សុខភាព - La Reine Media

វេជ្ជបណ្ឌិតនៅអេស្ប៉ាញ ត្រូវបង្ខំចិត្តជ្រើសរើស “អ្នកជំងឺណាគួរស្លាប់ និងអ្នកជំងឺណាគួររស់”

នៅក្នុងបន្ទប់សង្គ្រោះបន្ទាន់នៃមន្ទីរពេទ្យនៅទីក្រុង Madrid វេជ្ជបណ្ឌិត Bernabeu បានចុះហត្ថលេខាលើលិខិតបញ្ជាក់មរណភាពជូនលោកតាម្នាក់ ហើយបានងាកទៅជួយសង្គ្រោះអ្នកជំងឺម្នាក់ផ្សេងទៀតដែលកំពុងដង្ហក់ ដោយទុកឱ្យលោកតាម្នាក់នោះបាត់បង់ជីវិត ដោយគ្មានការជួយសង្គ្រោះ។

“នៅក្នុងស្ថានភាពផ្សេង លោកតានោះនឹងមានឱកាសទទួលបានការជួយសង្គ្រោះជីវិត។ ក៏ប៉ុន្តែ នៅទីនេះមានមនុស្សច្រើនហួសពេក ហើយអ្នកទាំងអស់សុទ្ធតែកំពុងដង្ហក់រកខ្យល់ដូចៗគ្នា” វេជ្ជបណ្ឌិត Daniel Bernabeu ធ្វើការនៅឯមន្ទីរពេទ្យ La Paz (ដែលជាមន្ទីរពេទ្យធំជាងគេមួយនៅក្នុងរាជធានី Madrid របស់ប្រទេសអេស្ប៉ាញ) បានថ្លែងដូច្នេះកាលពីម្សិលមិញ។

វេជ្ជបណ្ឌិត Bernabeu បានឱ្យដឹងថា បន្ទប់ពិសេសទាំងអស់នៅក្នុងមន្ទីរពេទ្យនេះសុទ្ធតែចង្អៀតណែន ហើយក្រុមគ្រូពេទ្យត្រូវបានស្នើឱ្យផ្ដល់អាទិភាពក្នុងការព្យាបាលអ្នកជំងឺដែលមានវ័យក្មេង ព្រោះថា អ្នកជំងឺចាស់ៗដែលបានឆ្លងវីរុសCOVID-19 សុទ្ធតែមានឱកាសជាសះស្បើយតិចតួចបំផុត។ អ្នកជំងឺជាច្រើនបានដាច់ខ្យល់ស្លាប់ខណៈកំពុងស្ថិតនៅក្នុងបន្ទប់រង់ចាំ មុនពេលត្រូវបានជួយសង្គ្រោះ ព្រោះថា ទាំងមន្ទីរពេទ្យ ទាំងបុគ្គលិកពេទ្យ សុទ្ធតែត្រូវធ្វើការលើសចំណុះដូចគ្នា។

នៅឯមន្ទីរពេទ្យ La Paz ដែលមានអគារធំៗចំនួន17អគារ ក្នុងបន្ទប់សង្គ្រោះបន្ទាន់កាលពីថ្ងៃទី24មីនា មានពេលខ្លះត្រូវទទួលអ្នកជំងឺរហូតដល់240នាក់ ដែលកំពុងរង់ចាំចូលសម្រាកព្យាបាល។ ក្រុមគ្រូពេទ្យនៅជួរមុខ មិនមានឈុតការពារការឆ្លងមេរោគគ្រប់គ្រាន់នោះទេ ដោយពួកគេខ្លះពាក់តែអាវធំពីក្រៅ និងពាក់ម៉ាស់តែប៉ុណ្ណោះ។ ក្រុមគ្រូពេទ្យទាំងនេះត្រូវបានស្នើឱ្យនៅឆ្ងាយពីអ្នកជំងឺប្រវែង1ម៉ែត្រ ប៉ុន្តែប្រការនេះគឺមិនអាចទៅរួចនោះទេ។ នេះក៏ជាកត្តាដែលនាំឱ្យបុគ្គលិកសុខាភិបាលប្រមាណជា4,000នាក់(ស្មើនឹង12% នៃអ្នកជំងឺសរុប) របស់អេស្ប៉ាញ បានឆ្លងវីរុសCOVID-19។

ប្រទេសអេស្ប៉ាញ បច្ចុប្បន្ន មានអ្នកជំងឺកូរ៉ូណា COVID-19 ជិត58,000នាក់ ក្នុងនោះមាន4,365នាក់បានបាត់បង់ជីវិត ពោលគឺខ្ពស់ជាងប្រទេសចិន និងទាបជាងប្រទេសអ៊ីតាលីមួយតែប៉ុណ្ណោះ។

គួររំឭកថា កាលពីថ្ងៃទី8មីនា នាយករដ្ឋមន្ត្រីអេស្ប៉ាញ លោក Sanchez បានលើកទឹកចិត្តឱ្យពលរដ្ឋអេស្ប៉ាញចូលរួមក្នុងព្រឹត្តការណ៍ដ៏ធំមួយដើម្បីអបអរថ្ងៃសិទ្ធិនារីអន្តរជាតិ ដោយមិនអើពើចំពោះបម្រាមគោចរនៅភាគខាងជើងប្រទេសនេះ។

ព្រឹត្តិការខាងលើនោះ មានមនុស្សប្រមាណជា120,000នាក់បានចូលរួម ក្នុងនោះមានរដ្ឋមន្ត្រីជាច្រើនរូប រួមនឹងលោក Sanchez និងលោកស្រី Begona Gomez ផងដែរ។ រាជរដ្ឋាភិបាលអេស្ប៉ាញពេលនោះគិតថា ស្ថានភាពអាសន្នរោគនៅពេលនោះអាចគ្រប់គ្រងបាននៅឡើយ។ ប៉ុន្តែ Begona Gomez ដែលជាភរិយារបស់នាយករដ្ឋមន្ត្រីអេស្ប៉ាញ ជាមួយនឹងរដ្ឋមន្ត្រីក្រសួងសមធម៌ Irene Montero និងឧបនាយករដ្ឋមន្ត្រី Carmen Calvo ក៏បានឆ្លងវីរុសCOVID-19.

លោកនាយករដ្ឋមន្ត្រី Sanchez កាលពីថ្ងៃទី15មីនា បានចេញបញ្ជាឱ្យបិទប្រទេសទាំងស្រុង និងចាប់ផ្ដើមចាត់វិធានការថ្មីៗ និងខ្លាំងក្លាជាបន្តបន្ទាប់។ ក៏ប៉ុន្តែ វាហាក់ដូចជាយឺតពេលបន្តិចទៅហើយ ខណៈដែលប្រទេសនេះកំពុងខ្វះខាត់ស្ទើរគ្រប់យ៉ាងក្នុងវិស័យសុខាភិបាល៕

ប្រភព៖ សារព័ត៌មានបរទេស

March 27, 2020

(ទស្សនារូបភាព)កម្មករនៅក្នុងទីក្រុងវូហាន អង្គុយហូបបាយថ្ងៃត្រង់ ឆ្ងាយពីគ្នា 2ម៉ែត្រ ក្រោយរោងចក្របើកដំណើរការឡើងវិញ

អាចនិយាយបានថា ជារូបភាពនៃក្ដីឯកោ ដែលកក់ក្ដៅក្នុងចិត្តសម្រាប់បរិយាកាសក្នុងអំឡុងពេលសម្រាកថ្ងៃត្រង់ នៅក្នុងរោងចក្រផលិតរថយន្ត តុងហ្វឹង ក្នុងទីក្រុងវូហាន មណ្ឌលហ៊ូពេយ មណ្ឌលកណ្ដាលនៃការឆ្លងរាលដាលរបស់មេរោគវីរុសកូវីដ-19 ព្រោះបណ្ដាបុគ្គលិកទាំងអស់បាននាំគ្នាឱនមុខយកចិត្តទុកដាក់លើការញ៉ាំអាហារថ្ងៃត្រង់របស់ខ្លួនឯង នៅលើកៅអីជ័រពណ៌ក្រហមដែលរៀបជាជួរមួយៗ រក្សាគម្លាតឆ្ងាយពីគ្នាប្រមាណជា 2ម៉ែត្រ ដើម្បីការពារការឆ្លងសាយភាយរបស់មេរោគវីរុសកូរ៉ូណាប្រភេទថ្មី ឬកូវីដ-19 ក្រោយពីស្ថានការណ៍រោគរាតត្បាតក្នុងប្រទេសចិនវិវឌ្ឍទៅក្នុងផ្លូវល្អប្រសើឡើងជាលំដាប់ ធ្វើឱ្យធុរកិច្ចជាច្រើនវិលត្រឡប់មកដំណើរការជាថ្មីឡើងវិញ។

បន្ទាប់ពីបានបញ្ចូលថាមពលពេញវិញហើយ ពួកគេក៏នាំគ្នាត្រឡប់ទៅប្រតិបត្តិការងារយ៉ាងសស្រោកសស្រាំបន្តទៀត…ទាំងអស់នេះ វិធានការនេះបានធ្វើឱ្យអ្នកលេងបណ្ដាញសង្គមនៅក្នុងប្រទេសចិន មានអារម្មណ៍កោតសរសើរ ចំពោះភាពមានវិន័យ និងនឹកអាណិតអ្នកប្រើកម្លាំងពលកម្មទាំងនោះជាខ្លាំង អ្នកខ្លះបានសម្ដែងការយល់ឃើញថា បើជួយរៀបចំតុឱ្យពួកគាត់ផង ប្រហែលជាល្អខ្លាំងណាស់…។

ប្រភព៖ សារព័ត៌មានបរទេស

March 27, 2020

Imperial College ព្យាករ៖ ទោះជាមានវិធានការតឹងរ៉ឹងប៉ុនណា ក៏ចំនួនអ្នកស្លាប់ដោយសារវីរុស Covid-19 អាចនឹងឡើងដល់ 1.8លាននាក់

Imperial College London ជាស្ថាប័នមួយក្នុងចំណោមស្ថាប័នវិភាគ ដែលបានទទួលការជឿជាក់លំដាប់ពិភពលោក បានចេញផ្សាយលទ្ធផលនៃការសិក្សាស្រាវជ្រាវ ដែលបានបង្ហាញនូវព័ត៌មានដ៏គួរឱ្យភ្ញាក់ផ្អើលមួយថា ចំនួនអ្នកស្លាប់ដែលបណ្ដាលមកពីការឆ្លងរាតត្បាតរបស់មេរោគកូរ៉ូណាប្រភេទថ្មី ឬកូវីដ-19 ទូទាំងពិភពលោក អាចនឹងកើនឡើងខ្ពស់ដល់ 1.8លាននាក់ក្នុងឆ្នាំនេះ បើទោះជារដ្ឋបាលនៃប្រទេសផ្សេងៗមានវិធានការយ៉ាងតឹងរ៉ឹង ដើម្បីបញ្ឈប់ការបាត់បង់ដែលកំពុងកើតឡើងនេះយ៉ាងណាក៏ដោយ។

ការងារវិភាគមួយនេះ បានយោងទៅលើព័ត៌មានមូលដ្ឋាននាពេលបច្ចុប្បន្ន ពាក់ព័ន្ធនឹងកម្រិតភាពធ្ងន់ធ្ងររបស់វីរុស ដោយបាននាំយកតួលេខរបស់ការឆ្លងមេរោគ និងការប៉ាន់ស្មានចំនួនអ្នកស្លាប់ មកប្រកបក្នុងការពិចារណា រួមជាមួយបច្ច័យខាងផ្នែកស្ថិតិ និងខាងសង្គមផងដែរ។

លទ្ធផលនៃការវិភាគ បានសិក្សាពីលទ្ធផលដែលនឹងកើតឡើងក្នុងករណីដែលមានការតបស្នងក្នុងកម្រិតដែលខុសប្លែកពីគ្នា ដោយក្នុងករណីដែលមិនបានមានការត្រួតពិនិត្យគ្រប់គ្រងអ្វីទាំងអស់ មនុស្សស្ទើរតែទាំងអស់នៅលើពិភពលោកនេះ ប្រហែលជានឹងបានឆ្លងមេរោគកូវីដ-19ទាំងអស់ និងធ្វើឱ្យមានអ្នកស្លាប់ប្រមាណជា 40លាននាក់(ក្នុងករណីដែលគ្មានចាត់វិធានការអ្វីទាំងអស់)។

ចំណែកក្នុងករណីដែលមានការដំណើរការ កំណត់វិធានការដើម្បីគ្រប់គ្រងការឆ្លងរាលដាលដែលតឹងរ៉ឹងម៉ឺងម៉ាត់តាំងពីដំបូងៗ នឹងធ្វើឱ្យអត្រាការស្លាប់របស់មនុស្ស ស្ថិតក្នុងចំនួន 0.2នាក់(ចំនួននេះ 5ដង បានស្មើនឹងមនុស្សម្នាក់) ក្នុងចំនួនមនុស្ស 100,000នាក់ ក្នុង 1សប្ដាហ៍ ដែលក្រោមការគណនានេះ នឹងធ្វើឱ្យមានអ្នកស្លាប់ទាំងអស់ចំនួន 1.86លាននាក់ និងឆ្លងមេរោគជិត 470លាននាក់ក្នុងឆ្នាំនេះ។

ខណៈដែល បើមានការដំណើរការវិធានការគ្រប់គ្រងតឹងរ៉ឹងម៉ឺងម៉ាត់ដូចគ្នា តែយឺតយ៉ាវ នឹងធ្វើឱ្យចំនួនអ្នកស្លាប់ កើនទៅជា 1.6នាក់(ជិត 2នាក់)ក្នុងចំនួនមនុស្ស 100,000នាក់ ក្នុង 1សប្ដាហ៍។ នោះមានន័យថា ចំនួនការបាត់បង់រួម នឹងហក់ឡើងខ្ពស់ទៅជាមានអ្នកស្លាប់ 10.45លាននាក់ និងមានអ្នកឆ្លងមេរោគទូទាំងពិភពលោក 2.4ពាន់លាននាក់ក្នុងឆ្នាំនេះ។

អ្នកវិភាគ បានបញ្ជាក់ថា យើងនឹងអាចរក្សាជីវិតរបស់មនុស្សរាប់សិបលាននាក់បាន បើសិនជារដ្ឋបាលនៃប្រទេសទាំងអស់ចាប់ផ្ដើមយ៉ាងឆាប់រហ័សក្នុងការបញ្ជាឱ្យប្រើវិធានការខាងផ្នែកសាធារណសុខាភិបាល ដែលរួមទាំងការត្រួតពិនិត្យ ដើម្បីស្វែងរកអ្នកឆ្លងមេរោគ បង្ខាំងបរិវេណ(មិនឱ្យដើរហើរ) និងការដំណើរការវិធានការរក្សាគម្លាតឆ្ងាយពីគ្នា យ៉ាងទូលំទូលាយនោះ៕

ប្រភព៖ សារព័ត៌មានបរទេស

March 27, 2020

មនុស្សជាងកន្លះលាននាក់បានឆ្លងវីរុសCOVID-19 នៅទូទាំងពិភពលោក

ចំនួនអ្នកឆ្លងមេរោគCOVID-19 បន្តកើនឡើងខ្លាំងនៅសហរដ្ឋអាមេរិក អ៊ីតាលី និងអេស្ប៉ាញ ដែលនេះនាំឱ្យចំនួនអ្នកឆ្លងមេរោគកូរ៉ូណាសរុបនៅទូទាំងពិភពលោក ឡើងដល់ជាង529,000នាក់។

COVID-19 បានបង្ហាញវត្តមាននៅក្នុងប្រទេស និងដែនដីជិត200នៅទូទាំងពិភពលោក ហើយសហរដ្ឋអាមេរិកបានលោតរំលោងប្រទេសចិន និងអ៊ីតាលី និងក្លាយជាសម្បុកមេរោគCOVID-19 ធំជាងគេបង្អស់ក្នុងពិភពលោក។

សហរដ្ឋអាមេរិកបានរកឃើញអ្នកផ្ទុកមេរោគCOVID-19 ចំនួន14,933នាក់បន្ថែមទៀត ក្នុងរយៈពេល24ម៉ោងកន្លងទៅ ធ្វើឱ្យតួលេខនៃករណីឆ្លងមេរោគនៅទូទាំងប្រទេសនេះកើនដល់83,144នាក់។ ប្រទេសនេះក៏មានអ្នកស្លាប់ថ្មីចំនួន174នាក់បន្ថែមទៀតផងដែរ នាំឱ្យតួលេខនៃអ្នកស្លាប់សរុបឡើងដល់1,201នាក់។

ប្រទេសអ៊ីតាលី ជាសម្បុកមេរោគCOVID-19 ធំបំផុតលំដាប់ទី3 នៅក្នុងពិភពលោក និងទី1នៅឯទ្វីបអឺរ៉ុប ដោយមានអ្នកស្លាប់ថ្មី712នាក់ថែមទៀត។ ជាសរុប ប្រទេសអ៊ីតាលីបានប្រកាសឱ្យដឹងថា ប្រទេសនេះមានអ្នកឆ្លង COVID-19 ចំនួន80,589នាក់ និងបាត់បង់ជីវិតចំនួន8,215នាក់។ អត្រានៃការស្លាប់គឺ10% ពោលគឺខ្ពស់ជាង2ដង បើធៀបនឹងមធ្យមភាគ(4,6%) នៅទូទាំងពិភពលោក។

ប្រទេសអេស្ប៉ាញ នៅតែជាសម្បុកមេរោគកូរ៉ូណាធំទី2នៅអឺរ៉ុប ដោយមានអ្នកឆ្លងវីរុស 57,786នាក់(កើន8,271នាក់បន្ថែមទៀត) និង4,365នាក់បានស្លាប់(កើន718នាក់)។

អាល្លឺម៉ង់ បានរកឃើញអ្នកផ្ទុកមេរោគកូរ៉ូណាថ្មីចំនួន6,615នាក់ និងស្លាប់ 61នាក់បន្ថែមទៀត ធ្វើឱ្យចំនួនអ្នកឆ្លងវីរុសសរុប43,938នាក់ និងស្លាប់សរុប267នាក់។

ប្រទេសអ៊ីរ៉ង់គឺជាសម្បុកមេរោគធំទី2ប្រចាំអាស៊ី បន្ទាប់ពីប្រទេសចិន (ចិនដីគោក) ដោយមានអ្នកឆ្លងមេរោគ29,406នាក់ និងអ្នកបានស្លាប់ មានចំនួន2,234នាក់។

ប្រទេសចិន និងកូរ៉េខាងត្បូងមិនទាន់ឱ្យដឹងអំពីតួលេខថ្មីនៅឡើយ។

នៅតំបន់អាស៊ីអាគ្នេយ៍ ប្រទេសម៉ាឡេស៊ី គឺជាសម្បុកមេរោគធំបំផុត ដោយមានអ្នកជំងឺកូរ៉ូណា 2,031នាក់ និងស្លាប់23នាក់។

ឥណ្ឌូនេស៊ី គឺជា “វាលពិឃាត” ធំជាងគេបង្អស់របស់វីរុសCOVID-19 នៅក្នុងតំបន់អាស៊ីអាគ្នេយ៍ ដោយមានអ្នកស្លាប់78នាក់ក្នុងចំណោមអ្នកជំងឺ893នាក់។ អត្រានៃការស្លាប់ដោយសារវីរុសនេះ គឺ8,7% ដែលស្ថិតក្នុងលំដាប់ខ្ពស់បំផុតក្នុងពិភពលោក។

ជាសរុប ពិភពលោកទាំងមូល បច្ចុប្បន្នមានអ្នកឆ្លងវីរុសCOVID-19 ចំនួន529,148នាក់ ក្នុងនោះមាន23,968នាក់បានស្លាប់។ អ្នកជំងឺចំនួន123,380នាក់(ស្មើនឹង23%នៃអ្នកឆ្លងមេរោគសរុប) បានជាសះស្បើយ៕

ប្រភព៖ AFP, Worldometer

March 27, 2020

COVID-19! សហរដ្ឋអាមេរិក បានក្លាយជា “សម្បុកមេរោគ” COVID-19 ធំជាងគេបំផុតក្នុងពិភពលោកហើយ!

គិតមកដល់ពេលនេះ សហរដ្ឋអាមេរិក មានអ្នកឆ្លងមេរោគកូរ៉ូណាCOVID-19 ជាង82,000ករណី ខ្ពស់ជាងប្រទេសចិន និងអ៊ីតាលី ហើយបានក្លាយជាសម្បុកមេរោគធំបំផុតនៅលើពិភពលោក។

សហរដ្ឋអាមេរិក បានរកឃើញអ្នកផ្ទុកមេរោគ COVID-19 ចំនួន14,933ករណីបន្ថែមទៀត ក្នុងរយៈពេល24ម៉ោងកន្លងទៅនេះ ធ្វើឱ្យចំនួនអ្នកបានឆ្លងមេរោគករូ៉ណាសរុបឡើងដល់83,144នាក់។ សហរដ្ឋអាមេរិកក៏មានអ្នកស្លាប់ថ្មីចំនួន174នាក់បន្ថែមទៀត នាំឱ្យតួលេខនៃចំនួនអ្នកស្លាប់សរុបក្នុងប្រទេសនេះ កើនដល់1,201ករណី។ នេះបើតាមស្ថិតិរបស់សាកលវិទ្យាល័យ Johns Hopkins។

យោងតាមតួលេខថ្មីដែលទើបត្រូវបានប្រកាស សហរដ្ឋអាមេរិក បានលោតរំលងផុតប្រទេសចិន និងប្រទេសអ៊ីតាលី ហើយបានក្លាយជាសម្បុកមេរោគCOVID-19 ធំជាងគេបង្អស់នៅលើពិភពលោក។ ប្រទេសចិនបច្ចុប្បន្ន មានអ្នកឆ្លងមេរោគកូរ៉ូណាជាង81,000នាក់ ក្នុងនោះមានជាង3,200នាក់បានស្លាប់ ខណៈប្រទេសអ៊ីតាលីមានអ្នកឆ្លងមេរោគជាង80,000នាក់ ក្នុងនោះមានជាង8,000នាក់បានបាត់បង់ជីវិត។

New York, Washington និង California គឺជារដ្ឋដែលរងផលប៉ះពាល់ធ្ងន់ធ្ងរជាងគេបំផុត ក្នុងពេលដែលតួលេខនៃអ្នកឆ្លងមេរោគCOVID-19 នៅក្នុងបណ្ដារដ្ឋ និងទីក្រុងផ្សេងៗទៀតក៏បាន និងកំពុងកើនឡើងយ៉ាងឆាប់រហ័ស។ Craig Smith នាយកផ្នែកវះកាត់ក្នុងមជ្ឈមណ្ឌលវេជ្ជសាស្ត្រ Irving នៃសាកលវិទ្យាល័យ Columbia ក្នុងទីក្រុង New York បានឱ្យដឹងថា អ្នកជំងឺដែលត្រូវការប្រើម៉ាស៊ីនជំនួយការដកដង្ហើមក្នុងមន្ទីរពេទ្យនេះ បានកើនឡើងជាងទ្វេដង ក្នុងរយៈពេល3ថ្ងៃកន្លេងមកនេះ។

នេះគឺជាស្ថានភាពដែលត្រូវបានព្យាករមុនរួចហើយនៅសហរដ្ឋអាមេរិក។ Jeremy Konyndyk ជាសមាជិកជាន់ខ្ពស់ម្នាក់មកពីមជ្ឈមណ្ឌលអភិវឌ្ឍសកលលោក បានបង្ហោះសារនៅលើ Twitter ថា ករណីឆ្លងទាំងឡាយដែលនៅពាសពេញសហរដ្ឋអាមេរិក ពិតជាគួរឱ្យព្រួយបារម្ភ ផ្ទុយពីប្រទេសចិន។

លោក Jeremy Konyndyk សរសេរថា “ប្រទេសចិន មានភ្លើងឆេះនៅខេត្ត Hubei ប៉ុន្តែបានពន្លត់ផ្កាភ្លើងនៅគ្រប់កន្លែងផ្សេងៗទៀត។ ពេលនេះ យើងកើតអគ្គិភ័យនៅទីក្រុង New York រួមទាំងដុំភ្លើងនៅស្ទើរគ្រប់កន្លែង ហើយទាំងនេះកំពុងបញ្ចេញផ្កាភ្លើង”។

ប្រធានាធិបតីសហរដ្ឋអាមេរិក លោក Donald Trump មុននេះបានឱ្យដឹងថា លោកនឹងពិភាក្សាជាមួយប្រធានាធិបតីចិន លោក Xi Jinping អំពី COVID-19 ប៉ុន្តែ លោកអះអាងថា រដ្ឋាភិបាលរបស់លោក មិនជឿទាំងស្រុងទៅលើទិន្នន័យទាំងអស់របស់ប្រទេសចិននោះទេ។

ការសិក្សាស្រាវជ្រាវមួយរបស់សាកលវិទ្យាល័យ Washington កាលពីថ្ងៃទី26មីនា បានព្រមានថា មនុស្សប្រមាណពី 38,000-162,000នាក់នៅសហរដ្ឋអាមេរិក អាចនឹងបាត់បង់ជីវិតក្នុងអំឡុង4ខែខាងមុខ ដោយសារតែបានឆ្លងមេរោគCOVID-19៕

ប្រភព៖ ABC, Hill

March 27, 2020

COVID-19! ក្រសួងសុខាភិបាលកម្ពុជា យប់នេះបានរកឃើញអ្នកផ្ទុកមេរោគកូរ៉ូណា2ករណីបន្ថែមទៀតហើយ

ក្រសួងសុខាភិបាលកម្ពុជា នៅមុននេះបានប្រកាសថា បានរកឃើញអ្នកផ្ទុកវីរុសCOVID-19 ចំនួន2ករណីបន្ថែមទៀត ដែលនេះធ្វើឱ្យចំនួនសរុបនៃអ្នកឆ្លងមេរោគកូរ៉ូណា COVID-19 ក្នុងប្រទេស កើនឡើងដល់98នាក់។

គិតមកដល់យប់នេះ(26មីនា) កម្ពុជាបានរកឃើញអ្នកឆ្លងមេរោគកូរ៉ូណាCOVID-19 សរុប 98ករណី ក្នុងនោះមាន10ករណីបានជាសះស្បើយ និង88ករណីទៀតកំពុងទទួលការព្យាបាល។

March 26, 2020

COVID-19! មនុស្ស4,089នាក់បានស្លាប់នៅអេស្ប៉ាញ ដោយសារវីរុសបង្កជំងឺរលាកសួតប្រភេទថ្មី

តួលេខនៃចំនួនអ្នកស្លាប់ដោយសារមេរោគCOVID-19 នៅប្រទេសអេស្ប៉ាញ បានកើនឡើងដល់4089ករណី បន្ទាប់ពីប្រទេសនេះបានកត់ត្រាចំនួនអ្នកស្លាប់ថ្មី 655ករណីបន្ថែមទៀត ក្នុងអំឡុង24ម៉ោងកន្លងមកនេះ។

ក្រសួងសុខាភិបាលប្រទេសអេស្ប៉ាញ ថ្ងៃនេះបានឱ្យដឹងថា បានរកឃើញករណីឆ្លងមេរោគថ្មីចំនួន6,673ករណីបន្ថែមទៀត នាំឱ្យអ្នកឆ្លងមេរោគសរុបក្នុងប្រទេសនេះឡើងដល់56,188នាក់។ ចំនួនអ្នកស្លាប់សរុបក៏កើនឡើងដល់4,089ករណី ដោយសារមានករណីស្លាប់ថ្មីចំនួន655នាក់បន្ថែមទៀត គឺកើន19% បើធៀបនឹងម្សិលមិញ។

ទីក្រុង Madrid ទទួលរងឥទ្ធិពលធ្ងន់ធ្ងរជាងគេ ដោយមានអ្នកឆ្លងមេរោគដល់ទៅ 17,166ករណី ជិតស្មើនឹង1/3នៃចំនួនសរុបទូទាំងប្រទេស។ ចំណែកអ្នកស្លាប់សរុបក្នុងទីក្រុង Madrid ក៏ច្រើនជាងគេផងដែរ ពោលគឺមានចំនួន 2,090ករណី ប្រហាក់ប្រហែលនឹង51% នៃករណីស្លាប់សរុបនៅទូទាំងប្រទេស។

បើទោះជាប្រទេសអេស្ប៉ាញបានអនុវត្តបទបញ្ជាបិទការធ្វើដំណើរទូទាំងប្រទេសចាប់ពីថ្ងៃទី14មីនា ហើយត្រូវសភាអនុម័តឱ្យពន្យារពេលបន្តសុពលភាពរហូតដល់ថ្ងៃទី11មេសាក៏ដោយ ក៏តួលេខនៃករណីឆ្លងមេរោគ និងស្លាប់ដោយសារ COVID-19 ក្នុងប្រទេសនេះ ក៏នៅតែកើនឡើងមិនឈប់ឈរ។ អេស្ប៉ាញ បច្ចុប្បន្នគឺជាសម្បុកមេរោគធំជាងគេបង្អស់លំដាប់ទី4ក្នុងពិភពលោក ប៉ុន្តែប្រទេសនេះបានក្លាយជា “វាលពិឃាត” របស់វីរុសCOVID-19 ធំទី2ក្នុងពិភពលោក បន្ទាប់ពីប្រទេសអ៊ីតាលី។

នាយករដ្ឋមន្ត្រី Pedro Sanchez ដែលភរិយារបស់លោកបានឆ្លងវីរុសCOVID-19 បានថ្លែងថា នេះគឺជាដំណាក់កាលលំបាកបំផុតរបស់ប្រទេសជាតិ រាប់ចាប់តាំងពីសង្គ្រាមស៊ីវិល ឆ្នាំ1936-1939៕

ប្រភព៖ សារព័ត៌មានបរទេស

March 26, 2020

COVID-19! មហាក្សត្រប្រទេសម៉ាឡេស៊ី និងមហេសី ត្រូវបង្ខាំងព្រះកាយ បន្ទាប់ពីបុគ្គលិក7នាក់របស់រាជវាំងបានឆ្លងមេរោគ

បន្ទាប់ពីអ្នកបម្រើ7នាក់ក្នុងរាជវាំង បានឆ្លងមេរោគCOVID-19 មហាក្សត្រនៃប្រទេសម៉ាឡេស៊ី រួមនឹងមហេសី របស់ទ្រង់ក៏បានចាប់ផ្ដើមបង្ខាំងព្រះកាយរយៈពេល2សប្ដាហ៍ផងដែរ។

ព្រះបរមរាជវាំង Istana Negara ថ្ងៃនេះ បានប្រកាសឱ្យដឹងថា បុគ្គលិក7នាក់ក្នុងរាជវាំងនេះ បានឆ្លងមេរោគCOVID-19 ពីប្រភពដែលគេមិនទាន់ដឹងនៅឡើយ។ បុគ្គលិករាជវាំងទាំង7នាក់នេះ កំពុងទទួលការព្យាបាលនៅក្នុងមន្ទីរពេទ្យ Kuala Lumpur ក្នុងស្ថានភាពសុខភាពធម្មតា។ ក្រសួងសុខាភិបាលម៉ាឡេស៊ីកំពុងតែស្រាវជ្រាវរកប្រភពចម្លងរបស់បុគ្គលិកទាំងនេះ។

ភ្លាមៗបន្ទាប់ពីទទួលបានដំណឹងថា បុគ្គលិករាជវាំងបានឆ្លងវីរុសCOVID-19 មហាក្សត្រ Abdullah Sultan Ahmad Shah និងមហេសីរបស់ទ្រង់ គឺព្រះនាង Tunku Azizah Aminah Maimunah Iskandaria ក៏បានធ្វើតេស្តរកមេរោគ និងទទួលបានលទ្ធផលអវិជ្ជមានជាមួយនឹងមេរោគនេះ។ “មហាក្សត្រ និងមហេសី កំពុងតែបង្ខាំងព្រះកាយដោយព្រះអង្គឯងរយៈពេល14ថ្ងៃ ចាប់ពីថ្ងៃទី25មីនា”។ នេះជាសេចក្ដីប្រកាសរបស់ព្រះបរមរាជវាំង។

អ្នកដែលបានប៉ះពាល់ផ្ទាល់ជាមួយនឹងបុគ្គលិក7នាក់ខាងលើ ត្រូវបាននាំទៅធ្វើតេស្តរួចហើយ និងកំពុងបង្ខាំងខ្លួននៅដោយឡែករយៈពេល14ថ្ងៃ។

កាលពីថ្ងៃទី24មីនាកន្លងទៅ នៅលើទំព័រ Instagram មហាក្សត្រី Tunku Azizah បានបង្ហោះរូបភាពនៃអាហារដែលទ្រង់បានធ្វើសម្រាប់បុគ្គលិកសុខាភិបាលដែលកំពុងប្រឆាំងនឹង COVID-19។ កាយវិការលើកទឹកចិត្តនេះ ត្រូវបានប្រជាជនម៉ាឡេស៊ីគាំទ្រ និងកោតសរសើរទ្រង់ជាខ្លាំង។

ប្រទេសម៉ាឡេស៊ី បច្ចុប្បន្ន មានអ្នកឆ្លងវីរុសCOVID-19 ចំនួន2,031នាក់ ក្នុងនោះមាន23នាក់បានបាត់បង់ជីវិត និង199នាក់បានជាសះស្បើយ ខណៈដែលនៅទូទាំងពិភពលោក មានអ្នកឆ្លងមេរោគកូរ៉ូណា COVID-19 សរុប 487,648នាក់ ក្នុងនោះមាន22,030នាក់បានស្លាប់ និង117,749បានជាសះស្បើយ៕

ប្រភព៖ សារព័ត៌មានបរទេស

March 26, 2020

COVID-19! សភាជាន់ខ្ពស់សហរដ្ឋអាមេរិក បានអនុម័តលើកញ្ចប់ថវិកាជំនួយ 2លានលានដុល្លារ សម្រាប់ដោះស្រាយបញ្ហាទាក់ទងនឹងវីរុសកូរ៉ូណា

សភាជាន់ខ្ពស់អាមេរិកាំង ទើបតែបានបោះឆ្នោតអនុម័តយល់ព្រមទៅលើសេចក្ដីព្រាងច្បាប់ដ៏ធំមួយ ដើម្បីជួយដល់ពលករ និងវិស័យឧស្សហកម្មទាំងឡាយដែលរងផលប៉ះពាល់ខ្លាំងពីវិបត្តិសុខភាពដែលបង្កឡើងដោយវីរុសCOVID-19។

ក្រោយពីការជជែកគ្នាយ៉ាងតឹងសរសៃក រៀងៗខ្លួន សភាជាន់ខ្ពស់សហរដ្ឋអាមេរិក ក៏បានបោះឆ្នោតអនុម័តលើសេចក្ដីព្រាងច្បាប់ស្ដីអំពីកញ្ចប់ថវិកាជំនួយ ដែលមានទំហំទឹកប្រាក់រហូតដល់ 2លានលានដុល្លារអាមេរិក(សារព័ត៌មាន Globalnews ថា 2.2លានលានដុល្លារ) ដោយមាន96សំឡេងយល់ព្រម និង0សំឡេងជំទាស់។ សេចក្ដីព្រាងច្បាប់នេះ នឹងត្រូវបានបញ្ជូនទៅកាន់សភាជាន់ទាបអាមេរិកាំង ដើម្បីពិនិត្យ និងអនុម័តនៅថ្ងៃស្អែក(27មីនា)។ ប្រធានាធិបតីសហរដ្ឋអាមេរិក លោក Donald Trump ថ្ងៃនេះបានអះអាងថា នឹងចុះហត្ថលេខាភ្លាម បន្ទាប់ពីសេចក្ដីព្រាងច្បាប់នេះ បានឆ្លងកាត់សភាជាន់ទាប និងបានមកដល់សេតវិមាន។

កញ្ចប់ថវិកាជំនួយដែលមានទំហំទឹកប្រាក់ 2លានលានដុល្លារនេះ នឺងក្លាយជាកញ្ចប់ថវិកាជំរុញសេដ្ឋកិច្ចជាតិដំបូងគេបង្អស់នៅសភាសហរដ្ឋអាមេរិក ដែលមានទំហំទឹកប្រាក់ធំជាងគេមិនធ្លាប់មានពីមុនមក។ ក្នុងនោះ រួមមាន500ពាន់លានដុល្លារសម្រាប់វិស័យឧស្សហកម្មដែលទទួលរងផលប៉ះពាល់ខ្លាំងវិបត្តិសុខភាពCOVID-19 និង250ពាន់លានដុល្លារសម្រាប់បែងចែកជូនពលរដ្ឋផ្ទាល់ ដោយក្នុង1គ្រួសារនឹងទទួលបានប្រាក់3,000ដុល្លារ ចំណែក350ពាន់លានដុល្លារទៀតសម្រាប់ផ្ដល់ជាប្រាក់កម្ចីដល់អាជីវកម្មខ្នាតតូច និង250ពាន់លានដុល្លារសម្រាប់ជួយដល់អ្នកអត់ការងារធ្វើ និង130ពាន់លានដុល្លារសម្រាប់ជួយដល់បណ្ដាមន្ទីរពេទ្យ និង150ពាន់លានដុល្លារទៀតសម្រាប់ជួយដល់អាជ្ញាធរមូលដ្ឋានដើម្បីពង្រឹងយុទ្ធនាការប្រឆាំងនឹង COVID-19។

កាលពីម្សិលមិញ ក្រោយរយៈពេល5ថ្ងៃដែលបានជជែកគ្នា ក្រុមមន្ត្រីកំពូលៗរបស់រដ្ឋាភិបាលសហរដ្ឋអាមេរិក និងតំណាងរាស្ត្រទាំង2បក្ស បានព្រមព្រៀងគ្នាទៅលើការបញ្ចេញកញ្ចប់ថវិកាជំនួយដ៏ធំមួយខាងលើនេះ។ ប្រធានសភាជាន់ទាបអាមេរិកាំង Nancy Pelosi បានឱ្យដឹងថា លោកស្រីសង្ឃឹមថា ការព្រមព្រៀងគ្នានេះនឹងត្រូវបានអនុម័តយល់ព្រមនៅថ្ងៃស្អែក(27មីនា)នេះ។ នេះគឺជាកិច្ចការចាំបាច់ដើម្បីកាត់បន្ថយទម្ងន់នៃវិបត្តិនាបច្ចុប្បន្ន។

មុននេះ សហរដ្ឋអាមេរិកក៏បានអនុម័តយល់ព្រមទៅលើការបញ្ចេញកញ្ចប់ថវិកាចំនួន2រួចមកហើយនៅក្នុងខែនេះ។ ទំហំសរុបនៃកញ្ចប់ថវិកាទាំង3នេះ ជិតស្មើនឹងពាក់កណ្ដាលនៃការចំណាយសរុបប្រចាំឆ្នាំរបស់រដ្ឋាភិបាលសហរដ្ឋអាមេរិក។ នេះបើតាមសារព័ត៌មាន Reuters។

កញ្ចប់ថវិកាទី3នេះនឹងបញ្ចូលទឹកប្រាក់ទំហំ “ខ្នាតយក្ស” ចូលទៅក្នុងសេដ្ឋកិច្ចជាតិ ក្នុងអំឡូងប្រទេសនេះ មានអ្នកឆ្លងមេរោគកូរ៉ូណាCOVID-19 ចំនួន68,489នាក់ ដែលក្នុងនោះមាន1,032នាក់បានបាត់បង់ជីវិត៕

ប្រភព៖ សារព័ត៌មានបរទេស

March 26, 2020

រៀនពិនិត្យមើលអាការពេលឆ្លងមេរោគកូវីដ-19 ដោយខ្លួនឯង

វិនាទីនេះ ប្រហែលជាគ្មាននរណាម្នាក់ចង់ឱ្យជំងឺដែលបណ្ដាលមកពីវីរុសមួយនេះកើតឡើងចំពោះខ្លួនឯងឡើយ និងអ្នកដែលធ្វើការនៅក្នុងតំបន់ប្រថុយប្រថាន ក៏រឹតតែមានសំណួរចំពោះខ្លួនឯងដែរថា “ថ្ងៃនេះ តិចលោខ្ញុំឆ្លងមេរោគកូវីដទៅ?!”។ ចំពោះបញ្ហានេះ គ្រូពេទ្យជំនាញចិនបានណែនាំពីវិធីពិនិត្យមើលអាការមេរោគវីរុសក្នុងរយៈដំបូងដោយខ្លួនឯង ដើម្បីឱ្យយើងទាំងអស់គ្នាបានធូរស្រាលកង្វល់ និងត្រៀមខ្លួនទប់ទល់យ៉ាងមានសតិស្មារតី។

ក្នុងការបង្ហាញអាការរបស់ជំងឺដែលបណ្ដាលមកពីមេរោគវីរុសកូវីដ-19 បែប 1ថ្ងៃ ទល់ 1ថ្ងៃរបស់មនុស្សម្នាក់ៗ មិនដូចគ្នាទេ តែមានទិដ្ឋភាពរួមដែលដូចគ្នា 3យ៉ាងគឺ រយៈដំបូង នឹងគ្រុនក្ដៅខ្លួនខ្លាំង មានហៀរសម្បោរ និងអំឡុងពេលចុងក្រោយ នឹងមានលក្ខណៈរបស់ការឆ្លងមេរោគនៅក្នុងប្រព័ន្ធដង្ហើម បណ្ដាលឱ្យក្អក ឬកណ្ដាស់ ដោយអាការនៃជំងឺកូវីដ-19 រយៈដំបូង ស្រដៀងគ្នានឹងជំងឺគ្រុនផ្ដាសាយធម្មតា និងគ្រុនផ្ដាសាយធំដែរ ដូច្នេះចាំបាច់ត្រូវតែពិនិត្យដោយវិធីការអះអាងលទ្ធផលពីបន្ទប់ប្រតិបត្តិការតែប៉ុណ្ណោះ ហើយយើងអាចសង្កេតមើលលក្ខណៈការប្រែប្រួលរបស់ជំងឺបែប 1ថ្ងៃ ទល់ 1ថ្ងៃបាន តាមរយៈស្ថិតិដែលមន្ទីរពេទ្យ Zhongnan របស់Wuhan University ដែលបានវិភាគរកឃើញ និងបោះពុម្ពផ្សាយនៅក្នុង American Medical Association ដូចតទៅ…៖

ថ្ងៃទី1
តាមរយៈការស្រាវជ្រាវលើក្រុមមនុស្សគំរូ 138នាក់ បានរកឃើញថា៖
-99% នៃអ្នកជំងឺ មានអាការគ្រុនក្ដៅខ្លួនខ្លាំង
-70% មានអាការនឿយល្វើយខ្លាំង
-59% មានអាការក្អកស្ងួត
-35% មានអាការឈឺចុករួយសាច់ដុំ
-31% ពិបាកដកដង្ហើម

ថ្ងៃទី5
តាមរយៈការសិក្សាស្រាវជ្រាវរបស់Wuhan University រកឃើញថា អ្នកជំងឺក្នុង 5ថ្ងៃដំបូង នឹងមានអាការពិបាកពិបាកដកដង្ហើម

ថ្ងៃទី7
តាមរយៈការសិក្សាស្រាវជ្រាវ បានរកឃើញថា អ្នកជំងឺនឹងមានអាការពិបាកដកដង្ហើមស៊ីពេល 12-13ថ្ងៃ(មេរោគចាប់ផ្ដើមវាយលុកសួត)

ថ្ងៃទី8
អ្នកជំងឺ នឹងមានអាការចូលឆ្ពោះទៅរកជំងឺខាងផ្លូវដង្ហើមទាន់ហន់(ARDS)ធ្វើឱ្យសួតទទួលបានអុកស៊ីហ្ស៊ែនមិនគ្រប់គ្រាន់

ថ្ងៃទី10
អ្នកជំងឺ នឹងបង្ហាញអាការរោគខាងផ្លូវដង្ហើមទាន់ហន់(ARDS) (មានការសិក្សាស្រាវជ្រាវថា អ្នកជំងឺដែលបង្ហាញអាការនេះនៅថ្ងៃទី10 នឹងមានឱកាសរស់ជីវិត ច្រើនជាងអ្នកដែលបង្ហាញអាការនេះនៅថ្ងៃទី12)

ថ្ងៃទី12
អ្នកខ្លះមានគ្រុនក្ដៅខ្លួនស៊ីពេលយូរដល់ទៅ 12ថ្ងៃ និងមានអាការក្អកដល់ទៅ 19ថ្ងៃ

ថ្ងៃទី22
អ្នកជំងឺបណ្ដាលមកពីឆ្លងមេរោគកូវីដ-19 ច្រើនតែជាសះស្បើយក្នុងរយៈពេល 19-22ថ្ងៃ ក្រោយពេលបង្ហាញអាការក្នុងថ្ងៃដំបូង(បើទទួលបានការព្យាបាល) ហើយគ្រូពេទ្យនឹងអនុញ្ញាតឱ្យចេញពីមន្ទីរពេទ្យបាន។

សរុបអាការកូវីដ-19 រយៈដំបូង មានលក្ខណៈយ៉ាងណា?

តាមរយៈការសិក្សាស្រាវជ្រាវរបស់មជ្ឈមណ្ឌលគ្រប់គ្រង និងការពារជំងឺរបស់ប្រទេសចិន បានរកឃើញថា មានអ្នកជំងឺដែលគ្មានបង្ហាញអាការមានចំនួន 1.2ភាគរយ និង 80.9ភាគរយ បង្ហាញអាការមិនធ្ងន់ធ្ងរ ហើយអាការកូវីដ-19 រយៈដំបូងមាន 5លក្ខណៈ ដូចជា គ្រុនក្ដៅខ្លួន នឿយល្វើយ ក្អក ឈឺចុករួយ ពិបាកដកដង្ហើម ដែលបើសិនជាគ្រប់ទាំង 5លក្ខណៈនេះហើយ ត្រូវតែទៅមន្ទីរពេទ្យជាបន្ទាន់៕

ប្រភព៖ សារព័ត៌មានបរទេស

March 26, 2020

COVID-19! ឥណ្ឌាដាក់ទណ្ឌកម្មអ្នករំលោភបទបញ្ជាបម្រាមគោចរ ដោយវាយនឹងដំបង

អាជ្ញាធរឥណ្ឌា ធ្វើការពិន័យយ៉ាងធ្ងន់ធ្ងរចំពោះអ្នកទាំងឡាយណាដែលបានរំលោភលើបទបញ្ជាបម្រាមគោចរ ខណៈដែលប្រជាជនប្រមាណជា1.3ពាន់លាននាក់ ត្រូវបានស្នើឱ្យនៅក្នុងផ្ទះ ដើម្បីទប់ទល់នឹងការឆ្លងរាលដាលវីរុសCOVID-19។

យោងតាមបទបញ្ជារបស់លោក Narendra Modi នាយករដ្ឋមន្ត្រីនៃប្រទេសឥណ្ឌា ប្រទេសដែលមានប្រជាជនប្រមាណជា1.3ពាន់លាននាក់នេះ នឹងត្រូវបានបិទការដើរហើរទាំងស្រុងក្នុងរយៈពេល21ថ្ងៃ ដើម្បីរារាំងពលរដ្ឋមិនឱ្យចេញក្រៅផ្ទះ។

នាយករដ្ឋមន្ត្រីឥណ្ឌា មានប្រសាសន៍ថា ការដាក់បម្រាមគោចរគឺជាវិធីតែមួយគត់ដែលអាចជួយទប់ស្កាត់ការឆ្លងCOVID-19បន្ថែមទៀត និងកាត់បន្ថយទំហំនៃការរីករាលដាលរបស់មេរោគនេះ។

សេវាកម្មចាំបាច់មួយចំនួនដូចជា អគ្គិសនី ទឹក ការថែទាំសុខភាព ពន្លត់អគ្គិភ័យ និងហាងលក់គ្រឿងទេសជាដើម ត្រូវបានអនុញ្ញាតឱ្យបន្តសកម្មភាព។ ក្រៅពីនេះ សុទ្ធតែត្រូវបានបិទ សូម្បីតែរថយន្តក្រុង និងរថភ្លើងក្រោមដីក៏ត្រូវបានផ្អាកដំណើរការទាំងស្រុង។

បម្រាមគោចរនៅប្រទេសឥណ្ឌា ត្រូវបានគេមើលឃើញថា មានទ្រង់ទ្រាយធំជាងប្រទេសចិនដែលមនុស្សប្រមាណជា750លាននាក់ប៉ុណ្ណោះ ត្រូវបានហាមមិនឱ្យធ្វើដំណើរ។

នៅប្រទេសឥណ្ឌា មានការព្រួយបារម្ភខ្លាំងចំពោះបទបញ្ជាបម្រាមគោចរនេះ។ មនុស្សជាច្រើនយល់ថា បទបញ្ជានេះអាចធ្វើឱ្យវីរុសCOVID-19 ឆ្លងរាលដាលដល់ជនបទ ខណៈដែលពលរដ្ឋជាច្រើនប្រញាប់ធ្វើដំណើរទៅស្រុកកំណើត ព្រោះខ្លាចជាប់នៅក្នុងទីក្រុង។

សមត្ថកិច្ចឥណ្ឌា កំពុងប្រើប្រាស់វិធានការពិន័យច្រើនរូបភាព ចំពោះអ្នកដែលបានរំលោភលើបទបញ្ជាបម្រាមគោចររបស់រដ្ឋាភិបាល ក្នុងនោះមានដូចជា ការពិន័យដោយការវាយនឹងដំបង ឬចាប់ឱ្យអង្គុយតាមកាយវិការពិបាកទ្រាំជាច្រើនរបៀប។ល។

ប្រទេសឥណ្ឌា គិតត្រឹមល្ងាចនេះ បានរកឃើញអ្នកឆ្លងមេរោគCOVID-19 តែ665នាក់ និងស្លាប់ចំនួន13នាក់ប៉ុណ្ណោះ ដែលតួលេខនេះ នៅទាបជាងប្រទេសចិន សហរដ្ឋអាមេរិក និងបណ្ដាប្រទេសនៅអឺរ៉ុបនៅឡើយ។ ក៏ប៉ុន្តែ កត្តាជីវភាពរស់នៅ អនាម័យនៅមានកម្រិត រួមនឹងប្រព័ន្ធសុខាភិបាលនៅខ្សោយ របស់ប្រទេសឥណ្ឌា អាចធ្វើឱ្យការឆ្លងរាលដាលនៃវីរុសCOVID-19 កើនឡើងខ្លាំង មិនអាចគ្រប់គ្រងបាន។

នាយករដ្ឋមន្ត្រី Modi បានប្រកាសចំណាយថវិកាចំនួន150ពាន់លាន rupee (ជិត2ពាន់លានដុល្លារអាមេរិក) ដើម្បីជួយដល់ការធ្វើតេស្តរកមេរោគ ការបន្ថែមគ្រែក្នុងមន្ទីរពេទ្យ ម៉ាស៊ីនជំនួយការដកដង្ហើម។ល។ លោក Modi ក៏បានបង្កើតក្រុមការងារពិសេសមួយដែលស្ថិតក្រោមការដឹកនាំរបស់រដ្ឋមន្ត្រីក្រសួងហិរញ្ញវត្ថុ ដើម្បីដោះស្រាយបញ្ហាសេដ្ឋកិច្ចដែលកើតឡើងដោយសារវិបត្តិសុខភាពនេះ៕

ប្រភព៖ Reuters, AFP, PTI,indiatimes

March 26, 2020

អភិបាលក្រុងនៅអ៊ីតាលី សារភាព៖ មន្ទីរពេទ្យជួយអ្នកជំងឺឆ្លងវីរុសកូវីដ-19គ្រប់គ្នាលែងរួចហើយ មានច្រើនណាស់ត្រូវស្លាប់នៅផ្ទះ…

ដោយសារតែមន្ទីរពេទ្យទាំងអស់ គ្មានទីកន្លែង និងធនធានមនុស្សច្រើនគ្រប់គ្រាន់សម្រាប់ជួយសង្គ្រោះឱ្យបានគ្រប់គ្នា នោះវាមានន័យថា នឹងមានអ្នកឆ្លងមេរោគវីរុសកូរ៉ូណាប្រភេទថ្មី ឬកូវីដ-19 ចំនួនដ៏ច្រើនត្រូវដេកស្លាប់នៅក្នុងផ្ទះ…នេះបើយោងតាមពាក្យដាស់តឿនរបស់លោក ចចជិអូ ហ្គូរី អភិបាលទីក្រុងប៊ែហ្គាម៉ូ ក្នុងមណ្ឌលឡំបាឌី ភាគខាងជើងនៃប្រទេសអ៊ីតាលី ជាតំបន់ដែលទទួលរងផលប៉ះពាល់ពីវីរុសមរណៈនេះខ្លាំងក្លាជាងគេបំផុត។

លោក ហ្គូរី បានផ្ដល់បទសម្ភាសជាមួយសារព័ត៌មានក្នុងតំបន់មួយកាលពីថ្ងៃពុធ(ទី25មីនា)ម្សិលមិញថា ប្រព័ន្ធសាធារណសុខាភិបាលទាំងអស់របស់ទីក្រុង បានធ្លាក់ក្នុងសភាវណែនណាន់តាន់តាប់ ដោយសារតែការឆ្លងរាតត្បាតនៃវីរុសកូវីដ-19 ហើយគ្រប់គ្នា “ធ្វើការយ៉ាងវីវក់ តាំងពីម៉ោង 8.00 រហូតមកដល់ពេលដែលយើងត្រូវប្រះខ្លួនដេកដោយក្ដីនឿយហត់នៅពេលព្រលប់”។

“មនុស្សចំនួនដ៏ច្រើន បាននាំគ្នាមកមន្ទីរពេទ្យយឺតពេលជ្រុលពេក និងមកដល់ក្នុងស្ថានភាពធ្ងន់ធ្ងរបាត់ទៅហើយ ចាំបាច់ត្រូតែដាក់បំពង់ដកដង្ហើមនៅក្នុងបន្ទប់សង្គ្រោះបន្ទាន់” លោក ហ្គូរីបន្តប្រាប់ ព្រមទាំងបញ្ជាក់ថា កាលពីសប្ដាហ៍មុន មានអ្នកស្លាប់នៅក្នុងប៊ែហ្គាម៉ូ ក្នុងមណ្ឌលតែមួយ ក៏ច្រើនជាង 300នាក់បាត់ទៅហើយ។

លោកបានថ្លែងថា “មានចំនួនច្រើនទៀតណាស់ ដែលមកមិនដល់មន្ទីរពេទ្យ បានស្លាប់នៅតាមផ្លូវ និងនៅក្នុងផ្ទះ សឹងតែទាំងអស់ ជាមនុស្សចាស់ជរាដែលមានអាការរលាកសួត និងមានករណីឆ្លងវីរុសកូវីដ-19ជាច្រើនទៀត បានរបូតផុតពីការឃ្លាំមើលរបស់យើង។ វាជារឿងពិបាកណាស់ ក្នុងការទប់ស្កាត់អ្នកឆ្លងមេរោគឱ្យបានទាន់ពេលវេលា ហើយយើងថែមទាំងគ្មានបន្ទប់នៅក្នុងមន្ទីរពេទ្យសម្រាប់គ្រប់គ្នាទៀតផង”

មណ្ឌលឡំបាឌី គឺជាមណ្ឌលកណ្ដាលនៃការឆ្លងរាលដាលរបស់មេរោគវីរុសកូរ៉ូណាប្រភេទថ្មីនៅក្នុងប្រទេសអ៊ីតាលី ដោយកាលពីថ្ងៃពុធ(ទី25មីនា)ម្សិលមិញ មានអ្នកឆ្លងមេរោគទូទាំងប្រទេសរួចហើយចំនួន 69,176នាក់ ខ្ពស់បំផុតលំដាប់លេខ2 របស់ពិភពលោកបន្ទាប់ពីចិន និងមានចំនួនអ្នកស្លាប់សរុប 6,820នាក់ វ៉ាដាច់ប្រទេសចិន ឡើងជាលំដាប់លេខ1 របស់ពិភពលោកទៅហើយ៕

ប្រភព៖ Mgronline

March 26, 2020

Tag: សុខភាព