ប្រធានាធិបតីបារាំងលោក Emmanuel Macron បានថ្លែងថា លោកនឹងព្យាយាមបញ្ចុះបញ្ចូល Kylian Mbappe ឱ្យនៅជាមួយក្លឹប Paris Saint-Germain ម្ដងទៀត នៅរដូវក្ដៅឆ្នាំនេះ។
លោក Emmanuel Macron បញ្ជាក់ថា លោកបានត្រៀមខ្លួនរួចហើយសម្រាប់ការជជែកគ្នាម្ដងទៀតជាមួយនឹង Mbappe ក្នុងបំណងបញ្ចុះបញ្ចូលឱ្យកីឡាករបារាំងរូបនេះលេងបាល់ឱ្យក្លឹបក្នុងស្រុក។ ប្រសាសន៍របស់លោក Emmanuel Macron ត្រូវបានធ្វើឡើងបន្ទាប់ពី Mbappe កាលពីពេលថ្មីៗនេះ បានប្រកាសជាផ្លូវការថា មិនមានបំណងពន្យារកិច្ចព្រមព្រៀងជាមួយក្លឹប PSG និងត្រូវចាកចេញក្រោយពីចប់កិច្ចសន្យា។ ចំណែក PSG ក៏បានប្រកាសអំពីតម្លៃខ្លួន 200 លានអឺរ៉ូរបស់ Mbappe។
លោក Emmanuel Macron ថ្លែងថា «Mbappe គឺជាកីឡាករឆ្នើម និងស្ថិតក្នុងលំដាប់កំពូល ដូចដែលគ្រប់គ្នាបានដឹង។ ដូច្នេះ គាត់មានទំនោរទៅរកការធ្វើចំណាកស្រុកដើម្បីអភិវឌ្ឍសមត្ថភាព និងយកឈ្នះលើឧបសគ្គថ្មីក្នុងអាជីព»។ លោកបន្ថែមថា «ក៏ប៉ុន្តែ បច្ចុប្បន្ន ខ្ញុំមិនមានដំណឹងល្អណាមួយសម្រាប់គ្រប់គ្នា តែយ៉ាងណាក៏ដោយ ខ្ញុំនឹងប្រឹងប្រែងឱ្យអស់ពីលទ្ធភាព (ក្នុងការបញ្ចុះបញ្ចូល Mbappe) ដូចអ្វីដែលខ្ញុំបានធ្វើកន្លងមក»។
កាលពីឆ្នាំមុន ប្រធានាធិបតីបារាំង ក៏បានជជែកគ្នាជាមួយ Mbappe ទាក់ទងនឹងអនាគតរបស់កីឡាករនេះ ហើយ PSG ក៏រក្សាបាន Mbappe មួយឆ្នាំទៀត។ ក៏ប៉ុន្តែ លើកនេះ ស្ថានភាពនៅក្លឹប PSG ហាក់មិនល្អប្រសើរ គ្រាដែលកីឡាករកំពូលៗរបស់ក្លឹបនេះ មានដូចជា Messi ជាដើម ត្រូវបានអ្នកគាំទ្ររបស់ PSG ធ្វើបាបផ្លូវចិត្ត ហើយជើងខ្លាំងខ្លះក៏ចាកចេញ ឬមានបំណងចាកចេញជាបន្តបន្ទាប់ ស្របពេលដែលទីផ្សារក្រៅប្រទេសកំពុងមានភាពទាក់ទាញខ្លាំង៕
