Tag: ជំនួញ

យន្តហោះអវកាស Virgin Galactic បន្តដឹកមនុស្សឡើងទៅក្បែរគន្លងតារាវិថីផែនដី
(សហរដ្ឋអាម៉េរិក) – Virgin Galactic បានទទួលជោគជ័យក្នុងការដឹកមនុស្សឡើងទៅកាន់ទីអវកាសក្បែរគន្លងតារាវិថីផែនដីលើកទីប្រាំ មុនពេលចាប់ផ្ដើមធ្វើសកម្មភាពជំនួញនៅខែក្រោយ។
បេសកកម្មកាលពីថ្ងៃទី 25 ឧសភា ដែលមានឈ្មោះថា Unity 25 គឺជាជើងហោះហើរដំបូងរបស់ក្រុមហ៊ុន Virgin Galactic ទៅកាន់ទីអវកាសក្បែរគន្លងគោចរផែនដី គិតចាប់ពីខែកក្កដា 2021 ក្រោយពីក្រុមហ៊ុននេះបានដឹកមហាសេដ្ឋី Richard Branson សហស្ថាបនិករបស់ Virgin Group ដែលជាក្រុមហ៊ុនមេរបស់ Virgin Galactic និងអតិថិជនជាច្រើនរូបផ្សេងទៀត ឡើងទៅទីអវកាស។
Virgin Galactic ប្រើប្រាស់ប្រព័ន្ធបាញ់បង្ហោះក្នុងអាកាសដើម្បីដឹកមនុស្ស និងឧបករណ៍ស្រាវជ្រាវឡើងទៅកាន់ទីអវកាសក្បែរកន្លងតារាវិថិផែនដី។ បច្ចុប្បន្ន ប្រព័ន្ធនេះរួមមានយានចំនួនពីរគ្រឿងគឺយានអវកាសដែលអាចដឹកមនុស្សបាន 8 នាក់ ឈ្មោះ VSS Unity និងយន្តហោះដឹកជញ្ជូន VMS Eve។ Unity ត្រូវបាន Eve នាំឡើងពីព្រលានយន្តហោះ។ ពេល Eve ហោះដល់កម្ពស់ 15,000 ម៉ែត្រ វានឹងទម្លាក់ Unity ដើម្បីឱ្យយាននេះបញ្ឆេះម៉ាស៊ីនរ៉ុក្កែត ហើយបន្តហោះឡើងទៅលំហក្បែរគន្លងគោចរផែនដី។
អតិថិជនដែលហោះក្នុងយាន Unity នឹងបានបណ្ដែតខ្លួនក្នុងស្ថានភាពគ្មានទម្ងន់ច្រើននាទី និងគយគន់ផែនដីពីអវកាស មុនពេលហោះចុះចតលើព្រលានយន្តហោះ។ Unity បានធ្វើការហោះហើរបែបនេះចំនួនប្រាំលើកមកហើយ។ បេសកកម្មថ្មីបំផុតត្រូវបានចាប់ផ្ដើមនៅម៉ោង 23 និង 15 នាទី ថ្ងៃទី 24 ឧសភា (ពេលវេលានៅកម្ពុជា) ពេល Eve ហោះឡើងពីអវកាសយានដ្ឋាន Spaceport America នៅ New Mexico។ Unity ត្រូវបានភ្ជាប់ទៅនឹងគ្រោងឆ្អឹងនៅចន្លោះដងខ្លួនទាំងពីររបស់យន្តហោះដឹកជញ្ជូន Eve។
មនុស្សទាំង 8 នាក់ដែលចូលរួមក្នុងជើងហោះហើរថ្មីបំផុតនេះគឺសុទ្ធតែជាបុគ្គលិករបស់ Virgin Galactic ក្នុងនោះក៏មានប្រធានផ្នែកបណ្ដុះបណ្ដាលអ្នកអវកាស លោកស្រី Beth Moses ផងដែរ។
យោងតាមតំណាងរបស់ Virgin Galactic បន្ទាប់ពីផ្ដាច់ខ្លួន យាន Unity ហោះក្នុងល្បឿនអតិបរមា 3,630 គីឡូម៉ែត្រ/ម៉ោង និងឡើងដល់កម្ពស់ 87.2 គីឡូម៉ែត្រ។ ណាសាឱ្យដឹងថា កម្ពស់នេះអាចចាត់ទុកដូចបានហោះដល់ទីអវកាស។ ក៏ប៉ុន្តែលំហអវកាសចាប់ផ្ដើមពីកម្ពស់ 100 គីឡូម៉ែត្រ។
យាន Unity ត្រលប់មកកាន់ផែនដីនៅម៉ោង 00 និង 37 នាទី ថ្ងៃទី 26 ឧសភា 2023 នៅ Spaceport America។ ចំណែកយន្តហោះ Eve ក៏បានចុះចតដល់ដីប៉ុន្មាននាទីមុននោះ ហើយបេសកកម្ម Unity 25 ក៏បានបញ្ចប់៕
May 26, 2023
Cristiano Ronaldo ដណ្ដើមបានតំណែង «ស្ដេចរកប្រាក់» របស់ Lionel Messi
Cristiano Ronaldo នាំមុខគេនៅក្នុងបញ្ជីចំណាត់ថ្នាក់ស្ដីពីកីឡាករដែលរកប្រាក់បានច្រើនជាងគេលើពិភពលោក សម្រាប់ឆ្នាំសារពើពន្ធ 2022-2023។
យោងតាមទំព័រ Forbes កំពូលតារាបាល់ទាត់ Ronaldo រកបាន 136 លានដុល្លារអាម៉េរិក នៅក្នុងឆ្នាំសារពើពន្ធ 2022-2023។ ខ្សែប្រយុទ្ធរបស់ព័រទុយហ្កាល់រូបនេះ កំពុងនាំមុខគេនៅក្នុងបញ្ជីចំណាត់ថ្នាក់ជាលើកដំបូង រាប់ចាប់ពីឆ្នាំ 2017 និងជាលើកទីបីក្នុងអាជីពបាល់ទាត់របស់ខ្លួន។ 136 លានដុល្លារអាម៉េរិក ក៏ជាប្រាក់ចំណូលប្រចាំឆ្នាំខ្ពស់បំផុតក្នុងប្រវត្តិសាស្ត្ររបស់កីឡាករបាល់ទាត់មួយរូប។
ខ្ទង់ប្រាក់ប្រហែល 46 លានដុល្លារនៅក្នុងប្រាក់ចំណូលសរុបរបស់ Ronaldo គឺបានមកពីក្លឹបដែលគាត់លេងឱ្យ គឺ Man Utd និង Al Nassr។ 90 លានដុល្លារទៀតគឺបានមកពីវិស័យនានាដែលនៅក្រៅវាលស្មៅ ក្នុងនោះមានទាំងការផ្សាយពាណិជ្ជកម្ម និងជំនួញ។ នៅក្នុងប្រវត្តិសាស្ត្រ មានកីឡាករតែបីនាក់ប៉ុណ្ណោះដែលមានប្រាក់ចំណូលក្រៅវាលស្មៅច្រើនជាង 90 លានដុល្លារ នោះគឺ Roger Federer, Tiger Woods និង Conor McGregor ។
Ronaldo បានបញ្ចប់កិច្ចសន្យាជាមួយ Man Utd កាលពីពាក់កណ្ដាលខែវិច្ឆិកា 2022 និងបានចុះកិច្ចសន្យាជាមួយ Al Nassr ចាប់ពីខែមករា 2023។ យោងតាមបណ្ដាញផ្សព្វផ្សាយ ក្លឹប Al Nassr ផ្ដល់ប្រាក់ចំណូលប្រហែល 200 លានដុល្លារអាម៉េរិក/ឆ្នាំ ដល់ CR7។ ដូច្នេះ ស្ថិតិរបស់ Forbes ស្ដីពីប្រាក់ចំណូលរបស់ Ronaldo ទំនងជានឹងកើនឡើងខ្ពស់ចាប់ពីឆ្នាំក្រោយ។
Cristiano Ronaldo
លំដាប់លេខពីរនៅក្នុងតារាងចំណាត់ថ្នាក់នេះ គឺបានទៅលើ Lionel Messi។ ចំណាត់ថ្នាក់របស់ Messi បានធ្លាក់ចុះមួយកាំបើធៀបនឹងឆ្នាំកន្លង ប៉ុន្តែគាត់នៅតែមានប្រាក់ចំណូល 130 លានដុល្លារអាម៉េរិក។ ប្រាក់ចំណូលនៅក្នុង និងក្រៅវាលស្មៅរបស់កំពូលតារាបាល់ទាត់អាហ្សង់ទីនរូបនេះគឺស្មើគ្នា។
ចំណាត់ថ្នាក់លេខបីបានទៅលើ Kylian Mbappe ដោយរកបាន 120 លានដុល្លារអាម៉េរិក។ ក្នុងនោះ 100 លានដុល្លារបានពីក្លឹបបាល់ទាត់។
Kylian Mbappe (ស្ដាំ) និង Lionel Messi
កំពូលកីឡាករបាល់បោះ LeBron James ឈរលំដាប់លេខបួន ដោយរកបាន 119.5 លានដុល្លារ ខណៈកំពូលអ្នកប្រដាល់ Canelo Alvarez រកបាន 110 លានដុល្លារ ត្រូវឈរលេខប្រាំ។
បន្ទាប់មកទៀតគឺ កីឡាករវាយកូនគោល Dustin Johnson (107 លាន), កីឡាករវាយកូនគោល Phil Mickelson (106 លាន), តារាបាល់បោះ Stephen Curry (100.4 លាន), កីឡាករវាយកូនបាល់ (tennis) Roger Federer (95.1 លាន) និងទីដប់គឺតារាបាល់បោះ Kevin Durant (89.1 លាន)៕
May 3, 2023
រកឃើញរូបចម្លាក់ព្រះពុទ្ធអាយុកាល 1,900 ឆ្នាំនៅប្រទេសអេហ្ស៊ីបបុរាណ
រូបចម្លាក់ព្រះពុទ្ធសក្យមុនីដែលមានសំណាកឆព្វណ្ណរង្សីនៅពីក្រោយ អាចត្រូវបានជនជាតិឥណ្ឌាដែលរស់នៅក្នុងទីក្រុង Berenike ឆ្លាក់ឡើងកាលពីសតវត្សរ៍ទីមួយ។
រូបចម្លាក់ដែលមានអាយុកាល 1,900 ឆ្នាំ និងត្រូវបានរកឃើញនៅក្នុងទីក្រុងផែរបស់អេហ្ស៊ីបបុរាណ Berenike ក្បែរសមុទ្រក្រហមនេះ អាចជាកម្មសិទ្ធិរបស់ជនចំណាកស្រុកម្នាក់មកពីអាស៊ីខាងត្បូង។ នេះបើតាម Live Science ដែលបានចុះផ្សាយកាលពីថ្ងៃទី 02 ឧសភា។ រូបចម្លាក់ព្រះពុទ្ធនេះបរិយាយអំពីព្រះពុទ្ធសក្យមុនីដែលគង់នៅក្នុងតំបន់អាស៊ីខាងត្បូងកាលពី 2,550 ឆ្នាំមុន។ ព្រះពុទ្ធដើមឡើយគឺជារាជបុត្រាមួយអង្គ ប៉ុន្តែក្រោយមកបានបោះបង់គ្រប់យ៉ាងដើម្បីសាងព្រះផ្នួស។
យោងតាម Steven Sidebotham សាស្ត្រាចារ្យផ្នែកប្រវត្តិសាស្ត្រនៅសាកលវិទ្យាល័យ Delaware និងជាសហប្រធានរបស់គម្រោង Berenike រូបចម្លាក់ខាងលើត្រូវបានបង្កើតឡើងចន្លោះពីឆ្នាំ 90 ដល់ឆ្នាំ 140 ក្នុងសម័យចក្រភពរ៉ូមដែលគ្រប់គ្រងប្រទេសអេហ្ស៊ីប។ អេហ្ស៊ីប និងឥណ្ឌាមានទំនាក់ទំនងពាណិជ្ជកម្មជាច្រើនក្នុងសម័យនោះ។
ក្រៅពីរូបចម្លាក់នេះ ក្រុមបុរាណវិទូក៏បានរកឃើញចម្លាក់ជាអក្សរសំស្ក្រឹតនៅ Berenike ផងដែរ។ បើទោះអក្សរចម្លាក់នេះត្រូវបានបំផ្លាញ ប៉ុន្តែអ្នកស្រាវជ្រាវដឹងថា វាត្រូវបានបង្កើតឡើងក្នុងសម័យកាលដែលត្រួតត្រាដោយព្រះចៅអធិរាជរ៉ូម៉ាំង Marcus Julius Philippus ដែលគ្រងរាជពីឆ្នាំ 244 ដល់ឆ្នាំ 249។ សាស្ត្រាចារ្យ Sidebotham និងសហការីកំពុងរៀបចំ ត្រៀមសម្រាប់ការប្រកាសអំពីរបកគំហើញនេះនៅលើទស្សនាវដ្ដី។
យោងតាមអ្នកស្រាវជ្រាវ អក្សរចម្លាក់ជាភាសាសំស្ក្រឹតបង្ហាញថា មានសហគមន៍អ្នកជំនួញអេហ្ស៊ីបមួយរស់នៅក្នុងដែនដីអេហ្ស៊ីបបុរាណ ពោលគឺពួកគេមិនមែនគ្រាន់តែឆ្លងកាត់ទីនោះដើម្បីធ្វើជំនួញឡើយ។ ការកត់ត្រាក្នុងប្រវត្តិសាស្ត្រក៏បានបង្ហាញថា មានជនជាតិឥណ្ឌារស់នៅក្នុងតំបន់ Alexandria ផងដែរ៕
May 3, 2023
ថៃហាមអត្តពលិកទៅកាន់កាស៊ីណូនៅពេលចូលរួមព្រឹត្តិការណ៍ស៊ីហ្គេមកម្ពុជា
ប្រតិភូកីឡាថៃស្នើអត្តពលិកចៀសឱ្យឆ្ងាយពីបនល្បែង (កាស៊ីណូ) នៅកម្ពុជា គ្រាដែលពួកគេមកចូលរួមព្រឹត្តិការណ៍ប្រកួតកីឡាអាស៊ីអាគ្នេយ៍ (ស៊ីហ្គេម) លើកទី 32។
«ចេញទៅក្រៅលេងបាន ប៉ុន្តែកុំទៅបនល្បែ» ប្រធានក្រុម Thana Chaiprasit បានប្រាប់ប្រព័ន្ធផ្សព្វផ្សាយ Thairath ដូច្នេះ។ «រឿងនេះនៅកម្ពុជាគឺស្របច្បាប់ ប៉ុន្តែមិនសមស្របសម្រាប់អត្តពលិកដែលកំពុងបំពេញកាតព្វកិច្ចជាតិ»។
មេដឹកនាំក្រុម និងគ្រូបង្វឹកនឹងតាមដានអត្តពលិក បង្ការកុំឱ្យពួកគេធ្វើទង្វើខុសច្បាប់ ឬខុសគោលការណ៍ដែលបានកំណត់។ សារព័ត៌មាន Thairath យល់ថា ការណែនាំរបស់លោក Chaiprasit នឹងមិនទទួលបានចំណាប់អារម្មណ៍ច្រើន ព្រោះថា អត្តពលិកចេះថែរក្សារូបភាពសម្រាប់កីឡារបស់ប្រទេសថៃ។
ប្រទេសហ្វ៊ីលីពីនក៏ចាត់ទុកកាស៊ីណូជាជំនួញស្របច្បាប់។ ប៉ុន្តែ ក្នុងព្រឹត្តិការណ៍ស៊ីហ្គេមលើកទី 30 ប្រតិភូកីឡារបស់បណ្ដាប្រទេសពុំបានជួបបញ្ហាអត្តពលិកចូលបនល្បែងឡើយ។
អត្តពលិកនៃប្រតិភូកីឡាថៃចំនួន 847 នាក់ មកកាន់កម្ពុជាប្រកួតក្នុង 36 លើ 37 វិញ្ញាសា។ បណ្ដាក្រុមកីឡាករដែលបានប្រកួតមុនគេនៅស៊ីហ្គេមលើកនេះ រួមមាន ក្រុមបាល់ទាត់ U-22, ក្រុមចត្រង្គ និងក្រុមកីឡាកីឡាគ្រីឃីត (Cricket) ដែលចាប់ផ្ដើមប្រកួតតាំងពីថ្ងៃទី 29 មេសា 2023។
ក្រុមអត្តពលិកជាច្រើនរូបរបស់ប្រទេសថៃ បានមកដល់កម្ពុជាតាំងពីថ្ងៃទី 30 មេសា
គោលដៅរបស់ក្រុមប្រតិភូកីឡាថៃគឺមេដាយមាស 162 គ្រឿង។ នេះគឺជាចំនួនច្រើនបំផុតរាប់ចាប់តាំងពីស៊ីហ្គេមលើកទី 24 ដែលថៃទទួលធ្វើជាម្ចាស់ផ្ទះ។ នៅស៊ីហ្គេមលើកទី 31 ក្រុមថៃដណ្ដើមមេដាយមាសបាន 92 គ្រឿង តិចជាងឆ្ងាយធៀបនឹងក្រុមម្ចាស់ផ្ទះវៀតណាតដែលដណ្ដើមបាន 205 គ្រឿង។
នៅក្នុងប្រវត្តិសាស្ត្រស៊ីហ្គេម ថៃគឺជាក្រុមកីឡាតែមួយគត់ដែលមិនធ្លាប់ជាប់ចំណាត់ថ្នាក់ក្រោមលេខបី។
May 2, 2023
“អាណាចក្រពាណិជ្ជកម្ម” របស់មហាសេដ្ឋី Jeff Bezos
នៅពេល Jeff Bezos ចាកចេញពីតំណែង CEO កាលពីថ្ងៃទី 5 ខែកក្កដា ឆ្នាំ 2021 ក្រុមហ៊ុនយក្ស Amazon ដែលលោកបានកសាងឡើង កំពុងតែរីកមាឌលឿនជាងពេលណាៗទាំងអស់។
ក្នុងអំឡុង 27 ឆ្នាំ លោក Jeff Bezos បានប្រែក្លាយ Amazon ទៅជាក្រុមហ៊ុនដ៏ធំមួយក្នុងពិភពលោក ដែលមានអំណាច និងឥទ្ធិពលយ៉ាងសម្បើម នៅក្នុងវិស័យជាច្រើន។ ទ្រព្យសម្បត្តិរបស់ Jeff Bezos និងក្រុមហ៊ុន Amazon ក៏បានកើនឡើងយ៉ាងឆាប់រហ័សក្នុងរយៈពេលប៉ុន្មានឆ្នាំកន្លងទៅថ្មីៗនេះ។
ក្រៅពីការដណ្ដើមបានជោគជ័យក្នុងវិស័យពាណិជ្ជកម្មអនឡាយ ក្រុមហ៊ុន Amazon ក៏ទទួលបានជោគជ័យយ៉ាងត្រចះត្រចង់ក្នុងវិស័យជាច្រើនទៀត ក្នុងនោះមានដូចជាសេវាកម្ម កុំព្យូទ័រពពក (cloud computing) កម្សាន្ត និងសេវាផ្សាយពាណិជ្ជកម្ម។
ចាប់ពីថ្ងៃទី 5 ខែកក្កដា ឆ្នាំ 2021 ក្រោយពីបានប្រគល់តំណាង CEO ឱ្យ Andy Jassy ដើម្បីក្លាយជាប្រធានក្រុមហ៊ុន មហាសេដ្ឋី Jeff Bezos នឹងឈានចូលដល់ជីវភាពថ្មី ហើយលោកនឹងចំណាយពេលវេលាច្រើនជាងមុន ទៅលើកិច្ចការស្រាវជ្រាវអវកាស កិច្ចការមនុស្សធម៌ ទិញអចលនទ្រព្យ និងនាវាទេសចរណ៍។
ធ្វើជំនួញក្នុងវិស័យជាច្រើន
ក្រុមហ៊ុនស្រាវជ្រាវ eMarketer បានឱ្យដឹងថា Amazon គ្រប់គ្រងផ្នែកលក់រាយអនឡាញ ប្រមាណ 41% ក្នុងចំណោមផលិតផលលក់រាយតាមអនឡាញសរុបរបស់ សហរដ្ឋអាមេរិក។ ប៉ុន្តែ Amazon ក៏បាននាំមុខគេក្នុងវិស័យសេវាកម្មកុំព្យូទ័រពពក និងជា «មហាអំណាច» មួយក្នុងវិស័យផ្សាយពាណិជ្ជកម្ម ដែលប្រកួតប្រជែងនឹង Google និង Facebook ផងដែរ។ Amazon ក៏វាយលុកទៅក្នុងវិស័យផ្ដល់សេវាកម្មអនឡាញ និងផលិតផលឆ្លាតវៃ។
ការជ្រើសរើសបុគ្គលិក
Amazon បានជ្រើសរើសបុគ្គលិកបន្ថែម ជាង 500,000 នាក់ នៅជុំវិញពិភពលោក នាឆ្នាំ 2020 ហើយក្នុងឆ្នាំបន្តបន្ទាប់ទៀត ក្រុមហ៊ុននេះ អាចយកឈ្នះ Walmart ដើម្បីក្លាយជាអ្នកជ្រើសរើសបុគ្គលិកច្រើនជាងគេបង្អស់នៅ សហរដ្ឋអាមេរិក។
ដើមឆ្នាំ 2021 នេះ Amazon បានជ្រើសរើសបុគ្គលិកបន្ថែមជិត 4,000 នាក់ទៀត។ បច្ចុប្បន្ន ក្រុមហ៊ុននេះ មានបុគ្គលិកការិយាល័យចំនួនជាង 130,000នាក់ ក្នុងចំណោម 950,000 នាក់ របស់ខ្លួន ដែលកំពុងធ្វើការនៅ សហរដ្ឋអាមេរិក។
ជោគជ័យនៅ Hollywood
Amazon បានចាប់ផ្ដើមចូលប្រលូកក្នុងវិស័យឧស្សាហកម្មភាពយន្តកាលពីឆ្នាំ 2010 តាមរយៈ Amazon Studios។ បច្ចុប្បន្ន ពួកគេគឺជាផលិតកម្ម និងជាអ្នកផ្គត់ផ្គង់ភាពយន្តដែលមានឈ្មោះល្បីល្បាញ។ ខ្សែភាពយន្តរបស់ Amazon ដែលទទួលបានជោគជ័យច្រើនជាងគេ មានដូចជា រឿង “The Marvelous Mrs. Maisel”, “Manchester by the Sea” និង “Sound of Metal” ជាដើម។
គម្រោងវិនិយោគដទៃ
មហាសេដ្ឋី Bezos មានគម្រោងហោះទៅកាន់ទីអវកាស នៅថ្ងៃទី 20 ខែកក្កដា ខាងមុខ។ លោក ក៏នឹងផ្ដោតទៅលើកិច្ចការមនុស្សធម៌ អាកាសធាតុច្រើនជាងមុនផងដែរ។ លោក Bezos គឺជាមហាសេដ្ឋីលំដាប់ទីមួយក្នុងពិភពលោក ដោយមានទ្រព្យប្រមាណ 200 ពាន់លានដុល្លារអាមេរិក នេះបើតាម Bloomberg Billionaires Index៕
ប្រភព ៖ WSJ
ប្រែសម្រួល ៖ បុត្រា
July 7, 2021
តើស្រ្តីមានផ្ទៃពោះ ជិះយន្តហោះបានដែរឬទេ?
យើងទាំងអស់គ្នាប្រហែលជាធ្លាប់បានឮពីជំនឿកាលពីបុរាណដែលពាក់ព័ន្ធនឹងការហាមប្រាមមិនឱ្យស្រីៗធ្វើក្នុងអំឡុងពេលខ្លួនមានគភ៌ខ្លះៗមកហើយមិនខាន។ គឺជាការហាមប្រាមធម្មតាៗ ដូចជា ហាមកាន់កន្ត្រៃ ហាមទៅចូលរួមបុណ្យសព រហូតទៅដល់ហាមលាបពណ៌សក់ជាដើម ហើយស្រ្តីៗយើងក៏ប្រហែលជាធ្លាប់បានឮមកខ្លះៗដែរហើយថា ស្ត្រីមានគភ៌ត្រូវបានហាមមិនឱ្យជិះយន្តហោះឡើយ តើជារឿងពិតឬដែលគេនិយាយថា ការធ្វើដំណើរតាមយន្តហោះក្នុងអំឡុងពេលមានផ្ទៃពោះនឹងបង្កឱ្យមានគ្រោះថ្នាក់? ដូច្នេះសរុបមកថា តើស្រ្តីមានផ្ទៃពោះអាចជិះយន្តហោះបានដែរឬទេ? ឡា រ៉ែនមានចម្លើយសម្រាប់សំនួរនេះ…។
អ្នកជំនាញការផ្នែកសុខភាពស្រ្តី បានរៀបរាប់ផ្ទុយពីចំណុចហាមប្រាមចាស់ៗដែលលោកអ្នកធ្លាប់បានឮមកនោះថា នៅក្នុងផ្នែកជំនួញ ការធ្វើដំណើរដោយយន្តហោះមិនមានភាពប្រថុយប្រថានជាពិសេសណាមួយសម្រាប់ស្ត្រីមានគភ៌ដែលមានសុខភាពរឹងមាំល្អ ឬសូម្បីតែចំពោះទារកនៅក្នុងផ្ទៃឡើយ តែហេតុផលធំចម្បងគឺ ជាក្តីកង្វល់របស់ក្រុមហ៊ុនអាកាសចរណ៍នោះទៅវិញទេ ព្រោះមានភាពអាចទៅរួចច្រើនដែលស្រ្តីមានគភ៌នឹងប្រសូតបុត្រនៅក្នុងយន្តហោះដែលកំពុងហោះហើរ ដែលធ្វើឱ្យក្រុមហ៊ុនអាកាសចរណ៍នោះត្រូវចេញថ្លៃចាយវាយបន្ថែមតាមច្បាប់កំណត់ និងថែមទាំងជាការរុកគួនរំខានអ្នកដំណើរដទៃទៀតផង។
ខាងក្រោមនេះ គឺគន្លឹះសំខាន់ៗសម្រាប់ស្រ្តីមានគភ៌ខណៈជិះយន្តហោះ ៈ
1. ក្រោកឡើងដើររយៈចម្ងាយខ្លីៗតាមផ្លូវដើរនៅក្នុងយន្តហោះរៀងរាល់ 30នាទីម្តង បើសិនជាមានសុវត្ថិភាពក្នុងការធ្វើ។
2. សណ្តូកជើងឱ្យត្រង់ និងធ្វើចលនាជើងបែប អៃហ្សូមេធ្រិក(Isometric)។
3. ញ៉ាំទឹកឱ្យបានច្រើន។
4. ជ្រើសរើសកន្លែងអង្គុយដែលនៅក្បែរបន្ទប់ទឹក។
5. គួរបំពាក់ខ្សែក្រវាត់សុវត្ថិភាពឱ្យទាប ម្តុំជុំវិញឆ្អឹងត្រគាកជាប់រហូតក្នុងពេលធ្វើដំណើរ។
6. ចៀសវាងអាហារដែលធ្វើឱ្យកើតមានហ្កាស និងអាហារដែលបម្រើនៅក្នុងយន្តហោះ។ ព្យាយាមយកអាហាររបស់ខ្លួនឯងទៅទុកញ៉ាំ។
ការធ្វើដំណើរក្នុងរយៈដំបូងនៃការមានគភ៌ គឺមានសុវត្ថិភាព តែអ្វីដែលគួរប្រុងប្រយ័ត្ននោះគឺ អាការពាក់ព័ន្ធនឹងការមានគភ៌ ដូចជាអាការចាញ់កូនដែលអាចនឹងកាន់តែអាក្រក់ឡើង ដូច្នេះអ្នកគួរមានថង់សម្រាប់ក្អួតនៅជិតខ្លួន 2 – 3សម្រាប់។
មានស្រ្តីជាច្រើនមានអារម្មណ៍ថា សប្បាយ និងស្រួលខ្លួនល្អឡើងវិញនៅក្នុងអំឡុងត្រីមាសទី2 នៃការមានគភ៌។ អាការចាញ់កូនរបស់អ្នកបាត់ទៅវិញហើយ នៅក្នុងត្រីមាសនេះមានភាពប្រថុយប្រថានតិចបំផុតក្នុងការប្រសូតមុនកំណត់ ទើបមិនមែនជារឿងប្លែកឡើយដែលស្រ្តីជាច្រើនឆ្លៀតឱកាសនេះធ្វើដំណើរទៅកម្សាន្តនៅទីឆ្ងាយ តែយ៉ាងណាក៏ដោយអ្នកគួរប្រយ័ត្នរឿងប្រព័ន្ធឈាមរត់ផង។ យើងមានពាក្យណែនាំដើម្បីជួយឱ្យលំហូរវិលរបស់លោហិតរបស់ស្រ្តីមានគភ៌ដំណើរការយ៉ាងប្រក្រតី ដូចខាងក្រោម ៖
- គួរស្លៀកសម្លៀកបំពាក់ណាដែលធូររលុងសប្បាយស្រួលខ្លួន។
- គួរពាក់ស្រោមជើងបារ៍ដែលមានភាពរឹប ដើម្បីជួយបង្កើនការហូរវិលរបស់ឈាមពីកជើងទៅរកបេះដូង និងសួតរបស់អ្នក។
- ចៀសវាងការអង្គុយគងអន្ទាក់ខ្លា។
- ញ៉ាំទឹកឱ្យបានច្រើន ដើម្បីរក្សាភាពស្រស់ថ្លាក្នុងរាងកាយ។
រឿងមួយទៀតដែលជួយរក្សាលំហូរវិលរបស់លោហិតបានច្រើននោះ គឺការធ្វើចលនារាងកាយដោយការក្រោកឡើងដើរនៅតាមផ្លូវដើរក្នុងយន្តហោះ សណ្តូកជើង និងពង្រឹងសាច់ដុំជើងរៀងរាល់កន្លះម៉ោងម្ដង បង្វិលកជើងទៅមក និងកម្រើកម្រាមជើង។ អ្វីទាំងអស់នេះ គឺជាឧទាហរណ៍តូចៗដែលស្រ្តីមានគភ៌អាចធ្វើបាននៅនឹងកន្លែងដែលខ្លួនអង្គុយដោយមិនរំខានអ្នកធ្វើដំណើរដែលអង្គុយក្បែរឡើយ៕
November 18, 2020
ក្រោយវិបត្តិកូវីដ-19 ធុរកិច្ចជាច្រើននឹងត្រូវផ្លាស់ប្ដូរ…
មិនអាចបដិសេធបានឡើយថា វិបត្តិការឆ្លងរាតត្បាតនៃមេរោគកូវីដ-19 បានធ្វើឱ្យជីវិតរបស់មនុស្សទូទៅផ្លាស់ប្ដូរ និងមិនត្រឹមតែប៉ុណ្ណោះទេ បណ្ដាអ្នកទីផ្សារ អ្នកសេដ្ឋសាស្ត្រ និងអ្នកធុរកិច្ចផ្សេងៗ សុទ្ធតែបានសន្និដ្ឋានទុកថា ក្រោយវិបត្តិកូវីដ-19 បញ្ចប់ទៅ ធុរកិច្ចផ្សេងៗនៅក្នុងប្រទេស ក៏នឹងប្រែប្រួលផ្លាស់ប្ដូរទៅតាមនោះដែរ ដូច្នេះហើយទើបគ្រប់ផ្នែកត្រូវត្រៀមខ្លួនជាស្រេច ដើម្បីទប់ទល់នឹងភាពផ្លាស់ប្ដូរដែលបម្រុងនឹងកើតឡើងនៅពេលខាងមុខ។
សម្រាប់ធុរកិច្ច ដែលត្រូវកែសម្រួល មានដូចជា…
1. ការលក់ទំនិញផ្សេងៗ និងធុរកិច្ចលក់រាយ៖ ត្រូវបន្ថែមសេវាកម្មតាមប្រព័ន្ធអនឡាញ ត្រូវនាំយកប្រព័ន្ធ ITមកប្រើ ព្រោះដោយសារតែវិបត្តិកូវីដ-19 បានធ្វើឱ្យមនុស្សនាំគ្នាងាកមកទិញទំនិញតាមអនឡាញច្រើនឡើង។
2. ខ្សែចង្វាក់ផ្គត់ផ្គង់៖ ដូចជាការចាត់ចែងរកវត្ថុធាតុដើម ការផលិត រហូតដល់ការលក់ទំនិញទៅដល់ដៃអតិថិជន នឹងផ្លាស់ប្ដូរ ដោយប្រទេសផ្សេងៗទូទាំងពិភពលោក នឹងងាកមកផ្ដល់ភាពសំខាន់ចំពោះការផលិត ការបញ្ជាទិញវត្ថុធាតុដើម និងទំនិញនៅក្នុងប្រទេស ឬបញ្ជាទិញទំនិញពីប្រទេសជិតខាងវិញម្ដង ដើម្បីការពារបញ្ហាការដឹកជញ្ជូន ដែលបណ្ដាលមកពីផលប៉ះពាល់របស់វិបត្តិផ្សេងៗ ដូចដែលបានកើតមានក្នុងអំឡុងវិបត្តិកូវីដ-19។ ក្រៅពីនោះ ឧស្សាហកម្មមួយចំនួន ក៏នឹងមានការផ្លាស់ប្ដូរមូលដ្ឋានផលិតផងដែរ។
3. ការវិនិយោគទុនក្នុងធុរកិច្ចហិរញ្ញវត្ថុ នឹងចែកចាយទៅក្នុងក្រុមធុរកិច្ចផ្សេងៗទៀតកាន់តែច្រើនឡើង៖ ដោយអ្នកវិនិយោគនឹងចែកចាយភាពប្រថុយប្រថាន ដោយការជ្រើសរើសវិនិយោគក្នុងធុរកិច្ចដែលសម្បូរបែប(ច្រើនមុខ) ខ្លាំងជាងវិនិយោគតែក្នុងធុរកិច្ចណាមួយតែ1មុខ ព្រោះវិបត្តិកូវីដ-19 បានធ្វើឱ្យអ្នកវិនិយោគដឹងថា ធុរកិច្ចមួយចំនួន ដែលមើលទៅស្ថិតស្ថេរគង់វង្ស និងមានកម្រៃល្អនោះ បើសិនជាជួបនឹងសភាវវិបត្តិអ្វីមួយ ក៏អាចនឹងដួលរលំគ្រាំងភ្លាមៗតែម្ដងដែរ។
4. ធនាគារ និងគ្រឹះស្ថានហិរញ្ញវត្ថុ នឹងកាត់បន្ថយចំនួនសាខា និងកាត់បន្ថយចំនួនបុគ្គលិក លឿនជាងផែនការដែលបានរៀបចំទុក ដោយសារតែវិបត្តិកូវីដ-19 បានធ្វើឱ្យអតិថិជននាំគ្នាងាកមកប្រើប្រាស់សេវាកម្ម E-Banking យ៉ាងច្រើនវិញម្ដង។
ធុរកិច្ចដែលធំធាត់ឡើង មានដូចជា…
1.ធុរកិច្ច IT ផ្សេងៗ ដូចជា ការធ្វើវេបសាយ អ៊ែបភ្លីខេស្សិន ប្លុកឆេន (បណ្ដាញការរក្សាទុកព័ត៌មាន) ដោយសារតែវិបត្តិកូវីដ-19 បានធ្វើឱ្យធុរកិច្ចផ្សេងៗ ងាកមកប្រើប្រាស់សេវាកម្មអៃធីទាំងនេះច្រើនឡើង និងក្លាយជាផ្នែកមួយរបស់ធុរកិច្ច។
2. ធុរកិច្ចបញ្ជូនទំនិញ និងអាហារ…ដោយសារតែវិបត្តិកូវីដ-19 ដែលមនុស្សម្នាត្រូវស្ថិតនៅក្នុងផ្ទះ ធ្វើឱ្យមានការបញ្ជាទិញម្ហូបអាហារ និងទំនិញតាមអនឡាញកាន់តែច្រើនឡើង និងក្លាយជារបៀបរបបជីវិតថ្មីមួយដែលមនុស្សមានទម្លាប់ ទើបបណ្ដាលឱ្យធុរកិច្ចបញ្ជូនអាហារ និងទំនិញ មានសញ្ញាថា នឹងរីកធំធាត់ឡើងយ៉ាងឆាប់រហ័ស។
ធុរកិច្ចដែលកើតថ្មី មានដូចជា…
បង្រៀនតាមប្រព័ន្ធអនឡាញផ្សេងៗ៖ ដោយសារតែវិបត្តិកូវីដ-19 មនុស្សបាននាំគ្នាងាកមកចាប់អារម្មណ៍សិក្សារៀនសូត្ររឿងផ្សេងៗដោយខ្លួនឯងតាមរយៈប្រព័ន្ធអនឡាញច្រើនឡើង មិនថាតែការរៀនធ្វើម្ហូបអាហារ រៀនជំនាញការងារសិល្បៈផ្សេងៗ ការរៀនច្រៀង ការហាត់ប្រាណ ឬការរៀនតាមអនឡាញ ដើម្បីប្រកបអាជីពផ្សេងៗ ទើបធ្វើឱ្យមានធុរកិច្ចបង្រៀនកួរតាមអនឡាញថ្មីៗកើតឡើងជាច្រើន។
ធុរកិច្ចដែលបាត់ទៅ មានដូចជា…
ធុរកិច្ចដែលបានទទួលផលប៉ះពាល់ពីវិបត្តិកូវីដ-19 បានធ្វើឱ្យអ្នកខ្លះដែលដើមទុនវិនិយោគមិនច្រើនគ្រប់គ្រាន់ ត្រូវបិទដំណើរការ ដូចជា ភោជនីយដ្ឋាន សណ្ឋាគារ កន្លែងម៉ាស្សា និងស្ប៉ា រោងចក្រឧស្សាហកម្ម ជាដើម៕
ប្រភព៖ សារព័ត៌មានបរទេស
May 7, 2020
កំហុស 10យ៉ាង ដែលអ្នកជោគជ័យទាំងឡាយមិនដែលសាង
ការមិនសូវសើច អាកប្បកិរិយាអវិជ្ជមាន ឬការមិនហ៊ានបង្ហាញឱ្យគេឃើញនូវសមត្ថភាពរបស់ខ្លួនឯង ជាដើម សុទ្ធតែជាចំណុចដែលអាចរារាំងលោកអ្នក មិនឱ្យទៅដល់តំបន់ជោគជ័យ ឬមិនអាចក្លាយជាអ្នកមានបានទាំងអស់។
ខាងក្រោមនេះ គឺជាយោបល់របស់សេដ្ឋី 10រូបដែលចេញមកពីប្រភពអ្នកក្រ ស្ដីអំពីសកម្មភាពប្រចាំថ្ងៃដែលអាចដឹកនាំឱ្យមនុស្សឈានដល់ភាពជោគជ័យបាន។
មិនហ៊ានបង្ហាញខ្លួន ឬមិនហ៊ានបង្ហាញពីបំណងក្នុងការធ្វើអ្វីមួយ
“មិនបង្ហាញខ្លួន គឺជាកំហុសដែលគេតែងជួបប្រទះរាល់ថ្ងៃ ហើយវាអាចរាំងខ្ទប់លោកអ្នក មិនឱ្យងើបមុខរួច។ ការហ៊ានបង្ហាញខ្លួនម្ដងហើយម្ដងទៀត វាទាមទារឱ្យមានភាពជឿជាក់លើខ្លួនឯង និងការព្យាយាម ប៉ុន្តែវាក៏បង្កើតបានជាវិន័យល្អមួយដែរ។ អ្នកនឹងមិនអាចមានអ្វីៗតាមចិត្តប្រាថ្នាបានទេ បើអ្នកមិនស្វែងរកវិធីដើម្បីចាប់យកវា” នេះ ជាមតិរបស់ Grant Cardone ស្ថាបនិក Capital ដែលជាក្រុមហ៊ុនអចលនទ្រព្យដ៏ធំមួយដែលមានតម្លៃ 750លានដុល្លារអាមេរិក។
ភាពខ្ជិលច្រអូស
អតីតប្រធានក្រុមហ៊ុន Walt Disney លោក Michael Ovitz បាននិយាយថា៖ “អ្នករាល់គ្នាងាយនឹងមានទម្លាប់ខ្ជិលច្រអូសណាស់។ ប៉ុន្តែ ដើម្បីទទួលបានលទ្ធផលល្អ យើងត្រូវតែធ្វើការ។ ខ្ញុំត្រូវបានឪពុកម្ដាយបង្ហាត់បង្រៀនថា ខ្ញុំអាចធ្វើអ្វីៗបានទាំងអស់ ឱ្យតែធ្វើដោយការព្យាយាម និងផ្ដោតទៅលើតែគោលដៅនោះ។ ខ្ញុំអាចនឹងធ្វើការហួសកម្លាំង ប៉ុន្តែនោះ គឺជាអ្វីដែលត្រូវតែធ្វើ”។
អាកប្បកិរិយាអវិជ្ជមាន
“នៅពេលខ្ញុំជ្រើសរើសបុគ្គលិកណាម្នាក់ ឬសហការជាមួយអ្នកជំនួញណាម្នាក់នៅក្នុងកម្មវិធី Shark Tank ខ្ញុំតែងស្វែងរកចំណុចមួយ គឺអាកប្បកិរិយាវិជ្ជមានរបស់គេ។
ខ្ញុំធ្លាប់គិតថា ខ្ញុំអាចផ្លាស់ប្ដូរមនុស្សម្នាក់ដែលមានអាកប្បកិរិយាអវិជ្ជមាន ប៉ុន្តែចុងក្រោយខ្ញុំបានត្រឹមតែបញ្ឈប់គាត់ពីការងារប៉ុណ្ណោះ។ គ្រាន់តែមានមនុស្សអវិជ្ជមានម្នាក់ក្នុងចំណោមក្រុមមនុស្សដែលមានសុភមង្គល 10នាក់ គឺវាអាចទាញទម្លាក់មនុស្សមួយក្រុមនោះបាន។ ផ្ទុយទៅវិញ វាមិនមានអ្វីដែលអាចរារាំងមនុស្សម្នាក់ដែលហ៊ាននិយាយថា៖ “យើងអាចធ្វើបាន” នោះទេ។
ទោះជាស្ថិតក្នុងអំឡុងពេលជួបការលំបាកបំផុត អ្នកត្រូវតែលើកទឹកចិត្តខ្លួនឯង និងរក្សាអាកប្បកិរិយាវិជ្ជមាន បើទោះមានរឿងអ្វីកើតឡើងលើសពីការលំបាកក៏ដោយ។ នេះគឺជាសម្ដីរបស់លោក Barbara Corcoran ស្ថាបនិកក្រុមហ៊ុន Corcoran និងជាវិនិយោគិននៃកម្មវិធី Shark Tank។
ប្រើពេលវេលាច្រើន ដើម្បីធ្វើការសម្រេចចិត្ត
“ច្រើនឆ្នាំមកនេះ ខ្ញុំទទួលបានបទពិសោធមួយ គឺពេលខ្លះ យើងត្រូវការព័ត៌មានត្រឹមតែ 40 ទៅ70% ប៉ុណ្ណោះដើម្បីធ្វើការសម្រេចចិត្ត ព្រោះបើសិនជាត្រូវការភាពប្រាកដប្រជាដ៏ល្អឥតខ្ចោះនោះ យើងអាចនឹងបាត់បង់ឱកាស ដូច្នេះចូរជឿជាក់លើវិចារណញ្ញាណរបស់អ្នក រួចធ្វើការសម្រេចចិត្ត ហើយអនុវត្ត”។
នេះគឺជាមតិរបស់សេដ្ឋី Shaun Rawls ជាស្ថាបនិក និងជាអគ្គនាយកនៃក្រុមហ៊ុន Rawls of Keller Williams ដែលរកបានចំណូលជាង 4ពាន់លានដុល្លាររៀងរាល់ឆ្នាំ។
មិនចេះសើច
ថាមពលនៃការសើច ឬញញឹម កំពុងត្រូវបានគេវាយតម្លៃទាប។ ស្នាមញញឹមមួយដែលប្រកបដោយភាពកក់ក្ដៅ ស្មោះត្រង់ នឹងបង្កើតបាននូវភាពជឿជាក់ភ្លាមៗ នេះគឺជាគ្រឹះនៃការធ្វើជំនួញ។ ការសើច ឬញញឹម វាមិនត្រឹមតែបង្កើនថាមពលវិជ្ជមានទៅ
លើអ្វីដែលអ្នកកំពុងបង្ហាញនោះទេ តែវាក៏ជួយឱ្យអ្នកមើលទៅជាមនុស្សងាយរាប់អាន និងងាយជិតស្និទ្ធ។
ខាងលើនេះជាសម្ដីរបស់លោក Parker ជាស្ថាបនិក និងជា CEO នៃ Holly Parker Team ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុនមេ Douglas Elliman ធ្លាប់រកបានចំណូល 8ពាន់លានដុល្លារ។
ចាប់នេះចាប់នោះ មិនឆ្ពោះត្រង់ណា
ចូរជ្រើសយកអ្វីមួយដែលអ្នកស្រឡាញ់ និងពូកែជាងអ្វីៗផ្សេងទៀត…។ មានមនុស្សច្រើនរាប់មិនអស់ដែលមានគំនិតល្អចំនួន 1,000ប្រការ ហើយពួកគេមិនបានចាប់ផ្ដើមធ្វើតាមគំនិតល្អណាមួយសោះ។ ជំនួសមកវិញ ពួកគេបែរជាចូលរួមការងាររបស់អ្នកផ្សេងទៅវិញ។
បើសិនជាអ្នកមិនមែនជាមេធាវី ចូរកុំធ្វើខ្លួនឱ្យដូចជាមេធាវី។ នេះជាសម្ដីរបស់ James Daily ជាសហស្ថាបនិកនៃក្រុមហ៊ុន Daily Law Group។
មិនកត់ត្រារំឭកការងារសំខាន់
Dennis Najjar ជាសហស្ថាបនិកនៃ AccountingDepartment.com (សេវាកម្មគណនីស្រមោលសម្រាប់ក្រុមហ៊ុនតូចៗ) បានឱ្យដឹងថា៖ “ជាអ្នកជំនួញម្នាក់ ខ្ញុំតែងតែទទួលជោគជ័យដោយការអនុវត្តតាមគោលការណ៍មួយគឺ បង្កើតផែនការ និងរៀបចំអ្វីៗដែលខ្ញុំមានគម្រោងនឹងធ្វើ។ អ្នកនឹងមិនមានបញ្ហាទាក់ទិននឹងការចងចាំរាល់កិច្ចការដែលអ្នកត្រូវធ្វើទេ បើសិនអ្នកកត់ត្រាវាទុក”។
ធ្វើតាមអ្នកជោគជ័យ
ការដែលមានគំរូសម្រាប់ឱ្យធ្វើតាម គឺជារឿងមួយល្អ ដើម្បីអាចគេចចេញពីបញ្ហាដែលយើងដឹងថា នឹងកើតឡើង ប៉ុន្តែមានការពិតមួយដែលយើងត្រូវដឹង៖ បើវិធីនេះមានប្រសិទ្ធភាពជាមួយអ្នកផ្សេង វាមិនសំខាន់ទេ តែសំខាន់ គឺវាមានប្រសិទ្ធភាពជាមួយអ្នកដែរ ឬអត់?។ បើអ្នកពាក់អាវ-កវែងរាល់ថ្ងៃ អ្នកក៏នឹងមិនអាចក្លាយជា Steve Jobs បានដែរ…(ព្រោះ Steve Jobs ចូលចិត្តពាក់អាវយឺត-កមូលដៃវែង)។ នេះជាសម្ដីរបស់ Luke Freiler ជាសហស្ថាបនិក និងជា CEO នៃក្រុមហ៊ុន Centercode ដែលជាអ្នកផ្ដល់សេវាផ្ទៀងផ្ទាត់អតិថិជន។
ព្យាយាមគ្រប់គ្រងរាល់បញ្ហា
បើសិនអ្នកចង់ឱ្យខ្លួនឯងទៅដល់គោលដៅ ចូរបោះបង់គំនិតមួយដែលយល់ថា “គ្រប់យ៉ាងស្ថិតក្នុងការគ្រប់គ្រង”។
CEO របស់ក្រុមហ៊ុន Review Home Warranties លោក Alon Rajić បានថ្លែងថា ៖ ជួនកាល អ្នកគ្រាន់តែទទួលយកការពិតនៃស្ថានភាពណាមួយ ហើយសម្រេចចិត្ត រួចបែងចែកពេលវេលាសម្រាប់អ្វីដែលអ្នកអាចបង្កើតបានភាពខុសប្លែកពីគេ នោះអ្នកនឹងជោគជ័យ។
មិនហក់ចូលទៅក្នុងអ្វីដែលអ្នកមិនទាន់ស្គាល់
ការបង្កើតក្រុមហ៊ុនមួយ ឬហាងមួយដោយខ្លួនឯង វាទាមទារការធ្វើការងារនោះឱ្យអស់ពីចិត្ត។ ចូរចាកចេញពីតំបន់សុវត្ថិភាពរបស់អ្នក ហើយចូរកុំខ្លាចនឹងការប្រយុទ្ធជាមួយគូប្រជែងដែលមានកម្លាំងស្មើនឹងអ្នក។ បញ្ហាអាក្រក់បំផុតអាចនឹងកើតឡើង ប៉ុន្តែប្រការនេះ មិនមែនមានន័យថា អ្នកមិនអាចទទួលបានបទពិសោធសោះនោះទេ។ ដូច្នេះ យ៉ាងហោចណាស់ក៏អ្នកទទួលបានបទពិសោធខ្លះៗ ដើម្បីជាមេរៀនសម្រាប់ការរកស៊ីបន្តទៀតដែរ។ នេះគឺជាគំនិតរបស់ James Sixsmith ជាស្ថាបនិក និងជាអគ្គនាយកប្រតិបត្តិនៃក្រុមហ៊ុន Trade Context និងជាសហស្ថាបនិកនៃក្រុមហ៊ុន SpeedUp Trader ផងដែរ៕
ប្រភព៖ សារព័ត៌មានបរទេស
February 3, 2020
វិធីសំខាន់ចំនួន4 ដែលអ្នកត្រូវជ្រើសដើរ បើចង់ក្លាយជាអ្នកមាន…
សន្សំសំចៃ រួចធ្វើការវិនិយោគ មិនត្រឹមតែជាវិធីងាយស្រួលបំផុតដើម្បីក្លាយជាអ្នកមាននោះទេ តែបើសិនអ្នកឆាប់ចាប់ផ្ដើមធ្វើវា អ្នកនឹងទទួលជោគជ័យមិនខាន។
អ្នកធ្លាប់សួរខ្លួនឯងទេថា “តើអ្នកមានទាំងនោះ បានធ្វើអ្វីខ្លះទើបធ្វើឱ្យពួកគេក្លាយជាអ្នកមានបែបនោះ”?
ខាងលើនេះ ជាប្រការដែល Tom Corley (គណនេយ្យករ អ្នកធ្វើគម្រោងហិរញ្ញវត្ថុ និងជាម្ចាស់សៀវភៅដែលនិយាយអំពី វិថីដើម្បីក្លាយជាអ្នកមាន) លោកបានចំណាយពេល 5ឆ្នាំក្នុងការធ្វើសម្ភាស និងស្រាវជ្រាវទៅលើសកម្មភាព និងទម្លាប់ប្រចាំថ្ងៃរបស់អ្នកមានចំនួន 233នាក់។ អ្នកមានទាំងនេះ សុទ្ធតែមានប្រាក់ចំណូលយ៉ាងតិច160,000ដុល្លារ/ឆ្នាំ និងមានទ្រព្យសម្បត្តិយ៉ាងហោច 3.2លានដុល្លារអាមេរិក។
ក្នុងការស្រាវជ្រាវរបស់លោក Tom Corley បានបង្ហាញថា អ្នកមានទាំងនោះ ប្រើប្រាស់វិធីសាស្ដ្រសំខាន់ចំនួន4។ វិធីសន្សំ និងវិនិយោគ គឺងាយស្រួលជាងគេ ខណៈវិធីផ្សេងទៀតមានហានិភ័យច្រើន។
1.សន្សំ និងវិនិយោគ
Tom Corley បានឱ្យដឹងថា ក្នុងចំណោមអ្នកមានទាំងអស់ដែលលោកបានសម្ភាស គឺមានតែ 22% ប៉ុណ្ណោះដែលជ្រើសរើសវិធីសន្សំប្រាក់ និងវិនិយោគ។ នេះ មិនត្រឹមតែជាវិធីងាយស្រួលក្នុងការធ្វើដំណើរទៅរកភាពមានបានប៉ុណ្ណោះទេ ប៉ុន្តែវាក៏ជាវិធីមួយដែលធានាថា អ្នកនឹងក្លាយជាអ្នកមានពិតប្រាកដ បើសិនជាអ្នកឆាប់ចាប់ផ្ដើមធ្វើវា។ ក្រុមអ្នកមាននៅក្នុងការស្រាវជ្រាវរបស់ Tom Corley ភាគច្រើនសុទ្ធតែរកបាន 1លានដុល្លារជាលើកដំបូង នៅពេលពួកគេមានវ័យចាប់ពី 35 ទៅ 39ឆ្នាំ ហើយសន្សំបានជាមធ្យម 3.3លានដុល្លារពេលមានអាយុ 55ឆ្នាំ។
ក្រុមអ្នកមាននេះ មាន 4ចំណុចដូចគ្នា៖
-ពួកគេតែងមានប្រាក់ចំណូលមធ្យម។
-ការចំណាយប្រចាំថ្ងៃរបស់ពួកគេ មានកម្រិតទាប ហើយពួកគេចូលចិត្តសន្សំសំចៃជាជាងការចាយវាយខ្ជះខ្ជាយ។
-ពួកគេសន្សំប្រាក់ 20% ឬច្រើនជាងនេះ បើធៀបនឹងចំណូលរបស់ពួកគេ។
-ពួកគេយកប្រាក់ដែលសន្សំបានទៅវិនិយោគតាំងតែពីយូរ ហើយបន្តធ្វើកិច្ចការនេះដោយការប្រុងប្រយ័ត្នបំផុតក្នុងរយៈពេលជាច្រើនឆ្នាំបន្តបន្ទាប់។
មិនថាកិច្ចការដែលពួកគេធ្វើរាល់ថ្ងៃជាកិច្ចការអ្វីនោះទេ តែក្រុមនេះនៅតែធ្វើឱ្យការសន្សំ និងវិនិយោគរបស់ពួកគេក្លាយជាទម្លាប់ ហើយពួកគេក៏មិនភ្លេចរិះរកគំនិតល្អៗ ឆ្លាតវៃ ដើម្បីបង្កើនភាពមានបាន។ វិថីឆ្ពោះទៅរកការសន្សំប្រាក់ និងវិនិយោគ មិនមែនសម្រាប់អ្នករាល់គ្នានោះទេ។ វាទាមទារការយល់ដឹងពីរឿងហិរញ្ញវត្ថុ និងការប្ដេជ្ញាចិត្តយូរអង្វែង។
2.រត់តាមក្ដីស្រមៃរបស់ខ្លួន
នេះប្រហែលជាវិធីដ៏លំបាកមួយ ដើម្បីបង្កើតភាពមានបាន ព្រោះវាទាមទារឱ្យយើងរត់តាមក្ដីស្រមៃ ដូចជាការចាប់ផ្ដើមរកស៊ី ការក្លាយជាតារាចម្រៀង ឬអ្នកនិពន្ធដែលប្រកបដោយជោគជ័យ។
ប្រហែល 28% នៃអ្នកមានដែលស្ថិតក្នុងការស្រាវជ្រាវរបស់លោក Tom Corley បានជ្រើសរើសយកវិធីនេះ ហើយពួកគេរកបានប្រាក់ជាមធ្យម 7.4លានដុល្លារ(ច្រើនជាងក្រុមដទៃ) ក្នុងរយៈពេលប្រហែល 12ឆ្នាំ។
ពួកគេយល់ថា ការដេញតាមក្ដីស្រមៃរបស់ខ្លួន គឺជារឿងដែលមានប្រយោជន៍បំផុតដែលពួកគេបានធ្វើក្នុង 1ជីវិត។ ពួកគេបានធ្វើអ្វីដែលពួកគេចូលចិត្ត ហើយពួកគេបានចូលចិត្តនូវអ្វីដែលពួកគេបានធ្វើ ហើយចុងក្រោយ ប្រការដែលពួកគេចូលចិត្ត បានជួយឱ្យពួកគេមានប្រាក់កាន់តែច្រើននៅក្នុងធនាគារ។
អ្នកដែលចង់ជ្រើសរើសយកវិធីនេះ ពួកគេត្រូវតែត្រៀមចិត្តក្នុងការធ្វើការច្រើនម៉ោង និងអាចដោះស្រាយបញ្ហាហិរញ្ញវត្ថុ។ ភាគច្រើននៃពួកគេ បានធ្វើការលើស 61ម៉ោង/សប្ដាហ៍ មុននឹងសម្រេចបានតាមក្ដីស្រមៃ។ ក្នុងខួរក្បាលរបស់ក្រុមនេះ ហាក់ដូចជាពុំមានពាក្យថា ចុងសប្ដាហ៍ ឬរដូវលម្ហែកាយឡើយ។
ការទទួលបានប្រាក់ខែដែលមានស្ថិរភាពក្នុងដំណាក់កាលដំបូង វាហាក់ដូចជាមិនអាចទៅរួច។ អ្នកដែលមានភារកិច្ចត្រូវជួយពុកម្ដាយ បងប្អូន នឹងជួបការលំបាកច្រើន។ ដើម្បីមានប្រាក់រត់តាមក្ដីស្រមៃ មនុស្សមួយចំនួនត្រូវបង្ខំចិត្តលុបគម្រោងទិញផ្ទះ ឬក៏ពួកគេត្រូវយកលុយសម្រាប់ចូលនិវត្តន៍មកប្រើប្រាស់។ បើសិនអ្នកមិនចូលចិត្តការប្រឈមនឹងហានិភ័យ វិធីនេះនឹងមិនមែនជាជម្រើសល្អសម្រាប់អ្នកទេ។
3.ស្វែងរកវិធីរីកចម្រើនក្នុងក្រុមហ៊ុន
ពួកគេ គឺជាបុគ្គលិកដែលធ្វើការនៅក្នុងក្រុមហ៊ុនធំៗ ហើយបានចំណាយកម្លាំងកាយចិត្តដើម្បីធ្វើឱ្យមានការរីកចម្រើនក្នុងការងារ រហូតដល់ក្លាយជាអ្នកគ្រប់គ្រងកំពូល។
នេះ គឺជាវិធីលំបាកទី2 ដើម្បីក្លាយជាសេដ្ឋី ហើយប្រហែល 31% នៃអ្នកដែលស្ថិតក្នុងបញ្ជីស្រាវជ្រាវរបស់ Tom Corley បានជ្រើសរើសយកវិធីនេះ។ ជាមធ្យម ពួកគេត្រូវចំណាយពេល 22ឆ្នាំ ដើម្បីរកបានប្រាក់ចាប់ពី 3.4លានដុល្លារទៅ។ ភាគច្រើន ការក្លាយជាអ្នកមានរបស់ពួកគេ គឺបានមកពីរង្វាន់ជាភាគហ៊ុនប្រចាំឆ្នាំ ឬការចែករំលែកប្រាក់ចំណេញពីក្រុមហ៊ុន។
ការជ្រើសរើសយកវិធីនេះ វាទាមទារឱ្យអ្នកត្រូវតែមានជំនាញក្នុងការបង្កើត និងរក្សាទំនាក់ទំនងល្អ និងយូរអង្វែងជាមួយបណ្ដាបុគ្គលមានអំណាចក្នុងវិស័យដែលអ្នកកំពុងធ្វើការ។
អ្នកដែលដើរតាមផ្លូវនេះ សុទ្ធតែជាមនុស្សដែលហ៊ានលះបង់ច្រើន ទាក់ទិននឹងពេលវេលា ដោយពួកគេត្រូវចេញទៅបំពេញបេសកកម្មជាញឹកញាប់ និងត្រូវខាតបង់ថ្ងៃសម្រាកជាហូរហែផងដែរ។
4. ក្លាយជាអ្នកជំនាញលំដាប់កំពូល
ក្នុងចំណោមអ្នកមានដែលបានចូលរួមក្នុងការស្រាវជ្រាវរបស់ Tom Corley គឺមាន 19% បានជ្រើសរើសយកវិធីនេះ។ ទាំងនេះ គឺជាមនុស្សដែលមានជំនាញលំដាប់កំពូលនៅក្នុងវិស័យដែលពួកគេកំពុងធ្វើ។ ពួកគេទទួលបានប្រាក់ខែខ្ពស់សម្រាប់ចំណេះដឹង និងជំនាញរបស់ពួកគេ ប្រការនេះធ្វើឱ្យពួកគេមានភាពខុសប្លែកពីគូប្រជែង។
ក្រុមអ្នកមានប្រភេទនេះ ត្រូវចំណាយពេល 20ឆ្នាំ ដើម្បីមានទ្រព្យជាមធ្យម 4លានដុល្លារ។ បុគ្គលទាំងនេះ មួយចំនួនធ្វើការឱ្យក្រុមហ៊ុនធំៗ មួយចំនួនធ្វើការក្នុងវិស័យសុខាភិបាល ឬជាម្ចាស់ក្រុមហ៊ុនខ្នាតតូច តែចំណូលខ្ពស់។
អ្នកជំនាញ ឬឯកទេសលំដាប់កំពូល មិនសម្រាប់តែអ្នកមានបញ្ញាពីកំណើតនោះទេ ប៉ុន្តែពួកគេត្រូវចំណាយពេលយូរឆ្នាំជាបន្តបន្ទាប់ក្នុងការសិក្សា និងសិក្សា។ ពួកគេតែងតែជាមនុស្សដែលត្រូវបានបណ្ដុះបណ្ដាលយ៉ាងច្បាស់លាស់ និងមានសញ្ញាបត្រខ្ពស់ៗ។
នេះមានន័យថា ពួកគេត្រូវវិនិយោគប្រាក់កាស់ច្រើន និងពេលវេលាដ៏យូរ មុនពេលបានទទួលប្រាក់ខែច្រើនដែលអាចធ្វើឱ្យពួកគេក្លាយជាអ្នកមាន៕
ប្រភព៖ សារព័ត៌មានបរទេស
January 22, 2020