សុខភាព - La Reine Media

អនុរដ្ឋមន្ត្រីក្រសួងសុខាភិបាលអ៊ីតាលី បានឆ្លងវីរុស COVID-19 ខណៈថ្នាក់ដឹកនាំសំខាន់ៗជាច្រើនទៀត ក៏មានលទ្ធផលវិជ្ជមានជាមួយវីរុសនេះដែរ

មន្ត្រីជាន់ខ្ពស់ជាច្រើនរូបរបស់ប្រទេសអ៊ីតាលី ក្នុងនោះមានអនុរដ្ឋមន្ត្រីក្រសួងសុខាភិបាល ក៏បានឆ្លងមេរោគកូរ៉ូណា COVID-19 ខណៈដែលប្រទេសនេះ ក្លាយជាទឹកដីដែលមានការឆ្លងរាលដាលរោគខ្លាំងបំផុតនៅអឺរ៉ុប។

ទីភ្នាក់ងារសារព័ត៌មាន CGTN ដកស្រង់ប្រភពព័ត៌មានក្នុងស្រុក បានឱ្យដឹងថា អនុរដ្ឋមន្ត្រីក្រសួងសុខាភិបាលអ៊ីតាលី Pierpaolo Sileri បានប្រកាសថា លោកបានទទួលលទ្ធផលនៃការធ្វើតេស្ត ហើយថា លោកវិជ្ជមានជាមួយនឹងមេរោគ COVID-19 និងកំពុងបង្ខាំងខ្លួននៅដោយឡែក។ នេះ បើតាមសារព័ត៌មាន Reuters។

លោក Sileri គឺជាមនុស្សម្នាក់ក្នុងចំណោមមន្ត្រីជាន់ខ្ពស់ជាច្រើនរូបរបស់ប្រទេសអ៊ីតាលី ដែលបានឆ្លងមេរោគកូរ៉ូណា COVID-19 ក្នុងនោះក៏មានប្រធានសមាគមវេជ្ជសាស្ត្រនៃតំបន់ Lazio និងជាមេដឹកនាំបក្សប្រជាធិបតេយ្យ លោក Nicola Zingaretti ផងដែរ។ ជាងនេះទៀត ក៏នៅមាន លោក Alberto Cirio ដែលជាអ្នកគ្រប់គ្រងតំបន់ Piedmont លោក Salvatore Farina ជាមេបញ្ជាការកងទ័ពជើងគោក និងលោកស្រី Anna Ascani ដែលជាអនុរដ្ឋមន្ត្រីក្រសួងអប់រំ និងជាអនុប្រធានគណបក្សប្រជាធិបតេយ្យនៃប្រទេសអ៊ីតាលីផងដែរ ដែលបានឆ្លងមេរោគ COVID-19នេះ។

គិតមកដល់ពេលនេះ ប្រទេសអ៊ីតាលី មានអ្នកឆ្លងមេរោគ COVID-19 ចំនួនជាង 21,000នាក់ ក្នុងនោះមាន 1,441នាក់ បានបង់ជីវិត ខណៈដែលពិភពលោកទាំងមូល មានអ្នកឆ្លងមេរោគចំនួន 156,396នាក់ ក្នុងនោះមាន5,833នាក់ បានបាត់បង់ជីវិត៕

ប្រភព៖ សារព័ត៌មានបរទេស

March 15, 2020

ភរិយារបស់នាយករដ្ឋមន្ត្រីអេស្ប៉ាញ បានឆ្លងវីរុស COVID-19

លោកស្រី Begona Gomez ដែលជាភរិយារបស់នាយករដ្ឋមន្ត្រីអេស្ប៉ាញ បានឆ្លងវីរុសកូរ៉ូណា COVID-19។

ការិយាល័យនាយករដ្ឋមន្ត្រីអេស្ប៉ាញ កាលពីយប់ថ្ងៃទី14មីនា បានចេញសេចក្ដីប្រកាស និងឱ្យដឹងថា លោកស្រី Belgona និងស្វាមីរបស់លោកស្រី គឺលោកនាយករដ្ឋមន្ត្រី Pedro Sanchez សុទ្ធតែនៅមានសុខភាពល្អនៅឡើយ។

ប្រទេសអេស្ប៉ាញ បានប្រកាសបិទការធ្វើដំណើរទៅ-មក ស្ទើរតែទូទាំងប្រទេស ចាប់ពីថ្ងៃទី14មីនា នាំឱ្យមនុស្សប្រមាណជា46លាននាក់ រងផលប៉ះពាល់។ ប្រជាជនទាំងអស់ត្រូវបង្ខំឱ្យនៅតែក្នុងផ្ទះ លើកលែងតែអ្នកដែលត្រូវចេញទៅក្រៅដើម្បីទិញអាហារ ថ្នាំ ទៅមន្ទីរពេទ្យ ឬមានការចាំបាច់បំផុត។

គិតមកដល់ព្រឹកនេះ ប្រទេសអេស្ប៉ាញ បានរកឃើញអ្នកផ្ទុកមេរោគរលាកសួតប្រភេទថ្មី COVID-19 ចំនួន 6,391នាក់ ក្នុងនោះមាន195នាក់ បានបាត់បង់ជីវិត៕

ប្រភព៖ សារព័ត៌មានបរទេស

March 15, 2020

ប្រធានាធិបតី Donald Trump បានធ្វើតេស្តរកវីរុស COVID-19 លទ្ធផលបានចេញមកហើយ

លទ្ធផលនៃការធ្វើតេស្តរកមេរោគកូរ៉ូណារបស់ប្រធានាធិបតីសហរដ្ឋអាមេរិក បានបង្ហាញថា លោក Trump អវិជ្ជមានជាមួយនឹង COVID-19។

“ខ្ញុំបានទទួលការបញ្ជាក់ថា គាត់ (លោក Trump) អវិជ្ជមានជាមួយនឹងវីរុស COVID-19” នេះជាការប្រកាសរបស់វេជ្ជបណ្ឌិត Sean Conley ដែលជាគ្រូពេទ្យផ្ទាល់របស់ប្រធានាធិបតី កាលពីម្សិលមិញ(14មីនា)។ វេជ្ជបណ្ឌិតរូបនេះបន្តថា “1សប្ដាហ៍បន្ទាប់ពីបានទទួលទានអាហារពេលយប់ជាមួយប្រតិភូប្រេស៊ីល នៅឯ Mar-a-Lago លោកប្រធានាធិបតី នៅតែមិនមានរោគសញ្ញាអ្វីនោះឡើយ”។

ប្រធានាធិបតីសហរដ្ឋអាមេរិក លោក Donald Trump បានធ្វើតេស្តរកមេរោគ COVID-19 បន្ទាប់ពីបានប៉ះពាល់ផ្ទាល់ជាមួយនឹងសមាជិកមួយចំនួននឹងក្រុមប្រតិភូប្រធានាធិបតីប្រេស៊ីល នៅឯ Mar-a-Lago ក្នុងរដ្ឋ Florida។ លេខាផ្នែកព័ត៌មាន និងមេធាវីរបស់ប្រធានាធិបតីប្រេស៊ីល Jair Bolsonaro បានឆ្លងវីរុស COVID-19 បន្ទាប់ពីបានវិលត្រឡប់ពីសហរដ្ឋអាមេរិក។ ប៉ុន្តែ លោក Jair Bolsonaro កាលពីថ្ងៃទី13មីនា បានឱ្យដឹងថា លោក អវិជ្ជមានជាមួយ COVID-19។

ថ្មីៗនេះ អ្នកនយោបាយ និងបុគ្គលល្បីៗជាច្រើនរូប បានឆ្លងមេរោគ COVID-19 រួមមានដូចជា អនុប្រធានាធិបតីអ៊ីរ៉ង់ រដ្ឋមន្ត្រីក្រសួងមហាផ្ទៃអូស្ត្រាលី ភរិយារបស់នាយករដ្ឋមន្ត្រីកាណាដា ភរិយារបស់នាយករដ្ឋមន្ត្រីអេស្ប៉ាញ និងកីឡាករខ្សែបម្រើរបស់ក្រុមបាល់ទាត់ Chelsea ។ល។

គិតមកដល់ពេលនេះ សហរដ្ឋអាមេរិក បានរកឃើញអ្នកផ្ទុកមេរោគ COVID-19 ចំនួន 2,726នាក់ ក្នុងនោះមាន 54នាក់បានស្លាប់ ខណៈនៅទូទាំងពិភពលោក មានមនុស្ស156,102នាក់បានឆ្លងមេរោគកូរ៉ូណា ក្នុងនោះមាន 5,819នាក់បានបាត់បង់ជីវិត៕

ប្រភព៖ សារព័ត៌មានបរទេស

March 15, 2020

ប្រធានាធិបតីហ្វីលីពីន ទទួលបានលទ្ធផលធ្វើតេស្តរកមេរោគ COVID-19 ហើយ

ប្រធានាធិបតីរបស់ប្រទេសហ្វីលីពីន លោក Rodrigo Duterte បានទទួលលទ្ធផលនៃការធ្វើតេស្តរកមេរោគកូរ៉ូណា COVID-19 ហើយ ដោយលោកត្រូវបានបញ្ជាក់ថា អវិជ្ជមានជាមួយនឹងមេរោគនេះ។

សមាជិកព្រឹទ្ធសភាម្នាក់ គឺលោក Christopher Lawrence Go ដែលជាជំនួយការផ្ទាល់របស់ប្រធានាធិបតីហ្វីលីពីន បានធ្វើតេស្តរកមេរោគកូរ៉ូណា COVID-19 កាលពីថ្ងៃទី12មីនា បន្ទាប់ពីបាននៅក្បែរមន្ត្រីមួយចំនួននៅក្នុងជួរគណៈរដ្ឋមន្ត្រី ដែលពួកគេធ្លាប់បាននៅក្បែរអ្នកមានផ្ទុកមេរោគកូរ៉ូណា។

លោក Go បានឱ្យដឹងថា លទ្ធផលនៃការធ្វើតេស្តបានបង្ហាញថា លោក និងលោកប្រធានាធិបតី Duterte សុទ្ធតែមិនមានផ្ទុកវីរុស COVID-19 នោះទេ។

គិតមកដល់ពេលនេះ ប្រទេសហ្វីលីពីន មានអ្នកផ្ទុកមេរោគ COVID-19 ចំនួន 98នាក់ ក្នុងនោះមាន 8នាក់ បានបាត់បង់ជីវិត៕

ប្រភព៖ សារព័ត៌មានបរទេស

March 14, 2020

ឧត្តមសេនីយ៍ជាន់ខ្ពស់របស់អ៊ីរ៉ង់ បានបាត់បង់ជីវិតហើយ ដោយសារតែ COVID-19

លោក Nasser Shabani ដែលជាមេបញ្ជាការជាន់ខ្ពស់ម្នាក់របស់កងកម្លាំងឆ្មាំបដិវត្តន៍អ៊ីស្លាមអ៊ីរ៉ង់ បានបាត់បង់ជីវិត ក្រោយពីបានឆ្លងមេរោគរលាកសួតថ្មី COVID-19។

ការស្លាប់របស់មេបញ្ជាការ Shabani ត្រូវបានទីភ្នាក់ងារសារព័ត៌មានរដ្ឋអ៊ីរ៉ង់ FARS បញ្ជាក់នៅក្នុងថ្ងៃទី14មីនានេះ។ លោក Shabani គឺជាមេបញ្ជាការជាន់ខ្ពស់បំផុតរបស់កងកម្លាំងឆ្មាំបដិវត្តន៍អ៊ីស្លាមអ៊ីរ៉ង់ (IRGC)។ លោកបានបាត់បង់ជីវិតដោយសារបានឆ្លងវីរុសកូរ៉ូណា COVID-19។

សារព័ត៌មាន FARS មិនបានរាយការណ៍អំពីមូលហេតុដែលលោក Shabani បានឆ្លងមេរោគនោះទេ ហើយក៏មិនបានប្រាប់អំពីអាយុរបស់លោកនោះដែរ។ ក៏ប៉ុន្តែ លោក Shabani បានចូលរួមបម្រើកងទ័ពចាប់ពីឆ្នាំ1982 នៅក្នុងសម័យសង្គ្រាមអ៊ីរ៉ាក់-អ៊ីរ៉ង់។

នៅប្រទេសអ៊ីរ៉ង់ មេរោគកូរ៉ូណា បានឆ្លងទៅមនុស្សចំនួន 12,729នាក់ ក្នុងនោះមាន 611នាក់បានបាត់បង់ជីវិត ខណៈដែលនៅទូទាំងពិភពលោក មានអ្នកឆ្លងមេរោគកូរ៉ូណាចំនួន 148,306នាក់ ក្នុងនោះមាន 5,539នាក់ស្លាប់ និង 71,718នាក់ បានជាសះស្បើយពីជំងឺ៕

ប្រភព៖ សារព័ត៌មានបរទេស

March 14, 2020

ប្រធានាធិបតីប្រេស៊ីល ប្រកាសថា លោកអវិជ្ជមានជាមួយនឹង COVID-19 ដែលផ្ទុយទៅនឹងដំណឹងដែលសារព័ត៌មានមួយចំនួនធ្លាប់បានចុះផ្សាយ

ប្រធានាធិបតីប្រេស៊ីល លោក Jair Bolsonaro បានឱ្យដឹងថា លោកត្រូវបានធ្វើតេស្តរកមេរោគ COVID-19 ហើយលទ្ធផលទទួលបាននោះគឺ “អវិជ្ជមាន” ដែលនេះបានផ្ទុយទៅនឹងការចុះផ្សាយរបស់សារព័ត៌មានធំៗមួយចំនួន។

“មន្ទីរពេទ្យយោធា Sabin បានប្រគល់លទ្ធផលនៃការធ្វើតេស្ដដែលបង្ហាញថា អវិជ្ជមានជាមួយ COVID-19 មកលោកប្រធានាធិបតី Jair Bolsonaro” នេះបើតាមព័ត៌មានដែលបានបង្ហោះនៅលើគណនី Facebook របស់ប្រធានាធិបតីប្រេស៊ីល។

ប្រធានាធិបតី Bolsonaro ត្រូវបានធ្វើតេស្តរកមេរោគ បន្ទាប់ពីមានបុគ្គលិកម្នាក់របស់លោក មានផ្ទុកមេរោគ COVID-19។ លោក Bolsonaro ទើបតែបានត្រឡប់មកពីសហរដ្ឋអាមេរិក និងបានជួបពិភាក្សាជាមួយប្រធានាធិបតីអាមេរិក លោក Donald Trump កាលពីថ្ងៃទី7មីនាកន្លងទៅ។ នេះបើតាមសារព័ត៌មាន AFP/Fox News។

ប្រធានាធិបតីប្រេស៊ីល លោក Jair Bolsonaro (ស្ដាំ) ចាប់ដៃជាមួយប្រធានាធិបតីសហរដ្ឋអាមេរិក លោក Donald Trump

មុននោះ Fox News ដកស្រង់សម្ដីរបស់ Eduardo ដែលជាកូនប្រុសរបស់ប្រធានាធិបតីប្រេស៊ីល បានឱ្យដឹងថា ឪពុករបស់គាត់ “វិជ្ជមាន” ជាមួយនឹងវីរុស COVID-19 និងកំពុងរង់ចាំលទ្ធផលនៃការធ្វើតេស្តជាលើកទី2។ ប៉ុន្តែ Eduardo បែរជាបង្ហោះសារនៅលើ Twitter ថា “ការធ្វើតេស្តរកមេរោគទៅលើប្រតិភូដែលបានអមដំណើរប្រធានាធិបតី Jair Bolsonaro ទៅកាន់សហរដ្ឋអាមេរិក មិនទាន់បានបញ្ចប់នៅឡើយ” និងថែមទាំងបានសម្ដែងការមិនសប្បាយចិត្តចំពោះ “អ្នកដែលបានបញ្ចេញដំណឹងចចាមអារ៉ាម” និង “ព័ត៌មានមិនពិត” ដែលថា ឪពុករបស់ខ្លួនបានឆ្លងវីរុសCOVID-19 ទៀតផង៕

ប្រភព៖ សារព័ត៌មានបរទេស

March 14, 2020

អ្នកជំនាញផ្នែកវេជ្ជសាស្ត្រថា “អ្នកជក់បារី ងាយរងគ្រោះជាងគេ ពេលបានឆ្លងវីរុស COVID-19

វីរុសកូរ៉ូណា COVID-19 បានចាប់ផ្ដើមឆ្លងរាលដាលនៅឯទីក្រុង Wuhan ប្រទេសចិន កាលពីចុងឆ្នាំ2019 ហើយបានឆ្លងរាលដាលទៅប្រទេស និងដែនដីចំនួន138 នៅទូទាំងពិភពលោក និងបានធ្វើឱ្យមនុស្សចំនួនជាង 145,000នាក់កើតរោគ ក្នុងនោះ មានមនុស្ស5,401នាក់ បានបាត់បង់ជីវិត ហើយក្នុងចំណោមអ្នកដែលបានឆ្លងរោគនេះ មាន7ករណី ត្រូវបានរកឃើញនៅកម្ពុជា។

មេរោគ COVID-19 គឺជាវីរុសកូរ៉ូណាថ្មីមួយដែលបង្កឱ្យកើតជំងឺផ្លូវដង្ហើម និងអាចឆ្លងពីសត្វមកមនុស្ស និងពីមនុស្សម្នាក់ទៅមនុស្សម្នាក់ តាមរយៈកណ្ដាស់ ក្អក ឬប៉ះពាល់គ្នាជាដើម។ COVID-19 អាចសម្លាប់មនុស្ស បានយ៉ាងងាយ ដោយប្រើពេលតិចជាងជំងឺមហារីក ជំងឺអេដស៍។ល។ COVID-19 ត្រូវបានអ្នកខ្លះហៅថា “មេរោគស៊ីសួត” ព្រោះថា ពេលបានឆ្លងចូលទៅក្នុងរាងកាយមនុស្ស មេរោគនេះ តែងតែ “វាយប្រហារ” ទៅលើសួត ធ្វើឱ្យសួតត្រូវរងរបួស រលាក និងខូចខាត ហើយបើព្យាបាលមិនទាន់ពេលនោះទេ អ្នកជំងឺនឹងត្រូវប្រឈមនឹងការស្លាប់មិនខាន។

លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាអ្នកនាំពាក្យក្រសួងសុខាភិបាលកម្ពុជា។

អ្នកនាំពាក្យក្រសួងសុខាភិបាល លោកស្រី ឱ វណ្ណឌីន មានប្រសាសន៍ថា ចំពោះអ្នកដែលមានបញ្ហាសួតស្រាប់ បើសិនជាបានឆ្លងមេរោគ COVID-19នេះទៀត អ្នកជំងឺនឹងត្រូវប្រឈមនឹងគ្រោះថ្នាក់ខ្ពស់ជាងអ្នកដែលមិនមានបញ្ហាសួត។

បច្ចុប្បន្ន កម្ពុជាមានអ្នកជំងឺផ្លូវដង្ហើម ឬបញ្ហាផ្លូវសួត ចំនួនជាង 2លាននាក់ ដែលភាគច្រើនត្រូវបានរកឃើញថា បណ្ដាលមកពីការជក់បារី។ ផ្សែងបារី អាចបង្កជំងឺមួយចំនួនផ្សេងទៀត ដូចជា ជំងឺលើសឈាម ជំងឺទឹកនោមផ្អែម និងជំងឺរលាកសួត។ល។ នេះបើតាមប្រសាសន៍របស់ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាអ្នកនាំពាក្យក្រសួងសុខាភិបាលកម្ពុជា។

រដ្ឋលេខាធិការក្រសួងសុខាភិបាល បន្តថា COVID-19 នឹងបង្កហានិភ័យខ្ពស់ចំពោះអ្នកដែលមានរោគប្រចាំកាយស្រាប់ បើសិនជាវាបានឆ្លងចូលដល់រាងកាយ ជាពិសេសបំផុតគឺចំពោះអ្នកដែលមានបញ្ហា ឬជំងឺផ្លូវដង្ហើម ពិសេសគឺជំងឺសួត។

លោកស្រីវេជ្ជណ្ឌិត ឱ វណ្ណឌីន សង្កាត់ធ្ងន់ថា “អ្នកជក់បារីទាំងអស់ ត្រូវតែមានការប្រុងប្រយ័ត្នឱ្យបានខ្ពស់បំផុត” ទាក់ទិននឹងវីរុស COVID-19 និងបញ្ហាសុខភាពផ្លូវដង្ហើម ដោយសារថា អ្នកជក់បារីភាគច្រើន មានបញ្ហាផ្លូវដង្ហើម ហើយ COVID-19 នឹងមាន “ឱកាសល្អ” កាន់តែច្រើនក្នុងការសម្លាប់អ្នកជំងឺ៕

March 14, 2020

ថ្ងៃនេះ COVID-19 បាន “វ៉ៃប្រហារ” លើអ្នកនយោបាយជាច្រើនរូប នៅជុំវិញពិភពលោក

ភរិយារបស់នាយករដ្ឋមន្ត្រីកាណាដា និងរដ្ឋមន្ត្រីក្រសួងមហាផ្ទៃអូស្ត្រាលី គឺជាជនរងគ្រោះថ្មីបំផុតនៅពេល COVID-19 រាលដាលកាន់តែខ្លាំង បណ្ដាលឱ្យមនុស្សជាង 135,000នាក់ ឆ្លងជំងឺ។

COVID-19 បានបង្ហាញវត្តមាននៅក្នុងប្រទេស និងដែនដីចំនួន130 នៅទូទាំងពិភពលោក បណ្ដាលឱ្យមានអ្នកឆ្លងជំងឺនេះ ឡើងដល់ជិត 140,000នាក់ និងជាង 5,000នាក់ បានបាត់បង់ជីវិត។ ខាងក្រោមនេះគឺជាអ្នកនយោបាយមួយចំនួនដែលបានឆ្លងមេរោគ COVID-19 ក្នុងថ្ងៃទី13មីនានេះ៖

រដ្ឋមន្រ្តីក្រសួងសមធម៌នៃប្រទេសអេស្ប៉ាញ

រដ្ឋមន្រ្តីក្រសួងសមធម៌នៃប្រទេសអេស្ប៉ាញ លោកស្រី Irene Montero ទទួលបានលទ្ធផលវិជ្ជមានជាមួយនឹងវីរុសកូរ៉ូណា COVID-19 បន្ទាប់ពីត្រូវបានធ្វើតេស្តរកមេរោគ ខណៈដែលស្វាមីរបស់លោកស្រី គឺឧបនាយករដ្ឋមន្ត្រី Pablo Iglesias ត្រូវបង្ខាំងខ្លួននៅដោយឡែក។

គ្រួសារនាយករដ្ឋមន្ត្រីកាណាដា

លោកស្រី Sophie Gregoire ដែលជាភរិយារបស់នាយករដ្ឋមន្ត្រីកាណាដា ត្រូវបានធ្វើតេស្តរកឃើញថា មានផ្ទុកវីរុស COVID-19 បន្ទាប់ពីបានវិលត្រឡប់មកពីប្រទេសអង់គ្លេស ប៉ុន្តែ នៅមានសុខភាពល្អ និងមានអាការរោគស្រាលប៉ុណ្ណោះ។

រដ្ឋមន្ត្រីក្រសួងមហាផ្ទៃអូស្ត្រលី

រដ្ឋមន្ត្រីក្រសួងមហាផ្ទៃអូស្ត្រាលី លោក Dutton ត្រូវបានពិនិត្យឃើញថា មានផ្ទុកមេរោគ COVID-19 និងបានបញ្ជូនទៅកាន់មន្ទីរពេទ្យមួយនៅក្នុងរដ្ឋ Queensland ដើម្បីនៅដាច់ដោយឡែក និងទទួលការព្យាបាល។ លោក Dutton គឺជាអ្នកនយោបាយអូស្ត្រាលីទី1ហើយ ដែលបានឆ្លងវីរុស COVID-19។

ទីប្រឹក្សាជាន់ខ្ពស់ និងជាអតីតរដ្ឋមន្ត្រីការក្រសួងការបរទេសអ៊ីរ៉ង់

លោក Ali Akbar Velayati អាយុ74ឆ្នាំ ជាទីប្រឹក្សាជាន់ខ្ពស់ផ្នែកកិច្ចការអន្តរជាតិ របស់មេដឹកនាំអ៊ីរ៉ង់ Ali Khamenei ត្រូវបានធ្វើតេស្តឃើញថា មានផ្ទុកមេរោគ COVID-19។ លោក Ali Akbar Velayati ធ្លាប់ធ្វើជារដ្ឋមន្ត្រីក្រសួងការបរទេសអ៊ីរ៉ង់ ចាប់ពីឆ្នាំ 1981-1997 មុនពេលលោកក្លាយជាទីប្រឹក្សាជាន់ខ្ពស់ផ្នែកកិច្ចការបរទេសរបស់មេដឹកនាំ Ali Khamenei។

អ្នកការទូតហ្វីលីពីន នៅអង្គការសហប្រជាជាតិ

យោងតាមសារព័ត៌មាន Reuters ស្ត្រីដែលជាមន្ត្រីការបរទេសហ្វីលីពីននេះ ត្រូវបានរកឃើញថា មានផ្ទុកមេរោគ COVID-19 កាលពីថ្ងៃទី12មីនា ដែលនេះជាករណីដំបូងបង្អស់នៅឯអង្គការសហប្រជាជាតិ នាទីក្រុង New York។ ឯកអគ្គរដ្ឋទូតស្តីទីហ្វីលីពីន ប្រចាំនៅអង្គការសហប្រជាជាតិ លោកស្រី Kira Christianne Azucena

ប្រធានាធិបតីប្រេស៊ីល

យោងតាមសារព័ត៌មាន Guardian កាសែតធំមួយដែលមានឈ្មោះថា Jornal O Dia របស់ប្រេស៊ីល ថ្ងៃនេះបានចេញផ្សាយថា ប្រធានាធិបតីប្រេស៊ីល លោក Jair Bolsonaro បានឆ្លងមេរោគ COVID-19 បន្ទាប់ពីបានធ្វើតេស្ត។ សារព័ត៌មាន Fox News ក៏បានចេញផ្សាយអំពីដំណឹងនេះ៕

March 13, 2020

ទីប្រឹក្សាជាន់ខ្ពស់របស់មេដឹកនាំអ៊ីរ៉ង់ ឆ្លងវីរុស COVID-19 ខណៈប្រទេសនេះ មានអ្នកឆ្លងរោគ សរុបជាង11,000នាក់ និងអ្នកស្លាប់កើនដល់…

លោក Ali Akbar Velayati អាយុ74ឆ្នាំ ជាទីប្រឹក្សាជាន់ខ្ពស់ផ្នែកកិច្ចការអន្តរជាតិ របស់មេដឹកនាំអ៊ីរ៉ង់ Ali Khamenei ត្រូវបានធ្វើតេស្តឃើញថា មានផ្ទុកមេរោគ COVID-19។

“Ali Akbar Velayati ដែលជាអ្នកគ្រប់គ្រងមន្ទីរពេទ្យ Masih Daneshvari នៅក្នុងទីក្រុង Tehran ផងដែរនោះ ធ្លាប់បានប៉ះពាល់ផ្ទាល់ជាមួយនឹងអ្នកជំងឺកូរ៉ូណា COVID-19 ក្នុងរយៈពេលប៉ុន្មានសប្ដាហ៍កន្លងទៅនេះ។ ពេលនេះ លោកក៏បានឆ្លងវីរុសកូរ៉ូណា ហើយកំពុងត្រូវបានដាក់ឱ្យនៅដាច់ដោយឡែកផងដែរ” នេះបើតាមការចេញផ្សាយរបស់សារព័ត៌មាន Tasnim របស់អ៊ីរ៉ង់ កាលពីថ្ងៃទី12កន្លងទៅ។

លោក Ali Akbar Velayati ធ្លាប់ធ្វើជារដ្ឋមន្ត្រីក្រសួងការបរទេសអ៊ីរ៉ង់ ចាប់ពីឆ្នាំ 1981-1997 មុនពេលលោកក្លាយជាទីប្រឹក្សាជាន់ខ្ពស់ផ្នែកកិច្ចការបរទេសរបស់មេដឹកនាំ Ali Khamenei។

ប្រទេសអ៊ីរ៉ង់ ថ្ងៃនេះ បានរកឃើញអ្នកផ្ទុក COVID-19 ចំនួន 1,289នាក់ ធ្វើឱ្យចំនួនសរុបនៃអ្នកផ្ទុកមេរោគនេះ កើនដល់ 11,364នាក់។ ថ្ងៃនេះ អ៊ីរ៉ង់ក៏បានបាត់បង់ពលរដ្ឋចំនួន85នាក់បន្ថែមទៀតដែរ ដោយសារតែមេរោគកូរ៉ូណា ធ្វើឱ្យចំនួនអ្នកស្លាប់សរុបឡើងដល់ 514នាក់។ នេះបើតាមអ្នកនាំពាក្យក្រសួងសុខាភិបាលអ៊ីរ៉ង់ Kianoush Jahanpour៕

ប្រភព៖ សារព័ត៌មានបរទេស

March 13, 2020

COVID-19! ការិយាល័យអង្គការសហប្រជាជាតិ មានករណីឆ្លងវីរុស COVID-19 ដំបូងគេបង្អស់ហើយ!

មន្ត្រីការបរទេសម្នាក់របស់ប្រទេសហ្វីលីពីន បានក្លាយជាអ្នកផ្ទុកវីរុស COVID-19 ដំបូងគេបង្អស់នៅទីស្នាក់ការនៃអង្គការសហប្រជាជាតិ នាទីក្រុង New York សហរដ្ឋអាមេរិក។

“មកដល់ពេលនេះ គណៈប្រតិភូហ្វីលីពីន (នៅឯការិយាល័យអង្គការសហប្រជាជាតិ) កំពុងត្រូវបានស្នើឱ្យនៅមួយកន្លែង ហើយសមាជិកទាំងអស់ក៏ត្រូវបានស្នើឱ្យនៅដាច់ដោយឡែក និងស្វែងរកជំនួយផ្នែកសុខាភិបាល បើសិនជាមានអាការនៃជំងឺ COVID-19។ យើងកំពុងកំណត់ថា យើងបានឆ្លងមេរោគ” Reuters ដកស្រង់សេចក្ដីប្រកាសរបស់ឯកអគ្គរដ្ឋទូតស្តីទីហ្វីលីពីន ប្រចាំនៅអង្គការសហប្រជាជាតិ លោកស្រី Kira Christianne Azucena។

យោងតាមសារព័ត៌មាន Reuters ស្ត្រីដែលជាមន្ត្រីការបរទេសហ្វីលីពីននេះ ត្រូវបានរកឃើញថា មានផ្ទុកមេរោគ COVID-19 កាលពីថ្ងៃទី12មីនា ដែលនេះជាករណីដំបូងបង្អស់នៅឯអង្គការសហប្រជាជាតិ នាទីក្រុង New York។

គណៈប្រតិភូហ្វីលីពីននៅឯទីស្នាក់ការនៃអង្គការសហប្រជាជាតិ មានមន្ត្រីការបរទេសចំនួន12នាក់។ មន្ត្រីការបរទេសដែលបានឆ្លងមេរោគនេះ គឺជាអ្នកតំណាងឱ្យប្រទេសហ្វីលីពីន នៅឯគណៈកម្មការផ្នែកច្បាប់នៃមហាសន្និបាតអង្គការសហប្រជាជាតិ។

ឯកអគ្គរដ្ឋទូតស្តីទីរបស់ប្រទេស ហ្វីលីពីនប្រចាំនៅអង្គការសហប្រជាជាតិ លោកស្រី Kira Christianne Azucena បានឱ្យដឹងថា អ្នកការទូតដែលបានឆ្លង COVID-19នេះ បានទៅដល់ទីស្នាក់ការអង្គការសហប្រជាជាតិ កាលពីថ្ងៃទី9មីនា និងនៅទីនោះរយៈពេលប្រហែល1ម៉ោង។ នៅក្នុងអំឡុងពេលនោះ លោកស្រីអ្នកការទូតរូបនោះ មិនមានរោគសញ្ញាអ្វីនោះទេ។

ទីស្នាក់ការរបស់អង្គការសហប្រជាជាតិ នៅទីក្រុង New York សហរដ្ឋអាមេរិក

អ្នកការទូតខាងលើចាប់ផ្ដើមមានរោគសញ្ញានៅថ្ងៃទី10មីនា និងបានទៅពិនិត្យសុខភាព និងធ្វើតេស្តរកមេរោគ។

អង្គការសហប្រជាជាតិកំពុងចាត់វិធានការមួយចំនួនដើម្បីទប់ស្កាត់ការឆ្លងមេរោគកូរ៉ូណា នៅទីស្នាក់ការក្នុងទីក្រុង New York រួមមានទាំងការកាត់បន្ថយពេលនៃមហាសន្និបាតស្ដីអំពីសិទ្ធិរបស់ស្ត្រី ដែលមានរយៈពេល2ថ្ងៃ មកនៅត្រឹម1ថ្ងៃ ព្រមទាំងកាត់ចោលនូវកិច្ចប្រជុំខ្លីៗទៀតផង។

ចំណែកប្រតិភូមកពីបណ្ដាប្រទេស ក៏ត្រូវបានអង្គការសហប្រជាជាតិស្នើឱ្យកាត់បន្ថយចំនួនសមាជិកដែលនឹងមកចូលរួមប្រជុំនៅអង្គការសហប្រជាជាតិផងដែរ៕

ប្រភព៖ សារព័ត៌មានបរទេស

March 13, 2020

រដ្ឋមន្ត្រីក្រសួងមហាផ្ទៃអូស្ត្រាលី ឆ្លង COVID-19 ខណៈប្រទេសនេះមានអ្នកស្លាប់ចំនួន3នាក់

រដ្ឋមន្ត្រីក្រសួងមហាផ្ទៃអូស្ត្រាលី លោក Dutton ត្រូវបានពិនិត្យឃើញថា មានផ្ទុកមេរោគ COVID-19 និងបានបញ្ជូនទៅកាន់មន្ទីរពេទ្យមួយនៅក្នុងរដ្ឋ Queensland ដើម្បីនៅដាច់ដោយឡែក និងទទួលការព្យាបាល។

“កាលពីព្រឹកនេះ ខ្ញុំបានក្រោកពីគេង ស្រាប់តែមានអារម្មណ៍ថាក្ដៅខ្លួន និងឈឺបំពង់ក។ ខ្ញុំក៏បានទាក់ទងទៅកាន់ក្រុមគ្រូពេទ្យ ហើយក៏បានធ្វើតេស្តរកមេរោគ។ ក្រោយមក ពួកគេឱ្យដឹងថា ខ្ញុំបានឆ្លងមេរោគ COVID-19” នេះជាការឱ្យដឹងរបស់រដ្ឋមន្ត្រីក្រសួងមហាផ្ទៃអូស្ត្រាលី លោក Dutton។

បច្ចុប្បន្ន លោករដ្ឋមន្ត្រី កំពុងសម្រាកព្យាបាលនៅឯមន្ទីរពេទ្យ។ លោកបានឱ្យដឹងដែរថា លោកមានសុខភាពល្អប្រសើរនៅឡើយ។

លោក Dutton គឺជាអ្នកនយោបាយអូស្ត្រាលីទី1ហើយ ដែលបានឆ្លងវីរុស COVID-19។

គិតមកដល់ពេលនេះ ប្រទេសអូស្ត្រាលី មានអ្នកឆ្លងវីរុសកូរ៉ូណាចំនួន 150នាក់ ក្នុងនោះមានអ្នកស្លាប់ចំនួន 3នាក់ ខណៈដែលនៅទូទាំងពិភពលោក ចំនួនអ្នកដែលបានឆ្លងមេរោគនេះ កើនឡើងដល់128,343នាក់ ក្នុងនោះមាន 4,720នាក់ បានបាត់បង់ជីវិត៕

ប្រភព៖ សារព័ត៌មានបរទេស

March 13, 2020

ភរិយារបស់នាយករដ្ឋមន្ត្រីកាណាដា ឆ្លងវីរុស COVID-19 បន្ទាប់ពីបានត្រឡប់មកពីប្រទេសអង់គ្លេស

លោកស្រី Sophie Gregoire ដែលជាភរិយារបស់នាយករដ្ឋមន្ត្រីកាណាដា ត្រូវបានធ្វើតេស្តរកឃើញថា មានផ្ទុកវីរុស COVID-19 បន្ទាប់ពីបានវិលត្រឡប់មកពីប្រទេសអង់គ្លេស ប៉ុន្តែ នៅមានសុខភាពល្អ និងមានអាការរោគស្រាលប៉ុណ្ណោះ។

“ដំបូង ខ្ញុំសូមអរគុណយ៉ាងជ្រាលជ្រៅចំពោះអ្នកទាំងអស់ដែលបានសួរសុខទុក្ខខ្ញុំ។ បើទោះជាត្រូវឆ្លងកាត់អាការរោគមិនស្រួលខ្លួនដោយសារវីរុស តែខ្ញុំនឹងមានសុខភាពល្អឡើងវិញមិនខាន” លោកស្រី Sophie Gregoire Trudeau ដែលកំពុងបង្ខាំងខ្លួននៅក្នុងផ្ទះ បានឱ្យដឹងបែបនេះនៅក្នុងសេចក្ដីប្រកាសកាលពីថ្ងៃទី12មីនាកន្លងទៅ។

ការិយាល័យនាយករដ្ឋមន្ត្រីកាណាដា ក៏បានទទួលស្គាល់ថា លោកស្រី Sophie បានឆ្លងមេរោគកូរ៉ូណានេះ។ ការិយាល័យនេះក៏បានឱ្យដឹងថា លោកនាយករដ្ឋមន្ត្រី Trudeau មិនទាន់បានធ្វើតេស្តរកមេរោគនៅឡើយ ដោយសារតែគាត់ពុំមានរោគសញ្ញាដែលគួរសង្ស័យ ប៉ុន្តែលោកនឹងចាប់ផ្ដើមបង្ខាំងខ្លួនឯងក្នុងរយៈពេល14ថ្ងៃ។

លោកស្រី Sophie Gregoire ទើបតែបានវិលត្រឡប់មកប្រទេសកាណាដាវិញ បន្ទាប់ពីបានទៅបំពេញបេសកកម្មនៅឯទីក្រុងឡុងដ៍ ប្រទេសអង់គ្លេស ហើយក៏ចាប់ផ្ដើមមានអាការមិនស្រួលខ្លួនកាលពីយប់ថ្ងៃទី11មីនា ប៉ុន្តែ ភ្លាមនោះ លោកស្រីក៏បានស្វែងរកជំនួយពីក្រុមគ្រូពេទ្យ។

គិតមកដល់ពេលនេះ ប្រទេសកាណាដា បានរកឃើញអ្នកផ្ទុកវីរុសកូរ៉ូណាចំនួន 117នាក់ ក្នុងនោះមានម្នាក់បានបាត់បង់ជីវិត។

COVID-19 បានចាប់ផ្ដើមឆ្លងរាលដាលនៅប្រទេសចិន កាលពីខែធ្នូ ឆ្នាំ2019 ហើយមកដល់ពេលនេះ វាបានបង្ហាញខ្លួននៅក្នុងប្រទេស និងដែនដីចំនួន130 នៅទូទាំងពិភពលោក បណ្ដាលឱ្យមានអ្នកឆ្លងជំងឺជាង 128,343នាក់ ក្នុងនោះមាន 4,720នាក់បានស្លាប់ និង68,324នាក់បានជាសះស្បើយ៕

ប្រភព៖ សារព័ត៌មានបរទេស

March 13, 2020

Tag: សុខភាព