សុខភាព - La Reine Media

COVID-19! ទារកភ្លោះត្រូវបានដាក់ឈ្មោះឱ្យថា “Corona” និង “Covid”

ឥណ្ឌា៖ ប្ដីប្រពន្ធមួយគូនៅឯទីក្រុង Raipur បានដាក់ឈ្មោះឱ្យកូនភ្លោះរបស់ខ្លួនថា Corona និង Covid ដើម្បីចងចាំនូវការលំបាកដែលបង្កឡើងដោយវីរុស COVID-19 ដែលពួកគេបានឆ្លងកាត់។

ពាក្យ “Corona” និង “Covid” អាចធ្វើឱ្យមនុស្សជាច្រើនភ័យខ្លាច ប៉ុន្តែចំពោះប្ដីប្រពន្ធមួយគូនៅក្នុងទីក្រុង Raipur នៃរដ្ឋ Chhattisgarh របស់ប្រទេសឥណ្ឌាវិញ បានចាត់ទុកថាជា និមិត្តរូបនៃការយកឈ្នះទៅលើស្ថានភាពលំបាក ដោយសារតែកូនភ្លោះរបស់ពួកគេបានចាប់កំណើតក្នុងកាលៈទេសៈដែលប្រជាជននៃប្រទេសឥណ្ឌាទាំងមូលកំពុងរស់នៅក្រោមបម្រាមគោចរ។

“ខ្ញុំបានទទួលកូនទាំង2រូប ម្នាក់ស្រី និងម្នាក់ប្រុស កាលពីព្រឹកព្រលឹមក្នុងថ្ងៃទី27មីនា” Preeti Verma អាយុ27ឆ្នាំ ជាម្ដាយរបស់ទារកភ្លោះទើបកើត បាននិយាយបែបនេះ។ “ពួកយើងបានដាក់ឈ្មោះឱ្យកូនប្រុសថា Covid និងកូនស្រីថា Corona។ ខ្ញុំបានបង្កើតពួកគេបន្ទាប់ពីបានប្រឈមនឹងការលំបាកជាច្រើន ដូច្នេះហើយ ខ្ញុំ និងប្ដីខ្ញុំ មានបំណងចង់ចងចាំកាលៈទេសៈនេះ”។

ប្ដីប្រពន្ធនេះ មានស្រុកកំណើតនៅក្នុងរដ្ឋ Uttar Pradesh និងកំពុងរស់នៅក្នុងផ្ទះជួលមួយនៅតំបន់ Raipur។ យប់នៃថ្ងៃទី26មីនា នាង Verma ឈឺពោះយ៉ាងខ្លាំង ធ្វើឱ្យប្ដីរបស់នាងត្រូវហៅឡានពេទ្យ102 Mahtari Express មកដឹកនាងទៅពេទ្យជាបន្ទាន់។ ប៉ុន្តែ មធ្យោបាយធ្វើដំណើរទាំងអស់ត្រូវបានហាមឃាត់ក្នុងអំឡុងពេលអនុវត្តបទបញ្ជាបម្រាមគោចរ។ ពួកគេត្រូវបានសមត្ថកិច្ចជាច្រើនកន្លែងរារាំង និងសួរនាំ។ ញាតិរបស់ Verma ក៏មិនអាចទៅថែទាំនាងបាន ព្រោះតែរថយន្តក្រុង និងរថភ្លើងសុទ្ធតែត្រូវផ្អាកដំណើរការ។

“ពួកគេបានសម្រេចចិត្តឆ្លងទន្លេដោយការវះកាត់ ព្រោះនេះគឺជាករណីស្មុគស្មាញ”។ នេះបើតាមការឱ្យដឹងពីលោក Shubhra Singh ដែលជាតំណាងរបស់មន្ត្រីពេទ្យ Dr BR Ambedkar Memorial។ ក្រោយរយៈពេល45នាទី កូនភ្លោះមួយគូបានចាប់កំណើត។ ទារកទាំង2នាក់នេះ មានសុខភាពល្អ និងមានទម្ងន់2.9 និង2.7គីឡូក្រាម។

Verma ថ្លែងថា បើទោះជាបង្កគ្រោះថ្នាក់ធំធេង ប៉ុន្តែ វីរុសCOVID-19 បានធ្វើឱ្យមនុស្សទូទៅមានការចាប់អារម្មណ៍ទៅលើបញ្ហាអនាម័យជាងមុន និងចងចាំទម្លាប់ល្អផ្សេងៗទៀត។

“នៅពេលបុគ្គលិកពេទ្យបានហៅទារកទាំង2ថា Corona និង Covid យើងក៏សម្រេចចិត្តដាក់ឈ្មោះនេះឱ្យកូនៗ” Verma និយាយបែបនេះ។ ប៉ុន្តែ ប្ដីប្រពន្ធនេះបានឱ្យដឹងថា ពួកគេអាចនឹងកែប្រែការសម្រេចចិត្ត និងប្ដូរឈ្មោះឱ្យកូនៗ នៅពេលក្រោយ។

ប្រទេសឥណ្ឌា បច្ចុប្បន្នមានអ្នកជំងឺ COVID-19 ជាង2,500នាក់ ក្នុងនោះមាន70នាក់បានបាត់បង់ជីវិត។ រដ្ឋាភិបាលប្រទេសនេះបានដាក់បម្រាមគោចរចាប់ពីថ្ងៃទី25មីនា ដោយស្នើឱ្យប្រជាជនប្រមាណជា1.3ពាន់លាននាក់ នៅតែក្នុងផ្ទះ ហើយមានតែសេវាកម្មចាំបាច់ប៉ុណ្ណោះដែលត្រូវបានអនុញ្ញាតឱ្យដំណើរការ៕

ប្រភព៖ សារព័ត៌មានបរទេស

April 4, 2020

COVID-19! ប្រទេសចិនផ្ដល់ឋានៈដល់សពវេជ្ជបណ្គិត Li Wenliang ជាវីរជនពលីរបស់ប្រទេសជាតិ

លោកវេជ្ជបណ្ឌិត Li Wenliang ដែលជាមនុស្សម្នាក់ក្នុងចំណោមអ្នកដែលបានព្រមានអំពីវីរុស COVID-19 ដំបូងគេនៅប្រទេសចិន ប៉ុន្តែត្រូវបានអាជ្ញាធរបង្ខំឱ្យចុះកិច្ចសន្យាទទួលកំហុសកន្លងមកនោះ ពេលនេះត្រូវបានតែងតាំងជាវីរជនពលី។

អាជ្ញាធរខេត្ត Hubei ប្រទេសចិន បានសម្រេចផ្ដល់ឋានៈជាវីរជនពលី (martyr) ដល់បុគ្គលិកពេទ្យចំនួន12រូបដែលបានបាត់បង់ជីវិតដោយសារវីរុសCOVID-19 បន្ទាប់ពីបានបូជាជីវិតក្នុងសង្គ្រាមប្រឆាំងនឹងវីរុសដើម្បីការពារជីវិត និងសុខភាពរបស់ប្រជាជន។ នេះបើតាមការចេញផ្សាយរបស់ CCTV កាលពីថ្ងៃទី2មេសាកន្លងទៅ។

“វីរជនពលី” គឺជាឋានៈកិត្តិយសខ្ពស់បំផុតត្រូវបានប្រទេសចិនតែងតាំងដល់ពលរដ្ឋដែលបានស្លាប់ក្នុងពេលបំពេញបេសកកម្មដើម្បីប្រទេសជាតិ។ ឋានៈនេះត្រូវបានផ្ដល់ជូនសពវេជ្ជបណ្ឌិត Li Wenliang បន្ទាប់ពីគ្រូពេទ្យរូបនេះត្រូវបានអាជ្ញាធរទីក្រុង Wuhan ហៅទៅស្ដីបន្ទោស បង្ខំឱ្យចុះកិច្ចសន្យា និងទទួលកំហុស។

Li Wenliang គឺជាវេជ្ជបណ្ឌិតឯកទេសខាងជំងឺភ្នែកនៅមន្ទីរពេទ្យ Central Hospital ក្នុងទីក្រុង Wuhan ខេត្ត Hubie។ ចុងខែធ្នូ ឆ្នាំ2019 វេជ្ជបណ្ឌិតរូបនេះបានចែករំលែកសារមួយទៅកាន់អ្នករួមអាជីព អំពីជំងឺថ្មីមួយដែលដូចទៅនឹងជំងឺផ្លូវដង្ហើមបង្កឡើងដោយវីរុសSARS។ បន្ទាប់មក មេរោគនេះត្រូវបានគេហៅថា COVID-19 ដែលបច្ចុប្បន្ន បានធ្វើឱ្យមនុស្សជាង1098,000នាក់បានកើតជំងឺ និងជាង59,160នាក់ បានបាត់បង់ជីវិត នៅទូទាំងពិភពលោក។

ក្រោយពីបានចែករំលែកព័ត៌មានស្ដីអំពីវីរុសថ្មី វេជ្ជបណ្ឌិត Li Wenliang ក៏ត្រូវបានសមត្ថកិច្ចហៅទៅសួរនាំ ហើយបង្ខំឱ្យចុះហត្ថលេខាទទួលស្គាល់កំហុសថាបាន “បញ្ចេញព័ត៌មានព័ត៌មិនពិត” និង “បញ្ចេញមតិមិនត្រឹមត្រូវ”។

លោកវេជ្ជបណ្ឌិត Li បន្ទាប់មកក៏បានឆ្លងវីរុសកូរ៉ូណា COVID-19 នៅពេលកំពុងព្យាបាលអ្នកជំងឺ ហើយបានបាត់បង់ជីវិតកាលពីថ្ងៃទី27មីនា នៅមន្ទីរពេទ្យCentral Hospital។ នៅមុនពេលលោកស្លាប់ លោកវេជ្ជបណ្ឌិតរូបនេះក៏ធ្លាប់បានសម្ភាសជាមួយសារព័ត៌មាន New York Time និងបានថ្លែងថា “បើសិនជាក្រុមមន្ត្រីបានបញ្ចេញព័ត៌មានស្ដីអំពីជំងឺនេះបានឆាប់ ខ្ញុំគិតថាស្ថានភាពនឹងបានធូរស្រាលជាងនេះច្រើន។ គេត្រូវការភាពស្មោះត្រង់ និងតម្លាភាពជាងនេះ”។

ការស្លាប់របស់គ្រូពេទ្យ Li បានធ្វើឱ្យមានការខឹងសម្បាយ៉ាងខ្លាំងពីសំណាក់ប្រជាជនចិន។ ពួកគេអំពាវនាវឱ្យមានសេរីភាពក្នុងការបញ្ចេញមតិ និងឱ្យអាជ្ញាធរសុំទោសជាដើម។ល។ ប្រការនេះបានជះឥទ្ធិពលដល់រដ្ឋាភិបាលចិន។ ថ្ងៃទី19មីនា NSC(National Supervisory Commission) ដែលជាអង្គភាពប្រឆាំងអំពើពុករលួយរបស់ប្រទេសចិន បានប្រកាសថា ទង្វើដែលអាជ្ញាធរទីក្រុង Wuhan ពិន័យទៅលើវេជ្ជបណ្ឌិត Li Wenliang គឺជារឿង “ខុសប្រក្រតី” និង “មិនត្រឹមត្រូវ”។

NSC ថ្លែងថា នគរបាលទីក្រុង Wuhan ត្រូវតែទទួលខុសត្រូវ ហើយការពិន័យទៅលើវេជ្ជបណ្ឌិត Li ក៏ត្រូវតែលុបចោល។ អាជ្ញាធរទីក្រុង Wuhan ក្រោយមកក៏បានធ្វើការសុំទោស និងដកការពិន័យរបស់ខ្លួនមកវិញ។

នៅព្រឹកនេះ ប្រទេសចិនទាំងមូលបានធ្វើការគោរពវិញ្ញាណក្ខន្ធ3នាទី ដើម្បីលើកតម្កើងកិត្តិយសរបស់វីរជន វីរនាីទាំងអស់ដែលបានស្លាប់ក្នុងសង្គ្រាមប្រឆាំងនឹងវីរុសCOVID-19៕

ប្រភព៖ សារព័ត៌មានបរទេស

April 4, 2020

មនុស្សជិត59,000នាក់បានស្លាប់ដោយសារ COVID-19 នៅទូទាំងពិភពលោក

អឺរ៉ុប និងសហរដ្ឋអាមេរិកបន្តជាចំណុចក្ដៅរបស់ COVID-19 នាំឱ្យករណីឆ្លងមេរោគនៅទូទាំងពិភពលោកកើនឡើងជិត1.1លាននាក់ ក្នុងនោះអ្នកជំងឺជិត59,000នាក់ បានបាត់បង់ជីវិត។

យោងតាមទិន្នន័យរបស់សាកលវិទ្យា John Hopkins ពិភពលោកទាំងមូលមានអ្នកឆ្លងមេរោគ COVID-19 ចំនួន1,094,068នាក់ ក្នុងនោះអ្នកស្លាប់មានចំនួន58,787នាក់។ អ្នកឆ្លងមេរោគថ្មីកើន 82,578ករណី និងអ្នកស្លាប់ថ្មីកើន5,924ករណី ក្នុងរយៈពេល24ម៉ោងកន្លងមកនេះ។ ក្នុងចំណោមអ្នកជំងឺសរុប មាន225,796ករណីបានជាសះស្បើយ ដែលភាគច្រើនគឺនៅប្រទេសចិន។

សហរដ្ឋអាមេរិក៖ មានអ្នកឆ្លងមេរោគថ្មី28,667ករណី និងអ្នកឆ្លងមេរោគសរុប273,880ករណី។ អ្នកស្លាប់ថ្មី1,094ករណី និងអ្នកស្លាប់សរុប7,094ករណី។

អ៊ីតាលី៖ អ្នកឆ្លងវីរុសថ្មី4,585ករណី និងឆ្លងសរុប119,827ករណី។ អ្នកស្លាប់ថ្មី766ករណី និងអ្នកស្លាប់សរុប14,681ករណី។

អេស្ប៉ាញ៖ អ្នកឆ្លងមេរោគថ្មី7,134ករណី និងអ្នកឆ្លងសរុប119,199ករណី។ អ្នកស្លាប់ថ្មី850ករណី និងស្លាប់សរុប11,198ករណី

អាល្លឺម៉ង់៖ អ្នកឆ្លងមេរោគថ្មី6,365ករណី និងអ្នកឆ្លងសរុប91,159ករណី។ អ្នកស្លាប់ថ្មី168ករណី និងអ្នកស្លាប់សរុប1,275ករណី។

អង់គ្លេស៖ អ្នកឆ្លងមេរោគថ្មី4,450ករណី និងអ្នកឆ្លងសរុប38,168ករណី។ អ្នកស្លាប់ថ្មី684ករណី និងស្លាប់សរុប3,560ករណី។

នៅប្រទេសចិន តួលេខចុងក្រោយបង្ហាញថា ចំនួនអ្នកឆ្លងមេរោគសរុបមាន81,639ករណី និងអ្នកស្លាប់សរុប3,326ករណី ខណៈកូរ៉េខាងត្បូង មានអ្នកឆ្លងមេរោគសរុប10,156ករណី និងស្លាប់សរុប177ករណី។

ប្រទេសអ៊ីរ៉ង់មានអ្នកឆ្លងមេរោគសរុប53,183ករណី និងស្លាប់សរុប3,294ករណី បន្ទាប់ពីបានរកឃើញអ្នកជំងឺថ្មី2,715ករណី និងស្លាប់ថ្មី134ករណី។

អាស៊ីអាគ្នេយ៍៖ ម៉ាឡេស៊ីគឺជាសម្បុកមេរោគធំបំផុត ដោយមានអ្នកជំងឺ3,333នាក់ និងស្លាប់53នាក់។ ចំណែកឥណ្ឌូនេស៊ីវិញគឺជា “វាលពិឃាត” ធំបំផុតរបស់វីរុសCOVID-19 ក្នុងតំបន់នេះ ដោយមានអ្នកស្លាប់181នាក់ ក្នុងចំណោមអ្នកជំងឺ1,986នាក់។ ហ្វីលីពីនមានអ្នកផ្ទុកមេរោគ3,018ករណី ក្នុងនោះមាន136ករណីបានបាត់បង់ជីវិត។ ប្រទេសថៃ មានអ្នកជំងឺសរុប1,978នាក់ ក្នុងនោះករណីស្លាប់មានចំនួន19នាក់៕

ប្រភព៖ AFP/Worldometers

April 4, 2020

ករណីស្លាប់ និងឆ្លង COVID-19 នៅអាស៊ីអាគ្នេយ៍ បន្តកើនឡើងគួរឱ្យព្រួយបារម្ភ

ប្រទេសម៉ាឡេស៊ីថ្ងៃនេះបានរកឃើញអ្នកជំងឺCOVID-19ថ្មីចំនួន217ករណីបន្ថែមទៀត នាំឱ្យករណីឆ្លងមេរោគសរុបកើនលើសពី3,300នាក់ ខណៈដែលឥណ្ឌូនេស៊ី បានរកឃើញអ្នកផ្លុកមេរោគកូរ៉ូណាច្រើនបំផុតរាប់ចាប់ពីមេរោគនេះបានបង្ហាញខ្លួននៅប្រទេសនេះ។

រដ្ឋមន្ត្រីក្រសួងសុខាភិបាលម៉ាឡេស៊ី ថ្ងៃនេះបានឱ្យដឹងថា ប្រទេសនេះមានអ្នកស្លាប់ដោយសារមេរោគCOVID-19 ចំនួន3នាក់បន្ថែមទៀត ធ្វើឱ្យចំនួនករណីស្លាប់ដោយសារមេរោគនេះកើនដល់53នាក់ ក្នុងចំណោមអ្នកជំងឺសរុប3,333នាក់។ ម៉ាឡេស៊ីគឺជាសម្បុកមេរោគកូរ៉ូណាធំជាងគេនៅតំបន់អាស៊ីអាគ្នេយ៍។។

“វាលពិឃាត” របស់ COVID-19 ដែលធំជាងគេលំដាប់ទី2នៅតំបន់អាស៊ីអាគ្នេយ៍ នោះគឺប្រទេសហ្វីលីពីន ដោយមានអ្នកស្លាប់សរុប136ករណី ក្នុងនោះមាន29ករណីទើបបានកើតឡើងក្នុងថ្ងៃនេះ។ ប្រទេសនេះក៏ទើបបានរកឃើញអ្នកផ្ទុកមេរោគកូរ៉ូណាថ្មីចំនួន385នាក់បន្ថែមទៀតដែរ នាំឱ្យចំនួនអ្នកជំងឺកើនដល់3,018នាក់។

ប្រទេសថៃ ថ្លៃនេះបានរកឃើញករណីឆ្លងមេរោគថ្មី103ករណី ធ្វើឱ្យអ្នកជំងឺសរុបឡើងដល់1,978នាក់។ ប្រទេសនេះ មានអ្នកស្លាប់ដោយសារ COVID-19 ចំនួន19នាក់ ក្នុងនោះមាន4នាក់ទើបតែបានស្លាប់ក្នុងថ្ងៃនេះ។

ចំណែកប្រទេសឥណ្ឌូនេស៊ីវិញ ទើបបានរកឃើញអ្នកផ្ទុកមេរោគកូរ៉ូណាចំនួន196ករណីបន្ថែមទៀតដែរ បណ្ដាលឱ្យតួលេខនៃអ្នកជំងឺឡើងដោយ1,986នាក់។ ឥណ្ឌូនេស៊ីជា “វាលពិឃាត” ធំបំផុតរបស់ COVID-19 នៅក្នុងតំបន់អាស៊ីអាគ្នេយ៍ ដោយមានអ្នកស្លាប់181នាក់។

តួលេខនៃចំនួនអ្នកបានឆ្លងមេរោគកូរ៉ូណាសរុបនៅប្រទេសសិង្ហបុរី បានឡើងដល់1,114ករណី ក្នុងនោះអ្នកស្លាប់មានចំនួន5ករណី បើគិតមកដល់ពេលនេះ។

ប្រទេសវៀតណាម ថ្ងៃនេះបានរកឃើញអ្នកជំងឺថ្មីចំនួន10ករណី ធ្វើឱ្យករណីឆ្លងមេរោគកូរ៉ូណាសរុបឡើងដល់237ករណី ក្នុងនោះមាន86ករណីបានជាសះស្បើយ។

ប្រទេសប៊្រុយណេ មានអ្នកជំងឺសរុប134នាក់ ក្នុងនោះមានអ្នកជំងឺម្នាក់បានបាត់បង់ជីវិត។

ប្រទេសមីយ៉ានម៉ារ បានរកឃើញអ្នកជំងឺកូរ៉ូណាសរុប20នាក់ ក្នុងនោះមានម្នាក់បានស្លាប់។

ប្រទេសឡាវ មានអ្នកជំងឺសរុប10នាក់។ ប្រទេសនេះមិនទាន់មានអ្នកស្លាប់នៅឡើយ។

ទីម័រខាងកើត ដែលជាប្រទេសមួយស្ថិតនៅក្នុងតំបន់អាស៊ីភាគអាគ្នេយ៍ដែរនោះ មានអ្នកជំងឺសរុប1នាក់។

នៅកម្ពុជា មកដល់បច្ចុប្បន្នបានរកឃើញអ្នកផ្ទុកមេរោគកូរ៉ូណាសរុបចំនួន114ករណី បន្ទាប់ពីបានរកឃើញ4ករណីថ្មីក្នុងថ្ងៃនេះ។ ក្នុងចំណោមអ្នកបានឆ្លងមេរោគសរុប គឺមាន79ករណីកំពុងទទួលការព្យាបាល និង35ករណីបានជាសះស្បើយ។

COVID-19 បានបង្ហាញវត្តមាននៅក្នុងប្រទេស និងដែនដីចំនួន204 នៅទូទាំងពិភពលោក បណ្ដាលឱ្យមនុស្សជាង54,465នាក់បានស្លាប់ និង38,405នាក់កំពុងប្រឈមនឹងការស្លាប់ ខណៈដែល220,025នាក់បានជាសះស្បើយ ក្នុងចំណោមអ្នកជំងឺសរុប1,034,163នាក់៕

ប្រភព៖ សារព័ត៌មានបរទេស

April 3, 2020

ភ័ស្តុតាងបង្ហាញថា COVID-19 មិនមែនជាផលិតផលបង្កើតឡើងដោយមនុស្សលោក

ការវិភាគទៅលើប្រព័ន្ធហ្សែនរបស់ COVID-19 បានបង្ហាញថា រចនាសម្ព័ន្ធប្រូតេអ៊ីនរាងបន្លានៅលើផ្ទៃខាងលើនៃវីរុសនេះ ធ្វើការដោយមានប្រសិទ្ធភាពខ្លាំងណាស់ រហូតដល់ក្រុមអ្នកវិទ្យាសាស្ត្រអាចសន្និដ្ឋានបានថា មនុស្សមិនអាចបង្កើតបានមេរោគបែបនេះនោះឡើយ។

ក្រុមអ្នកវិទ្យាសាស្ត្របានឱ្យដឹងថា COVID-19 មិនមែនជាផលិតផលនៃការបង្កើតឡើងដោយមនុស្សនោះទេ នៅពេលបានប្រៀបធៀបលំដាប់អាស៊ីត RNA (Ribonucleic acid) របស់វីរុសCOVID-19 ជាមួយនឹងវីរុសSARS, MERS និងបណ្ដាវីរុសកូរ៉ូណាប្រភេទផ្សេងទៀត ដូចជាវីរុស HKU1 ដែលបង្កអាការរោគស្រាលនៅលើមនុស្សជាដើម។

លទ្ធផលនៃការសិក្សាស្រាវជ្រាវនេះ ត្រូវបានចុះផ្សាយកាលពីថ្ងៃទី17មីនា លើទស្សនាវដ្ដី Nature។ ការសិក្សាស្រាវជ្រាវនេះ ផ្ដោតសំខាន់ទៅលើបណ្ដាប្រូតេអ៊ីនដែលមានរូបរាងដូចបន្លារបស់ COVID-19។ ប្រូតេអ៊ីននេះ រួមមានដែនតភ្ជាប់ RDB (Receptor Binding Domain) និងទីតាំងកាត់ផ្ដាច់ (Cleavage Site)។

RDB ថ្ពក់ជាប់ទៅនឹងទីតាំងភ្ជាប់ ACE2 ដែលមាននៅលើកោសិកាមនុស្ស បន្ទាប់មក Cleavage Site បើកផ្លូវឱ្យវីរុសរុកចូលទៅខាងក្នុងកោសិកា។ រចនាសម្ព័ន្ធរបស់ប្រូតេអ៊ីនរូបបន្លារបស់វីរុសCOVID-19 ធ្វើការមានប្រសិទ្ធភាពរហូតដល់ថ្នាក់ “មានតែធម្មជាតិប៉ុណ្ណោះទើបអាចធ្វើបែបនេះបាន” ពោលគឺមិនមែនជាផលិតផលផ្នែកជីវសាស្ត្ររបស់មនុស្សនោះទេ។

នៅពេលដែលអ្នកវិទ្យាសាស្ត្របង្កើតវីរុស COVID-19 នៅលើកុំព្យូទ័រ ពួកគេឃើញថា សមត្ថភាពឆ្លងរបស់វីរុសនៅលើកុំព្យូទ័រ មានលក្ខណៈខ្សោយជាងច្រើនណាស់បើធៀបនឹងវីរុសនៅខាងក្រៅ។

វេជ្ជបណ្ឌិត Kristian Andersen នៅមន្ទីរពិសោធន៍ Scripps ដែលជាសមាជិកម្នាក់នៃក្រុមអ្នកវិទ្យាសាស្ត្រខាងលើ បានឱ្យដឹងថា បើសិនជាអ្នកវិទ្យាសាស្ត្រជាអ្នកបង្កើតវីរុសCOVID-19ពិតមែន នោះពួកគេនឹងមិនជ្រើសយកប្រូតេអ៊ីនវ៉ារ៉្យុង(variant protein) ដែលមិនសូវមានប្រសិទ្ធភាពនោះទេ។ ក្រៅពីនេះ អាវុធជីវសាស្ត្រជាទូទៅត្រូវបានបង្កើតឡើងដោយវីរុសសាហាវៗ។ ក៏ប៉ុន្តែ បណ្ដាវីរុសសែស្រឡាយជិតរបស់កូរ៉ូណាCOVID-19 ដែលមាននៅលើសត្វប្រចៀវ និងពង្រូល វាហាក់មិនបង្កគ្រោះថ្នាក់នោះឡើយ។

រូបរាង និងរចនាសម្ព័ន្ធរបស់វីរុសកូរ៉ូណាCOVID-19

COVID-19 ត្រូវបានគេជឿថា បានឆ្លងពីសត្វប្រចៀវ ទៅពង្រូល និងពីពង្រូលទៅកាន់មនុស្ស។ ក្រុមអ្នកវិទ្យាសាស្ត្រខាងលើបានឱ្យដឹងថា ពួកគេកំពុងតែធ្វើការដើម្បីកំណត់ឱ្យបានច្បាស់ទៅលើបញ្ហានេះ៕

ប្រភព៖ សារព័ត៌មានបរទេស

April 3, 2020

ធ្លុះ 1លាននាក់ហើយ!! ចំនួនអ្នកឆ្លងមេរោគកូវីដ-19ទូទាំងពិភពលោក អាមេរិកធ្ងន់ធ្ងរបំផុត លើស 2.3សែននាក់

សារព័ត៌មានរ៉យទ័របានរាយការណ៍ដោយយោងតាមព័ត៌មានពីមហាវិទ្យាល័យ ចន ហប់គីនស៍ថា ចំនួនអ្នកឆ្លងមេរោគកូរ៉ូណាប្រភេទថ្មី ឬកូវីដ-19 បានកើនឡើងលើស 1លាននាក់ហើយកាលពីថ្ងៃព្រហស្បតិ៍(ទី2មេសា)ម្សិលមិញ ដោយរោគរាតត្បាតដ៏ចង្រៃនេះ នៅតែចម្លងមេរោគយ៉ាងធ្ងន់ធ្ងរនៅក្នុងប្រទេសអាមេរិក ខណៈដែលចំនួនអ្នកស្លាប់នៅតែកើនឡើងជារឿយៗ ទាំងនៅក្នុងប្រទេសអ៊ីតាលី និងអេស្ប៉ាញ។

វេបសាយតាមដានស្ថានការណ៍ការឆ្លងរាលដាលនៃមេរោគកូវីដ-19 បែបអនឡាញ របស់មហាវិទ្យាល័យ ចន ហប់គីនស៍ ថែមទាំងបានរកឃើញថា វីរុសកូវីដ-19បានប្រហារជីវិតមនុស្សទូទាំងពិភពលោកលើស 51.000នាក់ហើយទៀតផង ដោយប្រទេសដែលមានអ្នកស្លាប់ច្រើនជាងគេបំផុតគឺ អ៊ីតាលី តាមក្រោយដោយអេស្ប៉ាញ និងសហរដ្ឋអាមេរិក។

តួលេខរបស់មហាវិទ្យាល័យ ចន ហប់គីនស៍ បានបង្ហាញឱ្យដឹងពីព័ត៌មានដ៏គួរឱ្យភ្ញាក់ផ្អើលមួយ ក្រោយពីបានរកឃើញថា ពិភពលោកបានប្រើពេលវេលាប្រមាណជា 55ថ្ងៃក្នុងការមានអ្នកឆ្លងមេរោគកូវីដ-19 នេះគ្រប់ 100,000នាក់ដំបូង តែបន្ទាប់ពីនោះមកក៏ឡើងធ្លុះដល់ខ្ទង់ 500,000នាក់នៅថ្ងៃទី76(21ថ្ងៃក្រោយ) មុននឹងវីរុសនេះប្រើពេលវេលាថែមទៀតត្រឹមតែ 8ថ្ងៃប៉ុណ្ណោះ រាប់តាំងពីពេលនោះ ក្នុងការចម្លងមេរោគទៅមនុស្សលោកទ្វេ 1ជា2 រហូតដល់លើស 1លាននាក់។

ចំនួនអ្នកឆ្លងមេរោគជារួមនៅថ្ងៃព្រហស្បតិ៍(ទី2មេសា) កើនឡើងពីមួយថ្ងៃមុននោះ 10% ដែលតួលេខនេះអាចនិយាយបានថា គឺជាលើកដំបូងហើយដែលមានការចម្លងមេរោគរបស់កូវីដ-19 បានកើនឡើងក្នុងកម្រិតតួលេខ 2ខ្ទង់ រាប់ចាប់តាំងពីវីរុសកូរ៉ូណាប្រភេទថ្មីនេះចាប់ផ្ដើមឆ្លងរាលដាលចេញមកក្រៅប្រទេសចិន។

ពេលនេះ មានប្រទេស និងតំបន់ផ្សេងៗ 117កន្លែង បានរាយការណ៍ពីការរកឃើញអ្នកឆ្លងមេរោគលើស 100ករណី និង 50កន្លែង មានអ្នកឆ្លងមេរោគលើស 1,000ករណី និងមាន 7ប្រទេស ដែលបានរាយការណ៍អំពីការរកឃើញអ្នកឆ្លងមេរោគលើស 50,000នាក់ ភាគច្រើននៅក្នុងទ្វីបអឺរ៉ុប។

បច្ចុប្បន្នអ្នកស្លាប់ទូទាំងពិភពលោក ស្ថិតក្នុងកម្រិតលើសពី 5% របស់គ្រប់ករណីអ្នកឆ្លងមេរោគដែលមានការរាយការណ៍ជាផ្លូវការ ដោយសហរាជអាណាចក្រ, សហរដ្ឋអាមេរិក, និងប្រទេសអេស្ប៉ាញ សុទ្ធតែបានរាយការណ៍ពីចំនួនអ្នកស្លាប់កើនឡើងយ៉ាងច្រើនក្នុងអំឡុងពេលមិនប៉ុន្មានថ្ងៃកន្លងមកនេះ។

ក្នុងករណីអ្នកឆ្លងមេរោគទាំងអស់របស់ពិភពលោក មានប្រមាណ 22% ស្ថិតក្នុងសហរដ្ឋអាមេរិក(ប្រមាណ 238,000នាក់) ចំណែកអ៊ីតាលី និងអេស្ប៉ាញ គិតត្រួសៗប្រមាណជា 10%ក្នុង1ប្រទេស ខណៈដែលចិន ប្រទេសដែលមេរោគវីរុសកើតឡើងមុនគេនោះ មានអ្នកឆ្លងមេរោគគិតជាភាគរយ ប្រមាណ 8% នៃចំនួនអ្នកឆ្លងមេរោគទាំងអស់របស់ពិភពលោក ដែលនេះជាភ័ស្តុតាងជាក់ស្ដែងថា មណ្ឌលកណ្ដាលនៃការឆ្លងសាយភាយ បានចូលមកដល់អឺរ៉ុប និងអាមេរិកហើយ។

ទាំងអស់នេះ បើរាប់គ្រប់ប្រទេសនៅក្នុងអឺរ៉ុបរួមគ្នា ពួកគេមានចំនួនអ្នកឆ្លងមេរោគ គិតទៅជាងពាក់កណ្ដាលនៃអ្នកឆ្លងមេរោគទូទាំងពិភពលោក និងមានអ្នកស្លាប់រួមគ្នាច្រើនជាង 70% នៃចំនួនអ្នកស្លាប់ទូទាំងពិភពលោក ដោយប្រទេសជាច្រើននៅភាគខាងត្បូងនៃទ្វីបអឺរ៉ុប ដែលជាសង្គមប្រជាជនវ័យចំណាស់ បានក្លាយជាប្រទេសដែលរងផលប៉ះពាល់ពីការឆ្លងរាតត្បាតនេះធ្ងន់ធ្ងរបំផុត៕

ប្រភព៖ សារព័ត៌មានបរទេស

April 3, 2020

ផែនការបើករថភ្លើងបំបុកនាវាមន្ទីរពេទ្យនៅសហរដ្ឋអាមេរិក(វីដេអូ)

អ្នកបើកបររថភ្លើងម្នាក់ត្រូវបានចាប់ខ្លួន បន្ទាប់ពីបានព្យាយាមបង្វែរក្បាលរថភ្លើងតម្រង់ទៅកាន់នាវាមន្ទីរពេទ្យ USNS Mercy នៅក្នុងរដ្ឋ Los Angeles ដោយសារតែអ្នកបើកបររូបនេះ សង្ស័យអំពីគោលបំណងនៃវត្តមានរបស់នាវាមន្ទីរពេទ្យនេះ។

Eduardo Moreno អាយុ44ឆ្នាំ រស់នៅក្នុងតំបន់ San Pedro ត្រូវបានចោទប្រកាន់ពីបទព្រហ្មទណ្ឌ ក្រោយការបំផ្លាញរថភ្លើងកាលពីយប់ថ្ងៃទី31មករា” នេះបើតាមការប្រកាសរបស់ការិយាល័យមេធាវីនៃតំបន់ Central District ក្នុងរដ្ឋ California នាថ្ងៃនេះ។

កាមេរ៉ានៅកន្លែងកើតហេតុបានបង្ហាញថា Moreno បានបើកបររថភ្លើងក្នុងល្បឿនលឿនបំផុតនៅចុងផ្លូវដែក ក្បែរកំពង់ផែ Los Angeles។ រថភ្លើងនេះបានបុករបងបេតុង រួចទម្លុះរបងដែក និងរបងសំណាញ់ដែក បន្ទាប់មកក៏ជ្រុលទៅដល់ទីលានចតរថយន្ត និងបុកទៅលើជញ្ជាំងរបងផ្សេងមួយទៀត។

ហេតុការណ៍នេះ មិនបានធ្វើឱ្យមានអ្នកស្លាប់នោះទេ ហើយក៏មិនមានរថយន្តណាមួយត្រូវរងការខូចខាតនោះដែរ។ ក្បាលរថភ្លើង បានឈប់ក្នុងរយៈចម្ងាយប្រហែល200ម៉ែត្រពីនាវាមន្ទីរពេទ្យ USNS Mercy។

ជនសង្ស័យបានសារភាពរួចហើយនៅក្នុងការសួរចម្លើយរបស់សមត្ថកិច្ចនៅឯកំពង់ផែ Los Angeles នៅមុនពេលត្រូវបានបញ្ជូនទៅកាន់ការិយាល័យស៊ើបអង្កេតសហព័ន្ធ (FBI)។ Moreno បានឱ្យដឹងថា សកម្មភាពនេះត្រូវបានធ្វើឡើងដើម្បីទាក់ទាញចំណាប់អារម្មណ៍របស់ក្រុមអ្នកសារព័ត៌មាន ដោយបានអះអាងថា វត្តមានរបស់នាវាមន្ទីរពេទ្យ USNS Mercy មិនមែនដើម្បីជួយដល់ការប្រឆាំងនឹងវីរុសCOVID-19 នោះទេ ប៉ុន្តែវាគ្រាន់តែជា “ផ្នែកមួយក្នុងផែនការក្ដោបក្ដាប់អំណាចរបស់រដ្ឋាភិបាល” តែប៉ុណ្ណោះ។ នេះបើតាម Washington Times។

“Moreno យល់ថា USNS Mercy ពិតជាគួរឱ្យសង្ស័យ ហើយគាត់ក៏មិនជឿទៅលើការប្រកាសរបស់មន្ត្រីអំពីគោលបំណងរបស់វា (នាវា)” នេះបើតាមការប្រកាសរបស់ការិយាល័យមេធាវី។ ការប្រកាសនេះបន្តថា ជនសង្ស័យអាចប្រឈមនឹងការកាត់ទោសឱ្យជាប់ពន្ធនាគាររយៈពេល20ឆ្នាំ។

មុននេះ ប្រធានាធិបតីសហរដ្ឋអាមេរិក បានបញ្ជាឱ្យនាវាមន្ទីរពេទ្យ USNS Mercy ធ្វើដំណើរទៅកាន់ Los Angeles និងនាវា USNS Comfort ទៅកាន់ទីក្រុង New York។ នាវានីមួយៗ មានគ្រែចំនួន1,000 និងបន្ទប់វះកាត់ចំនួន12។ នាវាទាំងនេះមិនមានសមត្ថភាពព្យាបាល COVID-19 នោះទេ ប៉ុន្តែវាអាចទទួលព្យាបាលអ្នកជំងឺធម្មតា (ក្រៅពីជំងឺកូរ៉ូណា) ដើម្បីទុកឱ្យមន្ទីរពេទ្យនានានៅលើគោក អាចផ្ដោតទៅលើការព្យាបាលតែអ្នកជំងឺ COVID-19។

USNS Comfort និង USNS Mercy គឺជានាវាមន្ទីរពេទ្យដែលស្ថិតក្នុងក្រុមនាវា Mercy ដែលជានាវាប្រភេទធំបំផុតលំដាប់ទី3ក្នុងជួរកងទ័ពជើងទឹកសហរដ្ឋអាមេរិក បន្ទាប់ពីកំពូលនាវា Nimitz និង Gerald R. Ford៕

ប្រភព៖ សារព័ត៌មានបរទេស

April 3, 2020

លទ្ធផលពិសោធន៍ថ្មី៖ COVID-19 អាចរក្សាជីវិតបាន7ថ្ងៃនៅលើម៉ាស់(វីដេអូ)

“ថ្វីបើវីរុសCOVID-19 អាចរក្សាជីវិតរបស់វាបានដល់ទៅ7ថ្ងៃនៅលើម៉ាស់ ប៉ុន្តែពួកវាក៏ងាយនឹងត្រូវសម្លាប់ដោយវិធីសាមញ្ញ” នេះបើតាមការសិក្សាស្រាវជ្រាវថ្មីរបស់សាកលវិទ្យាល័យហុងកុង។

លទ្ធផលនៃការសិក្សាស្រាវជ្រាវនេះត្រូវបានប្រកាសកាលពីថ្ងៃទី15មីនា នៅលើគេហទំព័រ medRxiv របស់ក្រុមអ្នកវេជ្ជសាស្ត្រនៃសាកលវិទ្យាល័យហុងកុង។ ការសិក្សាស្រាវជ្រាវនេះបានបង្ហាញថា រយៈពេលនៃការរស់រានមានជីវិតរបស់វីរុសCOVID-19 មានភាពខុសគ្នាអាស្រ័យទៅលើបរិយាកាស ឬផ្ទៃនៃវត្ថុដែលវាកំពុងស្ថិតនៅ។

ក្រុមអ្នកវិទ្យាសាស្ត្របានបន្តក់វីរុសដែលគេបានបណ្ដុះ 1តំណក់ទៅលើផ្ទៃលើនៃវត្ថុមួយចំនួន រួមមាន ក្រដាស ឈើក្រដាសជូតមាត់ ក្រណាត់ វ៉ែនតា ប្រាក់ ដែកអ៊ីណុក ជ័រ រួមនឹងម៉ាស់ជាដើម។

ជាលទ្ធផល ក្រុមអ្នកវេជ្ជសាស្ត្រមិនបានរកឃើញវីរុសCOVID-19 នៅលើក្រដាស និងក្រដាសជូនមាត់នោះទេ បន្ទាប់ពីបានបន្តក់មេរោគរយៈពេល3ម៉ោង។

COVID-19 ក៏មិនមាននៅជាប់នៅលើឈើ និងក្រណាត់ បន្ទាប់ពី2ថ្ងៃក្រោយការបន្តក់មេរោគ។ បន្ទាប់ពីរយៈពេល4ថ្ងៃ គេក៏មិនឃើញមានវីរុសនេះនៅជាប់នៅលើកញ្ចក់វ៉ែនតា និងក្រដាសប្រាក់នោះដែរ។ វីរុសកូរ៉ូណាCOVID-19 អាចរក្សាជីវិតរបស់វាបានដល់ទៅ7ថ្ងៃ នៅលើដែកអ៊ីណុក និងជ័រ។

អ្វីដែលគួរឱ្យបារម្ភជាងគេនោះគឺថា នៅផ្ទៃខាងក្រៅនៃម៉ាស់ពេទ្យ (surgical mask) វីរុសនេះអាចរក្សាជីវិតរបស់វាបានដល់ទៅ7ថ្ងៃ ដូចទៅនឹងនៅលើជ័រ និងដែកអ៊ីណុក។

ក្រុមអ្នកវេជ្ជសាស្ត្របានសន្និដ្ឋានថា បើទោះវីរុស COVID-19 អាចមានជីវិតយូរថ្ងៃនៅលើវត្ថុមួយចំនួន ប៉ុន្តែវាក៏ងាយនឹងត្រូវបានសម្លាប់ដោយវិធីកំចាត់មេរោគសាមញ្ញៗផងដែរ៕

ប្រភព៖ សារព័ត៌មានបរទេស

April 3, 2020

ប្រធានសភាអ៊ីរ៉ង់ បានឆ្លងវីរុសCOVID-19!

លោក Ali Larijani អាយុ62ឆ្នាំ ជាប្រធានសភាអ៊ីរ៉ង់ ត្រូវបានរកឃើញថាវិជ្ជមានជាមួយនឹងវីរុសCOVID-19 ហើយលោកកំពុងទទួលការព្យាបាលក្នុងបន្ទប់ដាច់ដោយឡែក។

ស្ថានីយទូរទស្សន៍ជាតិអ៊ីរ៉ង់កាលពីម្សិលមិញបានចេញផ្សាយថា ប្រធានសភាអ៊ីរ៉ង់ លោក Ali Larijani ត្រូវបានធ្វើតេស្តរកមេរោគCOVID-19 បន្ទាប់ពីមានរោគសញ្ញាមួយចំនួន។ លទ្ធផលនៃការធ្វើតេស្ត បានរកឃើញថាលោកមានផ្ទុកមេរោគCOVID-19 ហើយលោកក៏កំពុងទទួលការព្យាបាល។

លោក Ali Larijani បានក្លាយជាមន្ត្រីម្នាក់ ក្នុងចំណោមមន្ត្រីជាន់ខ្ពស់របស់អ៊ីរ៉ង់ដែលបានឆ្លងវីរុសកូរ៉ូណានេះ។ មុននេះ អនុប្រធានាធិបតី Masoumeh Ebtekar រួមនឹងប្រធានគណៈកម្មការកិច្ចការបរទេស និងសន្តិសុខជាតិរបស់សភាអ៊ីរ៉ង់ លោក Mojtaba Zolnour និងតំណាងរាស្ត្រ Mahmoud Sadeghi និងអនុរដ្ឋមន្ត្រីក្រសួងសុខាភិបាល លោក Iraj Harirchi ក៏បានឆ្លងវីរុសCOVID-19។

លោក Hadi Khosroshahi ជាបព្វជិតម្នាក់នៅទីក្រុង Qom ដែលជាអតីតឯកអគ្គរដ្ឋទូតអ៊ីរ៉ង់ប្រចាំនៅទីក្រុង Vatican ក៏បានទទួលមរណភាពដោយសារ COVID-19។

ប្រទេសអ៊ីរ៉ង់នៅតែជាសម្បុកមេរោគធំជាងគេលំដាប់ទី2នៅទ្វីបអាស៊ី បន្ទាប់ពីប្រទេសចិន ដោយមានអ្នកជំងឺសរុប50,468នាក់ និងអ្នកស្លាប់សរុប3,160នាក់៕

ប្រភព៖ សារព័ត៌មានបរទេស

April 3, 2020

មនុស្សជាង1លាននាក់បានឆ្លងវីរុសCOVID-19 នៅទូទាំងពិភពលោក ខណៈកម្ពុជាមានត្រឹមជាង100នាក់ប៉ុណ្ណោះ

ពិភពលោកទាំងមូលមានអ្នកឆ្លងមេរោគCOVID-19 ដល់ទៅជាង1លាននាក់ និងអ្នកស្លាប់ដោយសារមេរោគនេះក៏បានកើនឡើងដល់ជិត53,000នាក់។

យោងតាមសាកលវិទ្យាល័យ John Hoskin គិតមកដល់ពេលនេះ ពិភពលោកមានអ្នកឆ្លងមេរោគCOVID-19 ចំនួន1,011,490នាក់ និងអ្នកស្លាប់មានចំនួន52,863នាក់ បន្ទាប់ពីបានរកឃើញអ្នកផ្ទុកមេរោគថ្មីចំនួន77,902នាក់ និងអ្នកស្លាប់5,994នាក់។ ចំនួនអ្នកដែលបានជាសះស្បើយ មាន210,186នាក់។

ទិន្នន័យបានបង្ហាញថា ចំនួនអ្នកស្លាប់ដោយសារមេរោគCOVID-19 បានកើនទ្វេដង រាប់ចាប់ពីថ្ងៃទី27មីនា។ បច្ចុប្បន្ន អឺរ៉ុបគឺជាសម្បុកមេរោគធំជាងគេ ដោយមានអ្នកឆ្លងវីរុស542,191នាក់ ក្នុងនោះមាន37,715នាក់បានបាត់បង់ជីវិត គឺស្មើនឹង54% និង73% នៃតួលេខទូទាំងពិភពលោក។ នេះបើតាម AFP។

សហរដ្ឋអាមេរិក៖ ជាសម្បុកមេរោគធំបំផុតក្នុងពិភពលោក ដោយមានអ្នកឆ្លងមេរោគសរុប243,298នាក់ និងស្លាប់5,883នាក់ បន្ទាប់ពីបានរកឃើញករណីឆ្លងមេរោគថ្មី 28,295នាក់ និងស្លាប់ថ្មី781នាក់។

អ៊ីតាលី៖ អ្នកជំងឺថ្មី4,668នាក់ និងអ្នកស្លាប់ថ្មី760នាក់។ អ្នកជំងឺសរុប115,242នាក់ និងអ្នកស្លាប់សរុប13,915នាក់។ ប្រទេសនេះ នៅតែបន្តជា “វាលពិឃាត” ធំជាងគេរបស់ COVID-19។

អេស្ប៉ាញ៖ អ្នកជំងឺថ្មី7,947នាក់ និងអ្នកស្លាប់ថ្មី961នាក់។ អ្នកជំងឺសរុប112,065នាក់ និងអ្នកស្លាប់សរុប10,348នាក់។

អាល្លឺម៉ង់៖ អ្នកជំងឺថ្មី6,813នាក់ និងអ្នកស្លាប់ថ្មី176នាក់។ អ្នកជំងឺសរុប84,794នាក់ និងអ្នកស្លាប់សរុប1,107នាក់។ ប្រទេសនេះ ជាសម្បុកមេរោគធំបំផុតលំដាប់ទី3នៅទ្វីបអឺរ៉ុប។

អង់គ្លេស៖ អ្នកជំងឺថ្មី4,244នាក់ និងអ្នកស្លាប់ថ្មី569នាក់។ អ្នកជំងឺសរុប33,718នាក់ និងអ្នកស្លាប់សរុប2,921នាក់។

អ៊ីរ៉ង់៖ ប្រទេសនេះនៅតែជាសម្បុកមេរោគធំជាងគេលំដាប់ទី2នៅទ្វីបអាស៊ី បន្ទាប់ពីប្រទេសចិន ដោយមានអ្នកជំងឺសរុប50,468នាក់ និងអ្នកស្លាប់សរុប3,160នាក់។ មន្ត្រីជាច្រើនរូបរបស់អ៊ីរ៉ង់ បានឆ្លងមេរោគCOVID-19 ក្នុងនោះក៏មានករណីថ្មីបំផុត គឺប្រធានសភា Ali Larijani ផងដែរ។

ប្រទេសចិន៖ តួលេខចុងក្រោយបង្ហាញថា មានអ្នកជំងឺសរុប 82,433នាក់ និងអ្នកស្លាប់សរុប 3,322នាក់។
ប្រទេសកូរ៉េខាងត្បូង៖ តួលេខចុងក្រោយបង្ហាញថា មានអ្នកជំងឺសរុប 9,976នាក់ និងអ្នកស្លាប់សរុប 169នាក់។

អាស៊ីអាគ្នេយ៍៖ ម៉ាឡេស៊ីបន្តជាសម្បុកមេរោគធំបំផុតក្នុងតំបន់នេះ ដោយមានអ្នកជំងឺសរុប3,116នាក់ និងអ្នកស្លាប់សរុប208នាក់។ ហ្វីលីពីនមានអ្នកជំងឺសរុប2,633នាក់ និងអ្នកស្លាប់សរុប107នាក់។ ប្រទេសថៃ មានអ្នកជំងឺសរុប1875នាក់ និងស្លាប់សរុប15នាក់។ ឥណ្ឌូនេស៊ី មានអ្នកជំងឺសរុប1,790នាក់ និងស្លាប់170នាក់។

ប្រទេសកម្ពុជា៖ អ្នកដែលបានឆ្លងមេរោគCOVID-19 មានចំនួន114នាក់ ក្នុងនោះមាន80នាក់កំពុងទទួលការព្យាបាល និង34នាក់បានជាសះស្បើយ។ កម្ពុជាមិនទាន់មានករណីស្លាប់ដោយសារមេរោគនេះនៅឡើយ៕

ប្រភព៖ សារព័ត៌មានបរទេស

April 3, 2020

COVID-19! ជាប់ពន្ធនាគារកន្លះឆ្នាំ ព្រោះតែក្អកដាក់មុខសមត្ថកិច្ច

មនុស្សម្នាក់ កាលពីថ្ងៃទី1មេសាកន្លងទៅ ត្រូវបានកាត់ទោសឱ្យជាប់ពន្ធនាគាររយៈពេល6ខែ បន្ទាប់ពីបានក្អកតម្រង់ទៅលើមុខរបស់មន្ត្រីនគរបាលម្នាក់ ហើយថែមទាំងបានគំរាមថានឹងចម្លងវីរុសCOVID-19។

Adam Lewis អាយុ55ឆ្នាំ ត្រូវបានចាប់ខ្លួនក្នុងពេលកំពុងព្យាយាមគាស់ទ្វារឡានមួយគ្រឿងនៅក្នុងទីក្រុងឡុងដ៍ កាលពីថ្ងៃទី31មីនាកន្លងទៅ។ នៅពេលសមត្ថកិច្ចមកដល់ Lewis ក៏បានប្រតិកម្មដោយបោកដបស្រាដែលនៅក្បែរនោះ ហើយស្រែកគំរាមមន្ត្រីនគរបាល។ នេះបើតាមការប្រកាសរបស់នាយកដ្ឋាននគរបាលទីក្រុងឡុងដ៍ ប្រទេសអង់គ្លេស។

“ខ្ញុំគឺជាអ្នកជំងឺ COVID-19។ ខ្ញុំនឹងក្អកដាក់មុខលោកឯង ឱ្យលោកឯងឆ្លងជំងឺម្ដង” Lewis ស្រែកគំរាមបែបនេះ ហើយក្អកតម្រង់មុខសមត្ថកិច្ច។ បុរសរូបនេះថែមទាំងព្យាយាមស្ដោះទឹកមាត់តម្រង់ទៅនគរបាលទៀតផង។

បន្ទាប់ពីធ្វើសកម្មភាពដូចខាងលើ Lewis ក៏ត្រូវបានចាប់បញ្ជូនឡើងតុលាការនៅតំបន់ Westminster កាលពីម្សិលមិញ។ បុរសវ័យ55ឆ្នាំរូបនេះ ត្រូវជាប់ពន្ធនាគាររយៈពេល6ខែ ក្រោមបទចោទ “មានចេតនាវាយប្រហារសមត្ថកិច្ច” ដោយយោងទៅតាមមាត្រាមួយនៃច្បាប់របស់ប្រទេសអង់គ្លេស ដែលត្រូវបានដាក់ឱ្យអនុវត្តកាលពីខែវិច្ឆិកា ឆ្នាំ2018។

មន្ត្រីម្នាក់នៅឯតុលាការ បានឱ្យដឹងថា “ខ្ញុំសង្ឃឹមថា ការដាក់ទោសនេះនឹងជាសារមួយសម្រាប់អ្នករាល់គ្នាឱ្យដឹងថា ទង្វើបែបនោះ គឺមិនអាចអត់ឱនបានឡើយ”។

ប្រទេសអង់គ្លេស គិតមកដល់ថ្ងៃនេះបានរកឃើញអ្នកផ្ទុកមេរោគ COVID-19 ចំនួន 29,872នាក់ ក្នុងនោះអ្នកស្លាប់មានចំនួន2,357នាក់ ខណៈដែលពិភពលោកទាំងមូល មានអ្នកឆ្លងវីរុសសរុប 956,588នាក់ ក្នុងនោះមានអ្នកស្លាប់48,583នាក់ និងអ្នកបានជាសះស្បើយមានប្រមាណជា202,728នាក់៕

ប្រភព៖ សារព័ត៌មានទេស

April 2, 2020

ឯកអគ្គរដ្ឋទូតហ្វីលីពីន បានបាត់បង់ជីវិតហើយ ដោយសារតែ COVID-19

លោកស្រី Bernardita Catalla អាយុ62ឆ្នាំ ជាឯកអគ្គរដ្ឋទូតហ្វីលីពីន ប្រចាំប្រទេសលីបង់ បានបាត់បង់ជីវិតក្នុងថ្ងៃនេះនៅឯមន្ទីរពេទ្យមួយក្នុងរដ្ឋធានី Beirut នៃប្រទេសលីបង់ ក្រោយពីបានឆ្លងវីរុសCOVID-19។

ក្រសួងការបរទេសហ្វីលីពីន បានប្រកាសចូលរួមរំលែកទុក្ខដ៏ក្រៀមក្រំ បន្ទាប់ពីឯកអគ្គរដ្ឋទូតរបស់ខ្លួនប្រចាំនៅទីក្រុង Beirut បានទទួលមរណភាពដោយសារតែវីរុសបង្កជំងឺរលាកសួតថ្មី COVID-19។ លោកស្រី Catalla បានធ្វើការក្នុងវិស័យការទូតអស់រយៈពេល27ឆ្នាំមកហើយ។ លោកស្រីធ្លាប់កាន់តំណែងសំខាន់ៗប្រចាំនៅប្រទេសម៉ាឡេស៊ី និងឥណ្ឌូនេស៊ី។ នៅមុនពេលត្រូវបានតែងតាំងជាឯកអគ្គរដ្ឋទូតប្រចាំនៅប្រទេសលីបង់ លោកស្រីក៏ធ្លាប់ធ្វើជាអគ្គកុងស៊ុលរបស់ហ្វីលីពីន ប្រចាំទីក្រុងហុងកុងផងដែរ។

ប្រទេសលីបង់ មកដល់ពេលនេះ បានរកឃើញអ្នកផ្ទុកមេរោគ COVID-19 ចំនួនជិត500នាក់ ក្នុងនោះមាន16នាក់បានបាត់បង់ជីវិត។

ក្នុងរយៈពេលប៉ុន្មានខែមកនេះ លោកស្រី Catalla ត្រូវបានគេមើលឃើញថា មមាញឹកយ៉ាងខ្លាំងក្នុងការបំពេញការងារ ពិសេសគឺកិច្ចការដែលទាក់ទិននឹងការបញ្ជូនពលករហ្វីលីពីនជាច្រើនម៉ឺននាក់នៅលីបង់ ត្រឡប់ទៅកាន់ប្រទេសវិញ ខណៈមេរោគ COVID-19 កំពុងរាលដាលពាសពេញពិភពលោក។

COVID-19 បានបង្ហាញខ្លួននៅក្នុងប្រទេស និងដែនដីចំនួន203 ក្នុងពិភពលោក បណ្ដាលឱ្យមនុស្ស 956,588នាក់បានឆ្លងមេរោគ ក្នុងនោះមានអ្នកជំងឺ 48,583នាក់បានបាត់បង់ជីវិត៕

ប្រភព៖ សារព័ត៌មានបរទេស

April 2, 2020

Tag: សុខភាព