សុខភាព - La Reine Media

ជាង10,000នាក់បានស្លាប់ ដោយសារឆ្លងវីរុស COVID-19 នៅទូទាំងពិភពលោក ខណៈចំនួនករណីឆ្លងរោគ បានកើនដល់ជាង 244,000នាក់

ចំនួនអ្នកស្លាប់ដោយសារមេរោគ COVID-19 នៅអឺរ៉ុប បានកើនឡើងរហ័សបំផុត ធ្វើឱ្យចំនួនករណីស្លាប់ដោយសារមេរោគនេះ កើនដល់ 10,015នាក់ និងអ្នកបានឆ្លងមេរោគនេះ កើនដល់ 244,615នាក់ នៅទូទាំងពិភពលោក។

COVID-19 បានបង្ហាញវត្តមាននៅក្នុងប្រទេស និងដែនដីចំនួន179 នៅក្នុងពិភពលោក ក្នុងពេលដែលក្រុមមេដឹកនាំពិភពលោក ត្រូវសម្រេចចិត្តចំណាយថវិកាជិត1លានលានដុល្លារអាមេរិក ដើម្បីជួយដល់សេដ្ឋកិច្ចពិភពលោក។ មហារោគរាតត្បាត COVID-19 ហាក់កំពុងដកខ្លួនចេញផុតពីការគ្រប់គ្រងរបស់ប្រទេសមួយចំនួនក្នុងពិភពលោក។

ប្រទេសអ៊ីតាលី នៅតែជាសម្បុកមេរោគ COVID-19 ធំជាងគេនៅអឺរ៉ុប និងធំជាងគេលំដាប់ទី2ក្នុងពិភពលោក បន្ទាប់ពីប្រទេសចិន ដោយអ៊ីតាលីបានរកឃើញករណីផ្ទុកមេរោគថ្មីចំនួន5,322នាក់ និងអ្នកស្លាប់ចំនួន 427នាក់បន្ថែមទៀត នាំឱ្យចំនួនអ្នកជំងឺឡើងដល់ 41,035នាក់ និងចំនួនអ្នកស្លាប់សរុប 3,405នាក់។ អត្រានៃការស្លាប់ដោយសារវីរុសកូរ៉ូណានៅអ៊ីតាលី គឺ 8.3% ខ្ពស់ជាងទ្វេដងបើធៀបនឹងអត្រាមធ្យម 4.1% របស់ពិភពលោក។ អត្រានៃការស្លាប់ខ្ពស់បែបនេះ ត្រូវបានគេជឿថា បណ្ដាលមកពីប្រទេសអ៊ីតាលី មានមនុស្សចាស់ច្រើនបំផុតនៅអឺរ៉ុប។

ក្រៅពីនេះ មធ្យោបាយធ្វើដំណើរសាធារណៈ នៅប្រទេសនេះ នៅតែដំណើរការធម្មតា ប្រជាជនក៏នៅតែធ្វើដំណើរទៅមក ពិធីជប់លៀង ការចូលហាងហូបចុកនៅពេលយប់ ក៏នៅតែមាន។ មួយវិញទៀត មនុស្សមួយចំនួន ក៏មិនបានពាក់ម៉ាស់ទៀតផង។ ក្រុមអ្នកជំនាញមកពីប្រទេសចិន ដែលចូលទៅជួយប្រទេសអ៊ីតាលី បានឱ្យដឹងថា ប្រទេសនេះ អនុវត្តវិធានការទប់ស្កាត់ COVID-19 មិនទាន់បានខ្លាំងក្លានៅឡើយ។

ប្រទេសអេស្ប៉ាញ គឺជាសម្បុកមេរោគកូរ៉ូណាធំបំផុតទី2 ប្រចាំទ្វីបអឺរ៉ុប ដោយទើបតែបានរកឃើញអ្នកជំងឺថ្មី 3,308នាក់ ធ្វើឱ្យចំនួនអ្នកបានឆ្លងមេរោគសរុប 18,077នាក់។ ប្រទេសនេះក៏ទើបតែមានអ្នកស្លាប់ដោយសារកូរ៉ូណាចំនួន193ករណីបន្ថែមទៀត ដូច្នេះ អ្នកស្លាប់សរុបនៅអេស្ប៉ាញ បានឡើងដល់ 831នាក់។

អាល្លឺម៉ង់ និងបារាំង បានរកឃើញអ្នកឆ្លងរោគថ្មី 2,993 និង 1,861ករណីបន្ថែមទៀត ធ្វើឱ្យចំនួនអ្នកជំងឺកូរ៉ូណាសរុបនៃប្រទេសអាល្លឺម៉ង់ គឺមាន 15,320នាក់ និងបារាំងគឺមាន 10,995នាក់។ អាល្លឺម៉ង់ មានអ្នកស្លាប់សរុប 193នាក់ ចំណែកបារាំងវិញ មាន108នាក់។

អ៊ីរ៉ង់នៅតែជាសម្បុកមេរោគកូរ៉ូណាធំទី2នៅអាស៊ី បន្ទាប់ពីប្រទេសចិន ដោយមានអ្នកជំងឺថ្មី 1,046នាក់ នាំឱ្យអ្នកជំងឺសរុបឡើងដល់ 18,407នាក់ ខណៈដែលចំនួនអ្នកស្លាប់បានកើនដល់ 1,284នាក់។

សហរដ្ឋអាមេរិក បានរកឃើញអ្នកផ្ទុកមេរោគថ្មី 4,412នាក់បន្ថែមទៀត ដូច្នេះ ចំនួនអ្នកឆ្លងរោគកូរ៉ូណានៅប្រទេសនេះ កើនដល់ 13,671នាក់ ក្នុងនោះមាន 191នាក់បានស្លាប់។

ប្រទេសកូរ៉េខាងត្បូងកាលពីម្សិលមិញ បានរកឃើញអ្នកជំងឺថ្មី 152នាក់បន្ថែមទៀត ដែលនេះគឺជាការកើនឡើងថ្មីមកវិញ បន្ទាប់ពីបានថយចុះមួយរយៈពេលកន្លងមក ដូច្នេះ ចំនួនអ្នកបានឆ្លងមេរោគកូរ៉ូណាសរុបឡើងដល់ 8,565នាក់ ក្នុងនោះមាន 91នាក់បានស្លាប់។

ប្រទេសចិនកាលពីម្សិលមិញ ក៏បានប្រកាសថា មិនមានករណីឆ្លងមេរោគ COVID-19 ថ្មីណាមួយត្រូវបានរកឃើញនោះទេ ប៉ុន្តែ ប្រទេសនេះក៏បានរកឃើញអ្នកផ្ទុកមេរោគកូរ៉ូណា ដែលមានប្រភពពីខាងក្រៅប្រទេសចំនួន 34ករណីបន្ថែមទៀត។

គិតមកដល់ពេលនេះ ពិភពលោក មានអ្នកឆ្លងជំងឺកូរ៉ូណា COVID-19 ចំនួន 244,615ករណី និងអ្នកស្លាប់ចំនួន10,015ករណី រួមនឹងអ្នកដែលបានជាសះស្បើយចំនួន 87,407ករណី។ បណ្ដាប្រទេស និងដែនដីដែលទើបតែមានករណីឆ្លងវីរុស COVID-19 ដំបូង គឺមានដូចជា Chad, El Salvador, Fiji, Nicaragua, Niger និង Isle of Man៕

ប្រភព៖ សារព័ត៌មានបរទេស

March 20, 2020

ថ្មីៗជុំវិញពិភពលោក៖ លោកខាងលិច ប្រកាសសង្គ្រាមបង្ក្រាបកូវីដ-19, អ៊ីតាលីស្លាប់ថែមទៀត 475នាក់, គ្មានអ្នកឆ្លងមេរោគថ្មីនៅក្នុងប្រទេសចិន…

មហាអំណាចលោកខាងលិច បានប្រកាសសង្គ្រាមជាមួយកូវីដ-19 និងត្រៀមខ្លួនជាស្រេចក្នុងការដាក់ចេញវិធានការការពារសេដ្ឋកិច្ចពិភពលោក ខណៈដែលចំនួនអ្នកស្លាប់នៅក្នុងប្រទេសអ៊ីតាលីក្នុង 1ថ្ងៃ ស្ទុះឡើងខ្ពស់ ផ្ទុយពីស្ថានការណ៍នៅចិនដែលលែងរកឃើញអ្នកឆ្លងមេរោគថ្មីនៅក្នុងប្រទេសជាលើកដំបូង រាប់ចាប់ពីពេលដែលមេរោគចង្រៃនេះ ចាប់ផ្ដើមឡើងនៅក្នុងទីក្រុងវូហាន កាលពីខែធ្នូ ឆ្នាំមុន តែនៅមានអ្នកឆ្លងមេរោគមកពីក្រៅប្រទេស…។

ស្ថានការណ៍ការឆ្លងរាលដាលនៅក្នុងប្រទេសភាគច្រើនទូទាំងពិភពលោក កាន់តែអាក្រក់ទៅៗយ៉ាងឆាប់រហ័ស ចំនួនអ្នកឆ្លងមេរោគកាលពីថ្ងៃពុធ កើនឡើងជាង 20,000នាក់ សរុបជិត 219,000នាក់ និងស្លាប់ក្បែរៗ 9,000នាក់។

លោកប្រធានាធិបតី ដូណាល់ ត្រាំ ថ្លែងកាលពីថ្ងៃពុធ(ទី18 មីនា)ថា មានអារម្មណ៍ដូចខ្លួនឯង ជាមេបញ្ជាការនៅក្នុងអំឡុងពេលសង្គ្រាម…ត្រៀមបញ្ជាឱ្យមន្ទីរពេទ្យបណ្ដែតទឹករបស់កងទ័ព ចេញមកជួយសង្គ្រោះអ្នកជំងឺអាមេរិកាំង ដែលមានចំនួនកើនឡើងយ៉ាងឆាប់រហ័ស។

លោកស្រីនាយករដ្ឋមន្ត្រី អ៊ែងជើឡា មើរកែល របស់ប្រទេសអាល្លឺម៉ង់ ថ្លែងថា ចាប់តាំងពីសង្គ្រាមលោកលើកទី2 មក អាល្លឺម៉ង់មិនដែលប្រឈមមុខនឹងភាពសាកល្បងដែលត្រូវពឹងពាក់លើភាពសាមគ្គីរបស់ប្រជាជនខ្លាំងស្មើនឹងពេលនេះឡើយ។ សេចក្ដីថ្លែងការណ៍នេះ បានឆ្លុះបញ្ចាំងពីគោលជំហររបស់លោកប្រធានាធិបតី អេមម៉ានូអែល ម៉ាក្រុង របស់ប្រទេសបារាំង កាលពីដើមសប្ដាហ៍ ដែលបានប្រៀបធៀបថា ប្រទេសជាតិកំពុងធ្វើសង្គ្រាមជាមួយវីរុស និងចេញបញ្ជាឱ្យប្រជាជន ផ្អាកចេញពីគេហដ្ឋានដោយមិនចាំបាច់។

ក្នុងថ្ងៃជាមួយគ្នា ប្រទេសអ៊ីតាលីបានរាយការណ៍ពីចំនួនអ្នកស្លាប់កើនឡើង 475នាក់ ដែលជាស្ថិតិខ្ពស់បំផុត ដែលធ្វើឱ្យចំនួនរួម កើនឡើងដល់ជិត 3,000នាក់ ឬ 1ភាគ3 នៃចំនួនអ្នកស្លាប់ទូទាំងពិភពលោក ទោះជារដ្ឋាភិបាលប្រកាសបិទ និងបញ្ឈប់ការជួបជំនុំខ្នាតធំទូទាំងប្រទេស ជាវិធានការដែលប្រទេសជាច្រើនទូទាំងពិភពលោកខ្ចីពីចិនមកប្រើក៏ដោយ។ ខណៈដែលលោក ស៊ីលវីអូ ប្រ៊ូសាហ្វ៊ើរ៉ូ អគ្គនាយកស្ថាប័នសុខភាពរបស់ប្រទេសអ៊ីតាលី បញ្ជាក់ថា រឿងសំខាន់គឺ កុំចុះចាញ់ឱ្យសោះ!។

និងខណៈដែលប្រទេសជាច្រើនក្លាយជាជនពិការដោយសារជំងឺរាតត្បាតដ៏អាក្រក់ និងផ្សារហ៊ុនដាំក្បាលចុះឥតឈប់ឈរនោះ សប្ដាហ៍នេះ បណ្ដាអ្នករៀបចំគោលនយោបាយសេដ្ឋកិច្ច បាននាំគ្នាប្រកាសពីវិធានការសង្គ្រោះសេដ្ឋកិច្ចពិភពលោក ដោយកាលពីថ្ងៃពុធ ធនាគារកណ្ដាលអឺរ៉ុប បានប្រកាសផែនការទិញត្រឡប់មកវិញនូវរូបិយប័ណ្ណសរុបតម្លៃ 817,000លានដុល្លារ ក្រោយពីបានដាក់ចេញវិធានការជំរុញដ៏ធំមួយកាលពីមិនប៉ុន្មានថ្ងៃមុន តែ នៅតែមិនអាចសម្រាលក្ដីកង្វល់ក្នុងទីផ្សារបាន។

ចំណែកឯលោក ត្រាំ វិញ បានចុះហត្ថលេខាលើវិធានការជួយសង្គ្រោះបន្ទាន់ តម្លៃ 100,000លានដុល្លារ ដែលបានឆ្លងកាត់ការឯកភាពពីរដ្ឋសភាយ៉ាងងាយស្រួល ដើម្បីឱ្យប្រជាជនអាមេរិកអាចពិនិត្យរកមេរោគកូវីដ-19 ហ្វ្រ៊ី និងផ្ដល់ប្រាក់សំណងលើការសុំច្បាប់សម្រាកឈឺ និងសុំច្បាប់ដើម្បីមើលថែទាំគ្រួសារ។

លោក ត្រាំ ថែមទាំងបានដាក់បញ្ជាឱ្យប្រើច្បាប់ក្នុងអំឡុងពេលសង្គ្រាមកូរ៉េ ដើម្បីឱ្យរដ្ឋាភិបាលអាចបញ្ជាឱ្យផ្នែកខាងធុរកិច្ចបានចុះហត្ថលេខាលើកិច្ចសន្យាបន្ថែម បង្កើនការផលិតផលិតផលដែលចាំបាច់ ដូចជាម៉ាស់អនាម័យការពារមេរោគ ជាដើមទៀតផង។

ធនាគារកណ្ដាលនៃប្រទេសអូស្ត្រាលី បានបញ្ចុះអត្រាការប្រាក់ដល់អត្រាទាបបំផុតជាប្រវត្តិសាស្ត្រ ដែលទោះជាយ៉ាងនេះក្ដី ក៏វិធានការខាងហិរញ្ញវត្ថុ និងវិធានការជំរុញសេដ្ឋកិច្ចបន្ទាន់របស់អន្តរជាតិក្នុងអំឡុងពេលនេះ មិនអាចសម្រាលក្ដីកង្វល់ពាក់ព័ន្ធនឹងសញ្ញាធ្លាក់ចុះនៃសេដ្ឋកិច្ចបានដែរ។

ផ្សារហ៊ុនអាស៊ី កាលពីអំឡុងព្រឹកថ្ងៃព្រហស្បតិ៍(ទី19 មីនា) នៅតែជាប់គាំងនៅក្នុងតំបន់លេខដក ដោយផ្សារហ៊ុនក្រុងម៉ានីល ក្នុងអំឡុងពេលដំបូង បានដាំក្បាលចុះជិត 25% បន្ទាប់ពីបិទដំណើរការមកបាន 2ថ្ងៃ។

ប្រទេសជាច្រើន បានលើកកម្ពស់វិធានការទប់ស្កាត់វីរុសកូវីដ-19 ដោយនៅថ្ងៃព្រហស្បតិ៍
អូស្ត្រាលីបានហាមជនបរទេស ធ្វើដំណើរចូលប្រទេស ហើយមុនហ្នឹង 1ថ្ងៃ ប្រទេសកាណាដា និងអាមេរិក បានប្រកាសបិទព្រំដែនទៅវិញទៅមក ដែលអាចរាប់ថា ជាព្រំដែនដែលវែងបំផុតក្នុងពិភពលោក និងហាមការធ្វើដំណើរដែលមិនចាំបាច់រយៈពេល 30ថ្ងៃ។

នៅប្រទេសអង់គ្លេស លោកនាយករដ្ឋមន្ត្រី បូរីស ចនសុន បានផ្លាស់ប្ដូរផែនការទប់ទល់វីរុសកូវីដ-19 ដោយការបិទសាលារៀនទូទាំងប្រទេស ចាប់ពីថ្ងៃសុក្រ(ទី20 មីនា)នេះ ក្រោយពីចំនួនអ្នកស្លាប់បានកើនឡើងដល់ 100នាក់។

សប្ដាហ៍នេះ សហភាពអឺរ៉ុប បានផ្អាកទទួលអ្នកធ្វើដំណើរមកពីក្រៅប្រទេសរយៈពេល 30ថ្ងៃ ហើយប្រទេសជាសមាជិកមួយចំនួនបានបិទព្រំដែន ខណៈដែលរង្គសាល ភោជនីយដ្ឋាន និងហាងលក់ទំនិញភាគច្រើន បានបិទសេវាកម្ម រហូតទាល់តែមានបញ្ជាជាថ្មី ចំណែកការប្រកួតច្រៀង យូរ៉ូ វីហ្សិន និងការប្រកួតបាល់ទាត់ ក៏ត្រូវបានផ្អាកទាំងអស់ដូចគ្នា។

យ៉ាងណាក្ដី ពិភពលោក បានចាប់ផ្ដើមមានសង្ឃឹមឡើងវិញបន្តិច ពីការដែលស្ថានការណ៍ឆ្លងរាលដាលនៅក្នុងប្រទេសចិន បានស្ងប់ស្ងាត់ដោយបរិយាយ…ចិនបានរាយការណ៍កាលពីថ្ងៃព្រហស្បតិ៍ម្សិលមិញថា លែងរកឃើញអ្នកឆ្លងមេរោគទៀតហើយ នៅក្នុងប្រទេសជាថ្ងៃដំបូង ចាប់តាំងពីមានការរកឃើញវីរុសនេះកាលពីខែមករាកន្លងមក។ ទាំងអស់នេះ ដោយសារតែប្រជាជនប្រមាណ 56លាននាក់ក្នុងមណ្ឌលហ៊ូពេយ ដែលមានទីក្រុងចម្បងគឺ វូហាន ត្រូវបានបង្ខាំងដាក់ឱ្យនៅដាច់ដោយឡែកចាប់តាំងពីចុងខែមករាមក។

បច្ចុប្បន្ន រដ្ឋបាលចិនចាប់ផ្ដើមបន្ធូរបន្ថយការកម្រិតលើការធ្វើដំណើរនៅក្នុងមណ្ឌលមួយនេះ ដោយអនុញ្ញាតឱ្យប្រជាជនដែលធ្វើការក្នុងមណ្ឌលផ្សេងទៀត អាចធ្វើដំណើរចេញពីហ៊ូពេយបាន តែទោះជាដូច្នេះក្ដី ចិននៅតែរកឃើញអ្នកឆ្លងមេរោគថ្មី ដែលធ្វើដំណើរមកពីក្រៅប្រទេសចំនួន 34នាក់ ជាចំនួនខ្ពស់បំផុត ក្នុងរយៈពេល 2សប្ដាហ៍កន្លងទៅ។ ដោយហេតុនេះហើយ ទើបមានការចេញច្បាប់ឱ្យអ្នកដែលធ្វើដំណើរមកពីបរទេស ត្រូវតែបង្ខាំងខ្លួនឯងនៅក្នុងសណ្ឋាគារដែលបានកំណត់ឱ្យ រយៈពេល 14ថ្ងៃ។ ចំណែកប្រទេសជប៉ុន កោះហុកកៃដូ បានលើកលែងស្ថានការណ៍គ្រាអាសន្ន ដែលបានប្រកាសកាលពីខែកន្លងទៅ ដោយសារតែមានសញ្ញាថា ការឆ្លងរាលដាល បានស្រាកស្រាន្តចុះខ្លះហើយ…។

តែយ៉ាងណាក៏ដោយ កោះតូចមួយ ដែលជាកោះនៅក្នុងមហាសមុទ្រប៉ាស៊ីហ្វិក បានរកឃើញអ្នកឆ្លងមេរោគដំបូងគេ ខណៈដែលសាប់-សាហារ៉ា អាហ្វ្រិក បានអះអាងថា មានអ្នកស្លាប់ដំបូងគេ គឺ អនុប្រធានសភាទី1 របស់ប្រទេសប៊ើគីណាហ្វាសូ ដែលការណ៍នេះបានឆ្លុះបញ្ចាំងឱ្យឃើញថា ការតស៊ូជាមួយវីរុសកូវីដ-19 នៅក្នុងតំបន់មួយចំនួនក្នុងពិភពលោក ទើបតែចាប់ផ្ដើមប៉ុណ្ណោះ។

ខណៈនេះ ប្រទេសជាច្រើននៅក្នុងតំបន់អាមេរិកឡាទីន បានហាមប្រជាជនចេញក្រៅផ្ទះ ក្នុងពេលរាត្រី ខណៈដែលប្រទេសឈីលី បានប្រកាសសភាវមហន្តភ័យ ឯប្រទេសគុយបា និងកូស្តារីកា បានរកឃើញអ្នកស្លាប់ទី1។

លោក ថេដ្រូស កេប្រេយេស៊ុស ប្រធានអង្គការសុខភាពពិភពលោក បានអំពាវនាវឱ្យប្រទេសទូទាំងពិភពលោក សហការគ្នា ប្រយុទ្ធតស៊ូនឹង “សត្រូវរបស់មនុស្សជាតិ” និងបានដាស់តឿនប្រទេសក្នុងតំបន់អាហ្វ្រិក ឱ្យភ្ញាក់ខ្លួនឡើង និងត្រៀមខ្លួនឱ្យរួចជាស្រេច ដើម្បីទប់ទល់នឹងស្ថានការណ៍ដ៏អាក្រក់បំផុតដែលនឹងកើតឡើងនាពេលឆាប់ៗនេះ…៕

ប្រភព ៖ សារព័ត៌មានបរទេស

March 20, 2020

ដូចឆាកនៅក្នុងខ្សែភាពយន្តសង្គ្រាមៈ រថយន្តយោធា ដឹកសាកសពអ្នកស្លាប់ដោយសារវីរុសកូវីដ-19 យកទៅធ្វើពិធី រាប់សិបសាកសព

អ្នកលេងបណ្ដាញសង្គមនៅក្នុងប្រទេសអ៊ីតាលី បានបង្ហាញឃ្លីបគួរឱ្យអាណោចអាធម្ម និងសោកសៅយ៉ាងខ្លាំង នៅពេលឃើញរថយន្តយោធា 15គ្រឿងបើកជាជួរវែង ដឹកសាកសពអ្នកស្លាប់ដោយសារវីរុសកូវីដ-19 យកទៅធ្វើពិធីតាមសាសនា នៅក្នុងទីក្រុង ប៊ែរកាណូ ស្ថិតនៅប៉ែកខាងកើតឆៀងខាងជើងនៃទីក្រុង មីឡាន របស់អ៊ីតាលី។

https://www.youtube.com/watch?v=9sxrYYDpYoU

ជនជាតិអ៊ីតាលីម្នាក់ដែលបានឃើញទិដ្ឋភាពនេះ បាននិយាយថា ជាទិដ្ឋភាពគួរសោកសៅបំផុតក្នុងប្រវត្តិសាស្រ្តរបស់ប្រទេស ខណៈដែលម្នាក់ទៀត និយាយថា វាគឺជាសង្គ្រាម…។

សារព័ត៌មានអ៊ីតាលីបានបញ្ជាក់ថា មានការដឹកជញ្ជូនក្ដារមឈូសដែលផ្ទុកសាកសពប្រមាណជា 70 យកទៅធ្វើបុណ្យតាមសាសនាកាលពីយប់ថ្ងៃពុធ(ទី18 មីនា)។

លោក ជីអាខូម៉ូ អាន់កេឡូនី មន្ត្រីក្នុងតំបន់ដែលទទួលខុសត្រូវកន្លែងបញ្ចុះសព ក្នុងទីក្រុង ប៊ែរកាណូ បាននិយាយថា ព្រះវិហារដែលត្រូវប្រារព្ធពិធី ត្រូវរើយកកៅអីវែងៗចេញមកក្រៅទាំងអស់ ដើម្បីឱ្យមានទីកន្លែងសម្រាប់តម្កល់ក្ដារមឈូស ដែលមានចូលមកថែមជារៀងរាល់ថ្ងៃ។

វិបត្តិសាកសពមានច្រើនលើសលប់ បានបង្ហាញឱ្យយើងមើលឃើញថា តើមន្ទីរពេទ្យនៅតំបន់ភាគខាងជើងនៃប្រទេសអ៊ីតាលី ត្រូវទទួលរងសម្ពាធធ្ងន់ធ្ងរប៉ុនណា ក្នុងស្ថានការណ៍រោគរាតត្បាតបែបនេះ?

អភិបាលមណ្ឌល ឡមបារឌី ដែលទីក្រុងប៊ែរកាណូស្ថិតនៅក្នុងនោះដែរ បាននិយាយថា គ្រូពេទ្យ និងគិលានុបដ្ឋាកក្នុងតំបន់ ជិតនឹងទប់ទល់លែងរួចហើយ…ហើយបើសិនជាថ្ងៃណា បុគ្គលិកពេទ្យទាំងនោះ អស់ទាំងកម្លាំងកាយ និងចិត្ត ថ្ងៃនោះហើយ គឺជាមហាគ្រោះថ្នាក់ និងភយន្តរាយសម្រាប់ប្រទេសអ៊ីតាលីយ៉ាងពិតប្រាកដ…។

លោកនាយករដ្ឋមន្ត្រី ជូសិបប៉េ ខន់តេ បានប្រកាសបង្ខាំងប្រជាជនទូទាំងប្រទេស ដើម្បីគ្រប់គ្រងមេរោគ តែអ៊ីតាលីនៅតែមានចំនួនអ្នកឆ្លង និងស្លាប់កើនឡើងយ៉ាងគួរឱ្យភ្ញាក់ផ្អើល។ ចុងក្រោយបំផុត មានអ្នកឆ្លងមេរោគចំនួន 41.035នាក់ និងស្លាប់ 3,405នាក់(វ៉ាដាច់ចិនទៅហើយ)។

អាជ្ញាធរ បានថ្លែងថា នៅមានប្រជាជនចំនួនច្រើនណាស់ ដែលមិនធ្វើតាមបញ្ជាឱ្យនៅតែក្នុងផ្ទះ និងបានទាមទារឱ្យរដ្ឋរឹតបន្តឹងជាងនេះទៀត៕

ប្រភព ៖ សារព័ត៌មានបរទេស

March 20, 2020

ចំនួនករណីស្លាប់ដោយសារ COVID-19 នៅអ៊ីតាលី កើនលើសប្រទេសចិន!

ប្រទេសអ៊ីតាលី បានរកឃើញអ្នកជំងឺសរុប 41,035ករណី និងករណីស្លាប់ដោយសារ COVID-19 ចំនួន 3,405នាក់ ខណៈដែលចំនួនអ្នកស្លាប់នៅប្រទេសចិន (ចិនដីគោក) មានចំនួន 3,245នាក់។

មជ្ឈមណ្ឌលការពារជនស៊ីវិលអ៊ីតាលី កាលពីម្សិលមិញបានឱ្យដឹងថា ប្រទេសនេះបានរកឃើញអ្នកផ្ទុកមេរោគកូរ៉ូណាចំនួន5,322ករណីបន្ថែមទៀត នាំឱ្យចំនួនអ្នកឆ្លងរោគនេះ ឡើងដល់ 41,035នាក់។ ចំនួនករណីស្លាប់ដោយសារ COVID-19 នៅក្នុងប្រទេសនេះ មានចំនួន3,405នាក់ គឺកើន427ករណី បើធៀបនឹងមុននោះមួយថ្ងៃ។ ប្រការនេះ ធ្វើឱ្យអ៊ីតាលី ក្លាយជាប្រទេសដែលមានអ្នកស្លាប់ដោយសារវីរុស COVID-19 ច្រើនបំផុតក្នុងពិភពលោក។

អត្រាអ្នកស្លាប់ដោយសារ COVID-19 នៅប្រទេសអ៊ីតាលី គឺ 8.3% ខ្ពស់ជាងទ្វេដង បើធៀបនឹងអត្រាមធ្យមទូទាំងពិភពលោក។ ក្រុមអ្នកជំនាញផ្នែកសុខាភិបាលនៃប្រទេសចិន ដែលមកជួយអ៊ីតាលី បាននិយាយថា វិធានការនានាដែលត្រូវបានធ្វើឡើងដើម្បីទប់ទល់នឹង COVID-19 នៅប្រទេសអ៊ីតាលី មិនទាន់មានភាពខ្លាំងក្លានៅឡើយ។

COVID-19 បានបង្ហាញខ្លួននៅក្នុងប្រទេស និងដែនដីចំនួន 176 នៅទូទាំងពិភពលោក ធ្វើឱ្យមនុស្សជាង 227,000នាក់បានឆ្លងរោគ និងជាង 9,300នាក់បានស្លាប់៕

ប្រភព៖ សារព័ត៌មានបរទេស

March 20, 2020

មហាក្សត្រនៃប្រទេសម៉ូណាកូ បានឆ្លងវីរុស COVID-19

ព្រះអង្គម្ចាស់ Albert II នៃប្រទេសម៉ូណាកូ (Monaco) ព្រះជន្ម 62វស្សា បានឆ្លងមេរោគ COVID-19 ក្លាយជាអ្នកដឹកនាំកំពូលដំបូងរបស់ពិភពលោក ផ្ទុកមេរោគកូរ៉ូណានេះ។

រាជវាំងម៉ូណាកូ ថ្ងៃនេះបានប្រកាសថា ព្រះអង្គម្ចាស់ Albert II ត្រូវបានធ្វើតេស្តកាលពីដើមសប្ដាហ៍នេះ ហើយលទ្ធផលថ្មីៗនេះ បានបង្ហាញថា ទ្រង់មានផ្ទុកមេរោគ COVID-19។ ព្រះអង្គម្ចាស់ព្រះជន្ម 62វស្សានេះ គឺជាមេដឹកនាំប្រទេសដំបូងគេក្នុងលោក ដែលបានឆ្លងវីរុស COVID-19។

យោងតាមសេចក្ដីប្រកាសរបស់ព្រះមរមរាជវាំងម៉ូណាកូ ទ្រង់ Albert II បច្ចុប្បន្ន នៅមានសុខភាពធម្មតា ហើយទ្រង់ក៏នៅតែធ្វើការក្នុងបន្ទប់ដោយឡែកក្នុងរាជវាំង។ ប៉ុន្តែ ទ្រង់ក៏កំពុងទទួលការព្យាបាល និងតាមដានពីក្រុមវេជ្ជបណ្ឌិតផងដែរ។

ព្រះអង្គម្ចាស់ Albert បានឡើងគ្រងរាជ្យ ចាប់ពីឆ្នាំ2005 បន្ទាប់ពីបិតាទ្រង់បានសោយទិវង្គត។ ទ្រង់ក៏បានអំពាវនាវឱ្យពលរដ្ឋ 39.000នាក់របស់ទ្រង់ គោរពតាមវិធានការនានារបស់រដ្ឋ ដើម្បីទប់ស្កាត់ការឆ្លងវីរុសកូរ៉ូណា។ បច្ចុប្បន្ន គេមិនទាន់ដឹងថា មហេសីរបស់ទ្រង់ ឆ្លងវីរុសនេះដែរ ឬទេនៅឡើយ។ នាយករដ្ឋមន្ត្រីម៉ូណាកូ លោក Serge Telle កាលពី3ថ្ងៃមុនក៏ត្រូវបានប្រកាសថា បានឆ្លងមេរោគ COVID-19 នេះដែរ។

COVID-19 បានបង្ហាញខ្លួននៅក្នុងប្រទេស និងដែនដីចំនួន 176 នៅទូទាំងពិភពលោក ធ្វើឱ្យមនុស្សជាង 227,000នាក់បានឆ្លងរោគ និងជាង 9,300នាក់បានស្លាប់។

គិតត្រឹមថ្ងៃនេះ ប្រទេសម៉ូណាកូ មានអ្នកឆ្លងរោគ COVID-19 ចំនួន9នាក់។ មេដឹកនាំប្រទេសនេះ បានស្នើឱ្យបិទទីតាំងសាធារណៈនានា ចាប់ពីថ្ងៃទី21មីនាខាងមុខ ដើម្បីបញ្ចៀសការឆ្លងរាលដាលបន្ត៕

ប្រភព៖ សារព័ត៌មានបរទេស

March 20, 2020

ពលរដ្ឋអាមេរិកាំង 1គ្រួសារ មាន7នាក់បានឆ្លង COVID-19 ក្នុងនោះមានអ្នកស្លាប់ចំនួន…

ស្ត្រីជាម្ដាយម្នាក់ រួមនឹងកូន2នាក់ នៅក្នុងរដ្ឋ New Jersey សហរដ្ឋអាមេរិក បានស្លាប់ដោយសារឆ្លងវីរុស COVID-19 ចំណែកកូនៗ4នាក់ផ្សេងទៀតក៏បានឆ្លងមេរោគនេះ។

លោកយាយ Grace Fusco អាយុ73ឆ្នាំ បានបាត់បង់ជីវិតកាលពីថ្ងៃទី18មីនាកន្លងទៅ 5ថ្ងៃក្រោយមក កូនស្រីច្បងរបស់លោកយាយ Grace Fusco ឈ្មោះ Rita Fusco-Jackson អាយុ55ឆ្នាំ ក៏បានស្លាប់ដោយសារមេរោគកូរ៉ូណានេះ។ ប៉ុន្មានម៉ោងមុនការស្លាប់របស់អ្នកស្រី Rita Fusco-Jackson កូនប្រុសម្នាក់របស់លោកយាយ Grace Fusco ឈ្មោះ Carmine Fusco នៅក្នុងរដ្ឋ Pennsylvania ក៏បានបាត់បង់ជីវិតដោយសារ COVID-19។

លោកយាយ Grace Fusco មានកូន11នាក់ និងចៅ27នាក់។ ដោយសារតែបានឆ្លង COVID-19 និងត្រូវព្យាបាលជំងឺ លោកយាយ Carmine Fusco មិនបានដឹងថា កូនរបស់គាត់2នាក់ បានស្លាប់សោះឡើយ។

អ្នកជិតខាងម្នាក់ បាននិយាយថា កូនៗ4នាក់ផ្សេងទៀតរបស់លោកយាយ Grace Fusco ក៏បានឆ្លងរោគកូរ៉ូណា និងកំពុងព្យាបាលក្នុងមន្ទីរពេទ្យ ក្នុងនោះមាន3នាក់ ស្ថិតក្នុងស្ថានភាពធ្ងន់ធ្ងរ។ មនុស្សចំនួន20 ដែលជាសាច់ញាតិរបស់លោកយាយ Grace Fusco បច្ចុប្បន្ន ត្រូវគេដាក់ឱ្យនៅដាច់ដោយឡែកក្នុងផ្ទះ ហើយក៏មិនបានចូលរួមពិធីបុណ្យសពរបស់ពួកគេនោះដែរ។

COVID-19 ប្រហែលជាបានឆ្លងទៅក្នុងគ្រួសារលោកយាយ Grace Fusco តាំងពីពេលដែលពួកគេជួបជុំគ្នាកាលពីដើមខែនេះ។ ម្នាក់ដែលបានចូលរួមក្នុងពិធីជួបជុំគ្រួសារយប់នោះ ក៏ធ្លាប់បានទំនាក់ទំនងផ្ទាល់ជាមួយ John Brennan ដែលជាពលរដ្ឋដំបូងរបស់រដ្ឋ New Jersey ដែលបានស្លាប់កាលពីថ្ងៃទី10មីនា ដោយសារឆ្លង COVID-19។

Judith M. Persichilli មេដឹកនាំផ្នែកសុខាភិបាលនៃរដ្ឋ New Jersey យល់ថា សោកនាដកម្មរបស់គ្រួសារនេះ គឺភ័ស្តុតាងបញ្ជាក់ថា ការជួបជុំមនុស្សច្រើន គឺជាមូលហេតុដែលអាចនាំឱ្យមនុស្សស្លាប់បាន នៅក្នុងអំឡុងពេលវីរុស COVID-19 កំពុងរាតត្បាតពិភពលោក។

COVID-19 បានឆ្លងរាលដាលដល់ប្រទេស និងដែនដី ចំនួន176 ក្នុងពិភពលោក បណ្ដាលឱ្យមនុស្សជាង227,000នាក់ក្លាយជាអ្នកជំងឺរលាកសួតប្រភេទថ្មី និងជាង 9,300នាក់បានស្លាប់ និងជិត 86,000នាក់បានជាសះស្បើយ។ នៅសហរដ្ឋអាមេរិក បច្ចុប្បន្ន មានអ្នកឆ្លងរោគនេះចំនួនជាង 9,400នាក់ ក្នុងនោះមាន155នាក់បានស្លាប់។ រដ្ឋចំនួន50 និងរដ្ឋធានី Washington របស់សហរដ្ឋអាមេរិក សុទ្ធតែមានករណីឆ្លង COVID-19៕

ប្រភព៖ សារព័ត៌មានបរទេស

March 19, 2020

កម្ពុជារកឃើញ អ្នកឆ្លងជំងឺ COVID-19 ចំនួន10នាក់បន្ថែមទៀតហើយនៅថ្ងៃនេះ!

នៅមុននេះបន្តិច ក្រសួងសុខាភិបាលកម្ពុជា បានប្រកាសឱ្យដឹងថា បានរកឃើញអ្នកឆ្លងជំងឺ COVID-19 ថ្មីចំនួន10នាក់បន្ថែមទៀត។ ដូច្នេះ ចំនួនអ្នកបានឆ្លងមេរោគកូរ៉ូណានៅកម្ពុជា បានកើនដល់ 47នាក់។ នេះបើតាមសេចក្តីប្រកាសរបស់ក្រសួងសុខាភិបាលកម្ពុជា។

March 19, 2020

អ្នកវេជ្ជសាស្ត្រចិន៖ ថ្នាំប្រឆាំងមេរោគ HIV (អេដស៍) មិនមានប្រសិទ្ធភាពព្យាបាលជំងឺ COVID-19 ធ្ងន់ធ្ងរនោះទេ

ក្រុមអ្នកវិទ្យាសាស្ត្រនៅប្រទេសចិន បានឱ្យដឹងថា ថ្នាំប្រឆាំងមេរោគ HIV (អេដស៍) ដែលមានឈ្មោះថា Kaletra មិនមានប្រសិទ្ធភាពគ្រប់គ្រាន់ក្នុងការព្យាបាលជំងឺ COVID-19 នៅលើអ្នកជំងឺដែលមានសភាពធ្ងន់ធ្ងរនោះឡើយ។

ការរកឃើញខាងលើនេះ ត្រូវបានធ្វើឡើងដោយក្រុមអ្នកវេជ្ជសាស្ត្រនៃប្រទេសចិន និងត្រូវបានចុះផ្សាយនៅលើទស្សនាវដ្ដីវេជ្ជសាស្ត្រ New England កាលពីថ្ងៃទី18មីនា ឆ្នាំ2020។

Kaletra គឺជាថ្នាំមួយប្រភេទដែលមានសមាសធាតុនៃថ្នាំ2ប្រភេទផ្សេងទៀត គឺ lopinavir និង ritonavir ដែលត្រូវបានគេផលិតឡើងដើម្បីប្រឆាំងនឹងមេរោគ HIV ដែលបង្កជំងឺអេដស៍។ ចាប់តាំងពីខែមករា ក្រុមវេជ្ជបណ្ឌិតនៅប្រទេសចិន បានប្រើប្រាស់ថ្នាំទាំង2ប្រភេទនេះដើម្បីព្យាបាលអ្នកជំងឺ COVID-19។

បន្ទាប់ពីបានសិក្សាស្រាវជ្រាវគ្រប់ជ្រុងជ្រោយ ក្រុមអ្នកវិទ្យាសាស្ត្រខាងលើ បានសន្និដ្ឋានថា “ថ្នាំ Kaletra មិនមានប្រសិទ្ធភាពច្បាស់លាស់នោះទេ”។

ក្រុមអ្នកវិទ្យាសាស្ត្រនេះ បានពិសោធថ្នាំខាងលើ នៅលើអ្នកជំងឺដែលមានអាការធ្ងន់ធ្ងរ ចំនួន199នាក់ នៅឯមន្ទីរពេទ្យ Jin Yin-Tan ក្នុងទីក្រុង Wuhan។ អ្នកជំងឺទាំងនេះ មានវ័យចាប់ពី48ឆ្នាំ ដល់68ឆ្នាំ។ នេះគឺជាការពិសោធធំដំបូងមួយ ទៅលើអ្នកជំងឺដែលមានអាការធ្ងន់ធ្ងរ នៅប្រទេសចិន។

ក្នុងរយៈពេល14ថ្ងៃ ពាក់កណ្ដាលនៃអ្នកជំងឺ COVID-19 ត្រូវបានថែទាំតាមស្ដង់ដាបច្ចុប្បន្ន រួមមានការប្រើប្រាស់វិធីព្យាបាលជំងឺរលាកសួតធម្មតា និងឱ្យប្រើអ៊ុកស៊ីហ្ស៊ែនពេលចាំបាច់។ អ្នកជំងឺក្រៅពីនេះ ត្រូវព្យាបាលដោយប្រើថ្នាំអេដស៍ Kaletra។ ក៏ប៉ុន្តែ លទ្ធផលបានបង្ហាញថា ថ្នាំអេដស៍នេះ មិនអាចជួយឱ្យអ្នកជំងឺប្រសើរឡើង ឬជួយទប់ស្កាត់ហានិភ័យនៃការស្លាប់នោះឡើយ។

បើទោះជាថ្នាំអេដស៍ខាងលើ មិនបានបង្ហាញប្រសិទ្ធភាពជាក់ស្ដែងក៏ដោយ ក្រុមអ្នកវិទ្យាសាស្ត្របញ្ជាក់ថា នេះមិនមែនជាលទ្ធផលចុងក្រោយនោះដែរ។ គេត្រូវធ្វើការពិសោធជាច្រើនទៀត ដើម្បីឱ្យដឹងអំពីប្រសិទ្ធភាពរបស់វា ក្នុងករណីអ្នកជំងឺត្រូវបានព្យាបាលដោយប្រើថ្នាំអេដស៍ បូករួមជាមួយថ្នាំផ្សេងៗទៀត។

បច្ចុប្បន្ន មិនទាន់មានថ្នាំ “ពិសេស” ណាមួយ ដែលមានប្រសិទ្ធភាពគ្រប់គ្រាន់ក្នុងការព្យាបាល COVID-19 បាននៅឡើយ។ ក្រុមគ្រូពេទ្យនៅលើពិភពលោក កំពុងធ្វើការពិសោធឆ្នាំជាច្រើនប្រភេទផ្សេងៗគ្នា ដោយសង្ឃឹមថា នឹងអាចរកឃើញវិធីជួយសង្គ្រោះជីវិតអ្នកជំងឺ COVID-19 បានច្រើនជាងពេលនេះ។

មនុស្សមួយចំនួនត្រូវបានព្យាបាលដោយថ្នាំ អង់ទីប៊ីយ៉ូទិក(ថ្នាំផ្សះ) និងថ្នាំប្រឆាំងវីរុស ដើម្បីទប់ស្កាត់ការឆ្លងរោគ និងកាត់បន្ថយការវិវត្តទៅរកភាពធ្ងន់ធ្ងរនៃជំងឺ។ អ្នកខ្លះក៏ព្យាបាលដោយប្រើថ្នាំ steroid ដើម្បីកាត់បន្ថយការរលាកសួតខ្លាំង និងដើម្បីទប់ស្កាត់ប្រតិកម្មហួសកម្រិតរបស់ប្រព័ន្ធភាពស៊ាំ ដែលអាចបង្កគ្រោះថ្នាក់ដល់ជីវិត។

ក៏ប៉ុន្តែ មិនទាន់មានថ្នាំណាដែលត្រូវបានបញ្ជាក់ថា មានប្រសិទ្ធភាពនោះទេ។ យ៉ាងណាក៏ដោយ នៅក្នុងស្ថានភាពអាសន្ននេះ ក្រុមគ្រូពេទ្យត្រូវតែប្រើប្រាស់រាល់វិធីដែលអាចធ្វើទៅបាន បើទោះវាមានប្រសិទ្ធភាពតិចតួច ឬបណ្ដោះអាសន្នក៏ដោយ។ មានវេជ្ជបណ្ឌិតខ្លះ ថែមទាំងបានបង្កើតស្ដង់ដានៃកម្រិតថ្នាំដោយខ្លួនឯង សម្រាប់ប្រើដើម្បីព្យាបាលអ្នកជំងឺទៀតផង។

មជ្ឈមណ្ឌលគ្រប់គ្រង និងទប់ស្កាត់ជំងឺរបស់សហរដ្ឋអាមេរិក បានផ្ដល់អនុសាសន៍ជាសាធារណៈ ដើម្បីឱ្យមានការជួយព្យាបាលដល់អ្នកជំងឺទូទៅ ប៉ុន្តែក៏បានរំឭកថា ប្រភេទថ្នាំប្រឆាំងវីរុស ឬប្រឆាំងការរលាក អាចនឹងមិននាំមកនូវក្ដីសង្ឃឹមនោះឡើយ។ នេះបើតាម NY Times។

កន្លងមក ក៏មានមន្ទីរពេទ្យមួយចំនួន បានប្រើប្រាស់ថ្នាំគ្រុនចាញ់ hydroxychloroquine ដែលមានតម្លៃទាប និងសុវត្ថិភាពបង្គួរ ដើម្បីព្យាបាលជំងឺ COVID-19 ផងដែរ។ ការសិក្សាស្រាវជ្រាវ បានបញ្ជាក់ថា ថ្នាំនេះអាចទប់ស្កាត់វីរុស COVID-19 មិនឱ្យជ្រៀតចូលបានទៅក្នុងកោសិកាមនុស្ស។ របាយការណ៍ពីប្រទេសចិន និងប្រទេសបារាំង បានឱ្យដឹងថា វិធីព្យាបាលនេះ អាចមានប្រសិទ្ធភាព ប៉ុន្តែ បច្ចុប្បន្ន មិនទាន់មានទិន្នន័យគ្រប់គ្រាន់ដែលអាចបញ្ជាក់ឱ្យច្បាស់អំពីប្រការនេះនៅឡើយ៕

ប្រភព៖ សារព័ត៌មានបរទេស

March 19, 2020

Bill Gates៖ ប្រទេសណាដែលធ្វើបានល្អចំពោះការដាក់បម្រាមគោចរ និងធ្វើតេស្តរក COVID-19 សេដ្ឋកិច្ចនឹងអាចងើបឡើងវិញក្នុងពេលដ៏ខ្លី

“បើសិនជាប្រទេសណាដែលធ្វើបានល្អទៅលើការដាក់បម្រាមគោចរ និងធ្វើតេស្ត បន្ទាប់ពី6-10សប្ដាហ៍ទៅមុខ ចំនួនករណីឆ្លងរោគក្នុងប្រទេសទាំងនោះ នឹងថយចុះមកនៅតិចតួចបំផុត ហើយអាចដកបម្រាមគោចរឡើងវិញបាន” លោក Bill Gates មានប្រសាសន៍ឆ្លើយតបទៅនឹងសំណួរ1 នៅលើបណ្ដាញសង្គម Teddit កាលពីថ្ងៃពុធកន្លងទៅ។

ដោយចង់ជំរុញឱ្យមនុស្សគ្រប់គ្នារក្សាភាពនឹងនរ និងធ្វើតាមវិធានការសុវត្ថិភាព លោក Bill Gates ដែលជាស្ថាបនិក និងជាសប្បុរសជនរបស់ក្រុមហ៊ុន Microsoft បានថ្លែងថា បណ្ដាប្រទេសដែលបានចាត់វិធានការផ្សេងៗបានល្អ ដូចជាការធ្វើសេស្តរកវីរុសកូរ៉ូណា និងផ្អាករាល់សកម្មភាពមិនចាំបាច់ ប្រទេសទាំងនោះនឹងបានឃើញសេដ្ឋកិច្ច និងសុខុមាលភាពប្រជាជន ល្អប្រសើរឡើងវិញនាប៉ុន្មានសប្ដាហ៍ខាងមុខ។

មហាសេដ្ឋ Bill Gates ថ្លែងថា ការរួមផ្សំរវាងការធ្វើតេស្តរកមេរោគ និងការដាក់ឱ្យនៅដាច់ដោយឡែក គឺពិតជាមានប្រសិទ្ធភាពក្នុងការទប់ស្កាត់មេរោគកូរ៉ូណាបានយ៉ាងល្អ។

លោក Bill Gates បានសេរសេរបន្តថា “ដំណាក់កាលបច្ចុប្បន្ន មានការឆ្លងរាលដាលមេរោគដ៏ច្រើនករណី នៅក្នុងបណ្ដាប្រទេសអ្នកមាន។ ជាមួយនឹងសកម្មភាពត្រឹមត្រូវ រួមមានការធ្វើតេស្ត និងបម្រាមគោចរ (ដែលខ្ញុំហៅថា “shut down”) នៅក្នុងរយៈពេលពី2-3ខែទៅមុខទៀត ប្រទេសអ្នកមានទាំងនោះ នឹងអាចគេចផុតពីការឆ្លងរាលដាលកម្រិតខ្ពស់មិនខាន”។

គាត់បន្តថា “ខ្ញុំមានការព្រួយបារម្ភអំពីការខាតបង់ផ្នែកសេដ្ឋកិច្ច ប៉ុន្តែ បញ្ហាអាក្រក់ជាងនេះ នឹងធ្វើឱ្យប៉ះពាល់ខ្លាំងដល់បណ្ដាប្រទេសកំពុងអភិវឌ្ឍ ជាបណ្ដាប្រទេសដែលមិនអាចដាក់បម្រាមគោចរដូចទៅនឹងបណ្ដាប្រទេសអ្នកមាន ហើយប្រព័ន្ធសុខាភិបាលក៏នៅមានកម្រិត”។

មហាសេដ្ឋីរូបនេះ ថ្លែងថា មូលនិធិ Gates Foundation បានសន្យាថា នឹងផ្ដល់ថវិកាចំនួនដល់ទៅ100លានដុល្លារអាមេរិក ដើម្បីជួយដោះសា្រយបញ្ហាវិបត្តិសុខភាព COVID-19 នៅទូទាំងពិពលោក ក៏ដូចជាការផ្ដល់5លានដុល្លារអាមេរិក ដើម្បីជួយដល់រដ្ឋ Washington ដែលជាសម្បុកមេរោគកូរ៉ូណាដ៏ធំមួយនៅសហរដ្ឋអាមេរិក បន្ទាប់ពីទីក្រុង New York។

លោក Bill Gates ឱ្យដឹងថា មូលនិធិ Gates Foundation កំពុងតែធ្វើការជាមួយក្រុមនានា ដែលធ្វើសកម្មភាពទាក់ទិននឹងរោគវិនិច្ឆ័យ ការព្យាបាល និងវ៉ាក់សាំង ដើម្បីធានាឱ្យបានប្រាកដថា កិច្ចខិតខំប្រឹងប្រែងត្រឹមត្រូវ ត្រូវបានផ្តល់អាទិភាព។

“យើងចង់ធ្វើឱ្យប្រាកដថា ប្រទេសទាំងអស់ ទទួលបានជំនួយទាំងនេះ។ យើងបានបរិច្ចាគចំនួន 100លានដុល្លារអាមេរិក នៅក្នុងខែកុម្ភៈ សម្រាប់កិច្ចការផ្សេងៗជាច្រើន ហើយយើងនឹងធ្វើច្រើនជាងនេះទៀត”។

“អាទិភាពសំខាន់មួយ នោះគឺជាការធានាឱ្យបាននូវលទ្ធភាពនៃការផលិតថ្នាំព្យាបាល និងថ្នាំវ៉ាក់សាំងការពារ។ យើងខ្ញុំក៏បាន និងកំពុងខិតខំជួយជ្រោមជ្រែងវិស័យផ្សេងៗ ដូចជាក្រុមអប់រំរបស់យើង ដែលកំពុងធ្វើការដើម្បីធានាឱ្យធនធាននៅលើអនឡាញសម្រាប់សិស្សានុសិស្ស មានប្រយោជន៍ច្រើនបំផុត តាមដែលអាចធ្វើទៅបាន” នេះបើតាមការបញ្ជាក់របស់មហាសេដ្ឋី Bill Gates៕

ប្រភព៖ សារព័ត៌មានបរទេស

March 19, 2020

Manny Pacquiao ចាប់ដៃជាមួយ Jack Ma ចែកឈុតពិនិត្យរកវីរុសកូវីដ-19 ដល់ប្រជាជនហ្វីលីពីន

មែននី ប៉ាកគីអាវ កំពូលអ្នកប្រដាល់ វីរបុរសជនជាតិហ្វីលីពីន បានសហការជាមួយអ្នកជំនួញល្បីឈ្មោះលំដាប់ពិភពលោក ជែក ម៉ា ចែកឈុតពិនិត្យរកមេរោគវីរុសកូវីដ-19 ដល់ប្រជាជននៅក្នុងប្រទេសកំណើតរបស់ខ្លួន ក្រោយកើតការឆ្លងរាលដាលយ៉ាងធ្ងន់ធ្ងរនៅក្នុងប្រទេស។

ហ្វីលីពីន ក៏ជាប្រទេសមួយ ដែលគេចមិនផុតពីការឆ្លងរាលដាលរបស់មេរោគវីរុសកូរ៉ូណាប្រភេទថ្មី ឬកូវីដ-19 មកពីប្រទេសចិនដែរ និងយ៉ាងណាក្ដី ក្នុងនាមជាវីរបុរសនៃប្រទេសហ្វីលីពីន មែននី ប៉ាកគីអាវ ដែលមានមុខតំណែងជាតំណាងរាស្ត្រនៅក្នុងសភា ក៏មិនអាចបោះបង់ចោលប្រជាជនបានដែរ។

កំពូលអ្នកប្រដាល់ជនជាតិតាកាឡុក បានថ្លែងប្រាប់តាមរយៈសារព័ត៌មានថា ខ្លួនបានប្រើថវិកាក្នុងមូលនិធិផ្ទាល់ខ្លួន មែននី ប៉ាកគីអាវ ហ្វោនដេស្សិន និងអាស្រ័យភាពជិតស្និទ្ធស្អិតល្មួតជាមួយ ជែក ម៉ា បានរួមគ្នាចែកឈុតពិនិត្យរកមេរោគកូវីដ-19 ហ្វ្រ៊ី ជូនប្រជាជនហ្វីលីពីន ដើម្បីពិនិត្យរកមេរោគរយៈដំបូង មុននឹងទៅជួបគ្រូពេទ្យ។

“យើងមានអារម្មណ៍រំភើបចិត្តខ្លាំងណាស់ ដែលបានប្រកាសថា មូលនិធិរបស់ ជែក ម៉ា បានសហការជាមួយមូលនិធិរបស់ មែននី ប៉ាកគីអាវ ចែកឈុតពិនិត្យមេរោគវីរុសកូវីដ-19 នៅក្នុងប្រទេសហ្វីលីពីន ចំនួន 50,000ឈុត ដោយរឿងរ៉ាវដែលកើតឡើងនៅលើពិភពលោកថ្ងៃនេះ គ្មានអ្វីប្រសើរជាងការជួយសង្គ្រោះរវាងគ្នានឹងគ្នាឡើយ”

សម្រាប់ ប៉ាកគីអាវ អាយុ 41ឆ្នាំ ម្ចាស់ខ្សែក្រវាត់ជើងឯកពិភពលោកទម្ងន់ វែលធើរវេធ របស់សមាគមប្រដាល់ពិភពលោក(WBA) កាលពីពេលមុននេះ មានប្រូក្រាមវិលត្រឡប់ទៅកាន់សង្វៀនវិញនៅក្នុងឆ្នាំនេះ តែក៏ត្រូវបត់គម្រោងការនេះទុកបណ្ដោះអាសន្នសិន ក្រោយកើតការឆ្លងរាលដាលរបស់មេរោគវីរុសដ៏កំណាចនេះ។

ប្រភព៖ ព័ត៌មានបរទេស

March 19, 2020

អបអរសាទរ វូហាន អ្នករស់វិញហើយ!! វូហានលែងរកឃើញអ្នកឆ្លងមេរោគថ្មីទៀតហើយជាលើកដំបូង ចាប់មានការឆ្លងកូវីដ-19មក

ទីក្រុងវូហាន មណ្ឌលកណ្ដាលនៃការឆ្លងរាលដាលវីរុសកូវីដ-19 ក្នុងប្រទេសចិន លែងរកឃើញអ្នកឆ្លងមេរោគថ្មីទៀតហើយ សូម្បីតែម្នាក់ជាលើកដំបូង ចាប់តាំងពីធ្លាប់បានប្រឈមនឹងការឆ្លងរាតត្បាតយ៉ាងធ្ងន់ធ្ងរ រហូតដល់ត្រូវបិទទីក្រុងកាលពីពេលកន្លងមក។

ថ្ងៃទី19 មីនា ឆ្នាំ2020 នេះ រដ្ឋបាលទីក្រុងវូហាន បានបង្ហើបឱ្យដឹងអំពីរបាយការណ៍ថ្មីចុងក្រោយបំផុតថា លែងរកឃើញអ្នកឆ្លងមេរោគវីរុសកូវីដ-19ថ្មីទៀតហើយ សូម្បីតែម្នាក់ជាលើកដំបូង ដូចគ្នានឹងទីក្រុងផ្សេងៗទៀតក្នុងមណ្ឌលហ៊ូពេយរបស់ចិន ដែលក៏លែងរកឃើញអ្នកឆ្លងមេរោគថ្មីទៀតដូចគ្នាដែរ ជិត 2សប្ដាហ៍មកហើយ និងបើសិនជានៅតែមិនមានអ្នកឆ្លងមេរោគថ្មីនៅក្នុងវូហានជាប់ៗគ្នាដល់ 14ថ្ងៃទៀតនោះ អាចនឹងមានបញ្ជាឱ្យបញ្ឈប់ការបិទទីក្រុងវូហាន រដ្ឋធានីចម្បងរបស់មណ្ឌលហ៊ូពេយបាន មិនហួសពីចុងខែមីនានេះឡើយ។

កាលពីពេលមុននេះ ទីក្រុងវូហានត្រូវបានបិទចោលទូទាំងទីក្រុង តាំងពីពាក់កណ្ដាលខែមករាកន្លងមក ដែលអ្នកជំនាញការបានបញ្ជាក់ថា ទោះជាបញ្ឈប់ការបិទទីក្រុងហើយក៏ដោយ តែវិធានការដើម្បីគ្រប់គ្រង និងការពារមេរោគ នឹងនៅតែប្រតិបត្តិជាបន្តបន្ទាប់យ៉ាងម៉ឺងម៉ាត់ដដែល ដើម្បីការពារការវិលត្រឡប់មកឆ្លងរាលដាលជាថ្មី៕

ប្រភព៖ សារព័ត៌មានបរទេស

March 19, 2020

ចំនួនអ្នកស្លាប់ដោយសារ COVID-19 នៅអ៊ីតាលី ជិតស្មើប្រទេសចិនហើយ!

ប្រទេសអ៊ីតាលី មានអ្នកស្លាប់ដោយសារឆ្លងវីរុស COVID-19 ចំនួន2,978នាក់ បន្ទាប់ពីអ្នកស្លាប់បានកើន475នាក់បន្ថែមទៀតក្នុងរយៈពេលតែមួយថ្ងៃ គឺជិតស្មើនឹងចំនួនអ្នកស្លាប់នៅប្រទេសចិន(3.249នាក់)។

នាយកដ្ឋានការពារជនស៊ីវិលនៃប្រទេសអ៊ីតាលី បានឱ្យដឹងថា ប្រទេសនេះ មានអ្នកស្លាប់ដោយសារ COVID-19 ចំនួន475នាក់បន្ថែមទៀត ដែលជាតួលេខនៃការស្លាប់ក្នុង1ថ្ងៃខ្ពស់បំផុតក្នុងពិភពលោក តាំងពីប្រទេសបានចាប់ផ្ដើមប្រកាសអំពីតួលេខទាក់ទិននឹងរោគរាតត្បាតកូរ៉ូណានេះ។

គិតមកដល់ថ្ងៃទី19មីនានេះ មានអ្នកជំងឺសរុប 35,713នាក់ អ្នកស្លាប់ 2,978នាក់ និងអ្នកដែលបានជាសះស្បើយចំនួន4,025នាក់ នៅប្រទេសអ៊ីតាលី។ តួលេខនៃអ្នកស្លាប់ដោយសារ COVID-19 នៅប្រទេសអ៊ីតាលី ស្មើនឹង 1/3 នៃចំនួនអ្នកស្លាប់ទូទាំងពិភពលោក ខណៈដែលប្រទេសនេះ បានបិទក្រុមហ៊ុនទាំងអស់ និងហាមមិនឱ្យមានការជួបជុំនៅទីសាធារណៈ។

អត្រាអ្នកស្លាប់នៅប្រទេសអ៊ីតាលី ស្មើនឹង 8.3% ខ្ពស់ជាងទ្វេដង បើធៀបនឹងអត្រាមធ្យម 4.1% នៅទូទាំងពិភពលោក។ មានមូលហេតុជាច្រើនដែលនាំឱ្យអត្រានៃអ្នកស្លាប់ដោយសារ COVID-19 ខ្ពស់នៅប្រទេសអ៊ីតាលី ក្នុងនោះ ចំនួនប្រជាជនវ័យចំណាស់ច្រើន និងកង្វះខាតមន្ទីរពេទ្យគឺជាកត្តាចម្បងបំផុត។

នៅតំបន់អឺរ៉ុប ក្រៅពីប្រទេសអ៊ីតាលី ក៏នៅមានប្រទេសមួយចំនួនទៀតដែលរងគ្រោះធ្ងន់ធ្ងរដោយសារ COVID-19 ក្នុងនោះ ប្រទេសអេស្ប៉ាញ មានអ្នកឆ្លងមេរោគជាង14,700នាក់ និងស្លាប់638នាក់ ប្រទេសអាល្លឺម៉ង់មានអ្នកឆ្លងរោគជាង12,300នាក់ និងស្លាប់28នាក់ ប្រទេសបារាំងមានអ្នកឆ្លងរោគ9,100នាក់ និងស្លាប់264នាក់ ប្រទេសអង់គ្លេសមានអ្នកឆ្លងជាង2,600នាក់ និងស្លាប់104នាក់។

COVID-19 បានឆ្លងរាលដាលនៅក្នុងទីក្រុង Wuhan ខេត្ត Hubei ប្រទេសចិន កាលពីខែធ្នូ ឆ្នាំ2019 ហើយបានបង្ហាញខ្លួននៅក្នុងប្រទេស និងដែនដីចំនួន173 នៅទូទាំងពិភពលោក ធ្វើឱ្យមនុស្សជាង218,000នាក់កើតជំងឺ ជាង9,000នាក់ស្លាប់ និងជាង84,000នាក់បានជាសះស្បើយ៕

ប្រភព៖ សារព័ត៌មានបរទេស

March 19, 2020

Tag: សុខភាព