មនុស្ស - La Reine Media

ស្ថានីយអវកាសនៅលើដីដំបូងរបស់ប្រទេសចិន

មូលដ្ឋានថ្មីដែលមានសមត្ថភាពបង្ហាញត្រាប់តាមបរិស្ថានស្ថានីយអវកាសចំនួន 9 យ៉ាង អនុញ្ញាតឱ្យអ្នកវិទ្យាសាស្ត្រធ្វើការពិសោធផ្នែកអវកាសជាច្រើនប្រភេត នៅលើផែនដីដោយផ្ទាល់។

ហេដ្ឋារចនាសម្ព័ន្ធស្រាវជ្រាវ និងធ្វើត្រាប់តាមបរិស្ថានអវកាស (SESRI) ដែលត្រូវបានចាត់ទុកថា ជាស្ថានីយអវកាសលើដីដំបូងរបស់ប្រទេសចិន បានឆ្លងផុតដំណាក់កាលវាយតម្លៃនៅខេត្ត Heilongjiang ភាគឦសានប្រទេសចិន កាលពីថ្ងៃទី 27 កុម្ភៈ។

ស្ថានីយអវកាសលើកដីនេះ ត្រូវបានសាងសង់ដោយវិទ្យាស្ថានស្រាវជ្រាវអវកាស និងវិទ្យាសាស្ត្រវត្ថុធាតុ នៃវិទ្យាស្ថានបច្ចេកវិទ្យាខេត្ត Heilongjiang (HIT) សហការជាមួយក្រុមហ៊ុនបច្ចេកវិទ្យា និងវិទ្យាសាស្ត្រអាកាសចរណ៍អវកាសចិន។

នៅក្នុងមូលដ្ឋាននេះ មានអគារពិសោធន៍ចំនួនបួន រួមមាន អគារបរិស្ថានអវកាសទាំងស្រុង, អគារវិទ្យាសាស្ត្រផ្លាស្មាអវកាស, អគារបរិស្ថានម៉ាញ៉េទិចអវកាស និងទីតាំងពង្រីកពូជសត្វ។

តាមផែនការ SESRI អាចធ្វើត្រាប់តាមកត្តាបរិស្ថានអវកាសចំនួន 9 ប្រភេទ មានជាអាទិ៍ សុញ្ញកាស សីតុណ្ហភាពខ្ពស់ និងទាប ភាគល្អិតផ្ទុកអគ្គិសនី វិទ្យុសកម្មអេឡិចត្រូម៉ាញ៉េទិច ធូលីអវកាស ផ្លាស្មា កម្លាំងទំនាញខ្សោយ ឧស្ម័នអព្យាក្រឹត និងមីក្រូទំនាញ។

យោងតាមអ្នកស្រាវជ្រាវនៅសភាវិទ្យាសាស្ត្រចិន ស្ថានីយអវកាសលើដីនេះនឹងក្លាយជាកន្លែងបណ្ដុះបណ្ដាលធនធានមនុស្សជាន់ខ្ពស់នៅប្រទេសចិន។ គិតត្រឹមខែមិថុនា 2023 មានស្ថាប័នជាង 110 មកពីប្រទេស និងដែនដីជាង 30 បានចុះឈ្មោះប្រើប្រាស់ស្ថានីយ SESRI៕

February 29, 2024

កាមេរូន និងប៉ូឡូញអភិវឌ្ឍ «កាក់ហោះ» ដូច UFO ដំបូងគេលើពិភពលោក

ធនាគារជាតិកាមេរូន និងរោងចក្រស្លកាក់ប្រាក់ប៉ូឡូញ Mennica Polska ថ្មីៗនេះបានអភិវឌ្ឍជោគជ័យនូវកាក់ UFO MP-1766 ដែលជាឧបករណ៍ហោះហើរស្របច្បាប់ដំបូងគេលើពិភពលោក។

យោងតាមទំព័រ Oddity Central (អង់គ្លេស) ឈ្មោះរបស់កាក់នេះត្រូវបានដាក់ទៅតាមលំនាំនៃថាសហោះ និងសមត្ថភាពវិលយឺតក្នុងអាកាសដូចទៅនឹងយានអវកាសរបស់មនុស្សពិភពផ្កាយ (UFO)។ ចំណែកលេខ 1766 គឺជាថ្ងៃបង្កើតនាយកដ្ឋានស្លកាក់ប្រាក់ប៉ូឡូញ ក៏ដូចជាតម្លៃរបស់កាក់ 1,766 ហ្វ្រង់កាមេរូន ដែលប្រហែលនឹង 2.91 ដុល្លារអាម៉េរិក។

កាក់ប្រាក់នេះអាចត្រូវបានប្រើប្រាស់ដោយស្របច្បាប់នៅប្រទេសកាមេរូន។ ជាងនេះ តម្លៃរបស់វាក៏ខ្ពស់ជាងបើធៀបនឹងតម្លៃផ្លូវការរបស់វា។ ដោយសារតែបរិមាណមានកំណត់ត្រឹមតែ 510 កាក់ នៅទូទាំងសកលលោក មួយកាក់ UFO MP-1766 មានតម្លៃជាង 1,000 ដុល្លារអាម៉េរិក នៅពេលកក់មុន។

Mennica Polska មិនទាន់បង្ហើបឱ្យដឹងព័ត៌មានលម្អិតអំពីបច្ចេកវិទ្យានៅពីក្រោយ UFO MP-1766 ប៉ុន្តែបើតាមព័ត៌មានដែលបានលេចធ្លាយ កាក់នេះត្រូវបានបំពាក់កូនម៉ាស៊ីនមួយគ្រឿងនៅខាងក្នុង និងត្រូវបញ្ឆេះដោយកម្លាំងម៉ាញ៉េទិចដែលបង្កើតឡើងរវាងកាក់ និងរចនាសម្ព័ន្ធពិសេសដែលអមជាមួយ។ ប្រការនេះអនុញ្ញាតឱ្យកាក់ UFO MP-1766 អាចបណ្ដែតខ្លួន និងវិលដូចទៅនឹងថាសហោះ (UFO)។

ក្រៅពីនេះ UFO MP-1766 ក៏ត្រូវបានបំពាក់សមាសធាតុដែលបញ្ចេញពន្លឺក្នុងទីងងឹត ធ្វើឱ្យវាកាន់តែមានភាពទាក់ទាញ៕

February 28, 2024

ក្រុមហ៊ុនមួយរបស់ហុងកុង ស្វែងរកឱកាសវិនិយោគនៅកម្ពុជា

(ភ្នំពេញ) – នារសៀលថ្ងៃទី 26 ខែកុម្ភៈ ឆ្នាំ 2024 ឯកឧត្តមរដ្ឋលេខាធិការ ហេង ណន តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រី ក្រសួងសាធារណការ និងដឹកជញ្ជូន បានអញ្ជើញទទួលជួបសម្ដែងការគួរសមពីសំណាក់លោក Francois Shih អគ្គនាយកក្រុមហ៊ុន Sharpland Group។

ក្នុងឱកាសនេះក៏មានការអញ្ជើញចូលរួមពីថ្នាក់ដឹកនាំក្រសួង តំណាងក្រសួងព័ត៌មាន តំណាងក្រសួងមហាផ្ទៃ និងគណ:ប្រតិភូក្រុមហ៊ុន Sharpland Investment Holding, Ltd និងមន្ត្រីជំនាញពាក់ព័ន្ធមកពីអង្គភាពក្រោមឱវាទក្រសួងផងដែរ។

យោងតាមក្រសួងសាធារណការ និងដឹកជញ្ជូន ជំនួបនេះធ្វើឡើងក្នុងគោលបំណងដើម្បីស្វែងយល់ពីឱកាស ក៏ដូចជាសក្កានុពលវិនិយោគលើវិស័យដឹកជញ្ជូនតាមផ្លូវគោក ផ្លូវទឹក និងកំពង់ផែ និងស្នើសុំការគាំទ្រ និងអនុសាសន៍ណែនាំពីថ្នាក់ដឹកនាំក្រសួងលើគម្រោងរបស់ខ្លួនផងដែរ។

ថ្លែងនាឱកាសនោះ ឯកឧត្តមរដ្ឋលេខាធិការ បានជម្រាបជូនអំពីគោលនយោបាយរបស់រាជរដ្ឋាភិបាល កម្ពុជា ដែលផ្ដោតជាសំខាន់លើវិស័យអាទិភាពសំខាន់ៗរួមមាន មនុស្ស ផ្លូវ ទឹក ភ្លើង និងបច្ចេកវិទ្យា ដែលជាគោលដៅគន្លឹះដើម្បីប្រែក្លាយកម្ពុជាឱ្យទៅជាប្រទេសមានចំណូលមធ្យមកម្រិតខ្ពស់នៅឆ្នាំ 2030 ខាងមុខ តាមគោលដៅដែលបានដាក់ចេញប្រកបដោយចីរភាព៕

February 26, 2024

ប្រទេសពីរក្នុងចំណោមមហាអំណាចសេដ្ឋកិច្ចធំៗទាំងដប់របស់ពិភពលោក កំពុងជួបវិបត្តិសេដ្ឋកិច្ច

ចក្រភពអង់គ្លេស និងជប៉ុន បាន និងកំពុងធ្លាក់ចូលក្នុងវិបត្តិសេដ្ឋកិច្ចចាប់ពីដំណាក់កាលចុងឆ្នាំ 2023 ខណៈដែលសហរដ្ឋអាម៉េរិក បន្តទទួលបានសញ្ញាណវិជ្ជមានគួរឱ្យមានសុទិដ្ឋិនិយមជាងមុន។

មហាអំណាចសេដ្ឋកិច្ចទាំងដប់របស់ពិភពលោក រួមចំណែកយ៉ាងធំធេងទៅក្នុងផលិតផលក្នុងស្រុកសរុប (GDP) ទូទាំងសកលលោក និងមានឥទ្ធិពលយ៉ាងខ្លាំងក្លាដល់គោលនយោបាយសេដ្ឋកិច្ច និងពាណិជ្ជកម្មអន្តរជាតិ។ ក៏ប៉ុន្តែ ពីរប្រទេសក្នុងចំណោមនោះ ពោលគឺ ជប៉ុន និងអង់គ្លេស ថ្មីៗនេះបានប្រកាសអំពីស្ថានភាពសេដ្ឋកិច្ច ដែលធ្លាក់ចូលក្នុងវិបត្តិ ក្នុងរយៈពេលពីរត្រីមាសជាបន្តបន្ទាប់។ ចំណែកមហាអំណាចសេដ្ឋកិច្ចទាំង 8 ផ្សេងទៀត បានឃើញកំណើនសេដ្ឋកិច្ចងើបឡើងវិញប្រកបដោយទំនុកចិត្ត។

ខាងក្រោមនេះគឺជាស្ថានភាពសេដ្ឋកិច្ចរបស់ Top 10 នៃប្រទេសមហាអំណាចសេដ្ឋកិច្ចទាំងដប់ លើពិភពលោក នៅក្នុងឆ្នាំ 2024 ដោយយោងទៅលើការវិភាគទិន្នន័យរបស់មូលនិធិរូបិយវត្ថុអន្តរជាតិ (IMF) ដែលគិតត្រឹមថ្ងៃទី 07 ខែកុម្ភៈ ឆ្នាំ 2024៖

សហរដ្ឋអាម៉េរិក

GDP៖ 27,974 ពាន់លានដុល្លារ
GDP ជាមធ្យមសម្រាប់មនុស្សម្នាក់៖ 83 ពាន់ដុល្លារ
កំណើន GDP ប្រចាំឆ្នាំ៖ 1.5%

ចាប់ពីឆ្នាំ 1960 ដល់បច្ចុប្បន្ន សហរដ្ឋអាម៉េរិក នៅតែរក្សាបានតំណែងជាមហាអំណាចសេដ្ឋកិច្ចទីមួយលើពិភពលោក។

ប្រទេសចិន

GDP៖ 18,566 ពាន់លានដុល្លារអាម៉េរិក
GDP ជាមធ្យមសម្រាប់មនុស្សម្នាក់៖ 13 ពាន់ដុល្លារ
កំណើន GDP ប្រចាំឆ្នាំ៖ 4.2%

ប្រទេសនេះបានហក់ពីចំណាត់ថ្នាក់មហាអំណាចសេដ្ឋកិច្ចទីបួនកាលពីឆ្នាំ 1960 ឡើងមកចំណាត់ថ្នាក់ទីពីរនៅក្នុងប៉ុន្មានឆ្នាំចុងក្រោយនេះ។

ប្រទេសអាល្លឺម៉ង់

GDP៖ 4,730 ពាន់លានដុល្លារ
GDP ជាមធ្យមសម្រាប់មនុស្សម្នាក់៖ 56 ពាន់ដុល្លារ
កំណើន GDP ប្រចាំឆ្នាំ៖ 0.9%

ប្រទេសជប៉ុន

GDP៖ 4,291 ពាន់លានដុល្លារ
GDP ជាមធ្យមសម្រាប់មនុស្សម្នាក់៖ 34 ពាន់ដុល្លារ
កំណើន GDP ប្រចាំឆ្នាំ៖ 1.0%

ប្រទេសឥណ្ឌា

GDP៖ 4,112 ពាន់លានដុល្លារ
GDP ជាមធ្យមសម្រាប់មនុស្សម្នាក់៖ 2.8 ពាន់ដុល្លារ
កំណើន GDP ប្រចាំឆ្នាំ៖ 6.3%

ចក្រភពអង់គ្លេស

GDP៖ 3,592 ពាន់លានដុល្លារ
GDP ជាមធ្យមសម្រាប់មនុស្សម្នាក់៖ 52 ពាន់ដុល្លារ
កំណើន GDP ប្រចាំឆ្នាំ៖ 0.6%

ប្រទេសបារាំង

GDP៖ 3,182 ពាន់លានដុល្លារ
GDP ជាមធ្យមសម្រាប់មនុស្សម្នាក់៖ 48 ពាន់ដុល្លារ
កំណើន GDP ប្រចាំឆ្នាំ៖ 1.3%

ប្រទេសអ៊ីតាលី

GDP៖ 2,280 ពាន់លានដុល្លារ
GDP ជាមធ្យមសម្រាប់មនុស្សម្នាក់៖ 38 ពាន់ដុល្លារ
កំណើន GDP ប្រចាំឆ្នាំ៖ 0.7%

ប្រទេសប្រេស៊ីល

GDP៖ 2,272 ពាន់លានដុល្លារ
GDP ជាមធ្យមសម្រាប់មនុស្សម្នាក់៖ 11 ពាន់ដុល្លារ
កំណើន GDP ប្រចាំឆ្នាំ៖ 1.5%

ប្រទេសកាណាដា

GDP៖ 2,242 ពាន់លានដុល្លារ
GDP ជាមធ្យមសម្រាប់មនុស្សម្នាក់៖ 55 ពាន់ដុល្លារ
កំណើន GDP ប្រចាំឆ្នាំ៖ 1.6%

February 26, 2024

ព្រឹត្តិការណ៍ពិសេសៗពីការសម្ពោធជាផ្លូវការនូវស្មាតហ្វូន OPPO Reno11 Series 5G

កម្មវិធីសម្ពោធស្មាតហ្វូនស៊េរីថ្មី OPPO Reno11 Series 5G បានសម្ពោធជាផ្លូវការហើយ ជាមួយនឹងបរិយាកាសដ៏អធិកអធម ក្រោមការយាងចូលរួមពីភ្ញៀវកិត្តិយសពិសេស ព្រះនាងតូច ជេនណា ជាមួយនឹងវត្តមានទូតសុច្ឆន្ទៈប្រចាំក្រុមហ៊ុន OPPO ទាំង 3 រូបគឺ ពេជ្រ វត្តីសារ៉ាវឌ្ឍី, ថេណា និងរ៉េត ស៊ូហ្សាណា ព្រមទាំងតារាប្រុសស្រីល្បីៗជាច្រើនរូប ដែលបានអញ្ជើញចូលរួមនៅក្នុងកម្មវិធីនេះ។

OPPO បានដាក់បង្ហាញស្មាតហ្វូន OPPO Reno11 Series 5G ជំនាន់ថ្មីរបស់ខ្លួនរហូតទៅដល់ 3 ម៉ូដែល ដែលរួមមាន Reno11 5G, Reno11 F និង Reno11 Pro 5G ទាំងការឌីហ្សាញ ប្រព័ន្ធកាមេរ៉ា កម្លាំងម៉ាស៊ីន និងបច្ចេកវិទ្យា AI គឺសុទ្ធសឹងតែជាបច្ចេកវិទ្យាចុងក្រោយ។

សម្រាប់ការរចនាឌីហ្សាញដ៏ថ្មីស្រឡាងដែលមិនធ្លាប់មានពីមុនមក បានបំផុសគំនិតពីធម្មជាតិពិតៗ ដែលផ្តល់ជូននូវភាពស្រស់ស្រាយរាល់ពេលដែលយើងសម្លឹងមើល។ រីឯ គុណភាពប្រព័ន្ធកាមេរ៉ាថតរូប Portrait បានអាប់ដេតកាន់តែប្រសើរជាងមុន ដែលធ្វើឲ្យអ្នកទទួលបានរូបភាពហាក់ដូចជាថតរូបក្នុងស្ទីឌីយោ ទាំងគុណភាព ការចាប់ប្លង់ និងពន្លឺនោះទេ។ បន្ថែមពីនេះជាមួយមុខងារ 2x optical zoom អាចទាញផ្ទៃខាងក្រោយមកកាន់តែកៀករូបមនុស្ស និងធ្វើឲ្យព្រាលផ្ទៃខាងក្រោយ ធ្វើឲ្យរូបភាព Portrait កាន់តែលេចធ្លោ និងនៅតែអាចរក្សាទម្រង់មុខមនុស្សបានស្អាតធម្មជាតិ មិនធ្វើឲ្យខូចទ្រង់ទ្រាយនោះទេ។ លើសពីនេះ OPPO Reno11 Series 5G ទាំងនៅលើកាមេរ៉ាមុខ និងក្រោយអាចថតវីដេអូបានកម្រិត 4K ។ ចំពោះអេក្រង់វិញ OPPO Reno11 Series 5G បំពាក់ជាមួយអេក្រង់ប្រភេទ 3D គាំទ្រដោយកញ្ចក់ AMOLED Display មានគែមកោង និងមានទំហំ 6.7Inch ព្រមទាំងមានសមត្ថភាពខ្ពស់អាចបង្ហាញរូបភាព និងវីដេអូចេញបានក្នុងកម្រិត FHD+ ថែមទៀតផង។ ចំណែកថាមពលថ្មវិញ Reno11 និង Reno11 F មានកម្លាំង 5000mAh និងគាំទ្របច្ចេកវិទ្យា 67W SUPERVOOC ដោយឡែក Reno11 Pro មានកម្លាំងថ្ម 4600mAh និងគាំទ្របច្ចេកវិទ្យា 80W SUPERVOOC ។

ក្រៅពីនេះ OPPO ក៏មានសម្ពោធប្រព័ន្ធប្រតិបត្តិការថ្មី ColorOS 14 ដែលមានមុខងារពិសេសៗជាច្រើនដូចជា Smart Image Matting, File Dock, Smart Touch និងមុខងារ LinkBoost ។ លើសពីនេះទៅទៀត ក៏មានការប្រកាសផលិតផល IOT ដូចជា OPPO Pad Neo, OPPO Watch X និងកាសឥតខ្សែ OPPO Enco Bud2 ពណ៌ថ្មីផងដែរ។

សម្រាប់ថេប្លេតជំនាន់ថ្មី OPPO Pad Neo រចនាមកជាមួយអេក្រង់ ReadFit កម្រិត 2.4K ទំហំ 14” និងអាចប្រើប្រាស់ស៊ីមកាតដោយគាំទ្រសេវា 4G LTE និង Wifi ជាមួយថាមពលថ្មធំ 8000mAh ដែលមានបច្ចេកវិទ្យាសាកថ្មរហ័ស 33W SUPERVOOC ព្រមទាំង RAM 16GB ((8+8GB) និង ROM 128GB ផ្តល់ជូនលោកអ្នកនូវភាពរីករាយគ្មានដែនកំណត់គ្រប់ទីកន្លែង។
សម្រាប់ OPPO Enco Buds2 ជាកាសឥតខ្សែជំនាន់ថ្មីនឹងផ្តល់ឲ្យអ្នកនូវបទពិសោធសំឡេងដ៏អស្ចារ្យឥតដែនកំណត់ និងអាចឲ្យអ្នកប៉ះបញ្ជាផ្ទាល់លើកាស រាល់ពេលចង់ផ្លាស់ប្តូរបទចម្រៀង បន្ថយឬបន្ថែមសំឡេង និងទទួលការហៅចូលបានយ៉ាងងាយស្រួលដោយមិនចាំបាច់ចុចផ្ទាល់លើទូរស័ព្ទ។
សម្រាប់ OPPO Watch X នាឡិកាវៃឆ្លាតជំនាន់ថ្មី ដែលមានរចនាបថរូបរាងកាលីបស្រស់ស្អាត ទាន់សម័យ កម្រាស់ស្តើង ស័ក្កសមជាមួយជីវិតប្រចាំថ្ងៃ ដោយភ្ជាប់មកនូវមុខងារប្រើប្រាស់ទំនើបៗជាច្រើន។

តោះ! កក់ទុកមុនចាប់ពីថ្ងៃនេះរហូតដល់ថ្ងៃទី02 មីនា 2024 លើស្មាតហ្វូនស៊េរីថ្មី OPPO Reno11 Series 5G ទាំង 3 ម៉ូដែល Reno11 Pro 5G $599 | Reno11 5G $449 | Reno11 F 5G $339 នឹងទទួលបានកាដូរួមមានដូចជា ៖

រាល់ការកក់ទុកមុន Reno11 Pro 5G | Reno11 5G ថែមជូន ៖
បណ្ណប្តូរអេក្រង់ 1ឆ្នាំ តម្លៃ $89
កាតាបស្ពាយដ៏ស្រស់ស្អាត តម្លៃ $39
ស៊ីមស្មាតលេខពិសេស Bronze តម្លៃ $54
រាល់ការកក់ទុកមុន Reno11 F 5G ថែមជូន ៖
បណ្ណប្តូរអេក្រង់ 1ឆ្នាំ តម្លៃ $69
កាតាបស្ពាយដ៏ស្រស់ស្អាត តម្លៃ $39
ស៊ីមស្មាតលេខពិសេស Bronze តម្លៃ $54

សម្រាប់ផលិតផល IoT រួមមាន OPPO Pad Neo តម្លៃ $299 | OPPO Watch X | OPPO Enco Buds2 អាចរកទិញបានចាប់ពីថ្ងៃទី03 ខែមីនា 2024 នេះតទៅ៕

February 24, 2024

យានអវកាសឯកជនអាម៉េរិក ចុះចតដោយជោគជ័យលើឋានព្រះចន្ទ

យាន Odysseus របស់ក្រុមហ៊ុន Intuitive Machines ត្រូវបានចារក្នុងប្រវត្តិសាស្ត្របន្ទាប់ពីបានក្លាយជាយានអវកាសឯកជនដំបូងគេដែលបានទទួលជោគជ័យក្នុងការចុះចតលើផ្ទៃព្រះចន្ទ កាលពីវេលាទៀបភ្លឺថ្ងៃទី 23 កុម្ភៈ ឆ្នាំ 2024 ម៉ោងនៅកម្ពុជា។

នេះគឺជាព្រឹត្តិការណ៍ដ៏អស្ចារ្យនៅក្នុងការស្រាវជ្រាវទីអវកាស។ កន្លងមកពុំដែលមានយានអវកាសឯកជនណាមួយធ្លាប់បានទទួលជោគជ័យក្នុងការចុះចតលើផ្ទៃព្រះចន្ទ និងមិនទាន់មានយានអវកាសណាមួយរបស់អាម៉េរិក ចុះចតលើផ្ទៃឋានរណបនេះនៅឡើយ រាប់ចាប់ពីក្រោយការចុះចតរបស់យានមានមនុស្ស Apollo 17 កាលពីខែធ្នូ ឆ្នាំ 1972។

ទីភ្នាក់ងារអវកាសអាម៉េរិក (ណាសា) មានផែនការកសាងមូលដ្ឋានមានមនុស្សសម្រាប់កម្មវិធី Artemis នៅតំបន់ប៉ូលខាងត្បូងរបស់ព្រះចន្ទ ជាទីដែលត្រូវបានគេជឿថា មានផ្ទុកទឹកកកយ៉ាងច្រើន។ ក៏ប៉ុន្តែ មុននឹងនាំមនុស្សឡើងទៅកាន់ទីនោះ ណាសាចង់ប្រមូលទិន្នន័យបន្ថែមទៀត ទាក់ទងនឹងតំបន់ដែលមិនសូវមានការស្រាវជ្រាវច្រើនមួយនេះ ក្នុងនោះរួមមានទាំងប្រភពទឹកជាដើម។

ដើម្បីឆ្លើយតបនឹងតម្រូវការខាងលើ ណាសាក៏បានបង្កើតកម្មវិធីដោយឡែកមួយដែលមានឈ្មោះថា CLPS (Commercial Lunar Payload Services) អនុញ្ញាតឱ្យបណ្ដាក្រុមហ៊ុនអាម៉េរិក អភិវឌ្ឍយានចុះចតលើផ្ទៃព្រះចន្ទបែបស្វ័យប្រវត្តិ ដើម្បីដឹកឧបករណ៍វិទ្យាសាស្ត្រ ហើយយាន Odysseus របស់ក្រុមហ៊ុន Intuitive Machines ក៏ស្ថិតក្នុងកម្មវិធីនេះផងដែរ៕

February 23, 2024

ខាងក្នុងយានអវកាសដែលនឹងនាំមនុស្សត្រឡប់ទៅកាន់ឋានព្រះចន្ទ

អង្គការណាសាទើបតែបានបង្ហាញរូបរាងចុងក្រោយរបស់យានអវកាស Orion ដែលនឹងត្រូវបានប្រើប្រាស់សម្រាប់ការដឹកអវកាសចរឡើងទៅកាន់ឋានព្រះចន្ទជាលើកដំបូង ក្រោយរយៈពេលកន្លះសតវត្សរ៍។

ណាសាបានចែករំលែករូបថតថ្មីៗរបស់យានអវកាស Orion ដែលនឹងដឹកអ្នកអវកាស 4 រូប ហោះឡើងទៅគោចរជុំវិញព្រះចន្ទនៅក្នុងបេសកកម្ម Artemis 2 ដែលគ្រោងនឹងចាប់ផ្ដើមការហោះហើរយ៉ាងឆាប់ត្រឹមខែកញ្ញាឆ្នាំ 2025។ ផ្នែកខាងក្នុងរបស់ Orion ត្រូវបានដំឡើងរួចរាល់នៅឯមជ្ឈមណ្ឌលអវកាស Kennedy របស់ណាសានៅ Florida។ នេះបើតាម Space ចុះផ្សាយកាលពីពេលថ្មីៗនេះ។

យាន Orion ហោះទៅកាន់ទីអវកាសបានពីរលើកមកហើយ នៅក្នុងបេសកកម្មគ្មានមនុស្សបើកបរ Artemis 1 ដែលក្នុងនោះ វាធ្លាប់ហោះដល់គន្លងតារាវិថីព្រះចន្ទកាលពីចុងឆ្នាំ 2022 និងជើងហោះហើរជុំវិញគន្លងតារាវិថីផែនដីកាលពីឆ្នាំ 2014។

Artemis 2 នឹងជាបេសកកម្មដំបូងដែលដឹកអវកាសចរនៅក្នុងកម្មវិធី Artemis។ Artemis 2 គឺជាការបើកផ្លូវសម្រាប់គោលដៅនាំមនុស្សទៅចុះចតលើផ្ទៃព្រះចន្ទ នៅក្នុងបេសកកម្ម Artemis 3។

កម្មវិធី Artemis របស់សហរដ្ឋអាម៉េរិក ត្រូវបានកំណត់គោលដៅសាងសង់តំបន់រស់នៅរបស់មនុស្ស ដែលស្ថិតនៅក្បែរប៉ូលខាងត្បូងរបស់ព្រះចន្ទ ដើម្បីប្រើប្រាស់ប្រភពទឹកនៅទីនោះ៕

February 19, 2024

រកឃើញភពថ្មីមួយទៀតដែលស្ថិតក្នុងតំបន់អំណោយផលដល់ជីវិត

ក្រុមអ្នកវិទ្យាសាស្ត្របានរកឃើញផែនដីយក្សមួយទៀតដែលស្ថិតក្នុងតំបន់ដែលអាចរស់នៅបាន និងវិលជុំវិញផ្កាយមេដែលមានចម្ងាយពីព្រះអាទិត្យ 137 ឆ្នាំពន្លឺ។

ភពខាងលើដែលត្រូវបានដាក់ឈ្មោះឱ្យថា TOI-715b វិលជុំវិញកូនផ្កាយក្រហមមួយដួង មានទំហំតូចជាងព្រះអាទិត្យរបស់មនុស្ស។ ក្រុមអ្នកវិទ្យាសាស្ត្របានរកឃើញភពថ្មីនេះតាមរយៈការប្រើប្រាស់ផ្កាយរណបតេឡេស្កុប TESS របស់ណាសា។ យោងតាម CNN ដែលបានចុះផ្សាយកាលពីថ្ងៃទី 10 កុម្ភៈ 2024 ព័ត៌មានខាងលើត្រូវបានប្រកាសលើទស្សនាវដ្ដី Monthly Notices of the Royal Astronomical Society។

TOI-715b ធំជាងផែនដី 1.5 ដង ហើយមួយឆ្នាំរបស់វាគឺមានតែ 19 ថ្ងៃ។ TOI-715b ស្ថិតនៅក្បែរផ្កាយមេរបស់វា ដែលនេះ អនុញ្ញាតឱ្យទឹកមានសភាពរាវ ដែលជាអំណោយផលល្អដល់ការកកើតជីវិត។

អ្នកស្រាវជ្រាវឱ្យដឹងថា ឆាប់ៗខាងមុខនេះ ភព TOI-715b នឹងត្រូវបានសង្កេតដោយតេឡេស្កុបអវកាស James Webb ហើយបរិយាកាសរបស់វានឹងត្រូវបានបញ្ជាក់៕

February 12, 2024

ប្រទេសចិននឹងបាញ់បង្ហោះផ្កាយរណបពិសោធន៍ទៅកាន់ឋានព្រះចន្ទក្នុងឆ្នាំនេះ

ប្រទេសចិនមានផែនការបាញ់បញ្ជូនផ្កាយរណបពិសោធន៍ចំនួនពីរគ្រឿងទៅកាន់គន្លងតារាវិថីព្រះចន្ទ ដើម្បីបង្កើតបណ្ដាញទំនាក់ទំនងរវាងឋានរណបនេះ និងផែនដី។ នេះបើតាមសារព័ត៌មាន Xinhua ចុះផ្សាយកាលពីថ្ងៃទី 04 កុម្ភៈ។

សេចក្ដីប្រកាសកាលពីថ្ងៃទី 03 កុម្ភៈ របស់បន្ទប់ពិសោធន៍ស្រាវជ្រាវអវកាសជ្រៅរបស់ប្រទេសចិន បានឱ្យដឹងថា ផ្កាយរណបដូចគ្នាចំនួនពីរគ្រឿង ដែលមានទម្ងន់ 61 និង 15 គីឡូក្រាម នឹងហោះក្នុងគន្លងតារាវិធីព្រះចន្ទ។

ផ្កាយរណបទាំងនេះនឹងធ្វើការពិសោធ វាយតម្លៃលើលទ្ធភាពនៃការប្រើប្រាស់ និងប្រសិទ្ធភាពរបស់បច្ចេកវិទ្យាថ្មីនានា មានដូចជា បច្ចេកវិទ្យាបញ្ជូនរលកសញ្ញា និងបច្ចេកវិទ្យាវាស់វែងដែលមានសុក្រឹតភាពកម្រិតខ្ពស់ជាដើម។

ប្រទេសចិនគ្រោងនឹងបាញ់បង្ហោះផ្កាយរណបទាំងពីរគ្រឿងខាងលើនៅពាក់កណ្ដាលដើមឆ្នាំ 2024 ជាមួយនឹងផ្កាយរណបអន្តរកម្ម Queqiao-2។ Queqiao-2 នឹងផ្ដល់សេវាទំនាក់ទំនងសម្រាប់បេសកកម្មព្រះចន្ទ Chang’e 4, 6, 7 និង 8 របស់ចិន។

បច្ចុប្បន្ន ប្រទេសចិនកំពុងជំរុញកម្មវិធីស្រាវជ្រាវព្រះចន្ទ ក្នុងនោះ ប្រទេសនេះក៏មានផែនការនាំមនុស្សឡើងទៅកាន់ភពរណបនេះនៅមុនឆ្នាំ 2030 ផងដែរ៕

February 8, 2024

ផ្ទះលក់មិនដាច់នៅប្រទេសចិន ច្រើនគ្រប់គ្រាន់សម្រាប់មនុស្ស 150 លាននាក់

ផ្ទះដែលលក់មិនទាន់ដាច់នៅប្រទេសចិន មានទំហំសរុបជិត 5 ពាន់លានម៉ែត្រការ៉េ បើគិតត្រឹមចុងឆ្នាំកន្លង ហើយផ្ទៃក្រឡានេះអាចឱ្យមនុស្សរស់នៅបាន 150 លាននាក់។ នេះបើតាមការផ្សាយរបស់ទំព័រ Nikkei។

បច្ចុប្បន្ន ដោយសារតែជួបបញ្ហាហិរញ្ញវត្ថុ វិនិយោគិនទាំងឡាយក្នុងវិស័យអចលនទ្រព្យនៅប្រទេសចិន នាំគ្នាលក់បញ្ចុះតម្លៃជាបន្តបន្ទាប់។ ការប្រកួតប្រជែងតម្លៃនេះ កើតឡើងនៅពេលទីផ្សារអចលនទ្រព្យបានឈានចូលដល់ដំណាក់កាលគ្រប់គ្រាន់។ អត្រានៃអចលនទ្រព្យដែលនៅសល់ពីការលក់ គឺជិត 5 ពាន់លានម៉ែត្រការ៉េ កាលពីចុងឆ្នាំ 2023។ Nikkei ឧទាហរណ៍ថា ខុនដូ ឬផ្ទះមួយខ្នងដែលមានទំហំ 100 ម៉ែត្រការ៉េ និងមានមនុស្ស 3 នាក់រស់នៅ នោះផ្ទៃក្រឡាសរុបរបស់ផ្ទះដែលកំពុងសល់គឺអាចឱ្យមនុស្សរស់នៅបាន 150 លាននាក់ ដែលប្រហាក់ប្រហែលនឹងផ្ទះ 50 លានខ្នង។

ប្រទេសចិនកំពុងតែប្រឈមមុខនឹងផលវិបាករបស់ «ប៉ោងប៉ោងអចលនទ្រព្យ»។ កំណើននៃការសាងសង់ផ្ទះបានថយចុះ បន្ទាប់ពីប្រទេសនេះចាប់ផ្ដើមរឹតបន្តឹងគោលការណ៍នានាក្នុងឆ្នាំ 2020 ប៉ុន្តែចំនួនផ្ទះដែលលក់មិនដាច់នៅតែមានកម្រិតខ្ពស់ ព្រោះតែការលក់ចេញមានភាពយឹតយ៉ាវ។

China Index Academy ព្យាករថា សកម្មភាពទីផ្សារអាចនឹងប្រសើរឡើងវិញ នៅក្រោយរដូវបុណ្យចូលឆ្នាំប្រពៃណីជាតិចិន ដែលចាប់ផ្ដើមពីថ្ងៃទី 10 ដល់ 17 កុម្ភៈខាងមុខ។ ក៏ប៉ុន្តែ ក្រុមអ្នកវិភាគយល់ថា បញ្ហាបំណុលរបស់ក្រុមហ៊ុន Evergrande នៅតែជាស្រមោលអាក្រក់ក្នុងវិស័យអចលនទ្រព្យនៅប្រទេសចិន៕

February 8, 2024

Tag: មនុស្ស