ឆ្មា - La Reine Media

ណាសាបញ្ជូនវីដេអូមកកាន់ផែនដី ពីចម្ងាយជាង 30 លានគីឡូម៉ែត្រ

នេះជាលើកដំបូងហើយដែល ទីភ្នាក់ងារអវកាសអាម៉េរិក (ណាសា-NASA) បញ្ជូនវីដេអូដែលមានភាពច្បាស់ខ្ពស់ ពីទីអវកាសដ៏ឆ្ងាយ មកកាន់ផែនដី ដោយប្រើប្រាស់ពន្លឺឡាស៊ែរ នៅក្នុងការពិសោធនៅលើយាន Psyche។

កាលពីថ្ងៃទី 11 ធ្នូ 2023 កម្មវិធីពិសោធផ្នែកទំនាក់ទំនងដោយពន្លឺក្នុងអវកាសឆ្ងាយ (DSOC) នៃបន្ទប់ពិសោធន៍កម្លាំងរុញច្រានល្បឿនលឿន (JPL) របស់ណាសា បានបញ្ជូនវីដេអូដែលមានភាពច្បាស់កម្រិតខ្ពស់ខ្លាំង ស្ដីពីសត្វឆ្មាមួយក្បាលដែលមានឈ្មោះថា Taters កំពុងដេញតាមព្រួញពន្លឺឡាស៊ែរ ពីចម្ងាយប្រហែល 31 លានគីឡូម៉ែត្រ។ ការធ្វើតេស្តនេះ ត្រូវបានធ្វើឡើងនៅលើយានអវកាស Psyche របស់ណាសា ដែលបច្ចុប្បន្នកំពុងហោះហើរទៅកាន់ 16 Psyche ដែលជាអាចម៍ផ្កាយលោហធាតុស្ថិតក្នុងតំបន់ខ្សែក្រវាត់អាចម៍ផ្កាយចម្បងគេ នៅចន្លោះភពអង្គារ និងភពព្រហស្បតិ៍ ក្រោយពីត្រូវបានបាញ់បង្ហោះតាមរយៈរ៉ុក្កែត Falcon Heavy របស់ SpaceX កាលពីថ្ងៃទី 13 តុលា។

«ការបង្កើនកម្រិតបញ្ជូនគឺជារឿងចាំបាច់ដើម្បីសម្រេចបានគោលដៅវិទ្យាសាស្ត្រ និងការស្រាវជ្រាវក្នុងអនាគត។ យើងឆ្ពោះទៅកាន់ជោគជ័យនៃបច្ចេកវិទ្យាគន្លឹះនេះ ហើយផ្លាស់ប្ដូរវិធីទាក់ទងនៅក្នុងបេសកកម្មអន្តរភព» Pam Melroy អនុប្រធានរបស់ណាសា ឱ្យដឹងដូច្នេះ។

វីដេអូស្ដីពី Taters ត្រូវបានបញ្ជូនដោយឧបករណ៍ថ្មីដែលអភិវឌ្ឍដោយ JPL និងត្រូវបានហៅថា ប្រព័ន្ធបញ្ជូន និងទទួលឡាស៊ែរក្នុងជើងហោះហើរ។ ឧបករណ៍នេះបញ្ជូនពន្លឺឡាស៊ែរក្បែរអ៊ីហ្វ្រារ៉េដ ទៅកាន់តេឡេស្កុប Hale នៅឯស្ថានីយ Palomar របស់វិទ្យាស្ថានបច្ចេកវិទ្យា California។ រលកសញ្ញានេះចំណាយពេល 101 វិនាទី ដើម្បីធ្វើដំណើរមកដល់ផែនដី ក្នុងល្បឿន 267 មេហ្គាប៊ិត/វិនាទី (Mbps)។

Ryan Rogalin អ្នកវិទ្យាសាស្ត្រដែលទទួលខុសត្រូវលើឧបករណ៍អេឡិចត្រូនិចទទួលរលកសញ្ញារបស់គម្រោងនេះ និយាយថា «បើទោះបញ្ជូនពីចម្ងាយរាប់សិបលានគីឡូម៉ែត្រ ប្រព័ន្ធនេះនៅតែអាចបញ្ជូនវីដេអូបានលឿនជាងអ៊ីនធើណិតស្ទើរតែទាំងអស់នៅលើផែនដី»។

ប្រព័ន្ធបញ្ជូន និងទទួលឡាស៊ែរក្នុងជើងហោះហើរ បានធ្វើការពិសោធដំបូងកាលពីខែវិច្ឆិកា ដោយការបញ្ជូនរលកសញ្ញាមកកាន់ផែនដី ពីចម្ងាយ 16 លានគីឡូម៉ែត្រ។

យានអវកាស Psyche នឹងហោះកាត់ភពអង្គារនៅក្នុងឆ្នាំ 2026 និងថតរូបរបស់ភពក្រហមនេះ មុននឹងហោះឆ្ពោះទៅកាន់គោលដៅចុងក្រោយ គឺ អាចម៍ផ្កាយ 16 Psyche ដែលគ្រោងនឹងទៅដល់នៅក្នុងឆ្នាំ 2029៕

December 21, 2023

គ្រាន់តែកិនឆ្មាងាប់សោះ ក្រុមហ៊ុនបារាំងរងការពិន័យជាប្រាក់ 3,000 ដុល្លារអាម៉េរិក

ក្រុមហ៊ុនគ្រប់គ្រងផ្លូវដែកជាតិបារាំង ត្រូវបានពិន័យជាប្រាក់ជាង 1,000 ដុល្លារអាម៉េរិក ពីបទខ្វះការទទួលខុសត្រូវ ដោយសារតែបានកិនឆ្មាសំណព្វរបស់អ្នកដំណើរម្នាក់ រហូតដល់ងាប់។

តុលាការបារាំង កាលពីថ្ងៃទី 04 កក្កដា បានសម្រេចថា ក្រុមហ៊ុនផ្លូវដែកជាតិ (SNCF) បានធ្វើឱ្យមានកំហុសទាក់ទិននឹងបញ្ហាខ្វះការទទួលខុសត្រូវ បន្ទាប់ពីមានករណីរថភ្លើងមួយខ្សែបានកិនឆ្មាសំណព្វរបស់អ្នកដំណើររហូតដល់ងាប់ កាលពីខែមករា។

ការចោទប្រកាន់ខាងលើនេះអាចដាក់ពិន័យជាប្រាក់ឡើងដល់ 75,000 អឺរ៉ូប (ជាង 80,000 ដុល្លារអាម៉េរិក) និងដាក់ពន្ធនាគារ 5 ឆ្នាំ។ ក៏ប៉ុន្តែ តុលាការបានសម្រេចពិន័យជាប្រាក់ត្រឹមតែ 1,000 អឺរ៉ូ (ជាង 1,000 ដុល្លារអាម៉េរិក) ចំពោះ SNCF។

SNCF ក៏ត្រូវបានបញ្ជាឱ្យបង់ប្រាក់ជំងឺចិត្តបន្ថែមចំនួន 2,000 អឺរ៉ូ (ជិត 2,200 ដុល្លារអាម៉េរិក) ដល់ម្ចាស់ពីរនាក់របស់សត្វមួយក្បាលឈ្មោះ Neko ដែលត្រូវរថភ្លើងកិននោះផងដែរ។

រឿងរ៉ាវខាងលើបានកើតឡើងកាលពីខែមករា 2023។ កាលណោះ Georgia និងកូនស្រី Melaina អាយុ 15 ឆ្នាំ បានឃើញ Neko លោតចុះពីថង់ និងរត់ទៅកាន់ផ្លូវដែកនៅមុនពេលរថភ្លើងចេញដំណើរ។ Georgia បានចោទថា បុគ្គលិករបស់ក្រុមហ៊ុនរថភ្លើងមានចិត្តឃោរឃៅ ព្រោះបានបដិសេធការស្នើសុំពន្យារការចេញដំណើរពី Paris ទៅកាន់ Bordeaux ដើម្បីជួយស្វែងរកឆ្មា។

នៅពេលរថភ្លើងចេញដំណើរ ម្ចាស់ឆ្មាក៏បានឃើញ Neko ត្រូវរថភ្លើងកិន។ ពេលនោះ SNCF ស្នើសុំបង់ថ្លៃខូចខាតដោយសំបុត្ររថភ្លើងមួយទៅកាន់ Bordeaux។

ករណីខាងលើក៏បានធ្វើឱ្យមានបាតុកម្ម រួមនឹងញត្តិតវ៉ាដែលមានស្នាមមេដៃរបស់មនុស្ស 100,000 នាក់។ រដ្ឋមន្ត្រីក្រសួងមហាផ្ទៃបារាំង Gerald Darmanin និយាយថា លោកភ្ញាក់ផ្អើលខ្លាំងណាស់នៅចំពោះហេតុការណ៍នេះ។ អង្គការការពារសិទ្ធិសត្វមួយក៏បានដាក់ញត្តិតវ៉ាចំពោះ SNCF ព្រោះតែ «អំពើហិង្សាធ្ងន់ធ្ងរ និងឃោរឃៅដែលនាំឱ្យសត្វស្លាប់»។

ចៅក្រមតុលាការបារាំង កាលពីថ្ងៃទី 04 កក្កដា 2023 យល់ថា បុគ្គលិកនៅលើរថភ្លើង «មិនបានប្រឹងប្រែងក្នុងការសង្គ្រោះសត្វឆ្មា»។ សាលក្រមរបស់តុលាការនេះក៏ដើរផ្ទុយពីអនុសាសន៍របស់ក្រុមរដ្ឋអាជ្ញា ជាក្រុមដែលអំពាវនាវឱ្យទម្លាក់ចោលរាល់ការចោទប្រកាន់ទៅលើ SNCF ដោយយល់ថា បុគ្គលិករបស់ស្ថាប័ននេះមិនបានបញ្ចេញភាពគ្មានមនុស្សធម៌។

នៅលើបណ្ដាញសង្គម មនុស្សមួយចំនួនបានរិះគន់សាលក្រមតុលាការខាងលើ។ អ្នកខ្លះថា លើកក្រោយបើមានករណីនេះកើតឡើង ពួកគេគិតថា ម្ចាស់សត្វត្រូវតែបង់ថ្លៃខាតបង់ពេលវេលាដល់អ្នកដំណើរដទៃ នៅពេលរថភ្លើងត្រូវបានពន្យារពេលចេញដំណើរ៕

July 6, 2023

បំណែកសាកសពនាវាមុជទឹក Titan ត្រូវបានស្រង់ឡើងគោក

បំណែករបស់នាវាមុជទឹក Titan ដែលបានជួបគ្រោះថ្នាក់កាលពីថ្ងៃទី 18 មិថុនា 2023 ត្រូវបានស្រង់ឡើងគោក និងនាំទៅកាន់កំពង់ផែនៅប្រទេសកាណាដា ក្នុងនោះក៏អាចមានផ្ទុកបំណែកសាកសពរបស់ជនរងគ្រោះ។

ក្រុមហ៊ុនអាម៉េរិក Pelagic Research ដែលមានរ៉ូបូតបញ្ជាពីចម្ងាយ Odysseus ដែលត្រូវបានប្រើប្រាស់ក្នុងការស្វែងរកនាវា Titan បានឱ្យដឹងថា បំណែកនានាពីសាកសពនាវាមុជទឹក Titan ក្នុងនោះអាចមានផ្នែកខាងមុខ និងឧបករណ៍បញ្ជា ត្រូវបាននាំទៅកាន់កំពង់ផែ St. John នៅប្រទេសកាណាដា កាលពីថ្ងៃទី 28 មិថុនា។

«ក្រុមអ្នកស្វែងរកបានធ្វើការទាំងយប់ទាំងថ្ងៃចំនួន 10 ថ្ងៃ នៅក្នុងការស្វែងរកសាកសពនាវា Titan» អ្នកនាំពាក្យរបស់ក្រុមហ៊ុនខាងលើឱ្យដឹងដូច្នេះ និងបន្តថា បេសកកម្មស្រង់ឡើងគោករបស់ពួកគេត្រូវបានបិទបញ្ចប់។

បំណែកពីនាវា Titan នឹងត្រូវបានដឹកទៅកាន់សហរដ្ឋអាម៉េរិក ដើម្បីវិភាគបន្ថែម។ កម្លាំងឆ្មាំសមុទ្រអាម៉េរិក ថ្មីៗនេះក៏បានបញ្ជាក់ថា ប្រហែលជាបានរកឃើញបំណែកសាកសពរបស់ជនរងគ្រោះនៅក្បែរបំណែកនាវា ក្នុងពេលស្រង់ឡើងគោក។

Jason Meubauer ប្រធានក្រុមស្រាវជ្រាវអំពីហេតុកាណ៍គ្រោះថ្នាក់នាវា Titan របស់សហរដ្ឋអាម៉េរិក និយាយថា «នៅមានកិច្ចការត្រូវធ្វើជាច្រើនទៀតដើម្បីស្វែងរកមូលហេតុដែលនាំឱ្យកើតមានហេតុកាណ៍ដ៏សោកសៅរបស់ Titan»។

នាវាមុជទឹក Titan បានដាច់ទំនាក់ទំនងតាំងពីថ្ងៃទី 18 មិថុនា 2023 ប្រហែលជិតពីរម៉ោងបន្ទាប់ពីបានចាកចេញពីកប៉ាល់មេ Polar Prince ដើម្បីចុះទៅមើលសាកសពកប៉ាល់ Titanic។ កាលពីថ្ងៃទី 22 មិថុនា ក្រុមល្បាតសមុទ្រអាម៉េរិកអះអាងថា នាវា Titan បានបែកបាក់ខ្ទេចខ្ទីនៅបាតសមុទ្រ បណ្ដាលឱ្យមនុស្ស 5 នាក់បាត់បង់ជីវិត។ បំណែករបស់ Titan ត្រូវបានរកឃើញនៅតំបន់ដែលមានចម្ងាយពីក្បាលសាកសពកប៉ាល់ Titanic ប្រហែល 488 ម៉ែត្រ។

មន្ត្រីអាម៉េរិកយល់ថា Titan ត្រូវបានកម្ទេចដោយសម្ពាធទឹកក្នុងជម្រៅជិត 4,000 ម៉ែត្រ ធ្វើឱ្យជនរងគ្រោះហាក់ត្រូវស្លាប់ភ្លាមៗ ប៉ុន្តែមិនទាន់ដឹងច្បាស់ថា គ្រោះថ្នាក់នេះកើតឡើងដោយសារបញ្ហាបច្ចេកទេសក្នុងនាវា ឬដោយសារមនុស្សធ្វើឱ្យមានកំហុស៕

June 29, 2023

U-22 កម្ពុជាកំពុងមានប្រៀបនៅមុនការប្រកួតទីពីរដែលត្រូវបះហ្វ៊ីលីពីននៅស៊ីហ្គេម

ក្រុមកីឡាករបាល់ទាត់បុរសអាយុក្រោម 22 ឆ្នាំ (U-22) របស់កម្ពុជា កំពុងតែមានប្រៀបច្រើនលើហ្វ៊ីលីពីន ដែលអាចនាំទៅរកជ័យជម្នះទីពីរនៅស៊ីហ្គេមលើកទី 32 ដែលការប្រកួតនឹងធ្វើឡើងនៅវេលាម៉ោង 19 ថ្ងៃទី 02 ខែឧសភា ឆ្នាំ 2023។

U-22 កម្ពុជាកំពុងមានប្រភពជំរុញកម្លាំងដ៏ធំសម្រាប់ការប្រកួតជើងទីពីររបស់ខ្លួននៅពូល A។ U-22 កម្ពុជាទើបតែបានឈ្នះទីម័រខាងកើត 4-0។ យុទ្ធសាស្ត្រប្រកួតរបស់ «ឆ្មាំអង្គរ» ក៏កាន់តែល្អដែលគេមើលឃើញកាន់តែច្បាស់ឡើងៗ។ បច្ចុប្បន្ន នៅលើតារាងចំណាត់ថ្នាក់ កម្ពុជាក៏កំពុងតែនាំមុខគេជាបណ្ដោះអាសន្នដោយមានបីពិន្ទុ ខណៈដែលគ្រាប់បាល់ចំណេញធំជាង U-22 ឥណ្ឌូណេស៊ីទៅទៀតនៅក្នុងពូល។

ទន្ទឹមនឹងនេះ ការទាត់លើទឹកដីរបស់ខ្លួន បូករួមនឹងការផ្ដល់កម្លាំងចិត្តពីអ្នកគាំទ្រកម្ពុជា គេជឿថា U-22 កម្ពុជា នឹងដណ្ដើមបានជ័យជម្នះលើកទីពីរនៅថ្ងៃទី 02 ឧសភា 2023 វេលាម៉ោង 19 ហើយអាចបង្កើនកម្លាំងសម្រាប់ការដណ្ដើមសំបុត្រឡើងទៅកាន់វគ្គពាក់ផ្ដាច់ព្រ័ត្រ។

ដោយឡែក ក្រុម U-22 ហ្វ៊ីលីពីនវិញ បច្ចុប្បន្នកំពុងកាន់កាប់លទ្ធផលមិនល្អ។ ពួកគេទើបតែបានចាញ់ U-22 ឥណ្ឌូណេស៊ីនៅក្នុងការប្រកួតបើកឆាក។ ទន្ទឹមនឹងនេះ នៅក្នុងព្រឹត្តិការណ៍ស៊ីហ្គេមនៅកម្ពុជា ហ្វ៊ីលីពីនក៏មិនមានក្រុមកីឡាករល្អបំផុតនោះដែរ។ ទោះជាយ៉ាងណាក៏ដោយ នៅក្នុងការប្រកួតបើកឆាករបស់ខ្លួន U-22 ហ្វ៊ីលីពីនក៏បានធ្វើឱ្យ U-22 ឥណ្ឌូណេស៊ី «បែកញើស» មិនតិចឡើយ ដោយសារខ្សែការពារដ៏រឹងមាំ៕

May 1, 2023

ឆ្មា3Dយក្ស ផុសឡើង កណ្ដាលផ្លូវបំបែកឈីនជូគុ ដូចឆ្មាមែនទែនបំផុត រាយមន្តស្នេហ៍ដាក់អ្នកស្រឡាញ់សត្វ

កាលពីថ្ងៃទី7 កក្កដា CNN និង sora news24 បានរាយការណ៍ថា អ្នកទីក្រុងតូក្យូ បាននាំគ្នាភ្ញាក់ផ្អើលនឹងរូបភាពសត្វឆ្មា3D ដ៏ធំមួយ ដែលបង្ហាញខ្លួនឡើងនៅក្នុងផ្ទាំងផ្សាយពាណិជ្ជកម្ម នៃអេក្រង់ LED កណ្ដាលផ្លូវបំបែកជា4 ឈិនជូគុ មជ្ឈមណ្ឌលសបភីង កណ្ដាលទីក្រុងតូក្យូ នៃប្រទេសជប៉ុន ទាក់ទាញចំណាប់អារម្មណ៍ ពីមនុស្សម្នាដែលធ្វើដំណើរទៅមក និងក្នុងពិភពអនឡាញ តាំងពីមិនទាន់ដល់ថ្ងៃបើកបង្ហាញខ្លួនជាផ្លូវការទៅទៀត។

Cross Shinjuku Vision អ្នកផលិតរូបភាពសត្វឆ្មាយក្ស ធ្វើជាតារាណែនាំផលិតផលនេះ គឺដើម្បីប្រូម៉ូតពីទីតាំងដាក់ឱ្យជួលផ្ទាំងផ្សាយពាណិជ្ជកម្ម ដែលជាអេក្រង់ LED ដែលមានភាពកោង ទំហំ 154ម៉ែត្រការ៉េ ប្រដាប់បំពងសំឡេងគុណភាពខ្ពស់ រូបភាពច្បាស់កម្រិត 4K ដែលផ្ដល់រូបភាពច្បាស់ដូចរបស់ពិត បង្ហាញពីរូបភាពសត្វឆ្មា ដើរលេងទៅមក នៅពីលើទីក្រុងតូក្យូ និងស្រែកយំម៉េវ។

រូបភាពសត្វឆ្មា សម្លឹងមើលចុះមកខាងក្រោម ហាក់ដូចជាវា ប្រុងលោតចុះមកគ្រប់ពេលវេលា ជារូបភាពវីដេអូ3D ដែលទាំងគួរឱ្យស្រឡាញ់ និងគួរឱ្យខ្លាចប៉ុនៗគ្នា ជាពិសេស នៅពេលដែលសត្វឆ្មាដ៏ប៉ឹនឆ្ងល់នោះ សម្លឹងចំមុខយើង។

វីដេអូ នឹងចាប់បញ្ចាំងចន្លោះពីម៉ោង 7.00នាទី ដល់ម៉ោង 1.00នាទី ដោយបង្ហាញរូបភាពសត្វឆ្មា បញ្ចេញកាយវិការក្នុងឥរិយាបថផ្សេងៗពេញ 1ថ្ងៃ ចាប់ផ្ដើមតាំងពីពេលភ្ញាក់ពីដេក ដោយនៅពេលព្រឹក និងពេលរសៀល សត្វឆ្មាក្រោកឈរឡើង និងបញ្ចេញសំឡេងម៉េវៗទៅកាន់មនុស្សម្នាដែលដើរទៅដើរមក លុះដល់ពេលព្រលប់ សត្វឆ្មានឹងទម្លាក់ខ្លួនដេកវិញ ក្នុងឥរិយាបថយកក្បាលកើយបាតជើង។

ទោះជាការឃោសនាផ្សាយពាណិជ្ជកម្មសត្វឆ្មាយក្សនេះ មិនទាន់បង្ហាញខ្លួនជាផ្លូវការ រហូតទាល់តែដល់ថ្ងៃទី12 កក្កដាខាងមុខក្ដី តែមានការសាកល្បងផ្សព្វផ្សាយតាមរលកធាតុអាកាសតាំងពីខែកន្លងមករួចទៅហើយ ធ្វើឱ្យសត្វឆ្មាឈិនជូគុ រាយមន្តស្នេហ៍ រហូតល្បីល្បាញនៅក្នុងបណ្ដាញសង្គមអនឡាញ រហូតដល់អ្នកលេងបណ្ដាញសង្គមជាច្រើន នាំគ្នាបញ្ចេញយោបល់ថា គួរឱ្យស្រឡាញ់ និងកំពុងភ្ញាក់ផ្អើលរំភើបញាប់ញ័រចំពោះតិចណូឡូជីថ្មីមួយនេះ៕

July 9, 2021

ស្ត្រីមានគភ៌ ត្រូវប្រយ័ត្ន…គ្រោះថ្នាក់ បែបនឹកស្មានមិនដល់!!

រឿងដែលនឹកស្មានមិនដល់ តែងតែកើតឡើងគ្រប់ពេលវេលា…ដូច្នេះស្ត្រីមានគភ៌ គួរតែមានការប្រុងប្រយ័ត្នជាប់ជានិច្ច ព្រោះធ្លាប់បានឃើញឧទាហរណ៍ជាច្រើនរួចមកហើយ ដូចជា មានមិត្តភក្តិជិតដិតម្នាក់ នាងមានផ្ទៃពោះ 5ខែទៅហើយ តែក៏នៅតែចូលចិត្តធ្វើការងារប្រចាំថ្ងៃ ដូចមនុស្សទូទៅធម្មតាអ៊ីចឹង រហូតមកដល់ថ្ងៃមួយ ទើបដឹងថា…រឿងដែលនឹកស្មានមិនដល់ និងធ្លាប់តែធ្វើជាប្រចាំនោះ បានហុចផលមិនល្អដល់ខ្លួន ហើយថែមទាំងមានផលអាក្រក់ទៅដល់កូននៅក្នុងផ្ទៃទៀតផង រឿងទាំងនោះគឺ៖

គ្រាន់តែការទំពាអាហារសោះ…

ដឹងទេថា រឿងដ៏តូចតាចមួយនេះ បើស្ត្រីមានគភ៌យើងមើលរំលង រឿងនេះអាចនាំមកនូវផលអាក្រក់ជាច្រើនដល់ខ្លួនអ្នកម្តាយ និងកូនតូចបាន។ ស្ត្រីមានគភ៌ ដែលទទួលទានអាហារបែបប្រញាប់ៗ ទំពាអាហារតែមួយភ្លែត ហើយលេបនោះ ផលអាក្រក់ដែលតាមមកគឺ អាហារដែលយើងលេបចូលទៅក្នុងក្រពះនោះ នឹងមិនរំលាយ ធ្វើឱ្យមានអាការណែនឆ្អល់ក្នុងពោះ អាចបណ្តាលឱ្យការទទួលទានអាហារលើកក្រោយថយចុះ កូនតូចនៅក្នុងផ្ទៃក៏ទទួលរងផលប៉ះពាល់នេះតាមដែរ។ ដូច្នេះក្នុងការទទួលទានអាហារ ទោះជាពេលណាក៏ដោយ សូមស្ត្រីមានគភ៌យើង នឹកក្នុងចិត្តជាប់ជានិច្ចថា ត្រូវទទួលទានឱ្យបានទៀងទាត់ពេលវេលា ហើយត្រូវទំពាអាហារឱ្យបានល្អិត ព្រោះនេះ គឺជារឿងល្អមួយ ដើម្បីឱ្យកូនតូចរបស់អ្នក បានទទួលសារធាតុអាហារបានពេញលេញតាមនោះដែរ។

រហ័សទាន់ចិត្ត ភ្លែតៗ ដល់ណាដល់ហ្នឹងដែរ…

ស្ត្រីមានគភ៌ខ្លះ ច្រើនតែភ្លេចថា ខ្លួនឯងកំពុងពពោះ ធ្វើឱ្យការដើរ ក្រោក អង្គុយ រត់ រួមទាំងការធ្វើចលនាផ្សេងៗ ប្រព្រឹត្តទៅតាមធម្មតា។ ចំពោះរឿងនេះ សូមជម្រាបថា បើស្ត្រីដែលមានអាយុគភ៌នៅតិច អាចគ្មានគ្រោះថ្នាក់អ្វីធ្ងន់ធ្ងរទេ តែបើជាស្ត្រីដែលអាយុគភ៌ ស្ថិតក្នុងអំឡុងខែចុងក្រោយៗ ហើយមានការធ្វើចលនា ដូចជា ក្រោក ដើរ រត់ បែបរហ័សៗនោះ ប្រាកដណាស់ ពិតជាមានផលប៉ះពាល់ដល់កូនតូច ដែលនៅក្នុងផ្ទៃមិនខាន។ អាចដល់ថ្នាក់ មានកាបុកប៉ះនឹងសាច់ជញ្ជាំងស្បូនក្នុងពោះ ទៅជំរុញឱ្យស្បូនបង្រួញខ្លួន ធ្វើឱ្យអ្នកម្តាយមានអារម្មណ៍ឈឺពោះ និងបើសិនជាស្បូនកើតការបង្រួញខ្លួនខ្លាំងៗផងនោះ កូនអាចនឹងប្រសូតចេញមក មុនពេលកំណត់បាន។ ដូច្នេះស្ត្រីមានគភ៌ ត្រូវធ្វើចលនាឱ្យយឺតៗ ដើម្បីឱ្យកូនតូចក្នុងផ្ទៃមានសុវត្ថិភាព មិនដូច្នោះទេ បេះដូងនឹងធ្វើការខ្លាំង អុកស៊ីហ្ស៊ែន ដែលត្រូវបញ្ជូនទៅកូនតូច នឹងត្រូវថយចុះ តែផលអាក្រក់ ដែលខ្លាំងជាងហ្នឹងទៅទៀតនោះគឺ កូនតូចនៅក្នុងគភ៌អាចនឹងមិនសូវរឺងមាំ និងធំធាត់យឺត។

សត្វចិញ្ចឹមគួរឱ្យស្រឡាញ់…

ជាពិសេសឆ្កែ និងឆ្មា ស្ត្រីមានគភ៌ខ្លះ កើតរោគប្រតិកម្មចាញ់ជាមួយរោមសត្វ ល្អងធូលី កេសរផ្កា តែក៏នៅតែចូលចិត្តចិញ្ចឹមសត្វ នៅក្នុងផ្ទះ និងចូលចិត្តលេងជាមួយពួកវា ដោយមិនបានគិតដល់សត្វចៃ ដែលនឹងនាំមេរោគចូលមករកទាំងខ្លួនឯង និងកូនក្នុងផ្ទៃ ដោយមិនបានដឹងខ្លួនឡើយ។ ដូច្នេះស្ត្រីមានគភ៌ គួរមើលថែទាំ សម្អាតសត្វចិញ្ចឹម ដែលក្នុងផ្ទះឱ្យបានកាន់តែខ្លាំងឡើង ដើម្បីសុខភាព និងអនាម័យដ៏ល្អរបស់អ្នក និងកូនក្នុងផ្ទៃ។

ធ្មេញពុក…

ស្ត្រីមានគភ៌មួយចំនួន អាចគិតថាជារឿងតូចតាច រហូតបណ្តោយឱ្យកើតអាការអញ្ចាញធ្មេញឡើងហើម មានខ្ទុះ ឬមិនព្រមព្យាបាល ព្រោះគិតថា អនាម័យ និងភាពស្អាតក្នុងប្រអប់មាត់ មិនចាំបាច់យកចិត្តទុកដាក់ខ្លាំងពេកទេ រហូតធ្វើឱ្យកើតមានមេរោគបាក់តេរី កើនឡើងច្រើន រាលដាលទៅដល់ឫសធ្មេញ ធ្វើឱ្យអញ្ចាញក្លាយជាដំបៅឡើងខ្ទុះជាដើម។ ពេលនោះ រឿងតូចតាច ក៏ក្លាយជារឿងធំឡើង ផលប៉ះពាល់ដែលតាមមក គឺមេរោគឆ្លងចូលទៅក្នុងក្រសែឈាម ហើយឆ្ពោះទៅរកកូនតូច រហូតដល់ថ្នាក់អាចធ្វើឱ្យបាត់បង់ជីវិតបានទៀតផង។ ដូច្នេះស្ត្រីមានគភ៌ ត្រូវតែថែរក្សាអនាម័យ និងភាពស្អាតក្នុងប្រអប់មាត់ឱ្យបានល្អជាប់ជានិច្ច ព្រោះនេះ គឺជារឿងតូចតាច ដែលអាចធ្វើឱ្យកើតទៅជារឿងធំបាន។

យួរ ឬលើករបស់ធ្ងន់…

ស្ត្រីមានគភ៌ ត្រូវប្រុងប្រយ័ត្នជាប់ជានិច្ចថា ខ្លួនអ្នកកំពុងតែមានផ្ទៃពោះ!! ចូរកុំលើករបស់ធ្ងន់ៗជាដាច់ខាត តែមានពេលខ្លះ ស្ត្រីមួយចំនួនអាចភ្លេចខ្លួនពេលទៅដើរទិញឥវ៉ាន់ ដែលត្រូវយួររបស់របរឡើងជ្រែកដៃ ពេលនោះសាច់ដុំខ្នង សាច់ដុំជើង និងសន្លាក់ផ្សេងៗ ត្រូវធ្វើការធ្ងន់ទាំងអស់ រហូតជំរុញឱ្យកើតរោគផ្សេងៗឡើង ដូចជាសម្ពាធលោហិតឡើងខ្ពស់ ដោយសារតែបេះដូងខំធ្វើការខ្លាំងពេក ឈឺខ្នង ឈឺស្មា និងសន្លាក់ជាដើម។

បើកសំឡេងបទភ្លេងឮខ្លាំងៗពេក…

ក្នុងចំណុចនេះចង់បានន័យថា ស្ត្រីមានគភ៌រូបណា ដែលចូលចិត្តបើកបទចម្រៀង ឮៗខ្លាំងជាងប្រក្រតី ព្រោះតែយល់ច្រឡំថា កូនតូចនៅក្នុងផ្ទៃ នឹងបានឮច្បាស់នោះ ការពិតទៅ នេះជាគ្រោះថ្នាក់សម្រាប់កូនតូចទៅវិញទេ ព្រោះជាការរុកកួនរំខានកូនតូចនៅក្នុងផ្ទៃដោយផ្ទាល់តែម្តង ដោយសារតែសរសៃប្រសាទត្រចៀករបស់កូន មិនទាន់វិវឌ្ឍបានពេញទំហឹងនៅឡើយទេ។ អាចធ្វើឱ្យកូនតូច កើតក្តីធុញថប់មួម៉ៅ មានផលប៉ះពាល់ធ្វើឱ្យការវិវឌ្ឍរបស់កូនថមថយចុះបាន។ ការបើកបទចម្រៀង ដើម្បីជួយជំរុញវិវឌ្ឍនាការរបស់កូនតូចនៅក្នុងផ្ទៃនោះ គ្រាន់តែចាក់បទភ្លេង ដែលមានចង្វាក់ស្រាលៗ ពីរោះៗ ដូចជាបទភ្លេងក្លាស៊ីក ឬក៏បទចម្រៀងធម្មតាទូទៅណា ដែលមានចង្វាក់ និងទំនុកភ្លេងងាយស្រួលស្តាប់ មានទំនុកច្រៀង និងអត្ថន័យល្អៗ តែប៉ុណ្ណឹងក៏គ្រប់គ្រាន់ណាស់ទៅហើយ៕

June 17, 2021

ចង់ឱ្យកូនចេញមកស្បែកស្អាត សុខភាពល្អ ស្រ្តីមានគភ៌ត្រូវញ៉ាំអាហារ 6យ៉ាងនេះ ធានាថាមិនខុសបំណង!…

ការមើលថែទាំសុខភាពរបស់ស្រ្តីមានគភ៌ ចម្បងៗក៏គឺ ការយកចិត្តទុកដាក់លើការជ្រើសរើសញ៉ាំអាហារដែលមានប្រយោជន៍ដល់រាងកាយ ព្រោះអាហារដែលល្អពិតជាជួយចិញ្ចឹម និងបំប៉នសុខភាពទារកក្នុងគភ៌ទៅដំណាលគ្នានឹងសុខភាពរបស់ម្ដាយដែរ។ តែបើស្រ្តីមានគភ៌ចង់ឱ្យកូនមានស្បែកសស្អាត សាច់ឈាមស្រស់ថ្លាមានសុខភាពល្អវិញនោះ តើត្រូវញ៉ាំអាហារអ្វីខ្លះទៅ?។ ថ្ងៃនេះ យើងមានអាហារដែលស្រ្តីមានគភ៌ញ៉ាំទៅហើយ កូនតូចនឹងមានស្បែកសស្អាតមកជម្រាបជូន…តើមានអ្វីខ្លះនោះ យើងនាំគ្នាតាមដានដូចតទៅ ៖

1-ដូងខ្ចី

ផ្លែដូងខ្ចី ជាផ្លែឈើដែលសម្បូរទៅដោយសារធាតុអាហារដែលមានប្រយោជន៍ជាច្រើន មិនថាតែកាល់ស្យូម ជាតិដែក ប៉ូតាស្យូម វីតាមីនB អាស៊ីតអាមីណូ និងថែមទាំងប្រកបទៅដោយអ័រម៉ូនអេស្រ្តូជេនខ្ពស់ ដែលជួយជំរុញការសាងខូឡាជេន និងអ៊ីឡាស្ទិកនៅលើស្បែក ជួយឱ្យស្បែកស្អាតភ្លឺថ្លា ទន់ម៉ដ្ឋខៃ និងថែមទាំងជួយបណ្ដេញវត្ថុអាក្រក់ផ្សេងៗចេញពីរាងកាយ បង្កើនប្រព័ន្ធប្រឆាំងជំងឺ កាត់បន្ថយអាការរាករូស និងជួយសម្រាលអាការអាស៊ីតហូរបញ្រ្ចាសសម្រាប់ស្រ្តីជាម្ដាយទៀតផង ដែលយើងអាចហៅបានថា ញ៉ាំចូលទៅហើយ នឹងល្អទាំងម្ដាយ រហូតដល់ទារកក្នុងគភ៌យ៉ាងពិតប្រាកដ។

2-ផ្លែឈើរសជាតិជូរ ឬផ្លែប៊ើរីផ្សេងៗ

ដែលនឹងយកមកញ៉ាំជាទឹកផ្លែឈើស្រស់ៗក៏បានដូចគ្នា មិនថាតែក្រូចឆ្មារ ក្រូចពោធិ៍សាត់ ស្រ្តប៊ើរី ប្លូ៊ប៊ើរី រ៉ាស់ប៊ើរី ម្នាស់ ឬទំពាំងបាយជូរ។ល។ ផ្លែឈើរសជាតិជូរទាំងអស់នោះមានវីតាមីនខ្ពស់ណាស់ និងនៅមានអាស៊ីតAHA ដែលចូលទៅថែបំប៉នស្បែកដោយផ្ទាល់ ជាសារធាតុប្រឆាំងរ៉ាឌីកាល់សេរី ជំរុញការសាងខូឡាជេន ជួយបំប៉នស្បែកឱ្យសថ្លាសុខភាពល្អ ជួយឱ្យកោសិកាស្បែករឹងប៉ឹង ពណ៌ស្បែកស្មើមិនមានស្នាមអុចខ្មៅ និងអាចជួយសាងក្រោះការពារដែលរឹងមាំឱ្យស្បែកអាចតតាំងនឹងសភាវមិនល្អបានទាំងអ្នកម្ដាយ និងកូនក្នុងផ្ទៃ។

3-សាច់ត្រី

នៅក្នុងសាច់ត្រីមានជាតិប្រូតេអ៊ីនខ្ពស់ដែលងាយរំលាយ និងបឺតជ្រាបបានងាយ។ ជួយឱ្យគ្រោងសាងសាច់ស្បែកមានភាពរឹងមាំ និងថែមទាំងមានអាស៊ីតខ្លាញ់អូមេហ្កា3 និងអូមេហ្កា6 ដែលជួយឱ្យស្បែកមើលទៅមានសំណើម និងសុខភាពល្អ និងមានបរិមាណជាតិខ្លាញ់ដែលល្មមសមរម្យជាក្រោះការពារសភាវមិនល្អផ្សេងៗបាន និងថែមទាំងជួយបំប៉នខួរក្បាលទាំងរបស់អ្នកម្ដាយ និងទារកក្នុងគភ៌ទៀតផង។

4-សណ្ដែកលឿង និងផលិតផលធ្វើពីសណ្ដែកលឿងផ្សេងៗ

ដូចជា ទឹកតៅហ៊ូ តៅហ៊ូដុំប្រភេទផ្សេងៗ ទឹកសណ្ដែកលឿង-ល- ព្រោះនៅក្នុងសណ្ដែកលឿងសម្បូរទៅដោយអៃសូហ្វ្លាវ៉ូន និងនៅមានអាស៊ីតអាមីណូដែលជួយតតាំងសភាវមិនល្អផ្សេងៗ ធ្វើឱ្យស្បែករឹងប៉ឹង ស្អាតភ្លឺថ្លា ហើយសណ្ដែកលឿងថែមទាំងជួយជំរុញវិវឌ្ឍនាការរបស់កូនក្នុងគភ៌បានទៀតផង។

5-ធញ្ញជាតិប្រភេទផ្សេងៗ រួមទាំងស៊ុតមាន់ផង

ទាំងប្រូតេអ៊ីនដែលមាននៅក្នុងធញ្ញជាតិ និងក្នុងស៊ុតមាន់ នឹងរួមកម្លាំងជាមួយខេរ៉ាទីន ជួយក្នុងការការពារស្បែកពីសភាវមិនល្អផ្សេងៗ ភ្ជាប់កោសិកាស្បែក ជួសជុលសាច់ភ្នាស ប្រឆាំងនឹងមេរោគបាក់តេរី ធ្វើឱ្យស្បែករឹងមាំ អាចទប់ទល់នឹងសភាវអាកាសធាតុក្ដៅសើមរបស់ប្រទេសយើងបាន។

6-មើមរមៀត

ឱសថបុរាណតុបតែងពណ៌ និងក្លិនអាហារប្រភេទនេះ យើងទាំងអស់គ្នាដឹងច្បាស់ថា មើមរមៀតមានគុណសម្បត្តិធ្វើឱ្យស្បែករឹងមាំ ព្រោះមានសារធាតុប្រឆាំងរ៉ាឌីកាល់សេរីខ្ពស់ ទើបអាចជួយការពារស្បែកពីពន្លឺថ្ងៃ ធ្វើឱ្យស្បែកម៉ដ្ឋស្អាត ពណ៌ស្បែកស្មើ និងថែមទាំងជួយឱ្យស្រ្តីមានគភ៌កើតអាការចាញ់កូនតិចតួច និងក្រៅពីនេះនៅជួយបញ្ចេញទឹកដោះបានច្រើនក្រោយពេលឆ្លងទន្លេរួច និងថែទាំសុខភាពរាងកាយទាំងម្ដាយ និងកូនតូចឱ្យរឹងមាំទៀតផង។

អាហារស្បែកស្អាតប្រភេទនីមួយៗដែលបានរៀបរាប់មក សុទ្ធតែមិនពិបាករកឡើយនៅក្នុងប្រទេសយើង។ ពិតហើយថា អាហារទាំងនេះមិនអាចផ្លាស់ប្ដូរពូជអម្បូរបានមែន តែអ្វីដែលអាហារទាំងនោះអាចជួយបានពិតប្រាកដនោះគឺ វាជួយឱ្យសាច់ស្បែករឹងមាំ មិនងាយរងប្រតិកម្មចាញ់ អាចបង្កើនភាពតតាំងប្រឆាំងនឹងសភាវមិនល្អផ្សេងៗ និងថែទាំសុខភាពរាងកាយឱ្យរឹងប៉ឹងជាមួយគ្នាទាំងម្ដាយ និងកូន៕

November 25, 2020

អាការបន្តិចឈឺនេះ បន្តិចឈឺនោះ គួរឱ្យធុញទ្រាន់ក្នុងអំឡុងពេលមានគភ៌

មានមិត្តភ័ក្តិរបស់នាងខ្ញុំ(អ្នកគ្រូ ឆវី)ម្នាក់តែងតែរអ៊ូឱ្យនាងខ្ញុំបានឮជាញឹកញាប់ថា គាត់ទើបតែចាប់ផ្តើមពពោះទេ តែហេតុអីបានជាចេះតែឈឺក្បាល ឈឺខ្នង ឈឺស្មា ឆ្អល់ពោះ អាហារមិនសូវរំលាយ លនិងល មិនឈប់ឈរសោះដូច្នេះ?។ ពេលបានឮហើយ ធ្វើឱ្យនឹកអាណឹតអ្នកមានផ្ទៃពោះមែនទែន ព្រោះទម្រាំតែឆ្លងផុតរយៈពេល 9ខែនៃការពពោះជាទីស្រឡាញ់មួយនេះបាន អ្នកម្តាយគ្រប់រូបសុទ្ធតែត្រូវឆ្លងកាត់ឧបសគ្គដែលធ្វើឱ្យមានកង្វល់ និងរៀនយល់ដឹងពីវិធីបន្ធូរបន្ថយ និងសម្រាលអាការដែលកើតឡើងនេះឱ្យបានសឹងតែគ្រប់គ្នាទាំងអស់ ដូច្នេះមិនមែនត្រឹមតែជាការមើលថែទាំរាងកាយ និងសុខភាពឱ្យរឹងមាំប៉ុណ្ណោះទេ តែត្រូវមើលថែទាំផ្លូវចិត្តឱ្យរឹងប៉ឹងផងដែរ។

លេខនេះ ទស្សនាវដ្តី ឡារ៉ែន នឹងជម្រាបស្ត្រីមានគភ៌ទាំងឡាយអំពីវិធីបន្ធូរបន្ថយ និងសម្រាលអាការដែលធ្វើឱ្យមានកង្វល់ និងរំខានចិត្តដែលកើតឡើងក្នុងអំឡុងពេលមានគភ៌នេះ ដើម្បីឱ្យទាំងអស់គ្នាបានសប្បាយចិត្តក្នុងការពពោះរយ:ពេល 40សប្តាហ៍ចាប់ពីពេលនេះទៅ ។

អាការរំខានចិត្តរបស់ស្ត្រីមានផ្ទៃពោះ៖

.អាការក្អួតចង្អោរ : អាចកើតឡើងដោយសារតែកម្រិតអ័រម៉ូនផ្សេងៗដែលកើនឡើងខ្ពស់ក្នុងអំឡុងពេលមានគភ៌ ដូចជា អ័រម៉ូន hCG, និងអ័រម៉ូន អេសត្រូជេន ជាដើម ដោយអ័រម៉ូនទាំងនេះមានផលប៉ះពាល់ដល់ប្រព័ន្ធប្រសាទការដឹងក្លឹន ធ្វើឱ្យស្រ្តីមានគភ៌ធំក្លិនអ្វីក៏មិនបាន ច្រើនតែមានអាការក្អួតចង្អោរ វឹលមុខក្នុងអំឡុងពេលពពោះដំបូងៗ។

ការមើលថែទាំខ្លួនឯង : ស្រ្តីមានគភ៌គួរចៀសវាងពីអ្វីដែលជំរុញដល់ប្រព័ន្ធប្រសាទការដឹងក្លិន ដូចជាក្លិនអាហារ ជាដើម ។ អ្នកជំនាញការខាងភោជនាហារបានរកឃើញថា ក្លិនរបស់ក្រូចឆ្មារ អាចជួយបន្ធូរបន្ថយអាការក្អួតចង្អោរនេះបានយ៉ាងឆាប់រហ័ស ដូច្នេះបើស្រ្តីមានគភ៌កើតអាការក្អួតចង្អោរនោះ មិនគួរទទួលទានថ្នាំផ្តេសផ្តាស់ដោយគ្មានការអនុញ្ញាតពីគ្រូពេទ្យឡើយ ។

.អាការថប់ៗដង្ហើម ដកដង្ហើមមិនស្រួល និងវិលមុខ : ស្រ្តីមានគភ៌តែងមានចង្វាក់នៃការដកដង្ហើមលឿន ហើយវែង ខណៈពេលជាមួយគ្នា ស្បូនដែលពង្រីកខ្លួនតាមការរីកចម្រើនធំធាត់របស់ទារកក៏នឹងខឹតចូលទៅបៀតសួត និងក្បាំងខ្យល់របស់អ្នកមានផ្ទៃពោះ ធ្វើឱ្យទីកន្លែងដែលទទួលផ្ទុកខ្យល់អុកស៊ីហ្ស៊ែននៅសល់តិច ធ្វើឱ្យពេលខ្លះអ្នកមានគភ៌មានអារម្មណ៍ថា ដកដង្ហើមមិនស្រួលបាន។

ការមើលថែទាំខ្លួនឯង : នៅពេលមានអារម្មណ៍ថា ដកដង្ហើមមិនស្រួល ចូរអង្គុយសម្រាក ហើយដកដង្ហើមចេញចូលយឺតៗ មួយៗ។ បើមានអារម្មណ៍ថា រកកល់ងងឹតមុខ ហាក់ដូចជាចង់ខ្យល់គ ចូរអង្គុយចុះ ហើយឱនក្បាលចុះនៅត្រង់ចន្លោះក្បាលជង្គង់ទាំងសងខាង ដើម្បីជួយឱ្យឈាមហូរឡើងមកចិញ្ចឹមខួរក្បាលឱ្យបានកាន់តែលឿនឡើង នឹងធ្វើឱ្យស្រ្តីមានគភ៌មានអារម្មណ៍ស្រួលឡើងវិញ។ អាការនេះកើតឡើងដោយសារតែកម្រិតជាតិស្ករនៅក្នុងឈាមថយចុះ ដូច្នេះពេលមានផ្ទៃពោះចូរឧស្សាហ៍ទទួលទានអាហារបង្អែម ចម្អាបឱ្យបានញឹកញាប់ ដើម្បីរក្សាកម្រិតជាតិស្ករនៅក្នុងឈាម។

.អាការតឹងឆ្អល់ក្នុងពោះ : អ័រម៉ូនដែលរាងកាយបញ្ចេញមកក្នុងអំឡុងពេលមានគភ៌ ហុចផលឱ្យសាច់ដុំបន្ទះបង្រួញខ្លួន ធ្វើឱ្យប្រព័ន្ធរំលាយអាហារធ្វើការយឺត ជាហេតុធ្វើឱ្យស្រ្តីមានគភ៌ងាយនឹងកើតអាការឆ្អល់ណែនក្នុងពោះ រួមជាមួយមូលហេតុផ្សេងទៀតក្នុងការទទួលទានអាហារផងដែរ។

ការមើលថែទាំខ្លួនឯង : អ្នកមានផ្ទៃពោះគួរទទួលទានអាហារដែលមានកាកសរសៃឱ្យបានច្រើន ដូចជា បន្លែ និងផ្លែឈើស្រស់ រួមទាំងគ្រាប់ធញ្ញជាតិផងដែរ។ ពិសាទឹកឱ្យបានច្រើន ហើយបើសិនជាអាការណែនឆ្អល់ពោះនោះមានកម្រិតខ្លាំង ស្ត្រីមានគភ៌គួរតែទៅប្រឹក្សានឹងគ្រូពេទ្យដែលពិនិត្យគភ៌ ព្រោះគ្រូពេទ្យនឹងផ្តល់នូវពាក្យណែនាំបានយ៉ាងត្រឹមត្រូវអំពីអាការនេះ ។

.អាការប្រគ្រីវកាច់ជើង : អាចបណ្តាលមកពីការខ្វះជាតិកាល់ស្យូម និងបញ្ហានៃលំហូរវិលរបស់ឈាម។

ការមើលថែទាំខ្លួនឯង : ក្នុងខណ:កើតអាការប្រគ្រីវកាច់នោះ ចូរចាប់ក្តោបចុងជើងឱ្យជាប់ ហើយទាញវាមករកស្មងជើងឱ្យខ្លាំង ដើម្បីជួយយឹតសាច់ដុំបរិវេណកំភួនជើងឱ្យត្រង់ឡើងវិញ។ មិនគួរសណ្តូកជើង នៅពេលម្រាមជើងចង្អុលត្រង់ទៅខាងមុខឡើយ ព្រោះនឹងរឺតតែធ្វើឱ្យសាច់ដុំកំភួនជើងកើតអាការរឹងខ្លាំងឡើង និងកើតប្រគ្រីវកាច់កាន់តែខ្លាំងឡើងដែរ ហើយនៅពេលគេងពេលយប់អ្នកមានផ្ទៃពោះគួរតែពាក់ស្រោមជើង ដើម្បីឱ្យចុងជើងកក់ក្តៅ វាអាចជួយកាត់បន្ថយអាការប្រគ្រីវកាច់បាន។

.អាការឈឺខ្នង : ស្រ្តីភាគច្រើនតែងតែមានអាការឈឺខ្នងកើតឡើងក្នុងអំឡុងពេលតាំងគភ៌។ ទាំងអស់នេះ មានមួយចំណែកបណ្តាលមកពីទំហំរបស់គភ៌ដែលចេះតែរីកធំឡើង និងទម្ងន់ខ្លួនរបស់ទារកនៅក្នុងគភ៌ដែលទៅបង្កើនកម្លាំងសង្កត់លើឆ្អឹងកងខ្នង ហុចផលឱ្យរាងកាយមិនកើតមានតុល្យភាពខាងទម្ងន់។

ការមើលថែខ្លួនឯង : ដើម្បីឱ្យអ្នកមានផ្ទៃពោះមានអារម្មណ៍កាន់តែសប្បាយស្រួលខ្លួន រួចផុតពីការឈឺខ្នងនេះ ពេលអង្គុយ គួរតែមានខ្នើយមួយកល់នៅត្រង់ចង្កេះផ្នែកខាងក្រោម លើកជើងដាក់លើកូនកៅអីសំរាប់ទ្រជើង ជាដើម។ ពេលឈរ គួរដាក់ជើងម្ខាងនៅលើកូនកៅអីទាបៗមួយ និងឧស្សាហ៍ផ្លាស់ជើង ម្តងខាងឆ្វេង ម្តងខាងស្តាំផង វានឹងជួយឱ្យអាការឈឺខ្នងបានធូរស្រាលឡើង៕

November 12, 2020

COVID-19! សត្វឆ្មាដំបូងបង្អស់ក្នុងពិភពលោក ដែលបានឆ្លងវីរុសពីម្ចាស់

បែលហ្សិក៖ ឆ្មា1ក្បាលបានឆ្លងវីរុសCOVID-19 បន្ទាប់ពីម្ចាស់របស់វា បានត្រឡប់មកពីប្រទេសអ៊ីតាលី នាំឱ្យវាក្លាយឆ្មាដំបូងគេបង្អស់ក្នុងពិភពលោក ដែលបានឆ្លង COVID-19 ពីមនុស្ស។

នាយកដ្ឋានសុខាភិបាលសាធារណៈ សុវត្ថិភាពអាហារ និងបរិស្ថានរបស់ប្រទេសបែលហ្សិក កាលពីថ្ងៃទី27មីនា បានប្រកាសថា ឆ្មា1ក្បាលរបស់ប្រទេសនេះបានឆ្លងវីរុសCOVID-19។ មួយសប្ដាហ៍បន្ទាប់ពីម្ចាស់របស់វាបានត្រឡប់មកពីប្រទេសអ៊ីតាលី ហើយបានឆ្លងវីរុសCOVID-19 ឆ្មានៅក្នុងផ្ទះនេះក៏ចាប់ផ្ដើមមានរោគសញ្ញាទាក់ទិននឹងផ្លូវដង្ហើម ដូចជាអាការរាក និងក្អួតចង្អោរ។ នេះបើតាមការឱ្យដឹងពី Steven Van Gucht អ្នកនាំពាក្យរបស់រដ្ឋាភិបាលបែលហ្សិក។

ម្ចាស់របស់ឆ្មាខាងលើ បានយកសំណាកវត្ថុវិភាគរបស់ឆ្មានេះ ផ្ញើទៅកាន់មន្ទីរពិសោធន៍របស់វេជ្ជបណ្ឌិត Daniel Desmecht នៅឯសាកលវិទ្យាល័យ Liege។ លទ្ធផលនៃការធ្វើតេស្ត បានរកឃើញថា សត្វឆ្មានេះមានផ្ទុកវីរុសCOVID-19 យ៉ាងច្រើននៅក្នុងសំណាកវត្ថុវិភាគខាងលើ។ Van Gucht បានឱ្យដឹងថា សត្វឆ្មានេះ មានសុខភាពល្អវិញខ្លះហើយ បន្ទាប់ពីបានព្យាបាលរយៈពេល9ថ្ងៃ។

ឆ្មា និងមនុស្ស ហាក់ដូចជាមានចំណុចពិសេសរួមមួយ នៅលើផ្ទៃនៃកោសិកាប្រព័ន្ធដង្ហើម នោះគឺទីតាំងដែល COVID-19 ប្រើដើម្បីជ្រែកចូល។ ចំពោះមនុស្ស ក្រុមអ្នកវិទ្យាសាស្ត្ររកឃើញថា COVID-19 ភ្ជាប់ខ្លួនទៅនឹងប្រូតេអ៊ីនដែលមានឈ្មោះថា ACE2 ស្ថិតនៅខាងក្រៅកោសិកាផ្លូវដង្ហើម។ បន្ទាប់ពីបានជ្រែកចូល វីរុសនេះនឹងគ្រប់គ្រងយន្តការខាងក្នុងនៃកោសិកាដើម្បីបង្កើនចំនួនវីរុស(កើតកូនចៅដោយមិនបាច់មានញី-ឈ្មោល។ ប្រូតេអ៊ីន ACE2 របស់សត្វឆ្មា មានលក្ខណៈដូចច្រើនទៅនឹង ACE2 របស់មនុស្ស។ នេះបើតាមសម្ដីរបស់ Van Gucht។

កន្លងមកនេះ គេបានរកឃើញសត្វចិញ្ចឹមចំនួន2ក្បាលដែលបានឆ្លងវីរុសCOVID-19 ពីម្ចាស់របស់វាផងដែរ។ ករណីនេះគឺជាសត្វសុនក2ក្បាលនៅក្នុងទីក្រុងហុងកុង។

ក្រុមគ្រូពេទ្យខាងលើនិយាយថា មកដល់ពេលនេះ មិនទាន់មានរបាយការណ៍ណាមួយនិយាយអំពីសត្វចិញ្ចឹមចម្លងមេរោគដល់ម្ចាស់របស់វានោះទេ។ លោកបញ្ជាក់ថា ការឆ្លងមេរោគពីសត្វមកមនុស្ស មិនមែនជាវិធីចម្បងក្នុងការចម្លងមេរោគនោះទេ។ ដើម្បីស្វែងយល់ឱ្យបានច្បាស់ជាងនេះ គេត្រូវធ្វើការពិសោធន៍ស៊ីជម្រៅជាងនេះ បន្ទាប់ពីសត្វឆ្មាខាងលើបានឆ្លងផុតការដាក់ឱ្យនៅដោយឡែករយៈពេល14ថ្ងៃ៕

ប្រភព៖ Live Science

March 30, 2020

Tag: ឆ្មា