សុខភាព - La Reine Media

WHO ប្រកាស៖ ចំនួនអ្នកឆ្លងមេរោគកូវីដ-19 កើនជាងកន្លះលាន ចំណែកវ៉ាក់សាំង គ្មានផ្លូវកាត់ទេ ត្រូវរង់ចាំ 1ឆ្នាំ

ទីក្រុងហ្សឺណែវ ថ្ងៃទី27 មីនា អង្គការសុខភាពពិភពលោក ឬ WHO បានបង្ហើបឱ្យដឹងថា ចំនួនអ្នកឆ្លងមេរោគវីរុសកូរ៉ូណាប្រភេទថ្មី ឬកូវីដ-19 ដែលបានអះអាងហើយទូទាំងពិភពលោក បានកើនឡើងដល់ជាងកន្លះ លាននាក់ និងមានអ្នកស្លាប់ច្រើនជាង 20,000នាក់ហើយ ដែលនេះជា “ស្ថិតិដ៏គួរឱ្យសោកសៅ” បំផុត។

WHO បានបញ្ជាក់ថា ចំនួនអ្នកឆ្លងមេរោគកូវីដ-19 ទូទាំងពិភពលោកបានកើនឡើងដល់ 509,164នាក់ គិតត្រឹមម៉ោង10 ម៉ោងនៅអឺរ៉ុប នៃថ្ងៃសុក្រ ទី27 មីនា ដោយវីរុសបានឆ្លងសាយភាយទូទាំងប្រទេស និងភូមិភាគ ជាង 200កន្លែង និងធ្វើឱ្យមានអ្នកស្លាប់ច្រើនរហូតដល់ 23,335នាក់។

លោក ថេដ្រូស អាត់ហាណូម គីប្រ៊ីយេស៊ុស ប្រធានអង្គការសុខភាពពិភពលោក បានថ្លែងថា នៅតែត្រូវរង់ចាំយ៉ាងហោចណាស់ក៏ 12-18ខែទៀតដែរ ទម្រាំនឹងមានវ៉ាក់សាំងការពារមេរោគមួយនេះ…។ លោកព្រមទាំងបាននិយាយសង្កត់ធ្ងន់ទៅលើភាពចាំបាច់យ៉ាងបន្ទាន់ក្នុងការព្យាបាលអ្នកជំងឺ និងបន្ថយចំនួនអ្នកស្លាប់ ទៀតផង។

“ការសាកល្បងដែលបានរួមដៃគ្នាជាធ្លុងមួយ មានន័យអំពីការសាកល្បងខាងការព្យាបាលរបស់ប្រទេសជាច្រើន ដើម្បីស្វែងរកវិធីព្យាបាលជំងឺដែលបណ្ដាលមកពីវីរុសកូវីដ-19 គឺជាការសាកល្បងជាប្រវត្តិសាស្ត្រ ដែលវានឹងជួយឱ្យការពិសោធភ័ស្តុតាងពាក់ព័ន្ធនឹងថ្នាំដែលមានប្រសិទ្ធផលខាងការព្យាបាល”

លោក ថេដ្រូស បានប្រកាសថា អ្នកជំងឺ 1ឈុតដំបូងនៅក្នុងប្រទេសន័រវេយ៍ និងអេស្បាញ នឹងចូលរួមការសាកល្បងខាងការព្យាបាលក្នុងពេលឆាប់ៗនេះ ដើម្បីប្រៀបធៀបពីសុវត្ថិភាព និងប្រសិទ្ធភាពរបស់ឱសថតែមួយ ឬឱសថផ្សំ ដែលអាចមានសក្ដានុពលព្យាបាលជំងឺដ៏សាហាវមួយនេះ ចំនួន 4មុខ”

“រឹតតែមានប្រទេសផ្សេងៗ ចូលរួមការសាកល្បងកាន់តែច្រើនឡើង នឹងរឹតតែជួយឱ្យយើងបានទទួលលទ្ធផលកាន់តែលឿនឡើង”។ លោកបានបន្តទៀតថា បច្ចុប្បន្ន មានប្រទេស និងភូមិភាគប្រមាណជា 45 កំពុងរួមដៃគ្នាសាកល្បងខាងគ្លីនិក ដើម្បីស្វែងរកវិធីការព្យាបាល និងសង្ឃឹមថា នឹងមានអ្នកចូលរួមកើនឡើងទៀត។

ខណៈពេលជាមួយគ្នា លោក ថេដ្រូស បានអំពាវនាវឱ្យចៀសវាងពីវិធីព្យាបាលដែលមិនបានបង្ហាញពីប្រសិទ្ធផល ដោយលោកបានសង្កត់ធ្ងន់ថា វា “គ្មានផ្លូវកាត់” ទេ និងត្រូវតែប្រកាន់យកភ័ស្តុតាងដែលមានការពិសោធសាកល្បង និងរៀនយល់ជាបន្តបន្ទាប់ថា តើវិធីការមួយណាដែលទទួលបានលទ្ធផល៕

ប្រភព៖ សារព័ត៌មានបរទេស

March 30, 2020

អតីតរដ្ឋមន្ត្រីរបស់បារាំងម្នាក់ បានបាត់ស្លាប់ដោយសារ COVID-19

លោក Patrick Devedjian អាយុ75ឆ្នាំ ដែលជាអតីតរដ្ឋមន្ត្រីម្នាក់របស់ប្រទេសបារាំង បានក្លាយជាអ្នកនយោបាយជាន់ខ្ពស់ដំបូងបង្អស់របស់ប្រទេសនេះ បានស្លាប់ដោយសារ COVID-19។

Patrick Devedjian គឺជារដ្ឋមន្ត្រីទទួលបន្ទុកដោះស្រាយបញ្ហាសេដ្ឋកិច្ចរបស់ប្រទេសបារាំង ក្រោយវិបត្តិហិរញ្ញវត្ថុឆ្នាំ2008។ លោកក៏ធ្លាប់ធ្វើជាទីប្រឹក្សាផ្ទាល់របស់អតីតប្រធានាធិបតីបារាំង Nicolas Sarkozy ផងដែរ។ អតីតរដ្ឋមន្ត្រីរូបនេះ បានប្រកាសថា លោកមានរោគសញ្ញាឆ្លង COVID-19 កាលពីថ្ងៃទី25មិនា។

លោក Devedjian ធ្លាប់បានកាន់កាប់តំណែងជាច្រើន តាំងពីបានចូលប្រលូកក្នុងឆាកនយោបាយចាប់ពីឆ្នាំ1983។ លោកក៏ធ្លាប់បានធ្វើជាអភិបាលក្រុង Antony មុនពេលចូលកាន់តំណែងប្រធានតំបន់ Haut-de-Seine នៅជាយក្រុងភាគខាងលិចនៃរដ្ឋធានីបារីស។

គិតមកដល់ពេលនេះ ប្រទេសបារាំង បានរកឃើញអ្នកជំងឺ COVID-19 ចំនួន38,105នាក់ ក្នុងនោះមាន 2,317នាក់បានបាត់បង់ជីវិត និងជិត6,000នាក់បានជាសះស្បើយ៕

ប្រភព៖ សារព័ត៌មានបរទេស

March 29, 2020

រដ្ឋមន្ត្រីហិរញ្ញវត្ថុអាល្លឺម៉ង់ ស្លាប់ដោយសារធ្វើអត្តឃាត ព្រោះតែបារម្ភអំពី COVID-19

Thomas Schaefer ជារដ្ឋមន្ត្រីក្រសួងហិរញ្ញវត្ថុរបស់រដ្ឋ Hesse នៃប្រទេសអាល្លឺម៉ង់ ត្រូវបានគេរាយការណ៍ថា បានធ្វើអត្តឃាតព្រោះតែ “មានការបារម្ភជ្រុល” អំពីវិធានការទប់ទល់នឹងហានិភ័យដួលរលំនៃសេដ្ឋកិច្ចជាតិ ដោយសារតែ COVID-19។

Schaefer មានអាយុ54ឆ្នាំ ត្រូវបានប្រទះឃើញដេកស្លាប់នៅក្បែរផ្លូវរថភ្លើងមួយកន្លែងកាលពីថ្ងៃទី28មីនាកន្លងទៅ។ ការិយាល័យរដ្ឋអាជ្ញានៃតុលាការក្រុង Wiesbaden បានឱ្យដឹងថា ពួកគេជឿថា រដ្ឋមន្ត្រីរូបនេះ បានធ្វើអត្តឃាត។

“យើងពិតជាតក់ស្លុតខ្លាំងណាស់…។ យើងពិតជាមានការសង្វេគខ្លាំងណាស់” អភិបាលរដ្ឋ Hesse លោក Volker Bouffier មានប្រសាសន៍បែបនេះនៅក្នុងសេចក្ដីប្រកាសរបស់លោក បន្ទាប់ពីករណីខាងលើបានកើតឡើង។

លោក Bouffier បានឱ្យដឹងថា លោក Schaefer បានកាន់កាប់តំណែងរដ្ឋមន្ត្រីហិរញ្ញវត្ថុនៃរដ្ឋ Hesse អស់រយៈពេល10ឆ្នាំមកហើយ។ លោកបានខិតខំប្រឹងប្រែង “មិនថាយប់ថ្ងៃ” ដើម្បីជួយដល់ក្រុមហ៊ុននានា និងកម្មករទូទៅ ក្នុងការប្រយុទ្ធប្រឆាំងនឹងផលប៉ះពាល់សេដ្ឋកិច្ចពី COVID-19។

អភិបាលរដ្ឋ Hesse បានថ្លែងថា “យើងជឿថា គាត់ពិតជាមានការព្រួយបារម្ភខ្លាំងណាស់។ នេះពិតជាដំណាក់កាលដ៏លំបាកដែលយើងត្រូវការមនុស្សដូចគាត់”។

Schaefer កន្លងមកនេះ ត្រូវបានគេយល់ថាជាអ្នកបន្តវេនរបស់អភិបាលរដ្ឋ Hesse គឺលោក Bouffier។ រដ្ឋមន្ត្រីហិរញ្ញវត្ថុរូបនេះ បានលាចាកលោកនេះទៅ ដោយបន្សល់ទុកភរិយា និងកូន2នាក់ឱ្យរស់នៅដោយគ្មានស្វាមី និងឪពុក។

គិតត្រឹមម៉ោងនេះ ប្រទេសអាល្លឺម៉ង់ បានរកឃើញអ្នកផ្ទុកមេរោគCOVID-19 ចំនួន 58,247នាក់ និងស្លាប់ចំនួន455នាក់៕

ប្រភព៖ សារព័ត៌មានបរទេស

March 29, 2020

ក្រោយពីបានជាសះស្បើយ អ្នកជំងឺCOVID-19 នៅតែមានផ្ទុកវីរុសនេះរយៈពេល8ថ្ងៃបន្តទៀត

អ្នកផ្ទុកវីរុសCOVID-19 ដែលត្រូវបានព្យាបាលជាសះស្បើយ និងលែងមានអាការរោគ នៅតែអាចបញ្ចេញវីរុសក្នុងអំឡុងពេលពី1ថ្ងៃទៅ8ថ្ងៃបន្តទៀត។

ក្រុមអ្នកវិទ្យាសាស្ត្រមកពីមន្ទីរពេទ្យ PLA នៃប្រទេសចិន និងសាកលវិទ្យាល័យវេជ្ជសាស្ត្រ Yale របស់សហរដ្ឋអាមេរិក បានរកឃើញថា ពាក់កណ្ដាលនៃអ្នកជំងឺCOVID-19 កម្រិតស្រាលដែលត្រូវបានព្យាបាលជាសះស្បើយ នៅតែមានផ្ទុកវីរុសនេះរហូតដល់8ថ្ងៃ ក្រោយពីលែងមានរោគសញ្ញា។ លទ្ធផលនៃការសិក្សាស្រាវជ្រាវនេះ ត្រូវបានចុះផ្សាយកាលពីថ្ងៃទី23មីនានៅលើទស្សនាវដ្ដី Respiratory and Critical Care Medicine របស់សមាគម American Thoracic Society នៅសហរដ្ឋអាមេរិក។

សាស្ត្រាចារ្យ Lixin Xie និងវេជ្ជបណ្ឌិត Lokesh Sharma រួមនឹងសហការី បានសិក្សាទៅលើអ្នកជំងឺCOVID-19ចំនួន16នាក់ ដែលព្យាបាលនៅមន្ទីរពេទ្យ PLA ក្នុងទីក្រុងប៉េកាំង ចាប់ពីថ្ងៃទី28មករា ដល់ថ្ងៃទី9មីនា ឆ្នាំ2020។ អ្នកជំងឺទាំងនេះ មានវ័យជាមធ្យម 35.5ឆ្នាំ។ ក្រុមអ្នកវិទ្យាសាស្ត្របានពិសោធទៅលើសំណាកវត្ថុវិភាគរបស់អ្នកជំងឺ ដែលបានជាសះស្បើយ ដោយមានលទ្ធផលអវិជ្ជមាន2លើកបន្តបន្ទាប់គ្នានៅពេលធ្វើតេស្ត។

“របកគំហើញសំខាន់បំផុតពីការសិក្សាស្រាវជ្រាវរបស់យើងនោះគឺ ពាក់កណ្ដាលនៃអ្នកជំងឺ នៅតែបន្តបញ្ចេញវីរុស បើទោះពួកគេត្រូវបានព្យាបាលជាសះស្បើយពីអាការរោគ” នេះបើតាមប្រសាសន៍របស់វេជ្ជបណ្ឌិត Sharma មកពីសាកលវិទ្យាល័យវេជ្ជសាស្ត្រ Yale។ លោក Sharma បន្តថា “ករណីអ្នកជំងឺដែលមានសភាពធ្ងន់ធ្ងរ អាចនឹងនៅតែបញ្ចេញវីរុសក្នុងរយៈពេលយូរ”។

ការសិក្សាស្រាវជ្រាវខាងលើនេះក៏បានបង្ហាញថា រយៈពេលនៃការសម្ងំលាក់ខ្លួនរបស់វីរុស ភាគច្រើនអូសបន្លាយពេល5ថ្ងៃ។ រយៈពេលដែលអ្នកជំងឺអាចចេញរោគសញ្ញា គឺ8ថ្ងៃ ហើយរយៈពេលដែលពួកគេនៅមានផ្ទុកវីរុសក្រោយពីលែងមានរោគសញ្ញា គឺចាប់ពី1ថ្ងៃដល់8ថ្ងៃ។

ក្រុមអ្នកវិទ្យាសាស្ត្រខាងលើបានសង្កាត់ធ្ងន់ថា ចំនួនអ្នកជំងឺដែលពួកគេបានវិភាគ គឺមានចំនួនតិចតួចពេក ហើយសុទ្ធតែជាអ្នកជំងឺដែលមានអាការរោគស្រាលៗ។ ពួកគេនិយាយថា ពួកគេត្រូវការសិក្សាបន្ថែមច្រើនជាងនេះទៀតដើម្បីទទួលបានលទ្ធផលសុក្រឹតជាងនេះ៕

ប្រភព៖ Phys.org

March 29, 2020

ការផលិតម៉ាស់នៅប្រទេសចិន ប្រៀបដូចជាការបោះពុម្ភក្រដាសប្រាក់

នៅពេលដែល COVID-19 រាតត្បាតពេញពិភពលោក ក៏ជាពេលដែលរោងចក្រជាច្រើននៅប្រទេសចិនបង្វែរទិសដៅរបស់ខ្លួនឆ្ពោះទៅក្នុងទីផ្សារដ៏ធំធេងលាតសន្ធឹងទូទាំងពិភពលោក ដែលរកប្រាក់ចំណេញបានច្រើនមិនធ្លាប់មានពីមុនមក នោះគឺការផលិតម៉ាស់។

កាលពីដើមខែកុម្ភៈ ជាពេលដែលជំងឺរលាកសួតប្រភេទថ្មី កំពុងតែអុកឡុកប្រទេសចិន ក្រុមហ៊ុនរបស់ Guan Xunze អាយុ34ឆ្នាំ បានសាងសង់រោងចក្រថ្មីមួយដើម្បីផលិតម៉ាស់ ដោយប្រើពេលត្រឹមតែ7ថ្ងៃប៉ុណ្ណោះ។

រោងចក្ររបស់ Guan ដែលមានខ្សែចង្វាក់ផលិតកម្មចំនួន5 និងស្ថិតនៅភាគឦសានប្រទេសចិននេះ ផ្គង់ផ្គង់ម៉ាស់ប្រភេទ N95 ដើម្បីឆ្លើយតបទៅនឹងតម្រូវការដ៏ច្រើនរបស់ទីផ្សារ ខណៈដែលតួលេខនៃការឆ្លងវីរុសCOVID-19 នៅតែកើនឡើងយ៉ាងគំហុកជារៀងរាល់ថ្ងៃ។

បច្ចុប្បន្ន បើទោះជាចំនួនអ្នកឆ្លងមេរោគនៅប្រទេសចិនបានថយចុះក៏ដោយ ប៉ុន្តែ Guan នៅតែបន្តរកប្រាក់ចំណេញបានយ៉ាងច្រើន ដោយនាំម៉ាស់ចេញទៅកាន់ទីផ្សារប្រទេសអ៊ីតាលី ជាកន្លែងដែលមានអ្នកស្លាប់ដោយសារ COVID-19 10,023នាក់ ពោលគឺច្រើនជាងប្រទេសចិនដែលមានអ្នកស្លាប់ត្រឹមតែ3,304នាក់។

នៅទូទាំងពិភពលោក ករណីឆ្លងវីរុសកូរ៉ូណា COVID-19នេះ កើនដល់ជិត680,000នាក់ ហើយតម្រូវការសម្ភារការពារសុវត្ថិភាពសុខភាពកំពុងតែកើនឡើងខ្លាំងពីមួយថ្ងៃទៅមួយថ្ងៃ។

Shi Xinghui ដែលជានាយកផ្នែកទីផ្សារម្នាក់របស់ក្រុមហ៊ុនផ្គត់ផ្គង់ម៉ាស៊ីនផលិតម៉ាស់មួយ នៅក្នុងខេត្តក្វាងទុង ប្រទេសចិននិយាយថា “ម៉ាស៊ីនផលិតម៉ាស់ គឺប្រៀបដូចជាម៉ាស៊ីនបោះពុម្ភក្រដាសប្រាក់ពិតៗ”។ លោកបន្ថែមថា ប្រាក់ចំណេញដែលបានមកពីការផលិតម៉ាស់ បានកើនឡើងច្រើនដងធៀបនឹងមុននេះ។

ចំណែក Qi Guangtu បានវិនិយោគប្រាក់7លានដុល្លារអាមេរិក ដើម្បីបង្កើតរោងចក្រផលិតម៉ាស់របស់ខ្លួន។ រោងចក្ររបស់ Qi ធ្វើការមិនឈប់ឈរសូម្បីតែ1វិនាទី ចាប់ពីថ្ងៃដំណើរការដំបូងរហូតដល់ពេលនេះ។

Qi បានឱ្យដឹងថា “ការស្វែងរកទុន មិនមែនជាបញ្ហាធំនោះទេ”។ ក្រោយរយៈពេល2ខែ ក្រុមហ៊ុនរបស់គាត់ លក់ដាច់ម៉ាស់ចំនួន70ឈុត ក្នុង1ឈុតៗមានតម្លៃ 71,000ដុល្លារអាមេរិក។ ថៅកែរូបនេះកំពុងមានអតិថិជនក្នុងដៃចំនួនជាង200នាក់។ ការបញ្ជាទិញពីអតិថិជនទាំងនេះ មានតម្លៃសរុបឡើងដល់ 14លានដុល្លារអាមេរិក។

“ក្រោយពីទិញម៉ាស៊ីន និងដំណើរការក្នុងរយៈពេល15ថ្ងៃ យើងរកបានប្រាក់ចំណេញស្មើនឹងទុនវិនិយោគសរុបទៅហើយ” នេះបើតាមការឱ្យដឹងពី Qi។

You Lixin មិនធ្លាប់បានឈានជើងចូលក្នុងវិស័យផលិតម៉ាស់នោះទេ ប៉ុន្តែដោយឃើញឱកាសល្អ You ក៏បានលោតចូលវិស័យនេះ និងបង្កើតបានរោងចក្រផលិតម៉ាស់មួយកន្លែង ដោយប្រើពេលតែ10ថ្ងៃក្នុងការសាងសង់រោងចក្រនេះ។

You ថ្លែងថា “ខ្ញុំគេងបានតែ2-3ម៉ោងប៉ុណ្ណោះក្នុង1ថ្ងៃ។ អតិថិជនរបស់ខ្ញុំក៏ដូច្នេះដែរ”។ You ឱ្យដឹងថា ពេលខ្លះ អតិថិជនរបស់គាត់ ត្រូវគេងនៅក្នុងរោងចក្ររបស់គាត់ទៀតផង ដើម្បីរង់ចាំទទួលទំនិញ។

ការផលិតម៉ាស់ចេះតែកើនឡើង ហើយតម្លៃវត្ថុធាតុដើម (ក្រណាត់) ក៏ចេះតែកើនឡើងពី1,400ដុល្លារ ដល់ជិត68,000ដុល្លារក្នុង1តោន។ ថ្វីបើការផលិតត្រូវចំណាយទុនច្រើន ប៉ុន្តែប្រាក់ចំណេញក៏នៅតែមានទំហំធំដដែល។

បរិមាណម៉ាស់ដែលផលិតនៅប្រទេសចិន គឺច្រើនជាង116លានបន្ទះក្នុង1ថ្ងៃ ដែលនេះគ្រប់គ្រាន់សម្រាប់ផ្គង់ផ្គង់ក្នុងស្រុក និងអាចនាំចេញទៅក្រៅប្រទេសបានខ្លះផងដែរ៕

ប្រភព៖ AFP

March 29, 2020

កម្ពុជាមានអ្នកឆ្លងវីរុសCOVID-19ចំនួន103ករណី ខណៈប្រទេសថៃកើនជិតដល់1,400ករណី និងវៀតណាច្រើនជាងកម្ពុជាជិតទ្វេដង

នៅព្រឹកនេះ កម្ពុជាបានប្រកាសឱ្យដឹងថា បានរកឃើញអ្នកជំងឺCOVID-19ថ្មីចំនួន1ករណីបន្ថែមទៀត ធ្វើឱ្យតួលេខនៃអ្នកបានឆ្លងវីរុសCOVID-19 សរុបឡើងដល់103ករណី។

កម្ពុជា

អ្នកផ្ទុកជំងឺCOVID-19 ដែលទើបត្រូវបានរកឃើញនេះ ជាស្ត្រីវ័យ36ឆ្នាំ ធ្វើការនៅ Star TV និងរស់នៅក្នុងភូមិបាលេឡៃ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។ បច្ចុប្បន្នសម្រាកព្យាបាលនៅមន្ទីរពេទ្យបង្អែកខេត្តបន្ទាយមានជ័យ។

អ្នកបានជាសះស្បើយពីជំងឺរលាកសួតប្រភេទថ្មីនេះ មានចំនួន8ករណី ក្នុងនោះមានបុរសជនជាតិអង់គ្លេសម្នាក់ ស្ត្រីជនជាតិអង់គ្លេសម្នាក់ បុរសជនជាតិបារាំងម្នាក់ និងបុរសជនជាតិខ្មែរ5នាក់។

គិតមកដល់ពេលនេះ កម្ពុជាមានអ្នកឆ្លងវីរុសCOVID-19 សរុប103នាក់ ក្នុងនោះ អ្នកជំងឺកំពុងទទួលការព្យាបាលមានចំនួន82នាក់ អ្នកបានជាសះស្បើយមានចំនួន21នាក់។ កម្ពុជាមិនទាន់មានករណីស្លាប់ដោយសារវីរុសCOVID-19 នៅឡើយ។

នៅប្រទេសវៀតណាម បច្ចុប្បន្ន មានអ្នកឆ្លងមេរោគCOVID-19 សរុប188 ករណី ក្នុងនោះមាន28ករណីបានជាសះស្បើយ។ ក្នុងចំណោមអ្នកបានឆ្លងមេរោគសរុប មាន71ករណីនៅឯរដ្ឋធានីហាណូយ 45ករណីនៅទីក្រុងសៃហ្គន(ហូជីមិញ) និងក្រៅពីនេះគឺនៅក្នុងខេត្តផ្សេងៗទៀត។

ប្រទេសថៃ មានអ្នកឆ្លងមេរោគសរុប1.388ករណី ក្នុងនោះមានអ្នកស្លាប់7ករណី និងជាសះស្បើយ97ករណី។ ចំណែកអ្នកជំងឺដែលកំពុងទទួលការព្យាបាលមាន1,284ករណី។

គិតមកដល់ពេលនេះ នៅទូទាំងពិភពលោក មានអ្នកឆ្លងវីរុសCOVID-19 ចំនួន678.910ករណី ក្នុងនោះមានអ្នកស្លាប់31.771ករណី និងជាសះស្បើយចំនួន146.319ករណី៕

March 29, 2020

Dyson ផលិតម៉ាស៊ីនជំនួយការដកដង្ហើមទំនើបបំផុត អាចជួយព្យាបាលអ្នកជំងឺ COVID-19

ក្រុមហ៊ុនបច្ចេកវិទ្យាដ៏ល្បីឈ្មោះខាងផលិតម៉ាស៊ីនបូមធូលី កង្ហារ និងម៉ាស៊ីនផ្លុំសក់ កំពុងតែត្រៀមផលិតម៉ាស៊ីនជំនួយការដកដង្ហើមប្រភេទថ្មី ហើយទទួលបានការបញ្ជាទិញពីអតិថិជនដល់ទៅ10,000នាក់។

ម៉ាស៊ីនជំនួយការដកដង្ហើមនេះមានឈ្មោះថា CoVent ត្រូវបាន Dyson អភិវឌ្ឍឡើងដោយប្រើពេលត្រឹមតែ10ថ្ងៃប៉ុណ្ណោះ ដោយប្រើប្រាស់បច្ចេកវិទ្យាដែលខ្លួនមានស្រាប់។ បើទោះជាកំពុងរង់ចាំការត្រួតពិនិត្យ និងអនុញ្ញាតពីអាជ្ញាធរអង់គ្លេស ប៉ុន្តែ Dyson ក៏នៅតែទទួលបានការបញ្ជាទិញពីអតិថិជនប្រមាណជា10,000នាក់ ពីរដ្ឋាភិបាលប្រទេសនានាក្នុងពិភពលោក។

ក្រៅពីការប្រើប្រាស់ដូចទៅនឹងម៉ាស៊ីនធម្មតា Covent ក៏អាចយកទៅតាមខ្លួន និងអាចប្រើជាមួយថ្មពិលផងដែរ។ James Dysin ដែលជាស្ថាបនិកក្រុមហ៊ុនបានឱ្យដឹងថា CoVent ត្រូវបានរចនាឡើងសម្រាប់អ្នកជំងឺដែលបានឆ្លងCOVID-19។ ស្ថាបនិករូបនេះក៏បានសន្យាថា នឹងបរិច្ចាគម៉ាស៊ីននេះចំនួន5,000គ្រឿង ក្នុងនោះ1,000គ្រឿងសម្រាប់ប្រទេសអង់គ្លេស។

ម៉ាស៊ីនជំនួយការដកដង្ហើមរបស់ក្រុមហ៊ុន Dyson

CoVent កំពុងត្រូវបានត្រៀមលក្ខណៈដើម្បីផលិត និងអាចចេញលក់នៅដើមខែមេសាខាងមុខ។ ម៉ាស៊ីនជំនួយការដកដង្ហើមនេះ គឺជាឧបករណ៍ដ៏សំខាន់ក្នុងការជួយព្យាបាលអ្នកជំងឺកូរ៉ូណាដែលមានសភាពធ្ងន់ធ្ងរ និងមិនអាចដកដង្ហើមដោយខ្លួនឯងបាន។ ក្រៅពី Dyson នៅមានក្រុមហ៊ុនផលិតរថយន្តជាច្រើនដូចជា Ford Tesla និង General Motors ជាដើម ក៏បានចូលរួមក្នុងការអភិវឌ្ឍ និងផលិតឧបករណ៍សុខាភិបាលសំនាន់ៗ ក្នុងនោះក៏មានម៉ាស៊ីនជំនួយការដកដង្ហើមផងដែរ ខណៈដែលពិភពលោកកំពុងខ្វះ និងត្រូវការវាជាចាំបាច់បំផុត៕

ប្រភព៖ សារព័ត៌មាន

March 28, 2020

កោដ្ឋដាក់អដ្ឋិធាតុរបស់អ្នកស្លាប់ដោយសារ COVID-19 រាប់ពាន់ ត្រូវបានតម្រួតលើគ្នានៅខាងក្រៅផ្ទះបុណ្យសពនៅ ទីក្រុងអ៊ូហាន

ក្រឡ(កោដ្ឋ)ដាក់អធិធាតុរាប់ពាន់ត្រូវបានបញ្ជូនទៅកាន់ផ្ទះបុណ្យសពនានាក្នុងទីក្រុងអ៊ូហាន ធ្វើឱ្យមានការសង្ស័យទៅលើតួលេខជាក់ស្ដែងនៃករណីស្លាប់ដោយសារវីរុសCOVID-19 នៅប្រទេសចិន។

បណ្ដារូបថតបង្ហាញអំពីមនុស្សម្នាឈរតម្រៀបជួរគ្នាយ៉ាងវែងនៅខាងក្រៅផ្ទះបុណ្យសពនានានៅក្នុងទីក្រុងអ៊ូហាន ខេត្ត Hubei ប្រទេសចិន ដើម្បីរង់ចាំទទួលអដ្ឋិធាតុញាតិរបស់ពួកគេ ដែលត្រូវបានគេចែករំលែកតៗគ្នានៅលើបណ្ដាញសង្គមចិននាពេលថ្មីៗនេះ បានបង្កឱ្យមានសម្ពាធកាន់តែធ្ងន់ទៅលើអាជ្ញាធរទីក្រុង ក្នុងការប្រកាសអំពីតួលេខនៃករណីស្លាប់ដោយសារវីរុសCOVID-19។

ទិន្នន័យផ្លូវការរបស់រដ្ឋាភិបាលចិន បានឱ្យដឹងថា អ្នកជំងឺចំនួន2,535នាក់ បានបាត់បង់ជីវិតនៅក្នុងទីក្រុងអ៊ូហាន។ ក៏ប៉ុន្តែ បណ្ដារូបថតដែលត្រូវបានទស្សនាវដ្ដីហិរញ្ញវត្ថុ និងពាណិជ្ជកម្ម Caixin (ដែលមានទីស្នាក់ការធំនៅទីក្រុងប៉េកាំង) ចុះផ្សាយនាពេលថ្មីៗនេះ បានបង្ហាញថា តួលេខខាងលើនេះ ពិតជាគួរឱ្យសង្ស័យ។

នៅក្នុងរូបថតទាំងនោះ ដែលត្រូវបានចុះផ្សាយដោយ Caixin គេឃើញមានក្បួនរថយន្តដឹកទំនិញមួយ ដឹកកោដ្ឋដាក់អដ្ឋិធាតុប្រមាណជា2,500 ឆ្ពោះទៅកាន់ផ្ទះបុណ្យសពមួយនៅក្នុងទីក្រុងអ៊ូហានកាលពីថ្ងៃទី25 និង26ខែមីនាកន្លងទៅ។ ឯរូបភាពមួយសន្លឹកទៀត ក៏បានបង្ហាញអំពីកោដ្ឋដាក់អដ្ឋិធាតុប្រមាណជា3,500 ត្រូវបានតម្រៀបលើគ្នា ក្នុងផ្ទះបុណ្យសពមួយកន្លែងផងដែរ។

ផ្ទះបុណ្យសពនានានៅក្នុងទីក្រុងអ៊ូហាន បានបដិសេធការផ្ដល់ព័ត៌មានអំពីចំនួនសាកសពដែលត្រូវបានបូជានោះទេ ប៉ុន្តែ មានគ្រួសារមួយនោះបានរៀបរាប់ថា គេត្រូវចំណាយពេលរង់ចាំរាប់ម៉ោង ទើបអាចទទួលបានអដ្ឋិធាតុរបស់ញាតិពួកគេ។ ទស្សនាវដ្ដី Caixin បានសរសេរថា អ្នកដែលបានទៅទទួលអដ្ឋិធាតុ ត្រូវឈរតម្រៀបជួរប្រវែងប្រហែល200ម៉ែត្រនៅខាងក្រៅផ្ទះបុណ្យ។

គណៈកម្មការសុខាភិបាលចិន បានឱ្យដឹងថា គិតមកដល់ពេលនេះ ប្រទេសចិនមានអ្នកស្លាប់ជា 3,200នាក់ ខណៈដែលអ្នកបានឆ្លងវីរុសមានចំនួនជាង 81,000នាក់៕

ប្រភព៖ សារព័ត៌មានបរទេស

March 28, 2020

COVID-19! ប្រធានមន្ទីរពេទ្យនៅហៃទី ត្រូវគេចាប់ជំរិត ខណៈអ្នកជំងឺកំពុងរង់ចាំព្យាបាល

ប្រទេសហៃទី៖ ប្រធានមន្ទីរពេទ្យមួយក្នុងចំណោមមន្ទីរពេទ្យធំៗនៅប្រទេសហៃទី ត្រូវបានគេចាប់ជំរិត នាំឱ្យក្រុមវេជ្ជបណ្ឌិត ផ្អាកទទួលព្យាបាលអ្នកជំងឺថ្មី ខណៈដែលមេរោគCOVID-19 កំពុងឆ្លងរាលដាលខ្លាំង។

លោក Jerry Bitar ដែលជាវេជ្ជបណ្ឌិតផ្នែកវះកាត់ ត្រូវបានគេចាប់ជំរិតកាលពីម្សិលមិញ បន្ទាប់ពីលោកបានចាកចេញពីផ្ទះនៅក្នុងតំបន់ប្រជុំជន ឆ្ពោះទៅកាន់កន្លែងធ្វើការនៅឯមន្ទីរពេទ្យ Bernard Mevs ក្នុងរដ្ឋធានី Port-au-Prince។

មនុស្សជាច្រើនបានប្រមូលផ្ដុំគ្នានៅខាងក្រៅមន្ទីរពេទ្យ Bernard Mevs ដើម្បីសម្ដែងសាមគ្គីភាពជាមួយនឹងលោកវេជ្ជបណ្ឌិត Bitar ដែលជាអ្នកគ្រប់គ្រងមន្ទីរពេទ្យនេះជាមួយនឹងបងប្អូនភ្លោះរបស់លោក។ បុគ្គលិកទាំងអស់របស់លោក Bitar បាននាំគ្នាអង្វរករ សូមឱ្យដោះលែងអ្នកដឹកនាំរបស់ពួកគេ។ សារព័ត៌មានក្នុងស្រុកក៏បានចេញផ្សាយ ដោយការអង្វរ ទទូចឱ្យដោះលែងលោកវេជ្ជបណ្ឌិតរូបនេះផងដែរ។

“នៅក្នុងស្ថានភាពនៃវិបត្តិសុខភាពនេះ ការចាប់ជំរិតវេជ្ជបណ្ឌិតរបស់មន្ទីរពេទ្យ គឺជារឿងធ្ងន់ធ្ងរណាស់។ ខ្ញុំស្នើឱ្យដោះលែងគាត់ដោយមិនមានលក្ខខណ្ឌ”។ នេះជាសម្ដីរបស់ពលរដ្ឋម្នាក់ឈ្មោះ Jean Wilguens Charles ដែលមានមិត្តម្នាក់កំពុងទទួលការព្យាបាលជំងឺនៅក្នុងមន្ទីរពេទ្យ Bernard Mevsនេះ។

ជំនួយការ Claude Devil បានឱ្យដឹងថា មន្ទីរពេទ្យនេះ ទទួលព្យាបាលអ្នកជំងឺទាំងអស់ មិនថាជាអ្នកមាន ឬអ្នកក្រគ្មានប្រាក់នោះទេ។ ក៏ប៉ុន្តែ ពេលនេះពួកគេមិនអាចទទួលព្យាបាលអ្នកជំងឺបន្ថែមទៀតនោះឡើយ ខណៈដែលក្រុមគ្រូពេទ្យនៅតែបន្តជួយសង្គ្រោះអ្នកជំងឺដែលកំពុងសម្រាកព្យាបាលនៅទីនេះ។ មាអ្នកជំងឺមួយចំនួន ត្រូវការវះកាត់ ប៉ុន្តែក្រុមវេជ្ជបណ្ឌិតមិនហ៊ានសម្រេចចិត្ត។

អ្នកនាំពាក្យម្នាក់របស់ក្រសួងសុខាភិបាលប្រទេសហៃទី(Hiti)បានឱ្យដឹងថា សមត្ថកិច្ចប្រទេសនេះកំពុងដុតដៃដុតជើង ស្រាវជ្រាវតាមចាប់អ្នកដែលនៅពីក្រោយការចាប់ជំរិតលោកវេជ្ជបណ្ឌិត Jerry Bitar។

ករណីចាប់ជំរិតទារប្រាក់នៅប្រទេសហៃទី ឆ្នាំនេះមានការកើនឡើងច្រើន ក្នុងពេលដែលប្រទេសនេះកំពុងជួបវិបត្តិសេដ្ឋកិច្ចផង និងនយោបាយផង។ យោងតាមធនាគារពិភពលោក ហៃទីជាប្រទេសក្រីក្របំផុតនៅទ្វីបអាមេរិក។ សមត្ថកិច្ចហៃទីបានឱ្យដឹងថា នៅក្នុងខែមករាឆ្នាំនេះ មានករណីចាប់ជំរិតដល់ទៅ15ករណី។ ក្រុមជនពាលទាំងនេះ ធ្វើសកម្មភាពមិនរើសមុខនោះទេ ដោយពួកគេចាប់ជំរិតទាំងអ្នកជំនួញ បុគ្គលិកក្រុមមនុស្សធម៌បរទេស និងតំណាងរាស្ត្រ ហើយសូម្បីតែសិស្សសាលាក៏ពួកវាមិនលើកលែងដែរ។

ពលរដ្ឋនាំគ្នាអង្វរករ សុំឱ្យដោះលែងលោកវេជ្ជបណ្ឌិត

គិតមកដល់បច្ចុប្បន្ន ប្រទេសហៃទី បានរកឃើញអ្នកឆ្លងវីរុសCOVID-19 ត្រឹមតែ8ករណីប៉ុណ្ណោះ។ ប្រធានាធិបតី Jovenel Moise កាលពីសប្ដាហ៍មុនបានប្រកាសអាសន្នទូទាំងប្រទេស និងស្នើឱ្យបិទសាលារៀន រោងចក្រ រួមនឹងកន្លែងគោរពបូជាសាសនាផងដែរ ដើម្បីទប់ស្កាត់ការរាលដាលរបស់វីរុស៕

ប្រភព៖ សារព័ត៌មានបរទេស

March 28, 2020

Trump ចុះហត្ថលេខាលើកញ្ចប់ថវិកាជំនួយ ទំហំ2.2លានលានដុល្លារអាមេរិក

ប្រធានាធិបតីសហរដ្ឋអាមេរិក បានចុះហត្ថលេខាលើកញ្ចប់ថវិកាជំនួយសេដ្ឋកិច្ចទំហំ2.2លានលានដុល្លារ ដើម្បីជួយដល់បណ្ដាក្រុមហ៊ុន និងកម្មករអាមេរិកាំងដែលជួបការលំបាកដោយសារវីរុសCOVID-19។

“ខ្ញុំសូមថ្លែងអំណរគុណចំពោះតំណាងរាស្ត្រមកពីគណបក្សប្រជាធិបតេយ្យ និងគណបក្សសាធារណរដ្ឋ ដែលបានសាមគ្គីគ្នា និងយកប្រទេសជាតិជាធំ” ប្រធានាធីបតីសហរដ្ឋអាមេរិក Donald Trump មានប្រសាសន៍កាលពីថ្ងៃទី27មីនាកន្លងទៅ បន្ទាប់ពីបានចុះហត្ថលេខាលើកញ្ចប់ថវិកាជំនួយខាងលើ។ លោកបន្ថែមថា “យើងត្រូវបានវាយប្រហារយ៉ាងខ្លាំងក្លាដោយសត្រូវលាក់មុខ។ ក៏ប៉ុន្តែ ខ្ញុំគិតថា យើងនឹងងើបឡើងវិញបានយ៉ាងឆាប់រហ័ស”។

នៅមុនពេលចុះហត្ថលេខា លោក Trump បានលើកតម្កើងអំពីទំហំនៃកញ្ចប់ជំនួយដែលមានទឹកប្រាក់ជាង2លានលានដុល្លារនេះ។ “កន្លងមក ខ្ញុំមិនដែលបានចុះហត្ថលេខាលើអ្វីមួយដែលមានអក្សរលានលានដូច្នេះនោះទេ”។

មុននេះ កញ្ចប់ថវិកាជំនួយសេដ្ឋកិច្ចដែលមានទំហំទឹកប្រាក់ធំជាងគេបង្អស់់ក្នុងប្រវត្តិសាស្ត្រសហរដ្ឋអាមេរិកនាសម័យនេះ ក៏ត្រូវបានអនុម័តយល់ព្រមដោយសភាជាន់ខ្ពស់អាមេរិកាំងរួចហើយ។ កញ្ចប់ថវិកានេះនឹងផ្ដល់ជំនួយរាប់ពាន់លានដុល្លារ ទៅឱ្យបណ្ដាក្រុមហ៊ុនឧស្សាហកម្មដែលកំពុងជួបការលំបាក និងជួយកាត់បន្ថយអត្រាបាត់បង់ការងារ ព្រមទាំងផ្ដល់ជំនួយជាសាច់ប្រាក់សុទ្ធដល់ពលរដ្ឋដែលត្រូវរងគ្រោះព្រោះវីរុសCOVID-19។

អ្វីដែលពលរដ្ឋអាមេរិកាំងមានការសប្បាយចិត្តជាងគេនោះគឺ គម្រោងជំនួយផ្ទាល់ដល់ប្រជាជន។ ក្នុងគម្រោងជំនួយនេះ ពលរដ្ឋណាដែលមានចំណូលទាបជាង75,000ដុល្លារក្នុង1ឆ្នាំ នឹងទទួលបានប្រាក់សុទ្ធ 1,200ដុល្លារក្នុងមនុស្សម្នាក់។

មន្ទីរពេទ្យនានានឹងទទួលបានជំនួយសរុប 100ពាន់លានដុល្លារពីកញ្ចប់ជំនួយខាងលើ។ ចំណែកក្រុមហ៊ុនតូចៗនឹងទទួលបានទឹកប្រាក់សរុប 350ពាន់លានដុល្លារ។ ក្រុមហ៊ុនធំៗដែលរួមទាំងក្រុមហ៊ុនអាកាសចរណ៍ និងក្រុមហ៊ុននាវាទេសចរណ៍ នឹងទទួលបានជំនួយសរុប 500ពាន់លានដុល្លារ។ ចំណែក150ពាន់លានដុល្លារផ្សេងទៀតទុកសម្រាប់ជួយជំរុញសេដ្ឋកិច្ចរបស់រដ្ឋនីមួយៗ រួមនឹងតំបន់មូលដ្ឋានផងដែរ។

យោងតាមស្ថិតិរបស់សាកលវិទ្យាល័យ Johns Hopskins ចំនួនអ្នកឆ្លងវីរុសCOVID-19 នៅសហរដ្ឋអាមេរិកកាលពីថ្ងៃទី27មីនាបានកើន16,961ករណីបន្ថែមទៀត ដែលធ្វើឱ្យចំនួនអ្នកឆ្លងមេរោគសរុបឡើងដល់ 102,936ករណី ក្នុងនោះអ្នកស្លាប់សរុបបានកើនដល់ 1,607ករណី ពោលគឺកើន312ករណី បើធៀបនឹងមុននេះមួយថ្ងៃ។ បច្ចុប្បន្ន សហរដ្ឋអាមេរិក បានក្លាយជាសម្បុកមេរោគCOVID-19 ធំជាងគេបង្អស់នៅទូទាំងពិភពលោក៕

ប្រភព៖ សារព័ត៌មានបរទេស

March 28, 2020

COVID-19! ចំនួនអ្នកជំងឺកូរ៉ូណាប្រភេទថ្មីនៅសហរដ្ឋអាមេរិក កើនលើស100,000នាក់

សហរដ្ឋអាមេរិក បច្ចុប្បន្នជាសម្បុកមេរោគCOVID-19 ធំជាងគេបង្អស់ក្នុងពិភពលោក ដោយមានអ្នកឆ្លងវីរុសCOVID-19 ជាង100,000នាក់ កើនជិត17,000នាក់ បើធៀបនឹងមុននេះ1ថ្ងៃ។

យោងតាមស្ថិតិរបស់សាកលវិទ្យាល័យ Johns Hopskins បានឱ្យដឹងថា តួលេខនៃអ្នកបានឆ្លងវីរុសCOVID-19 នៅសហរដ្ឋអាមេរិកកាលពីថ្ងៃទី27មីនា បានកើន16,961ករណីបន្ថែមទៀត នាំឱ្យចំនួនអ្នកជំងឺសរុបទូទាំងប្រទេសឡើងដល់102,936នាក់។ ចំនួនអ្នកស្លាប់ថ្មីដោយសារវីរុសកូរ៉ូណានេះ កើន312នាក់បន្ថែមទៀត ដូច្នេះចំនួនអ្នកស្លាប់សរុបនៅសហរដ្ឋអាមេរិក ឡើងដល់1,607នាក់។

នៅទូទាំងពិភពលោក មានអ្នកឆ្លងវីរុសCOVID-19 សរុប593,952នាក់ ក្នុងនោះមាន27,341នាក់បានបាត់បង់ជីវិត និង133,057នាក់ (ស្មើនឹង22.3% នៃចំនួនអ្នកឆ្លងមេរោគសរុប) បានជាសះស្បើយ។ ចំណែកអ្នកជំងឺដែលកំពុងប្រឈមនឹងការស្លាប់ មានចំនួនដល់ទៅ 23,519នាក់៕

ប្រភព៖ សារព័ត៌មានបរទេស

March 28, 2020

COVID-19! មនុស្សជាង27,000នាក់ស្លាប់ដោយសារវីរុសកូរ៉ូណាថ្មី នៅទូទាំងពិភពលោក

តួលេខនៃអ្នកស្លាប់ដោយសារ COVID-19 នៅតែបន្តកើនឡើងនៅសហរដ្ឋអាមេរិក និងអឺរ៉ុប ធ្វើឱ្យចំនួនអ្នកស្លាប់ទូទាំងពិភពលោក កើនដល់27,215នាក់ ក្នុងចំណោមអ្នកឆ្លងមេរោគ 593,656នាក់។

COVID-19 បង្ហាញខ្លួននៅក្នុងប្រទេស និងដែនដីចំនួន199 នៅទូទាំងសកលលោក ក្នុងនោះចំនួនករណីឆ្លងមេរោគនៅសហរដ្ឋអាមេរិក កើនឡើងលឿនជាងគេក្នុងរយៈពេល24ម៉ោងកន្លងទៅនេះ។ សហរដ្ឋអាមេរិក រកឃើញអ្នកជំងឺកូរ៉ូណាថ្មី 16,419ករណីបន្ថែមទៀត ធ្វើឱ្យអ្នកឆ្លងមេរោគសរុបក្នុងប្រទេសនេះឡើងដល់102,396ករណី។

អ៊ីតាលី៖ អ្នកជំងឺសរុប86,498នាក់ ក្នុងនោះមានអ្នកស្លាប់9,134នាក់។
ប្រទេសចិន៖ អ្នកជំងឺសរុប 81,340នាក់ ក្នុងនោះមានអ្នកស្លាប់3,292នាក់។
អេស្ប៉ាញ៖ អ្នកជំងឺសរុប65,719 ក្នុងនោះមានអ្នកស្លាប់5,138នាក់។
អាល្លឺម៉ង់៖ អ្នកជំងឺសរុប50,871 ក្នុងនោះមានអ្នកស្លាប់351នាក់។
បារាំង៖ អ្នកជំងឺសរុប32,964នាក់ ក្នុងនោះមានអ្នកស្លាប់1,995នាក់។
អ៊ីរ៉ង់៖ អ្នកជំងឺសរុប32,332 ក្នុងនោះមានអ្នកស្លាប់2,378នាក់។
អង់គ្លេស៖ អ្នកជំងឺសរុប14,543 ក្នុងនោះមានអ្នកស្លាប់759នាក់។
ស្វីស៖ អ្នកជំងឺសរុប12,928នាក់ ក្នុងនោះមានអ្នកស្លាប់231នាក់។

នៅទូទាំងពិភពលោក មានអ្នកឆ្លងវីរុសCOVID-19 សរុប593,656នាក់ ក្នុងនោះមាន27,215នាក់បានបាត់បង់ជីវិត និង132,526នាក់ (ស្មើនឹង22.3% នៃចំនួនអ្នកឆ្លងមេរោគសរុប) បានជាសះស្បើយ៕

ប្រភព៖ សារព័ត៌មានបរទេស

March 28, 2020

Tag: សុខភាព