដោះអាសន្ន ដើម្បីទប់ស្កាត់ការឆ្លងរាលដាលនៃមេរោគ។

ការរកឃើញអ្នកផ្ទុកមេរោគ Covid-19 ថ្មី ទី2នេះ ក៏នឹងធ្វើឱ្យព្រឹត្តិការសំខាន់ៗមួយចំនួននៅខេត្តសៀមរាបត្រូវបានផ្អាក។

លោកវេជ្ជបណ្ឌិត ម៉ម ប៊ុនហេង បានថ្លែងនៅក្នុងសន្និសីទសារព័ត៌មាននៅឯទីស្ដីការក្រសួងសុខាភិបាលថា នាល្ងាចនេះថា ជាមួយនឹងការបិទសាលារៀនក្នុងទីរួមខេត្តសៀមរាបជាបណ្ដោះអាសន្ន ព្រឹត្តិការអង្គរសង្ក្រាន្តដែលគ្រោងនឹងប្រារព្ធនៅក្នុងឱកាសបុណ្យចូលឆ្នាំខ្មែរខាងមុខក៏នឹងត្រូវបានផ្អាកផងដែរ។

ព្រឹត្តិការអង្គរសង្ក្រាន្តដែលគ្រោងនឹងប្រារព្ធនៅក្នុងឱកាសបុណ្យចូលឆ្នាំខ្មែរខាងមុខក៏នឹងត្រូវបានផ្អាកផងដែរ

គិតមកដល់ពេលនេះ កម្ពុជាបានរកឃើញអ្នកផ្ទុកមេរោគ Covid-19 ចំនួន2នាក់ និងជាង40នាក់កំពុងស្ថិតក្នុងការតាមដានសុខភាព។ ចំណែកនៅទូទាំងពិភពលោកឯណោះវិញ ចំនួនអ្នកបានឆ្លងមេរោគ Covid-19 បានកើនឡើងដល់ 102,471នាក់ ក្នុងនោះមានអ្នកស្លាប់ជិត 3,500នាក់៕

March 7, 2020

Covid-19៖ កម្ពុជារកឃើញអ្នកផ្ទុកមេរោគកូរ៉ូណាទី2 បន្ទាប់ពីដាក់មនុស្សជាង40នាក់ក្រោមការតាមដានសុខភាពពិសេស នៅសៀមរាប

លោក ម៉ម ប៊ុនហេង រដ្ឋមន្ត្រីក្រសួងសុខាភិបាលកម្ពុជា នៅល្ងាចនេះ បានប្រកាសលទ្ធផលនៃការធ្វើតេស្តលើពលរដ្ឋដែលត្រូវបានសង្ស័យថា មានផ្ទុកមេរោគកូរ៉ូណា។

រដ្ឋមន្ត្រីក្រសួងសុខាភិបាលបានឱ្យដឹងថា ក្រសួងបានរកឃើញអ្នកផ្ទុកមេរោគ Covid-19 ម្នាក់នៅខេត្តសៀមរាប។ អ្នកជំងឺនេះ មានអាយុ38ឆ្នាំ ជាពលរដ្ឋខ្មែរដំបូងបង្អស់ដែលបានឆ្លងមេរោគនេះ។ អ្នកជំងឺនេះ ក៏បានក្លាយជាមនុស្សទី2 ដែលត្រូវបានរកឃើញថាមានផ្ទុកមេរោគកូរ៉ូណានៅកម្ពុជា បន្ទាប់ពីករណីទី1នៅឯខេត្តព្រះសីហនុ។

កម្ពុជា កាលពីចុងខែមករា បានរកឃើញអ្នកផ្ទុកមេរោគកូរ៉ូណាជាជនជាតិចិនម្នាក់ មកពីទីក្រុង Wuhan ប្រទេសចិន។ អ្នកជំងឺនោះ ត្រូវបានព្យាបាលជាសះស្បើយ និងត្រូវបានអនុញ្ញាតឱ្យវិលទៅកាន់ប្រទេសកំណើត៕

March 7, 2020

21នាក់បានឆ្លងមេរោគ Covid-19 នៅលើនាវាទេសចរណ៍អាមេរិក

បុគ្គលិកនាវាចំនួន19នាក់ និងអ្នកទេសចរ 2នាក់នៅលើនាវាទេសចរណ៍ Grand Princess របស់អាមេរិក ត្រូវបានគេរកឃើញថាមានផ្ទុកមេរោគកូរ៉ូណា Covid-19 នេះបើតាមការឱ្យដឹងរបស់អនុប្រធានាធិបតីអាមេរិក កាលពីម្សិលមិញ។

នៅក្នុងសន្និសីទសារព័ត៌មានមួយ កាលពីថ្ងៃទី6មីនា លោក Mike Pence ដែលជាអនុប្រធានាធិបតីអាមេរិក បានឱ្យដឹងថា “វត្ថុវិភាគចំនួន 21 ត្រូវបានធ្វើតេស្តរកឃើញថាមានវីរុស Covid-19 ចំណែកវត្ថុវិភាគចំនួន 24ផ្សេងទៀតមិនមានមេរោគ។ វត្ថុវិភាគក្រៅពីនេះ មិនទាន់ចេញលទ្ធផលនៃការធ្វើតេស្តនៅឡើយ។ វត្ថុវិភាគដែលមានវីរុសគឺជារបស់នាវិក19នាក់ និងអ្នកទេសចរចំនួន2នាក់”។ នេះបើតាមសារព័ត៌មាន Reuters។

អនុប្រធានាធិបតីអាមេរិក បានបន្តថា “នាវា Grand Princess នឹងត្រូវនាំទៅកាន់កំពង់ផែ និងតម្រូវឱ្យផ្អាកធ្វើសកម្មភាពពាណិជ្ជកម្មនៅចុងសប្ដាហ៍នេះ ហើយអ្នកទេសចរ និងក្រុមនាវិកសរុប 3,533នាក់ ដែលនៅលើនាវានេះក៏នឹងត្រូវធ្វើតេស្តរកមេរោគ”។

សូមបញ្ជាក់ថា នាវា Grand Princess ត្រូវបានដាក់ឱ្យចតនៅដាច់ដោយឡែកលើលម្ហសមុទ្រ San Francisco កាលពីថ្ងៃទី5មីនា បន្ទាប់ពីអ្នកទេសចរ3នាក់បានឆ្លងមេរោគ Covid-19 ក្នុងនោះ មានអ្នកទេសចរវ័យ71ឆ្នាំម្នាក់ បានបាត់បង់ជីវិត។ នាវានេះ បានធ្វើដំណើរចេញពី San Francisco ទៅកាន់ Mexico កាលពីខែមុន។

គិតមកដល់ព្រឹកនេះ សហរដ្ឋអាមេរិក មានអ្នកឆ្លងមេរោគ Covid-19 ចំនួន 330នាក់ និងអ្នកស្លាប់ចំនួន 14នាក់ ខណៈដែលនៅទូទាំងពិភពលោក មានអ្នកស្លាប់ដោយសារវីរុសកូរ៉ូណា Covid-19 ឡើងដល់ 3,491នាក់៕

ប្រភព៖ សារព័ត៌មានបរទេស

March 7, 2020

ចំនួនអ្នកនាំមេរោគ Covid-19 ពីខាងក្រៅ បញ្ច្រាសត្រឡប់ចូលប្រទេសចិនវិញ កើនដល់ 28នាក់

ក្រុមមន្ត្រីសុខាភិបាលខេត្ត Gansu នៃប្រទេសចិន បានឱ្យដឹងថា ខេត្តនេះបានរកឃើញអ្នកផ្ទុកមេរោគ Covid-19 បន្ថែម 17ករណី ធ្វើឱ្យចំនួនអ្នកផ្ទុកមេរោគដែលមកពីប្រទេសអ៊ីរ៉ង់ កើនឡើងដល់ 28នាក់។

អ្នកផ្ទុកមេរោគ 17នាក់ខាងលើ ស្ថិតក្នុងចំណោមអ្នកដំណើរ 283នាក់ដែលកំពុងត្រូវបានបង្ខាំងក្នុងបន្ទប់ដាច់ដោយឡែក នាទីក្រុង Lanzhou នៃខេត្ត Gansu ប្រទេសចិន។ អ្នកទាំង 283នាក់នេះ មកកាន់ទីក្រុង Lanzhou តាមយន្តហោះ ចាប់ពីថ្ងៃទី 2-5 ខែមីនា នេះបើតាមការប្រកាសរបស់គណៈកម្មការសុខាភិបាលទីក្រុង Lanzhou កាលពីថ្ងៃទី6 ខែមីនា។

ប្រទេសចិន បានព្រមានអំពីហានិភ័យនៃការឆ្លងមេរោគ Covid-19 បញ្ច្រាសត្រឡប់ចូលប្រទេសចិនវិញ ពីប្រទេសផ្សេងៗក្នុងពិភពលោក នៅពេលដែលស្ថានភាពរោគរាតត្បាតនៅប្រទេសចិន មានភាពធូរស្រាល។ ខេត្ត Zhejiang កាលពីថ្ងៃទី2 និងទី3 ខែមីនា បានរកឃើញអ្នកផ្ទុកមេរោគចំនួន2ករណី ដែលពួកគេសុទ្ធតែជាអ្នកត្រឡប់មកពីសង្កាត់ Bergamo ក្នុងតំបន់ Lombardy ដែលជាសម្បុកមេរោគកូរ៉ូណាធំបំផុតនៅប្រទេសអ៊ីតាលី។

Gansu គឺជាខេត្តដំបូងគេរបស់ប្រទេសចិន ដែលបានទម្លាក់ការប្រកាសអាសន្នមកនៅត្រឹមកម្រិតទី3ក្នុងចំណោម4កម្រិតនៃការប្រកាសអាសន្ន កាលពីខែកុម្ភៈ ដោយសារតែតំបន់នេះ មានអ្នកឆ្លងមេរោគកូរ៉ូណាថ្មី មានកម្រិតទាប។ មុនពេលរកឃើញអ្នកផ្ទុកមេរោគ Covid-19 មកពីប្រទេសអ៊ីរ៉ង់ ខេត្ត Gansu ក៏ធ្លាប់មានអ្នកផ្ទុកមេរោគ នេះចំនួន 91នាក់ និងអ្នកស្លាប់ 2នាក់ផងដែរ៕

ប្រភព៖ សារព័ត៌មានបរទេស

March 7, 2020

មនុស្សជាង 102,000នាក់ បានឆ្លង និងស្លាប់ដោយសារមេរោគ Covid-19 នៅទូទាំងពិភពលោក ក្នុងនោះអ្នកបានជាសះស្បើយមានចំនួន 57,376នាក់

រោគរាតត្បាត Covid-19 បានបង្ហាញវត្តមាននៅក្នុងប្រទេស និងដែនដីចំនួនជិត100 នៅជុំវិញពិភព លោក បណ្ដាលឱ្យមានអ្នកផ្ទុកមេរោគនេះ ចំនួនជាង 102,050នាក់ ក្នុងនោះមាន 3,466នាក់ បានបាត់បង់ជីវិត។

ចំនួនករណីឆ្លងមេរោគ Covid-19 នៅប្រទេសអ៊ីតាលី និងអ៊ីរ៉ង់ កំពុងតែបន្តកើនឡើងយ៉ាងលឿន។ ប្រទេសអ៊ីតាលីបានរកឃើញអ្នកផ្ទុកមេរោគនេះបន្ថែម 778ករណី ធ្វើឱ្យចំនួនអ្នកបានឆ្លងមេរោគសរុបកើនដល់ 4,636នាក់ ខណៈដែលចំនួនអ្នកបានឆ្លងមេរោគនៅអ៊ីរ៉ង់ កើនដល់ 4,747នាក់។

អ៊ីតាលី គឺជាប្រទេសដែលមានករណីស្លាប់ដោយសារ Covid-19 ច្រើនជាងគេបំផុតក្នុងពិភពលោក បន្ទាប់ពីប្រទេសចិន ដោយចំនួនអ្នកស្លាប់បានឡើងដល់ 197នាក់ កើន 49ករណី បើធៀបនឹង1ថ្ងៃមុន។

ប្រទេសចិន បានប្រកាសថា បានរកឃើញអ្នកផ្ទុកមេរោគ Covid-19 បន្ថែម 99ករណី និងអ្នកស្លាប់ចំនួន28នាក់ នាំឱ្យចំនួនអ្នកបានឆ្លងមេរោគនេះកើនដល់ 80,651នាក់ និងអ្នកស្លាប់ កើនដល់ 3,070នាក់។

កូរ៉េខាងត្បូងបន្តក្លាយជាសម្បុកមេរោគ Covid-19 ធំជាងគេលំដាប់ទី2 បន្ទាប់ពីប្រទេសចិន នៅពេលមានអ្នកឆ្លងមេរោគចំនួន 6,593នាក់ កើន 309នាក់ បើធៀបនឹង1ថ្ងៃមុន។ ប្រទេសនេះ មានអ្នកស្លាប់សរុប 43នាក់។

ប្រទេសអាល្លឺម៉ង់ មានអ្នកផ្ទុកមេរោគនេះ ចំនួន670នាក់ ខណៈដែលប្រទេសបារាំងមានចំនួន 653នាក់។

គិតមកដល់ពេលនេះ (7មីនា) ពិភពលោកទាំងមូល មានអ្នកផ្ទុកមេរោគកូរ៉ូណា ចំនួនជាង 102,050នាក់ ក្នុងនោះមានអ្នកស្លាប់ 3,494នាក់ និងអ្នកបានជាសះស្បើយ 57,611នាក់៕

ប្រភព៖ សារព័ត៌មានបរទេស

March 7, 2020

Facebook បិទការិយាល័យប្រចាំទីក្រុងឡុងដ៍ បុគ្គលិក3,000នាក់ ត្រូវធ្វើការនៅឯផ្ទះ ព្រោះតែបុគ្គលិកម្នាក់បានឆ្លង Covid-19

ក្រុមហ៊ុនបណ្ដាញសង្គមយក្ស Facebook បានប្រកាសថា បុគ្គលិកដែលបានឆ្លងមេរោគកូរ៉ូណាដែលធ្វើការនៅសិង្ហបុរី ធ្លាប់បានទៅកាន់ការិយាល័យនៅក្នុងទីក្រុងឡុងដ៍ កាលពីខែមុន។ ដូច្នេះ Facebook ត្រូវបង្ខំចិត្ត បិទការិយាល័យទាំងនេះ ដើម្បីបាញ់ថ្នាំសម្លាប់មេរោគ និងទប់ស្កាត់ការឆ្លងរាលដាល។

ក្រុមហ៊ុន Facebook នឹងបិទការិយាល័យចំនួន3 ដែលមានទីតាំងនៅទីក្រុងឡុងដ៍ ប្រទេសអង់គ្លេស រហូតដល់ថ្ងៃចន្ទ បន្ទាប់ពីបុគ្គលិកម្នាក់របស់ក្រុមហ៊ុននេះ បានឆ្លងមេរោគ Covid-19 និងធ្លាប់បានទៅកាន់ការិយាល័យ Facebook ទាំងនោះ ចាប់ពីថ្ងៃទី24-26កុម្ភៈកន្លងទៅ។

ចំណែកបុគ្គលិកផ្សេងៗទៀតនៅទីក្រុងឡុងដ៍ Facebook បានតម្រូវឱ្យពួកគេធ្វើការងារនៅឯផ្ទះរៀងៗខ្លួន។ បច្ចុប្បន្ន ក្រុមហ៊ុនបណ្ដាញសង្គមយក្ស Facebook មានបុគ្គលិកចំនួន 3,000នាក់ កំពុងធ្វើការនៅទីក្រុងឡុងដ៍ ប្រទេសអង់គ្លេស។

គេមិនទាន់ដឹងថា មានមនុស្សប៉ុន្មាននាក់នោះទេដែលបានប៉ះពាល់ ឬនៅក្បែរបុគ្គលិកដែលមានផ្ទុក Covid-19នេះ ប៉ុន្តែ Facebook បានឱ្យដឹងថា ក្រុមហ៊ុននេះកំពុងខិតខំស្រាវជ្រាវលើរឿងនេះ។ បុគ្គលិកទាំងអស់ដែលធ្វើការនៅឯទីក្រុងឡុងដ៍ ត្រូវបានស្នើឱ្យនៅដាច់ដោយឡែកពីគេ ហើយត្រូវយកចិត្តទុកដាក់ប្រសិនបើពួកគេមានរោគសញ្ញាចម្លែក៕

ប្រភព៖ សារព័ត៌មានបរទេស

March 7, 2020

Covid-19 ឆ្លងពេញពិភពលោក អ្នកស្រុក Wuhan ដែលជាប់នៅខាងក្រៅ នាំគ្នាត្រឡប់មកសម្បុកមេរោគវិញ

នៅពេលរោគរាតត្បាត Covid-19 បានឆ្លងរាលដាលពាសពេញពិភពលោក ព្រមទាំងមានភាពស្មុគស្មាញខ្លាំង អ្នកស្រុក Wuhan ដែលបានជាប់នៅខាងក្រៅតំបន់នេះ ក៏នាំគ្នាវិលត្រឡប់មកស្រុកកំណើតរបស់ខ្លួនដែលជាសម្បុកមេរោគដំបូងនៃ Covid-19។

តំបន់ Wuhan នៃខេត្ត Hubei ហាក់ត្រូវបានកាត់ផ្ដាច់ពីពិភពលោកខាងក្រៅ ចាប់តាំងពីថ្ងៃទី 23មករា ឆ្នាំ2020 បន្ទាប់ពីរដ្ឋាភិបាលចិន បានអនុវត្តវិធានការដែលមិនធ្លាប់មានពីមុនមក នោះគឺ បិទការចេញ-ចូលខេត្ត Hubei ដើម្បីទប់ស្កាត់ការឆ្លងរាលដាលនៃរោគរាតត្បាត Covid-19។

នៅពេលស្ថានភាព Covid-19 នៅប្រទេសចិន ចាប់ផ្ដើមត្រូវបានគ្រប់គ្រងបន្តិចម្ដងៗ ប្រជាជនមួយចំនួនដែលមានស្រុកកំណើតនៅក្នុងខេត្ត Hubei ដែលបានជាប់នៅខាងក្រៅខេត្តនេះ ព្រោះតែបម្រាមគោចរ ពេលនេះ អាចត្រឡប់មកស្រុកវិញ ដោយពួកគេជឿថា ផ្ទះគឺនៅតែជាកន្លែងសុវត្ថិភាពបំផុត។ នេះបើតាមសារព័ត៌មាន AFP។

ស្ត្រីម្នាក់ឈ្មោះ Zhao មានអាយុ 30ឆ្នាំ ដែលវិលត្រឡប់មកស្រុកកំណើតនៅឯទីក្រុង Wuhan ជាមួយស្វាមីនាងឈ្មោះ Gao បានឱ្យដឹងថា “មនុស្សដែលមកពីបរទេស មកកាន់ប្រទេសចិន អាចធ្វើឱ្យមានការផ្ទុះឆ្លងរាលដាលនៃមេរោគ Covid-19 ជាថ្មីម្ដងទៀត ដូច្នេះ នៅក្នុងទីក្រុង Wuhan អាចជាកន្លែងមានសុវត្ថិភាពនៅពេលនេះ”។

Zhao បានប្រាប់ថា ពួកគេបានដឹងថា នៅឯស្រុកកំណើតនាទីក្រុង Wuhan ត្រូវបានគេបិទការចេញ-ចូល នៅពេលដែលខ្លួនកំពុងស្ថិតនៅក្នុងទីក្រុង Changchun នៃខេត្ត Jilin។ នៅទីនេះ ពួកគេព្រួយបារម្ភយ៉ាងខ្លាំងចំពោះគ្រួសារដែលកំពុងនៅក្នុងទីក្រុង Wuhan ហើយពេលខ្លះ ពួកគេត្រូវអ្នកស្រុកផ្សេងរើសអើង ព្រោះតែមកពីពួកគេមកពី Wuhan។

ពេលបានមកដល់ Wuhan ដែលជាស្រុកកំណើត ពួកគេ (Zhao និង Gao) មានការសប្បាយចិត្តជាខ្លាំង។ ក៏ប៉ុន្តែ ពួកគេមិនទាន់បានជួបជុំគ្រួសារម្ដងណាឡើយ ដោយសារត្រូវអាជ្ញាធរដាក់ឱ្យនៅដាច់ដោយឡែកក្នុងរយៈពេល 14ថ្ងៃដើម្បីតាមដានសុខភាព។

Gao និយាយថា ឪពុកម្ដាយរបស់គាត់ សំណាងណាស់ដែលនៅមានសុខភាពល្អ ប៉ុន្តែ មិត្តភក្ដិមួយចំនួនរបស់គាត់ បានឆ្លងមេរោគ Covid-19 នេះ។ ក៏ប៉ុន្តែ ទោះជាយ៉ាងនេះក្ដី អ្នកស្រុក Wuhan បានចាប់ផ្ដើមនាំគ្នាត្រឡប់មកស្រុកកំណើតវិញ។ Zhao និយាយថា “ដំណាក់កាលគួរឱ្យខ្លាចបំផុតបានកន្លងផុតទៅហើយ”។

ទោះជាយ៉ាងណាក៏ដោយ ទីក្រុង Wuhan ក្នុងខេត្ត Hubei នៃប្រទេសចិន នៅតែស្ងប់ស្ងាត់នៅឡើយ

បើទោះជាបម្រាមគោចររបស់អាជ្ញាធរ បានកាត់បន្ថយការធ្វើដំណើរចេញ-ចូលខេត្ត Hubei ពិសេសគឺទីក្រុង Wuhan ក៏ប៉ុន្តែ រថភ្លើងល្បឿនលឿន នៅតែធ្វើដំណើរកាត់តាមខេត្តនេះ និងតែងឈប់នៅស្ថានីយមួយកន្លែងក្នុងទីក្រុង Wuhan។ ដូច្នេះ ការធ្វើដំណើរត្រឡប់ចូលស្រុកកំណើតវិញ គឺអាចធ្វើទៅបាន ប៉ុន្តែ វានៅមានការលំបាកខ្លាំងនៅឡើយ។

គិតមកដល់ថ្ងៃទី 6មីនានេះ ប្រទេសចិន មានអ្នកឆ្លងមេរោគកូរ៉ូណា Covid-19 សរុបចំនួន 80,556នាក់ ក្នុងនោះមានអ្នកស្លាប់ 3,042នាក់ ខណៈពិភពលោក មានអ្នកផ្ទុកមេរោគសរុប 100,330នាក់ ក្នុងនោះមានអ្នកស្លាប់ចំនួន 3,408នាក់៕

ប្រភព៖ សារព័ត៌មានបរទេស

March 6, 2020

អ្នកឆ្លង Covid-19 បានកើនដល់ជាង 100,330នាក់នៅទូទាំងពិភពលោក ខណៈកម្ពុជាមានមនុស្សចំនួនជាង…

គិតមកដល់ម៉ោងជិត10យប់ ថ្ងៃទី6 ខែមីនា ឆ្នាំ2020 តួលេខនៃអ្នកបានឆ្លងមេរោគ Covid-19 នៅទូទាំងពិភពលោក បានកើនឡើងដល់ 100,330នាក់ហើយ ក្នុងនោះគេឃើញថា ចំនួនអ្នកឆ្លងមេរោគថ្មីបន្ថែមនៅប្រទេសចិន បានថយចុះគួរឱ្យកត់សម្គាល់។

ទន្ទឺមនឹងការថយចុះនៃចំនួនអ្នកឆ្លងមេរោគកូរ៉ូណាថ្មីបន្ថែមនៅប្រទេសចិន គេឃើញថា តួលេខនៃអ្នកឆ្លងមេរោគនៅតាមបណ្ដាប្រទេសក្រៅពីប្រទេសចិន បែរជាកើនឡើងខ្លាំងគួរឱ្យព្រួយបារម្ភ។ ប្រទេសដែលមានអ្នកផ្ទុកមេរោគច្រើនជាងគេបង្អស់ក្នុងពិភពលោកក្រៅពីប្រទេសចិន មានដូចជាកូរ៉េខាងត្បូងមានអ្នកឆ្លងរោគឡើងដល់6,593នាក់ ប្រទេសអ៊ីរ៉ង់4,747នាក់ ប្រទេសអ៊ីតាលី3,858នាក់ ប្រទេសអាល្លឺម៉ង់577នាក់ បារាំង432នាក់ ជប៉ុន381នាក់ អេស្ប៉ាញ360នាក់ និងអាមេរិកមានអ្នកឆ្លងមេរោគនេះចំនួន233នាក់ រួមនឹងប្រទេសផ្សេងៗជាច្រើនទៀត។

ក្នុងចំណោមប្រទេសដែលមានអ្នកស្លាប់ដោយសារមេរោគកូរ៉ូណាច្រើនជាងគេបង្អស់ គេឃើញថាប្រទេសអ៊ីតាលីបានឈរលំដាប់់លេខ2 បន្ទាប់ពីប្រទេសចិន ដោយមានអ្នកស្លាប់សរុបចំនួន148នាក់។ ឈរលេខ3 គឺប្រទេសអ៊ីរ៉ង់ ដោយមានអ្នកស្លាប់124នាក់ និងកូរ៉េខាងត្បូងមានអ្នកស្លាប់ចំនួន42នាក់។

នៅប្រទេសកម្ពុជាវិញ មកដល់ពេលនេះ មិនទាន់មានសេចក្ដីរាយការណ៍អំពីករណីបាត់បង់ជីវិតដោយសារមេរោគកូរ៉ូណានៅឡើយ។ ប៉ុន្តែ កម្ពុជាមានមនុស្សចំនួន44នាក់កំពុងត្រូវបានដាក់ឱ្យនៅក្រោមការតាមដានសុខភាពពីសំណាក់ក្រសួងសុខាភិបាលនៅឯខេត្តសៀមរាប ក្នុងនោះមាន4នាក់ត្រូវគេដាក់ឱ្យនៅដាច់ដោយឡែក ព្រោះសង្ស័យថា បានឆ្លងមេរោគកូរ៉ូណាពីបុរសជនជាតិជប៉ុនម្នាក់ ដែលបច្ចុប្បន្នជនជាតិជប៉ុនម្នាក់នោះ កំពុងទទួលការព្យាបាលនៅឯប្រទេសជប៉ុន៕

March 6, 2020

Covid-19៖ មនុស្ស4នាក់ដែលត្រូវដាក់ឱ្យនៅដាច់ដោយឡែកក្នុងមន្ទីរពេទ្យខេត្តសៀមរាប មិនទាន់មានរោគសញ្ញាអ្វីឡើយ

រដ្ឋលេខាធិការ និងជាអ្នកនាំពាក្យក្រសួងសុខាភិបាល លោកជំទាវវេជ្ជបណ្ឌិត ឱ វណ្ណឌីន បានថ្លែងប្រាប់អ្នកសារព័ត៌មាននៅឯមន្ទីរពេទ្យបង្អែកខេត្តសៀមរាបថា មនុស្សទាំង4នាក់ (ស្រី2នាក់ ប្រុស2នាក់) ដែលត្រូវបានដាក់នៅក្នុងបន្ទប់ដាច់ដោយឡែក នៅក្នុងមន្ទីរពេទ្យបង្អែកខេត្តសៀមរាបនេះ នៅមានសុខភាពល្អធម្មតា និងមិនទាន់មានរោគសញ្ញាអ្វីគួរឱ្យចាប់អារម្មណ៍នោះទេ គិតត្រឹមវេលាថ្ងៃត្រង់ ថ្ងៃទី6មីនានេះ។

មនុស្សទាំង4នាក់ខាងលើ ក៏បានប្រាប់អ្នកតំណាងក្រសួងសុខាភិបាលដែរថា នៅកន្លែងធ្វើការរបស់ជនជាតិជប៉ុនម្នាក់ដែលពួកគេធ្វើការជាមួយនោះ បានអនុវត្តវិធានការការពារសុខភាពបានល្អណាស់។ ពួកគេបាននិយាយថា ជនជាតិជប៉ុនម្នាក់នោះ តែងឱ្យពួកគេឈរចម្ងាយ1ម៉ែត្រពីគាត់ នៅពេលនិយាយគ្នា បន្ទាប់ពីគាត់ដឹងថា ខ្លួនគាត់មិនសូវស្រួលខ្លួន។ នេះបើតាមសារព័ត៌មាន AKP។

ជនជាតិជប៉ុនម្នាក់ខាងលើនេះ ធ្លាប់បានធ្វើដំណើរទៅកាន់ប្រទេសជាច្រើនក្នុងតំបន់អាស៊ីអាគ្នេយ៍ មុននឹងបានត្រឡប់មកកាន់កម្ពុជា រួចចាកចេញពីខេត្តសៀមរាបទៅកាន់ប្រទេសជប៉ុន។

គិតមកដល់ពេលនេះ រោគរាតត្បាត Covid-19 បានរាលដាលដល់ប្រទេសជាច្រើនក្នុងពិភពលោក ក្នុងនោះ មានប្រទេសមួយចំនួនដែលរងផលប៉ះពាល់ច្រើនជាងគេក្រៅពីប្រទេសចិន ដូចជា ប្រទេសកូរ៉េខាងត្បូង (មានអ្នកជំងឺ 6,593នាក់) ប្រទេសអីតាលី (មានអ្នកជំងឺ 3,858នាក់) ប្រទេសអ៊ីរ៉ង់ (មានអ្នកជំងឺ 3,513នាក់) រួមនឹងប្រទេសជាច្រើនផ្សេងទៀត៕

ប្រភព៖ សារព័ត៌មានបរទេស

March 6, 2020

ក្រសួងនឹងរកអគារមួយសម្រាប់ដាក់មនុស្សទាំង40នាក់ដែលសង្ស័យថាបានឆ្លង Covid-19 ដោយប្រយោលពីជនជាតិជប៉ុនម្នាក់នៅខេត្តសៀមរាប

មួយផ្នែកនៃមន្ទីរពេទ្យបង្អែកខេត្តសៀមរាប បានក្លាយកន្លែងសម្រាប់ដាក់មនុស្សចំនួន4នាក់ ដែលកំពុងត្រូវបានសង្ស័យថាបានឆ្លងមេរោគកូរ៉ូណា Covid-19 ដោយផ្ទាល់ពីជនជាតិជប៉ុនម្នាក់ដែលត្រូវបានអាជ្ញាធរជប៉ុនរកឃើញថាមានផ្ទុកមេរោគកូរ៉ូណា។

មកដល់ពេលនេះ ក្រសួងសុខាភិបាល បានបង្កើតទីតាំងមួយសម្រាប់ដាក់មនុស្សទាំង4នាក់ខាងលើនេះហើយ ដោយយកបន្ទប់ធំមួយនៅក្នុងមន្ទីរពេទ្យបង្អែកខេត្តសៀមរាបធ្វើជាកន្លែងព្យាបាលដាច់ដោយឡែក ឬហៅថា ចត្តាឡីស័ក។

ចំណែកមនុស្សចំនួន40នាក់ដែលធ្លាប់បានប៉ះពាល់ដោយប្រយោលជាមួយនឹងអ្នកជំងឺជនជាតិជប៉ុននោះ ក្រសួងក៏នឹងរៀបចំអគារមួយសម្រាប់តាមដានសុខភាពរបស់ពួកគេផងដែរ។ រដ្ឋលេខាធិការ និងជាអ្នកនាំពាក្យក្រសួងសុខាភិបាល លោកស្រី ឱ វ៉ាន់ឌីន គឺជាអ្នកចាត់ចែងកិច្ចការខាងលើនេះ។

សូមបញ្ជាក់ថា មូលហេតុដែលនាំឱ្យមានវិធានការខាងលើ គឺកើតឡើងបន្ទាប់ពីជនជាតិជប៉ុនម្នាក់នៅខេត្តសៀមរាប ត្រូវបានអាជ្ញាធរជប៉ុនពិនិត្យឃើញថាមានផ្ទុកមេរោគ Covid-19 ក្រោយពីបុរសម្នាក់នេះ បានធ្វើដំណើរតាមជើងហោះហើរមួយរបស់ក្រុមហ៊ុនអាកាសចរណ៍វៀតណាម ចេញចំណើរពីខេត្តសៀមរាប ឆ្ពោះទៅកាន់ប្រទេសជប៉ុន ដោយបានចុះចត និងប្ដូរយន្តហោះក្នុងប្រទេសវៀតណាម ហើយបានបន្តដើម្បីទៅកាន់ប្រទេសជប៉ុន។

ជនជាតិជប៉ុនម្នាក់ខាងលើនេះ ធ្លាប់បានធ្វើដំណើរទៅកាន់ប្រទេសជាច្រើនក្នុងតំបន់អាស៊ីអាគ្នេយ៍ មុននឹងត្រឡប់មកកាន់កម្ពុជា និងចាកចេញពីខេត្តសៀមរាបទៅកាន់ប្រទេសជប៉ុន៕

March 6, 2020

ទិដ្ឋភាពដ៏ស្រស់ស្អាត នៅឯមន្ទីរពេទ្យ Wuhan ដែលធ្វើឱ្យមានការចាប់អារម្មណ៍ខ្លាំង នៅប្រទេសចិន

Liu Kai អាយុ 27ឆ្នាំ ជាវេជ្ជបណ្ឌិតម្នាក់នៅឯមន្ទីរពេទ្យ Renmin បានសួរអ្នកជំងឺរបស់ខ្លួនបន្ទាប់ពីនាំគាត់ទៅថត CT កាលពីថ្ងៃទី3មីនាថា ៖ “លោកចូលចិត្តទិដ្ឋភាពថ្ងៃរៀបលិចដែរទេ?”។

អ្នកជំងឺវ័យ 87ឆ្នាំ ដែលកំពុងស្ថិតនៅលើគ្រែសម្រាប់អ្នកជំងឺ ក៏ឆ្លើយថា “វាស្អាតខ្លាំងណាស់”។ បានឮដូច្នេះ វេជ្ជបណ្ឌិត Liu ក៏បានរុញគ្រែ និងអ្នកជំងឺដោយថ្នមៗ ចេញទៅខាងក្រៅមន្ទីរពេទ្យ និងគយគន់ទិដ្ឋភាពថ្ងៃរៀបលិចជាមួយគ្នា។

អ្នកជំងឺស្ថិតនៅលើគ្រែ ចំណែកលោកវេជ្ជបណ្ឌិត Liu ស្ថិតក្នុងសម្លៀកបំពាក់ការពារមេរោគ ដែលគ្របដណ្ដប់ជិតពីក្បាល ដល់ចុងជើង។ អ្នកទាំង2 បានឆ្លៀតឱកាសដ៏កម្រនេះដើម្បីទទួលយកពន្លឺស្រាលៗពីព្រះអាទិត្យដែលកំពុងតែរៀបអស្ដង្គត នៅឯទីក្រុង Wuhan ប្រទេសចិន។ រូបថតត្រូវបានថតដោយបុគ្គលិកពេទ្យម្នាក់ដែលដើរជាមួយពួកគេ បានធ្វើឱ្យមានការភ្ញាក់ផ្អើលខ្លាំងនៅលើសណ្ដាញសង្គម ក៏ដូចជាសារព័ត៌មាននៅប្រទេសចិនកាលពីម្សិលមិញ បន្ទាប់ពីវាត្រូវបានបង្ហោះ និងចុះផ្សាយ។

លោកវេជ្ជបណ្ឌិត Liu ថ្លែងថា “អ្នកជំងឺនេះ មិនបានឃើញពន្លឺថ្ងៃអស់រយៈពេល1ខែមកហើយ។ គាត់សប្បាយចិត្តខ្លាំងណាស់ នៅពេលបានឈរក្រោមកម្ដៅព្រះអាទិត្យជាមួយគ្នា”។ លោក Liu ឱ្យដឹងថា ខ្លួនគាត់ផ្ទាល់ ដូចជាមិនមានឱកាសមើលឃើញព្រះអាទិត្យ ព្រោះតែបានចំណាយពេលច្រើននៅក្នុងមន្ទីរពេទ្យ។

បន្ទាប់ពីបានបង្ហោះនៅលើបណ្ដាញសង្គម រូបថតខាងលើ បានធ្វើឱ្យមានការចាប់អារម្មណ៍ខ្លាំងពីសំណាក់អ្នកប្រើប្រាស់បណ្ដាញសង្គមនៅប្រទេសចិន។ មនុស្សម្នាក់បានបញ្ចេញមតិថា “មិនត្រឹមតែព្រះអាទិត្យនោះទេ ប៉ុន្តែរូបថតនេះក៏បានបង្ហាញអំពីក្ដីសង្ឃឹម ឬទិដ្ឋភាពដ៏កក់ក្ដៅ ដោយពន្លឺនៅចំពីមុខរបស់ពួកគេ”។

ក្រោយមក លោកវេជ្ជបណ្ឌិត Liu ក៏បាននាំអ្នកជំងឺនេះត្រឡប់ចូលមន្ទីរពេទ្យវិញ ហើយអ្នកជំងឺនេះក៏បានសម្រាន្តលង់លក់ទៅ។

វេជ្ជបណ្ឌិត Liu បានរៀបរាប់ថា អ្នកជំងឺវ័យ 87ឆ្នាំរូបនេះ កំពុងស្ថិតក្នុងស្ថានភាពធ្ងន់ធ្ងរ ប៉ុន្តែ ក្រុមគ្រូសារមិនអាចមកមើលអ្នកជំងឺញឹកញាប់បាន ដោយសារបញ្ហាសុវត្ថិភាព និងការដើរហើរ។ ដូច្នេះ អ្នកជំងឺនេះត្រូវបានថែទាំងដោយក្រុមបុគ្គលិកពេទ្យ។

ក្នុងរយៈពេល20ថ្ងៃនៃការព្យាបាល សុខភាពរបស់អ្នកជំងឺខាងលើ ក៏បានល្អប្រសើរឡើងវិញបន្តិចម្ដងៗ។ នេះបើតាម Global Times។

ក្រុមរបស់លោកវេជ្ជបណ្ឌិត Liu កំពុងតែធ្វើការនៅឯមន្ទីរពេទ្យ Renmin នៃមហាវិទ្យាល័យ Wuhan ដែលជាកន្លែងសម្រាប់ព្យាបាលអ្នកជំងឺដែលមានអាការធ្ងន់ធ្ងរ ឬកំពុងប្រឈមនឹងការបាត់បង់ជីវិត។

លោក Liu បន្តថា “អ្នកជំងឺស្ទើរតែទាំងអស់ មានសុខភាពល្អឡើងវិញ ហើយអ្នកជំងឺមួយចំនួនត្រូវបានអនុញ្ញាតឱ្យចេញពីមន្ទីរពេទ្យ”៕

ប្រភព៖ សារព័ត៌មានបរទេស

March 6, 2020

សមាជិកសភាបារាំង ឆ្លងមេរោគ Covid-19 ខណៈអ្នកជំងឺ 23នាក់ផ្សេងទៀតកំពុងស្ថិតក្នុងស្ថានភាពគ្រោះថ្នាក់ដល់ជីវិត

សមាជិកសភាបារាំងម្នាក់ត្រូវបានបញ្ជូនទៅកាន់មន្ទីរពេទ្យបន្ទាន់ដើម្បីព្យាបាលជំងឺ បន្ទាប់ពីពិនិត្យឃើញថា មានផ្ទុកមេរោគកូរ៉ូណា Covid-19។

សភាជាន់ទាបរបស់បារាំង បានចេញសេចក្ដីប្រកាសកាលពីថ្ងៃទី 5មីនា ឱ្យដឹងថា តំណាងរាស្ត្រមួយរូបរបស់ប្រទេសនេះ ត្រូវបានបញ្ជូនទៅកាន់មន្ទីរពេទ្យ ក្រោយពីបានឆ្លងវីរុស Covid-19 ដែលមេរោគនេះកំពុងសម្លាប់មនុស្សជារៀងរាល់ថ្ងៃ។

បុគ្គលិកម្នាក់ដែលធ្វើការនៅក្នុងវិមានសភាបារាំង ក៏ត្រូវបានរកឃើញថាមានផ្ទុកមេរោគកូរ៉ូណានេះដែរ ហើយក៏កំពុងបង្ខាំងខ្លួននៅឯផ្ទះ។ ក្នុងសេចក្ដីប្រកាសខាងលើ ក៏បានឱ្យដឹងថា បុគ្គលិកម្នាក់ផ្សេងទៀតដែលធ្វើការនៅក្នុងអាហារដ្ឋានរបស់ក្រុមអ្នកតំណាងរាស្ត្របារាំង ក៏ត្រូវបានសង្ស័យថា បានឆ្លងមេរោគកូរ៉ូណា ក្រោយមកបុគ្គលិកម្នាក់នេះក៏ត្រូវបានបញ្ជូនទៅកាន់មន្ទីរពេទ្យ។

សេចក្ដីប្រកាសរបស់សភាជាន់ទាបបារាំង មិនបានប្រាប់ឱ្យដឹងអំពិឈ្មោះរបស់សមាជិកសភាដែលបានឆ្លងមេរោគកូរ៉ូណានេះនោះទេ ប៉ុន្តែ បានសង្កត់ធ្ងន់ថា មនុស្សទាំងអស់ដែលធ្វើការនៅក្នុងវិមានសភានេះ ត្រូវបានជូនដំណឹងរួចរាល់ហើយអំពីករណីខាងលើ។ នេះបើតាមសារព័ត៌មាន Straits Times។

កាលពីថ្ងៃទី5មីនាកន្លងទៅ ប្រធានាធិបតីបារាំង លោក Emmanuel Macron បានជួបពិភាក្សាជាមួយក្រុមអ្នកវិទ្យាសាស្ត្រ និងក្រុមអ្នកជំនាញ ដើម្បីស្វែងរកវិធីទប់ស្កាត់ការឆ្លងរាលដាលខ្លាំងនៃមេរោគ Covid-19 នៅប្រទេសនេះ។

ប្រទេសបារាំង បច្ចុប្បន្ន មានអ្នកផ្ទុកមេរោគ Covid-19 ចំនួន 423នាក់ ក្នុងនោះមានអ្នកស្លាប់ 7នាក់។ រដ្ឋមន្ត្រីក្រសួងសុខាភិបាលបារាំង Jérôme Salomon បានឱ្យដឹងថា ក្នុងចំណោមអ្នកផ្ទុកមេរោគនេះ មានអ្នកជំងឺ 23នាក់កំពុងស្ថិតក្នុងស្ថានភាពគ្រោះថ្នាក់ដល់ជីវិត៕

ប្រភព៖ សារព័ត៌មានបរទេស

March 6, 2020

Tag: សុខភាព