ខេត - La Reine Media

ដឹកផាវជាង 200 គីឡូក្រាមពីកម្ពុជាទៅលក់នៅវៀតណាម ត្រូវប៉ូលិសចាប់ខ្លួន

បុរសម្នាក់ដឹកផាវ 250 គីឡូក្រាមពីតំបន់ព្រំដែនកម្ពុជា ទៅកាន់ខេត្តវុងតាវ (Vung Tau – ខេត្តអូរកាប់ ឬខេត្តព្រះសួគ៌ា) ដើម្បីលក់យកចំណេញ ប៉ុន្តែក៏ត្រូវអាជ្ញាធរវៀតណាមនៅក្នុងខេត្តឡុងអាន (Long An – កំពង់គោ) ចាប់បាន។

នៅថ្ងៃទី 11 វិច្ឆិកា សារព័ត៌មានវៀតណាមបានចុះផ្សាយថា ប៉ូស្តិ៍ការពារព្រំដែននៅច្រក ម៉ី គ្វី តៃ (My Quy Tay), ស្រុក ឌិកហ្វែ (Duc Hue), ខេត្តឡុងអាន ទល់មុខនឹងឃុំសំរោង ស្រុកចន្ទ្រា ខេត្តស្វាយរៀង បានបញ្ជូនឈ្មោះ ង្វៀន យ្វី អាញ់ (Nguyen Duy Anh) អាយុ 34 ឆ្នាំ មានស្រុកកំណើតនៅខេត្តវុងតាវ រួមនឹងវត្ថុតាង ទៅកាន់អធិការដ្ឋាននគរបាលស្រុក ឌិកហ្វែ ខេត្តឡុងអាន ដើម្បីស៊ើបអង្កេតលើករណីដឹកជញ្ជូនផាវខុសច្បាប់។

មុននោះ កាលពីថ្ងៃទី 07 វិច្ឆិកា អាជ្ញាធរវៀតណាមនៅប៉ូស្តិ៍ការពារព្រំដែនឃុំ ម៉ី គ្វី តៃ បានរកឃើញថា ឈ្មោះ ង្វៀន យ្វី អាញ់ ដែលកំពុងបើកបររថយន្ត Ford Ranger លើដងផ្លូវក្នុងឃុំនេះ មានចំណុចគួរឱ្យសង្ស័យ ក៏ហៅឱ្យឈប់ដើម្បីត្រួតពិនិត្យ និងរកឃើញផាវដែលផលិតនៅបរទេសចំនួន 18 ប្រអប់ ទម្ងន់ 250 គីឡូក្រាម។

បន្ទាប់ពីបានសួរនាំ ជនសង្ស័យខាងលើក៏បានសារភាពថា ផាវទាំងនេះត្រូវបានទិញពីឈ្មួញនៅ កម្ពុជា។ ក្រោយមក យ្វី អាញ់ ក៏ដឹកផាវទាំងនេះចូលទឹកដីវៀតណាម ទៅតាមផ្លូវលុំដោយខុសច្បាប់ ដើម្បីយកទៅលក់យកចំណេញនៅឯខេត្តវុងតាវ តែក៏ត្រូវអាជ្ញាធរវៀតណាមចាប់ឃាត់ខ្លួន៕

November 11, 2023

វិស័យទេសចរណ៍កម្ពុជាងើបឡើងវិញ គ្រាដែលភ្ញៀវបរទេសវិលមកជាបណ្ដើរៗ

កម្ពុជារំពឹងខ្ពស់ទៅលើកំណើនទេសចរអន្តរជាតិនៅក្នុងរដូវបុណ្យនាចុងឆ្នាំនេះ និងបានត្រៀមខ្លួនរួចរាល់សម្រាប់ការធ្វើបដិសណ្ឋារកិច្ចចំពោះភ្ញៀវដែលមកទស្សនាតំបន់ទេសចរណ៍ល្បីៗ ពិសេសគឺអង្គរវត្ត។

លោក ហុង ប៉ូលីន ដែលមានបទពិសោធន៍ជាមគ្គុទេសក៍ទេសចរណ៍ជាងមួយទសវត្សរ៍ ហើយបច្ចុប្បន្នជាមគ្គុទេសក៍ទេសចរណ៍នៅតំបន់អង្គរ បានសម្ដែងការសប្បាយរីករាយនៅពេលឃើញទេសចរបរទេសជាច្រើនវិលត្រលប់មកវិញ។ យោងតាមមគ្គុទេសក៍ទេសចរណ៍រូបនេះ វិស័យទេសចរណ៍កម្ពុជាកំពុងតែបង្ហាញសញ្ញាវិជ្ជមានច្រើន បន្ទាប់ពីរងផលប៉ះពាល់ដោយសារកូវីដ-19។

លោក ប៉ូលីន និយាយថា «ក្រោយពីកូវីដ-19 ត្រូវបានគ្រប់គ្រង ទេសចរក៏ចាប់ផ្ដើមវិលត្រលប់មកកាន់អង្គរវត្តក្នុងចំនួនកើនឡើងពីមួយថ្ងៃទៅមួយថ្ងៃ។ ពិសេសគឺនៅខែតុលា និងខែវិច្ឆិកា ខ្ញុំឃើញថា ចំនួនភ្ញៀវបរទេសដែលវិលត្រលប់មកកម្ពុជា ពិតជាច្រើន»។

លោក ហុង ប៉ូលីន បច្ចុប្បន្នជាមគ្គុទេសក៍ទេសចរណ៍នៅតំបន់អង្គរ

លោក ស៊ិន ច័ន្ទសិរីវុត្ថា អនុរដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិលកម្ពុជា បានឱ្យដឹងថា ក្នុងសប្ដាហ៍កន្លង ចំនួនភ្ញៀវទេសចរណ៍អន្តរជាតិមកដល់ព្រលានយន្តហោះសៀមរាប បានកើនជាមធ្យមប្រហែល 2,700 នាក់/ថ្ងៃ។ ភាគច្រើនពួកគេមកពីបណ្ដាប្រទេសក្នុងតំបន់អាស៊ីអាគ្នេយ៍ (75%) និងអឺរ៉ុប (25%)។ តួលេខនេះបានបង្ហាញអំពីការងើបឡើងវិញយ៉ាងខ្លាំងក្លារបស់វិស័យទេសចរណ៍របស់កម្ពុជា។

ក្នុង 9 ខែដំបូងនៃឆ្នាំ 2023 កម្ពុជាទាក់ទាញទេសចរបរទេសបាន 3.92 លាននាក់ កើន 211% បើធៀបនឹងដំណាក់កាលដូចគ្នាក្នុងឆ្នាំ 2022។ ភ្ញៀវថៃឈរលំដាប់លេខមួយក្នុងចំណោមភ្ញៀវបរទេសដែលបានមកទស្សនាកម្ពុជា ខណៈដែលវៀតណាម និងចិនឈរលំដាប់លេខពីរ និងលេខបី។

អ្នកនាំពាក្យអាកាសចរណ៍ស៊ីវិលកម្ពុជា អះអាងថា ចាប់ពីចុងខែតុលាឆ្នាំ 2023 ដល់ខែមីនាឆ្នាំ 2024 ចំនួនជើងហោះហើរមកកាន់ព្រលានយន្តហោះសៀមរាបនឹងកើនឡើងដល់ 40 ជើងជារៀងរាល់សប្ដាហ៍ ខណៈចំនួនក្រុមហ៊ុនអាកាសចរណ៍នឹងកើនពី 9 ឡើងដល់ 10 ក្រុមហ៊ុន។ យោងតាមលោក ស៊ិន ច័ន្ទសិរីវុត្ថា វិស័យទេសចរណ៍កម្ពុជាបានត្រៀមខ្លួនរួចរាល់ និងបានធ្វើគ្រប់យ៉ាងដើម្បីត្រៀមសម្រាប់ការវិលត្រលប់របស់ភ្ញៀវអន្តរជាតិ។

កាលពីថ្ងៃទី 02 វិច្ឆិកា 2023 ក្រសួងទេសចរណ៍កម្ពុជា ក៏បានចេញសេចក្តីជូនដំណឹងស្តីពី «កម្ពុជាជាគោលដៅទេសចរណ៍ឈានមុខគេលើពិភពលោក ផ្នែកទេសចរណ៍វប្បធម៌ និងដំណើរកម្សាន្តរបស់យុវជន ឆ្នាំ 2023» បន្ទាប់ពីមានកម្មវិធីបោះឆ្នោតជ្រើសរើសតាមអ៊ីនធើរណិត ដោយក្រុមអ្នកជំនាញ និងសាធារណជនពីជុំវិញពិភពលោក ដែលរៀបចំដោយក្រុមហ៊ុន World Travel Awards នៅចក្រភពអង់គ្លេស។

នៅព្រឹកថ្ងៃទី 04 ខែវិច្ឆិកា ឆ្នាំ 2023 កម្ពុជាក៏បានទទួលភ្ញៀវបរទេសចូលមកកម្សាន្តនៅខេត្តព្រះសីហនុ តាមនាវាទេសចរណ៍មួយគ្រឿង ឈ្មោះ VIKING ORION របស់ប្រទេសន័រវែស ដែលដឹកមនុស្សសរុប 1,337 នាក់ ផងដែរ៕

November 7, 2023

កម្ពុជា គ្រោងនឹងទទួលបានទុនវិនិយោគថ្មី តម្លៃ 500 លានដុល្លារពីក្រុមហ៊ុនមួយរបស់ចិន

ទីតាំងនៃតំបន់សេដ្ឋកិច្ចពិសេសពីរកន្លែងនៅកម្ពុជា កំពុងត្រូវបានសិក្សាពីសំណាក់ក្រុមហ៊ុនធំមួយរបស់ចិន ដែលគ្រោងនឹងបណ្ដាក់ទុនវិនិយោគចំនួន 500 លានដុល្លារអាម៉េរិក។

កាលពីថ្ងៃទី 31 តុលា 2023 ក្នុងពេលចុះធ្វើទស្សនកិច្ចតំបន់សេដ្ឋកិច្ចពិសេសក្នុងខេត្តស្វាយរៀង ឯកឧត្ដម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទីមួយនៃក្រុមប្រឹក្សាអភិវឌ្ឍកម្ពុជា បានថ្លែងថា ក្រុមហ៊ុនចិនដ៏ធំមួយ កំពុងសិក្សាទីតាំងនៃតំបន់សេដ្ឋកិច្ចពិសេសចំនួនពីរកន្លែង សម្រាប់ការវិនិយោគ 500 លានដុល្លាររបស់ខ្លួន។

ឯកឧត្ដម ស៊ុន ចាន់ថុល ធ្លាប់បានឱ្យដឹងថា ក្នុងរយៈពេលទស្សនកិច្ចនៅក្នុងប្រទេសចិនចាប់ពីថ្ងៃទី 20 ដល់ថ្ងៃទី 24 តុលា ឯកឧត្តម បានជួបពិភាក្សាជាមួយក្រុមហ៊ុនធំៗរបស់ចិនចំនួន 12 ក្រុមហ៊ុន និងបានពន្យល់ពួកគេអំពីគោលនយោបាយគាំពារអ្នកវិនិយោគរបស់រាជរដ្ឋាភិបាលកម្ពុជាផងដែរ។ ក្នុងនោះ មានក្រុមហ៊ុនធំមួយរបស់ចិន បានសម្រេចចិត្តមកវិនិយោគនៅកម្ពុជា ហើយបច្ចុប្បន្នកំពុងជ្រើសរើសទីតាំងបណ្ដាក់ទុនមួយក្នុងចំណោមពីរ ដែលមួយគឺតំបន់សេដ្ឋកិច្ចពិសេសខេត្តព្រះសីហនុ និងពីរគឺ តំបន់សេដ្ឋកិច្ចពិសេសក្នុងខេត្តស្វាយរៀង៕

November 4, 2023

ឡាវ និងថៃ ពិភាក្សាអំពីការស្ថាបនាស្ពានសម្រាប់រថភ្លើងឆ្លងកាត់ទន្លេមេគង្គ

រដ្ឋមន្ត្រីការបរទេសឡាវ និងថៃ បានចាប់ផ្ដើមកិច្ចពិភាក្សាអំពីការស្ថាបនាស្ពានសម្រាប់ផ្លូវដែកមួយខ្សែដែលឆ្លងកាត់ទន្លេមេគង្គ។ ស្ពាននេះនឹងតភ្ជាប់រដ្ឋធានីវៀងចន្ទន៍របស់ប្រទេសឡាវ ជាមួយនឹងខេត្តណងខៃនៅតំបន់ឦសានប្រទេសថៃ។

សារព័ត៌មានឡាវ ដែលបានចុះផ្សាយកាលពីថ្ងៃទី 01 វិច្ឆិកា ឱ្យដឹងថា ក្នុងជំនួបរវាងឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសឡាវ លោក Saleumxay Kommasith និងរដ្ឋមន្ត្រីការបរទេសថៃ Parnpree Bahiddha-Nukara នៅវៀងចន្ទន៍កាលពីថ្ងៃទី 30 តុលា ភាគីទាំងពីរបានពិភាក្សាអំពីការពង្រីកផ្លូវដែកឆ្លងប្រទេស ពីខេត្តណងខៃប្រទេសថៃ ទៅកាន់ស្ថានីយរថភ្លើង Khamsavath ក្នុងរដ្ឋធានីវៀងចន្ទន៍ ដើម្បីជំរុញកំណើនវិស័យទេសចរណ៍ និងបង្កភាពងាយស្រួលបន្ថែមទៀតសម្រាប់ផ្លូវដែកឡាវ – ចិន។

រដ្ឋមន្ត្រីប្រទេសទាំងពីរក៏បានឯកភាពគ្នាលើការលើកទឹកចិត្តដល់វិស័យពាក់ព័ន្ធនៃប្រទេសទាំងពីរ នៅក្នុងការពិនិត្យលទ្ធភាព និងវិធានការនានាដើម្បីបង្កើនប្រាក់ចំណូលក្នុងវិស័យពាណិជ្ជកម្មទ្វេភាគី តាមរយៈការលុបបំបាត់ឧបសគ្គដែលមាននាបច្ចុប្បន្ន និងបង្កលក្ខណៈងាយស្រួលជាងនេះសម្រាប់សកម្មភាពជំនួញ។

ជំនួបខាងលើនេះក៏ត្រូវបានធ្វើឡើងក្នុងបំណងជំរុញវិស័យទេសចរណ៍រវាងប្រទេសឡាវ និងប្រទេសថៃផងដែរ តាមរយៈការប្រើប្រាស់ស្ថានីយរថភ្លើង Khamsavath នៅវៀងចន្ទន៍៕

November 2, 2023

ជាលើកដំបូង ភេសជ្ជៈធ្វើពីទឹកផ្កាដូងស្រស់របស់ខ្មែរក្រោម ត្រូវបាននាំចេញទៅសហរដ្ឋអាម៉េរិក

(វៀតណាម) – កាលពីថ្ងៃទី 25 តុលា ភេសជ្ជៈទឹកផ្កាដូងស្រស់ចំនួន 20,000 ដប ដែលជាផលិតផលពិសេសរបស់ខេត្តត្រាវិញ (ព្រះត្រពាំង) ត្រូវបាននាំចេញជាផ្លូវការទៅកាន់ទីផ្សារសហរដ្ឋអាម៉េរិក។

ទឹកផ្កាដូងស្រស់គឺជាមួយក្នុងចំណោមផលិតផលចំនួន 19 មុខ ដែលស្ថិតក្នុងក្រុមផលិតផលដែលជាប់ចំណាប់ថ្នាក់ OCOP ផ្កាយ 5 ដែលវៀតណាម ទទួលស្គាល់ក្នុងឆ្នាំ 2023។

តាមផែនការ ក្រោយពីទទួលបានជោគជ័យក្នុងការលក់ដំបូង ជាមធ្យមក្នុងមួយខែ ភេសជ្ជៈទឹកផ្កាដូងស្រស់ពី 20,000 ដល់ 40,000 ដប នឹងត្រូវបាននាំចេញពីកាន់ទីផ្សារសហរដ្ឋអាម៉េរិក។

ក្នុងចំណោមផលិតផលចំនួន 19 មុខ ដែលស្ថិតក្នុងក្រុមផលិតផលផ្កាយ 5 ដែលទទួលស្គាល់ដោយ OCOP ក្នុងឆ្នាំ 2023 ខេត្តព្រះត្រពាំង នៅដែនដីកម្ពុជាក្រោម (វៀតណាម) រួមចំណែករហូតដល់ 3 មុខ ហើយ 3 មុខនេះ ក៏សុទ្ធតែជាផលិតផលដែលធ្វើពីដូង រួមមាន ភេសជ្ជៈធ្វើពីទឹកផ្កាដូងស្រស់ ស្ករផ្កាដូង របស់ក្រុមហ៊ុន SOKFARM CO., LTD ដែលជាកម្មសិទ្ធិរបស់ពលរដ្ឋខ្មែរក្រោម អ្នកស្រី ថាច់ ធីចន្ធី និងក្រមួនដួងរបស់ក្រុមហ៊ុន VICOSAP។

October 26, 2023

ចិនអភិវឌ្ឍទួរប៊ីនខ្យល់ថ្មី ធំជាងគេបង្អស់លើពិភពលោក

ក្រុមហ៊ុនថាមពលឆ្លាតវៃ Ming Yang របស់ប្រទេសចិន នឹងអភិវឌ្ឍទួរប៊ីនខ្យល់សម្រាប់ដាំលើសមុទ្រធំបំផុតលើពិភពលោកថ្មីមួយទៀត ដែលមានស្លាបចក្រប្រវែងជិតស្មើនឹងកម្ពស់របស់តួ Eiffel នៅប្រទេសបារាំង។

ក្រុមហ៊ុន Ming Yang ឱ្យដឹងថា គោលដៅរបស់ខ្លួនគឺការអភិវឌ្ឍទួរប៊ីនខ្យល់កម្លាំង 22 មេហ្គាវ៉ាត់ (MW) ដែលមានរ៉ូទ័រមានអង្កត់ផ្ចិតប្រវែងជាង 310 ម៉ែត្រ និងអាចទទួលបានខ្យល់ច្រើនជាង និងផលិតអគ្គិសនីបានច្រើនជាងទួរប៊ីនដទៃនាបច្ចុប្បន្ន។ នេះបើតាមទំព័រ Interesting Engineering ចុះផ្សាយកាលពីថ្ងៃទី 20 តុលា។

យោងតាមអ្នកនាំពាក្យរបស់ក្រុមហ៊ុនខាងលើ ពួកគេសង្ឃឹមថា នឹងអាចផលិតគំរូដើមរបស់ទួរប៊ីនខ្យល់នេះនៅឆ្នាំ 2024 ឬ 2025។

ប្រកាសខាងលើត្រូវបានលើកឡើងក្រោយពី Ming Yang បានបង្ហាញទួរប៊ីនខ្យល់លើសមុទ្រធំជាងគេលើពិភពលោក កម្លាំង 18 MW ដែលមានអង្កត់ផ្ចិត 140 ម៉ែត្រ កាលពីខែមករា ឆ្នាំ 2023។ នៅក្នុងសប្ដាហ៍នេះដែរ ក្រុមហ៊ុន Ming Yang ក៏បានបង្ហើបឱ្យដឹងអំពីទួរប៊ីនខ្យល់សម្រាប់ដំឡើងលើដីគោក កម្លាំង 11 MW ដែលមានស្លាបចក្រមានផ្ទៃធំស្មើនឹងទីលានបាល់ទាត់ចំនួន 6 បូកចូលគ្នា។

កាលពីខែកុម្ភៈឆ្នាំនេះ ប្រទេសចិនបានដំឡើងទួរប៊ីនខ្យល់ 16 MW នៅលើសមុទ្រដែលមានចម្ងាយពីដីគោករបស់ខេត្ត Fujian ជិត 33 គីឡូម៉ែត្រ។ គម្រោងដែលមានតម្លៃ 885 លានដុល្លារអាម៉េរិកនេះឆ្ពោះទៅកាន់ការដំឡើងទួរប៊ីនខ្យល់ដែលមានកម្លាំង 400 MW ក្នុងដំណាក់កាលទីពីររបស់ស្ថានីយផលិតអគ្គិសនីពីកម្លាំងខ្យល់ Zhangpu Liuao។ ទួរប៊ីនខ្យល់ 16 MW មួយដើមៗនៅក្នុងគម្រោងនេះ មានប្រអប់គ្រឿងចក្រដែលស្ថិតនៅលើក្បាលបង្គោលទួរប៊ីន កម្ពស់ 146 ម៉ែត្រ ស្មើនឹងអគារ 50 ជាន់ ខណៈដែលស្លាបកង្ហារមានអង្កត់ផ្ចិតប្រវែង 252 ម៉ែត្រ និងទទួលខ្យល់ក្នុងផ្ទៃអាកាសទំហំ 50,000 ម៉ែត្រការ៉េ។ រៀងរាល់ពេលដែលស្លាបកង្ហារនេះវិលបានមួយជុំ ទួរប៊ីនខ្យល់នេះអាចផលិតអគ្គិសនីបាន 34.2 គីឡូវ៉ាត់ម៉ោង និង 66 ជីហ្គាវ៉ាត់ម៉ោង (GWh) ក្នុងមួយឆ្នាំ ដែលគ្រប់គ្រាន់សម្រាប់ផ្គត់ផ្គង់ដល់មនុស្សចំនួន 25,000 គ្រួសារ។ ជាសរុប គម្រោងមួយនេះនឹងផលិតអគ្គិសនីបាន 1.6 តេរ៉ាវ៉ាត់ម៉ោង (TWh) ជួយសំចៃធ្យូងថ្មបាន 500,000 តោន និងកាត់បន្ថយឧស្ម័នពុលបាន 1.36 លានតោនជារៀងរាល់ឆ្នាំ៕

October 21, 2023

ថៃកំពុងពិនិត្យគម្រោងវិនិយោគតម្លៃ 27 ពាន់លានដុល្លារ ដើម្បីជំរុញកំណើនសេដ្ឋកិច្ច

ប្រទេសថៃកំពុងតែវាយតម្លៃលើគម្រោងប្រកបដោយមហិច្ឆតាក្នុងការស្ថាបនាផ្លូវគោក និងផ្លូវដែក តភ្ជាប់រវាងសមុទ្រ Andaman និងឈូងសមុទ្រថៃ។

យោងតាម Reuters នាយករដ្ឋមន្ត្រីថៃឱ្យដឹងថា ប្រទេសនេះកំពុងវាយតម្លៃលើគម្រោងដ៏ធំមួយនៅភាគខាងត្បូងប្រទេស រួមមានបណ្ដាខ្ទង់វិនិយោគដែលមានតម្លៃមួយទ្រីលានបាត (27.44 ពាន់លានដុល្លារអាម៉េរិក) ដើម្បីជំរុញកំណើនសេដ្ឋកិច្ច និងពាណិជ្ជកម្មទូទាំងសកលលោក។

ការស្រាវជ្រាវមួយរបស់រាជរដ្ឋាភិបាលថៃ បានឱ្យដឹងថា ការដេញថ្លៃ និងការស្ថាបនានឹងចាប់ផ្ដើមពីឆ្នាំ 2025 អាចបង្កើតការងារបានប្រហែល 280,000 កន្លែង នៅខេត្ត Ranong និង Chumpon។

នាយកដ្ឋានផែនការថៃ បានគណនាឃើញថា គម្រោងខាងលើនេះអាចជំរុញកំណើនសេដ្ឋកិច្ចថៃឡើងដល់ 5.5% ជារៀងរាល់ឆ្នាំ។

សេដ្ឋកិច្ចថៃត្រូវបានព្យាករថានឹងមានកំណើន 2.8% ក្នុងឆ្នាំនេះ និង 4.4% ក្នុងឆ្នាំ 2024។

នាយករដ្ឋមន្ត្រីថៃ លោក Srettha Thavisin សង្កត់ធ្ងន់ថា គម្រោងនេះខាងលើនេះនឹងជាការតភ្ជាប់សំខាន់នៅក្នុងការដឹកជញ្ជូនទំនិញរវាងប្រទេសឥណ្ឌា មជ្ឈិមបូព៌ា និងទ្វីបអាហ្វ្រិក។

ដំណាក់កាលដំបូងរបស់គម្រោងនេះគ្រោងនឹងរួចរាល់នៅឆ្នាំ 2030 និងអាចដឹកជញ្ជូនទំនិញតាមកុងតឺន័របាន 10 លាន TEU ហើយអាចសម្រេចបាន 40 លាន TEU នៅឆ្នាំ 2039៕

October 19, 2023

សភាពាណិជ្ជកម្មកម្ពុជា និងភាគីចិន ចុះហត្ថលេខាលើគម្រោងចំនួនបី

(ប្រទេសចិន) – សភាពាណិជ្ជកម្មកម្ពុជា និងភាគីចិន បានចុះហត្ថលេខាលើអនុស្សារណៈយោគយល់គ្នាចំនួនបី នៅក្នុងឱកាសអមដំណើរ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ចូលរួមវេទិកាខ្សែក្រវាត់និងផ្លូវសម្រាប់កិច្ចសហប្រតិបត្តិការអន្តរជាតិលើកទីបីនៅប្រទេសចិន។

នារសៀលថ្ងៃទី 17 ខែតុលា ឆ្នាំ 2023 ក្នុងឱកាសអមដំណើរ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ចូលរួមវេទិកាខ្សែក្រវាត់និងផ្លូវសម្រាប់កិច្ចសហប្រតិបត្តិការអន្តរជាតិលើកទីបី អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា បានអញ្ជើញចូលរួមពិធីចុះហត្ថលេខាលើគម្រោងចំនួនបី រៀបចំដោយសមាគមអ្នកវិនិយោគចិននៅកម្ពុជា ដែលប្រព្រឹត្តទៅក្រោមអធិបតីភាព លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម។

យោងតាមទំព័របណ្ដាញសង្គមរបស់សភាពាណិជ្ជកម្មកម្ពុជា គម្រោងទាំងបីដែលត្រូវបានចុះហត្ថលេខារួមមាន៖

ទីមួយ-អនុស្សារណៈយោគយល់គ្នា ស្ដីពី កិច្ចសហប្រតិបត្តិការលើគម្រោងអភិវឌ្ឍន៍វិស័យទេសចរណ៍ និងវិស័យផ្សេងទៀតនៅក្នុងតំបន់ប្រើប្រាស់ដោយចីរភាព នៃឧទ្យានជាតិព្រះសុរាម្រិត-កុសុមៈ “គិរីរម្យ” ក្នុងខេត្តកំពង់ស្ពឺ និងខេត្តព្រះសីហនុ

ទីពីរ-អនុស្សារណៈយោគយល់គ្នា ស្ដីពី កិច្ចសហការវិនិយោគលើការបណ្តុះបណ្ដាលវិស័យអប់រំ បដិសណ្ឋារកិច្ច ដែលត្រូវជ្រើសរើសសិស្ស និសិ្សតវិទ្យាល័យនៅកម្ពុជាទៅបន្តការសិក្សានៅប្រទេសចិន

ទីបី-អនុស្សារណៈយោគយល់គ្នា ស្ដីពី កិច្ចសហការវិនិយោគលើគម្រោងអភិវឌ្ឍន៍តំបន់សេដ្ឋកិច្ចពិសេស នៅភូមិតានៃ ឃុំតានៃ ស្រុកព្រៃនប់ ខេត្តព្រះសីហនុ

October 18, 2023

ឥណ្ឌូណេស៊ីសម្ពោធដាក់ឱ្យប្រើប្រាស់ផ្លូវដែកល្បឿនលឿនដំបូងអាស៊ីអាគ្នេយ៍

ផ្លូវដែកល្បឿនលឿនដំបូងរបស់ប្រទេសឥណ្ឌូណេស៊ី ជិតបើកទ្វារទទួលអ្នកដំណើរ ដែលនេះនឹងជួយកាត់បន្ថយពេលវេលានៃការធ្វើដំណើររវាងទីក្រុងពីរធំជាងគេបង្អស់របស់ប្រទេសនេះ។

គម្រោងផ្លូវដែកដែលមានតម្លៃ 7.3 ពាន់លានដុល្លារអាម៉េរិកនេះនឹងត្រូវបានសម្ពោធដាក់ឱ្យដំណើរការក្នុងថ្ងៃទី 02 តុលា 2023 ក្រោយពីបានពន្យារពេលច្រើនលើក។ នេះគឺជាមួយផ្នែកនៃគំនិតផ្ដួចផ្ដើមហេដ្ឋារចនាសម្ព័ន្ធខ្សែក្រវាត់ និងផ្លូវ ដែលទទួលបានជំនួយភាគច្រើនពីបណ្ដាក្រុមហ៊ុនរដ្ឋចិន។

«យើងនឹងសម្ពោធនៅថ្ងៃទី 02 តុលា ដោយសារប្រធានាធិបតីជាប់រវល់នៅក្នុងថ្ងៃទី 01 តុលា» រដ្ឋមន្ត្រីក្រសួងគមនាគមន៍ឥណ្ឌូណេស៊ី Budi Karya Sumadi កាលពីថ្ងៃទី 29 កញ្ញា ថ្លែងដូច្នេះ។

ផ្លូវដែកសម្រាប់រថភ្លើងល្បឿនលឿនប្រវែង 138 គីឡូម៉ែត្រ និងមានឈ្មោះថា WHOOSH នេះ តភ្ជាប់រវាងរដ្ឋធានីហ្សាការតា និង Bandung នៅខេត្តជ្វាខាងលិច ដែលជាទីក្រុងធំជាងគេលំដាប់ទីពីររបស់ឥណ្ឌូណេស៊ី និងជាមជ្ឈមណ្ឌលសិល្បៈ វប្បធម៌ដ៏ធំរបស់ឥណ្ឌូណេស៊ី។

រថភ្លើងដែលរត់លើផ្លូវដែក WHOOSH ដំណើរការដោយអគ្គិសនី និងមានល្បឿនប្រហែល 350 គីឡូម៉ែត្រ/ម៉ោង នឹងជួយកាត់បន្ថយពេលវេលាក្នុងការធ្វើដំណើររវាង ហ្សាការតា និង Bandung ពីបីម៉ោងមកនៅក្រោមមួយម៉ោង។ WHOOSH ក៏ជាផ្លូវដែកល្បឿនលឿនដំបូងនៅតំបន់អាស៊ីអាគ្នេយ៍ផងដែរ។

គម្រោងខាងលើនេះត្រូវបានគ្រប់គ្រងដោយក្រុមហ៊ុនបណ្ដាក់ទុនរួម PT Kereta Cepat ឥណ្ឌូណេស៊ី – ចិន (PT KCIC)។ តំណាងក្រុមហ៊ុននេះក៏បានឱ្យដឹងថា ស្ថាប័នពាក់ព័ន្ធកំពុងចរចាអំពីការពង្រីកផ្លូវដែកល្បឿនលឿនទៅកាន់ Surabaya ដែលជាទីក្រុងកំពង់ផែធំរបស់ខេត្តជ្វាខាងកើត។

កិច្ចព្រមព្រៀងអភិវឌ្ឍផ្លូវរថភ្លើងល្បឿនលឿននៅឥណ្ឌូណេស៊ី ត្រូវបានចុះហត្ថលេខាកាលពីឆ្នាំ 2015 និងចាប់ផ្ដើមស្ថាបនាតាំងពីចុងឆ្នាំនោះ។ តាមផែនការដំបូង គម្រោងនេះគ្រោងនឹងត្រូវបានដាក់ឱ្យដំណើរការក្នុងឆ្នាំ 2019 ប៉ុន្តែត្រូវបានពន្យារពេលច្រើនលើកដោយសារតែបញ្ហាកូវីដ-19៕

October 2, 2023

ក្រុមហ៊ុនថ្មីចំនួនប្រាំបី ដាក់ទុនវិនិយោគសរុបជាងហុកសិបបួនលានដុល្លារអាម៉េរិកនៅកម្ពុជា

កាលពីថ្ងៃទី 20 កញ្ញា គណៈកម្មាធិការតំបន់សេដ្ឋកិច្ចពិសេសកម្ពុជា នៃក្រុមប្រឹក្សាអភិវឌ្ឍន៍កម្ពុជា បានប្រកាសថា បានសម្រេចចេញវិញ្ញាបនបត្រចុះបញ្ជីគម្រោងវិនិយោគជូនដល់ក្រុមហ៊ុនចំនួន 8 ដែលអាចបង្កើតការងារសរុបបានចំនួនប្រហែល 4,000 កន្លែង ដោយមានទុនសរុបប្រមាណ 64.3 លានដុល្លារអាម៉េរិក។

ខាងក្រោមនេះគឺជាបណ្ដាក្រុមហ៊ុន និងគម្រោងវិនិយោគដែលទទួលបានការអនុញ្ញាត ក៏ដូចជាវិញ្ញាបនបត្រចុះបញ្ជីពីក្រុមប្រឹក្សាអភិវឌ្ឍន៍កម្ពុជា៖

ក្រុមហ៊ុន HUALE STEEL (CAMBODIA) CO., LTD. ៖ គម្រោងបង្កើតរោងចក្រផលិតដែកគ្រប់ប្រភេទ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស កំពង់ផែក្រុងព្រះសីហនុ ខេត្តព្រះសីហនុ ក្នុងទុនវិនិយោគចំនួន 40 លានដុល្លារអាម៉េរិក និងអាចបង្កើតការងារបានចំនួន 523 កន្លែង។

ក្រុមហ៊ុន WANGMAO (CAMBODIA) HOMEWARE CO., LTD.៖ គម្រោងបង្កើតរោងចក្រផលិតអំពូលភ្លើង សម្ភារៈប្រើប្រាស់ក្នុងផ្ទះ និងបន្ទប់ទឹក និងគ្រឿងបង្គុំវាំងនន ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ហាយ-ផាក ខេត្តស្វាយរៀង ក្នុងទុនវិនិយោគប្រមាណ 6.2 លានដុល្លារអាម៉េរិក និងអាចបង្កើតការងារបានចំនួន 1,369 កន្លែង។

ក្រុមហ៊ុន JUSHI (CAMBODIA) CO., LTD.៖ គម្រោងបង្កើតរោងចក្រផលិតគ្រាប់ប្លាស្ទិក ខ្សែភ្លើង និងខ្សែកាប ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ស្វាយរៀង ហ្គីហ្គា រីសស៍ ខេត្តស្វាយរៀង ក្នុងទុនវិនិយោគចំនួន 5 លានដុល្លារអាម៉េរិក និងអាចបង្កើតការងារបានចំនួន 549 កន្លែង។

ក្រុមហ៊ុន STARBLAZE (CAMBODIA) PLASTIC & METAL CO., LTD.៖ គម្រោងបង្កើតរោងចក្រផលិតផលិតផលប្លាស្ទិក សម្ភារៈលំអ និងគ្រឿងបង្គុំ អេឡិកត្រូនិកធ្វើពីប្លាស្ទិក ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ស្វាយរៀង ហ្គីហ្គា រីសស៍ ខេត្តស្វាយរៀង ក្នុងទុនវិនិយោគប្រមាណ ៣,៦លានដុល្លារអាម៉េរិក និងអាចបង្កើតការងារបានចំនួន ៥៨៦កន្លែង។

ក្រុមហ៊ុន CAMBODIAN LUHENG PET FOOD CO., LTD.៖ គម្រោងបង្កើតរោងចក្រផលិតចំណី និងសម្ភារៈសម្រាប់សត្វចិញ្ចឹម ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ខេមបូឌាន ចេជាង ហ្គ័រជី ខេត្តព្រះសីហនុ ក្នុងទុនវិនិយោគចំនួន 3 លានដុល្លារអាម៉េរិក និងអាចបង្កើតការងារបានចំនួន 119 កន្លែង។

ក្រុមហ៊ុន ULTIMATE MOTION CO., LTD. ៖ គម្រោងបង្កើតរោងចក្រផលិតសាឡុង និងគ្រឿងសង្ហារិម ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុ ខេត្តព្រះសីហនុ ក្នុងទុនវិនិយោគ 3 លានដុល្លារអាម៉េរិក និងអាចបង្កើតការងារបានចំនួន 195 កន្លែង។

ក្រុមហ៊ុន WANAN GAS CONTROL (CAMBODIA) CO., LTD.៖ គម្រោងបង្កើតរោងចក្រផ្គុំ និងតម្លើងសម្ភារៈបរិក្ខារចង្ក្រានហ្គាស (Regulators, Valves, Hose…) ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ស្វាយរៀង ហ្គីហ្គា រីសស៍ ខេត្តស្វាយរៀង ក្នុងទុនវិនិយោគប្រមាណ 2 លានដុល្លារអាម៉េរិក និងអាចបង្កើតការងារបានចំនួន 369 កន្លែង។

ក្រុមហ៊ុន HE DUI OPTOELECTRONICS CO., LTD.៖ គម្រោងបង្កើតរោងចក្រផលិតអំពូលភ្លើងលំអ និងអំពូលភ្លើង LED ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ស្វាយរៀង ហ្គីហ្គា រីសស៍ ខេត្តស្វាយរៀង ក្នុងទុនវិនិយោគចំនួន 1.5 លានដុល្លារអាម៉េរិក និងអាចបង្កើតការងារបានចំនួន 330 កន្លែង។

September 21, 2023

ឡាវរកឃើញករណីឆ្លងជំងឺអុតស្វា (Monkeypox) ដំបូងបង្អស់

ក្រសួងសុខាភិបាលឡាវស្នើឱ្យមន្ទីរពេទ្យនៅតាមបណ្ដាខេត្ត ស្រុក និងមណ្ឌលសុខភាពទាំងអស់ បូករួមទាំងបន្ទប់ពិគ្រោះជំងឺឯកជន បង្កើនការយកចិត្តទុកដាក់ទៅលើអ្នកជំងឺដែលមានអាការក្ដៅខ្លួន និងចេញកន្ទួលរមាស់។

យោងតាមបណ្ដាញសារព័ត៌មានក្នុងស្រុក នាថ្ងៃទី 19 កញ្ញានេះ ក្រសួងសុខាភិបាលឡាវបានចេញសេចក្ដីប្រកាសមួយ ស្នើឱ្យប្រជាជនគ្រប់រូបតាមដាន និងទប់ស្កាត់ ប្រឆាំងជំងឺអុតស្វា (Mpox-Monkeypox)។ សេចក្ដីប្រកាសនេះត្រូវបានធ្វើឡើងក្រោយពីបានរកឃើញអ្នកកើតជំងឺអុតស្វាម្នាក់ដែលជាករណី «នាំចូល»។

ដើម្បីទប់ស្កាត់ការឆ្លងរាលដាលជំងឺអុតស្វានេះ ក្រសួងសុខាភិបាលឡាវបានស្នើឱ្យមន្ទីរសុខាភិបាលតាមតំបន់នៅទូទាំងប្រទេស បង្កើនការតាមដាន ទប់ស្កាត់ និងគ្រប់គ្រងជំងឺឆ្លងមួយនេះ ដោយផ្ដោតទៅលើពលរដ្ឋដែលចូលមកប្រទេសឡាវ ជាពិសេស ចំពោះតំបន់ដែលមានព្រំដែនជាប់នឹងប្រទេសជិតខាងដែលកំពុងមានជំងឺនេះ។

ក្រសួងសុខាភិបាលឡាវស្នើឱ្យមន្ទីរពេទ្យនៅតាមបណ្ដាខេត្ត ស្រុក និងមណ្ឌលសុខាភិបាលទាំងអស់ បូករួមទាំងបន្ទប់ពិគ្រោះជំងឺឯកជនផង បង្កើនការយកចិត្តទុកដាក់ទៅលើអ្នកជំងឺដែលមានអាការក្ដៅខ្លួន និងចេញកន្ទួលរមាស់។ បើសិនរកឃើញករណីសង្ស័យថាឆ្លងជំងឺនេះ គឺត្រូវរាយការណ៍ដល់ស្ថាប័នពាក់ព័ន្ធដើម្បីយកសំណាកទៅពិនិត្យជាបន្ទាន់។

អុតស្វាគឺជាជំងឺឆ្លងដែលបង្ហាញវត្តមានជាយូរមកហើយនៅតំបន់អាហ្វ្រិក ប៉ុន្តែក្នុងឆ្នាំ 2022 ករណីឆ្លងជំងឺនេះនៅតំបន់អឺរ៉ុបបានកើនឡើងខ្ពស់ខ្លាំង នាំឱ្យអង្គការសុខភាពពិភពលោកប្រកាសអាសន្នកាលពីខែកក្កដា 2022។ ជំងឺនេះអាចឆ្លងតាមរយៈការប៉ះពាល់អ្នកជំងឺ។

អាការរបស់ជំងឺអុតស្វា រួមមាន ក្ដៅខ្លួនខ្លាំង ឈឺសាច់ដុំ ឡើងកូនកណ្ដុរ និងចេញពងកន្ទួលជាដើម។ តាមធម្មតា ជំងឺនេះអាចអូសបន្លាយពេលពី 2 ទៅ 4 សប្ដាហ៍ ខណៈដែលអាការជំងឺតែងបង្ហាញខ្លួននៅពេលរាងកាយឆ្លងវីរុសបានពី 5 ដល់ 21 ថ្ងៃ៕

September 19, 2023

ចិន-វៀតណាមចាប់ផ្ដើមអនុវត្តគម្រោង «ច្រកព្រំដែនឆ្លាតវៃ» គ្មានមនុស្សប្រចាំការ

គម្រោងច្រកព្រំដែនឆ្លាតវៃ Youyi Guan (ប្រទេសចិន) – Huu Nghi (វៀតណាម) ដែលប្រើប្រាស់ប្រព័ន្ធកំណត់ទិសពីផ្កាយរណប និងបច្ចេកវិទ្យា 5G អនុញ្ញាតឱ្យទំនិញឆ្លងកាត់ដោយស្វ័យប្រវត្ត មិនមានមនុស្សប្រចាំការ 24 ម៉ោងក្នុងមួយថ្ងៃ ត្រូវបានសម្ពោធបើកការដ្ឋានសាងសង់កាលពីថ្ងៃទី 15 កញ្ញា។

ដើម្បីអនុវត្តកិច្ចព្រមព្រៀងជំរុញការស្ថាបនាច្រកព្រំដែនឆ្លាតវៃសាកល្បងចិន – វៀតណាម ភាគីរដ្ឋបាលតំបន់ស្វយ័តជនជាតិ Zhuang Guangxi នៅប្រទេសចិន និងភាគីខេត្ត Lang Son ប្រទេសវៀតណាម បានឯកភាពគ្នាលើការជំរុញគម្រោងសាកល្បងច្រកព្រំដែនឆ្លាតវៃនៅលើកំណាត់ផ្លូវសម្រាប់ដឹកជញ្ជូនទំនិញនៃច្រកព្រំដែន Youyi Guan (ប្រទេសចិន) – Huu Nghi (វៀតណាម)។

គម្រោងច្រកព្រំដែនឆ្លាតវៃ Youyi Guan (ប្រទេសចិន) – Huu Nghi (វៀតណាម) ដែលអនុវត្តដោយរដ្ឋបាលតំបន់ស្វយ័តជនជាតិ Zhuang Guangxi និងយោងទៅលើប្រព័ន្ធកំណត់ទិសពីផ្កាយរណប និងបច្ចេកវិទ្យា 5G ត្រូវបានសម្ពោធបើកការដ្ឋានសាងសង់កាលពីថ្ងៃទី 15 កញ្ញា 2023 នៅលើទឹកដីចិន ដោយមានការចូលរួមពីក្រុមមន្ត្រីប្រទេសចិន និងវៀតណាម។

គម្រោងនេះប្រើប្រាស់យានយន្តស្វ័យប្រវត្តដឹកជញ្ជូនកុងតឺន័រគ្មានមនុស្សបើកបរ AGV, ឧបករណ៍ដងស្ទូចស្វ័យប្រវត្ត, ប្រព័ន្ធគ្រប់គ្រងផែនទីឆ្លាតវៃ និងអាចផ្លាស់ប្ដូរព័ត៌មានស្ដីពីការដឹកជញ្ជូនឆ្លងព្រំដែនរវាងចិន និងវៀតណាម ដែលអនុញ្ញាតឱ្យទំនិញឆ្លងកាត់ស្វ័យប្រវត្តមិនមានមនុស្សប្រចាំការ 24 ម៉ោងក្នុងមួយថ្ងៃ។

យោងតាមមន្ត្រីពាក់ព័ន្ធ គម្រោងច្រកព្រំដែនឆ្លាតវៃ Youyi Guan (ប្រទេសចិន) – Huu Nghi (វៀតណាម) នេះ នឹងលើកកម្ពស់កិច្ចការគយរវាងច្រកព្រំដែនរបស់ប្រទេសទាំងពីរថែមមួយកម្រិតទៀត។ ការដឹកទំនិញឆ្លងកាត់ព្រមដែននៅទីនេះនឹងមិនត្រូវរង់ចាំ។

បច្ចុប្បន្ន គម្រោងច្រកព្រំដែនឆ្លាតវៃ Youyi Guan របស់ប្រទេសចិន បានចាប់ផ្ដើមការសាងសង់ ខណៈគម្រោងច្រកព្រំដែនឆ្លាតវៃ Huu Nghi របស់វៀតណាម កំពុងឆ្លងយោបល់ពីស្ថាប័នពាក់ព័ន្ធរបស់ប្រទេសនេះ មុនពេលដាក់សំណើទៅកាន់នាយករដ្ឋមន្ត្រី។

នៅក្នុងពិធីសម្ពោធបើកការដ្ឋានសាងសង់ច្រកព្រំដែនឆ្លាតវៃខាងលើ ភាគីប្រទេសទាំងពីរក៏បានឯកភាពគ្នាថា នឹងបន្តលើកកម្ពស់កិច្ចសហការដើម្បីសម្រេចបានច្រកព្រំដែនឆ្លាតវៃប្រកបដោយភាពរលូន និងឆាប់រហ័សផងដែរ៕

September 16, 2023

Tag: ខេត