សុខភាព - La Reine Media

មន្ត្រីអន្តោប្រវេសន៍2រូបនៅអាកាសយានដ្ឋាន ដែលបានឆ្លង COVID-19 ប្រហែលជាបានចម្លងមេរោគនេះ ទៅឱ្យអ្នកដំណើរជាច្រើន មុនពេលពួកគេត្រូវធ្វើតេស្តរកមេរោគ

បុគ្គលិកផ្នែកអន្តោប្រវេសន៍ថៃ2រូបនៅព្រលានយន្តហោះសុវណ្ណភូមិ ក្នុងទីក្រុងបាងកក ត្រូវបានធ្វើតេស្តឃើញថា មានផ្ទុកមេរោគកូរ៉ូណា ដែលករណីនេះត្រូវបានគេជឿថា មានអ្នកដំណើរជាច្រើនត្រូវឆ្លងរោគកូរ៉ូណាពីមន្ត្រីទាំងនេះមិនខាន។

Sopon Iamsirithaworn ដែលជាមន្ត្រីម្នាក់មកពីនាយកដ្ឋានប្រយុទ្ធនឹងជំងឺរបស់ប្រទេសថៃ បានឱ្យដឹងថា បុគ្គលិកទី2រូបដែលមានតួនាទីគ្រប់គ្រងផ្នែកអន្តោប្រវេសន៍នេះ ត្រូវបានក្រុមគ្រូពេទ្យឱ្យដឹងថា បានឆ្លងមេរោគកាលពីថ្ងៃទី7មីនា និងទី8មីនា។ មន្ត្រីខាងលើបន្តថា បុគ្គលិកទាំង2នាក់នេះ ប្រហែលជាបានប៉ះពាល់អ្នកដំណើរជាច្រើនរូប មុនពេលពួកគេត្រូវបានពិនិត្យ និងរកឃើញមេរោគនេះ។

រដ្ឋមន្ត្រីក្រសួងមហាផ្ទៃនៃប្រទេសថៃ ក្នុងថ្ងៃនេះក៏បានប្រកាសថានឹងផ្អាកផ្ដល់ទិដ្ឋាការទៅឱ្យពលរដ្ឋកូរ៉េខាងត្បូង អ៊ីតាលី និងហុងកុងផងដែរ។

ប្រទេសថៃ បច្ចុប្បន្ន មានអ្នកឆ្លងជំងឺកូរ៉ូណាចំនួន59ករណី ក្នុងនោះមានអ្នកជំងឺម្នាក់កំពុងស្ថិតក្នុងស្ថានភាពអាសន្ន និង34នាក់បានជាសះស្បើយ។ ក្រុមហ៊ុនអាកាសចរណ៍ថៃ Thai Airways បានឱ្យដឹងថា ចាប់ពីថ្ងៃទី13មីនា ក្រុមហ៊ុននេះនឹងផ្អាកជើងហោះហើរទាំងអស់ដែលហោះទៅកាន់ប្រទេសអ៊ីតាលី ដែលជាតំបន់មួយមានអ្នកផ្ទុកមេរោគកូរ៉ូណាជាង 10,000នាក់ និងអ្នកស្លាប់ជាង600នាក់៕

ប្រភព៖ សារព័ត៌មានបរទេស

March 11, 2020

ប្រសាសន៍សម្ដេច ហ៊ុន សែន ល្បីដល់អឺរ៉ុប សារព័ត៌មានប្រទេសអង់គ្លេសបង្ហាញរូបភាព ព្រះអង្គម្ចាស់ ឆាលស៍ ទ្រង់ “សំពះ” ជំនួសការចាប់ដៃ ការពារការឆ្លងមេរោគ COVID-19

វេបសាយ ឌឹ ដេលី មីរើរ របស់ប្រទេសអង់គ្លេស បានរាយការណ៍ថា នៅក្នុងពិធីការមួយនៃបណ្ដាញសាខាចក្រភព នៅឯព្រះមហាវិហារ វេស្ទ មីនស្ទើរ ក្នុងទីក្រុងឡុងដ្រ៍ ប្រទេសអង់គ្លេស កាលពីថ្ងៃទី9 មីនា កន្លងទៅ ដែលមានខ្សែព្រះរាជវង្សានុវង្សលំដាប់ខ្ពស់ចូលរួមចំនួនដ៏ច្រើននោះ ក្នុងអំឡុងពេលស្វាគមន៍មន្ត្រីអ្នកមុខអ្នកការទាំងឡាយ ព្រះអង្គម្ចាស់ ឆាលស៍ មកុដរាជកុមារ នៃព្រះរាជាណាចក្រអង់គ្លេស ទ្រង់បានបដិសេធក្នុងការចាប់ដៃស្វាគមន៍ភ្ញៀវ(បែបអឺរ៉ុប)នៅក្នុងពិធី ដោយព្រះអង្គបានប្រើវិធី “សំពះ” ជំនួសវិញ ដែលបណ្ដាលមកពីការភ័យបារម្ភពាក់ព័ន្ធនឹងការឆ្លងរាលដាលរបស់មេរោគវីរុសកូរ៉ូណាប្រភេទថ្មី ឬ COVID-19 ដែលកំពុងរាតត្បាតខ្លាំងទូទាំងទ្វីបអឺរ៉ុបនាពេលបច្ចុប្បន្នេះ៕

ប្រភព៖ សារព័ត៌មានបរទេស

March 11, 2020

ចំនួនអ្នកឆ្លងវីរុស COVID-19 នៅសហរដ្ឋអាមេរិក កើនលើសពី1,000នាក់ទៅហើយ

ចំនួនមនុស្សដែលបានឆ្លងវីរុស COVID-19 នៅសហរដ្ឋអាមេរិក បានកើនឡើងលើសពី1,000នាក់ហើយ នេះបើតាមស្ថិតិថ្មីបំផុត។

យោងតាមស្ថិតិរបស់ទីភ្នាក់ងារសារព័ត៌មាន CNN និងសកលវិទ្យាល័យ Johns Hopkins ចំនួនអ្នកបានឆ្លងមេរោគ COVID-19 នៅសហរដ្ឋអាមេរិក គិតមកដល់ពេលនេះ បានកើនលើសពី1,000នាក់។ ចំនួនអ្នកជំងឺដែលត្រូវបានទទួលស្គាល់ដោយអាជ្ញាធរ បានកើនទ្វេដង ចាប់ពីថ្ងៃទី8មីនា ឆ្នាំ2020។

តួលេខនៃអ្នកស្លាប់ដោយសារវីរុស COVID-19 នៅសហរដ្ឋអាមេរិក មកដល់ពេលនេះ ក៏បានកើនដល់31នាក់។

យោងតាមមជ្ឈមណ្ឌលគ្រប់គ្រង និងទប់ស្កាត់រោគរបស់សហរដ្ឋអាមេរិក វីរុសបង្កជំងឺរលាកសួតប្រភេទថ្មីនេះ បានបង្ហាញខ្លួននៅក្នុងរដ្ឋចំនួន35 នៅទូទាំងសហរដ្ឋអាមេរិក។ ជិតពាក់កណ្ដាលនៃអ្នកជំងឺ គឺស្ថិតនៅក្នុងរដ្ឋចំនួន3 គឺ រដ្ឋ Washington រដ្ឋ California និងរដ្ឋ New York។

Washington បច្ចុប្បន្ន នៅតែជារដ្ឋដែលទទួលរងផលអាក្រក់បំផុតពីរោគរាតត្បាត COVID-19 នៅសហរដ្ឋអាមេរិក ដោយមានអ្នកជំងឺចំនួន273នាក់ និងអ្នកស្លាប់ចំនួន24នាក់។ ចំណែក California និង New York វិញ គឺមានអ្នកជំងឺជាង100នាក់ដូចគ្នា ខណៈដែល Massachusetts មានអ្នកជំងឺ 92នាក់។

យ៉ាងហោចណាស់ មានរដ្ឋចំនួន8 នៅសហរដ្ឋអាមេរិក បានប្រកាសភាពអាសន្ន ដោយសារវីរុស COVID-19។ ការ ប្រកាសអាសន្ននេះនឹងអនុញ្ញាតឱ្យអាជ្ញាធរមូលដ្ឋាន ប្រើប្រាស់រាល់មធ្យោបាយបន្ទាន់ទាំងអស់ ដើម្បីទប់ទល់នឹងរោគរាតត្បាត។ ក្រៅពីនេះ ទីក្រុង និងតំបន់មួយចំនួនរបស់សហរដ្ឋអាមេរិក ក៏បានប្រកាសអាសន្នដោយខ្លួនឯង ទាក់ទិននឹងផ្នែកវេជ្ជសាស្ត្រ ដើម្បីទប់ស្កាត់ COVID-19។

លោកវេជ្ជបណ្ឌិត Anthony Fauci អគ្គនាយកនៃវិទ្យាស្ថានជាតិអាឡែរហ្សី និងជំងឺឆ្លងរបស់សហរដ្ឋអាមេរិក (National Institute of Allergy and Infectious Diseases) កាលពីថ្ងៃទី8មីនា បានឱ្យដឹងថា ប្រទេសនេះអាចនឹងពិចារណាក្នុងការរឹតត្បិតទៅលើការដើរហើររបស់ប្រជាជន ទៅកាន់តំបន់ដែលមានមនុស្សច្រើន បើសិនរោគរាតត្បាតនេះ នៅតែបន្តឆ្លងរាលដាល។ លោកបានបដិសេធចំពោះការប្រើវិធានការដាក់បម្រាមគោចរទ្រង់ទ្រាយធំដូចនៅប្រទេសចិន និងប្រទេសអ៊ីតាលី ក៏ប៉ុន្តែ លោកក៏បានសង្កត់ធ្ងន់ថា សេណារីយ៉ោ ណា ក៏អាចកើតមានឡើងនោះដែរ៕

ប្រភព៖ សារព័ត៌មានបរទេស

March 11, 2020

នាយកដ្ឋានប្រយុទ្ធនឹងជំងឺឆ្លងកម្ពុជា CDC សំណូមពរឱ្យអាជ្ញាធរ ចាត់វិធានការផ្លូវច្បាប់ លើអ្នកដែលហៅទូរស័ព្ទទៅរំខានដល់លេខ 115 បើសិនជាចាំបាច់

“យេីងខ្ញុំសូមជំរាបជូនសាធារណជនថា ការទូរស័ព្ទចូលលេខ 115 មកមន្រ្តីទទួលបន្ទុក 115 នេះ មាន70% បានការដេីម្បីសួរព័ត៌មានអំពីជំងឺ COVID-19 ព្រមទាំងរាយការណ៍ស្ថានភាពសុខភាព និង 30% ភាគរយមិនបានការ។” នេះគឺជាការលើកឡើងនៅលើទំព័រ Facebook របស់នាយកដ្ឋានប្រយុទ្ធនឹងជំងឺឆ្លងកម្ពុជា ហៅកាត់ថា CDC។

នៅវេលាម៉ោងប្រហែលជា12ៈ30នាទីថ្ងៃត្រង់នេះ នៅលើទំព័រ Facebook របស់នាយកដ្ឋានប្រយុទ្ធនឹងជំងឺឆ្លងកម្ពុជា (CDC) បានបង្ហោះសារមួយដែលផ្ញើជូនសាធារណជន និងអាជ្ញាធរដើម្បីជ្រៀប។ ក្នុងខ្លឹមសារនៃសារនេះ បានលើកឡើងថា ទូរស័ព្ទលេខ 115 គឺប្រើសម្រាប់ទទួលការហៅចូលពីអ្នកទាំងឡាយណាដែលមានបញ្ហាទាក់ទិននឹងវីរុស COVID-19។ ប៉ុន្តែ CDC ឱ្យដឹងថា ក្នុងចំណោមការហៅចូលលេខទូរស័ព្ទ 115នេះ គឺមានដល់ទៅ30% គឺជាការហៅមិនបានការ ដោយរួមមាន៖

1. ប្រេីកុមារតូចៗឱ្យនិយាយជំនួស
2. ទូរស័ព្ទចូលមិននិយាយ បេីកចោល
3. ទូរស័ព្ទចូល ចាក់ចំរៀងឱ្យស្តាប់
4. ប្រេីសម្ដីអសុរោះ និងពាក្យប្រមាថ
5. អ្នកស្រវឹង ទូរស័ព្ទចូលនិយាយស្តាប់មិនយល់
6. ។ ល។

នាយកដ្ឋានប្រយុទ្ធនឹងជំងឺឆ្លងកម្ពុជា (CDC) ក៏បានសំណូមពរដល់សាធារណជន ឱ្យទុកឱកាសដល់អ្នកដទៃដែលត្រូវការចាំបាច់ក្នុងការហៅទៅលេខ 115 ទាក់ទិននឹងបញ្ហា COVID-19។ CDC ថែមទាំងបានស្នើឱ្យអាជ្ញាធរដែនដី ចាត់វិធានការទៅតាមច្បាប់ ទៅលើជនណាដែលបានហៅចូលលេខទូរស័ព្ទ 115 ដោយគ្មានប្រយោជន៍ និងរំខានដល់ដំណើរការនៃលេខទូរស័ព្ទនេះ៕

March 11, 2020

លទ្ធផលធ្វើតេស្តទៅលើម្ចាស់ម៉ូតូកង់3ឥណ្ឌា ដែលបានដឹកជនជាតិជប៉ុនម្នាក់ដែលផ្ទុក COVID-19 ត្រូវបានមន្ទីរសុខាភិបាលខេត្តសៀមរាបបញ្ចេញឱ្យដឹងហើយ

រដ្ឋបាលខេត្តសៀមរាបបានឱ្យដឹងថា មន្ទីរសុខាភិបាលខេត្តនេះ បានបញ្ចេញលទ្ធផលនៃការធ្វើតេស្តរកមេរោគទៅលើបុរសជាម្ចាស់ម៉ូតូកង់3ឥណ្ឌាម្នាក់ ដែលធ្លាប់បានដឹកជនជាតិជប៉ុនដែលមានផ្ទុកមេរោគកូរ៉ូណានេះហើយ ដោយបង្ហាញថា ម្ចាស់ម៉ូតូកង់3ម្នាក់នេះ មិនមានផ្ទុកមេរោគ COVID-19នោះទេ។

រដ្ឋបាលខេត្តសៀមរាប បានបន្តថា ពេលនេះ បុរសជាម្ចាស់ម៉ូតូកង់3ខាងលើ មិនមានរោគសញ្ញាអ្វីនោះដែរ ពោលគឺគាត់មានសុខភាពល្អធម្មតា។ បុរសនេះត្រូវបានដាក់ឱ្យនៅដាច់ដោយឡែករយៈពេល14ថ្ងៃ នៅក្នុងអគារជំងឺឆ្លងនៃមន្ទីរពេទ្យបង្អែកខេត្តសៀមរាប ដើម្បីបន្តតាមដានសុខភាព។

គិតមកដល់ថ្ងៃនេះ កម្ពុជាបានរកឃើញអ្នកផ្ទុកវីរុស COVID-19 ចំនួន3ករណីហើយ ដោយករណីទី1គឺជាជនជាតិចិន ដែលត្រូវបានរកឃើញនៅខេត្តព្រះសីហនុកាលពីថ្ងៃទី27មករា។ ចំណែកករណីទី2 គឺជាបុរសជនជាតិខ្មែរនៅខេត្តសៀមរាប ដែលជាមនុស្សម្នាក់ ធ្លាប់បានធ្វើការជាមួយជនជាតិជប៉ុនម្នាក់ដែលត្រូវបានគេរកឃើញថាមានផ្ទុកមេរោគកូរ៉ូណា នៅពេលគាត់ត្រឡប់ទៅដល់ប្រទេសជប៉ុន។ រីឯករណីទី3 ដែលត្រូវបានរកឃើញនៅខេត្តកំពង់ចាម គឺជាស្ដ្រីអ្នកទេសចរជនជាតិអង់គ្លេសម្នាក់ មានអាយុ65ឆ្នាំ ដែលធ្វើដំណើរតាមនាវាទេសចរណ៍មួយ មកពីប្រទេសវៀតណាម៕

March 11, 2020

Jack Ma ដណ្ដើមបានតំណែងអ្នកមានបំផុតនៅអាស៊ីវិញហើយ ខណៈអ្នកមានបំផុតទាំង500នាក់របស់ពិភពលោក បានបាត់បង់ប្រាក់ 238.5ពាន់លានដុល្លារអាមេរិក កាលពីម្សិលម៉្ងៃ

ក្រោយពីបានលក់មូលបត្រទូទាំងពិភពលោកកាលពីថ្ងៃទី9មីនាកន្លងទៅ ទ្រព្យសម្បត្តិរបស់មហាសេដ្ឋីឥណ្ឌា លោក Mukesh Ambani បានថយចុះមកនៅក្រោមស្ថានិក Alibaba គឺមហាសេដ្ឋីចិន លោក Jack Ma។

យោងតាម Bloomberg Billionaires Index លោក Mukesh Ambani បានបាត់បង់5.8ពាន់លានដុល្លារអាមេរិកកាលពីម្សិលម៉្ងៃ (9មីនា) ធ្វើឱ្យគាត់បាត់បង់តំណែងជាអ្នកមានបំផុតប្រចាំទ្វីបអាស៊ី ដោយធ្លាក់ទៅលើដៃមហាសេដ្ឋីចិន លោក Jack Ma ដែលជាស្ថានិកនៃក្រុមហ៊ុន Alibaba។ មហាសេដ្ឋីចិន Jack Ma បច្ចុប្បន្ន មានទ្រព្យ 44.5ពាន់លានដុល្លារអាមេរិក ច្រើនជាងមហាសេដ្ឋីឥណ្ឌា លោក Mukesk Ambani ប្រមាណជា 2.6ពាន់លានដុល្លារអាមេរិក។

មូលបត្រ Alibaba កាលពីថ្ងៃទី9មីនា បានធ្លាក់ថ្លៃ3.41% នៅលើផ្សារហ៊ុន New York បណ្ដាលឱ្យមហាសេដ្ឋី Jack Ma បាត់បង់ 1.06ពាន់លានដុល្លារអាមេរិក។ ក៏ប៉ុន្តែ តម្លៃមូលបត្រពហុវិស័យ Reliance Industries របស់មហាសេដ្ឋី Ambani បានដាំក្បាលចុះខ្លាំងជាងនេះទៅទៀត ពោលគឺធ្លាក់ថ្លៃដល់ទៅ12% (ទាបបំផុតរាប់ចាប់ពីឆ្នាំ2009មកនេះ)។ ចាប់ពីដើមឆ្នាំ តម្លៃមូលបត្រ Reliance Industries បានថយចុះសរុបចំនួន 26%។

ចំណែក Alibaba វិញ ថ្វីបើរោគរាតត្បាត COVID-19 កំពុងតែ “ធ្វើទុក្ខ” ទៅលើវិស័យជំនួញមួយចំនួនរបស់ក្រុមហ៊ុននេះ ប៉ុន្តែ COVID-19 ក៏បានជួយជំរុញឱ្យតម្រូវការដែលទាក់ទិននឹងបច្ចេកវិទ្យាចល័ត មានកំណើនខ្ពស់ ដែលបាន និងកំពុងហុចផលប្រយោជន៍ខ្លះដល់មហាសេដ្ឋីចិន លោក Jack Ma។

តម្លៃមូលបត្រទូទាំងពិភពលោក កាលពីម្សិលម៉្ងៃ(9មីនា) បានធ្លាក់ចុះខ្លាំង ដោយសារតម្លៃប្រេងបានដាំក្បាលចុះ ហើយអ្នកវិនិយោគមានការព្រួយបារម្ភអំពីរោគរាតត្បាត COVID-19។ កត្តានេះ ក៏បានធ្វើឱ្យមានការសង្ស័យថា Reliance Industries មិនអាចសងអស់បំណុលនៅមុនដំណាច់ឆ្នាំ2021 ដូចដែលមហាសេដ្ឋីឥណ្ឌា Ambani បានសន្យា។

ភាពច្របូកច្របល់នៅលើផ្សារហ៊ុនកាលពីម្សិលម៉្ងៃ ក៏បានធ្វើឱ្យអ្នកមានមួយចំនួនក្នុងពិភពលោក ត្រូវខាតបង់រាប់ពាន់លានដុល្លារអាមេរិក។ ទ្រព្យរបស់មហាសេដ្ឋីប្រេង Harold Hamm បានថយចុះរហូតដល់ពាក់កណ្ដាល នៅសល់ត្រឹមតែ 2.4ពាន់លានដុល្លារ។ ចំណែក Jeff Hildebrand ក៏បាត់បង់ 3ពាន់លានដុល្លារអាមេរិក។ សរុបមក អ្នកមានបំផុតទាំង500នាក់របស់ពិភពលោក បានបាត់បង់ប្រាក់ 238.5ពាន់លានដុល្លារអាមេរិក នៅលើផ្សារហ៊ុន កាលពីម្សិលម៉្ងៃ ដែលការខាតបង់នេះ ខ្ពស់ជាងពេលណាៗទាំងអស់ រាប់ចាប់ពីឆ្នាំ2016៕

ប្រភព៖ សារព័ត៌មានបរទេស

March 11, 2020

បុគ្គលិកម្នាក់របស់ Apple បានក្លាយជាអ្នកមានផ្ទុក COVID-19 ដំបូងគេបង្អស់នៅក្នុងក្រុមហ៊ុន

បុគ្គលិកម្នាក់របស់ក្រុមហ៊ុនបច្ចេកវិទ្យា “ខ្នាតយក្ស” Apple នៅឯទីក្រុង Cork ក្នុងប្រទេសអៀរឡង់ ត្រូវបានរកឃើញថា មានផ្ទុកវីរុស COVID-19 ហើយបានក្លាយជាអ្នកឆ្លងមេរោគកូរ៉ូណាដំបូងគេក្នុងក្រុមហ៊ុននេះ។

“ម្នាក់ក្នុងចំណោមបុគ្គលិករបស់យើង ដែលធ្វើការនៅក្នុងទីក្រុង Cork ត្រូវបានរកឃើញថាមានផ្ទុក COVID-19។ យើងកំពុងសហការជាមួយក្រុមមន្ត្រីសុខាភិបាលមូលដ្ឋាន ដើម្បីដោះស្រាយបញ្ហានេះ។ ចំណែកអ្នកជំងឺវិញ កំពុងបង្ខាំងខ្លួនឯងនៅឯផ្ទះរបស់គាត់” នេះបើតាមការឱ្យដឹងពីអ្នកនាំពាក្យនៃក្រុមហ៊ុន Apple ដែលចុះផ្សាយដោយសារព័ត៌មាន CNBC។

Apple យល់ថា ការឆ្លងរោគពីអ្នកជំងឺនេះ គឺមានហានិភ័យទាប។ យ៉ាងណាក៏ដោយ ដើម្បីទប់ស្កាត់ការឆ្លងរាលដាល ក្រុមហ៊ុននេះក៏បានស្នើឱ្យសមាជិកមួយចំនួនក្នុងក្រុមដែលមានជាប់ទាក់ទិននឹងអ្នកជំងឺខាងលើ ធ្វើការនៅឯផ្ទះ ហើយក្រុមហ៊ុន Apple ក៏កំពុងតែធ្វើការជាមួយរដ្ឋបាលសុវត្ថិភាព និងសុខភាពដើម្បីវាយតម្លៃស្ថានភាពនៃករណីនេះ។

តំណាងក្រុមហ៊ុន Apple បានអះអាងថា “យើងកំពុងអនុវត្តវិធានការទប់ស្កាត់ចាំបាច់នានា ទៅតាមការណែនាំរបស់ក្រសួងសុខាភិបាល”។

មុននេះ Apple ក៏បានណែនាំឱ្យបុគ្គលិករបស់ខ្លួន ធ្វើការនៅឯផ្ទះ “បើសិនមានលក្ខខណ្ឌអំណោយផល” ទន្ទឹមនឹងនេះ ក្រុមហ៊ុនក៏កំពុងតែ “កាត់បន្ថយចំនួនមនុស្សនៅក្នុងការិយាល័យ” និង “ធានាចំពោះបុគ្គលិកដែលមកធ្វើការក្នុងការិយាល័យ ដើម្បីឱ្យពួកគេទទួលបានសុវត្ថិភាព និងស្ងប់ចិត្តក្នុងពេលធ្វើការ” ដើម្បីកាត់បន្ថយការឆ្លងរាលដាលនៃវីរុស COVID-19។

យោងតាមស្ថិតិនាថ្ងៃទី11មីនា វីរុសកូរ៉ូណា COVID-19 បានបង្ហាញខ្លួននៅក្នុងប្រទេស និងដែនដីចំនួន119 នៅទូទាំងពិភពលោក បណ្ដាលឱ្យមនុស្សចំនួន 119,027នាក់ បានឆ្លងជំងឺនេះ ក្នុងនោះមាន 4.284នាក់បានបាត់បង់ជីវិត។ ដោយឡែកនៅអៀរឡង់ មានអ្នកជំងឺកូរ៉ូណាចំនួន 34នាក់ ប៉ុន្តែ មិនទាន់មានករណីស្លាប់ដោយសារវីរុសនេះនៅឡើយ៕

ប្រភព៖ សារព័ត៌មានបរទេស

March 11, 2020

មនុស្សជិត 119,000នាក់បានឆ្លង COVID-19 នៅទូទាំងពិភពលោក ខណៈអនុរដ្ឋមន្ត្រីសុខាភិបាលអង់គ្លេស ក៏បានឆ្លងវីរុសនេះដែរ

COVID-19 បានបង្ហាញខ្លួននៅក្នុងប្រទេស និងដែនដីចំនួន 119 នៅទូទាំងពិភពលោក បណ្ដាលឱ្យមនុស្សជិត 119,000នាក់ បានឆ្លងវីរុសនេះ និងជាង 4,200នាក់ បានបាត់បង់ជីវិត ក្នុងនោះចំនួនអ្នកស្លាប់នៅអ៊ីតាលី បន្តកើនឡើងខ្ពស់។

តួលេខនៃករណីឆ្លង និងស្លាប់បន្ថែម ដោយសារវីរុសកូរ៉ូណា នៅប្រទេសអ៊ីតាលី នៅតែបន្តកើនឡើង ដោយប្រទេសនេះ បានរកឃើញអ្នកផ្ទុកមេរោគចំនួន 977ករណីបន្ថែមទៀត ធ្វើឱ្យចំនួនអ្នកឆ្លងវីរុសកូរ៉ូណាសរុបឡើងដល់ 10.149នាក់ ខ្ពស់ជាងគេលំដាប់ទី2ក្នុងពិភពលោក បន្ទាប់ពីប្រទេសចិន។

ប្រទេសអ៊ីតាលី ថ្ងៃនេះបានប្រកាសថា ចំនួនអ្នកស្លាប់បន្ថែមដោយសារកូរ៉ូណា គឺមានចំនួន168នាក់ ធ្វើឱ្យចំនួនអ្នកស្លាប់សរុបឡើងដល់ 631នាក់ ឈរលេខ2 បន្ទាប់ពីប្រទេសចិន។

ចំនួនអ្នកបានឆ្លងកូរ៉ូណានៅប្រទេសអ៊ីរ៉ង់ គឺ 8,042នាក់ កើន 881ករណី។ ជាមួយនឹងចំនួនអ្នកស្លាប់បន្ថែម54ករណី អ្នកស្លាប់សរុបនៅអ៊ីរ៉ង់កើនដល់ 291នាក់។

ប្រទេសកូរ៉េខាងត្បូង ចំនួនអ្នកឆ្លងកូរ៉ូណាថ្មីបន្ថែម 35នាក់ អ្នកបានឆ្លងសរុប 7,513នាក់ ក្នុងនោះមាន 58នាក់បានបាត់បង់ជីវិត (ប្រទេសនេះ តែងប្រកាសលទ្ធផលនៃការធ្វើតេស្តអ្នកជំងឺ 2លើកក្នុង1ថ្ងៃ គឺពេលព្រឹក និងពេលរសៀល)។

ប្រទេសចិន ចំនួនអ្នកឆ្លងកូរ៉ូណាថ្មីបន្ថែម 24នាក់ អ្នកបានឆ្លងសរុប 80,778នាក់ ក្នុងនោះមានអ្នកស្លាប់បន្ថែម22នាក់ ចំណែកអ្នកស្លាប់ សរុបគឺ 3,158នាក់។

ប្រទេសជប៉ុន ចំនួនអ្នកឆ្លងកូរ៉ូណាថ្មីបន្ថែម 57នាក់ អ្នកបានឆ្លងសរុប 587នាក់ ក្នុងនោះអ្នកស្លាប់សរុប មានចំនួន10នាក់។

ប្រទេសបារាំង និងអេស្ប៉ាញក៏បានរកឃើញករណីឆ្លងថ្មី ក្នុងនោះបារាំងរកឃើញបន្ថែម 372ករណី និងអេស្ប៉ាញ 464ករណី។ ចំនួនអ្នកឆ្លងមេរោគនៅប្រទេសបារាំង សរុប 1,784ករណី ចំណែកអេស្ប៉ាញគឺ 1,695ករណី រីឯចំនួនអ្នកស្លាប់នៅប្រទេសបារាំង និងអេស្ប៉ាញ គឺ 33 និង35ករណី។

ប្រទេសអាល្លឺម៉ង់ បានរកឃើញអ្នកជំងឺកូរ៉ូណាសរុប 1,565នាក់ កើន 341ករណី បើធៀបនឹងម្សិលមិញ ចំណែកចំនួនអ្នកស្លាប់គឺនៅដដែល (2ករណី)។

ប្រទេសអង់គ្លេស បានរកឃើញអ្នកឆ្លងថ្មីបន្ថែម 62ករណី ធ្វើឱ្យអ្នកជំងឺសរុប ឡើងដល់383នាក់ ក្នុងនោះមាន6នាក់បានបាត់បង់ជីវិត។ អនុរដ្ឋមន្ត្រីក្រសួងសុខាភិបាលអង់គ្លេស Nadine Dorries ក៏បានឆ្លងវីរុស COVID-19 នេះដែរ។

សហរដ្ឋអាមេរិក មានអ្នកឆ្លងមេរោគកូរ៉ូណាសរុប 975នាក់ កើន271នាក់ បើធៀបនឹងម្សិលមិញ ចំណែកអ្នកស្លាប់មានចំនួន30នាក់ កើន4ករណី។

ប្រទេសទួរគី ចាម៉ៃកា ប៉ាណាម៉ា ម៉ុងហ្គោលី និងបូលីវី គឺជាបណ្ដាប្រទេសដែលបានរកឃើញករណីឆ្លង COVID-19 ដំបូង កាលពីម្សិលមិញ និងព្រឹកនេះ។

ពិភពលោក បច្ចុប្បន្ន មានអ្នកឆ្លងមេរោគសរុបចំនួន 118,934នាក់ ក្នុងនោះមាន 4,293នាក់ស្លាប់ និង 66,576នាក់បានជាសះស្បើយ៕

ប្រភព៖ សារព័ត៌មានបរទេស

March 11, 2020

លទ្ធផលរកឃើញថ្មីៈ ក្នុងលក្ខខណ្ឌខ្លះ មេរោគCOVID-19 អាចសាយភាយបាន 4.5ម៉ែត្រ រស់នៅក្នុងអាកាសបាន 30នាទី

អ្នកជំនាញខាងជំងឺរាតត្បាតរបស់ចិន បានបង្ហើបឱ្យដឹងពីរបាយការណ៍ថ្មីចុងក្រោយបំផុត ដែលសង្កត់ធ្ងន់ពីលើភាពសំខាន់នៃការពាក់ម៉ាស់អនាម័យការពារនៅក្នុងរថយន្តធ្វើដំណើរផ្លូវឆ្ងាយ និងបិទបង្អួចជិត។

លទ្ធផលសិក្សាស្រាវជ្រាវដោយក្រុមអ្នកជំនាញការខាងរោគរាតត្បាតរបស់រដ្ឋបាលចិន បានរកឃើញថា មេរោគវីរុស COVID-19 អាចស្ថិតក្នុងអាកាសធាតុបានយ៉ាងតិច 30នាទី និងធ្វើដំណើរបានឆ្ងាយដល់ទៅ 4.5ម៉ែត្រ ច្រើនជាងចម្ងាយសុវត្ថិភាពដែលអាជ្ញាធរសុខាភិបាលទូទាំងពិភពលោក បានណែនាំឱ្យនៅឆ្ងាយពីអ្នកផ្ទុកមេរោគ 1-2ម៉ែត្រ ទៅទៀត។

ក្រៅពីនេះ អ្នកស្រាវជ្រាវបានរកឃើញទៀតថា មេរោគវីរុស COVID-19 អាចមានជីវិតបានយូរច្រើនថ្ងៃនៅលើវត្ថុដែលមានកម្ទេចលម្អងពីប្រព័ន្ធផ្លូវដង្ហើមដែលធ្លាក់ចុះមកលើស្រទាប់លើ ដែលបង្កើនភាពប្រថុយប្រថានក្នុងការចម្លងមេរោគថែមទៀត បើសិនជាមានអ្នកណាយកដៃមកប៉ះកម្ទេចលម្អងនៅលើវត្ថុនោះ ហើយយកទៅប៉ះផ្ទៃមុខ តែរយៈពេលដែលមេរោគស្ថិតនៅលើវត្ថុអ្វីមួយនោះ វាស្ថិតនៅលើបច្ច័យជាច្រើន ដូចជាសីតុណ្ហភាព និងប្រភេទនៃវត្ថុ ដូចជាបើស្ថិតក្នុងសីតុណ្ហភាព 37អង្សាC មេរោគអាចមានជីវិតនៅបានយូរដល់ទៅ2-3ថ្ងៃ នៅលើកែវ ក្រណាត់ លោហៈ ប្លាស្ទិក ឬក្រដាស ជាដើម។

សម្រាប់ប្រទេសចិន ដោយសាររដ្ឋបាលចិនបានកំណត់ឱ្យរថយន្តដឹកអ្នកដំណើរផ្លូវឆ្ងាយទាំងអស់ ត្រូវបំពាក់កេមេរ៉ាសុវត្ថិភាព ទើបឃ្លីបដែលបានមក មានប្រយោជន៍ជាខ្លាំងសម្រាប់អ្នកស្រាវជ្រាវ ក្នុងការសិក្សាពីវិធីការចម្លងមេរោគនៅក្នុងរថយន្តBus ដែលបិទបង្អួចជិតទាំងអស់ ទើបគេអាចអះអាងបានថា ស្ថិតនៅក្នុងសភាពបរិស្ថានបែបបិទជិត មានម៉ាស៊ីនត្រជាក់ មេរោគវីរុសកូរ៉ូណាប្រភេទថ្មី នឹងអាចចម្លងបានឆ្ងាយជាងរយៈសុវត្ថិភាពដែលយើងបានដឹងទៅទៀត ក្រៅពីនេះ នៅមានភាពប្រថុយប្រថានក្នុងការដែលមេរោគវីរុសអាចនៅតែមាន បន្ទាប់ពីអ្នកដំណើរដែលមានជាប់មេរោគបានចុះពីរថយន្តBus ទៅហើយទៀតផង ដូច្នេះហើយទើប ដំបូន្មានរបស់យើងគឺ “ត្រូវពាក់ម៉ាស់អនាម័យការពារគ្រប់ពេលវេលា ពេលស្ថិតនៅក្នុងរថយន្តធ្វើដំណើរ”៕

ប្រភព៖ សារព័ត៌មានបរទេស

March 10, 2020

ទ្វីបតែ1គត់នៅលើពិភពលោក ដែលមិនទាន់មានអ្នកឆ្លងវីរុស COVID-19

អង់តាកទិក (Antarctica) ដែលស្ថិតនៅប៉ូលខាងត្បូងនៃភពផែនដី គឺជាទ្វីបតែ1គត់ ដែលមិនទាន់មានករណីឆ្លង ឬស្លាប់ដោយសាររោគរាតត្បាត COVID-19 ដោយសារទ្វីបនេះ បានអនុវត្តវិធានការយ៉ាងតឹងរុឹងដើម្បីធានាមិនឱ្យមានការឆ្លងវីរុសនេះ។

អ្នកវិទ្យាសាស្ត្រជនជាតិអង់គ្លេស លោក Michael Brian ដែលជាប្រធាន Rothera (Rothera Research Station) ដែលជាស្ថានីយស្រាវជ្រាវមួយរបស់ប្រទេសអង់គ្លេសនៅប៉ូលខាងត្បូង បានឱ្យដឹងថា ស្ថានីយស្រាវជ្រាវនេះ បានអនុវត្តវិធានការយ៉ាងតឹងរុឹងដើម្បីការពារសុខភាព និងសុវត្ថិភាពនៃសមាជិកទាំង140នាក់របស់ខ្លួន។ ក្រុមអ្នកស្រាវជ្រាវនឹងមានហនិភ័យខ្ពស់ក្នុងការឆ្លងវីរុស បើសិន COVID-19 បង្ហាញវត្តមាននៅលើទ្វីបនេះ ព្រោះថា ពួកគេទាំងអស់ប្រើប្រាស់បន្ទប់ហូបបាយរូម និងរស់នៅក្បែរគ្នា ក្នុងស្ថានីយស្រាវជ្រាវនេះ ហើយសីតុណ្ហភាពនៅខាងក្រៅ ត្រជាក់រហូតដល់ -20អង្សាសេ។

“យើងទទួលបានការការពារយ៉ាងល្អនៅទីនេះ និងអនុវត្តវិធានការច្រើនដើម្បីថែរក្សាសុខភាព។ បើសិនរោគរាតត្បាត COVID-19 នៅតែបន្តឆ្លងរាលដាល ហើយធ្វើឱ្យប៉ះពាល់ដល់ប្រភពផ្គត់ផ្គង់ស្បៀងអាហារ និងថាមពលសម្រាប់់អង់តាកទិក មន្ទីរស្រាវជ្រាវនេះ ក៏មានផែនការដើម្បីទប់ទល់” នេះបើតាមលោក Michael Brian។

លោក Michael Brian បន្តថា បុគ្គលិកដែលត្រឡប់មកពីទ្វីបផ្សេង នឹងត្រូវបានធ្វើតេស្ត។ បុគ្គលិកណាដែលមានរោគសញ្ញា នឹងត្រូវបានដាក់ឱ្យនៅដាច់ដោយឡែកភ្លាម ដើម្បីទប់ស្កាត់ការឆ្លងបន្ត។

Steven Marshall ប្រធានគ្រប់គ្រងហានិភ័យរបស់មន្ទីរស្រាវជ្រាវនៅឯទ្វីបអង់តាកទិករបស់អង់គ្លេស ហៅកាត់ថា BAS (British Antarctic Survey) បានឱ្យដឹងថា “បើសមាជិកណាម្នាក់ក្នុងក្រុម ដែលត្រៀមនឹងត្រឡប់មកទ្វីបអង់តាកទិក ដែលជាអ្នកត្រូវសង្ស័យថា មានផ្ទុកមេរោគ ពួកគេនឹងត្រូវដាក់ឱ្យនៅដាច់ដោយឡែករយៈពេល2សប្ដាហ៍ មុនពេលឡើងនាវាមកកាន់ទ្វីប (អង់តាកទិក)។ នាវានេះនឹងចំណាយពេលធ្វើដំណើរ4សប្ដាហ៍ ទើបទៅដល់ស្ថានីយ Rothera។ រយៈពេល (4សប្ដាហ៍) នេះ គឺគ្រប់គ្រាន់សម្រាប់បញ្ចេញរោគសញ្ញា បើសិនពួកគេមានផ្ទុកមេរោគ”។

ទំនាក់ទំនងរវាងស្ថានីយស្រាវជ្រាវ និងពិភពលោកគឺតាមរយៈយន្តហោះ BAS Dash 7 និងនាវា ដើម្បីដឹកទំនិញសំខាន់ៗសម្រាប់ការសិក្សាស្រាវជ្រាវនៅលើទ្វីបអង់តាកទិក។ នេះបើតាមសារព័ត៌មាន Express។

ក្រៅពីនេះ នៅលើទ្វីបអង់តាកទិក ក៏មានជើងហោះហើរផ្ទៃក្នុងរវាងស្ថានីយស្រាវជ្រាវនានា ដែលគ្រប់គ្រងដោយប្រទេសផ្សេងៗ ដូចជាប្រទេសអ៊ីតាលី អាហ្សង់ទីន អ៊ុយក្រែន អាល្លឺម៉ង់ រុស្ស៊ី និងឥណ្ឌា។ បន្ទាប់ពីរោគរាតត្បាត COVID-19 ចាប់ផ្ដើមឆ្លងរាលដាល ចិនគឺជាប្រទេសតែ1គាត់ ដែលបានដកបុគ្គលិករបស់ខ្លួនចេញពីស្ថានីយស្រាវជ្រាវនៅលើទ្វីបអង់តាកទិក៕

ប្រភព៖ សារព័ត៌មានបរទេស

March 10, 2020

ចំនួនសូន្យ! លែងរកឃើញជនជាតិចិនដីគោកនៅក្រៅហ៊ូពេយ ឆ្លង “COVID-19” ទៀតហើយ ពេញ1ចុងសប្ដាហ៍កន្លងទៅ

អង្គភាពសាធារណសុខាភិបាលរបស់ប្រទេសចិន បានបង្ហើបឱ្យដឹងថា នៅតំបន់ចិនដីគោក មិនរួមមណ្ឌលហ៊ូពេយ លែងមានរបាយការណ៍អ្នកជំងឺក្នុងតំបន់ដែលឆ្លងមេរោគវីរុសកូរ៉ូណាប្រភេទថ្មីនេះទៀតហើយ ពេញមួយចុងសប្ដាហ៍កន្លងទៅនេះ។

កាលពីថ្ងៃទី9 មីនា ទីភ្នាក់ងារព័ត៌មានស៊ីនហួ បានរាយការណ៍ថា លោក មី ភឹង មន្ត្រីនៃគណៈកម្មការសុខភាពនៃប្រទេសចិន(NHC)បានប្រាប់ឱ្យដឹងតាមរយៈការថ្លែងព័ត៌មានថា ចំនួនតួលេខប្រចាំថ្ងៃរបស់អ្នកជំងឺថ្មីៗ ដែលជាមនុស្សក្នុងតំបន់នៅក្នុងប្រទេសចិនដីគោក មិនរួមមណ្ឌលហ៊ូពេយ ដែលជាប្រភពកណ្ដាលនៃការឆ្លងរាលដាលរបស់ជំងឺ នោះ ស្ថិតនៅនឹងមួយកន្លែងលើតួលេខតែ 1តួគត់តាំងពីចុងខែកុម្ភៈមក។

លោក មី បានបញ្ជាក់ថា ស្ថានការណ៍នៃការការពារ និងគ្រប់គ្រងជំងឺនៅក្នុងប្រទេសចិន ល្អប្រសើរឡើងជាបន្តបន្ទាប់ ដោយសារតែគ្រប់ទីក្រុងនៅក្នុងប្រទេសចិន លើកលែងតែទីក្រុងវូហានចេញ គ្មានរបាយការណ៍អ្នកជំងឺថ្មី ជាប់ៗគ្នា 4ថ្ងៃហើយ។

ចំណែកទីក្រុងវូហាន វិញ ទោះជាមានរបាយការណ៍ពីចំនួនអ្នកជំងឺថ្មីក៏ដោយ តែតួលេខនេះបានថយចុះ នៅ សល់់ទាបជាង 50នាក់ រយៈពេល 2ថ្ងៃហើយ។

លោក មី បានបញ្ចប់សេចក្ដីថា ចិនបានផ្ដល់ភាពសំខាន់ទៅលើការការពារ និងគ្រប់គ្រងយ៉ាងតឹងរ៉ឹងបំផុត រួមទាំងការព្យាបាលដែលតម្រង់ឆ្ពោះទៅរកការបង្កើតវិធីការពារ មិនឱ្យការឆ្លងរាលដាលវិលត្រឡប់មកជាថ្មី៕

ប្រភព៖ សារព័ត៌មានបរទេស

March 10, 2020

ទូទាំងប្រទេសចិន ថ្ងៃនេះមានអ្នកឆ្លងវីរុស COVID-19ថ្មី ត្រឹមតែ19នាក់ប៉ុណ្ណោះ ចំណែកអ្នកស្លាប់មានចំនួន…

ប្រទេសចិនបានប្រកាសឱ្យដឹងថា បានរកឃើញអ្នកផ្ទុកវីរុសកូរ៉ូណា COVID-19 បន្ថែមត្រឹមតែ19នាក់ប៉ុណ្ណោះ ដែលនេះជាតួលេខទាបបំផុតចាប់ពីរោគរាតត្បាតនេះបានផ្ទុះឆ្លងរាលដាល ខណៈដែលអ្នកស្លាប់បន្ថែមមានចំនួន17នាក់ ពោលគឺតិចជាងម្សិលមិញ5ករណី។

គណៈកម្មការសុខាភិបាលចិន ព្រឹកនេះបានរាយការណ៍ថា បានរកឃើញអ្នកផ្ទុកវីរុស COVID-19 ចំនួន19ករណីបន្ថែមទៀត គឺថយចុះខ្លាំងបើធៀបនឹង40ករណីកាលពីថ្ងៃមុន។ នេះក៏ជាកំណើនទាបបំផុតនៅប្រទេសចិន រាប់ចាប់តាំងពីប្រទេសនេះចាប់ផ្ដើមប្រកាសអំពីតួលេខស្ដីអំពី COVID-19 ចាប់ពីថ្ងៃទី20មករា រហូតមកដល់ពេលនេះ។

17នាក់ ក្នុងចំណោមអ្នកដែលបានឆ្លងមេរោគទាំង19នាក់ខាងលើ គឺសុទ្ធតែជាអ្នករស់នៅក្នុងទីក្រុង Wuhan ដែលជាសម្បុកមេរោគ COVID-19 ធំបំផុតនៅប្រទេសចិន។ ក្រៅពីនេះ គឺមានម្នាក់នៅទីក្រុងប៉េកាំង និងម្នាក់ទៀតនៅខេត្តក្វាងតុង ពួកគេគឺជាអ្នកទេសចរមកពីប្រទេសអង់គ្លេស និងប្រទេសអេស្ប៉ាញ។

ប្រទេសចិនក៏បានប្រកាសឱ្យដឹងដែរថា មានអ្នកស្លាប់ដោយសាររោគរាតត្បាត COVID-19 ចំនួន17នាក់កាលពីម្សិលមិញ ដែលទាំងអស់សុទ្ធតែនៅក្នុងខេត្ត Hubei ធ្វើឱ្យចំនួនអ្នកស្លាប់នៅប្រទេសចិន ឡើងដល់ 3,136នាក់។

មកដល់បច្ចុប្បន្ន ប្រទេសចិន មានអ្នកឆ្លងវីរុស COVID-19 សរុបចំនួន 80,754នាក់។ នៅក្នុងសន្និសីទសារព័ត៌មានកាលពីម្សិលមិញ អង្គការសុខភាពពិភពលោក (WHO) បានឱ្យដឹងថា ក្នុងចំណោមអ្នកដែលបានឆ្លងមេរោគទាំងអស់ គឺមាន “ជាង70% បានជាសះស្បើយពីជំងឺ និងបានអនុញ្ញាតឱ្យចេញពីមន្ទីរពេទ្យ”៕

ប្រភព៖ សារព័ត៌មានបរទេស

March 10, 2020

Tag: សុខភាព