សុខភាព - La Reine Media

ក្រុមហ៊ុនអាកាសចរណ៍វៀតណាម ផ្អាកទាំងស្រុងរាល់ការហោះហើរទៅ-មកអន្តរជាតិ

បណ្ដាក្រុមហ៊ុនអាកាសចរណ៍ក្នុងស្រុកនៃប្រទេសវៀតណាម ចាប់ផ្ដើមផ្អាកទាំងស្រុងរាល់ជើងហោះហើរទៅ-មកអន្តរជាតិ ចាប់ពីថ្ងៃនេះ ដោយសារការរាតត្បាតរបស់វីរុស COVID-19។

ជើងហោះហើរអន្តរជាតិចុងក្រោយក្នុងដំណាក់កាលនេះ របស់ Vietnam Airlines នឹងចេញដំណើរពីប្រទេសអាល្លឺម៉ង់ មកកាន់វៀតណាម នាថ្ងៃទី25មីនានេះ ដោយដឹកអ្នកដំណើរ 170នាក់ និងចុះចតនៅព្រលានយន្តហោះ Van Don (Van Don International Airport or Ha Long Airport) ក្នុងខេត្ត Quang Ninh ក្នុងតំបន់ភាគខាងជើងប្រទេសវៀតណាម ដែលនៅមិនឆ្ងាយប៉ុន្មានពីទីក្រុងហាណូយ និងព្រំដែនជាប់ជាមួយប្រទេសចិន។

ក្រុមហ៊ុនអាកាសចរណ៍ Vietnam Airlines និង Jetstar Pacific នឹងបិទជើងហោះហើរអន្តរជាតិ ចាប់ពីថ្ងៃទី30មេសាខាងមុខ។ Bamboo Airways ផ្អាកជើងហោះហើរអន្តរជាតិតែមួយគត់ ដែលហោះទៅកាន់កូរ៉េខាងត្បូង និងបន្តការបិទជើងហោះហើរអន្តជាតិថ្មីទៀតផងដែរ។

Vietjet Air បានផ្អាកជើងហោះហើរអន្តរជាតិ ទៅកាន់តំបន់អាស៊ីអាគ្នេយ៍ ប្រទេសចិន តៃវ៉ាន់ កូរ៉េខាងត្បូង ឥណ្ឌា និងប្រទេសជប់ុន។ ក្រុមហ៊ុននេះ នៅតែលក់សំបុត្រដែលធ្វើដំណើរពីរដ្ឋធានីហាណូយ ទៅកាន់រាជធានីនៃប្រទេសជប៉ុន និងត្រឡប់មកវិញ នៅក្នុងថ្ងៃទី31មីនា 2មេសា និង4មេសា។

មិនមែនមានតែក្រុមហ៊ុនអាកាសចរណ៍ក្នុងស្រុកនោះទេ ប៉ុន្តែ ក្រុមហ៊ុនអាកាសចរណ៍បរទេសជាច្រើនក៏បានផ្អាកនិងលុបចោលជើងហោះហើរមកកាន់ប្រទេសវៀតណាមផងដែរ។

ប្រទេសវៀតណាម បច្ចុប្បន្នបានផ្អាកការផ្ដល់ទិដ្ឋាការចំពោះពលរដ្ឋបរទេសទាំងអស់ លើកលែងតែអ្នកដែលប្រើប្រាស់លិខិតឆ្លងដែនផ្លូវរដ្ឋ។

ដើម្បីទប់ស្គាត់ការឆ្លង COVID-19 ក្រុមហ៊ុនអាកាសចរណ៍របស់វៀតណាម ក៏បានបង្កើនការបាញ់ថ្នាំសម្លាប់មេរោគទៅលើយន្តហោះដែលបានដឹកអ្នកដំណើរស្ថិតក្នុងការសង្ស័យថា អាចមានផ្ទុកមេរោគកូរ៉ូណានេះផងដែរ។

គិតមកដល់ល្ងាចនេះ (25មីនា) ប្រទេសវៀតណាមបានរកឃើញអ្នកផ្ទុកវីរុស COVID-19 ចំនួន134ករណី ក្នុងនោះមាន17ករណីបានជាសះស្បើយ។ អ្នកជំងឺនៅប្រទេសនេះភាគច្រើនមានជាប់ទាក់ទងនឹងអ្នកមកពីអឺរ៉ុប និងសហរដ្ឋអាមេរិក ហើយក្រោយមកក៏ឆ្លងរាលដាលក្នុងស្រុក៕

ប្រភព៖ សារព័ត៌មានបរទេស

March 25, 2020

COVID-19! សហរដ្ឋអាមេរិកអាចក្លាយជាស្នូលនៃវិបត្តសុខភាពរបស់ពិភពលោកនាពេលខាងមុខ?

WHO បានព្រមានដល់សហរដ្ឋអាមេរិកថា ប្រទេសនេះអាចនឹងក្លាយជាសម្បុកមេរោគធំជាងគេបង្អស់នៅក្នុងពិភពលោក បន្ទាប់ពីតួលេខនៃអ្នកឆ្លងមេរោគ និងអ្នកស្លាប់បានកើនឡើងយ៉ាងគំហុកក្នុងរយៈពេលតែមួយថ្ងៃ នាំឱ្យតួលេខសរុបនៃអ្នកបានឆ្លងវីរុស COVID-19 ឡើងដល់54.823នាក់ និងអ្នកស្លាប់ឡើងដល់ជិត778នាក់។

“យើងកំពុងតែឃើញការកើនឡើងខ្ពស់នៃតួលេខអ្នកឆ្លងមេរោគនៅសហរដ្ឋអាមេរិក។ ដូច្នេះ សហរដ្ឋអាមេរិកមានសក្ដានុពលក្លាយជាស្នូលនៃសម្បុកមេរោគ” នេះជាប្រសាសន៍របស់លោកស្រី Margaret Harris អ្នកនាំពាក្យរបស់់អង្គការសុខភាពពិភពលោក(WHO) ថ្លែងកាលពីម្សិលមិញ បន្ទាប់ពីមានសំណួរដែលសួរថា “តើសហរដ្ឋអាមេរិកអាចក្លាយជាស្នូលនៃសម្បុកមេរោគរាតត្បាតនៅទូទាំងពិភពលោកដែរ ឬអត់?”។

លោកស្រី Margaret Harris អ្នកនាំពាក្យរបស់់អង្គការសុខភាពពិភពលោក(WHO)

យោងតាមលោកស្រី Margaret Harris ចំនួនករណីឆ្លងមេរោគនៅសហរដ្ឋអាមេរិក បានកើនឡើងច្រើនណាស់ហើយ។ ក្នុងអំឡុង24ម៉ោងកន្លង គេបានរកឃើញថា 85% នៃករណីឆ្លងមេរោគថ្មីសរុបក្នុងពិភពលោក គឺកើតឡើងនៅទ្វីបអឺរ៉ុប និងអាមេរិក ក្នុងនោះសហរដ្ឋអាមេរិក មានដល់ទៅ40%។

សហរដ្ឋអាមរិក បានរកឃើញករណីឆ្លងមេរោគ COVID-19ថ្មី ចំនួន11,074នាក់បន្ថែមទៀត ធ្វើឱ្យតួលេខនៃអ្នកឆ្លងមេរោគនេះឡើងដល់54,808នាក់។ ចំនួនអ្នកស្លាប់ក៏បានកើន222ករណីបន្ថែមទៀត ដែលជាការកើនឡើងខ្ពស់បំផុតក្នុងរយៈពេលត្រឹមតែ24ម៉ោងចាប់តាំងពីមេរោគកូរ៉ូណាបានបង្ហាញខ្លួននៅក្នុងប្រទេសនេះ បណ្ដាលឱ្យតួលេខអ្នកស្លាប់កើនដល់775នាក់។

តួលេខនៃអ្នកឆ្លងមេរោគកូរ៉ូណា អាចខ្ពស់ជាងតួលេខដែលបានប្រកាស។ យ៉ាងហោចណាស់មានរដ្ឋចំនួន18របស់សហរដ្ឋអាមេរិក (ដែលមានប្រជាជនជាង 176លាននាក់ ប្រហាក់ប្រហែលនឹង54%នៃចំនួនប្រជាជនសរុបរបស់សហរដ្ឋអាមេរិក) ត្រូវបាន ឬនឹងត្រូវបានស្នើឱ្យនៅតែក្នុងផ្ទះ ដើម្បីចូលរួមទប់ស្កាត់ការឆ្លងរាលដាលនៃវីរុសដែលបង្កជំងឺរលាកសួតប្រភេទថ្មីនេះ។

រដ្ឋ New York ទទួលរងផលប៉ះពាល់ច្រើនជាងគេ ដោយមានអ្នកឆ្លងមេរោគចំនួន 26,348នាក់ គឺកើន5,473ករណី និងអ្នកស្លាប់271នាក់។ “យើងមិនទាន់គ្រប់គ្រងល្បឿននៃការឆ្លងរាលដាលរបស់ COVID-19 នៅឡើយ។ COVID-19 កំពុងបង្កើនល្បឿន និងរីករាលដាលលឿនដូចរថភ្លើងល្បឿនលឿន” លោក Andrew Cuomo អភិបាលទីក្រុង New York បានព្រមានដូច្នេះ។

ប្រធានាធិបតីសហរដ្ឋអាមេរិក លោក Donald Trump ទទួលស្គាល់ថា ប្រភពផ្គត់ផ្គង់ធនធានសម្រាប់ការថែទាំសុខភាពសំខាន់ៗដើម្បីការពារបុគ្គលិកសុខាភិបាលជួរមុខ បានប្រែទៅជាលំបាក។ លោក Trump បានបង្ហោះសារនៅលើបណ្ដាញសង្គម Twitter កាលពីថ្ងៃទី24មីនាថា “ទីផ្សារម៉ាស់ និងម៉ាស៊ីនជំនួយការដកដង្ហើមក្នុងពិភពលោក ប្រែទៅជាលំបាកខ្លាំង។ យើងនឹងជួយឱ្យរដ្ឋនានាមានឧបករណ៍ទាំងនេះ ប៉ុន្តែ វាមិនងាយស្រួលនោះទេ”។

ក៏ប៉ុន្តែ ខណៈដែលអភិបាលរដ្ឋនានារបស់សហរដ្ឋអាមេរិក អំពាវនាវឱ្យប្រជាជននៅក្នុងផ្ទះ លោក Trump បែរជាថ្លែងថា លោកកំពុងពិចារណាអំពីយន្តការដើម្បីដំណើរការសេដ្ឋកិច្ចឡើងវិញនៅប៉ុន្មានសប្ដាហ៍ខាងមុខ និងដើម្បីបញ្ចៀសវិបត្តិសុខភាពនេះមិនឱ្យក្លាយជា “វិបត្តិហិរញ្ញាវត្ថុយូរអង្វែង”។ ប្រធានាធិបតីសហរដ្ឋអាមេរិក បន្តថា “ប្រជាជនរបស់យើង ចង់ត្រឡប់មកធ្វើការវិញ។ ពួកគេនឹងអនុវត្តវិធានការបង្ខាំងខ្លួន និងវិធានការផ្សេងៗទៀត។ មនុស្សចាស់នឹងត្រូវបានការពារ និងថែទាំ។ យើងអាចធ្វើកិច្ចការ2 ក្នុងពេលតែ1”។

ទីប្រឹក្សាជាន់ខ្ពស់មួយចំនួនរបស់លោក Trump បានហៅការរឹតបន្តឹងនាបច្ចុប្បន្នរបស់រដ្ឋាភិបាលថាជា “បញ្ហាប្រឈមរយៈពេល15ថ្ងៃ” ហើយបានសន្យាថានឹងពិចារណាឡើងវិញនូវតម្រូវការនៃការអនុវត្តវិធានការនានា ដើម្បីទប់ស្កាត់មិនឱ្យវីរុសឆ្លងរាលដាល។ ប៉ុន្តែ រដ្ឋមន្ត្រីការពារជាតិ លោក Mark Esper បានព្រមានថា វិបត្តិសុខភាពនៅសហរដ្ឋអាមេរិកអាចនឹងបន្តក្នុងរយៈពេលជាច្រើនខែទៅមុខទៀត ខណៈប្រធានអគ្គសេនាធិការចម្រុះនៃកងទ័ពសហរដ្ឋអាមេរិក លោក Mark Milley មានប្រសាសន៍ថា តាមការវាយតម្លៃពីបទពិសោធពីបណ្ដាប្រទេស វិបត្តសុខភាព COVID-19 អាចអូសបន្លាយពេលដល់ទៅ7ខែឯណោះ។

ប្រធានអគ្គសេនាធិការចម្រុះនៃកងទ័ពសហរដ្ឋអាមេរិក លោក Mark Milley

COVID-19 បានបង្ហាញខ្លួននៅក្នុងប្រទេស និងដែនដីចំនួន197 នៅក្នុងពិភពលោក ក្រោយពីបានឆ្លងរាលដាលនៅទីក្រុង Wuhan ខេត្ត Hubei ប្រទេសចិន កាលពីខែធ្នូ ឆ្នាំ2020 បណ្ដាលឱ្យមនុស្សប្រមាណជា422,785នាក់បានឆ្លងមេរោគ ក្នុងនោះមាន18,903នាក់បានបាត់បង់ជីវិត និង 13,095នាក់ទៀតកំពុងប្រឈមនឹងការស្លាប់ ខណៈ109,102នាក់បានជាសះស្បើយ។ បច្ចុប្បន្ន សហរដ្ឋអាមេរិកគឺជាសម្បុកមេរោគ COVID-19 ធំជាងគេលំដាប់ទី3ក្នុងពិភពលោក បន្ទាប់ពីប្រទេសចិន និងប្រទេសអ៊ីតាលី៕

ប្រភព៖ សារព័ត៌មានបរទេស

March 25, 2020

កម្ពុជាកំពុងសិក្សាពីការរឹបអូសម៉ាស់ និងបិទឱសថស្ថានចោលមិនឱ្យរកស៊ីមួយជីវិត បើឡើងថ្លៃម៉ាស់

នៅក្នុងជំនួបជាមួយនឹងក្រុមនិស្សិតស្ម័គ្រចិត្តនាព្រឹកថ្ងៃទី24 ខែមីនា ឆ្នាំ2020នេះ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសថា សម្តេច កំពុងសិក្សាលទ្ធភាពផ្លូវច្បាប់ ដើម្បីរឹបអូសម៉ាស់ដល់ផ្ទះប្រសិនបើអ្នកណានៅតែបន្តលក់ម៉ាស់ឡើងថ្លៃខ្លាំង។

នៅក្នុងនោះដែរ សម្តេចក៏បញ្ជាក់ផងដែរថា ប្រសិនបើនៅតែមិនស្តាប់គ្នា មិនត្រឹមតែរឹបអូសនោះទេ គឺនឹងបិទឱសថស្ថាននោះចោលតែម្តង ហើយឈប់ឱ្យរកស៊ីមួយជីវិតចំពោះអ្នកដែលនៅតែដំឡើងថ្លៃ។

ភ្លាមៗសម្តេចនាយករដ្ឋមន្ត្រីក៏ជំរុញឱ្យក្រសួងសុខាភិបាល និងភាគីពាក់ព័ន្ធពិនិត្យមើល និងប្រជាពលរដ្ឋចូលរួមរាយការណ៍ ដើម្បីធ្វើយ៉ាងណាកំណត់ចំនួនឱ្យជាក់លាក់ដើម្បីចាត់វិធានការណ៍៕

March 25, 2020

លទ្ធផលវះពិសោធន៍សាកសពអ្នកស្លាប់ដោយសារកូវីដ-19 រកឃើញថា មាននៅសល់វីរុសក្នុងរាងកាយ

ចិនបានបង្ហើបឱ្យដឹងពីលទ្ធផលនៃការវះពិសោធន៍សាកសពអ្នកស្លាប់ដោយសារជំងឺឆ្លងនៃវីរុសកូរ៉ូណាប្រភេទថ្មី ឬកូវីដ-19 ចំនួន 29នាក់ ដែលបានរកឃើញថា នៅក្នុងរាងកាយសាកសព មាននៅសល់មេរោគវីរុសកំណាចនេះនៅក្នុងសួត និងអវយវៈសំខាន់ៗជាច្រើនទៀតក្នុងរាងកាយត្រូវបានខូចខាតធ្ងន់ធ្ងរ។

កាលពីថ្ងៃអង្គារ(ទី24មីនា) អ្នកជំនាញការចិន បានបង្ហើបឱ្យដឹងថា ក្រុមអ្នកវិភាគ និងស្រាវជ្រាវចិន បានធ្វើការវះពិសោធន៍សាកសពអ្នកស្លាប់ដោយសារមេរោគកូរ៉ូណាប្រភេទថ្មី ឬកូវីដ-19 ចំនួន 29នាក់ និងរកឃើញថា នៅតែមាននៅសល់មេរោគវីរុសនៅក្នុងសួតរបស់អ្នកជំងឺ។

លោក វ៉ាង គុយ ឆៀង អ្នកជំនាញការផ្នែកជំងឺឆ្លងនៃមន្ទីរពេទ្យលេខ1 របស់មហាវិទ្យល័យប៉េកាំង បានថ្លែងព័ត៌មានថា លទ្ធផលវះពិសោធន៍សាកសព បានបង្ហាញឱ្យឃើញពីភាពខូចខាតយ៉ាងធ្ងន់ធ្ងរដែលបានកើតឡើងនៅលើប្រព័ន្ធប្រឆាំងជំងឺរបស់អ្នកជំងឺ ដែលនេះអាចជា “បច្ច័យសំខាន់បំផុត” ក្នុងការបាត់បង់ជីវិត។ ការឆ្លងមេរោគ មិនត្រឹមតែបង្កឱ្យកើតការប្រែប្រួលខាង Pathological change យ៉ាងធ្ងន់ធ្ងរនៅក្នុងសួតរបស់អ្នកជំងឺប៉ុណ្ណោះទេ តែនៅហុចផលប៉ះពាល់បណ្ដាលឱ្យកើតការបង្ហូរចេញនូវសារធាតុក្នុងបំពង់ខ្យល់ខ្នាតតូច(Small bronchial tubes) ដែលធ្វើឱ្យពិបាកខ្លាំងក្នុងការចាប់យកខ្យល់អុកស៊ីហ្ស៊ែន។

លោក វ៉ាង បានបន្ថែមទៀតថា នៅក្នុងការព្យាបាល ការបើកផ្លូវដង្ហើមរបស់អ្នកជំងឺ និងការបង្កើនប្រព័ន្ធប្រឆាំងជំងឺរបស់អ្នកជំងឺ គឺជារឿងសំខាន់ និងដោយសារតែប្រព័ន្ធប្រឆាំងជំងឺដែលខូចខាត ទើបធ្វើឱ្យអ្នកជំងឺឆ្លងមេរោគបាក់តេរី និងមេរោគផ្សិតបានកាន់តែងាយជាមុន ដែលគេប្រទះឃើញញឹកញាប់នៅលើអ្នកជំងឺដែលមានអាការធ្ងន់ធ្ងរ ហើយថែមទាំងមានការឆ្លងមេរោគផ្ទួនៗបែបនេះផង ច្រើនតែក្លាយជាបច្ច័យសំខាន់ដែលហុចផលឱ្យអាការអ្នកជំងឺធ្លាក់ចុះទ្រុឌទ្រោម ឬដល់ថ្នាក់បាត់បង់ជីវិត។

លោកបានសរុបថា “តាមរយៈលទ្ធផលនៃការវះពិសោធន៍នេះ បេះដូង ថ្លើម និងក្រលៀន នៅបានរកឃើញភាពខូចខាតក្នុងកម្រិតដែលខុសគ្នាទៀតផង”៕

ប្រភព៖ សារព័ត៌មានស៊ីនហួ

March 25, 2020

សម្តេចតេជោ ហ៊ុន សែន៖ កម្ពុជាគ្មានផែនការបិទភោជនីយដ្ឋាន ហាងកាហ្វេ ផ្សារ និងរោងចក្រទេ

កម្ពុជានឹងបិទខេធីវី និងបិទក្លិបកម្សាន្ត តែកម្ពុជាគ្មានផែនការបិទភោជនីយដ្ឋាន ហាងកាហ្វេ ផ្សារ និងរោងចក្រទេ។ នេះជាការលើកឡើងរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

សម្តេចមានប្រសាសន៍ថា អ្នកខ្លះរុញឱ្យយើងបិទទាំងអស់ តែបើបិទម្លឹងៗតើយើងរស់របៀបម៉េច? ហេតុនេះយើងមិនបិទនោះទេ តែយើងនឹងមានការប្រុងប្រយ័ត្នកុំឱ្យមានការប្រមូលផ្តុំមនុស្សច្រើន។ កន្លងមកមានថ្នាក់ក្រោមខ្លះធ្វើលើស ត្រង់គេឱ្យបិទត្រឹមខេធីវី និងក្លិបកម្សាន្ត តែគាត់ទៅបិទដល់ហាងកាហ្វេ កន្លែងលក់គុយទាវ និងកន្លែងផ្សេងៗទៀត។

សម្តេចតេជោ បានបញ្ជាក់ផងដែរថា ក្រៅពីបញ្ហាទាំងអស់នេះ កម្ពុជាមិនបិទកម្មវិធីចូលឆ្នាំនោះទេ គ្រាន់តែកុំឱ្យមានការប្រមូលផ្តុំ ដោយប្រជាជនអាចកម្សាន្តបាននៅតាមផ្ទះរៀងៗខ្លួនក្នុងឱកាសចូលឆ្នាំ។ ចំណែកឯការប្រគុំតន្ត្រីក៏នៅតែអនុញ្ញាតដែរ តែអនុញ្ញាតសម្រាប់ការផ្សាយនៅស្ថានីយដោយគ្មានអ្នកចូលមើល ហើយឱ្យអ្នកទស្សនានានាមើលតាមកញ្ចក់ទូរទស្សន៍វិញ៕

March 25, 2020

SuperComputer របស់អាមេរិក នឹងយកទៅប្រើការប្រយុទ្ធប្រឆាំងវីរុស COVID-19 លឿនដល់ 30លានពាន់លានដងក្នុង 1វិនាទី

កំពូលកុំព្យូទ័រ SuperComputer អាចដំណើរការនូវទិន្នន័យទំហំដ៏ធំមហិមា ហើយអាចបង្កើតនូវការសាកល្បងដ៏ស្មុគស្មាញនៃអត្តចរិតរបស់ម៉ូលេគុល បានល្បឿនជាងកុំព្យូទ័រដទៃទៀត។ ដូចនេះ គេសង្ឃឹមថា វានឹងជួយពន្លឿនល្បឿនក្នុងការប្រយុទ្ធនឹងកូវីដ-19។

ក្រៅពីមានការចូលរួមជាសមាជិក ពីសំណាក់អ្នកជំនាញជាច្រើនហើយនោះ Google Cloud, Amazon Web Services និង Microsoft ក៏ជាផ្នែកមួយនៃសហព័ន្ធនេះដែរ ហើយពួកគេនឹងផ្ដល់សិទ្ធិឱ្យប្រើប្រាស់សេវាកម្ម Cloud របស់ពួកគេ ដើម្បីពន្លឿនកិច្ចការស្រាវជ្រាវ។

កំពូលកុំព្យូទ័រ ដែលក្នុងនោះរួមមានឈ្មោះ supercomputers Summit ផងនោះ (កំពូលកុំព្យូទ័រកម្លាំងខ្លាំងជាងគេក្នុងលោក) គឺគ្រប់គ្រងដោយសមាជិកនៃសហព័ន្ធ COVID-19 High Performance Computing ដែលបានប្រកាសបង្កើតឡើងនាថ្ងៃនេះដោយការិយាល័យសេតវិមាន។

កំពូលកុំព្យូទ័រទាំង 16 គឺមានសមត្ថភាពនៃការគណនាក្នុងល្បឿន 330 Petaflop ដែលមានន័យថា ពួកវាអាចធ្វើការគណនាបាន 330លានពាន់លានដងក្នុង 1វិនាទី។ គ្រាន់តែ Summit តែឯង គឺមានសមត្ថភាពដល់ 200 Petaflop ឯណោះ កន្លងមកគឺមានដំណឹងថា កំពូលកុំព្យូទ័របានដើរតួនាទីយ៉ាងសំខាន់ក្នុងការប្រយុទ្ធប្រឆាំងនឹងកូវីដ-19។

ជាក់ស្ដែងការបញ្ជាក់ ពីវេបសាយរបស់ក្រុមហ៊ុន IBM បានឱ្យដឹងថា ក្រុមការងារអ្នកស្រាវជ្រាវមកពីសាកលវិទ្យាល័យ Tennessee និងមន្ទីរពិសោធន៍ Oak Ridge National បានប្រើប្រាស់ Summit ដើម្បីបង្កើតការសាកល្បងមើលពីម៉ូលេគុលចំនួន 8ពាន់ផ្សេងគ្នា។

ជាលទ្ធផលគេអាចស្វែងរកម៉ូលេគុលជាប់ជាបេក្ខភាពចំនួន 77 ម៉ូលេគុល ដែលអ្នកស្រាវជ្រាវដទៃទៀតអាចតេស្តក្នុងដំណាក់កាលសាកល្បងថា វាអាចព្យាបាលកូវីដ-19 បានឬយ៉ាងណា?៕

March 25, 2020

អ្នកវិទ្យាសាស្រ្ត កំពុងតេស្តឧបករណ៍សំឡេងក្អក បច្ចេកវិទ្យា AI បើជោគជ័យបន្តតេស្តរក COVID-19

FluSense ជាឧបករណ៍ស្រូបសំឡេង ដូចទៅនឹង microphone ប៉ុន្តែវាឆ្លាតវៃត្រង់ដែលប្រើប្រាស់បច្ចេកវិទ្យា AI បង្ហាញចេញជាភាគរយ ដើម្បីវិភាគថា តើមនុស្សម្នាក់នោះឈឺឬក៏អត់?។

សហស្ថាបនិក លោក Tauhidur Rahman ផលិតឧបករណ៍ដ៏មានសារៈសំខាន់នេះបានឱ្យដឹងថា បន្ទាប់ពីដាក់វាសាកល្បងនៅបន្ទប់រង់ចាំនៅក្នុងបរិវេណ Campus សាកលវិទ្យាល័យ ចំនួន 4កន្លែង (Campus Clinic)។ ជាលទ្ធផលប្រមូលបានទិន្នន័យបានគួរឱ្យកត់សម្គាល់ FluScense ចាប់គំរូបាន 21លានសំឡេងដែលគ្មានបញ្ហា និងវិភាគបាន 350 000 សង្ស័យថា កំពុងចេញរោគសញ្ញា (Thermographic cameras) ។

ឧបករណ៍នេះ ទើបនឹងបង្កើតបានជារូបរាងដោយអ្នកស្រាវជ្រាវ 1ក្រុមមកពីមហាវិទ្យាល័យវិទ្យសាស្រ្តកុំព្យូទ័រនៃសាកលវិទ្យាល័យ Massachusetts Amherst សហរដ្ឋអាមេរិក។ ដំណើរការ FluSense គឺតាមដានជាបឋមនូវចង្វាក់ដង្ហើមធម្មតា ឬមិនប្រក្រតីទៅតាមសីតុណ្ហភាពក្នុងខ្លួន ចំនួនដងនៃការដកដង្ហើម និងការក្អក ឬកណ្ដាស់ជាដើម។

ត្រឹមតែការសាកល្បង ស្ថាបនិកដដែល មានសុទិដ្ឋិនិយមថា ម៉ូដែលឧបករណ៍នេះនឹងអាចធ្វើការបានល្អចាប់បានទម្រង់ជាវីរុស COVID-19 ឬ SARS ផងដែរ ប្រសិនណាបើអភិវឌ្ឍវាបន្ថែមទៀត។ លើសពីនេះទៀត លោកក៏បានជួបវេជ្ជបណ្ឌិតនៅមន្ទីរពេទ្យ ដើម្បីឱ្យឧបករណ៍នេះបានតេស្តផ្ទាល់ស្វែងរកកម្រិតដែលអាចទុកចិត្តបាន៕

March 25, 2020

សម្តេចអង្វរនិស្សិតខ្មែរនៅអាមេរិកកុំអាលឱ្យមកផ្ទះ

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីព្រឹកថ្ងៃទី25 ខែមីនា ឆ្នាំ2020 នេះ បានប្រកាសថា មាននិស្សិតខ្មែរនៅសហរដ្ឋអាមេរិកប្រមាណជាង 10នាក់ គ្រោងនឹងត្រឡប់មកកម្ពុជាវិញ តែសម្តេចបញ្ជាក់ថា សូមអង្វរកុំឱ្យពួកគេត្រឡប់មកកម្ពុជាពេលនេះអី។

សម្តេចតេជោ ហ៊ុន សែន បានបញ្ជាក់ផងដែរថា សូមឱ្យនិស្សិតកម្ពុជាទាំងអស់ស៊ូលំបាកបន្តិច កុំរត់ចោលអាមេរិក ហើយរៀនតាម Online នៅទីនោះសិន ដើម្បីការពារកុំឱ្យឆ្លងមេរោគ កូរ៉ូណា មកបងប្អូននៅកម្ពុជា។ សម្តេចក៏បានជំរុញភ្លាមៗផងដែរថា ឱ្យមន្ត្រីរបស់កម្ពុជាទាក់ទងទៅស្ថានទូតដើម្បីធ្វើយ៉ាងណាដោះស្រាយបញ្ហានេះ ដើម្បីទប់ស្កាត់ការរីករាលដាលដល់ប្រជាជនកម្ពុជា៕

March 25, 2020

COVID-19៖ រកឃើញអ្នកឆ្លងមេរោគ 2ករណីទៀតហើយ សរុប 93ករណី

ថ្លែងក្នុងពិធីជួបសំណេះសំណាលជាមួយក្រុមគ្រូពេទ្យសម្តេចតេជោដើម្បីប្រយុទ្ធប្រឆាំងនឹងជំងឺកូវីដ-19 នាព្រឹកថ្ងៃទី25 ខែមីនា នេះ សម្តេចតេជោ ហ៊ុន សែន បានប្រកាសថា អ្នកជំងឺកូវីដនៅក្នុងប្រទេសកម្ពុជាយើង បានកើនឡើងដល់ 93នាក់ ហើយ គិតត្រឹមព្រឹកថ្ងៃទី25 មីនា នេះ ដោយសារតែរកឃើញជនជាតិបារាំង 2នាក់ ទៀតបានឆ្លងមេរោគនេះ នៅខេត្ត ព្រះសីហនុ តែយើងបានព្យាបាលឱ្យជាសះស្បើយបានចំនួន 6ករណី។

សម្តេចតេជោ ហ៊ុន សែន បញ្ជាក់ថា នៅព្រឹកមិញនេះ អភិបាលខេត្តព្រះសីហនុ បានរាយការណ៍មកថា មានជនជាតិបារាំង 2នាក់ទៀត ត្រូវបានរកឃើញថា កើតជំងឺកូវីដ-19 ដែលនាំឱ្យចំនួនអ្នកជំងឺកូវីដ-19 កើតមានសរុបនៅកម្ពុជាយើង កើនឡើងដល់ 93នាក់ ខណៈដែលតួលេខរបស់ក្រសួងសុខាភិបាល មានត្រឹម 91នាក់ គិតត្រឹមយប់ថ្ងៃទី24មីនា(ម្សិលមិញ)៕

March 25, 2020

ចំនួនអ្នកស្លាប់ដោយសារវីរុស COVID-19 នៅអ៊ីតាលី ខ្ពស់ជាងប្រទេសចិនទ្វេដង

ប្រទេសអ៊ីតាលី បានរកឃើញអ្នកផ្ទុកវីរុស COVID-19 ចំនួន69,176នាក់ ក្នុងនោះមានអ្នកស្លាប់ 6,820នាក់ ខណៈដែលប្រទេសចិន មានអ្នកស្លាប់ 3,277នាក់។

ចំនួនអ្នកស្លាប់ដោយសារមេរោគកូរ៉ូណា ក្នុងរយៈពេល24ម៉ោងកន្លងទៅនៅអ៊ីតាលី បានកើន743នាក់បន្ថែមទៀត នាំឱ្យតួលេខអ្នកស្លាប់នៅប្រទេសនេះបានកើនដល់6,820នាក់ ខ្ពស់ជាងប្រទេសចិនដល់ទៅ2ដងឯណោះ។

ដោយសារតែការធ្វើតេស្តរកមេរោគនៅប្រទេសអ៊ីតាលី ត្រូវបានធ្វើឡើងចំពោះតែករណីមានរោគសញ្ញាធ្ងន់ លោក Angelo Borrelli ប្រធាននាយកដ្ឋានការពារប្រជាជនស៊ីវិលអ៊ីតាលី កាលពីម្សិលមិញបានឱ្យដឹងថា តួលេខពិតប្រាកដស្ដីអំពីអ្នកជំងឺ COVID-19 អាចខ្ពស់ជាង10ដង បើធៀបនឹងតួលេខដែលបានរាយការណ៍។

រដ្ឋាភិបាលអ៊ីតាលី កាលពីថ្ងៃទី23មីនា បានចេញបទបញ្ជាបិទរាល់អាជីវកម្មណាដែលត្រូវបានយល់ថាមិនចាំបាច់។ នាយករដ្ឋមន្ត្រី Giuseppe Conte ក៏បានបង្កើនកម្រិតនៃការពិន័យចំពោះអ្នកណាដែលចេញពីផ្ទះ ពី20 EUR (ជាង220ដុល្លារអាមេរិក) ឡើងដល់3,000 EUR (ជាង3,200ដុល្លារអាមេរិក)។

បទបញ្ជាទាំងឡាយក្នុងពេលបច្ចុប្បន្ន នៅប្រទេសអ៊ីតាលី នឹងអស់សុពលភាពនៅថ្ងៃទី3មេសាខាងមុខ។ យោងតាមអនុក្រឹត្យមួយដែលបានចេញកាលពីម្សិលមិញ រដ្ឋាភិបាលអាចនឹងពន្យារសុពលភាពនៃបទបញ្ជាខាងលើ រហូតដល់ថ្ងៃទី31កក្កដា។ ក៏ប៉ុន្តែ នាយករដ្ឋមន្ត្រី Conte បានច្រានចោលផែនការរក្សាសុពលភាពនៃបម្រាមគោចរនេះរហូតដល់ពេលនោះ (31កក្កដា)។

សូមបញ្ជាក់ថា បន្ទាប់ពីឆ្លងរាលដាលពីប្រទេសចិន កាលពីខែធ្នូ ឆ្នាំ2019 វីរុស COVID-19 បានបង្ហាញខ្លួននៅក្នុងប្រទេស និងដែនដីចំនួន197 នៅក្នុងពិភពលោក ហើយមកដល់ពេលនេះ អឺរ៉ុបបានក្លាយជាសម្បុកមេរោគដ៏ធំមួយរបស់ពិភពលលោកផងដែរ។ នៅទូទាំងពិភពលោក មានមនុស្ស 422,566នាក់បានឆ្លងមេរោគកូរ៉ូណា ក្នុងនោះមាន18,887នាក់បានបាត់បង់ជីវិត និង108,388នាក់បានជាសះស្បើយ៕

ប្រភព៖ សារព័ត៌មានបរទេស

March 25, 2020

មេបញ្ជាការកងទ័ពជើងគោកឧត្តមសេនីយ៍ឯក ហ៊ុន ម៉ាណែត ចេញសេចក្តីណែនាំចំនួន8ចំនុច ស្តីពីការបង្ការ ការពារ និងទប់ស្កាត់និងគ្រប់គ្រងជំងឺកូវីដ19

យោងតាមសភាពការណ៍ធ្ងន់ធ្ងរ នៃការរីករាលដាលយ៉ាងឆាប់រហ័ស របស់ជំងឺរាតត្បាតកូវីដ19
នៅទូទាំងពិភពលោក ក៏ដូចជាក្នុងតំបន់ ។ ស្ថិតក្នុងកាល:ទេស:នេះ ក្រោមការដឹកនាំរបស់ រាជរដ្ឋាភិបាល
និងការណែនាំរបស់ក្រសួងការពារជាតិ អគ្គបញ្ជាការ បញ្ជាការដ្ឋានកងទ័ពជើងគោក សូមធ្វើសេចក្តឹ
ណែនាំអំពីការចាត់វិធានការបន្ទាន់ ដើម្បីទប់ស្កាត់ ការរីករាលដាលនៃជំងឺរាតត្បាតផ្លូវដង្ហើម
ប្រភេទថ្មី (Covid-19) នៅព្រះរាជាណាចក្រកម្ពុជា ជូនដល់មេបញ្ជាការគ្រប់យោធភូមិភាគ កងពលធំ-តូច
កងឯកភាព និងស្ថាប័នចំណុះកងទ័ពជើងគោក ត្រវយកចិត្តទុកដាក់ដូចខាងក្រោម៖

1. ត្រប់ស្ថាប័នកងឯកភាព ត្រវធ្វើការអប់រំដល់យោធិនក្រោមឱវាទ ក្រុមគ្រួសារ និងប្រជាពលរដ្ឋ
ឱ្យបានយល់ដឹងជាក់លាក់ពីឥទ្ធិពល់នៃជំងឺរាតត្បាតផ្លូវដង្ហើមប្រភេទថ្មី (0219) និងត្រូវមានវិធាន
ការការពារ ទប់ស្កាត់តាមការណែនាំរបស់រាជរដ្ឋាភិបាល និងក្រសួងសុខាភិបាល នៃព្រះរាជាណាចក្រកម្ពុជា ។

2. គ្រប់ស្ថាប័នកងឯកភាពទាំងអស់ ត្រូវកាត់បន្ថយការជួបជុំ ឬប្រជុំគ្នាចាប់ពីចំនួន30នាក់ឡើងទៅ
លើកលែងក្នុងករណីចាំបាច់ត្រូវរក្សាតំលាតពីមនុស្សម្នាក់ទៅមនុស្សម្នាក់ក្នុងចម្ងាយ 1.5ម ទៅ2ម
យ៉ាងតិច ។

3. ជាប្រចាំ ត្រូវពង្រឹងស្មារតីដល់យោធិនជំនាញត្រប់ផ្នាក់ឱ្យមានភាពរឹងមាំ ម្ចាស់ការ ត្រៀមខ្លួន
ជាស្រេចចូលរូមប្រយុទ្ធប្រឆាំងនឹងផ្លូវដង្ហើមប្រភេទថ្មី (Covid-19) តាមបទបញ្ជារាជរដ្ឋាភីបាល
ក្រសួងការពារជាតិ អគ្គបញ្ជាការ និងកងទ័ពជើងគោក ។

4. គ្រប់ស្ថាប័នកងឯកភាពទាំងអស់ ចូលរួមអនុវត្តឱ្យបានម៉ឺងម៉ាត់ តាមការណែនាំរបស់
រាជរដ្ឋាភិបាល កុំឱ្យមានការភ័យខ្លាចហួសហេតុ ជំងឺវើសអើង យើងត្រូវរក្សាអនាម័យល្អ រស់នៅស្អាត
ផឹកស្អាត និងហូបស្អាត ។

5. ច្រកចេញចូលបន្ទាយស្នាក់នៅ កន្លែងធ្វើការ កន្លែងហូបចុក សាលា មជ្ឍមណ្ឌលហ្វឹកហ្វឹន
ត្រវចាត់តាំងការត្រួតពិនិត្យសុខភាព និងលាងសម្អាតដៃគ្រប់ពេល ។

6. កងឯកភាព សាលា និងមជ្ឍមណ្ឌលហ្វឹកហ្វឺនកងទ័ពជើងគោក មិនត្រូវអនុញ្ញាតឱ្យសិក្ខាកាម
ចេញក្រៅបរិវេណសាលា និងកងឯកភាពជាបណ្តោះអាសន្ន លើកលែងតែមានករណីពិសេសណាមួយ
ហើយពេលធូលមកវិញត្រូវមានការត្រួតពិនិត្យ សុខភាព ឱ្យបានរូសរាន់ ។

7. ត្រូវធូលរួមទប់ស្កាត់រាល់ការបំភិតបំភ័យគ្រប់រូបភាព តាមរយៈការបំផុសព័ត៌មានតាមបណ្តាញ
សង្គម នឹងប្រភពផ្សេងៗដែលបំផ្លើសការពិត ធ្វើឱ្យជះឥទ្ធិពលដល់សង្គម និងសតិអារម្មណ៍
ជួរកងទ័ព ។ ក្នុងករណីពិនិត្យឃើញមានយោធិនកើតរោគសញ្ញាសង្ស័យពាក់ព័ន្ធជំងឺផ្លូវដង្ហើម
ប្រភេទថ្មី (Covid-19) ត្រូវបញ្ជូនយោធិននោះទៅកាន់មន្ទីរពេទ្យ ឬទំនាក់ទំនងលេខទូរសព្ទ 115
ដើម្បីពិនិត្យ និងព្យាបាលជាបន្ទាន់ ។

8. នាយខុទ្ទកាល័យ មេបញ្ជាការគ្រប់យោធភូមិភាគ កងពលធំ-តូច កងឯកភាព និងស្ថាប័នចំណុះ
កងទ័ពជើងគោក ត្រូវអនុវត្តក្នុងស្មាវតីទទួលខុសត្រូវ ប្រកបដោយប្រសិទ្ធភាពខ្ពស់ ។

March 25, 2020

កម្ពុជា! អ្នកផ្ទុកវីរុស COVID-19 កើនឡើងដល់ជាង90នាក់ បន្ទាប់ពីបានរកឃើញ4ករណីបន្ថែមទៀត

ក្រសួងសុខាភិបាលកម្ពុជា បានប្រកាសឱ្យដឹងថា កម្ពុជាបានរកឃើញអ្នកផ្ទុកមេរោគកូរ៉ូណា COVID-19 ចំនួន4ករណីទៀត នាំឱ្យចំនួនអ្នកឆ្លងមេរោគកូរ៉ូណាសរុបឡើងដល់ជាង 90នាក់។

កម្ពុជាបានរកឃើញអ្នកឆ្លងវីរុស COVID-19 4ករណីបន្ថែមទៀត ដែលធ្វើឱ្យតួលេខឆ្លងសរុបនៅកម្ពុជាកើនឡើងដល់91ករណី។ នេះបើតាមការប្រកាសរបស់ក្រសួងសុខាភិបាល នៅថ្ងៃនេះ (24មីនា)។ អ្នកជំងឺថ្មីទាំងនេះ រួមមាន ជនជាតិអង់គ្លេស2នាក់ និងជនជាតិអាមេរិកាំង2នាក់។ ពួកគេគឺជាអ្នកដំណើរនៅលើនាវា Viking Cruise Journey នៅខេត្តកំពង់ចាម។

ទន្ទឹមនឹងនេះ ក្រសួងក៏ប្រកាសកម្ពុជា ក៏បានប្រកាសឱ្យដឹងផងដែរថា កម្ពុជាក៏មានករណីជាសះស្បើយចំនួន4នាក់បន្ថែមទៀតផងដែរ។

March 24, 2020

Tag: សុខភាព