ជំងឺ - La Reine Media

រោងចក្រដំបូងគេបង្អស់នៅក្នុងទីអវកាស ចាប់ផ្ដើមដំណើរការ

(សហរដ្ឋអាម៉េរិក) – ក្រុមហ៊ុន Varda Space Industries នឹងផលិតឱសថ រួមនឹងវត្ថុធាតុផ្សេងៗទៀតនៅលើគន្លងតារាវិថីផែនដី តាមរយៈកាប៊ីនដែលហោះអមនឹងផ្កាយរណប។

ក្រុមហ៊ុន Varda Space Industries នៅរដ្ឋ California ប្រកាសថា បានទទួលជោគជ័យក្នុងការបាញ់បង្ហោះ W-Seres 1 ដែលជាផ្កាយរណបដំបូងរបស់ខ្លួន ឡើងទៅកាន់គន្លងគោចរផែនដី។ ក្រុមហ៊ុននេះកំពុងឆ្ពោះទៅរកការផលិតវត្ថុធាតុជាច្រើននៅក្នុងទីអវកាស។ វត្ថុធាតុទាំងនេះមិនអាចបង្កើតឡើងនៅលើផែនដី ឬអភិវឌ្ឍឆាប់រហ័សជាមួយនឹងគុណភាពខ្ពស់ជាង ធៀបនឹងនៅក្នុងស្ថានភាពគ្មានទំនាញផែនដី។

ផ្ទាំងសូឡារបស់រោងចក្រដំបូងក្នុងអវកាសនេះ បានបែរទៅរកព្រះអាទិត្យ និងចាប់ផ្ដើមពន្លាតខ្លួន។ នេះបើតាមការឱ្យដឹងរបស់ Varda បន្ទាប់ពីផ្កាយរណបបានហោះចូលដល់គន្លងគោចរ នៅក្នុងបេសកកម្ម Transporter-8 របស់ SpaceX កាលពីថ្ងៃទី 13 មិថុនា 2023។

ផ្កាយរណប W-Series 1 ត្រូវបានបំពាក់កាប៊ីនទម្ងន់ 90 គីឡូក្រាម ដែលត្រូវបានរចនាឡើងដើម្បីស្រាវជ្រាវឱសថ។ កាប៊ីននេះនឹងផ្ដាច់ខ្លួន មុនពេលចាប់ផ្ដើមហោះហើរក្នុងអវកាស ប៉ុន្តែនៅតែភ្ជាប់ជាមួយនឹងបណ្ដាញថាមពល កម្លាំងរុញច្រាន និងទំនាក់ទំនងចាំបាច់ដើម្បីកំណត់ទិស។ ក្នុងភារកិច្ចដំបូង បណ្ដាញខាងលើត្រូវបានផ្គត់ផ្គង់ដោយក្រុមហ៊ុន Rocket Lab។ បន្ទាប់មក ការពិសោធនឹងត្រូវបានធ្វើឡើងដោយរ៉ូបូតក្នុងកាប៊ីន។

សកម្មភាពរបស់ Varda គឺយោងទៅតាមការសិក្សាស្រាវជ្រាវផ្នែកវិទ្យាសាស្ត្រដែលបញ្ជាក់ថា ប្រូតេអ៊ីនក្នុងអវកាសអាចកកើតរចនាសម្ព័ន្ធល្អជាងធៀបនឹងនៅលើផែនដី ដោយសារតែបរិស្ថានមាន និងគ្មានទំនាញផែនដី។

បេសកកម្មដំបូងរបស់ Varda នឹងផ្ដោតទៅលើការអភិវឌ្ឍ ritonavir ក្នុងអវកាស។ Ritonavir គឺជាថ្នាំដែលតែងត្រូវបានប្រើប្រាស់សម្រាប់ប្រឆាំងនឹង HIV ដែលជាវីរុសបង្កឱ្យមានជំងឺអេដស៍ ប៉ុន្តែប៉ុន្មានឆ្នាំចុងក្រោយនេះ វាក៏ត្រូវបានប្រើប្រាស់ដើម្បីព្យាបាលជំងឺកូវីដ-19។

ក្រោយពីការពិសោធរបស់ Varda បានបញ្ចប់ កាប៊ីននេះនឹងត្រូវបានផ្កាយរណបរុញទម្លាក់មកកាន់ផែនដី និងចុះចតដោយប្រើប្រាស់ឆត្រយោង មុនពេលអ្នកវិទ្យាសាស្ត្រប្រមូលយកវត្ថុធាតុឱសថ។

ក្រុមហ៊ុន Varda ត្រូវបានបង្កើតឡើងដោយអតីតវិស្វករអេឡិចត្រូនិចអាកាសចរណ៍របស់ SpaceX លោក Will Bruye និង Delian Asparouhov។ គោលដៅរបស់ពួកគេគឺបង្កើតផលិតផលនានានៅក្នុងអវកាស ដែលរោងចក្រនៅលើផែនដីមិនអាច ឬពិបាកធ្វើបានល្អ៕

June 15, 2023

សត្វត្រសក់សមុទ្រជួយទប់ស្កាត់ជំងឺទឹកនោមផ្អែមកម្រិតពីរ និងផលវិបាករបស់ជំងឺនេះ

យោងតាមការសិក្សាស្រាវជ្រាវមួយរបស់ក្រុមអ្នកវិទ្យាសាស្ត្រអូស្ត្រាលី សត្វត្រសក់សមុទ្រ (sea cucumber) ដែលមានឈ្មោះបច្ចេកទេសថា Holothuroidea មានផ្ទុកសារជាតិដែលជួយពន្យារការវិវត្តទៅរកជំងឺទឹកនោមផ្អែមកម្រិតពីរ និងកាត់បន្ថយផលវិបាកនានារបស់ជំងឺទឹកនោមផ្អែម។

ការសិក្សាស្រាវជ្រាវកន្លងមកធ្លាប់បានបញ្ជាក់ថា សត្វសមុទ្រខាងលើនេះអាចធ្វើឱ្យឈាមរាវ បញ្ចុះសម្ពាធឈាម និងអាចទប់ទល់នឹងបញ្ហារលាក ប្រឆាំងអុកស៊ីតកម្ម ប្រឆាំងជំងឺមហារីក និងព្យាបាលរបួស។ ពេលនេះ ក្រុមអ្នកវិទ្យាសាស្ត្រនៅសាកលវិទ្យាល័យអូស្ត្រាលីខាងត្បូង បានរកឃើញថា សារជាតិនានានៅក្នុងសត្វត្រសក់សមុទ្រ ក៏មានសមត្ថភាពទប់ស្កាត់ជំងឺទឹកនោមផ្អែមកម្រិតពីរផងដែរ។

ក្រុមអ្នកវិទ្យាសាស្ត្រខាងលើយកសត្វត្រសក់សមុទ្រប្រភេទ Holothuria scabra ទៅស្ងោរឱ្យឆ្អិន រួចកែច្នៃទៅតាមវិធីផ្សេងៗ រួមមាន ប្រឡាក់អំបិលរួចហាលថ្ងៃ, ហាលថ្ងៃមិនបាច់ប្រឡាក់អំបិល និងហាលថ្ងៃរួចឆ្អើរ។ បន្ទាប់មក ពួកគេយកអាហារកែច្នៃទាំងនេះទៅកិនជាម្សៅ។ អ្នកវិទ្យាសាស្ត្រចម្រាញ់យកខូឡាជែន (collagen) ពីសត្វត្រសក់សមុទ្រ រួចបន្ថែមទៅលើអាហារកែច្នៃទាំងនេះ។

សត្វត្រសក់សមុទ្រ (sea cucumber) ដែលមានឈ្មោះបច្ចេកទេសថា Holothuroidea

ជាលទ្ធផល ត្រសក់សមុទ្រប្រឡាក់អំបិលនិងហាលស្ងួត (ងៀត) មានសមត្ថភាពខ្ពស់ជាងគេក្នុងការទប់ស្កាត់ការផលិត AGE នៅក្នុងរាងកាយរបស់អ្នកជំងឺទឹកនោមផ្អែម។ AGE គឺជាផលិតផលស្ករចុងក្រោយ (ស្ករអាក្រក់) បន្ទាប់ពីប្រូតេអ៊ីន និង/ឬជាតិខ្លាញ់រួមផ្សំជាមួយជាតិស្ករក្នុងឈាមនៅក្នុងដំណើរការមួយដែលហៅថា glycation៕

June 14, 2023

លោកយាយម្នាក់ «ស្លាប់ហើយតែបែរជារស់ឡើងវិញ» ពេលកូនចៅកំពុងធ្វើបុណ្យសព

(អេក្វាទ័រ) – លោកយាយអាយុ 76 ឆ្នាំម្នាក់ត្រូវបានវេជ្ជបណ្ឌិតពិនិត្យ និងបញ្ជាក់ថាបានស្លាប់ នៅក្នុងមន្ទីរពេទ្យមួយក្នុងទីក្រុង Babahoyo ប៉ុន្តែបានភ្ញាក់ដឹងខ្លួននៅក្នុងពិធីបុណ្យសពរបស់ខ្លួន និងគោះលើមឈូស ធ្វើឱ្យមនុស្សម្នាមានការភ័យខ្លាច។

ស្ត្រីវ័យចំណាស់ដែលជាអតីតគ្រូពេទ្យម្នាក់ឈ្មោះ Bella Montoya ត្រូវបានបញ្ជូនទៅកាន់មន្ទីរពេទ្យក្នុងទីក្រុង Babahoyo ភាគកណ្ដាលប្រទេសអេក្វាទ័រ កាលពីថ្ងៃទី 09 មិថុនា 2023 បន្ទាប់ពីគាំងបេះដូង។ បន្ទាប់ពីជួយសង្គ្រោះមិនបានសម្រេច វេជ្ជបណ្ឌិតក៏ប្រកាសថា លោកយាយ Montoya បានបាត់បង់ជីវិត។ នេះបើតាមការអះអាងរបស់កូនប្រុសស្ត្រីរូបខាងលើ។

គ្រូសារបានយកសពលោកយាយ Montoya ទៅរៀបចំពិធីបុណ្យសព។ ពេលពិធីបុណ្យកំពុងប្រព្រឹត្តទៅ មនុស្សម្នាប្រហែល 20 នាក់នៅទីនោះ ក៏ឮសំឡេងចម្លែក។ «ប្រហែល 5 ម៉ោង រាប់ពីពេលពិធីបុណ្យបានចាប់ផ្ដើម មឈូសក៏ចាប់ផ្ដើមមានសំឡេង។ ម្ដាយរបស់ខ្ញុំត្រូវគេរុំក្នុងក្រណាត់ ហើយគាត់ក៏វាយទៅលើមឈូស។ ពេលទៅក្បែរ ពួកខ្ញុំដឹងថា គាត់កំពុងដកដង្ហើមយ៉ាងលំបាក» Gilberto Barbera ដែលជាកូនប្រុសរបស់ស្ត្រីខាងលើ ឱ្យដឹងដូច្នេះ។

សាច់ញាតិក៏ប្រញាប់បញ្ជូនលោកយាយ Montoya ទៅកាន់មន្ទីរពេទ្យ។ បច្ចុប្បន្ន លោកយាយកំពុងទទួលការព្យាបាលពិសេសពីក្រុមវេជ្ជបណ្ឌិត។

Barbera និយាយថា «ការដែលម្ដាយខ្ញុំភ្ញាក់ខ្លួននៅក្នុងពិធីបុណ្យសព ធ្វើឱ្យពួកខ្ញុំភ័យខ្លាចខ្លាំង» និងបន្តថា គ្រូពេទ្យថា ជំងឺរបស់ម្ដាយខ្ញុំនៅតែស្ថិតក្នុងស្ថានភាពគ្រោះថ្នាក់។

ក្រសួងសុខាភិបាលអេក្វាទ័រ បានឱ្យដឹងថា សមត្ថកិច្ចកំពុងស៊ើបអង្កេតលើក្រុមវេជ្ជបណ្ឌិតដែលទាក់ទងនឹងករណីលោកយាយ Montoya។ គណៈកម្មការមួយត្រូវបានបង្កើតឡើងដើម្បីពិនិត្យលើដំណើរការនៃការចេញលិខិតបញ្ជាក់មរណភាពរបស់មន្ទីរពេទ្យខាងលើ៕

June 13, 2023

បីទម្លាប់ជួយឱ្យនាយករដ្ឋមន្ត្រីអង់គ្លេសមានរាងកាយមាំមួនក្នុងវ័យ U50

ដើម្បីបានរាងកាយមាំមួនក្នុងមជ្ឈិមវ័យ លោក Sunak ដែលជានាយករដ្ឋមន្ត្រីអង់គ្លេសដើមកំណើតឥណ្ឌា តែងបោះបង់អាហារយូរៗម្ដង និងបោះបង់ទម្លាប់ពិសាភេសជ្ជៈផ្អែម។ល។

កាលពីចុងខែឧសភា នាយករដ្ឋមន្ត្រីអង់គ្លេស លោក Rishi Sunak រួមនឹងអត្តពលិកជាង 100 នាក់បានចូលរួមព្រឹត្តិការណ៍រត់ប្រណាំងដែលត្រូវបានធ្វើឡើងនៅ Northallerton ក្នុងតំបន់ North Yorkshire។ ក្នុងវ័យ 43 ឆ្នាំ លោករត់បានចម្ងាយ 10 គីឡូម៉ែត្រ ក្នុងរយៈពេល 47 នាទីនិង 41 វិនាទី។ ក្នុងវ័យកណ្ដាលនេះ លោក Sunak នៅតែរក្សាបានរាងកាយមាំមួន និងសុខភាពល្អ ដោយសារតែ «ទម្លាប់បីយ៉ាង» ខាងក្រោម។

ទីមួយ៖ បោះបង់ការញៀននឹងភេសជ្ជៈកំប៉ុង

កាលពីឆ្នាំ 2019 លោក Sunak ធ្លាប់បានសារភាពថា លោកជាមនុស្សញៀននឹងភេសជ្ជៈកំប៉ុង។ ទម្លាប់នេះបានធ្វើឱ្យលោកមានបញ្ហាធ្មេញ និងត្រូវដាក់ការកំណត់ពិសាតែមួយកំប៉ុង/សប្ដាហ៍។ អ្នកវិទ្យាសាស្ត្រថា ភេសជ្ជៈផ្អែមមួយកំប៉ុងមានផ្ទុកថាមពលប្រហែល 139 កាឡូរី រួមនឹងស្ករ 35 ក្រាម។ ជាតិស្ករនេះស្មើនឹងស្ករឆុងកាហ្វេចំនួន 22 កញ្ចប់តូច។ ដូច្នេះ ការពិសាភេសជ្ជៈផ្អែមក្នុងរយៈពេលយូរនឹងធ្វើឱ្យឡើងទម្ងន់ ធាត់ជ្រុល ឬអាចលើសជាតិស្ករ។ ការបោះបង់ទម្លាប់នេះនឹងជួយឱ្យជៀសផុតពីជំងឺទឹកនោមផ្អែម លើសសម្ពាធឈាម ជំងឺបេះដូង ជំងឺដាច់សរសៃឈាមខួរក្បាលជាដើម។

ទីពីរ៖ តមអាហារបណ្ដោះអាសន្ន

យោងតាមប្រភពជិតស្និទ្ធ នាយករដ្ឋមន្ត្រី Sunak តែងតែបោះបង់អាហារមួយ ឬពីរពេលជារៀងរាល់សប្ដាហ៍។ ប្រការនេះមានប្រយោជន៍ច្រើនដល់សុខភាព ព្រោះផ្ដល់ពេលវេលាគ្រប់គ្រាន់សម្រាប់រាងកាយរំលាយអាហារ និងស្រូបយកជីវជាតិក្នុងអាហារ និងកាត់បន្ថយជាតិស្ករ។

ទីបី៖ ហាត់ប្រាណ

«ខ្ញុំពិនិត្យមើលព័ត៌មាន ដំណឹងក្នុងទូរស័ព្ទ រួចហើយខ្ញុំនឹងរត់លើម៉ាស៊ីន ជិះកង់ ឬចូលរួមថ្នាក់លំហាត់ប្រាណ» លោក Sunak ធ្លាប់ឱ្យដឹងដូច្នេះ។

នាយករដ្ឋមន្ត្រីអង់គ្លេសព្យាយាមហាត់ប្រាណប្រើកម្លាំងខ្លាំង (HIIT) មួយដង និងរត់មួយដងក្នុងមួយសប្ដាហ៍។ យោងតាមអ្នកជំនាញ ការរត់ជាញឹកញាប់នឹងជួយដល់សុខភាពបេះដូង និងសរសៃឈាម ជួយឱ្យសម្ពាធឈាម និងខ្លាញ់អាក្រក់ស្ថិតក្នុងបរិមាណល្អ។ ទម្លាប់នេះក៏ជួយកែលំអប្រព័ន្ធការពាររាងកាយ និងបង្កើនកម្លាំងសាច់ដុំផងដែរ៕

June 7, 2023

ស្ត្រីជាប់ពន្ធនាគារព្រោះសម្លាប់កូនបួននាក់នៅអូស្ត្រាលី ត្រូវបានដោះលែង

Kathleen Folbigg ជាស្ត្រីម្នាក់ដែលធ្លាប់ត្រូវបានកាត់ទោសពីបទសម្លាប់កូនតូចបួននាក់ ត្រូវបានដោះលែងពីពន្ធនាគារ ក្រោយរយៈពេល 20 ឆ្នាំ នៅពេលមានការសង្ស័យថា ត្រូវបានកាត់ទោសដោយអយុត្តិធម៌។

ប្រធានតុលាការ New South Wales កាលពីថ្ងៃទី 05 មិថុនា 2023 បានឱ្យដឹងថា បានពិភាក្សាជាមួយអភិបាលរដ្ឋនេះ និងបានស្នើឱ្យមានការដោះលែងដោយគ្មានលក្ខខណ្ឌចំពោះ Kathleen Folbigg ក្រោយពីលទ្ធផលនៃការស្រាវជ្រាវបឋមបង្ហាញថា មានចំណុចខុសប្រក្រតីទាក់ទិននឹងការកាត់ទោសស្ត្រីដែលត្រូវបានចោទថាបានសម្លាប់កូនតូចបួននាក់។ Folbigg ត្រូវបានដោះលែងក្នុងថ្ងៃដដែល។

Kathleen Folbigg អាយុ 55 ឆ្នាំ បានជាប់ពន្ធនាគារកាលពីឆ្នាំ 2003 ដោយត្រូវបានកាត់ទោសពីបទសម្លាប់មនុស្ស បន្ទាប់ពីកូនបួននាក់របស់គាត់បានស្លាប់ជាបន្តបន្ទាប់ក្នុងរង្វង់ជាងមួយទសវត្សរ៍ ចាប់ពីឆ្នាំ 1989។ Folbigg សុទ្ធតែជាអ្នករកឃើញសាកសពរបស់កូនៗ ប៉ុន្តែពុំមានភស្ដុតាងអ្វីដែលបញ្ជាក់ថា ស្ត្រីរូបនេះជាជនដៃដល់។

Kathleen Folbigg ត្រូវជាប់ពន្ធនាគារក្រោយពីតុលាការយល់ថា លទ្ធភាពដែលក្មេងបួននាក់ក្នុងគ្រួសារសុទ្ធតែបានស្លាប់ដោយគ្មានមូលហេតុគឺជារឿង «ពិបាកទៅរួច»។ ការសម្រេចរបស់តុលារក៏យោងទៅលើខ្លឹមសារនៅក្នុងកំណត់ហេតុរបស់ Folbigg ដែលបានសរសេរអំពីការចាកចេញរបស់កូនៗផងដែរ។

កាលពីមានអាយុ 20 ឆ្នាំ Kathleen Folbigg បានរៀបការជាមួយ Craig Folbigg។ ក្នុងរង្វង់មួយឆ្នាំ Folbigg ក៏មានកូននៅក្នុងឆ្នាំ 1989 ប៉ុន្តែកូនច្បងនេះបានស្លាប់ទៅវិញក្រោយការចាប់កំណើតបាន19 ថ្ងៃ។ មួយឆ្នាំបន្ទាប់ Folbigg បង្កើតបានកូនប្រុសឈ្មោះ Patrick តែក៏បានស្លាប់ពេលមានអាយុ 8 ខែ។ ពីរឆ្នាំបន្ទាប់មកទៀត កូនទីបីឈ្មោះ Sarah របស់ Folbigg ក៏បានស្លាប់ក្នុងអាយុ 10 ខែ។ ចំណែកកូនពៅឈ្មោះ Laura កើតឆ្នាំ 1999 ក៏ឃើញពន្លឺថ្ងៃបានតែ 18 ខែ។

ពេល Laura បានស្លាប់ សមត្ថកិច្ចក៏បើកការស៊ើបអង្កេត ហើយពីរឆ្នាំក្រោយមក តុលាការក៏កាត់ទោសដាក់ពន្ធនាគារចំពោះ Folbigs។

Kathleen Folbigg មិនព្រមទទួលកំហុស ប៉ុន្តែនៅតែត្រូវជាប់ពន្ធនាគារ 40 ឆ្នាំ។ កាលពីឆ្នាំ 2019 រឿងក្ដីរបស់ Kathleen Folbigg ក៏ត្រូវបានសមត្ថកិច្ចស៊ើបអង្កេតឡើងវិញ ហើយក៏រកឃើញចំណុចគួរឱ្យសង្ស័យ។ កាលពីឆ្នាំ 2022 ការស៊ើបអង្កេតមួយផ្សេងទៀតក៏ត្រូវបានធ្វើឡើង បន្ទាប់ពីក្រុមអ្នកវិទ្យាសាស្ត្របង្ហាញភស្ដុតាងបញ្ជាក់ថា មូលហេតុនៃការស្លាប់របស់ក្មេងទាំងបូននាក់ខាងលើគឺដោយសារជំងឺតំណពូជ៕

June 5, 2023

គម្រោងសាងសង់កោះវេជ្ជសាស្ត្ររាងអឌ្ឍចន្ទប្រកបដោយបច្ចេកវិទ្យាខ្ពស់នៅទីក្រុងឌូបៃ

Kalbod Design ដែលជាស្ទូឌីយោមួយនៅរដ្ឋធានីតេហេរ៉ង់ (ប្រទេសអ៊ីរ៉ង់) បានបង្ហាញគម្រោងកោះវេជ្ជសាស្ត្រឌូបៃ ដែលមានអគារកប់ពពកទំហំមួយលានម៉ែត្រការ៉េ ដ៏លេចធ្លោនៅចំកណ្ដាល។

កោះថ្មីនេះមានឈ្មោះថា ទីក្រុងថែទាំសុខភាពឌូបៃ (Dubai Healthcare City) ដែលជាតំបន់ចម្រុះអណ្ដែតលើផ្ទៃទឹក ផ្ដោតសំខាន់លើការផ្ដល់សេវាថែទាំសុខភាពគុណភាពខ្ពស់ បំពាក់បច្ចេកវិទ្យាទំនើប និងប្រកបដោយស្ថិរភាព ព្រមទាំងគោរពតាមលក្ខខណ្ឌនៃភូមិសាស្ត្រ និងសង្គមដ៏ពិសេសរបស់តំបន់។ Design Boom ចុះផ្សាយព័ត៌មាននេះកាលពីថ្ងៃទី 15 ឧសភា។

ទីក្រុងថែទាំសុខភាពឌូបៃ មានរូបរាងដូចអឌ្ឍចន្ទ ឬដូចចំណិតដូង និងរួមផ្សំជាមួយនឹងកត្តារចនាបថរូបវិទ្យាក្នុងសាសនាអ៊ីស្លាម។ កោះនេះដំណើរការដូចទៅនឹងតំបន់ចម្រុះក្នុងអគារ ដោយមានប្រព័ន្ធគមនាគមន៍ក្នុងទឹកដោយឡែក តំបន់លំនៅដែលមានរុក្ខជាតិបៃតងត្រជាក់សម្រាប់អ្នកជំងឺ បណ្ដាមជ្ឈមណ្ឌលអប់រំ និងអភិវឌ្ឍ។ល។

ច្រកចូលកោះនេះត្រូវបានស្ថាបនាក្រោមទឹក ដើម្បីកាត់បន្ថយការធ្វើចរាចរណ៍របស់រថយន្តនៅលើកោះ។ ហេដ្ឋារចនាសម្ព័ន្ធក្រោមទឹករួមមាន ប្រព័ន្ធរថភ្លើងអគ្គិសនី និងរថយន្តអគ្គិសនី។ គ្រប់កន្លែងនៅលើកោះនេះសុទ្ធតែមានស្ថានីយដើម្បីសម្រួលដល់ការធ្វើដំណើរ។ ចំណែកអ្នកថ្មើរជើងវិញ គឺអាចដើរនៅលើកោះនេះដោយសេរី។

កោះនេះមានបីតំបន់សំខាន់ៗ ក្នុងនោះ តំបន់អប់រំ និងស្រាវជ្រាវស្ថិតនៅចំកណ្ដាល ខណៈតំបន់វេជ្ជសាស្ត្រ និងអគារស្នាក់នៅ ស្ថិតនៅជុំវិញ។ បណ្ដាផ្លូវស្ថិតនៅទីខ្ពស់ចន្លោះតំបន់នានានឹងនាំមកនូវខ្យល់បរិសុទ្ធ និងមានតួនាទីជាលំហបៃតង។ អ្នកថ្មើរជើងអាចផ្លាស់ទីក្នុងកម្ពស់ផ្សេងៗគ្នា អាចគយគន់ទេសភាពដ៏អស្ចារ្យរបស់ឌូបៃ និងឈូងសមុទ្រពែក្ស។

នៅកណ្ដាលកោះគឺជាអគារខ្ពស់កប់ពពកទំហំរហូតដល់មួយលានម៉ែត្រការ៉េ បែងចែកជាពីរផ្នែក រួមមាន ផ្នែក ផ្ទាល់ដី មានទំហំ 670,000 ម៉ែត្រការ៉េ សម្រាប់សកម្មភាពអប់រំ និងផ្នែកខាងលើដែលមានរាងដូចអឌ្ឍចន្ទ ទំហំ 330,000 ម៉ែត្រការ៉េ សម្រាប់ធ្វើជាសាលតាំងពិព័រណ៍ បន្ទប់ពិសោធន៍ និងអភិវឌ្ឍ សួនវិទ្យាសាស្ត្របច្ចេកវិទ្យា បណ្ណាល័យ និងពិព័រណ៍សមិទ្ធផលបច្ចេកវិទ្យាឌីជីថល។ ក្រៅពីអគារនៅចំកណ្ដាល Dubai Healthcare City នឹងមានអគារចំនួន 14 ផ្សេងទៀតដែលមានមុខងារវេជ្ជសាស្ត្រ និងសណ្ឋាគារចំនួន 24 នៅលើក្បាលទាំងពីររបស់កោះ។

គ្រប់អគារសុទ្ធតែមានសួនច្បារនៅខាងមុខ និងដាំរុក្ខជាតិច្រើនប្រភេទ ដែលនាំមកនូវម្លប់ត្រជាក់ និងខ្យល់បរិសុទ្ធបែបធម្មជាតិ រួមចំណែកលើកកម្ពស់គុណភាពបរិយាកាសរបស់ឌូបៃ៕

May 18, 2023

សម្រាប់អ្នកអសមត្ថភាពបន្តពូជ៖ «តើការបង្កកំណើតដោយប្រើឧបករណ៍វិទ្យាសាស្ត្រ បែប IVF គឺជាអ្វី?»

ការបង្កកំណើតក្នុងមន្ទីរពិសោធន៍ ឬឧបករណ៍វិទ្យាសាស្ត្រ ដោយប្រើប្រាស់វិធីសាស្ត្រ IVF ដែលគេអាចហៅបានថា «ការបង្កកំណើតដោយវិធីពាក់កណ្ដាលវិទ្យាសាស្ត្រ» ច្រើនធ្វើឡើងនៅពេលស្ត្រីមានជំងឺប្រចាំកាយ ឬក្រោយការព្យាបាលជំងឺហើយនាំឱ្យស្ត្រីបាត់បង់សមត្ថភាពបន្តពូជ ឬមួយស្ត្រីអស់រដូវនៅពេលឈានដល់វ័យចំណាស់។

ស្ត្រីមួយចំនួនដែលជួបបញ្ហាខាងលើ ប៉ុន្តែនៅតែចង់មានផ្ទៃពោះគឺត្រូវជ្រើសរើសវិធីសាស្ត្រ IVF (In Vitro Fertilization) ដោយត្រូវឆ្លងកាត់ដំណាក់កាលបង្កកពងមេជីវិតញី ដើម្បីទុកសម្រាប់បង្កកំណើតជាមួយមេជីវិតឈ្មោល នៅពេលណាដែលសមស្រប។

វដ្តនៃការបង្កកំណើតដោយវិធីសាស្ត្រ IVF ដែលចាប់ផ្តើមពីការបង្កកពងមេជីវិតញី មានដូចខាងក្រោម៖

1– ពងមេជីវិតញីដែលត្រូវបានយកមកបង្កកទុក នឹងត្រូវយកទៅរំលាយឱ្យត្រលប់ទៅរកសភាពដើម

2– ពងដែលអ្នកជំនាញយល់ថាអាចប្រើបាន និងត្រូវយកទៅបង្កកំណើតជាមួយមេជីវិតឈ្មោល

3– ពងមេជីវិតញី ក្រោយពីត្រូវបានរំលាយឱ្យត្រលប់ទៅរកសភាពដើម ហើយបានបង្កកំណើតដោយជោគជ័យនឹងចាប់ផ្តើមវិវឌ្ឍទៅជាអំប្រ៊ីយ៉ុង (embryo)

4– ក្នុងចំណោមអំប្រ៊ីយ៉ុងទាំងអស់អាចមានមួយទៅពីរ ឬអាចបី (សម្រាប់មនុស្សស្រីដែលមានអាយុច្រើនជាង 40 ឆ្នាំ) នឹងត្រូវបានបញ្ចូលទៅក្នុងស្បូន ដើម្បីចាប់ផ្ដើមដំណាក់កាលរីកចម្រើនទៅតាមលក្ខណៈធម្មជាតិ។

October 20, 2021

ជំនឿ 5យ៉ាងក្នុងរឿងអាហារការហូបចុក របស់ស្ត្រីមានគភ៌

មានជំនឿជាច្រើន ពាក់ព័ន្ធនឹងរឿងអាហារការហូបចុក ក្នុងអំឡុងពេលមានគភ៌ថា ញ៉ាំអានេះទៅ វានឹងល្អ ឬញ៉ាំអានោះទៅ នឹងធ្វើឱ្យកូនខ្ពស់ កូនឆ្លាត កូនងាយកើត ឬស្រួលកើត ជាដើម-ល- តែជំនឿខ្លះ មិនមែនចេះតែត្រូវទាំងអស់នោះទេ ដូច្នេះថ្ងៃនេះ យើងនាំគ្នាមកពិនិត្យមើលថា តើរឿងដែលយើងជឿទាំងអស់នោះ វាជាការពិត ឬយ៉ាងណា?

ជំនឿថា ញ៉ាំហឹរពេក នឹងធ្វើឱ្យកូន មិនសូវមានសក់…

ការពិត៖ សក់របស់កូនតិច ឬច្រើននោះ វាស្ថិតនៅលើពូជ ឬហ្ស៊ែន របស់មនុស្សម្នាក់ៗ ចំណែកឯជំនឿ រឿងហាមញ៉ាំហឹរនេះ ប្រហែលជាមកពីខ្លាចស្ត្រីមានគភ៌ឈឺពោះ ពិបាកបន្ទោបង់ ឬមិនទេ ក៏ខ្លាចរាករូស ដែលនាំឱ្យមានផលប៉ះពាល់ដល់សុខភាពរបស់ស្ត្រីមានគភ៌ទៅវិញទេ ព្រោះនៅក្នុងអំឡុងពេលមានគភ៌ ប្រព័ន្ធរំលាយអាហារ នឹងខុសពីពេលមុនមានគភ៌ ដោយសារតែអ័រម៉ូនប្រែប្រួល ដែលអាចនឹងធ្វើឱ្យមានបញ្ហាក្នុងការបន្ទោបង់ ឬអាចធ្វើឱ្យកើតអាការឆ្អល់ពោះ និងរាករូសបានហ្នឹងឯង។

ជំនឿថា ញ៉ាំទឹកដូងច្រើន នឹងជួយឱ្យកូនមានសាច់ស្អាត និងលាងជម្រះជាតិខ្លាញ់តាមដងខ្លួន…

ការពិត៖ ការពិតទៅ ការដែលមានខ្លាញ់ជាប់នៅតាមដងខ្លួនទារកនោះ នឹងធ្វើឱ្យងាយស្រួលប្រសូត ព្រោះវាប្រៀបដូចជា ជាតិខ្លាញ់រំអិលស្រោបពីលើខ្លួនទារក ខណៈពេលប្រសូតចេញមកដូច្នោះដែរ។ ជាតិខ្លាញ់មួយនេះ ផលិតឡើងដោយកោសិកាស្បែករបស់ទារក និងក្រពេញជាតិខ្លាញ់នៅខាងក្រោមស្បែក ពេលអាយុគភ៌ រឹតតែច្រើនឡើង ជាតិខ្លាញ់នោះក៏នឹងកើតឡើងច្រើនតាមនោះដែរ។ ក្រៅពីនេះ ក្រោយពេលប្រសូតហើយថ្មីៗ ជាតិខ្លាញ់ដែលស្រោបខ្លួនប្រាណទារកនោះ នឹងជួយគ្រប់គ្រងសីតុណ្ហភាពរបស់កូនតូច មិនឱ្យធ្លាក់ចុះទាបជ្រុលពេកបានទៀតផង។ ដូច្នេះហើយទើបគ្រូពេទ្យបណ្តោយឱ្យជាតិខ្លាញ់ទាំងនោះ នៅជាប់នឹងខ្លួនទារកមួយរយៈសិន មុននឹងលាងចេញ នៅពេលប្រាកដក្នុងចិត្តហើយថា ទារកចាប់ផ្តើមគ្រប់គ្រងសីតុណ្ហភាពដោយខ្លួនឯងបានហើយ។ ការប្រញាប់លាងជាតិខ្លាញ់នោះចេញពេក អាចនឹងធ្វើឱ្យខ្លួនប្រាណកូនតូច ត្រជាក់ខុសធម្មតា និងអាចបង្កឱ្យមានបញ្ហាបាន។

ចំណែកឯទឹកដូងវិញ មានជាតិស្ករ និងសារធាតុអាស៊ីតខ្លាញ់កកច្រើន ពេលស្ត្រីមានគភ៌ញ៉ាំច្រើន អាចធ្វើឱ្យកូនមានមាឌធំ តែមិនសូវរឹងមាំ ហើយអ្នកម្តាយខ្លួនឯង ក៏កាន់តែមានភាពប្រឈមនឹងការកើតមានខ្លាញ់ញ៉ុកណែនក្នុងសរសៃឈាមខ្លាំងដែរ ដូច្នេះបើទម្ងន់ខ្លួន កើនឡើងច្រើនហើយ គួរតែផ្អាកញ៉ាំទឹកដូងមួយរយៈ។

ជំនឿថា ហាមញ៉ាំបន្លែពពួកវល្លិ៍ៗ ឬបន្លែឡើងទ្រើង ព្រោះនឹងធ្វើឱ្យពិបាកប្រសូត…

ការពិតវិញ៖ វាជាជំនឿកាលពីបុរាណ ដែលថា បន្លែទាំងនោះមានលក្ខណៈជាខ្សែសរសៃ រឹតចងតោង ធ្វើឱ្យទារកពិបាកកើតចេញមក។ តែការពិតទៅ ស្ត្រីមានគភ៌ អាចទទួលទានបានទាំងអស់ មិនកំណត់ប្រភេទបន្លែឡើយ ជាពិសេសពពួកបន្លែស្លឹកបៃតងផ្សេងៗ ដូចជាត្រកួន ស្លឹកបាស សណ្តែកកួរ ល្ពៅ ប៉េងប៉ោះ ខាត់ណា ជាដើម។ បើបានទទួលទានបន្លែទាំងអស់នោះហើយ នឹងមានប្រយោជន៍ខ្លាំងណាស់ ព្រោះនឹងធ្វើឱ្យស្ត្រីមានគភ៌ខ្លួនឯង ទទួលបានវិតាមីនដែលចាំបាច់ និងសំខាន់ដល់ការរីកធំធាត់របស់ភ្នាសស្តើងៗ នៃកែវភ្នែក និងក្រពេញការធ្វើការងាររបស់គ្រាប់ភ្នែក។

ជំនឿដែលថា ហាមញ៉ាំទឹកតែ កាហ្វេ ព្រោះអាចធ្វើឱ្យរលូតបុត្រ…

តែការពិតវិញ…មានការសិក្សាវិភាគពីការញ៉ាំកាហ្វេ ឬភេសជ្ជៈដែលមានជាតិកាហ្វេអ៊ីនរបស់ស្ត្រីមានគភ៌ ចំនួន 1,063នាក់ បានរកឃើញថា ស្ត្រីមានផ្ទៃពោះ ដែលទទួលទានបរិមាណកាហ្វេអ៊ីន លើសពី 200មីល្លីក្រាមក្នុង 1ថ្ងៃ (ប្រមាណ 2ពែង ក្នុង 1ថ្ងៃ) អាចនឹងបណ្ដាលឱ្យកើតការរលូតបុត្របានដល់ទៅ 25ភាគរយ តែក៏មិនមែនមានន័យថា ហាមមិនឱ្យញ៉ាំនោះដែរ គ្រាន់តែត្រូវកំណត់ មិនឱ្យលើសពី 1កែវ ក្នុងរយៈពេល 2-3ថ្ងៃឡើយ អាចគ្រាន់តែក្រេបចឹបៗ ឱ្យបាត់ចង់ទៅបានហើយ។ ការញ៉ាំទឹកតែ ឬកាហ្វេ ច្រើនជ្រុលពេក នឹងធ្វើឱ្យគេងមិនលក់ សម្រាកមិនបានគ្រប់គ្រាន់ ឬអ្នកខ្លះអាចធ្វើឱ្យឆ្អល់ពោះ ដែលនឹងមានផលប៉ះពាល់ដល់សុខភាពរបស់ស្ត្រីមានគភ៌ខ្លួនឯង និងប៉ះពាល់ដល់ការរីកចម្រើនធំធាត់ និងការវិវឌ្ឍរបស់ទារកនៅក្នុងផ្ទៃបានទៀតផង។

ជំនឿថា ញ៉ាំថ្នាំខ្លាញ់ត្រី ប្រភេទគ្រាប់ នឹងធ្វើឱ្យឈាមបង្កកខ្លួនយឺត…

ការពិតវិញ៖ ខ្លាញ់ត្រី ឬ Fish Oil នេះ មិនដូចខ្លាញ់ថ្លើមត្រីទេ តែជាខ្លាញ់របស់ត្រី ដែលមានអាស៊ីតជាតិខ្លាញ់មិនកកដែលចាំបាច់ចំពោះរាងកាយ គឺអាស៊ីតខ្លាញ់នៅក្នុងក្រុមអូមេហ្កា3 ដែលជាចំណែកសំខាន់មួយរបស់កោសិកា ឬសាច់ភ្នាសរបស់រាងកាយ រួមទាំងខួរក្បាល គ្រាប់ឈាមប្រភេទផ្សេងៗ និងការបង្កើតភាពស៊ាំ ប្រឆាំងនឹងជំងឺរបស់រាងកាយ និងថែមទាំងជួយកាត់បន្ថយអាការរលាករបស់សន្លាក់ឆ្អឹង ដែលស្ត្រីមានគភ៌ច្រើនតែជួបប្រទះទៀតផង តែស្ត្រីមានផ្ទៃពោះ ក៏មិនគួរទទួលទានថ្នាំខ្លាញ់ត្រីប្រភេទគ្រាប់នេះច្រើនពេកដែរ តែគួរទទួលទានខ្លាញ់ត្រី ដែលមាននៅក្នុងសាច់ត្រីផ្សេងៗ ដូចជា សាច់ត្រីសាល់ម៉ុន ត្រីធូណា ត្រីឆ្ពុងក្រហម ជាដើមជំនួសវិញ ទើបជាការល្អ។

ក្រៅពីនេះ ស្ត្រីមានគភ៌គួរឈប់ទទួលទានអាហារបំប៉ន ប្រភេទថ្នាំខ្លាញ់ត្រីបែបគ្រាប់ ពេលមានផ្ទៃពោះបាន 6-7ខែ ព្រោះទោះជាវាជួយមិនឱ្យកើតមានភាពញ៉ុកណែនក្នុងសរសៃឈាមមែន តែវាអាចធ្វើឱ្យឈាម ក្របង្កកខ្លួននៅពេលកើតមានរបួសស្នាម ឬពេលវះកាត់ជាដើម។

បន្ទាប់ពីបានដឹងការពិតរបស់ជំនឿក្នុងរឿងអាហារការហូបចុក ដែលយើងបាននាំយកមកជម្រាបជូនហើយនោះ ស្ត្រីមានគភ៌ទាំងឡាយប្រហែលជាបានយល់ និងអាចជ្រើសរើសទទួលទានអាហារ បានយ៉ាងសប្បាយចិត្ត ដើម្បីសុវត្ថិភាពទាំងខ្លួនអ្នក និងកូននៅក្នុងផ្ទៃជាមិនខាន៕

រៀបរៀងដោយអ្នកគ្រូ ឆវី

July 21, 2021

អូ! តើខ្ញុំប្រែប្រួល ខ្លាំងដល់ថ្នាក់ហ្នឹងផងឬ? (រឿងប្រាប់តគ្នា របស់ស្ត្រីជប៉ុន ពេលបានក្លាយខ្លួនជាម្ដាយគេយ៉ាងពេញលេញ)

តើមានមិត្តៗយើងណា កំពុងចិញ្ចឹមមើលថែកូនដែរឬទេ? ហើយធ្លាប់សង្កេតមើលខ្លួនឯងដែរទេថា តាំងពីចាប់ផ្ដើមបំពេញតួនាទីចិញ្ចឹមមើលថែកូនតូចមក តើមិត្តៗ មានទង្វើ ឬលក្ខណនិស្ស័យអ្វី ប្រែប្រួលខុសពីមុនដែរទេ? បើសិនមាន មិនបាច់ភ្ញាក់ផ្អើលទេ ព្រោះមានស្ត្រីជនជាតិជប៉ុនមិនតិចទេ ដែលសង្កេតមើលខ្លួនឯងហើយ រកឃើញថា ក្រោយពីចាប់ផ្ដើមបំពេញតួនាទីជាម្ដាយរបស់គេយ៉ាងពេញលេញមក ពួកគាត់ក៏មានទង្វើ ឬចរិតនិស្ស័យមួយចំនួន ប្រែប្រួលខុសពីមុនដូចគ្នាដែរ ដូច្នេះថ្ងៃនេះ យើងនាំគ្នាសាកល្បងមកស្ដាប់បណ្ដាអ្នកម្ដាយជនជាតិជប៉ុនម្ដងមើល៍ថា តើពួកគាត់មានអ្វីប្រែប្រួលខុសពីមុនខ្លះ?

លក្ខណៈការនិយាយស្ដី ប្រែប្រួលខុសពីមុន (ក្លៀវក្លាជាងមុន!)

Iសាំង មានកូន អាយុ 1ខួប និង 5ខួប នាងរៀបរាប់ថា កាលសម័យនាងនៅក្មេង នាងមានចរិតអៀនច្រើន មិនសូវក្លាហាន និងមិនសូវហ៊ានជជែកនិយាយជាមួយនរណាប៉ុន្មានឡើយ។ ឧទាហរណ៍ដូចជា តឱ្យមានអារម្មណ៍ថា រឿងដែលកំពុងសន្ទនាគ្នានោះ វាមើលទៅរាងប្លែកៗ ឬវាដូចជាមិនគួរទៅជាអ៊ីចឹងក៏ដោយ ក៏នាងជ្រើសរើសក្នុងការនៅស្ងៀម មិនហ៊ានសម្ដែងពីភាពជំទាស់ទេ បានត្រឹមតែលាក់ទុកក្នុងចិត្តប៉ុណ្ណោះ តែក៏មិនមែនថា នឹងលាក់ទុកយកមកគិត រហូតដល់ស្ត្រេសដែរ។ សរុបងាយៗក៏គឺ ខ្លួនឯងជាមនុស្សកំសាក តែប៉ុនហ្នឹងឯង (=_=;)។

Iសាំង រៀបរាប់បន្តថា តែក្រោយពីកូនស្រីច្បងរបស់នាង អាយុបាន 2-3ខួប ពេលនិយាយជាមួយអ្នកម្ដាយឯទៀតៗ ក៏ចាប់ផ្ដើមមានអារម្មណ៍ថា ខ្លួនឯងហ៊ាននិយាយ ហ៊ានបញ្ចេញគំនិតយោបល់ច្រើនឡើង ដូចជា បើសិននាងមិនយល់ស្រប ជាមួយរឿងដែលកំពុងតែសន្ទនាគ្នានោះ នាងហ៊ានក្នុងការនិយាយចេញទៅត្រង់ៗតែម្ដងថា វាដូចជាមិនមែនអ៊ីចឹងទេណា៎! ជាដើម។ល។ ក្រៅពីនេះ ពេលទៅញ៉ាំបាយនៅក្នុងហាង ក៏ហ៊ានក្នុងការស្រែកហៅសេវាករ ដោយសំឡេងដ៏ក្លៀវក្លា និងមាំមួនខ្លាំងជាងមុន។ បើសម័យមុនវិញ បែបប្រហែលជាធ្វើបែបហ្នឹងមិនកើតទេ តែគិតចុះគិតឡើង មូលហេតុដែលទង្វើរបស់ខ្លួនឯងប្រែប្រួលបែបនេះ អាចមិនមែនកើតចេញពីការចិញ្ចឹមមើលថែកូនក៏អាចថាបានដែរ តែប្រហែលជាមកពីយើង ចាប់ផ្ដើមមានអាយុច្រើនឡើងហើយក៏មិនដឹង? (-_-;)។

ចាប់ផ្ដើមចូលសង្គមច្រើនឡើង

Yសាំង មានកូន អាយុ 5ខួប នាងរៀបរាប់ថា តាំងពីពេលនៅក្មេងៗ រហូតដល់ពេលមុនមានកូន នាងមានអារម្មណ៍ថា ការជួបជុំ និងការជជែកគ្នាជាមួយអ្នកដទៃ វាជារឿងដ៏គួរឱ្យរំខានខ្លាំងណាស់។ ពេលត្រឡប់មកពីសាលារៀន ឬត្រឡប់មកពីធ្វើការក្រុមហ៊ុន នាងច្រើនតែសម្ងំខ្លួន និងនៅតែក្នុងបន្ទប់ ស្ងាត់ៗតែម្នាក់ឯង ចង់និយាយថា រាងដូចជាចង់កើតជំងឺ ហ៊ិឃិខូម៉ូរិ តិចៗហើយក៏មិនដឹង? ម្យ៉ាងទៀត ប៉ា និងម៉ាក់ ក៏មិនសូវជារអ៊ូ អំពីរឿងហ្នឹងទៀតផង ទើបត្រូវរស់នៅបែបហ្នឹងរហូតមក។

បន្ទាប់ពីមានកូន ក៏ចាប់ផ្ដើមមានមិត្តភក្តិ ដែលជាអ្នកម្ដាយដូចគ្នាកាន់តែច្រើនឡើង តែក៏មានអារម្មណ៍ថា ក្រុមអ្នកម្ដាយទាំងឡាយនោះ គួរឱ្យរំខានខ្លាំងណាស់ ទើបព្យាយាមមិនសូវចង់ចូលរួម វង់សន្ទនាប៉ុន្មានទេ តែបើសិនជារឿងដែលពាក់ព័ន្ធនឹងកូនវិញ ក៏នឹងស្ទុះភ្លែតចូលទៅរួមវង់សន្ទនាភ្លាមតែម្ដង! ធ្វើឱ្យចាប់ផ្ដើមមានអារម្មណ៍ថា អេ៎? យើងក៏មាននិស្ស័យចូលចិត្តចូលសង្គមនឹងគេដែរតើ?! រហូតមកដល់ពេលនេះ ចាប់ផ្ដើមមានអារម្មណ៍ថា សប្បាយនឹងការជជែកពិភាក្សា ជាមួយមនុស្សទាំងឡាយច្រើនឡើងហើយ…។ បើសិនមិនមានកូនវិញ ថ្មើរណេះ ប្រហែលជាកើតជំងឺហ៊ិឃិខូម៉ុរិ បាត់ទៅហើយក៏មិនដឹង? (- _ -*)។

កំណត់សម្គាល់៖ ជំងឺហ៊ិឃិខូម៉ូរិ គឺជំងឺ ដែលអ្នកជំងឺមានទង្វើ បដិសេធការចូលសង្គម (មិនចង់ជួបអ្នកដទៃ) និងច្រើនតែសម្ងំរស់នៅតែក្នុងបន្ទប់ តែម្នាក់ឯងជានិច្ច។

ចេះគ្រប់គ្រង ចាត់ចែងពេលវេលា បានល្អជាងមុន

Sសាំង មានកូន អាយុ ៦ខួប នាងរៀបរាប់ថា ពីមុននាងមានអាជីពជាអ្នកនិពន្ធឯករាជ្យ មុនពេលមានកូន នាងមាននិស្ស័យខ្ជិលច្រអូសខ្លាំងណាស់ ទើបធ្វើការបែបតាមដំណើរ ត្រេតត្រត ពី ១ថ្ងៃទៅ ១ថ្ងៃ និងតែងតែចុះចាញ់អ្វីៗ ដែលធ្វើញាប់ញ័រអារម្មណ៍ ដែលនៅជុំវិញខ្លួនជានិច្ច។ ឧទាហរណ៍ដូចជា បន្ទាប់ពីអង្គុយធ្វើការ បានមិនយូរប៉ុន្មាន ពេលនាងដឹងខ្លួនឡើង ទើបដឹងថា ខ្លួនឯងមកអង្គុយលេងអ៊ីនធើណិត ឬអង្គុយមើលទូរទស្សន៍បាត់ទៅហើយ ហើយការងារផ្ទះ ក៏ត្រូវត្រាំៗទុកចោលសិន ទុកស្អែកចាំធ្វើ ជារឿយៗទៅ។

តែក្រោយពីមានកូន រៀងរាល់ថ្ងៃ ត្រូវមកអង្គុយរៀបផែនការថា ថ្ងៃនេះនឹងទៅទទួលកូន ពីសាលាមកវិញនៅម៉ោងប៉ុន្មាន? ពេលនេះត្រូវជម្រះការងារឱ្យស្អាតរួចរាល់ឱ្យអស់ណា៎ ពេលនេះត្រូវតែចាប់ផ្ដើមធ្វើការងារផ្ទះហើយណា៎ ពេលនេះអាចសម្រាកបានហើយជាដើម…ដែលការងារទាំងអស់នេះ ពីដំបូងៗ ក៏ធ្វើបែបតាមដំណើរពី១ថ្ងៃទៅ១ថ្ងៃ ហើយក៏មានអារម្មណ៍ដឹងខ្លួនថាខុសពី១ថ្ងៃទៅ១ថ្ងៃដូចគ្នាដែរ តែពេលនេះ មានអារម្មណ៍ថា ខ្លួនឯងអាចចាត់ចែងពេលវេលាធ្វើកិច្ចការងារផ្សេងៗ បានយ៉ាងពេញទំហឹងហើយ…(‘-o-’)។

ល្អិតល្អន់ និងហ្មត់ចត់ជាងមុន

Oសាំង មានកូន អាយុ 3ខួប និង 9ខួប នាងរៀបរាប់ថា កាលសម័យនៅជាសិស្ស នាងមាននិស្ស័យភ្លេចនេះ ភ្លេចនោះជាប់ជានិច្ច ដូចជា “អេ៎? យើងដូចជាភ្លេចផ្ញើកិច្ចការផ្ទះឱ្យលោកគ្រូទេដឹង?” ដល់ពេលចាប់ផ្ដើមចូលធ្វើការ ក៏ច្រើនតែភ្លេចជាញឹកញាប់ រឿងកំណត់ពេលផ្ញើកិច្ចការងារដែលមេប្រគល់ឱ្យ ទើបត្រូវហាមាត់សុំពន្យារពេលជាញឹកញាប់ដូចគ្នា។

ប៉ុន្តែ រាល់ថ្ងៃនេះ ត្រូវនៅចាំត្រួតពិនិត្យមើល និងរៀបចំត្រៀមតម្រាមេរៀន ឯកសារការរៀនសូត្ររបស់កូន ឱ្យហើយរួចរាល់ជាប់ជានិច្ច និងថែមទាំងនៅចាំសរសេរកាលបរិច្ឆេទ ផ្ញើកិច្ចការផ្ទះតាមមុខវិជ្ជាផ្សេងៗនៅលើប្រតិទិនដោយប៊ិចពណ៌ក្រហមធំៗ ដើម្បីការពារការភ្លេចភ្លាំងទៀតផង។ ក្រៅពីនេះ នៅបានចាត់ចែងរៀបចំទុកដាក់សៀវភៅឯកសារមេរៀនរបស់កូនៗទាំង2 យ៉ាងមានរបៀបរៀបរយទៀតផង។ រហូតមកដល់ពេលនេះ មានអារម្មណ៍រាងភ្ញាក់ផ្អើលនឹងខ្លួនឯងដូចគ្នាដែរថា ហេតុអីបានរឿងរបស់ខ្លួនឯង មិនព្រមល្អិតល្អន់ហ្មត់ចត់បែបហ្នឹង? តែបើរឿងរបស់កូនៗវិញ បែរជាធ្វើបានយ៉ាងល្អជានិច្ចតែម្ដង (* _ *)។

ចាប់ផ្ដើមគិតថា ការពិតទៅ ក្មេងៗក៏គួរឱ្យស្រឡាញ់ដែរតើ!

Hសាំង មានកូន អាយុ 3ខួប នាងរៀបរាប់ថា ការពិតទៅ កាលពីពេលមិនទាន់មានកូន នាងមានអារម្មណ៍ថា មិនចូលចិត្តក្មេងៗសោះតែម្ដង ព្រោះនាងគិតថា ពួកក្មេងៗ ចូលចិត្តតែបើកក្រពះស្រែកយំឮៗ អាត្មានិយមយ៉ាងចេះស្ដាប់អ្នកណា ស្មានពីអារម្មណ៍មិនត្រូវ សូម្បីតែកូនរបស់បងស្រីខ្លួនឯង ដែលជាក្មួយបង្កើត ក៏នាងមានអារម្មណ៍មិនចូលចិត្តដែរ។

តែដល់ពេលខ្លួនឯងមានកូនហើយ បែរជាមានអារម្មណ៍ចុះចាញ់កូនដោយឯងៗតែម្ដង…អាចដោយសារតែបានក្លាយជាម្ដាយរបស់គេ ឬមិនទេ ក៏អ័រម៉ូនក្នុងខ្លួន វាផ្លាស់ប្ដូរក៏មិនដឹង តែអ្វីដែលគួរឱ្យភ្ញាក់ផ្អើលបំផុតនោះគឺ រាល់ថ្ងៃនេះ ពេលឃើញក្មេងៗ ដែលរត់លេងនៅតាមសួនច្បារសាធារណៈពេលណា ស្រាប់តែរបូតមាត់និយាយចេញមកថា “អា៎! ក្មេងៗគួរឱ្យស្រឡាញ់អ្វីម្ល៉េះហ្ន៎?” រហូតដល់ខ្លួនឯងមានអារម្មណ៍ភ្ញាក់ផ្អើលថា ចុំ?! ម៉េចបានយើងរបូតមាត់ និយាយចេញមកបែបហ្នឹងកើតហ្ន៎? (=_=,)។

Hសាំង និយាយបញ្ចប់ថា ទោះជាពេលនេះ នាងមានអារម្មណ៍ថា ស្រឡាញ់ក្មេងៗខ្លាំងក៏ដោយ តែក៏ត្រូវប្រយ័ត្នគំនិតខ្លួនឯងជាប់ជានិច្ចដែរ ក្រែងលោថា ថ្ងៃណាមួយ ពេលកូនរបស់នាងធំឡើង ហើយមកនិយាយមិនពីរោះពិសាដាក់នាងនោះ ច្បាស់ជាបានវិលទៅមើលឃើញក្មេងៗក្នុងន័យអវិជ្ជមានដូចពីមុនវិញមិនខាន៕

រៀបរៀងដោយអ្នកគ្រូ ឆវី

July 9, 2021

ជំនឿ 5យ៉ាងក្នុងរឿងអាហារការហូបចុក របស់ស្ត្រីមានគភ៌

មានជំនឿជាច្រើន ពាក់ព័ន្ធនឹងរឿងអាហារការហូបចុក ក្នុងអំឡុងពេលមានគភ៌ថា ញ៉ាំអានេះទៅ វានឹងល្អ ឬញ៉ាំអានោះទៅ ណឹងធ្វើឱ្យកូនខ្ពស់ កូនឆ្លាត កូនងាយកើត ឬស្រួលកើត ជាដើម-ល- តែជំនឿខ្លះ មិនមែនចេះតែត្រូវទាំងអស់នោះទេ ដូច្នេះថ្ងៃនេះ យើងនាំគ្នាមកពិនិត្យមើលថា តើរឿង ដែលយើងជឿទាំងអស់នោះ វាជាការពិត ឬយ៉ាងណា?

ជំនឿថា ញ៉ាំហឹរពេក នឹងធ្វើឱ្យកូន មិនសូវមានសក់…

ការពិត៖ សក់របស់កូនតិច ឬច្រើននោះ វាស្ថិតនៅលើពូជ ឬហ្ស៊ែន របស់មនុស្សម្នាក់ៗ ចំណែកឯជំនឿ រឿងហាមញ៉ាំហឹរនេះ ប្រហែលជាមកពីខ្លាចស្ត្រីមានគភ៌ ឈឺពោះ ពិបាកបន្ទោបង់ ឬមិនទេ ក៏ខ្លាចរាករូស ដែលនាំឱ្យមានផលប៉ះពាល់ដល់សុខភាពរបស់ស្ត្រីមានគភ៌ទៅវិញទេ ព្រោះនៅក្នុងអំឡុងពេលមានគភ៌ ប្រព័ន្ធរំលាយអាហារនឹងខុសពីពេលមុនមានគភ៌ ដោយសារតែអ័រម៉ូនប្រែប្រួល ដែលអាចនឹងធ្វើឱ្យមានបញ្ហាក្នុងការបន្ទោបង់ ឬអាចធ្វើឱ្យកើតអាការឆ្អល់ពោះ និងរាករូសបានហ្នឹងឯង។

ជំនឿថា ញ៉ាំទឹកដូងច្រើន នឹងជួយឱ្យកូនមានសាច់ស្អាត និងលាងជម្រះជាតិខ្លាញ់តាមដងខ្លួន…

ការពិត៖ ការពិតទៅ ការដែលមានខ្លាញ់ ជាប់នៅតាមដងខ្លួនទារកនោះ នឹងធ្វើឱ្យងាយស្រួលប្រសូត ព្រោះវាប្រៀបដូចជា ជាតិខ្លាញ់រំអិលស្រោបពីលើខ្លួនទារក ខណៈពេលប្រសូតចេញមកដូច្នោះដែរ។ ជាតិខ្លាញ់មួយនេះ ផលិតឡើងដោយកោសិកាស្បែករបស់ទារក និងក្រពេញជាតិខ្លាញ់នៅខាងក្រោមស្បែក ពេលអាយុគភ៌ រឹតតែច្រើនឡើង ជាតិខ្លាញ់នោះ ក៏នឹងកើតឡើងច្រើនតាមនោះដែរ។ ក្រៅពីនេះ ក្រោយពេលប្រសូតហើយថ្មីៗ ជាតិខ្លាញ់ដែលស្រោបខ្លួនប្រាណទារកនោះ នឹងជួយគ្រប់គ្រងសីតុណ្ហភាពរបស់កូនតូច មិនឱ្យធ្លាក់ចុះទាបជ្រុលពេកបានទៀតផង ដូច្នេះហើយទើបគ្រូពេទ្យបណ្តោយឱ្យជាតិខ្លាញ់ទាំងនោះ នៅជាប់នឹងខ្លួនទារកមួយរយៈសិន មុននឹងលាងចេញ នៅពេលប្រាកដក្នុងចិត្តហើយថា ទារកចាប់ផ្តើមគ្រប់គ្រងសីតុណ្ហភាពដោយខ្លួនឯងបានហើយ។ ការប្រញាប់លាងជាតិខ្លាញ់នោះចេញពេក អាចនឹងធ្វើឱ្យខ្លួនប្រាណកូនតូច ត្រជាក់ខុសធម្មតា និងអាចបង្កឱ្យមានបញ្ហាបាន។

ចំណែកឯទឹកដូងវិញ មានជាតិស្ករ និងសារធាតុអាស៊ីតខ្លាញ់កកច្រើន ពេលស្ត្រីមានគភ៌ញ៉ាំច្រើន អាចធ្វើឱ្យកូនមានមាឌធំ តែមិនសូវរឹងមាំ ហើយអ្នកម្តាយខ្លួនឯង ក៏កាន់តែមានភាពប្រឈមនឹងការកើតមានខ្លាញ់ញ៉ុកណែនក្នុងសរសៃឈាមខ្លាំងដែរ ដូច្នេះបើទម្ងន់ខ្លួន កើនឡើងច្រើនហើយ គួរតែតមញ៉ាំទឹកដូងមួយរយៈ។

ជំនឿថា ហាមញ៉ាំបន្លែពពួកវល្លិ៍ៗ ឬបន្លែឡើងទ្រើង ព្រោះនឹងធ្វើឱ្យពិបាកប្រសូត…

ការពិតវិញ៖ វាជាជំនឿកាលពីបុរាណ ដែលថា បន្លែទាំងនោះមានលក្ខណះជាខ្សែសរសៃ រឹតចងតោង ធ្វើឱ្យទារកពិបាកកើតចេញមក។ តែការពិតទៅ ស្ត្រីមានគភ៌ អាចទទួលទានបានទាំងអស់ មិនកំណត់ប្រភេទបន្លែឡើយ ជាពិសេសពពួកបន្លែស្លឹកបៃតងផ្សេងៗ ដូចជាត្រកួន ស្លឹកបាស សណ្តែកកួរ ល្ពៅ ប៉េងប៉ោះ ខាត់ណា ជាដើម។ បើបានទទួលទានបន្លែទាំងអស់នោះហើយ នឹងមានប្រយោជន៍ខ្លាំងណាស់ ព្រោះនឹងធ្វើឱ្យស្ត្រីមានគភ៌ខ្លួនឯង ទទួលបានវិតាមីនដែលចាំបាច់ និងសំខាន់ដល់ការរីកធំធាត់របស់ភ្នាសស្តើងៗ នៃកែវភ្នែក និងក្រពេញការធ្វើការងាររបស់គ្រាប់ភ្នែក។

ជំនឿដែលថា ហាមញ៉ាំទឹកតែ កាហ្វេ ព្រោះអាចធ្វើឱ្យរលូតបុត្រ…

តែការពិតវិញ…មានការសិក្សាវិភាគពីការញ៉ាំកាហ្វេ ឬភេសជ្ជៈដែលមានជាតិកាហ្វេអ៊ីនរបស់ស្ត្រីមានគភ៌ ចំនួន 1,063នាក់ បានរកឃើញថា ស្ត្រីមានផ្ទៃពោះ ដែលទទួលទានបរិមាណកាហ្វេអ៊ីន លើសពី 200មីល្លីក្រាមក្នុង 1ថ្ងៃ (ប្រមាណ 2ពែង ក្នុង 1ថ្ងៃ) អាចនឹងបណ្ដាលឱ្យកើតការរលូតបុត្របាន ដល់ទៅ 25ភាគរយ តែក៏មិនមែនមានន័យថា ហាមមិនឱ្យញ៉ាំនោះដែរ គ្រាន់តែត្រូវកំណត់ មិនឱ្យលើសពី 1កែវ ក្នុងរយៈពេល 2-3ថ្ងៃឡើយ អាចគ្រាន់តែក្រេបចឹបៗ ឱ្យបាត់ចង់បានហើយ។ ការញ៉ាំទឹកតែ ឬកាហ្វេ ច្រើនជ្រុលពេក នឹងធ្វើឱ្យគេងមិនលក់ សំរាកមិនបានគ្រប់គ្រាន់ ឬអ្នកខ្លះអាចធ្វើឱ្យឆ្អល់ពោះ ដែលនឹងមានផលប៉ះពាល់ដល់សុខភាពរបស់ស្ត្រីមានគភ៌ខ្លួនឯង និងប៉ះពាល់ដល់ការរីកចម្រើនធំធាត់ និងការវិវឌ្ឍរបស់ទារកនៅក្នុងផ្ទៃបានទៀតផង។

ជំនឿថា ញ៉ាំថ្នាំខ្លាញ់ត្រី ប្រភេទគ្រាប់ នឹងធ្វើឱ្យឈាមបង្កកខ្លួនយឺត…

ការពិតវិញ៖ ខ្លាញ់ត្រី ឬ Fish Oil នេះ មិនដូចខ្លាញ់ថ្លើមត្រីទេ តែជាខ្លាញ់របស់ត្រី ដែលមានអាស៊ីតជាតិខ្លាញ់មិនកក ដែលចាំបាច់ចំពោះរាងកាយ គឺអាស៊ីតខ្លាញ់នៅក្នុងក្រុមអូមេហ្កា3 ដែលជាចំណែកសំខាន់មួយ របស់កោសិកា ឬសាច់ភ្នាសរបស់រាងកាយ រួមទាំងខួរក្បាល គ្រាប់ឈាមប្រភេទផ្សេងៗ និងការបង្កើតភាពស៊ាំ ប្រឆាំងនឹងជំងឺរបស់រាងកាយ និងថែមទាំងជួយកាត់បន្ថយអាការរលាករបស់សន្លាក់ឆ្អឹង ដែលអ្នកមានគភ៌ច្រើនតែជួបប្រទះទៀតផង តែស្ត្រីមានផ្ទៃពោះ ក៏មិនគួរទទួលទានថ្នាំខ្លាញ់ត្រីប្រភេទគ្រាប់នេះ ច្រើនពេកដែរ តែគួរទទួលទានខ្លាញ់ត្រី ដែលមាននៅក្នុងសាច់ត្រីផ្សេងៗ ដូចជា សាច់ត្រីសាល់ម៉ុន ត្រីធូណា ត្រីឆ្ពុងក្រហម ជាដើមជំនួសវិញ ទើបជាការល្អ។

ក្រៅពីនេះ ស្ត្រីមានគភ៌ គួរឈប់ទទួលទានអាហារបំប៉ន ប្រភេទថ្នាំខ្លាញ់ត្រីបែបគ្រាប់ ពេលមានផ្ទៃពោះបាន 6-7ខែ ព្រោះទោះជាវាជួយមិនឱ្យកើតមានភាពញ៉ុកណែនក្នុងសរសៃឈាមមែន តែវាអាចធ្វើឱ្យឈាម ក្របង្កកខ្លួននៅពេលកើតមានរបួសស្នាម ឬពេលវះកាត់ជាដើម។

បន្ទាប់ពីបានដឹងការពិតរបស់ជំនឿ ក្នុងរឿងអាហារការហូបចុក ដែលយើងបាននាំយកមកជម្រាបជូនហើយនោះ ស្ត្រីមានគភ៌ទាំងឡាយប្រហែលជាបានយល់ និងអាចជ្រើសរើសទទួលទានអាហារ បានយ៉ាងសប្បាយចិត្ត ដើម្បីសុវត្ថិភាពទាំងខ្លួនអ្នក និងកូននៅក្នុងផ្ទៃជាមិនខាន៕

June 19, 2021

Tag: ជំងឺ