បាល់ទាត់ - La Reine Media

កប៉ាល់ទេសចរណ៍ធំជាងគេបង្អស់លើពិភពលោក ជិតដំណើរការជាផ្លូវការ

(ហ្វាំងឡង់) – កប៉ាល់ The Icon of the Seas ដែលមានបណ្ដោយ 365 ម៉ែត្រ និងអាចដាក់ទេសចរបានជាង 7,000 នាក់ កំពុងស្ថិតក្នុងដំណាក់កាលបង្ហើយកិច្ចការចុងក្រោយបង្អស់ មុនពេលចេញដំណើរជើងដំបូងនៅខែមករា 2024។

ដោយមានបណ្ដោយពីក្បាលដល់កន្ទុយស្មើនឹងប្រវែងរបស់ទីលានបាល់ទាត់ចំនួន 3.5 ទីលានបូកចូលគ្នា The Icon of the Seas នឹងក្លាយជាកប៉ាល់ទេសចរណ៍ធំជាងគេបំផុតលើពិភពលោក។

កប៉ាល់ទេសចរណ៍ខាងលើដែលត្រូវបានបញ្ជាទិញដោយក្រុមហ៊ុន Royal Caribbean ត្រូវបានដាក់ឈ្មោះថា The Icon of the Seas។ កប៉ាល់នេះនឹងប្រើប្រាស់ម៉ាស៊ីនដំណើរការដោយឧស្ម័នធម្មជាតិរាវ (LNG) និងបំពាក់បច្ចេកវិទ្យាថ្មីៗ ដែលជួយឱ្យវាក្លាយជាកប៉ាល់ទំនើបបំផុតមួយនៅលើពិភពលោក។ នេះបើតាម Tim Meyer នាយកប្រតិបត្តិរបស់ក្រុមហ៊ុនសាងសង់កប៉ាល់ Meyer Turku។

The Icon of the Seas អាចដាក់អ្នកដំណើរបាន 7,600 នាក់ ច្រើនជាងឆ្ងាយបើធៀបនឹងជាង 1,500 នាក់របស់កប៉ាល់ទេសចរណ៍ខ្នាតយក្ស Titanic ដែលបានលិចកាលពីឆ្នាំ 1912 (111 ឆ្នាំមុន)។

ការធ្វើដំណើរជើងដំបូងរបស់កប៉ាល់ The Icon of the Seas នឹងមានរយៈពេល 7 យប់ ដោយចាប់ផ្ដើមចេញពី Miami របស់សហរដ្ឋអាម៉េរិក នៅក្នុងខែមករា 2024៕

June 26, 2023

គ្រូបង្វឹក Mourinho ត្រូវបានពិន័យធ្ងន់ធ្ងរ ព្រោះតែជេរអាជ្ញាកណ្ដាល បន្ទាប់ពីវគ្គផ្ដាច់ព្រ័ត្រ Europa League

គ្រូបង្វឹករបស់ក្រុមបាល់ទាត់ Roma (អ៊ីតាលី) លោក Jose Mourinho បានទទួលពិន័យជាផ្លូវការពីសហព័ន្ធកីឡាបាល់ទាត់អឺរ៉ុប (UEFA) ដោយសារតែបង្ហាញទង្វើជេរប្រមាថអាជ្ញាកណ្ដាល បន្ទាប់ពីការប្រកួតវគ្គផ្ដាច់ព្រ័ត្រនៅពានរង្វាន់ Europa League 2022-2023។

ក្លឹបបាល់ទាត់ AS Roma បានចាញ់ Sevilla (អេស្ប៉ាញ) នៅក្នុងការប្រកួតទាត់ប៉េណាំងទី ក្នុងវគ្គផ្ដាច់ព្រ័ត្រ Europa League 2022-2023 ធ្វើឱ្យគ្រូបង្វឹក Jose Mourinho ផ្ទុះការខឹងនៅក្រោយការប្រកួត។ គ្រូបង្វឹកជនជាតិព័រទុយហ្កាល់រូបនេះ បានរង់ចាំអាជ្ញាកណ្ដាលនៅចំណត់ឡាន ហើយបានជេរប្រមាថលោក Anthony Taylor។ លោក Mourinho ក៏និយាយបញ្ឆិតបញ្ឆៀងក្នុងន័យថា អាជ្ញាកណ្ដាល Anthony Taylor កាន់ជើងខាងអេស្ប៉ាញ។

ពេលនោះ អ្នកគាំទ្ររបស់ក្រុម Roma ក៏បានស្រែកចំអកឱ្យអាជ្ញាកណ្ដាល Taylor ហើយថែមទាំងគប់កៅអីសំដៅអាជ្ញាកណ្ដាល នៅពេលគាត់ និងគ្រួសារព្យាយាមចាកចេញពីហុងគ្រីត្រលប់ទៅផ្ទះ។

គ្រូបង្វឹក Mourinho ជេរប្រមាថគ្រូបង្វឹក Taylor នៅចំណត់ឡាន

ថ្មីៗនេះ សហព័ន្ធកីឡាបាល់ទាត់អឺរ៉ុប បានសម្រេចចិត្តពិន័យលើគ្រូបង្វឹក Mourinho ដោយមិនឱ្យដឹកនាំបួនប្រកួតនៅអឺរ៉ុប ខណៈដែល Roma ឈរលំដាប់ទី 6 នៅ Serie A កាលពីរដូវកាលមុន ហើយមានលក្ខខណ្ឌគ្រប់គ្រាន់ដើម្បីចូលប្រកួតនៅ Europa League។

ក្រៅពីនេះ ក្លឹប Roma ក៏ត្រូវ UEFA ពិន័យ។ ពួកគេត្រូវបានហាមលក់សំបុត្រនៅឯទីលានដទៃក្នុងការប្រកួតបន្ទាប់នៅអឺរ៉ុប និងពិន័យជាប្រាក់ 5,000 អឺរ៉ូផងដែរ ហើយពួកគេក៏ត្រូវបានតម្រូវឱ្យទាក់ទងទៅកាន់សហព័ន្ធបាល់ទាត់ហុងគ្រីដើម្បីដោះស្រាយការខូចខាតដែលអ្នកគាំទ្ររបស់ Roma បានធ្វើឡើង៕

June 22, 2023

ម្ចាស់កំណត់ត្រា Ronaldo ពេញចិត្តពេលទាត់ចូលទីក្នុងការប្រកួតលើកទី 200 ឱ្យព័រទុយហ្កាល់

(អៀឡង់) – ខ្សែប្រយុទ្ធ Cristiano Ronaldo ឱ្យដឹងថា លោកឆ្លងកាត់ថ្ងៃប្រកួតពិសេស នៅពេលបានទាត់ចូលទីមួយគ្រប់ ជួយឱ្យព័រទុយហ្កាល់ឈ្នះអៀឡង់នៅក្នុងវគ្គជម្រុះរបស់ Euro 2023 ដែលនេះក៏ជាការប្រកួតលើកទី 200 របស់ CR7 សម្រាប់ក្រុមបាល់ទាត់ជម្រើសជាតិ។

មុនពេលបាល់ចាប់ផ្ដើមរមៀល Ronaldo ត្រូវបានស្ថាប័ន Guinness ប្រគល់វិញ្ញាបនបត្របញ្ជាក់ថាជាកីឡាករដែលទាត់ឱ្យក្រុមជម្រើសជាតិបានច្រើនប្រកួតជាងគេក្នុងប្រវត្តិសាស្ត្រ។ CR7 បានបំបែកកំណត់ត្រាចាស់ 196 ប្រកួតរបស់ Bader Al-Mutawa មកពីប្រទេសកូវ៉ែត។ ទស្សនិកជននៅឯកីឡដ្ឋាន Laugardalsvollur របស់អៀឡង់ ក៏នាំគ្នាក្រោកឈរទះដៃអបអរសាទរជូនចំពោះកីឡាករវ័យ 38 ឆ្នាំរូបនេះផងដែរ។

Guinness ប្រគល់វិញ្ញាបនបត្របញ្ជាក់ថា Ronaldo ជាកីឡាករដែលទាត់ឱ្យក្រុមជម្រើសជាតិបានច្រើនប្រកួតជាងគេក្នុងប្រវត្តិសាស្ត្

ក្នុងថ្ងៃនោះដែរ ការសប្បាយរីករាយរបស់ Ronaldo ក៏ត្រូវបានបំពេញបន្ថែម នៅពេលគាត់គឺជាកីឡាករតែម្នាក់គត់ដែលបានទាត់ចូលទីមួយគ្រាប់នៅនាទីទី 89 ជួយឱ្យព័រទុយហ្កាល់ឈ្នះអៀឡង់ 1-0 នៅក្នុងវគ្គជម្រុះរបស់ Euro 2024 ដែលជាការប្រកួតលើកទី 200 របស់ CR7 សម្រាប់ក្រុមជម្រើសជាតិព័រទុយហ្កាល់។

Ronaldo ទាត់ចូលទីមួយគ្រាប់នៅនាទីទី 89 ជួយឱ្យព័រទុយហ្កាល់ឈ្នះអៀឡង់ 1-0 នៅក្នុងវគ្គជម្រុះរបស់ Euro 2024

នៅក្នុងការជួបជុំបន្ទាប់របស់ក្រុមជម្រើសជាតិព័រទុយហ្កាល់ Ronaldo និងមិត្តរួមក្រុមនឹងត្រូវធ្វើជាភ្ញៀវរបស់ស្លូវ៉ាគី នៅថ្ងៃទី 08 កញ្ញា រួចត្រឡប់ទៅកាន់ទីលានម្ចាស់ផ្ទះ Algarve ដើម្បីទទួលក្រុមលុចសំបួនៅបីថ្ងៃក្រោយមក៕

June 21, 2023

Man United នឹងស្ថិតក្រោមការគ្រប់គ្រងរបស់គ្រួសារត្រកូល Glazer បន្តទៀត?

ក្លឹបបាល់ទាត់ Manchester United ប្រហែលជាត្រូវឈានចូលដល់រដូវកាលថ្មី គ្រាដែលការដោះដូរក្លឹបនេះមិនទាន់បានសម្រេចជាស្ថាពរ។

គ្រួសារត្រកូល Glazer ទំនងជានឹងនៅតែបន្តគ្រប់គ្រងក្លឹបបាល់ទាត់ Man United ព្រោះថា គិតមកដល់ថ្ងៃទី 20 មិថុនានេះ ពុំទាន់មានសេចក្ដីប្រកាសជាផ្លូវការណាមួយត្រូវបានធ្វើឡើងនៅឡើយ ទាក់ទងនឹងការលក់ក្លឹបរបស់គ្រួសារត្រកូល Glazer។

បើសិន Glazer សម្រេចចិត្តលក់ក្លឹប MU ទៅឱ្យភាគីខាងណា ពួកគេនឹងត្រូវការពេលពី 8 ទៅ 12 សប្ដាហ៍ដើម្បីអនុវត្តដំណាក់កាលអនុម័ត មុនពេលចេញសេចក្ដីប្រកាសផ្លូវការ។ ដូច្នេះ ក្លឹបបាល់ទាត់របស់គ្រូបង្វឹក Erik ten Hag ទំនងជានឹងត្រូវចាប់ផ្ដើមរដូវកាលបាល់ទាត់ 2023-2024 នៅថ្ងៃទី 14 សីហា ក្រោមការគ្រប់គ្រងរបស់គ្រួសារត្រកូល Glazer ដដែល។

June 20, 2023

Mbappe ថា ខ្លួនស័ក្ដិសមនឹងការទទួលបានបាល់មាសនៅរដូវកាលនេះ

(បារាំង) – ខ្សែប្រយុទ្ធ Kylian Mbappe យល់ថា ដោយបានរួមចំណែកនៅក្នុងក្លឹបបាល់ទាត់ PSG និងក្រុមជម្រើសជាតិបារាំង គាត់ពិតជាបានបំពេញតាមលក្ខខណ្ឌនានាសម្រាប់ពានរង្វាន់គ្រាប់បាល់មាសឆ្នាំ 2023។

កាលពីព្រលប់ថ្ងៃទី 19 មិថុនា បន្ទាប់ពីទាត់ចូលទីបានមួយគ្រាប់ ជួយឱ្យបារាំងឈ្នះក្រិក 1-0 នៅក្នុងវគ្គជម្រុះ Euro 2024 Mbappe ត្រូវបានសួរថា តើមានអារម្មណ៍ថាខ្លួនឯងស័ក្ដិសមជាមួយនឹងគ្រាប់បាល់មាសឆ្នាំ 2023 ឬទេ។ Mbappe ឆ្លើយថា «ខ្ញុំនឹងនិយាយថាមាន។ ខ្ញុំបានបំពេញគ្រប់លក្ខខណ្ឌ។ ប៉ុន្តែពានរង្វាន់នេះអាស្រ័យទៅលើសន្លឹកឆ្នោត»។

ក្នុងការប្រកួតនៅលើទីលាន Stade de France កំពូលកីឡាករ Mbappe បានទាត់បាល់ពិន័យរកបានមួយគ្រាប់គត់នៅនាទីទី 55។ នេះគឺជាគ្រាប់បាល់ទី 54 របស់ Mbappe រាប់ចាប់តាំងពីដើមរដូវកាល 2022-2023 ដែលនេះគ្រប់គ្រាន់ដើម្បីក្លាយជាកីឡាករបារាំងដែលរកបានគ្រាប់បាល់ឈ្នះច្រើនជាងគេបំផុតក្នុងមួយរដូវកាល។

ពានរង្វាន់គ្រាប់បាល់មាសត្រូវបានរៀបចំឡើងដោយទស្សនាវដ្ដីបារាំង France Football។ អ្នកចូលរួមបោះឆ្នោតជ្រើសរើសម្ចាស់គ្រាប់បាល់មាសគឺជាអ្នកសារព័ត៌មានមកពីជុំវិញពិភពលោក។ ថ្ងៃទី 30 តុលា 2023 France Football នឹងប្រគល់ពានរង្វាន់នេះនៅទីក្រុងប៉ារីស។ Messi កំពុងកាន់កាប់កំណត់ត្រាគ្រាប់បាល់មាស ខណៈ Mbappe និង Haaland មិនទាន់ទទួលបានពានរង្វាន់នេះនៅឡើយ៕

Mbappe ទាត់ចូលទីបានមួយគ្រាប់ ជួយឱ្យបារាំងឈ្នះក្រិក 1-0 នៅក្នុងការប្រកួតវគ្គជម្រុះ Euro 2024 កាលពីថ្ងៃទី 19 មិថុនា 2023

https://www.youtube.com/watch?v=Topwjxtlbeo

June 20, 2023

ចិនដំឡើងទួរប៊ីនខ្យល់ផលិតអគ្គិសនីធំជាងគេបង្អស់លើពិភពលោក

ទួរប៊ីនខ្យល់ (Wind Turbine) សម្រាប់ដំឡើងលើសមុទ្រកម្លាំង 16 មេហ្គាវ៉ាត់ មានស្លាប់ដែលមានអង្កត់ផ្ចិតប្រវែង 252 ម៉ែត្រ និងវិលក្នុងផ្ទៃក្រឡា 50,000 ម៉ែត្រការ៉េ អាចផ្ដល់អគ្គិសនីសម្រាប់តម្រូវការរបស់គ្រួសារប្រមាណ 36,000 គ្រួ។

ផ្នែកនីមួយៗរបស់ទួរប៊ីនកម្លាំង 16 មេហ្គាវ៉ាត់នេះសុទ្ធតែជាប្រភេទធំជាងគេបង្អស់លើពិភពលោក និងត្រូវបានលើកដាក់លើប៉ាល់នៅខេត្ត Fujian ប្រទេសចិន កាលពីថ្ងៃទី 17 មិថុនា។ ទួរប៊ីនខ្យល់នេះស្ថិតក្នុងកិច្ចប្រឹងប្រែងដើម្បីប្ដូរទៅរកថាមពលស្អាតរបស់ប្រទេសចិន។

ដោយស្លាបកង្ហារមានអង្កត់ផ្ចិតប្រវែង 252 ម៉ែត្រ ទួរប៊ីននេះបក់ខ្យល់ក្នុងផ្ទៃក្រឡា 50,000 ម៉ែត្រការ៉េ ប្រហាក់ប្រហែលនឹងទីលានបាល់ទាត់ស្ដង់ដាចំនួន 7។ ក្នុងស្ថានភាពមានខ្យល់ខ្លាំង ទួរប៊ីននេះអាចផលិតអគ្គិសនីបាន 34.2 គីឡូវ៉ាត់ម៉ោងបន្ទាប់ពីស្លាបកង្ហារវិលបានមួយជុំ។ ជាមធ្យមក្នុងមួយឆ្នាំ ទួរប៊ីននេះអាចផលិតអគ្គិសនីបានជាង 66 លានគីឡូវ៉ាត់ម៉ោង អាចផ្គត់ផ្គង់ដល់តម្រូវការរបស់គ្រួសារចំនួន 36,000 គ្រួ ជួយសន្សំសំច័យធ្យូងថ្មបាន 22,000 តោន និងកាត់បន្ថយឧស្ម័នកាបូនឌីអុកស៊ីដចំនួន 54,000 តោន។

ការត្រៀមសម្រាប់ដឹក និងដំឡើងទួរប៊ីនខ្យល់របស់ក្រុមហ៊ុន Three Gorges Fujian

Sheng Lei អគ្គនាយករងរបស់ក្រុមហ៊ុនគ្រប់គ្រងតំបន់ឧស្សាហកម្មអន្តរជាតិផលិតអគ្គិសនីពីខ្យល់លើសមុទ្រ Three Gorges Fujian (Fujian Three Gorges Offshore Wind Power International Industrial Park Operations) ឱ្យដឹងថា ក្រុមហ៊ុននេះបានរៀបគម្រោងដឹកជញ្ជូន និងគម្រោងបន្ទាន់ពេលមានបញ្ហាអាកាសធាតុរួចរាល់ហើយ មុននឹងដឹកគ្រឿងទួរប៊ីនទៅកាន់គោលដៅ។

ក្រោយពីត្រូវបានដំឡើង និងដំណើរការនៅលើសមុទ្រ នេះនឹងជាទួរប៊ីនខ្យល់សមុទ្រធំជាងគេបង្អស់លើពិភពលោក។ គ្រឿងបង្គុំរបស់ទួរប៊ីននេះសុទ្ធតែត្រូវបានអភិវឌ្ឍក្នុងស្រុក។ វាក៏បំពាក់មុខងារឆ្លាតវៃជាច្រើនដើម្បីដំណើរការឱ្យបានសមស្របបំផុត។

គិតត្រឹមចុងខែមេសា 2023 ប្រទេសចិនបានដំឡើងបណ្ដាញទួរប៊ីនខ្យល់ដែលមានកម្លាំងផលិតអគ្គិសនីសរុប 380 លានគីឡូវ៉ាត់៕

June 20, 2023

Beckham ចំណាយមួយពាន់លានដុល្លារដើម្បី «បម្រើ» ដល់ Messi ក្នុងការប្រកួតនៅសហរដ្ឋអាម៉េរិក

កីឡាដ្ឋានថ្មីរបស់ក្លឹប Inter Miami ដែលត្រូវចំណាយប្រាក់ឡើងដល់មួយពាន់លានដុល្លារអាម៉េរិក កំពុងស្ថិតក្នុងដំណាក់កាលបង្ហើយការងារចុងក្រោយ មុននឹងដាក់ឱ្យ Messi និងមិត្តរួមក្រុមប្រើប្រាស់។

គម្រោងស្ថាបនាកីឡាដ្ឋានថ្មីស្ថិតនៅលើដីមួយកន្លែងមានឈ្មោះថា Miami Freedom Park លាតសន្ធឹងក្បែរឆ្នេរសមុទ្ររបស់រដ្ឋ Florida ទំហំ 73,000 ហិកតា អមនឹងអ្វីៗជាច្រើនទៀតដែលនឹងទាក់ទាញសាធារណជនក្នុងពេលខាងមុខ។ ក្នុងនោះមានជាអាទិ៍ ឧទ្យានធំបំផុតប្រចាំទីក្រុង សណ្ឋាគារ ហាង និងភោជនីយដ្ឋានលំដាប់ប្រណិត។ល។

កីឡដ្ឋានថ្មីនេះនឹងជាកន្លែងសម្រាប់ហ្វឹកហាត់របស់ក្រុមទីមួយក្នុងក្លឹប Inter Miami និងបណ្ដាក្រុមវ័យក្មេងរបស់វិទ្យាស្ថាន Inter Miami ដែលរួមមានចាប់ពីក្រុម U12 ដល់ U17 និងស្ថិតក្នុងកម្មវិធីអភិវឌ្ឍកីឡាបាល់ទាត់យូរអង្វែងនៅ Miami និងសហរដ្ឋអាម៉េរិក ដែលមានឈ្មោះថា MLS NEXT។

David Beckham និង Lionel Messi កាលពីឆ្នាំ 2013

Lionel Messi ក្លាយជាមនុស្សរបស់ក្លឹប Inter Miami នៅថ្ងៃដំបូងរបស់ខែកក្កដា ឆ្នាំ 2023 ក្រោយពីកិច្ចព្រមព្រៀងជាមួយក្លឹបបារាំង PGS អស់សុពលភាព។

កីឡដ្ឋានបាល់ទាត់ខាងលើគ្រោងនឹងដាក់ឱ្យប្រើប្រាស់នៅឆ្នាំក្រោយ បន្ទាប់ពីបានចាប់ផ្ដើមស្ថាបនាតាំងពីឆ្នាំ 2019៕

June 19, 2023

ពានរង្វាន់ជើងឯកបាល់ទាត់អឺរ៉ុប Nations League បានទៅលើក្លឹបរបស់អេស្ប៉ាញ

(ហូឡង់) – អេស្ប៉ាញឈ្នះក្រូអាត 5-4 នៅក្នុងការទាត់ប៉េណាំងទីម្ដងម្នាក់ ក្រោយពីទទួលបានលទ្ធផល 0-0 ក្នុងរយៈពេល 120 នាទី នៅក្នុងវគ្គផ្ដាច់ព្រ័ត្រកាលពីព្រលប់ថ្ងៃទី 18 មិថុនា ដូច្នេះ អេស្ប៉ាញបានលើកពានជើងឯក Nations League។

ក្នុងការប្រកួត អេស្ប៉ាញគ្រប់គ្រងបាល់បាន 55% និងទាត់ផ្ដាច់បាន 21 លើក ច្រើនជាងឆ្ងាយធៀបនឹង 12 លើករបស់ក្រូអាត។ ក៏ប៉ុន្តែ ដោយសារតែនេះជាវគ្គចុងក្រោយ ក្រុមទាំងពីរសុទ្ធតែធ្វើបានល្អស្ទើរតែដូចគ្នា នាំឱ្យមានលទ្ធផល 0-0 នៅក្នុងការប្រកួតរយៈពេល 120 នាទី។

ចូលដល់វគ្គទាត់ប៉េណាំងទីម្ដងម្នាក់ដើម្បីស្វែងរកអ្នកឈ្នះ អ្នកចាំទី Unai Simon បានក្លាយជាវីរបុរសរបស់ប្រទេសអេស្ប៉ាញ។ Unai Simon រារាំងបាល់ប៉េណាំងទីបានពីរគ្រាប់របស់ Majer នៅគ្រាប់ទី 4 និង Bruno Petkovic នៅគ្រាប់ទី 6។ ចំណែក Nikola Vlasic, Marcelo Brozovic, Modric និង Ivan Perisic ទាត់បានសម្រេចជូនក្រូអាត ខណៈ Joselu, Rodri, Mikel Merino, Marco Asensio និង Dani Carvajal សម្រេចបានភារកិច្ចសម្រាប់អេស្ប៉ាញ។ បន្ទាប់ពីអ្នកចាំទី Simon របស់អេស្ប៉ាញ រារាំងគ្រាប់បាល់របស់ Petkovic បានសម្រេច Carvajal ក៏ទាត់ផ្ដាច់បានជោគជ័យ ជួយឱ្យអេស្ប៉ាញឈ្នះ 5-4។

នេះជាលើកដំបូងហើយដែលក្លឹបបាល់ទាត់របស់ប្រទេសអេស្ប៉ាញ ដណ្ដើមបានពានរង្វាន់ជើងឯក Nations League។

Nations League គឺជាការប្រកួតដណ្ដើមពានរង្វាន់បាល់ទាត់អន្តរជាតិដែលត្រូវបានធ្វើឡើងពីរឆ្នាំម្ដង រវាងបណ្ដាក្រុមជម្រើសជាតិបុរសលំដាប់កំពូលរបស់បណ្ដាសមាគមជាសមាជិករបស់ UEFA។ UEFA គឺជាស្ថាប័នគ្រប់គ្រងផ្នែកបាល់ទាត់របស់អឺរ៉ុប។ ការប្រកួតដណ្ដើមពានរង្វាន់នេះ បានចាប់ផ្ដើមលើកដំបូងកាលពីខែកញ្ញា ឆ្នាំ 2018៕

June 19, 2023

ក្រុមថៃត្រូវក្រុមតៃវ៉ាន់តាមទាន់ 2-2 បើទោះគ្រប់គ្រងបាល់បាល់ 76%

(តៃវ៉ាន់) – ខ្សែការពាររបស់ក្រុមបាល់ទាត់ជម្រើសជាតិថៃធ្វើឱ្យមានកំហុស នាំឱ្យម្ចាស់ផ្ទះតៃវ៉ាន់ តាមទាន់ 2-2 បើទោះជាគ្រប់គ្រងសាច់បាល់បានច្រើនលើសលុបនៅក្នុងការប្រកួតមិត្តភាពកាលពីព្រលប់ថ្ងៃទី 16 មិថុនា។

Theerathon Bunmathan អវត្តមាននៅក្នុងការប្រកួតនេះ ប៉ុន្តែក្រុមជម្រើសជាតិថៃនៅមានជើងខ្លាំងច្រើនរូបទៀត មានដូចជា Chanathip Songkrasin, Supachok Sarachat ជាដើម នៅពេលធ្វើជាភ្ញៀវនៅឯកីឡដ្ឋាន Kaohsiung កោះតៃវ៉ាន់។ ម្ចាស់ពានរង្វាន់លេខពីរនៅស៊ីហ្គេមលើកទី 32 ដែលបច្ចុប្បន្នឈរលំដាប់លេខ 114 នៅ FIFA គ្រប់គ្រងបាល់បានច្រើលើសលុបនៅចំពោះមុខក្រុមម្ចាស់ផ្ទះតៃវ៉ាន់ ដែលទាបជាង 42 ថ្នាក់ ធៀបនឹងថៃនៅ FIFA ។

ក្នុងការប្រកួតដែលមានលទ្ធផល 2-2 នេះ Kritsada របស់ថៃ ទាត់ចូលទីខ្លួនឯងនៅនាទីទី 48, Teerasil Dangda របស់ថៃ រកបានមួយគ្រាប់នៅនាទីទី 62, Chen Ting-yang របស់តៃវ៉ាន់ រកបានមួយគ្រាប់នៅនាទីទី 87, Wang Ruei ទាត់ចូលទីខ្លួនឯងនៅនាទីទី 84។

https://www.youtube.com/watch?v=uIIP9iIJbdc

ក្រោយការប្រកួតនេះ ក្រុមដំរីប្រយុទ្ធរបស់ថៃ នឹងធ្វើដំណើរទៅកាន់ហុងកុងដើម្បីទាត់មិត្តភាពលើកទីពីនៅថ្ងៃទី 19 មិថុនា។

June 17, 2023

កីឡាករ CR7 អះអាងពីរឿងត្រលប់ទៅកាន់វាលស្មៅអឺរ៉ុប

បណ្ដាញផ្សព្វផ្សាយអន្តរជាតិផ្នែកកីឡាបាល់ទាត់ ឱ្យដឹងថា Cristiano Ronaldo បានបញ្ជាក់អំពីអនាគតទាក់ទិននឹងរឿងចាកចេញពីក្លឹបនៅតំបន់អារ៉ាប់ ទៅកាន់តំបន់អឺរ៉ុប។

ក្នុងសប្ដាហ៍នេះ ទំព័រ El Nacional បានផ្សាយថា កីឡាករខ្សែប្រយុទ្ធជនជាតិព័រទុយហ្កាល់ Cristiano Ronaldo នៅតែគោរពទាំងស្រុងចំពោះកិច្ចព្រមព្រៀងបច្ចុប្បន្នរវាងខ្លួន និងក្លឹប Al Nassr នៅអារ៉ាប៊ីសាអូឌីត ក្រោយពីមានពាក្យចចាមអារ៉ាមថា CR7 អាចនឹងវិលទៅទាត់ឱ្យក្លឹបនៅអឺរ៉ុបឆាប់ៗនេះ។

ទំព័រសារព័ត៌មានខាងលើបន្ថែមថា Cristiano Ronaldo បានបញ្ជាក់ដែរថា នឹងមិនបង្ហាញវត្តមាននៅលើវាលស្មៅអឺរ៉ុបឡើយ សម្រាប់រដូវកាលទិញដូរកីឡាករនារដូវក្ដៅឆ្នាំនេះ។

បច្ចុប្បន្ន Cristiano Ronaldo ទទួលបានប្រាក់ 3.3 លានផោនក្នុងមួយសប្ដាហ៍ពីក្លឹប Al Nassr នៅអារ៉ាប៊ីសាអូឌីត នៅក្នុងកិច្ចព្រមព្រៀងតម្លៃ 428 លានដុល្លារអាម៉េរិកសម្រាប់ពីររដូវកាល។

June 16, 2023

Tag: បាល់ទាត់