Tag: សុខភាព

អ្នកនាំពាក្យក្រសួងការបរទេសប្រទេសចិន បានធ្វីតធើរចោទប្រកាន់ ព្រមជាមួយឃ្លីបវីដេអូដែលលោក រ៉ូប៊ើត រេដហ្វ៊ីល អគ្គនាយកមជ្ឈមណ្ឌលគ្រប់គ្រង និងការពាររោគរបស់សហរដ្ឋអាមេរិកដែលបានចូលបកស្រាយចំពោះគណៈកម្មាធិការគ្រប់គ្រង និងកែសម្រួល នៃសភាតំណាងរាស្ត្រ ដោយបានទទួលស្គាល់ថា មានជនជាតិអាមេរិកាំងដែលស្លាប់ដោយសាររោគគ្រុនផ្ដាសាយធំ ត្រូវបានរកឃើញថាមានឆ្លងមេរោគវីរុសកូវីដ-19 មែន។

កងទ័ពសហរដ្ឋអាមេរិក អាចនៅពីក្រោយហេតុការណ៍នេះ។ ជាទ្រឹស្ដីផ្សំគំនិតដែលផ្សព្វផ្សាយនៅលើសារព័ត៌មានសង្គមអនឡាញរបស់ចិនកាលពីពេលថ្មីៗនេះថា ទាហានសហរដ្ឋអាមេរិកបាននាំមេរោគវីរុសកូរ៉ូណាប្រភេទថ្មីចូលទៅក្នុងវូហាន ក្នុងអំឡុងពេលចូលរួមព្រឹត្តិការណ៍ប្រកួតកីឡាទាហានពិភពលោក ឆ្នាំ2019(Military World Games) ដែលរៀបចំឡើងនៅមណ្ឌលហ៊ូពេយ អំឡុងថ្ងៃទី18 ដល់ 27 ខែតុលា ឆ្នាំ2019។

ការចោទប្រកាន់របស់អ្នកនាំពាក្យក្រសួងការបរទេសចិននេះ បានកើតឡើងបន្ទាប់ពីលោក រ៉ូប៊ើត អូប្រៃអាន់ ទីប្រឹក្សាសន្តិសុខជាតិសហរដ្ឋអាមេរិក បានរិះគន់ចិនថា បានឆ្លើយតបនឹងការឆ្លងរាតត្បាតរបស់វីរុសនៅក្នុងទីក្រុងវូហានកាលពីចុងឆ្នាំកន្លងទៅ យឺតយ៉ាវ និងមិនស្មោះត្រង់គ្រប់គ្រាន់ ធ្វើឱ្យពិភពលោកខាតពេលអស់ជិត 2ខែ សម្រាប់ការត្រៀមខ្លួនទប់ទល់ស្ថានការណ៍ឆ្លងរាតត្បាតនេះ តែលោក ចាវ លីចៀន បានធ្វើតធ្វើរតបថា គឺសហរដ្ឋអាមេរិកទៅវិញទេ ដែលខ្វះភាពស្មោះត្រង់ “អ្នកជំងឺដំបូងគេ(Patient zero) ក្នុងសហរដ្ឋអាមេរិកចាប់ផ្ដើមមកនៅពេលណា?! មានមនុស្សប៉ុន្មាននាក់ហើយដែលឆ្លងមេរោគ? ឯណាឈ្មោះមន្ទីរពេទ្យ? អាចជាទាហានសហរដ្ឋអាមេរិក ដែលនាំការឆ្លងរាលដាលដ៏ធំទៅក្នុងទីក្រុងវូហាន…ចូរបង្ហាញព័ត៌មានដល់សាធារណជនយ៉ាងស្មោះត្រង់!! សហរដ្ឋអាមេរិកត្រូវតែអធិប្បាយប្រាប់ចិនឱ្យបានចំពោះរឿងនេះ!”។

លោក ចាវ ទើបតែឡើងមកបំពេញតួនាទីជាអ្នកនាំពាក្យនៃក្រសួងការបរទេសចិនបានមិនយូរប៉ុន្មាន បន្ទាប់ពីធ្វើជាអនុប្រធានស្ថានទូតចិនប្រចាំនៅប្រទេសប៉ាគីស្ថាន និងតែងតែប្រើប្រាស់ប្រព័ន្ធធ្វីតធើរឆ្លើយតបបែបកាប់ឆៅៗ និងក្ឌុងក្ឌាំងបែបនេះជានិច្ច។ កាលពីអតីត លោកធ្លាប់មានជម្លោះពាក្យសម្ដីនៅលើធ្វីតធើរ ជាមួយអតីតទីប្រឹក្សាសន្តិសុខជាតិអាមេរិក លោកស្រី ស៊ូហ្សាន រ៉ៃស៍ ដែលធ្វើឱ្យលោកស្រី រ៉ៃស៍ ចោទលោក ចាវ ថា រើសអើងជាតិសាសន៍ពណ៌សម្បុរ។

នៅមុននេះ ក្នុងថ្ងៃជាមួយគ្នា លោក Geng Shuang អ្នកនាំពាក្យនៃកងទ័ពចិន ក៏បានរិះគន់បណ្ដាក្រុមមន្ត្រីសហរដ្ឋអាមេរិកដែរថា បានសម្ដែងការយល់ឃើញដោយគ្មានភាពទទួលខុសត្រូវ ក្រោយពីបានស្ដីបន្ទោសការទប់ទល់មេរោគវីរុសរបស់រដ្ឋាភិបាលក្រុងប៉េកាំង ធ្វើឱ្យពិភពលោកត្រូវប្រឈមនឹងស្ថានការណ៍ឆ្លងរាតត្បាតធ្ងន់ធ្ងរ…តែគឺជាចិនទៅវិញទេ ដែលខំព្យាយាមពន្យឺតការឆ្លងរាតត្បាត និងជួយពន្យារពេលឱ្យពិភពលោកបានត្រៀមខ្លួនជាស្រេចសម្រាប់ការទប់ទល់មេរោគវីរុស និងសង្ឃឹមថា អាជ្ញាធរសហរដ្ឋអាមេរិកនឹងលះបង់កម្លាំងថាមពលជាមួយការទប់ទល់មេរោគវីរុស បង្កើនការសហការ ជំនួសឱ្យការស្ដីបន្ទោសចិន៕

ប្រភព៖ សារព័ត៌មានបរទេស

“បើដឹងថា នឹងមានថ្ងៃនេះ(ដែលមានអ្នកស្លាប់ច្រើនបែបនេះ) ខ្ញុំនឹងមិនខ្វល់អ្វីទាំងអស់ ទោះជាត្រូវទទួលទោសធ្ងន់ធ្ងរខាងវិន័យយ៉ាងណាក៏ដោយ ក៏ខ្ញុំនឹងនិយាយយ៉ាងចំហ…” លោកស្រីវេជ្ជបណ្ឌិត អៃ ហ្វឹន។

រឿងធំ រឿងក្ដៅប្រចាំសប្ដាហ៍ដែលត្រូវបានស៊ែរតៗគ្នានៅក្នុងបណ្ដាញសង្គមដ៏ធំមួយនៅក្នុងប្រទេសចិន វីឆាត(WeChat) គឺរឿងរ៉ាវរបស់ “អ្នកប្រកាសដំណឹង” លោកស្រីវេជ្ជបណ្ឌិត អៃ ហ្វឹន ប្រធានផ្នែកសង្គ្រោះបន្ទាន់ នៃមន្ទីរពេទ្យកណ្ដាល ទីក្រុងវូហាន។ លោកស្រីជាមនុស្សដំបូងគេ ដែលចេញមកបង្ហើបរឿងរោគរាតត្បាតវីរុសកូរ៉ូណាប្រភេទថ្មីក្នុងរង្វង់គ្រូពេទ្យដូចគ្នានៅក្នុងវូហាន ដែលតមកលោកវេជ្ជបណ្ឌិត លី វឹនលៀង អ្នកពលីជីវិតក្នុងសមរភូមិវីរុសកូវីដ និងគ្រូពេទ្យដទៃទៀតបាននាំគ្នាចេញមកជួយគ្នា “ផ្សាយដំណឹង”។

“នៅថ្ងៃទី30 ធ្នូ ឆ្នាំ2019 លោកស្រីវេជ្ជបណ្ឌិត អៃ ហ្វឹន បានអានរបាយការណ៍ករណីអ្នកជំងឺឆ្លងមេរោគវីរុសរលាកសួតអាថ៌កំបាំងម្នាក់ លោកស្រីបានប្រើគំនូសរង្វង់មូលពណ៌ក្រហមបញ្ជាក់ដោយតួអក្សរថា “វីរុសកូរ៉ូណាSARS”។ នៅពេលនិស្សិតពេទ្យសួរពាក់ព័ន្ធនឹងករណីនេះ លោកស្រីបានថតរបាយការណ៍នោះ បញ្ជូនបន្តទៅឱ្យមិត្តភក្តិរបស់និស្សិតម្នាក់នោះ។ នៅរាត្រីនោះឯង របាយការណ៍នោះត្រូវបានបញ្ជូនបន្តទៅទូទាំងពិភពគ្រូពេទ្យក្នុងទីក្រុងវូហាន។ ក្រុមអ្នកដែលបញ្ជូនបន្តរបាយការណ៍ 1ច្បាប់នោះ មានទាំងគ្រូពេទ្យ 8នាក់ ដែលត្រូវប៉ូលិសចាប់ខ្លួនយកទៅសាកសួរ និងដាក់ទោសខាងវិន័យ។

លោកស្រីវេជ្ជបណ្ឌិត អៃ ហ្វឹន ត្រូវប្រឈមនឹងបញ្ហាលំបាក ពីបទជាដើមរឿងនៃការបញ្ជូនបន្តរបាយការណ៍នោះ។ គណៈកម្មាធិការត្រួតពិនិត្យវិន័យប្រចាំមន្ទីរពេទ្យ បានកោះហៅលោកស្រីទៅសាកសួរ និងបាន “ទិតៀន និងដាក់ទោសកម្រិតធ្ងន់ធ្ងរ ជាករណីដែលមិនធ្លាប់មានពីមុនមក”។ លោកស្រីត្រូវបានថ្កោលទោសថា ជាអ្នកជំនាញការដែលបង្កើតព័ត៌មានចចាមអារ៉ាម។

“អៃ ហ្វឹន គឺជាករណីគ្រូពេទ្យម្នាក់ទៀតដែលត្រូវបានសាកសួរ កោះហៅទៅទិតៀន ដាក់ទោស និងអប់រំវិន័យ” ដែលលេចឡើងច្បាស់។ កាលពីពេលមុនហ្នឹង មានរបាយការណ៍ទាំងក្នុងសារព័ត៌មានរបស់រដ្ឋចិនដូចជា ស៊ីនហួ និងសារព័ត៌មានប្រជាជន(People daily) គឺករណីលោកវេជ្ជបណ្ឌិត លី វឹនលៀង ដែលជាគ្រូពេទ្យតែម្នាក់គត់ដែលចេញមក “ប្រកាសដំណឹង”។ (លោកវេជ្ជបណ្ឌិត លី អាយុ 34ឆ្នាំ បានស្លាប់កាលពីថ្ងៃទី7 កុម្ភៈ ដោយសារមេរោគវីរុសកូរ៉ូណាប្រភេទថ្មី)។

មនុស្សម្នាដែលបានដឹងរឿងរ៉ាវទាំងនេះ បានដាក់រហស្សនាមឱ្យលោកស្រីវេជ្ជបណ្ឌិត អៃ ហ្វឹន ថាជា “អ្នកផ្លុំកញ្ចែ(ប្រកាសអាសន្ន)” តែលោកស្រីវេជ្ជបណ្ឌិត អៃ ហ្វឹន បានសុំកែរហស្សនាមរបស់ខ្លួនឯងថាជា “អ្នកចែកកញ្ចែ” វិញ។

រឿងរ៉ាវ “អ្នកចែកកញ្ចែ” ដែលអ្នកលេងអ៊ីនធើណិត ស៊ែរតៗគ្នាយ៉ាងភ្លូកទឹកភ្លូកដីនៅក្នុង WeChat នេះ ចេញមកពី “រឿងលើទំព័រទី1” របស់ព្រឹត្តិបត្រចិនឈ្មោះថា “បុគ្គល” ដែលបានបោះពុម្ពផ្សាយនៅថ្ងៃទី10 ខែមីនា ឆ្នាំ2020 គឺជាបទសម្ភាសរបស់លោកស្រីវេជ្ជបណ្ឌិត អៃ ហ្វឹន ប្រធានផ្នែកសង្គ្រោះបន្ទាន់នៃមន្ទីពេទ្យទីក្រុងវូហាន…តែនៅពេលព្រឹត្តិបត្រនេះ ចេញលក់នៅលើតូបកាសែតកាលពីថ្ងៃអង្គារ(ទី10មីនា) បានត្រឹមតែ 3ម៉ោងគត់ ក៏ត្រូវប្រកាសឱ្យដកចេញពីគ្រប់តូបកាសែតវិញភ្លាម។

អ្នកយកព័ត៌មាននៃព្រឹត្តិបត្រ “បុគ្គល” ដែលសម្ភាសលោកស្រីវេជ្ជបណ្ឌិត អៃ ហ្វឹន បានប្រាប់ថា គាត់បានសម្ភាសលោកស្រីវេជ្ជបណ្ឌិត អៃ ហ្វឹន នៅថ្ងៃទី1 មីនា នៅពេលព្រឹកព្រលឹម ម៉ោងប្រហែល5។ បន្ទាប់ពីនោះប្រមាណជាកន្លះម៉ោង មិត្តរួមការងាររបស់លោកស្រីវេជ្ជបណ្ឌិត អៃ ហ្វឹន គឺលោកវេជ្ជបណ្ឌិត ចៀង ស្វៀស៊ីង ប្រធានផ្នែកវះកាត់ថៃរ៉យដ៍ និងដើមទ្រូង នៃមន្ទីរពេទ្យកណ្ដាល ទីក្រុងវូហានក៏ស្លាប់ដោយសារមេរោគវីរុសកូវីដ-19 ហើយ 2ថ្ងៃតមកទៀត អនុប្រធានផ្នែកជំងឺចក្ខុ(ភ្នែក) នៃមន្ទីរពេទ្យកណ្ដាល ទីក្រុងវូហាន លោកវេជ្ជបណ្ឌិត មើយ ចុងមិង ក៏ស្លាប់ដោយសារវីរុសកូវីដ-19 ដូចគ្នា(គ្រូពេទ្យ មើយ ជាមិត្តសម្លាញ់នឹងលោកគ្រូពេទ្យ លី វឹនលៀង)។

បន្ទាប់ពីមានដំណឹងពីការប្រមូលព្រឹត្តិបត្រ “បុគ្គល” នៅក្នុងប្រទេសចិនដែលបោះពុម្ពផ្សាយពីបទសម្ភាសរបស់លោកស្រីវេជ្ជបណ្ឌិត អៃ ហ្វឹន រួចមក ក៏មានការរៀបចំការសម្ដែង “សិល្បកម្មប្រជាជន” ជារឿងរ៉ាវរបស់ “អ្នកផ្លុំកញ្ចែ” ក្នុងវើហ្សឹន 33ភាសា និងលេខកូដ ទាំងភាសាបុរាណចិនដែលចារិកនៅលើស្នូកអណ្ដើក តួអក្សរប្រ៊េលល៍(សម្រាប់អ្នកពិការភ្នែក)មកមើលជាគំរូវើហ្សឹនភាសា និងលេខកូដផ្សេងៗដែលរៀបរាប់ពីរឿងរ៉ាវរបស់ “អ្នកចែកកញ្ចែ”៕

ប្រភព៖ សារព័ត៌មានបរទេស

COVID-19 បាន​បង្ហាញ​ខ្លូន​នៅ​ក្នុង​ប្រទេស​ និង​ដែន​ដី​ចំនួន​126 នៅ​ទូទាំង​ពិភពលោក បណ្ដាល​ឱ្យ​មនុស្ស​ជាង 134,000នាក់ បាន​ឆ្លងមេរោគ​នេះ និង​ជិត​5,000នាក់​បាន​បាត់​បង់ជីវិត​ ក្នុង​នោះ​ ចំនួន​អ្នក​បាន​ឆ្លង​រោគ​នៅ​អ៊ីតាលី កើន​ឡើង​ខ្លាំង​គួរ​ឱ្យ​ភ័យ​ខ្លាច។

នៅ​អឺរ៉ុប ប្រទេស​អ៊ីតាលី​ កាល​ពី​ថ្ងៃទី12មីនា បាន​រក​ឃើញ​អ្នក​ឆ្លង​រោគ​បន្ថែមចំនួន​ដល់​ទៅ​ 2,651ករណី ធ្វើ​ឱ្យ​ចំនួន​អ្នក​ជំងឺ​រលាកសួត​ប្រភេទ​ថ្មីដែល​បង្ក​ឡើង​ដោយ​វីរុស​ COVID-19នៅប្រទេស​នេះ ឡើង​ដល់​ 15,113នាក់​។ អ៊ីតាលី​​ក៏ជា​ប្រទេស​ដែល​មាន​អ្នក​ស្លាប់​ដោយ​សារ​ COVID-19 ច្រើន​ជាង​គេ​លំដាប់​ទី​2ក្នុង​ពិភព​លោក បន្ទាប់​ពី​ប្រទេស​ចិន​ ដោយ​មាន​អ្នក​ស្លាប់​ 1,016នាក់ កើន​189នាក់ បើ​ធៀប​នឹង​មុន​នេះ​1ថ្ងៃ​។

នាយក​រដ្ឋ​មន្ត្រី​អ៊ីតាលី Giuseppe Conte កាល​ពី​ថ្ងៃទី​11មីនា បាន​ស្នើ​ឱ្យ​បិទ​ហាង​ទំនិញ​ទាំង​អស់​ក្នុង​ប្រទេស​នេះ លើក​លែង​តែ​ឱសថ​ស្ថាន និង​ហាង​លក់​ស្បៀង​អាហារ​ ដើម្បី​ប្រយុទ្ធ​ប្រឆាំង​នឹង​ COVID-19។

អេស្ប៉ាញ និង​អាល្លឺម៉ង់ ក៏បាន​រក​ឃើញ​អ្នក​ផ្ទុក​មេរោគ​កូរ៉ូណា​ថ្មី​បន្ថែម​ ដោយ​មាន​ជា​បន្ត​បន្ទាប់​គឺ 869 និង 779ករណី​។ ធ្វើ​ឱ្យ​ចំនួន​នៃ​អ្នក​ឆ្លង​រោគកូរ៉ូណា​​សរុប​នៅ​អេស្ប៉ាញ គឺ​មាន 3,146នាក់ និង​អាល្លឺម៉ង់ មាន​ 2,745នាក់។ ចំណែក​អ្នក​ស្លាប់​សរុប​នៅ​អេស្ប៉ាញ មាន​86នាក់ និង​អាល្លឺម៉ង់ មាន​6នាក់​។

ប្រទេស​បារាំង​ រក​ឃើញ​អ្នក​ឆ្លង​រោគ​បន្ថែម 595នាក់ ធ្វើ​ឱ្យចំនួន​​អ្នក​ដែល​បាន​ឆ្លង​រោគ​កូរ៉ូណា របស់​ប្រទេស​នេះ ឡើង​ដល់ 2,876នាក់ ក្នុង​នោះ​មាន​61នាក់​បាន​បាត់​បង់ជីវិត​ ខណៈ​ដែល​ប្រទេស​អង់គ្លេស បច្ចុប្បន្នមាន​អ្នក​ផ្ទុក​មេរោគ​ COVID-19 សរុប​590នាក់ កើន​130ករណី បើ​ធៀប​នឹង​ម្សិល​មិញ​ ក្នុង​នោះ​មាន​10បាន​បាត់​បង់​ជីវិត​។

នៅ​ឯទ្វីប​អាស៊ី​វិញ ប្រទេស​ជប៉ុន បាន​រក​ឃើញ​ករណី​ឆ្លង​រោគ​បន្ថែម​52ករណី នាំ​ឱ្យ​ចំនួន​សរុប​នៃ​អ្នក​បាន​ឆ្លង​មេរោគ​កូរ៉ូណា​ ឡើង​ដល់​ 691នាក់ ក្នុង​នោះអ្នក​ស្លាប់​មានចំនួន​19នាក់ កើន​4ករណី​ ធៀប​នឹង​ម្សិល​មិញ​។

កូរ៉េខាង​ត្បូង បាន​រកឃើញ​អ្នក​ផ្ទុក​មេរោគ​បន្ថែម​114ករណី ធ្វើ​ឱ្យ​ចំនួន​អ្នក​បាន​ឆ្លង​មេរោគ​សរុប​ ឡើង​ដល់​ 7,869នាក់ ក្នុង​នោះ​ចំនួន​អ្នក​ស្លាប់​បាន​កើន​ដល់​ 66នាក់។

ប្រទេស​ចិន​ឯណោះ​វិញ បើ​តាម​តួលេខ​ចុង​ក្រោយ​បង្ហាញ​ថា ប្រទេស​នេះ មាន​អ្នក​ស្លាប់​ដោយ​សារ COVID-19 សរុប​ 3,172​នាក់ ចំណែក​អ្នក​បាន​ឆ្លង​មេរោគ មាន​ចំនួន​80,932​នាក់​។ ប្រទេស​ចិន កាល​ពី​ម្សិល​មិញ ក៏បាន​ប្រកាស​ថា ប្រទេស​នេះ បាន​ឆ្លង​ផុត​ដំណាក់​កាល​ធ្ងន់​ធ្ងរ​បំផុត​នៃ​​រោគ​រាត​ត្បាត​នេះ​ ខណៈ​ដែល​តួលេខ​នៃ​អ្នក​បាន​ឆ្លង​ជា​រៀង​រាល់​ថ្ងៃ​ បាន​ថយ​ចុះ​ជា​បន្ត​បន្ទាប់​។

នៅ​មជ្ឈិម​បូពា៌ ប្រទេស​អ៊ីរ៉ង់ បាន​រក​ឃើញ​អ្នក​ផ្ទុក​មេរោគ​បន្ថែម 1,075ករណី និង​អ្នក​ស្លាប់​បន្ថែម 75ករណី ធ្វើ​ឱ្យ​ចំនួន​សរុប​នៃ​អ្នក​ជំងឺ​កូរ៉ូណា ឡើង​ដល់ 10,075នាក់ អ្នក​ស្លាប់​សរុប 429នាក់​។

សហរដ្ឋ​អាមេរិក មាន​អ្នក​ផ្ទុក​មេរោគ​ COVID-19 សរុប 1,670ករណី។ ចំនួន​អ្នក​ស្លាប់​សរុប 40នាក់ កើន​2ករណី បើ​ធៀប​នឹង​ម្សិល​មិញ។

COVID-19 បាន​បង្ហាញ​ខ្លួន​នៅ​ក្នុង​បណ្ដា​ប្រទេស​នៅ​ទ្វីប​អាមេរិក​ និង​ទ្វីប​អាហ្វ្រិក​។ ប្រទេស​ Gabon ប្រទេស​ Ghana ប្រទេស Trinidad និង​ប្រទេស Tobago រួម​នឹង​ Guyana គឺជា​ប្រទេស​ដែល​បាន​រក​ឃើញ​អ្នក​ផ្ទុក​មេរោគ​កូរ៉ូណាដំបូង​កាល​ពីម្សិល​មិញដូច​គ្នា​​។ នៅ​ទូទាំង​ពិភពលោក បច្ចុប្បន្ន​មាន​អ្នក​ឆ្លង​ COVID-19 សរុប​ 128,343​នាក់ ក្នុង​នោះ​មាន​​អ្នក​ស្លាប់​សរុប 4,970នាក់ និង​68.925នាក់ បាន​ជា​សះស្បើយ​៕

ប្រភព៖ សារ​ព័ត៌មាន​បរទេស

កាល​ពី​3សប្ដាហ៍​មុន ប្រទេស​អ៊ីតាលីមិន​បាន​យក​ចិត្ត​ទុក​ដាក់​ខ្លាំង​នោះ​ទេ នៅ​ចំពោះ​មុខ​ការ​ឆ្លង​រាល​ដាល​នៃ​វីរុស​កូរ៉ូណា COVID-19 ដែល​កំពុង​រាត​ត្បាត​ប្រទេស​ផ្សេង​ៗ​​ ព្រោះ​ថា​ ពេល​នោះ ប្រទេស​នេះ​មាន​អ្នក​ផ្ទុក​មេរោគ​នេះ​ត្រឹម​តែ​3ករណី​ប៉ុណ្ណោះ​ ហើយ​មនុស្ស​មួយ​ចំនួន​យល់​ថា ការ​បិទ​ ឬ​ដាក់​បម្រាម​គោចរ​ទៅ​លើ​ទីក្រុង ឬ​តំបន់​ណា​មួយ​ គឺ​ជារឿង​ហួស​សម័យ​ទៅ​ហើយ​។

ពេល​នេះ អ៊ីតាលី​ កំពុង​ក្លាយ​ជា​ចំណុច​ក្ដៅ​បំផុត​ទី​2ក្នុង​ពិភពលោក ដែល​ស្ថិត​ក្នុង​ការ​ឡោម​ព័ទ្ធ​របស់​ COVID-19 បន្ទាប់​ពី​ប្រទេស​ចិន ដោយប្រទេស​នេះ ​មាន​អ្នក​ឆ្លង​មេរោគ​ ជាង​12,000ករណី និង​អ្នក​ស្លាប់​យ៉ាង​តិច​827ករណី​ ដែល​នេះ​ វា​ខ្ពស់​ជាង​សម្បុក​មេរោគ​ធំ​ចំនួន​2ផ្សេង​ទៀត នោះ​គឺ​ ប្រទេស​អ៊ីរ៉ង់ និង​ប្រទេស​កូរ៉េខាង​ត្បុង​ ក៏ដូចជា​ប្រទេស​ជា​ច្រើន​ផ្សេង​ទៀត​ក្នុង​ពិភពលោក​។

ដើម្បី​ទប់​ស្កាត់​ COVID-19 មិន​ឱ្យ​ឆ្លង​រាល​ដាល​ខ្លាំង​ជាង​នេះ នាយក​រដ្ឋ​មន្ត្រី​ Giuseppe Conte បាន​ដាក់​ចេញ​នូវ​វិធាន​ការ​ខ្លាំង​ក្លា​ជា​ច្រើន​ដែល​មិន​ធ្លាប់​មាន​នៅ​អ៊ីតាលី នា​សម័យ​ថ្មីនេះ​​ ក្នុង​នោះ​ក៏មាន​បម្រាម​គោចរ​ទូទាំង​ប្រទេស​ រហូត​ដល់​ថ្ងៃ​ទី​3មីនា​ ហើយ​ការ​ប្រារព្ធ​ពិធី​បុណ្យ​សព និង​ពិធី​រៀប​ការ​ក៏​សុទ្ធ​តែ​ត្រូវ​បាន​ហាម​ឃាត់​។ ប្រទេស​នេះ ក៏បាន​ចេញ​បញ្ជា​ឱ្យ​បិទ​ហាង​ទំនិញទាំង​អស់​នៅ​ទូទាំង​ប្រទេស លើក​លែង​តែ​ឱសថស្ថាន និង​ហាង​លក់​ស្បៀង​អាហារ ដើម្បី​ទប់​ស្កាត់​ការ​ឆ្លង​រាល​ដាល​នៃ​វីរុស​ COVID-19នេះ។

មូលហេតុ​ចម្បង​មួយ​ដែល​នាំ​ឱ្យ​មាន​វិធាន​ការ​ក្ដៅ​នេះ នោះ​គឺ​ COVID-19 បាន​​ “ជាន់​ពន្លិច” ប្រព័ន្ធ​សុខាភិបាល​របស់​អ៊ីតាលី​ ពិសេស​គឺ​នៅ​ភាគ​ខាង​ជើង​ ដែល​មាន​តំបន់​ Lombardy នៅ​ទី​នោះ​។ គ្រែ​សម្រាប់​អ្នក​ជំងឺ​ចំនួន​ជាង​80% នៅ​​ក្នុង​បណ្ដា​មន្ទីរ​ពេទ្យ​ក្នុង​តំបន់​ Lombardy ត្រូវ​បាន​ប្រើ​ប្រាស់​សម្រាប់​តែ​អ្នក​ជំងឺ​រលាក​សួត​កូរ៉ូណា​តែប៉ុណ្ណោះ។

លោក Richard Neher អ្នក​ស្រាវ​ជ្រាវ​ម្នាក់​មក​ពី​សាកល​វិទ្យា​ល័យ Basel ប្រទេស​ស្វីស បាន​ឱ្យ​ដឹង​ថា “ប្រព័ន្ធ​សុខា​ភិបាល​​ស្ទើរ​តែ​ទាំង​អស់ សុទ្ធ​តែ​ត្រូវ​បាន​កាត់​បន្ថយ​ ដូច្នេះ​ហើយ​ នៅ​ពេល​ចំនួន​អ្នក​ជំងឺ​កើន​ឡើង​ខុស​ធម្មតា កម្លាំង​ធនធាន​ក្នុង​វិស័យ​សុខាភិបាល​ ក៏ចាប់​ផ្ដើម​ខ្វះខាត​។ ប្រការ​ដែល​ឃើញ​ច្បាស់​នោះ​គឺថា​ បើ​សិន​ល្បឿន​នៃ​ការ​ឆ្លង​របស់​មេរោគ​កូរ៉ូណា មិន​ថយ​ចុះនោះ​ទេ ប្រព័ន្ធ​សុខាភិបាល​ទាំង​មូល​នឹង​ត្រូវ​លើស​​ចំណុះ។

បច្ចុប្បន្ន អ្នក​ជំនាញ​មិន​ទាន់​ដឹង​ថា ហេតុ​អ្វី​បានជា​ប្រទេស​អ៊ីតាលី​ បែរ​ជា​មាន​ការ​ឆ្លង​រាល​ដាល​លឿន​ជាង​បណ្ដា​ប្រទេស​នៅ​អឺរ៉ុប​ដូច​គ្នានៅ​ឡើយ​។

ប៉ុន្តែ មាន​មតិខ្លះ​លើក​ឡើង​​ថា ករណី​ឆ្លង​មេរោគ​លឿន​បែប​នេះ​គឺ ដោយ​សារ​ថ្មី​ៗ​នេះ ប្រទេស​អ៊ីតាលី​ បាន​ចាប់​ផ្ដើម​យុទ្ធ​នាការ​ធ្វើ​តេស្ត​រក​មេរោគ​ក្នុង​ទ្រង់ទ្រាយ​ធំ​ ខណៈ​ដែល​ប្រទេស​ផ្សេង​ៗ​ មាន​ការ​យឺតយ៉ាវ​ក្នុង​ការ​ស្វែង​រក​អ្នក​ដែល​មាន​ផ្ទុក​មេរោគ​។

ជាង​នេះ ក៏​មាន​មតិ​ខ្លះ​បាន​លើក​ឡើង​ដែរ​ថា COVID-19 បាន​ឆ្លង​រាល​ដាល​ក្នុង​មន្ទីរពេទ្យ​នានា មុន​ពេល​គ្រូពេទ្យ​បាន​រក​ឃើញ​ បណ្ដាល​ឱ្យ​មេរោគ​នេះ ឆ្លង​រាល​ដាល​ក្នុង​ល្បឿន​លឿន និង​ទ្រង់​ទ្រាយ​ធំ​បែបនេះ​។ បុគ្គលិក​សុខាភិបាល​ប្រមាណជា​10% នៅ​ក្នុង​តំបន់ Lombardy និង​ 5% នៅ​ទូទាំង​ប្រទេស​ បាន​ឆ្លង​វីរុស​ COVID-19នេះ។

ក្រៅ​ពី​នេះ ក៏មាន​ការ​លើក​ឡើង​ថា ដោយ​សារ​ប្រទេស​នេះ មាន​មនុស្ស​ចាស់​ច្រើន ដែល​ជា​បន្ទុក​ដ៏​ធ្ងន់​សម្រាប់​អ៊ីតាលី​ ក្នុង​សង្គ្រាម​ប្រឆាំង​ COVID-19 ព្រោះ​ថា មនុស្ស​ចាប់​គឺជា​​មុខ​សញ្ញា​ដែល​ងាយ​រង​គ្រោះ​ពី​វីរុស​នេះ​ជាង​គេ​។​

អ្វីដែល​បាន​កើត​ឡើង​នៅ​ប្រទេស​អ៊ីតាលី វា​អាច​ក្លាយ​ជា​សេណារីយ៉ោ​ ឬ​ជា​បញ្ហា​ប្រឈម​ក្នុង​ពេល​ខាង​មុខ​របស់​ប្រទេស​ផ្សេង​ៗ​ទៀត​ក្នុង​ពិភពលោក​។ ក្នុង​នោះ​ សហ​រដ្ឋ​អាមេរិក ត្រូវ​បាន​គេ​ជឿថា នឹង​ប្រឈម​ទៅ​នឹង​បញ្ហា​ស្រដៀង​គ្នា​នេះ នា​ពេល​ដ៏ខ្លី​ខាង​មុខ​មិន​ខាន។

ការ​ធ្វើ​តេស្ត​រក​វីរុស COVID-19 នៅ​សហរដ្ឋ​អាមេរិក មក​ដល់​បច្ចុប្បន្ន ត្រូវ​គេ​រាយការណ៍​ថា ធ្វើ​ឡើង​ដោយ​យឺត​ៗ ប៉ុន្តែ អ្នក​ជំនាញ​បានព្យា​ករ​ថា តួលេខ​នៃ​ការ​ឆ្លង​រោគ​នៅ​ប្រទេស​នេះ​ នឹង​កើន​ឡើង​ខ្ពស់ នៅ​ពេល​មន្ត្រី​សុខា​ភិបាល​ចាប់​ផ្ដើម​ធ្វើ​តេស្ត​ទ្រង់​ទ្រាយ​ធំ​៕

ប្រភព៖ សារ​ព័ត៌មាន​បរទេស

ព័ត៌មានបន្ថែម​អំពី​ប្រទេស​អ៊ីតាលី
>មេបញ្ជាការ​កង​ទ័ព​ជើង​គោក​អ៊ីតាលី ឆ្លង​វីរុស Covid-19 ខណៈ​អ៊ីតាលី​បាន​ក្លាយ​ជា​ប្រទេស​ដែល​មាន​អ្នក​ស្លាប់​ដោយ​សារ​ Covd-19 ខ្ពស់​បំផុត​លំដាប់​ទី2ក្នុង​ពិភពលោក
>មេដឹកនាំ​បក្ស​ប្រជាធិបតេយ្យ​នៅ​អ៊ីតាលី ឆ្លង​វីរុស​ Covid-19 ស្រប​ពេល​មន្ត្រី​ជាន់​ខ្ពស់​មួយ​ចំនួន​ ក៏ត្រូវ​បង្ខាំង​ខ្លួន…

នៅទីបំផុត អង្គការសុខភាពពិភពលោក ក៏សម្រេចចិត្តប្រើពាក្យថា Pandemic ឬការរាតត្បាតដ៏ធំបំផុត ដើម្បីអធិប្បាយអំពីស្ថានការណ៍មេរោគ COVID-19 ក្រោយពីមេរោគនេះបានឆ្លងរាលដាលទូទាំងពិភពលោកលើស 100ប្រទេស និងឆ្លងមេរោគជាង 1សែននាក់។

“WHO បានវាយតម្លៃស្ថានការណ៍ការឆ្លងរាលដាលក្នុងគ្រានេះជាប់រហូត 24ម៉ោង និងមានអារម្មណ៍វិតក្កកង្វល់យ៉ាងខ្លាំងចំពោះការឆ្លងរាលដាល និងភាពធ្ងន់ធ្ងរយ៉ាងគួរឱ្យភ្ញាក់ផ្អើល ជាមួយនឹងកម្រិតភាពមិនសូវក្លៀវក្លាស្វាហាប់របស់ប្រទេសនានាយ៉ាងគួរឱ្យភ្ញាក់ផ្អើលដូចគ្នា ដូច្នេះហើយទើបយើងបានវាយតម្លៃថា COVID-19 បានចូលដល់ដំណាក់កាល រាតត្បាតដ៏ធំបំផុត…រាតត្បាតដ៏ធំបំផុត មិនមែនជាពាក្យដែលប្រើប្រាស់បែបមិនល្អិតល្អន់ ឬមិនច្បាស់លាស់នោះទេ” នេះជាប្រសាសន៍របស់លោកវេជ្ជបណ្ឌិត ដេត្រូស អាត់ហាណូម គីប្រ៊ីយេស៊ុស ប្រធានអង្គការសុខភាពពិភពលោក។

តើការប្រកាសថា ជា Pandemic ឬការរាតត្បាតដ៏ធំនេះ មានអត្ថន័យ និងមានផលពាក់ព័ន្ធយ៉ាងណា?

ពាក្យថា Pandemic

ពាក្យនេះមកពីភាសាក្រិកដែលមានន័យថា Pan(ទាំងអស់) និង demos(មនុស្សម្នា) ជាពាក្យដែលប្រើនៅពេលដែលមេរោគឆ្លងបានពង្រីកវង់ធំទូលាយនៅក្នុងប្រទេសជាច្រើន និងទ្វីបជាច្រើនក្នុងពេលតែមួយ។ ខុសពីពាក្យថា Epidemic ដែលមានន័យពីការឆ្លងរាលដាលហួសពីការគ្រប់គ្រង តែនៅមានកំណត់នៅក្នុងប្រទេសណាមួយ ឬក្នុងចំណុចណាមួយ។

ទោះជាស្ដាប់ទៅគួរឱ្យខ្លាច តែ Pandemic ជាគោលការណ៍គឺ ការអះអាងដោយយោងលើការសាយភាយនៃមេរោគ មិនមែនអត្រានៃការស្លាប់ ឬសក្ដានុពលរបស់ជំងឺនោះទេ។

WHO បានឱ្យនិយមន័យ Pandemic ថាជាសភាវឆ្លងរាលដាលរបស់រោគថ្មីមួយដែលចម្លងពីមនុស្សទៅមនុស្សទូទាំងពិភពលោកបានដោយងាយ ដែលមានន័យពីការឆ្លងរាតត្បាតក្នុងរង្វង់ធំក្នុងច្រើនប្រទេស ឬច្រើនទ្វីប ប៉ះពាល់មនុស្សក្នុងចំនួនដ៏ច្រើន ហើយរោគនោះត្រូវតែជារោគឆ្លងទៀតផង។

ជំងឺមហារីក ដែលមានអ្នកជំងឺដ៏ច្រើនទូទាំងពិភពលោក មិនមែនជាជំងឺឆ្លងទេ ដូច្នេះហើយទើបមិនមែនជាការឆ្លងរាតត្បាតដ៏ធំនោះទេ។

មុនដំបូង WHO មិនបានប្រើពាក្យថា ការរាតត្បាតដ៏ធំនេះឡើយ រហូតទាល់តែមានការច្បាស់លាស់ថា ការឆ្លងរាលដាលក្នុងប្រទេស ឬ Local transmission បានសាយភាយដ៏ធំចេញទៅ។ ប្រទេសដែលរកឃើញវីរុស Sars-CoV2 ស្ថិតក្នុងចំនួន 115ប្រទេស និងមានច្រើនជាង 10ប្រទេសដែលរកឃើញអ្នកដែលច្បាស់ជាឆ្លងមេរោគពិតប្រាកដហើយយ៉ាងតិច 500នាក់។

តើការប្រកាសជា សភាវឆ្លងរាតត្បាតដ៏ធំ លើកចុងក្រោយបំផុត កើតមាននៅពេលណា?

កាលពីឆ្នាំ2009 អង្គការសុខភាពពិភពលោក បានប្រកាសដាក់រោគផ្ដាសាយធំ H1N1 ជាសភាវឆ្លងរាតត្បាតដ៏ធំ តែនៅគ្រានោះ WHO ត្រូវទទួលរងនូវការរិះគន់ពីប្រទេសជាច្រើនដែលយល់ឃើញថា ជាការបង្កភាពភ័យភ្ញាក់ផ្អើលដោយមិនចាំបាច់ និងថែមទាំងធ្វើឱ្យប្រទេសជាច្រើនបាត់បង់ប្រាក់ទៅលើការអភិវឌ្ឍវ៉ាក់សាំងការពាររោគគ្រុនផ្ដាសាយប្រភេទថ្មី ដែលនៅទីបំផុតទៅ អាការក៏មិនធ្ងន់ធ្ងរខ្លាំងក្លា និងទប់ស្កាត់បានដោយមិនលំបាកឡើយ។
កាលពីពេលមុនហ្នឹង មានការប្រើពាក្យនេះជាមួយនឹងមេរោគវីរុស HIV គ្រុនផ្ដាសាយជ្រូក និងគ្រុនផ្ដាសាយធំអេស្បាញ។

កម្មវិធីការប្រកាសដាក់ជាសភាវ Pandemic

មានការផ្លាស់ប្ដូរច្រើនយ៉ាង រាប់ចាប់ពីឆ្នាំ2009 ដោយ WHO បានបញ្ជាក់ថា គ្មានដំណាក់កាលជាផ្លូវការតទៅទៀតទេ ក្នុងការចាត់លំដាប់ថ្នាក់ផ្នែករោគរាតត្បាតថា ជាPandemic ដូចកាលពីពេលមុនដែលមានកម្រិតប្រកាសអាសន្ន 6ដំណាក់កាលនោះទេ។

ការពិតទៅ ការប្រកាសកាលពីថ្ងៃទី30 មករាថា មេរោគវីរុសកូរ៉ូណាប្រភេទថ្មី2019 ជាស្ថានការណ៍អាសន្នខាងផ្នែកសាធារណសុខាភិបាលពិភពលោកនោះ គឺជាការលើកកម្ពស់កម្រិតខ្ពស់បំផុតក្នុងការបញ្ជាក់អំពីស្ថានការណ៍ឆ្លងរាតត្បាតរបស់ពិភពលោកក្រោមរបៀបច្បាប់សាធារណសុខាភិបាលអន្តរជាតិ ដែលជាផ្លូវការវិញ អាចមានអត្ថន័យទៅលើកម្មវិធីការទប់ទល់ ខ្លាំងជាងការប្រកាសថា ជាការឆ្លងរាតត្បាតដ៏ធំទៅទៀត។

ដូច្នេះហើយ នៅពេលប្រធានអង្គការសុខភាពពិភពលោកប្រកាសថា វីរុសកូវីដ-19 ជាសភាវឆ្លងរាតត្បាតដ៏ធំ ទើបវាមិនមែនជាការសម្រេចចិត្តដែលចេញមកពីកម្មវិធីជាផ្លូវការនោះទេ និងថែមទាំងគ្មានវិធានការថ្មីៗណាមួយចេញមកកំណត់ឱ្យប្រើប្រាស់ឡើយ។

តែទោះជាដូច្នេះមែន ការប្រកាសថា ជាការឆ្លងរាតត្បាតដ៏ធំ ក៏អាចរាប់បានថាជាជំហានសំខាន់មួយ ដែលបានឆ្លងកាត់ការពិភាក្សាទាំងក្នុង និងក្រៅអង្គការអស់រយៈពេលដ៏យូរមកហើយដែរ មុននឹងប្រើពាក្យនេះ។

ម៉ៃក៍ រ៉ៃអាន់ នាយកផ្នែកជំងឺអាសន្នរបស់ WHO បានថ្លែងថា ការប្រកាសថា ជាការឆ្លងរាតត្បាតដ៏ធំ មិនមែនជាការធ្វើឱ្យលេចធ្លោអ្វីខ្លាំងជាងសេចក្ដីត្រូវការចង់ឃើញវិធានការច្បាស់លាស់ និងម៉ឺងម៉ាត់ខ្លាំងឡើង យើងគិតថា វាជារឿងធ្ងន់ធ្ងរ និងយើងយល់អំពីផលពាក់ព័ន្ធរបស់ពាក្យមួយនេះ។

តើមានផលផ្លាស់ប្ដូរអ្វីឬទេ?

ប្រធាន WHO ថ្លែងថា លោកប្រើពាក្យនេះ ព្រោះព្រួយបារម្ភពីកម្រិតនៃភាពមិនក្លៀវក្លាស្វាហាប់ទូទាំងពិភពលោក ដូច្នេះក៏ប្រហែលជាដោយសារតែត្រូវការដាក់សម្ពាធទៅលើប្រទេសផ្សេងៗ ឱ្យដំណើរការខ្លាំងឡើង ដើម្បីទប់ស្កាត់វីរុសដ៏កំណាចនេះ។

ការអធិប្បាយស្ថានការណ៍ថា ជាការឆ្លងរាតត្បាតដ៏ធំ មិនបានផ្លាស់ប្ដូរការវាយតម្លៃគ្រោះថ្នាក់របស់មេរោគវីរុស មិនបានផ្លាស់ប្ដូរនូវអ្វីដែល WHO កំពុងធ្វើ និងមិនបានផ្លាស់ប្ដូរអ្វីដែលប្រទេសផ្សេងៗគួរតែធ្វើនោះទេ” តែសុំបញ្ជាក់ដាស់តឿនគ្រប់ប្រទេសឱ្យមានភាពស្វាហាប់ឡើង និងបញ្ចេញយន្តការ ឬសកម្មភាពទប់ទល់គ្រាអាសន្ន ទំនាក់ទំនងជាមួយប្រជាជនអំពីភាពប្រថុយប្រថាន និងឱ្យពួកគេបានដឹងថា តើនឹងត្រូវការពារខ្លួនយ៉ាងម៉េច? ការពិនិត្យរក បំបែកបង្ខាំងដោយឡែកដើម្បិរកមេរោគ និងព្យាបាលអ្នកជំងឺគ្រប់រូប តាមដានសាកសួរអ្នកប៉ះពាល់ជំងឺគ្រប់គ្នា ត្រៀមរួចជាស្រេច ការពារ និងអប់រំបុគ្គលិកសុខាភិបាល។

ផលប៉ះពាល់ខាងសេដ្ឋកិច្ច ពីការឆ្លងរាតត្បាតដ៏ធំ

ធនាគារពិភពលោកវាយតម្លៃថា ការឆ្លងរាតត្បាតដ៏ធំលំដាប់មធ្យមដល់ធ្ងន់ធ្ងរ នឹងបង្កការខូចខាតដល់សេដ្ឋកិច្ចពិភពលោក ប្រមាណ 5.7សែនលានដុល្លារ ឬប្រមាណ 0.7%នៃចំណូលទូទាំងពិភពលោក។

កាលពីជំងឺសារស៍រាតត្បាតក្នុងឆ្នាំ2002-2003 អ្នកឆ្លងមេរោគមានតែ 8,000នាក់ សេដ្ឋកិច្ចពិភពលោកខាតបង់ 5ម៉ឺនលានដុល្លារ ចំណែកកូវីដ-19 ទោះជាអត្រាការស្លាប់ទាបជាង តែកម្លាំងបំផ្លាញខ្លាំងជាង មួយចំណែកដោយសារតែពិភពលោករាល់ថ្ងៃនេះពឹងពាក់លើចិនខ្លាំងជាង 17ឆ្នាំមុនយ៉ាងមិនអាចប្រៀបធៀបបាន…។

17ឆ្នាំមុនចិនមានចំណែក 5%នៃសេដ្ឋកិច្ចពិភពលោក តែបច្ចុប្បន្នស្ថិតក្នុងចំនួនប្រមាណជា 20%៕

ប្រភព៖ សារព័ត៌មានបរទេស

ការ​សិក្សា​ស្រាវ​ជ្រាវ​របស់​ក្រុម​អ្នក​វិទ្យា​សាស្ត្រ​អាមេរិកាំង បាន​រក​ឃើញ​ថា វីរុស​កូរ៉ូណា COVID-19 អាច​រក្សា​ជីវិត​របស់​វា​បាន​ដល់​ទៅ​​ច្រើន​ម៉ោងនៅ​ក្នុង​ខ្យល់ និង​ចាប់​ពី ​2ទៅ​3ថ្ងៃ​ នៅ​លើ​ផ្ទៃខាង​លើ​​នៃ​វត្ថុ​​អ្វី​មួយ។

ទស្សនាវដ្ដី Time ដក​ស្រង់​លទ្ធ​ផល​នៃ​ការ​សិក្សា​ស្រាវ​ជ្រាវ​របស់​រដ្ឋា​ភិបាល​សហ​រដ្ឋ​អាមេរិក និង​ក្រុម​អ្នក​វិទ្យា​សាស្ត្រ ដែល​ត្រូវ​បាន​ប្រកាស​កាល​ពី​ថ្ងៃទី​11មីនា​កន្លង​ទៅ ឱ្យ​ដឹង​ថា ក្រៅ​ពី​ការ​ឆ្លង​តាម​រយៈ​មនុស្ស​ប៉ះពាល់​គ្នា វីរុស​ COVID-19 ក៏អាច​ឆ្លង​ទៅ​តាម​ខ្យល់ ឬ​តាម​រយៈ​ការ​ប៉ះ​ពាល់​ទៅ​លើ​ផ្ទៃ​ខាង​លើ​​នៃ​វត្ថុ​អ្វី​មួយ​ ដែល​អ្នក​ជំងឺ​បាន​ប៉ះ​ពាល់​ផងដែរ​។

ការ​សិក្សា​ស្រាវ​ជ្រាវ​ខាងលើ​នេះ ត្រូវ​បាន​ធ្វើ​ឡើង​ដោយ​ក្រុម​អ្នក​វិទ្យា​សាស្ត្រ​នៃ​វិទ្យា​ស្ថាន​សុខាភិបាល​ជាតិ សាកល​វិទ្យា​ល័យ Princeton និង​សាកល​​វិទ្យា​ល័យ California ដោយ​ទទួល​បាន​ថវិកាដែល​ឧបត្ថម្ភ​ដោយ​រដ្ឋាភិបាល​សហ​រដ្ឋ​អាមេរិក និង​មូល​និធិ​វិទ្យា​សាស្ត្រ​ជាតិ​។​

ក្រុម​អ្នក​វិទ្យា​សាស្ត្រ​ បាន​ប្រើ​ប្រាស់​ម៉ាស៊ីនឆ្ពុងប្រព័ន្ធ​ដង្ហើម nebulizer ដើម្បី​ពិសោធ​ទៅ​លើ​ការ​បញ្ចេញ​វីរុស​​​ទៅ​ក្នុង​បរិយា​កាស​ បំណង​ធ្វើ​ឱ្យ​វា​ដូច​ទៅ​នឹង​ស្ថាន​ភាព​ដែល​​អ្នក​ជំងឺ​ក្អក កណ្ដាស់ ឬ​បញ្ចេញ​វីរុស​ទៅ​ក្នុង​ខ្យល់​។ នេះ​បើ​តាម​សារ​ព័ត៌មាន Time។

តាម​រយៈ​ការ​ពិសោធ​ខាង​លើ អ្នក​វិទ្យា​សាស្ត្រ​បាន​រក​ឃើញ​ថា វីរុស​នៅ​តែអាច​រក្សា​​ជីវិតរបស់់​វា​ បាន​ដល់​ទៅ​ 3ម៉ោង​នៅ​ក្នុង​ខ្យល់ 4ម៉ោង​នៅ​លើ​ផ្ទៃ​នៃ​វត្ថុ​ធ្វើ​ពី​ស្ពាន់ 24ម៉ោង​នៅ​លើ​​ក្រដាស​កាតុង និង​3ថ្ងៃ នៅ​លើ​ផ្ទៃ​នៃ​វត្ថុ​ធ្វើ​ពីជ័រ ឬដែក​អ៊ីណុក​។ លទ្ធ​ផល​នេះ​ ប្រហាក់​ប្រហែល​នឹង​ការ​សិក្សា​ស្រាវ​ជ្រាវ​មួយ​ដែល​ត្រូវ​បាន​ធ្វើ​ឡើង​ទៅ​លើ​វីរុស​ដែល​បង្ក​ជំងឺ​ SARS កាល​ពី​ឆ្នាំ​2003។

“នេះ​គឺជា​ផ្នែក​មួយ​នៃ​ការ​សិក្សា​ស្រាវជ្រាវ​ដើម្បី​ឆ្លើយ​តប​ទៅ​នឹង​សំណួរ​របស់​សាធារណជន ហើយ​ទន្ទឹមនឹង​នេះ វា​ក៏​បង្ហាញ​ឱ្យ​ឃើញ​អំពី​តម្លៃ​​ ក៏ដូចជា​សារ​សំខាន់​នៃ​ការ​ណែនាំ​អំពី​បញ្ហា​រក្សា​អនាម័យ​ ដែល​ក្រុម​មន្ត្រី​សុខា​ភិបាល​បាន​លើក​ឡើង​។ អ្វី​ដែល​យើង​ទាំង​អស់​គ្នា​ត្រូវ​ធ្វើ​ នោះ​គឺ​ការ​លាង​ដៃ ហើយ​ត្រូវ​ដឹង​ថា អ្នកជំងឺ​ទាំង​អស់​ អាច​ចម្លង​មេរោគ​ទៅ​លើ​អ្វី​ៗ​ដែល​ពួកគេ​បាន​ប៉ះពាល់ និង​ចៀស​វាង​ការ​យក​ដៃ​ទៅ​ប៉ះមុខ​មាត់​” នេះ​បើ​តាម​ការ​ណែនាំ​របស់​ Julie Fischer ជា​សាស្ត្រាចារ្យ​ផ្នែក​មីក្រូជីវសាស្ត្រ​នៃ​សាកល​វិទ្យា​ល័យ​ Georgetown នៅ​សហ​រដ្ឋ​អាមេរិក។

មុន​នេះ លទ្ធ​ផល​នៃ​ការ​សិក្សា​ស្រាវ​ជ្រាវ​មួយ​របស់ក្រុម​អ្នក​វិទ្យា​សាស្ត្រ​ចិន ដែល​បាន​ប្រកាស​កាល​ពី​ថ្ងៃទី​6មីនា បាន​បញ្ជាក់​ថា វីរុស​កូរ៉ូណា​ COVID-19 អាច​អណ្ដែត​​ក្នុង​ខ្យល់​យ៉ាង​ហោច​30នាទី និង​អាច​ហោះ​បាន​​ក្នុង​ចម្ងាយ​4.5ម៉ែត្រ គឺ​ឆ្ងាយ​ជាង​ “ចម្ងាយ​សុវត្ថិ​ភាព​” ដែល​ក្រុម​អ្នក​វេជ្ជ​សាស្ត្រ​ធ្លាប់​បាន​លើក​ឡើង​ទៅ​ទៀត​។

សូម​បញ្ជាក់​ថា បន្ទាប់​ពី​ផ្ទុះ​ឆ្លង​រាល​ដាល​នៅ​ប្រទេស​ចិន តាំង​ពី​ចុង​ឆ្នាំ​2019​ មក​ដល់​ពេល​នេះ COVID-19 បាន​បង្ហាញ​ខ្លួន​នៅ​ក្នុង​ប្រទេស និង​ដែន​ដី​ចំនួន120 នៅ​ទូទាំង​ពិភពលោក។ បច្ចុប្បន្ន មនុស្ស​ចំនួន​126,136​នាក់​បាន​ឆ្លង​មេរោគ​កូរ៉ូណា​នេះ ក្នុង​នោះ​មាន​ 4,630​នាក់​បាន​ស្លាប់ និង​ 68,219នាក់​ បាន​ជា​សះស្បើយ​ពី​ជំងឺ​៕

ប្រភព៖ សារ​ព័ត៌មាន​បរទេស

ប្រធាន​អង្គ​ការ​សុខ​ភាព​ពិភពលោក លោក Tedros Adhanom Ghebreyesus បាន​ប្រកាស​ថា អង្គ​ការ​នេះ​បាន​វាយ​តម្លៃ​ និង​ចាត់​ទុក​ COVID-19 គឺជា​ “ជំងឺរាត​ត្បាត​សកល” ហើយ​បាន​អំពាវនាវ​ឱ្យ​ប្រទេស​ទាំង​អស់​ក្នុង​ពិភពលោក ចាត់​វិធាន​ការ​ខ្លាំង​ក្លា​បំផុត​ដើម្បី​ទប់​ទល់​នឹង​រោគ​រាត​ត្បាត​នេះ​។

“យើង​មាន​ករ​ព្រួយ​បារម្ភ​បំផុត​អំពី​កម្រិត​នៃ​ការ​ឆ្លង​រាល​ដាល​ ភាព​ធ្ងន់ធ្ងរ​របស់​វីរុស រួម​នឹង​ការ​ព្រងើយកន្ដើយ​ដ៏គួរ​ឱ្យ​បារម្ភ​នៃ​ភាគី​មួយ​ចំនួន​។ ដូច្នេះ យើង​បាន​វាយ​តម្លៃ​ថា COVID-19 អាច​ត្រូវ​បាន​ចាត់​ទុក​ថា​ជា ជំងឺ​រាត​ត្បាត​សកល​”។ នេះ​បើ​តាម​សម្ដី​របស់​ប្រធាន​អង្គការ​សុខ​ភាព​ពិភពលោក​ ដែល​បាន​ថ្លែង​នៅ​ក្នុង​សន្និ​សីទ​សារ​ព័ត៌មាន​មួយ​ កាល​ពី​ម្សិល​មិញ​ នៅ​ឯប្រទេស​ស្វីស។

លោក Tedros បាន​ឱ្យ​ដឹង​ថា ​តួលេខ​នៃ​ការ​ឆ្លង​មេរោគ​ COVID-19 នៅ​ខាង​ក្រៅ​ប្រទេស​ចិន បាន​កើន​ឡើងច្រើន​ជាង​មុន​​13ដង ក្នុង​អំឡុង​2សប្ដាហ៍​កន្លង​មក​នេះ​។ លោក​ Tedros បន្ត​ថា “យើង​ព្យាករ​ថា តួលេខ​នៃ​ករណី​ឆ្លង​ ករណី​ស្លាប់ និង​ចំនួន​ប្រទេស​ដែល​រង​ផល​ប៉ះពាល់​ នឹង​កើន​ឡើង​ច្រើន​ និង​​ខ្ពស់​ជាង​នេះ​ ក្នុង​រយៈ​ប៉ុន្មាន​ថ្ងៃ និង​ប៉ុន្មាន​សប្ដាហ៍​ខាង​មុខ​”។

Mike Ryan អ្នក​គ្រប់​គ្រង​កម្មវិធី​ប្រតិកម្ម​បន្ទាន់របស់​ WHO បាន​ឱ្យ​ដឹង​នៅ​ក្នុងសន្និសីទ​សារ​ព័ត៌មាន​ថា ការ​ដែល​អង្គ​ការ​នេះ​ប្រើ​ពាក្យ​ “ជំងឺរាតត្បាតសកល” ដើម្បី​សំដៅ​ទៅ​លើ​ COVID-19 គឺ​មិន​ធ្វើ​ឱ្យ​មាន​ការ​ផ្លាស់​ប្ដូរ​ទាក់​ទិន​នឹង​​វិធី​ទប់​ទល់​របស់​ពួកគេ​នោះ​ទេ​។

WHO ធ្លាប់​បាន​ប្រកាស​អាសន្ន​ផ្នែក​វេជ្ជ​សាស្ត្រ​នៅ​ទូទាំង​ពិភពលោក​ កាល​ពី​ថ្ងៃទី​30មករា ដែល​កាល​នោះ ចំនួន​​ករណី​ឆ្លង​ COVID-19 នៅ​ខាង​ក្រៅ​ប្រទេស​ចិន​ មិន​ដល់​100នាក់​ផង។ ប៉ុន្តែ បច្ចុប្បន្ន រោគ​រាត​ត្បាត​នេះ បាន​បង្ហាញ​ខ្លួន​នៅ​ក្នុង​ប្រទេស​ និង​ដែន​ដី​ចំនួន​120ទៅ​ហើយ​។ គិត​មក​ដល់​បច្ចុប្បន្ន ជំងឺរាតត្បាតសកលនេះ បាន​សម្លាប់​មនុស្ស​ចំនួន 4,630នាក់ និង​បាន​ឆ្លង​ទៅ​មនុស្ស​ចំនួន​ 126,135​នាក់ នៅ​ទូទាំង​ពិភពលោក​៕

ប្រភព៖​ សារ​ព័ត៌មាន​បរទេស

COVID-19 បាន​បង្ហាញ​ខ្លួន​នៅ​ក្នុង​ប្រទេស​ និង​ដែន​ដី​ចំនួន​122 នៅ​ទូទាំង​ពិភពលោក ហើយ​បាន​ធ្វើ​ឱ្យ​មនុស្ស​ជាង​126,000នាក់​ ត្រូវ​ឆ្លង​ជម្ងឺ​រលាក​សួត​ប្រភេទ​ថ្មី​​ និងបាន​សម្លាប់​មនុស្ស​ជាង​4,600នាក់ ក្នុង​នោះ​ ​កំណើន​នៃ​ចំនួន​អ្នក​​ស្លាប់​ដោយ​សារ​មេរោគ​នេះនៅ​អ៊ីតាលី លឿន​ជាង​គេ​បង្អស់​។

ប្រទេស​អ៊ីតាលី បាន​បញ្ជាក់​ថា​ តួលេខ​ថ្មី​នៃ​ចំនួន​អ្នក​ស្លាប់បន្ថែម​គឺ 196ករណី ធ្វើ​ឱ្យ​ចំនួន​អ្នក​ស្លាប់​ដោយ​សារ​ COVID-19 សរុបនៅ​ប្រទេស​នេះ​ ឡើង​ដល់ 827នាក់​។ ប្រទេស​នេះ​ក៏​បាន​រក​ឃើញ​អ្នក​ជំងឺ​ថ្មី​ចំនួន 2,313ករណី នាំ​ឱ្យ​ចំនួនសរុប​នៃ​​អ្នក​បាន​ឆ្លង​មេរោគ​នេះ​ កើន​ដល់​12,462នាក់ ឈរ​លំដាប់​ទី​2 ក្នុង​ពិភពលោក​។

នៅ​ប្រទេស​អ៊ីរ៉ង់ ចំនួន​ករណី​ឆ្លង​វីរុស​កូរ៉ូណា​ កាល​ពី​ថ្ងៃទី​11មីនា គឺ9,000នាក់ កើន​958​ករណី​។ ជាមួយ​នឹង​ករណី​ស្លាប់​ថ្មីចំនួន​63នាក់ អ៊ីរ៉ង់បច្ចុប្បន្ន​មាន​អ្នក​ស្លាប់​ដោយ​សារ​ COVID-19 ឡើង​ដល់​354នាក់​។

ប្រទេស​កូរ៉េខាង​ត្បូង កាល​ពី​ថ្ងៃទី​11មីនា មាន​អ្នក​ឆ្លង​មេរោគ​ចំនួន​242ករណីបន្ថែម​ទៀត នាំ​ឱ្យ​ចំនួន​សរុប​នៃ​ករណី​ឆ្លង​ក្នុង​ប្រទេស​នេះ កើន​ដល់​ 7,755នាក់​ ក្នុង​នោះ មាន​អ្នក​ស្លាប់​60នាក់​។ កូរ៉េខាង​ត្បូង​ ព្រឹក​នេះ​មិន​ទាន់​បាន​ប្រកាស​ឱ្យ​ដឹង​ជា​ផ្លូវ​ការ​អំពី​ស្ថិតិ​ថ្មី​បំផុត​នៅ​ឡើយ​។ ប្រទេសនេះ​ តែង​ប្រកាស​2លើក​ក្នុង​1ថ្ងៃ​ គឺ​ព្រឹក​​ និង​ល្ងាច។

តួលេខ​នៃ​​ករណី​ឆ្លង​ និង​ស្លាប់​នៅ​ក្នុង​ប្រទេស​ចិន គិត​មក​ថ្ងៃ​ទី​11មីនា តាម​លំដាប់​លំដោយ​គឺ 80,921នាក់​ និង​ 3,161នាក់​។

ប្រទេស​ជប៉ុន ក៏​បាន​រក​ឃើញ​អ្នក​ជំងឺ​ថ្មី​ចំនួន 52នាក់​ នាំ​ឱ្យ​ចំនួន​ករណី​ឆ្លង​រោគ​កូរ៉ូណា​ COVID-19 ក្នុង​ប្រទេស​នេះ​ឡើង​ដល់ ​639នាក់។ ចំណែក​ករណី​ស្លាប់​វិញ មាន​ចំនួន​15នាក់​។

ប្រទេស​អេស្ប៉ាញ និង​អាល្លឺម៉ង់ មាន​ករណី​​ឆ្លង​រោគ​ថ្មី​ជា​បន្ត​បន្ទាប់ ក្នុង​នោះ​ ចំនួន​ករណី​ឆ្លង​ថ្មីនៅ​អេស្ប៉ាញ​គឺ​493នាក់ និង​អាល្លឺម៉ង់​គឺ​ 288នាក់​។ ចំនួន​ករណី​ឆ្លង​សរុប​នៅ​អេស្ប៉ាញ គឺ​ 2,188នាក់ ចំណែក​អាល្លឺម៉ង់ គឺ 1,853នាក់។ រីឯ​តួលេខ​នៃ​អ្នក​ស្លាប់​ដោយ​សារ​ COVID-19 នៅ​អេស្ប៉ាញគឺ​ 49នាក់ និង​អាល្លឺម៉ង់ គឺ​មាន​ចំនួន​3នាក់​។

អង់គ្លេស មាន​ករណី​ឆ្លង​ថ្មី​ចំនួន 73នាក់ ធ្វើឱ្យ​ចំនួនសរុប​នៃ​ករណី​ឆ្លង​ COVID-19 នៅ​ប្រទេស​នេះ កើន​ដល់ 456​នាក់ ក្នុង​នោះ​មាន​អ្នក​ស្លាប់​ 6នាក់​។

ចំណែក​ប្រទេស​ស្វីស ហូឡង់ និង​ស៊ុយ​អែត សុទ្ធ​តែ​បាន​រក​ឃើញ​អ្នក​ផ្ទុក​មេរោគ​កូរ៉ូណា COVID-19 ករណី​ថ្មី ​លើស​ពី​ 120នាក់ដូច​គ្នា​។ ចំនួន​អ្នក​បាន​ឆ្លង​មេរោគ​កូរ៉ូណាសរុប​ នៅ​ក្នុង​ប្រទេស​ទាំង​3នេះ គឺ ស្វីស 652នាក់ ហូឡង់ 503នាក់ និងប្រទេស​ស៊ុយ​អែត​មាន 477នាក់​ ហើយ​ប្រទេស​ទាំង​នេះ ក៏សុទ្ធ​តែ​មាន​អ្នក​ស្លាប់​ថ្មី​ចំនួន​1ករណី​ដូច​គ្នា​។ ឯចំនួន​ករណី​ស្លាប់​សរុប​នៃ​ប្រទេស​ទាំង​នេះ គឺ ស្វីស 4នាក់ ហូឡង់ 5នាក់ និង​ស៊ុយ​អែត​ 1នាក់​។

សហរដ្ឋ​អាមេរិក បាន​រក​ឃើញ​ករណី​ឆ្លង​មេរោគ​ថ្មី​ចំនួន​309នាក់ នាំ​ឱ្យ​អ្នក​ផ្ទុក​មេរោគ​ COVID-19 ក្នុង​ប្រទេស​នេះ កើន​ដល់ 1,303នាក់​។ ករណី​ស្លាប់​ បាន​ឡើង​ដល់​38នាក់​ កើន​7ករណី បើ​ធៀប​នឹង​1ថ្ងៃ​មុន​។

ករណី​ដែល​គួរ​ឱ្យ​ព្រួយ​បារម្ភ​ជាង​គេ​នៅ​មជ្ឈិម​បូពា៌ នោះ​គឺ​ប្រទេស​កាតារ។ កាល​ពី​ថ្ងៃទី​11មីនា ប្រទេសនេះ បាន​រក​ឃើញ​អ្នក​ផ្ទុក​មេរោគ​ COVID-19 ចំនួន 238​ករណី​បន្ថែម​ទៀតក្នុង​ពេល​ត្រឹម​តែ​1ថ្ងៃ​ ខណៈ​មុន​នោះ​1ថ្ងៃ កាតារ​ មាន​អ្នក​ជំងឺ​ត្រឹម​តែ​24នាក់​ប៉ុណ្ណោះ។

បែលហ្ស៊ិក ហូឡង់ ប៊ុលហ្គារី និង​អៀរឡង់ គឺជា​បណ្ដា​ប្រទេស​ដែល​មាន​អ្នក​ស្លាប់​ដំបូង​​ដោយ​សារ​ COVID-19 កាល​ពី​ម្សិល​មិញ (11មីនា) និង​នៅ​ព្រឹក​នេះ។

ប្រទេស​ហុងឌូរ៉ាស (នៅអាមេរិកកណ្ដាល) និងកូតឌីវ័រ (នៅ​អាហ្វ្រិក​ខាង​លិច) រួម​នឹង​កោះ Reunion របស់​បារាំង គឺ​ជា​ទឹក​ដី​ចុង​ក្រោយ​ដែល​បាន​រក​ឃើញ​អ្នក​ផ្ទុក​ COVID-19៕

ប្រភព៖ សារ​ព័ត៌មាន​បរទេស

អនុប្រធានាធិបតីទី1របស់​ប្រទេស​អ៊ីរ៉ង់ Eshaq Jahangiri និង រដ្ឋមន្ត្រី​2រូប របស់​ប្រទេស​នេះ ត្រូវបាន​ធ្វើ​តេស្ត​រក​ឃើញ​វីរុស COVID-19 នេះ​បើ​តាម​សារព័ត៌មាន Fars។

សារ​ព័ត៌មាន Fars ដកស្រង់​ប្រភព​ព័ត៌មាន​គួរ​ឱ្យ​ទុក​ចិត្ត​មួយ កាល​ពី​ថ្ងៃ​ទី11មីនា ឱ្យដឹងថា អនុប្រធានាធីបតី​​អ៊ីរ៉ង់ Eshaq Jahangiri បាន​ឆ្លងវីរុស COVID-19។ ព័ត៌មាន​នេះ ត្រូវ​បាន​លើក​ឡើង​ ក្រោយ​ពី​មាន​ដំណឹង​ចចាម​អារ៉ាម​អំពីស្ថាន​ភាព​សុខ​ភាព​របស់​លោក Eshaq Jahangiri ដោយ​សារ​តែ​លោក​មិន​បាន​ចូល​រួម​ក្នុង​កិច្ច​ប្រជុំកំពូល​នានា​ក្នុង​ពេល​ថ្មី​ៗ​របស់​ប្រទេស​អ៊ីរ៉ង់។ បច្ចុប្បន្ន គេ​មិន​ទាន់​ដឹង​ថា លោក Eshaq Jahangiri ធ្លាប់​បាន​ប៉ះពាល់​ផ្ទាល់​ជាមួយ​នឹង​ប្រធានាធិបតី​អ៊ីរ៉ង់ លោក Hassan Rouhani ក្នុង​ពេល​​ថ្មី​ៗ​នេះ​ដែរ ឬ​អត់​នោះ​ទេ​។

សារ​ព័ត៌មាន Fars ក៏បាន​ឱ្យ​ដឹង​ថា បច្ចុប្បន្ន អនុប្រធានាធិបតី​អ៊ីរ៉ង់ លោក Eshaq កំពុង​បង្ខាំង​ខ្លួន​នៅ​ដាច់​ដោយ​ឡែក​ពីគេ ហើយ​ស្ថាន​ភាព​សុខភាព​របស់​គាត់​នៅ​ល្អ​នៅ​ឡើយ។

ក្រៅ​ពី​អនុប្រធានាធិតី​ Eshaq Jahangiri រដ្ឋ​មន្ត្រី​2រូប​ផ្សេង​ទៀត​របស់​ប្រទេស​អ៊ីរ៉ង់ ក៏ត្រូវ​បាន​ធ្វើ​តេស្ត​រក​ឃើញថា​មាន​ផ្ទុក​មេរោគ​ COVID-19 រួម​មាន​ រដ្ឋមន្ត្រី​ក្រសួងបេតិកភណ្ឌវប្បធម៌ និង​ទេសចរណ៍ Ali Asghar Mounesan និង​រដ្ឋមន្ត្រីក្រសួង​ឧស្សាហ​កម្ម​ រ៉ែ និង​អាជីវកម្ម​ Reza Rahmani។

បច្ចុប្បន្ន សារ​ព័ត៌មាន​របស់​រដ្ឋ​អ៊ីរ៉ង់ មិន​ទាន់​បាន​ចេញ​ប្រកាសជា​ផ្លូវ​ការ​អំពី​ករណី​ថ្មី​ទាំង​នេះ​នៅ​ឡើយ​។ បើ​សិន​ជា​ព័ត៌មាន​នេះ​ត្រូវ​បាន​បញ្ជាក់​ជា​ផ្លូវ​ការ នោះ​ករណី​ទាំង​នេះ​នឹង​ធ្វើ​ឱ្យ​មន្ត្រី​កំពូល​ៗ​នៅ​អ៊ីរ៉ង់​ កាន់​តែ​ប្រឈម​នឹង​ហានិភ័យ​នៃ​ការ​ឆ្លងវីរុស​កូរ៉ូណា​នេះ​​ខ្ពស់​បំផុត​។ នេះ​បើ​តាម​សារ​ព័ត៌មាន Aljazeera។

មុនករណី​នេះ អនុប្រធានាធិបតី​ទទួល​បន្ទុក​កិច្ច​ការ​នារី លោក​ស្រី Masoumeh Ebtekar និង​អនុរដ្ឋ​មន្ត្រីក្រសួង​សុខាភិបាល​អ៊ីរ៉ង់​ លោក Iraj Harirchi រួម​នឹង​តំណាង​រាស្ត្រ​រាប់​សិប​នាក់​ផ្សេង​ទៀត​របស់​អ៊ីរ៉ង់ ក៏ត្រូវ​បាន​​បញ្ជាក់​ថា បាន​ឆ្លង​វីរុស​ COVID-19 ផងដែរ​។

បច្ចុប្បន្ន អ៊ីរ៉ង់ គឺជា​សម្បុក​មេរោគ​កូរ៉ូណា​ធំ​បំផុត​1 របស់​ពិភពលោក។ គិត​មក​ដល់​ពេល​នេះ ប្រទេស​អ៊ីរ៉ង់ មាន​អ្នក​ឆ្លងមេរោគ​នេះ​សរុប 9,000​នាក់​ ក្នុង​នោះ​មាន​អ្នក​ស្លាប់​ដល់​ទៅ 354នាក់​។

នៅ​ទូទាំង​ពិភពលោក ចំនួន​អ្នក​បាន​ឆ្លង​វីរុស​កូរ៉ូណា​បាន​កើន​ដល់​ 125,865​នាក់​ ក្នុង​នោះ​មាន​អ្នក​ស្លាប់​ចំនួន 4,615​នាក់​៕

ប្រភព៖ សារ​ព័ត៌មាន​បរទេស

ទីភ្នាក់ងារយន្តការរួមការពារ និងគ្រប់គ្រងការឆ្លងរាតត្បាតរបស់វីរុស COVID-19 របស់គណៈរដ្ឋមន្ត្រីចិន បានរៀបចំធ្វើពិធីថ្លែងក្នុងសន្និសីទព័ត៌មានថា ក្រោយពីកិច្ចខិតខំប្រឹងប្រែងអស់រយៈពេលជាង 1ខែកន្លងមក កិច្ចការស្រាវជ្រាវតិចណូឡូជីការពារការឆ្លងរាតត្បាតរបស់វីរុស COVID-19 បានទទួលជោគជ័យហើយ។

ទីភ្នាក់ងារខាងលើបានថ្លែងថា ប្រទេសចិនអាចពិនិត្យវិនិច្ឆ័យរោគ ព្យាបាលអ្នកជំងឺឱ្យជាសះស្បើយ និងការពាររោគរាតត្បាតបានហើយ ដោយទាំងអស់នេះ ត្រូវបានរំពឹងថា ចិននឹងចាប់ផ្ដើមសាកល្បងវ៉ាក់សាំងការពារមេរោគវីរុស COVID-19 បាននៅក្នុងខែមេសាខាងមុខ។

បច្ចុប្បន្ន ចិនបានផ្ដល់រីអេជេនត៍សាកល្បងការឆ្លងមេរោគទៅឱ្យប្រទេសប៉ាគីស្ថាន ជប៉ុន និងសហភាពអាហ្វ្រិក និងថែមទាំងបានចែករំលែកផែនការព្យាបាលជំងឺទៅដល់ប្រជាសហគមន៍ពិភពលោកទៀតផង។

របាយការណ៍ព័ត៌មានបានបញ្ជាក់ថា មន្ត្រីក្រសួងវិទ្យាសាស្ត្រ និងតិចណូឡូជីរបស់ចិន បានថ្លែងថា ចិនរីករាយក្នុងការចែករំលែកបទពិសោធជាមួយប្រទេសដែលពាក់ព័ន្ធ រហូតដល់ការដំណើរការការសហការផ្នែកការស្រាវជ្រាវថ្នាំព្យាបាលរោគ វ៉ាក់សាំង និងរីអេជេនត៍សាកល្បងការឆ្លងមេរោគផងដែរ៕

ប្រភព៖ សារព័ត៌មានបរទេស