សុខភាព - La Reine Media

មន្ត្រីនគរបាលអាមេរិកាំងនៅ New York ជាង50នាក់ ឆ្លងមេរោគ COVID-19 ខណៈតួលេខនៃអ្នកឆ្លងរោគនេះ កើនឡើងយ៉ាងឆាប់រហ័ស

ប្រធានស្នងការដ្ឋាននគរបានទីក្រុង New York បានបញ្ជាក់ថា មន្ត្រីប៉ូលិសជាង50នាក់របស់ស្នងការដ្ឋាននេះ បានឆ្លងវីរុសកូរ៉ូណា COVID-19 ប៉ុន្តែ មានតែម្នាក់គត់ដែលបានសម្រាកព្យាបាលនៅមន្ទីរពេទ្យ។

សារព័ត៌មាន Fox News បានរាយការណ៍ថា កងកម្លាំងនគរបាលធំបំផុតនៅសហរដ្ឋអាមេរិក កំពុងតែប្រឈមនឹងការកើនឡើងខ្ពស់ និងឆាប់រហ័សនៃតួលេខអ្នកឆ្លង COVID-19 ក្នុងក្រុមប៉ូលីស នៅក្នុងសង្កាត់1 នៃតំបន់Manhattan ជាទីតាំងដែលរងផលប៉ះពាល់ខ្លាំងជាងគេ។

យោងតាមប្រភពខាងលើ មានប៉ូលីសរហូតដល់31នាក់នៅក្នុងសង្កាត់1 មានលទ្ធផលវិជ្ជមានជាមួយនឹង COVID-19 ស្មើនឹង17% នៃកម្លាំងសរុប ធ្វើឱ្យនាយកដ្ឋានប៉ូលិសទីក្រុង New York ត្រូវបញ្ជូនមន្ត្រីនគរបាលបន្ថែមទៅកាន់ទីនោះ។

ស្នងការដ្ឋាននគរបាលទីក្រុង New York លោក Dermot Shea បានឱ្យដឹងថា ពួកគេកំពុងតែរៀបចំកាលវិភាគការងារ បង្កើនការអនាម័យ។ល។ លោក បន្តថា នៅទីនេះមានវេជ្ជបណ្ឌិត1ក្រុម មានតួនាទីពិនិត្យ និងសម្រេចទៅលើការបង្ខាំងឱ្យនៅដោយឡែកចំពោះប៉ូលិសរូបណាដែលត្រូវបានសង្ស័យថា អាចមានផ្ទុកមេរោគ COVID-19។

ក៏ប៉ុន្តែ ខាងសហជីពនគរបាល បាននិយាយថា អធិការដ្ឋាននគរបាលទីក្រុង New York មិនបានផ្ដល់សម្ភារការពារសុវត្ថិភាពសុខភាពដែលសមស្របទៅឱ្យមន្ត្រីនគរបាលនោះទេ។

ស្ថានភាពរោគរាតត្បាត COVID-19 កំពុងតែអាក្រក់ទៅៗនៅសហរដ្ឋអាមេរិក ដោយសារករណីឆ្លងរោគនេះ បានកើនឡើងរហ័សពីមួយថ្ងៃទៅមួយថ្ងៃ។ សហរដ្ឋអាមេរិក គិតមកដល់បច្ចុប្បន្ន បានរកឃើញអ្នកផ្ទុកមេរោគកូរ៉ូណាសរុបជាង 26,000ករណី និងស្លាប់ 326ករណី។

New York គឺជារដ្ឋដែលមានករណីឆ្លង COVID-19 ច្រើនជាងគេបំផុតនៅសហរដ្ឋអាមេរិក ដោយរដ្ឋនេះមានអ្នកឆ្លងរោគជាង 10,300ករណី៕

ប្រភព៖ សារព័ត៌មានបរទេស

March 23, 2020

ខ្លាចនាយករដ្ឋមន្ត្រីបច្ចុប្បន្នឆ្លងរោគ COVID-19 អង់គ្លេសក៏តែងតាំងអ្នកជំនួសឱ្យហើយ

រដ្ឋមន្ត្រីក្រសួងការបរទេសអង់គ្លេស Dominic Raab ត្រូវបានតែងតាំងឱ្យបំពេញភារកិច្ចជំនួសនាយករដ្ឋមន្ត្រីបច្ចុប្បន្ន ក្នុងករណីលោក Boris Johnson មិនអាចដឹកនាំប្រទេសបាន ដោយសារឆ្លងរោគ COVID-19។

ការិយាល័យនាយករដ្ឋមន្ត្រីអង់គ្លេស ថ្ងៃនេះបានប្រកាសថា រដ្ឋមន្ត្រីការបរទេសអង់គ្លេស Raab ដែលជាអ្នកធ្លាប់ធ្វើតេស្ត2លើក ប៉ុន្តែអវិជ្ជមានជាមួយនឹង COVID-19 ត្រូវបានជ្រើសតាំងជា “នាយករដ្ឋមន្ត្រីបម្រុង” នៃប្រទេសនេះ។ លោក Raab នឹងធ្វើកិច្ចការរបស់នាយករដ្ឋមន្ត្រីអង់គ្លេស ក្នុងករណីដែលលោក Johnson និងក្រុមមន្ត្រីកំពូលៗនៅក្នុងគណរដ្ឋមន្ត្រីរបស់លោក ឆ្លងវីរុស COVID-19។

នាយករដ្ឋមន្ត្រីអង់គ្លេស Johnson មកដល់ពេលនេះមិនទាន់បានធ្វើតេស្តរកមេរោគកូរ៉ូណានៅឡើយ ប៉ុន្តែការតែងតាំងនេះ បានធ្វើឱ្យមានរឿងចម្រូងចម្រាសនៅក្នុងចំណោមអ្នកនយោបាយអង់គ្លេស។

រដ្ឋមន្ត្រីម្នាក់សុំមិនបញ្ចេញឈ្មោះ បានឱ្យដឹងថា “ប្រសិនលោក Boris Johnson មិនអាចបំពេញកិច្ចការ មានមនុស្សជាច្រើនយល់ថា រដ្ឋមន្ត្រីនៃខុទ្ទកាល័យគណរដ្ឋមន្ត្រី (ដែលជាអ្នកគ្រប់គ្រងរាល់គោលនយោបាយនៃខុទ្ទកាល័យទាំងមូល) លោក Michael Gove គួរតែជាអ្នកត្រូវទទួលតួនាទីនេះ មិនមែនលោក Raab នោះទេ។

យោងតាមផែនការថ្មីនេះដែរ ក្នុងករណីជំនួយការរបស់លោក Johnson ដែលជាទីប្រឹក្សាជាន់ខ្ពស់ គឺលោក Dominic Cummings និងនាយកផ្នែកសារព័ត៌មាន Lee Cain បានឆ្លងរោគ COVID-19 ពួកគេនឹងត្រូវបានជំនួសដោយ Isaac Levido ដែលជានាយកផ្នែកយុទ្ធនាការឃោសនារកសំឡេងឆ្នោតរបស់គណបក្សអភិរក្សនិយម Conservative Party នៅក្នុងការបោះឆ្នោតជាតិ ឬ Paul Stephenson ដែលជានាយកផ្នែកសារព័ត៌មានសម្រាប់យុទ្ធនាការរកសំឡេងឆ្នោតក្នុងការបោះឆ្នោត Brexit (ការបោះឆ្នោតមួយដែលទាញប្រទេសអង់គ្លេសចេញពីសហភាពអឺរ៉ុប)។

COVID-19 បានបង្ហាញខ្លួននៅក្នុងប្រទេស និងដែនដីចំនួន188ក្នុងពិភពលោក បន្ទាប់ពីបានឆ្លងរាលដាលនៅក្នុងតំបន់ Wuhan ខេត្ត Hubei នៃប្រទេសចិនកាលពីខែធ្នូ ឆ្នាំ2019 បណ្ដាលឱ្យមនុស្សជាង300,000នាក់កើតរោគ និងជាង13,000នាក់បានស្លាប់ (នៅទូទាំងពិភពលោក)។

បច្ចុប្បន្ន អង់គ្លេសមានអ្នកឆ្លងរោគ COVID-19 ជាង5,000នាក់ ក្នុងនោះមាន240នាក់បានបាត់បង់ជីវិត៕

ប្រភព៖ សារព័ត៌មានបរទេស

March 22, 2020

កូនស្រីរបស់លោក Trump ទទួលបានលទ្ធផលនៃការធ្វើតេស្តរកមេរោគរួចហើយ ប៉ុន្តែត្រូវត្រួតពិនិត្យសុខភាពជាប្រចាំ

Ivanka ដែលជាកូនស្រី និងជាទីប្រឹក្សាជាន់ខ្ពស់របស់ប្រធានាធិបតីសហរដ្ឋអាមេរិក បានត្រឡប់ចូលមកធ្វើការនៅសេតវិមានវិញនៅថ្ងៃទី20មីនា បន្ទាប់ពីទទួលបានលទ្ធផលអវិជ្ជមានជាមួយនឹងវីរុស COVID-19។

លោកស្រី Ivanka បានបង្ខាំងខ្លួន ក៏ដូចជាធ្វើការនៅឯផ្ទះ ចាប់ពីថ្ងៃទី13មីនា ក្រោយពីមន្ត្រីអូស្ត្រាលីម្នាក់លោកស្រីធ្លាប់បានជួបផ្ទាល់ បានឆ្លងមេរោគកូរ៉ូណា COVID-19។ Ivanka មិនមានរោគសញ្ញាអ្វីនោះទេ ប៉ុន្តែបានធ្វើតេស្តរកមេរោគកាលពីសប្ដាហ៍មុន។

“មួយសប្ដាហ៍កន្លងទៅ ទីប្រឹក្សាជាន់ខ្ពស់របស់ប្រធានាធិបតីសហរដ្ឋអាមេរិក Ivanka Trump បានគោរពយ៉ាងខ្ជាប់ខ្ជួនចំពោះវិធានការចត្តាឡីស័ក (បង្ខាំងខ្លួន និងព្យាបាលនៅដាច់ដោយឡែកពីគេឯង) នៅឯផ្ទះរបស់លោកស្រី” នេះជាប្រសាសន៍របស់មន្ត្រីជាន់ខ្ពស់អាមេរិកាំងម្នាក់សុំមិនបញ្ចេញឈ្មោះ បាននិយាយប្រាប់សារព័ត៌មាន the Hill កាលពីថ្ងៃទី20 ខែមីនាកន្លងទៅ។

មន្ត្រីខាងលើបានបន្តថា “យោងតាមការណែនាំរបស់ក្រុមគ្រូពេទ្យ លោកស្រី (Ivanka) នឹងបន្តធ្វើការនៅឯសេតវិមាន ចាប់ពីថ្ងៃនេះ ដោយសារតែមិនមានរោគសញ្ញា ហើយលទ្ធផលនៃការធ្វើតេស្តជាច្រើនលើក ក៏សុទ្ធតែបង្ហាញថាមិនមានរោគអ្វីនោះដែរ”។

Ivanka ដែលជាកូនស្រី និងជាទីប្រឹក្សាជាន់ខ្ពស់របស់ប្រធានាធិបតីសហរដ្ឋអាមេរិកមន្ត្រីរូបនោះបញ្ជាក់ថា “ដូចទៅនឹងបុគ្គលិកគ្រប់រូបនៅសេតវិមាន លោកស្រីនឹងត្រូវពិនិត្យកម្ដៅខ្លួន និងសុខភាពជាបន្តទៀត ដើម្បីធានាសុវត្ថិភាពសុខភាពផ្ទាល់ខ្លួន គ្រួសារ និងអ្នកនៅក្នុងសេតវិមាន”។

លោកស្រី Ivanka គឺជាកូនស្រី និងជាទីប្រឹក្សាជាន់ខ្ពស់របស់ប្រធានាធិបតីសហរដ្ឋអាមេរិក Donald Trump

បុគ្គលិកម្នាក់ធ្វើការនៅក្នុងការិយាល័យរបស់អនុប្រធានាធិតី Mike Pence ដែលជាអ្នកដឹកនាំក្នុងការប្រយុទ្ធប្រឆាំងរោគ COVID-19 បានឆ្លងមេរោគនេះ។ ប៉ុន្តែ លេខាផ្នែកសារព័ត៌មានរបស់អនុប្រធានាធិបតីសហរដ្ឋអាមេរិកឱ្យដឹងថា លោក Trump និងលោក Pence សុទ្ធតែមិនបាននៅក្បែរអ្នកបានឆ្លង COVID-19 ខាងលើនោះទេ។

COVID-19 បានបង្ហាញវត្តមាននៅក្នុងប្រទេស និងដែនដីចំនួន185 នៅទូទាំងពិភពលោក បណ្ដាលឱ្យមនុស្ស 278.557នាក់បានកើតរោគ ក្នុងនោះមាន7.918 ស្ថិតក្នុងស្ថានភាពធ្ងន់ធ្ងរ និង11.554នាក់បានស្លាប់ ខណៈជិត93.000នាក់បានជាសះស្បើយ៕

ប្រភព៖ សារព័ត៌មានបរទេស

March 21, 2020

ទាហានអាមេរិកាំង 2,600នាក់នៅអឺរ៉ុប ត្រូវបានបង្ខាំងឱ្យនៅដាច់ដោយឡែក ខណៈមានករណីឆ្លង COVID-19 ជាច្រើនសិបនាក់

កងទ័ពសហរដ្ឋអាមេរិកប្រចាំនៅទ្វីបអឺរ៉ុប បានស្នើឱ្យទាហាន និងបុគ្គលិកស៊ីវិលរបស់ខ្លួនចំនួន 2,600នាក់ ធ្វើការបង្ខាំងខ្លួនឯង ព្រោះសង្ស័យថា បានឆ្លង COVID-19 ក្នុងចំណោមនោះ មាន35នាក់ បានឆ្លងមេរោគនេះរួចហើយ។

បញ្ជាការដ្ឋានកងទ័ពសហរដ្ឋអាមេរិកប្រចាំនៅអឺរ៉ុប(EUCOM) កាលពីម្សិលមិញបានប្រកាសឱ្យដឹងថា អ្នកទាំងនេះ ដែលកំពុងធ្វើចត្តាឡីស័ក(ដាក់ឱ្យនៅដាច់ដោយឡែក) គឺដើម្បីទប់ស្កាត់ការឆ្លងរាលដាលនៃវីរុស COVID-19។ EUCOM ក៏បានទទួលស្គាល់ថា ទាហានចំនួន35នាក់ ក្នុងចំណោម 2,600នាក់ បានឆ្លងវីរុសកូរ៉ូណា។

មេបញ្ជាការ EUCOM លោក Tod Wolters បានថ្លែងថា ទាហានចំនួន72នាក់របស់កងកម្លាំង EUCOM កំពុងអនុវត្តយ៉ាងម៉ឺងម៉ាត់នូវវិធាននានា ដើម្បីទប់ស្កាត់ការរីករាលដាលនៃមេរោគនេះ។

លោក Tod Wolters មេបញ្ជាការកងទ័ពសហរដ្ឋអាមេរិកប្រចាំតំបន់អឺរ៉ុប (EUCOM)

យោងតាមសេតវិមាន គិតមកដល់ទី20មីនា យ៉ាងហោចមានទាហាន និងបុគ្គលិកស៊ីវិលចំនួន 67នាក់ បានឆ្លងវីរុស COVID-19 កើនឡើងជា3ដង ធៀបនឹងចំនួនអ្នកឆ្លងរោគកាលពីដើមសប្ដាហ៍។ មនុស្ស2នាក់់ដែលកំពុងធ្វើការនៅក្នុងមន្ទីរបញ្ចកោណ(Pentagon) ក៏ត្រូវបានរកឃើញថា មានផ្ទុកវីរុសកូរ៉ូណានេះដែរ។ សរុបមក នៅទូទាំងសហរដ្ឋអាមេរិក មកដល់ពេលនេះ មានអ្នកឆ្លងរោគ COVID-19 ចំនួន19.774នាក់ ក្នុងនោះមាន 275នាក់បានបាត់បង់ជីវិត។

នៅទូទាំងពិភពលោក វីរុស COVID-19 បានសម្លាប់មនុស្សចំនួន 11.419នាក់ ចំណែកអ្នកបានឆ្លងរោគនេះ មានចំនួន 276.698នាក់ ក្នុងនោះមាន7.914នាក់ កំពុងស្ថិតក្នុងស្ថានភាពគ្រោះថ្នាក់ដល់ជីវិត។ រីឯអ្នកដែលបានជាពីជំងឺ មានចំនួន 91.954នាក់៕

ប្រភព៖ សារព័ត៌មានបរទេស

March 21, 2020

COVID-19! បុគ្គលិកសុខាភិបាលអង់គ្លេស ត្រូវយកថង់ផ្លាស្ទិកដាក់សំរាម មកប្រើជំនួសសម្ភារការពាររោគ

ក្រុមបុគ្គលិកពេទ្យដែលជាគិលានុបដ្ឋាយិកានៃមន្ទីរពេទ្យ Northwick Park បានបង្ហើបឱ្យដឹងថា ពួកគេកំពុងតែធ្វើការដោយហួសកម្លាំង ព្រោះតែមានអ្នកជំងឺច្រើនពេក ហើយពួកគេក៏ត្រូវប្រើថង់ផ្លាស្ទិកមកប្រើជំនួសសម្ភារវេជ្ជសាស្ត្រ ដើម្បីការពារខ្លួន។

នៅក្នុងសេចក្ដីប្រកាសមួយដែលផ្ញើទៅកាន់បុគ្គលិករបស់ខ្លួនកាលពីថ្ងៃទី20មីនា មន្ទីរពេទ្យ Northwick Park ដែលមានទីតាំងនៅក្នុងទីក្រុងឡុងដ៍ បានឱ្យដឹងថា មន្ទីរពេទ្យនេះអស់គ្រែពិសេសរលីងហើយ ក្រោយពីចំនួនអ្នកជំងឺដែលឆ្លងវីរុស COVID-19 បានកើនឡើងយ៉ាងឆាប់រហ័ស។ អ្នកជំងឺ6នាក់ បានស្លាប់នៅក្នុងមន្ទីរពេទ្យនេះ និងរាប់សិបនាក់ផ្សេងទៀតកំពុងត្រូវដកដង្ហើមដោយពឹងលើម៉ាស៊ីនជំនួយ។

បុគ្គលិកពេទ្យដែលបានបង្ហើបឱ្យដឹងអំពីបញ្ហាប្រឈមក្នុងមន្ទីរពេទ្យ Northwick Park ខាងលើ បានស្នើសុំម៉ាស់ វ៉ែនតា និងស្រោមដៃ ដោយសារបុគ្គលិកនៅក្នុងមន្ទីរពេទ្យនេះ ត្រូវបង្ខំចិត្តយកថង់ដាក់សំរាម មកគ្របក្បាល និងជើង ព្រោះខ្វះសម្ភារការពារខ្លួន។

បច្ចុប្បន្ន ប្រទេសអង់គ្លេសមានអ្នកផ្ទុកមេរោគ COVID-19 ជិត4,000នាក់ ក្នុងនោះមាន177នាក់បានស្លាប់។ ក្រុមអ្នកតាមដានយល់ថា តួលេខខាងលើនេះ អាចមិនទាន់បង្ហាញអំពីតួលេខពិតនៅឡើយ ព្រោះថា មានតែអ្នកជំងឺនៅក្នុងមន្ទីរពេទ្យប៉ុណ្ណោះដែលត្រូវបានស្រង់ស្ថិតិ។ មន្ត្រីប្រទេសអង់គ្លេសមានការព្រួយបារម្ភថា មនុស្សប្រមាណជា180,000នាក់ ប្រហែលជាបានឆ្លងមេរោគ COVID-19 ខណៈដែលក្រុមអ្នកជំនាញ បានសន្និដ្ឋានថា អ្នកស្លាប់អាចមានដល់ទៅ1,000នាក់។

កាលពីថ្ងៃទី20មីនា ប្រទេសអង់គ្លេសបានស្នើឱ្យអាជ្ញាធរ បិទហាងកាហ្វេ ហាងស្រា ក្លិប KTV ភោជនីយដ្ឋាន កន្លែងប្រគំតន្ត្រី និងមជ្ឈមណ្ឌលកម្សាន្តផងដែរ ដើម្បីទប់ស្កាត់ការឆ្លងរាលដាលកាន់តែខ្លាំងនៃវីរុស COVID-19នេះ៕

ប្រភព៖ សារព័ត៌មានបរទេស

March 21, 2020

មនុស្សជាង 11,000នាក់ បានបាត់បង់ជីវិតដោយសារ COVID-19 នៅទូទាំងពិភពលោក

តួលេខស្ដីអំពីអ្នកស្លាប់ដោយសារឆ្លងវីរុស COVID-19 បានកើនឡើងយ៉ាងឆាប់រហ័សនៅអឺរ៉ុប ធ្វើឱ្យចំនួនអ្នកស្លាប់នៅទូទាំងពិភពលោក កើនដល់ 11,357នាក់ នៅក្នុងចំណោមអ្នកជំងឺកូរ៉ូណាសរុប 274,413នាក់។

COVID-19 បានបង្ហាញខ្លួននៅក្នុងប្រទេស និងដែនដីចំនួន185 នៅទូទាំងសកលលោក។ អេស្ប៉ាញ និងអាល្លឺម៉ង់ បានលោតរំលងផុតប្រទេសអ៊ីរ៉ង់ ហើយបានក្លាយជាសម្បុកមេរោគធំបំផុតទី3 និងទី4 ក្នុងពិភពលោក បន្ទាប់ពីប្រទេសចិន និងអ៊ីតាលី។ ចំនួនអ្នកស្លាប់ដោយសារកូរ៉ូណានៅអឺរ៉ុប កើនលើសពី 5,000ករណី។

អ៊ីតាលី ដែលជាសម្បុកមេរោគធំបំផុតនៅអឺរ៉ុប និងធំលំដាប់ទី2នៅលើលោក បានរកឃើញអ្នកជំងឺ COVID-19 សរុប 47,021នាក់ ក្នុងនោះ 4,032នាក់បានស្លាប់។ អត្រានៃការស្លាប់គឺ 8.5% ខ្ពស់ជាងទ្វេដង ធៀងនឹងអត្រាមធ្យម 4.1% នៅទូទាំងពិភពលោក។ កត្តាចម្បងដែលនាំឱ្យមានអ្នកស្លាប់ច្រើនបែបនេះ គឺដោយសារប្រទេសនេះមានមនុស្សចាស់ច្រើនជាងគេនៅអឺរ៉ុប ហើយ99%នៃអ្នកស្លាប់ សុទ្ធតែមានរោគប្រចាំកាយស្រាប់។

អេស្ប៉ាញគឺជាសម្បុកមេរោគ COVID-19 ធំទី2ក្នុងលោក។ បច្ចុប្បន្ន ប្រទេសនេះ មានអ្នកឆ្លងរោគសរុប21,510ករណី និងស្លាប់1,093ករណី ដោយមានអ្នកឆ្លងរោគថ្មីចំនួន 3,433ករណី និងអ្នកស្លាប់ថ្មី 262ករណី។

អាល្លឺម៉ង់ រកឃើញអ្នកឆ្លងរោគថ្មី4,528ករណី និងអ្នកស្លាប់24ករណីបន្ថែមទៀត ធ្វើឱ្យចំនួនអ្នកផ្ទុកមេរោគសរុបកើនដល់19,848នាក់ និងស្លាប់68នាក់។ បើទោះបានក្លាយជាសម្បុកមេរោគធំបំផុតលំដាប់ទី3ក្នុងពិភពលោក ប៉ុន្តែ អត្រានៃការស្លាប់នៅប្រទេសនេះ មានត្រឹមតែ 0.3% ប៉ុណ្ណោះ។

អ៊ីរ៉ង់គឺជាសម្បុកមេរោគធំបំផុតលំដាប់ទី2នៅអាស៊ី បន្ទាប់ពីប្រទេសចិន (ចិនដីគោក) ដោយមានអ្នកឆ្លងរោគសរុប19,644ករណី និងអ្នកស្លាប់សរុប1,433ករណី។

ប្រទេសចិន បានប្រកាសថា មិនបានរកឃើញអ្នកផ្ទុកមេរោគកូរ៉ូណាក្នុងស្រុកនោះទេ ប៉ុន្តែ បានរកឃើញ41ករណី ដែលជាអ្នកជំងឺ “នាំចូល” ពីបរទេស។ ចំណែកកូរ៉េខាងត្បូង មិនទាន់បានបញ្ចេញរបាយការណ៍ថ្មីនៅឡើយ។

សហរដ្ឋអាមេរិកបានរកឃើញករណីឆ្លងរោគថ្មីចំនួន 5,087នាក់បន្ថែមទៀត នាំឱ្យចំនួនអ្នកបានឆ្លង COVID-19 សុរបឡើងដល់ 18,876ករណី ក្នុងនោះមាន 237នាក់បានបាត់បង់ជីវិត។ បុគ្គលិកម្នាក់ធ្វើការក្នុងការិយាល័យអនុប្រធានាធិបតី Mike Pence ដែលជាអ្នកចាត់ចែងយុទ្ធនាការប្រឆាំង COVID-19 ក៏បានឆ្លងវីរុសនេះដែរ។

នៅតំបន់អេស៊ីអាគ្នេយ៍វិញ ប្រទេសម៉ាឡេស៊ី នៅតែបន្តជាសម្បុកមេរោគធំជាងគេ ដោយមានអ្នកជំងឺ 1,030នាក់ ក្នុងនោះមាន3នាក់បានបាត់បង់ជីវិត។ ចំណែកឥណ្ឌូនេស៊ីវិញ គឺជាប្រទេសដែលមានអ្នកស្លាប់ដោយសារ COVID-19 ច្រើនជាងគេក្នុងតំបន់ ដោយមានអ្នកស្លាប់ចំនួន32ករណី ក្នុងចំណោមអ្នកជំងឺសរុប369នាក់។

សរុបមក ពិភពលោកទាំងមូល មានករណីស្លាប់ថ្មីចំនួន 1,326នាក់ ដែលភាគច្រើនកើតឡើងនៅអឺរ៉ុប ធ្វើឱ្យចំនួនអ្នកស្លាប់សរុបកើនដល់ 11,357នាក់។ អ្នកជំងឺចំនួន 90,942នាក់ (ស្មើនឹង33.1% ធៀបនឹងអ្នកជំងឺសរុប) បានជាសះស្បើយពីជំងឺ។ ប្រទេស Papua New Guinea និងប្រទេស Cabo Verde រួមនឹង Angola គឺជាប្រទេសដែលទើបតែបានរកឃើញករណីឆ្លង COVID-19 ដំបូងបង្អស់របស់ខ្លួន៕

ប្រភព៖ សារព័ត៌មានបរទេស

March 21, 2020

សមាជិកសភាអឺរ៉ុប ឆ្លងវីរុស COVID-19

តំណាងរាស្ត្រប្រទសប៉ូឡូញ1រូប កាលពីម្សិលមិញ បានប្រកាសថា បានឆ្លងមេរោគកូរ៉ូណា COVID-19 ដូច្នេះ គាត់បានក្លាយជាសមាជិកដំបូងគេនៃសភាអឺរ៉ុប ដែលបានឆ្លងរោគរាតត្បាតនេះ។

“អ្នករាល់គ្នា ខ្ញុំបានធ្វើតេស្តរកវីរុស COVID-19។ លទ្ធផលគឺវិជ្ជមាន។ ខ្ញុំកំពុងសម្រាកព្យាបាលនៅមន្ទីរពេទ្យ និងមានអារម្មណ៍ថាមិនអីនោះទេ។ ខ្ញុំនឹងជាពីជំងឺ ហើយយើងនឹងឆ្លងផុតគ្រោះអាសន្ននេះ។ យើងត្រូវតែរឹងមាំឡើង។ សូមអរគុណគ្រូពេទ្យ អ្នកថែទាំ និងអ្នកគាំទ្រ។ សូមចាំថា ត្រូវតែនៅក្នុងផ្ទះ។ សូមជូនពរអ្នករាល់គ្នា សុខភាពល្អ” តំណាងរាស្ត្រប៉ូឡូញដែលបានឆ្លង COVID-19 បង្ហោះសារបែបនេះនៅលើទំព័រ Twitter របស់ខ្លួន កាលពីថ្ងៃទី20មីនា។

លោក Adam Jarubas អាយុ45ឆ្នាំ គឺជាសមាជិកម្នាក់នៃក្រុមនយោបាយប្រជាជនអឺរ៉ុប(EPP) នៅក្នុងសភាអឺរ៉ុប(EP) និងជាអនុប្រធាននៃគណបក្សប្រជាជនប៉ូឡូញ PSL។ លោក Adam Jarubas បានចូលរួមក្នុងកិច្ចប្រជុំមួយនៅសភាអឺរ៉ុប កាលពីថ្ងៃទី 9-10មីនា ឆ្នាំ2020 ក្រោយមកក៏បានត្រឡប់មកកាន់ប្រទេសប៉ូឡូញ នៅថ្ងៃទី11មីនា។ នេះបើតាមសារព័ត៌មានAFP។

EP បានឱ្យដឹងថា នាយកដ្ឋានសុខាភិបាល បានទទួលដំណឹងនេះ និងបានទាក់ទងទៅកាន់លោក Adam Jarubas រួចរាល់ហើយដែរ។ លោក Jaume Duch អ្នកនាំពាក្យរបស់ EP បានថ្លែងថា “EP មិនទាន់ទទួលបានរបាយការណ៍ដែលទាក់ទិននឹងករណីឆ្លង COVID-19 របស់សមាជិកផ្សេងទៀតនៅឡើយ”។

ប្រទេសប៉ូឡូញ បានរកឃើញអ្នកផ្ទុក COVID-19 សរុប378ករណី កើន23នាក់បើធៀបនឹងម្សិលមិញ ក្នុងនោះមាន6នាក់បានស្លាប់ និង13នាក់បានជាសះស្បើយ។

វីរុសបង្កជំងឺរលាកសួតប្រភេទថ្មី COVID-19 បានចាប់ផ្ដើមឆ្លងរាលដាលនៅក្នុងទីក្រុង Wuhan ខេត្ត Hubei នៃប្រទេសចិន កាលពីខែធ្នូ ឆ្នាំ2019 ហើយបច្ចុប្បន្ន វាបានបង្ហាញវត្តមាននៅក្នុងប្រទេស និងដែនដីជាង170 នៅទូទាំងពិភពលោក ធ្វើឱ្យមនុស្សជិត 245,000នាក់បានកើតជំងឺ និងជាង10,000នាក់បានបាត់បង់ជីវិត៕

ប្រភព៖ សារព័ត៌មានបរទេស

March 21, 2020

សហរដ្ឋអាមេរិក ផ្អាកការផ្ដល់ទិដ្ឋាការធម្មតា នៅទូទាំងពិភពលោក

ក្រសួងការបរទេសសហរដ្ឋអាមេរិក ថ្ងៃនេះបានប្រកាសផ្អាកការផ្ដល់ទិដ្ឋាការធម្មតារបស់ខ្លួន នៅទូទាំងពិភពលោក ដោយសារ COVID-19 ប៉ុន្តែ ទិដ្ឋាការចាំបាច់បន្ទាន់នៅតែត្រូវបានពិចារណាដូចមុន។

“ដើម្បីទប់ទល់នឹងបញ្ហាធំនៅលើពិភពលោកដែលទាក់ទងនឹងរោគរាតត្បាត COVID-19 ក្រសួងការបរទេសសហរដ្ឋអាមេរិក ប្រកាសផ្អាកការផ្ដល់ទិដ្ឋាការធម្មតានៅគ្រប់ស្ថានទូត និងស្ថានកុងស៊ុល នៅទូទាំងពិភពលោក។ ទិដ្ឋាការប្រញាប់បន្ទាន់ នៅតែត្រូវបានទទួលយកមកពិចារណា បើសិនបណ្ដាស្ថានទូត និងស្ថានកុងស៊ុលសហរដ្ឋអាមេរិក មានបុគ្គលិកគ្រប់គ្រាន់” នេះបើតាមអនុសាសន៍ស្ដីអំពីការធ្វើដំណើរ ដែលត្រូវបានក្រសួងការបរទេសអាមេរិកាំងប្រកាសកាលពីថ្ងៃទី20មីនាកន្លងទៅ។

មុននេះ សហរដ្ឋអាមេរិក ក៏បានផ្អាកការផ្ដល់ទិដ្ឋាការនៅឯការិយាល័យតំណាងក្រសួងការបរទេសរបស់ខ្លួននៅក្រៅប្រទេសរួចទៅហើយដែរ។ ពលរដ្ឋបណ្ដាប្រទេសនៅអឺរ៉ុប និងប្រទេសមួយចំនួននៅអាស៊ី ដែលធ្លាប់មានសិទ្ធិធ្វើដំណើរទៅកាន់សហរដ្ឋអាមេរិកដោយមិនចាំបាច់មានទិដ្ឋាការ នឹងមិនរងផលប៉ះពាល់នោះទេ។ ប៉ុន្តែ សហរដ្ឋអាមេរិក បានចេញបទបញ្ជាថ្មី ហាមធ្វើដំណើរទៅ-មក ចំពោះពលរដ្ឋចំនួន28ប្រទេសនៅអឺរ៉ុប ដើម្បីទប់ស្កាត់ការឆ្លងរាលដាលនៃវីរុស COVID-19។

មកដល់ពេលនេះ សហរដ្ឋអាមេរិក បានរកឃើញអ្នកផ្ទុកមេរោគកូរ៉ូណាចំនួន 16.058នាក់ កើនជាង650នាក់ក្នុងរយៈពេល24ម៉ោងចុងក្រោយនេះ ក្នុងនោះមាន 219នាក់បានស្លាប់ និងជាង125នាក់បានជាសះស្បើយ៕

ប្រភព៖ សារព័ត៌មានបរទេស

March 20, 2020

ចំនួនអ្នកឆ្លង COVID-19 នៅម៉ាឡេស៊ី កើនលើស1,000នាក់ហើយ!

ប្រទេសម៉ាឡេស៊ី បានរកឃើញអ្នកផ្ទុកមេរោគកូរ៉ូណាថ្មី 130ករណីបន្ថែមទៀត នាំឱ្យចំនួនអ្នកឆ្លងរោគ COVID-19 ក្នុងប្រទេសនេះ កើនដល់ 1,030នាក់ គឺខ្ពស់ជាងគេបង្អស់នៅអាស៊ីអាគ្នេយ៍ ក្នុងនោះមានអ្នកស្លាប់ចំនួន3ករណី។

ក្នុងចំណោមករណីឆ្លងថ្មី130នាក់ មាន48នាក់ធ្លាប់បានចូលរួមក្នុងពិធីសាសនាមួយដែលមានសាសនិកអ៊ីស្លាមប្រមាណជា16,000នាក់់បានចូលរួម នៅឯវិហារ Sri Petaling ជាយក្រុង Kuala Lumpur កាលពីខែកុម្ភៈ។ ចំនួនករណីឆ្លង COVID-19 នៅអាស៊ីអាគ្នេយ៍ដែលជាប់ទាក់ទិននឹងពិធីសាសនាគឺមាន 670ករណី ដោយឡែកនៅម៉ាឡេស៊ីគឺ624ករណី។

អាជ្ញាធរម៉ាឡេស៊ីបានឱ្យដឹងថា អ្នកជំងឺទី3ដែលបានស្លាប់ដោយសារ COVID-19 នៅប្រទេសនេះ គឺជាបុរសវ័យ58ឆ្នាំម្នាក់ ធ្លាប់បានចូលរួមក្នុងពិធីសាសនាខាងលើនេះដែរ។ មនុស្សប្រហែល 4,000នាក់ ក្នុងចំណោមសាសនិក 14,500ដែលបានចូលរួមក្នុងពិធីសាសនាខាងលើ ក៏ត្រូវបានធ្វើតេស្តរកមេរោគ។

គិតត្រឹមយប់នេះ(20មីនា) នៅទូទាំងពិភពលោក មានប្រទេស និងដែនដីចំនួន182ហើយដែលបានរកឃើញករណីឆ្លង COVID-19។ នៅទូទាំងពិភពលោក មានមនុស្សចំនួន 256.802នាក់បានឆ្លងវីរុស COVID-19 ក្នុងនោះមាន 10.540នាក់បានបាត់បង់ជីវិត៕

ប្រភព៖ សារព័ត៌មានបរទេស

March 20, 2020

អ៊ីរ៉ង់៖ រៀងរាល់10នាទី COVID-19 សម្លាប់បានមនុស្សម្នាក់នៅប្រទេសនេះ

ក្រសួងសុខាភិបាលអ៊ីរ៉ង់ឱ្យដឹងថា រៀងរាល់10នាទី វីរុស COVID-19នេះ អាចសម្លាប់បានមនុស្សម្នាក់ ខណៈចំនួនអ្នកស្លាប់សរុបក្នុងប្រទេសនៅមជ្ឈិមបូពា៌មួយនេះឡើងដល់ 1.433នាក់។

ព័ត៌មានខាងលើនេះ ត្រូវបានអ្នកនាំពាក្យក្រសួងសុខាភិបាលអ៊ីរ៉ង់ លោក Kianush Jahanpur បង្ហោះនៅលើទំព័រ Twitter កាលពីថ្ងៃទី19មីនាកន្លងទៅ។ លោកបានឱ្យដឹងថា “មនុស្សប្រមាណជា 50នាក់ ត្រូវឆ្លងមេរោគ បន្ទាប់ពី1ម៉ោងកន្លងផុតទៅ”។

ប្រទេសអ៊ីរ៉ង់ កាលពីម្សិលមិញ បានប្រកាសថា បានរកឃើញអ្នកជំងឺកូរ៉ូណាថ្មីចំនួន 1,046នាក់បន្ថែមទៀត នាំឱ្យចំនួនអ្នកបានឆ្លងមេរោគសរុបឡើងដល់ 19.644នាក់ និង149នាក់បានស្លាប់ ដែលជាតួលេខខ្ពស់បំផុតមិនធ្លាប់មាន ធ្វើឱ្យចំនួនអ្នកស្លាប់សរុបមកដល់ពេលនេះ បានឡើងដល់ 1.433នាក់។

ប្រទេសអ៊ីរ៉ង់ បច្ចុប្បន្នគឺជាតំបន់ដែលត្រូវរងគ្រោះធ្ងន់ធ្ងរបំផុតដោយសារការរាតត្បាតនៃមេរោគ COVID-19 នៅមជ្ឈិមបូព៌ា ប៉ុន្តែ អនុរដ្ឋមន្ត្រីក្រសួងសុខាភិបាលអ៊ីរ៉ង់ Alireza Raisi បានថ្លែងថា តួលេខនៃអ្នកឆ្លងមេរោគថ្មីប្រចាំថ្ងៃ បានថយចុះខ្លះ។ លោកបញ្ជាក់ថា ការថយចុះនេះ គឺដោយសារពលរដ្ឋអ៊ីរ៉ង់ បានអនុវត្តតាមការណែនាំរបស់រដ្ឋាភិបាល។

ប្រធានាធិបតីអ៊ីរ៉ង់ លោក Hassan Rouhani កាលពីម្សិលមិញ (19មីនា) បានចេញបទបញ្ជាឱ្យបិទរាល់មជ្ឈមណ្ឌលពាណិជ្ជកម្ម និងផ្សារនានា លើកលែងតែហាងទំនិញចាំបាច់ ដូចឱសថស្ថាន និងហាងលក់គ្រឿងទេសជាដើម ក្នុងរយៈពេល15ថ្ងៃ ចាប់ពីថ្ងៃទី21មីនាតទៅ។

គិតត្រឹមយប់នេះ(20មីនា) COVID-19 បានរាលដាលដល់ប្រទេស និងដែនដីចំនួន182 នៅទូទាំងពិភពលោក និងបានធ្វើឱ្យមនុស្ស 255.943នាក់បានឆ្លងរោគ ជាង10.496នាក់បានស្លាប់ និងជាង89,910នាក់បានជាសះស្បើយ៕

ប្រភព៖ សារព័ត៌មានបរទេស

March 20, 2020

ឡានដឹកទំនិញជិត400គ្រឿងចេញពីកម្ពុជា ឆ្ពោះទៅវៀតណាម ដែលត្រូវជាប់នៅច្រកព្រំដែនត្រពាំងផ្លុង ត្រូវបានដោះស្រាយបណ្ដើរៗហើយ

រដ្ឋមន្រ្តីក្រសួងមហាផ្ទៃកម្ពុជា បានលើកឡើងថា ពាណិជ្ជកម្ម និងការដឹកជញ្ជូនទំនិញទៅមករវាងកម្ពុជា និងវៀតណាម តាមផ្លូវគោកទាំងអស់ នៅតែមានសកម្មភាពជាធម្មតា ដោយមានបញ្ហាតិចតួចប៉ុណ្ណោះ នៅច្រកត្រពាំងផ្លុងនៃខេត្តត្បូងឃ្មុំ។

កាលពីព្រឹកថ្ងៃទី20 ខែមីនា ក្រោយចេញពីកិច្ចប្រជុំស្តីពីការត្រៀមវិធានការបន្ទាន់ សម្រាប់ទប់ស្កាត់ការឆ្លងរាលដាលនៃវីរុស COVID-19 សម្ដេច ស ខេង បានថ្លែងប្រាប់អ្នកយកព័ត៌មានថា រថយន្តដឹកទំនិញជិត400គ្រឿង កំពុងកកស្ទះនៅច្រកព្រំដែនត្រពាំងផ្លុង។

បញ្ហាកកស្ទះរថយន្តនេះ កើតឡើងដោយសារភាគីខាងវៀតណាម បិទច្រកមិនឱ្យរថយន្តដឹកនំនិញពីកម្ពុជា ចូលទៅប្រទេសវៀតណាម ដោយសារតែភាគីខាងវៀតណាម បានចេញបទបញ្ជាឱ្យបង្ខាំងចំពោះពលរដ្ឋទាំងឡាយដែលធ្វើដំណើរចូលប្រទេសនេះ ដើម្បីរួមចំណែកទប់ស្កាត់ការឆ្លងរាលដាលនៃមេរោគកូរ៉ូណា។ ប្រទេសវៀតណាម តម្រូវឱ្យអ្នកដំណើរពីកម្ពុជា ត្រូវយល់ព្រមធ្វើតាមវិធានការបង្ខាំងឱ្យនៅដាច់ដោយឡែក និងតាមដានសុខភាពក្នុងរយៈពេល14ថ្ងៃ នៅព្រំដែន។

បញ្ហាខាងលើនេះហើយ បាននាំឱ្យឡានដឹកទំនិញរាប់រយគ្រឿងចេញពីកម្ពុជា ត្រូវស្ទះនៅព្រំដែនវៀតណាម។ ក៏ប៉ុន្តែ សម្ដេច ស ខេង បានមានប្រសាសន៍ថា បញ្ហាស្ទះឡានទំនិញនេះ ត្រូវបានដោះស្រាយជាបណ្ដើរៗហើយ។

ប្រទេសកម្ពុជា កាលពីថ្ងៃទី18មីនាកន្លងទៅ បានចេញបទបញ្ជាបិទច្រកព្រំដែនកម្ពុជាវៀតណាម រួមមានទាំងដែនគោក ដែនទឹក និងដែនអាកាស ដើម្បីទប់ស្កាត់ការឆ្លងរាលដាលនៃមេរោគ COVID-19។ ប៉ុន្តែ កាលពីថ្ងៃទី19 ខែមីនា ម្សិលមិញ កម្ពុជានិងវៀតណាម បានជួបពិភាក្សាគ្នា ហើយក៏បានសម្រេចថា ការដឹកជញ្ជូនទំនិញចូលប្រទេសទាំងពីរ នៅតែបន្តសកម្មភាពជាធម្មតា លើកលែងតែការធ្វើដំណើរចេញ-ចូលរបស់ពលរដ្ឋនៃប្រទេសទាំងពីរ។

កិច្ចប្រជុំទ្វេភាគីនេះ បានឯកភាពគ្នា សម្រេចអនុវត្តដំណោះស្រាយចំពោះមុខ ចំនួន 04ចំណុច រួមមានដូចខាងក្រោម៖

ទី1. អនុញ្ញាតឲ្យរថយន្ដដឹកទំនិញចូលដល់តំបន់ ស ហើយធ្វើការផ្លាស់ប្តូរអ្នកបើកបរ។

ទី2. អនុញ្ញាតឲ្យរថយន្ដដឹកទំនិញចូលដល់តំបន់ ស ហើយប្តូរក្បាលឡានសណ្ដោង។

ទី3. អនុញ្ញាតឲ្យរថយន្ដដឹកទំនិញចូលដល់តំបន់ ស ហើយធ្វើការផ្ទេរទំនិញ ឬលើកផ្ទេរកុងតឺន័រ ពីរថយន្ដភាគីម្ខាង ទៅដាក់លើរថយន្ដភាគីម្ខាងទៀត។

ទី4. អនុញ្ញាតឲ្យរថយន្ដដឹកទំនិញពីភាគីវៀតណាម ចូលដល់ផែស្ងួតណាមួយ នៅក្បែរព្រំដែន រួចផ្ទេរទំនិញចេញ និងអាចផ្ទុកទំនិញដែលត្រូវនាំចេញពីកម្ពុជាទៅវិញ ដោយតម្រូវឲ្យអ្នកបើកបរត្រូវស្លៀកពាក់សម្លៀកបំពាក់សុវត្ថិភាពការពារ Virus ដែលអនុញ្ញាតដោយចត្ដាឡីស័ក និងសូមឲ្យសមត្ថកិច្ចពាក់ព័ន្ធខាងកម្ពុជាជួយសហការធានាថា អ្នកបើកបរមិនបានទៅណាខុសពីតម្រុយផ្លូវ និងទៅជួបប្រាស្រ័យទាក់ទងជាមួយអ្នកផ្សេង៕

March 20, 2020

នៅតំបន់អាស៊ីអាគ្នេយ៍ តើប្រទេសណាខ្លះដែលមិនទាន់មានករណីឆ្លងវីរុស COVID-19?

ទិន្នន័យផ្លូវការដែលត្រូវបានប្រកាសនៅប្រទេសឡាវ មីយ៉ានម៉ា និងទីម័រខាងកើត បានឱ្យដឹងថា ប្រទេសទាំងនេះ មិនទាន់មានករណីឆ្លងវីរុសកូរ៉ូណា COVID-19 នៅឡើយ ប៉ុន្តែ ប្រទេសខ្លះក៏បានរកឃើញអ្នកដែលសង្ស័យថា អាចមានផ្ទុកវីរុសកូរ៉ូណា ខណៈប្រទេសខ្លះទៀត មានការសង្ស័យថា អ្នកដែលបានស្លាប់ គឺមានជាប់ទាក់ទិននឹងមេរោគរលាកសួតប្រភេទថ្មី COVID-19 ប៉ុន្តែ រដ្ឋាភិបាលបានបដិសេធ។

ខាងក្រោមនេះគឺជាបណ្ដាប្រទេសដែលមិនទាន់មានរបាយការណ៍ផ្លូវការ ស្ដីអំពីករណីឆ្លងវីរុសកូរ៉ូណា COVID-19៖

ប្រទេសឡាវ

ក្នុងចំណោមបណ្ដាប្រទេសស្ថិតក្នុងតំបន់អាស៊ីអាគ្នេយ៍ ដែលសរុបមាន11ប្រទេស (រួមមានប្រទេសកម្ពុជា ប្រុ៊យណេ ទីម័រខាងកើត ឥណ្ឌូនេស៊ី ឡាវ ម៉ាឡេស៊ី មីយ៉ានម៉ា ហ្វីលីពីន សិង្ហបុរី ថៃ និងវៀតណាម) គឺមានតែប្រទេសឡាវ និងប្រទេស2ផ្សេងទៀត មិនទាន់មានករណីឆ្លងវីរុសកូរ៉ូណា COVID-19។

នៅតំបន់អាស៊ីអាគ្នេយ៍ តើប្រទេសណាខ្លះមិនទាន់មានករណីឆ្លងវីរុស COVID-19? — មន្ត្រីនៃប្រទេសឡាវ ធ្លាប់បានឱ្យដឹងថា ប្រទេសនេះ អនុវត្តរាល់វិធានការដែលណែនាំដោយអង្គការសុខភាពពិភពលោក

មន្ត្រីនៃប្រទេសឡាវ ធ្លាប់បានឱ្យដឹងថា ប្រទេសនេះ អនុវត្តរាល់វិធានការដែលណែនាំដោយអង្គការសុខភាពពិភពលោក ក្នុងនោះវិធានការបង្ខាំងឱ្យនៅដាច់ដោយឡែក ត្រូវបានអាជ្ញាធរប្រទេសនេះ យកចិត្តទុកដាក់ខ្លាំង។

ទោះជាយ៉ាងនេះក្ដី ប្រទេសឡាវក៏មានករណីសង្ស័យថា មានផ្ទុកវីរុសកូរ៉ូណាផងដែរ។ កាលពីថ្ងៃទី18មីនា ទិន្នន័យផ្លូវការដែលត្រូវបានប្រកាសនៅប្រទេសឡាវ បានឱ្យដឹងថា ប្រទេសនេះមានមនុស្សចំនួន 65នាក់ ត្រូវបានសង្ស័យថា មានផ្ទុកវីរុស COVID-19 ក៏ប៉ុន្តែ មិនមានអ្នកណាម្នាក់វិជ្ជមានជាមួយនឹងមេរោគនេះនោះទេ បន្ទាប់ពីបានធ្វើតេស្តរកមេរោគ។

ប្រទេសមីយ៉ានម៉ា (ភូមា)

លោកស្រី អ៊ុងសានស៊ូជី (Aung San Suu Kyi) ទីប្រឹក្សារដ្ឋ ដែលជាអ្នកដឹកនាំប្រទេសដោយប្រយោល បានអះអាងកាលពីថ្ងៃទី16មីនាថា ប្រទេសនេះ មិនទាន់មានករណីឆ្លងមេរោគ COVID-19 នៅឡើយ។

ប្រទេសនេះ បានធ្វើតេស្តរកមេរោគ ទៅលើមនុស្សប្រមាណជាជាង 100នាក់ប៉ុណ្ណោះ ក្នុងចំណោមប្រជាជនសរុបជាង 53លាននាក់។ មនុស្សជាង100នេះ មិនមានផ្ទុក COVID-19 នោះទេ។ កាលពីថ្ងៃទី17មីនា អ្នកជំងឺចំនួន3នាក់ បានស្លាប់ ដែលត្រូវបានសង្ស័យថា ដោយសារឆ្លងមេរោគកូរ៉ូណា ប៉ុន្តែ ខាងអាជ្ញាធរថា មិនជាប់ពាក់ព័ន្ធនឹងជំងឺ COVID-19 នោះទេ។

មន្ត្រីរដ្ឋាភិបាល1រូបថ្លែងថា អវត្តមាននៃករណីឆ្លង COVID-19 នៅក្នុងការធ្វើតេស្តរកមេរោគ បញ្ជាក់ថា រោគរាតត្បាតកូរ៉ូណានេះ មិនទាន់មកដល់ប្រទេសនេះនៅឡើយ។

ប្រទេសទីម័រខាងកើត (Timor Leste)

រដ្ឋាភិបាលនៃប្រទេសទីម័រខាងកើត (East Timor) បានគាំទ្រចំពោះការបិទច្រកព្រំដែននៃខេត្ត East Nusa Tenggara’s របស់ឥណ្ឌូនេស៊ី ដែលជាប់ជាមួយប្រទេសខ្លួន ដើម្បីទប់ស្កាត់ការឆ្លងរាលដាលនៃមេរោគកូរ៉ូណា។

ទីម័រខាងកើត ក៏ជាប្រទេសមួយដែលមិនទាន់បានរកឃើញអ្នកផ្ទុក COVID-19 នៅឡើយដែរ។ ប៉ុន្តែ មន្ត្រីការទូតរបស់ទីម័រខាងកើត ប្រចាំនៅទីក្រុង Kupang ប្រទេសឥណ្ឌូនេស៊ី លោក Jesuino Dos Reis Matas C បាននិយាយថា រដ្ឋាភិបាលទីម័រកំពុងចាត់វិធានការលើបញ្ហាទប់ស្កាត់ការឆ្លងរោគនេះហើយ។

អគ្គលេខាធិការនៃអង្គការសហប្រជាជាតិ លោក Antonio Guterres បានព្រមានកាលពីថ្ងៃទី19មីនាថា “បើសិនជាយើងបណ្ដោយឱ្យវីរុស ឆ្លងរាលដាលដូចភ្លើងឆេះព្រៃ ពិសេសគឺនៅតំបន់ដែលងាយរងគ្រោះបំផុតក្នុងពិភពលោក វា (COVID-19) នឹងសម្លាប់មនុស្សរាប់លាននាក់”។

គិតមកដល់ពេលនេះ ពិភពលោក មានអ្នកឆ្លងជំងឺកូរ៉ូណា COVID-19 ចំនួន 245.913ករណី និងអ្នកស្លាប់ចំនួន 10.048ករណី រួមនឹងអ្នកដែលបានជាសះស្បើយចំនួន 88.465ករណី។ បណ្ដាប្រទេស និងដែនដីដែលទើបមានករណីឆ្លង COVID-19 ដំបូង គឺមានប្រទេស Chad, El Salvador, Fiji, Nicaragua, Niger និង Isle of Man៕

ប្រភព៖ សារព័ត៌មានបរទេស

March 20, 2020

Tag: សុខភាព