អគ្គិសនី - La Reine Media

ទំនប់វារីអគ្គិសនីខ្នាតយក្សតម្លៃ 5 ពាន់លានដុល្លារ នៅលើទន្លេវែងជាងគេលើពិភពលោក

ទំនប់វារីអគ្គិសនី Grand Ethiopian Renaissance ដែលកំពុងត្រូវបានប្រទេសអេត្យូពីសាងសង់នៅលើទន្លេ Nile គឺជាស្ថាបត្យកម្មដ៏អស្ចារ្យ ដោយមានទំនប់មេប្រវែង 1.7 គីឡូម៉ែត្រ និងបឹងផ្ទុកទឹក 74 ពាន់លានម៉ែត្រគុប។

បឹងសម្រាប់ផ្ទុកទឹកនៅខាងក្រោយទំនប់ Grand Ethiopian Renaissance នេះ គ្រោងនឹងមានទំហំប្រហាក់ប្រហែលនឹងទីក្រុងឡុងដ៍របស់ប្រទេសអង់គ្លេស។ ចំណែកទំនប់នេះវិញ មានកម្ពស់ខ្ពស់ជាងទ្វេដង ធៀបនឹងស្ពាន Golden Gate Bride ដែលមានកម្ពស់ 227 ម៉ែត្រ។

គម្រោងវារីអគ្គិសនីដែលសង់លើទន្លេ Nile (Nile ធ្លាប់ត្រូវបានចាត់ទុកជាទន្លេវែងជាងគេលើពិភពលោកកាលពីអតីតកាល – ខ្លីជាងទន្លេ Amazon បន្តិច) ស៊ីពេលរាប់ទសវត្សរ៍នៅក្នុងការអនុវត្ត និងបង្កើតបានជាកត្តាជំរុញសេដ្ឋកិច្ចរបស់ប្រទេសអេត្យូពី ព្រោះវាអាចជួយឱ្យមនុស្សរាប់លាននាក់រួចផុតពីស្ថានភាពក្រីក្រ។

នេះគឺជាទំនប់វារីអគ្គិសនីធំជាងគេនៅទ្វីបអាហ្វ្រិក ដោយសារវាធំដល់ថ្នាក់ត្រូវបានចាត់ជាប្រភេទមហាទំនប់ (megadam)។ បន្ទាប់ពីការសាងសង់ត្រូវបានធ្វើឡើងរួចរាល់ជាស្ថាពរ សំណង់នេះនឹងផលិតអគ្គិសនីបានជាង 5,000 ម៉េហ្គាវ៉ាត់ ច្រើនជាងទ្វេដងបើធៀបនឹងបរិមាណអគ្គិសនីដែលអេត្យូពីផលិតបាននាបច្ចុប្បន្ន។

បឹងសម្រាប់ផ្ទុកទឹករបស់ទំនប់វារីអគ្គិសនីនេះនឹងអាចផ្ទុកទឹកបាន 74 ពាន់លានម៉ែត្រគុប។ រោងចក្រចំនួនពីរ និងទំនប់ចំនួនបីរបស់គម្រោងនេះ ត្រូវសាងសង់ឡើងពីបេតុង RCC ចំនួន 10 លានម៉ែត្រគុប។ ក្នុងនោះ ទំនប់មេនឹងមានកម្ពស់ 145 ម៉ែត្រ, បណ្ដោយ 1.7 គីឡូម៉ែត្រ ខណៈដែលទំនប់រងមានប្រវែងសរុប 4.8 គីឡូម៉ែត្រ និងកម្ពស់ 45 ម៉ែទ្រ៕

July 27, 2023

ឆេះកប៉ាល់ដឹករថយន្ត 3,000 គ្រឿង នៅលើសមុទ្រហូឡង់

កប៉ាល់ដឹករថយន្ត 3,000 គ្រឿង បានឆាបឆេះនៅលើផ្ទៃសមុទ្រ បណ្ដាលឱ្យមនុស្សម្នាក់ស្លាប់ និងច្រើននាក់ត្រូវបង្ខំចិត្តលោតចូលសមុទ្រ។

កាលពីថ្ងៃទី 26 កក្កដា កប៉ាល់ Fremantle Highway ដែលមានបណ្ដោយ 199 ម៉ែត្រ កើតមានអគ្គិភ័យពេល ស្ថិតក្នុងតំបន់ដែលមានចម្ងាយប្រហែល 27 គីឡូម៉ែត្រពីកោះ Ameland របស់ប្រទេសហូឡង់ គ្រាដែលកំពុងធ្វើដំណើរពីប្រទេសអាល្លឺម៉ង់ ឆ្ពោះទៅកាន់ប្រទេសអេហ្ស៊ីប។

ប៉ូលិសល្បាតសមុទ្ររបស់ហូឡង់ បានឱ្យដឹងថា ក្រុមកប៉ាល់សង្គ្រោះបានបាញ់ទឹកទៅកាន់កប៉ាល់ Fremantle Highway ដើម្បីពន្លត់ភ្លើង ប៉ុន្តែមិនអាចប្រើប្រាស់ទឹកច្រើន ព្រោះអាចធ្វើឱ្យកប៉ាល់លិច។ កប៉ាល់នេះត្រូវបានទាញចេញពីផ្លូវទឹកដែលមានចរាចរណ៍មមាញឹក។

នៅលើកប៉ាល់ដឹកឡាន 3,000 គ្រឿងនេះ មាននាវិក 23 នាក់ ក្នុងនោះមានម្នាក់បានស្លាប់ និង 7 នាក់ត្រូវលោតចូលសមុទ្រ ខណៈដែលនាវិកក្រៅពីនេះត្រូវបានសង្គ្រោះដោយឧទ្ធម្ភាគចក្រ។

ក្រុមហ៊ុនជប៉ុន Shoei Kisen ដែលជាអ្នកគ្រប់គ្រងកប៉ាល់ខាងលើ បានឱ្យដឹងថា ពួកគេកំពុងធ្វើការជាមួយអាជ្ញាធរហូឡង់ ទាក់ទិននឹងហេតុការណ៍អគ្គិភ័យនេះ។

ប៉ូលិសហូឡង់និយាយថា មូលហេតុនៃអគ្គិភ័យមិនទាន់ត្រូវបានរកឃើញនៅឡើយ។ ក៏ប៉ុន្តែ អ្នកនាំពាក្យម្នាក់របស់កងកម្លាំងនេះ មុននោះបានបង្ហើបឱ្យដឹងថា អណ្ដាតភ្លើងបានចាប់ផ្ដើមពីទីតាំងមួយនៅក្បែររថយន្តអគ្គិសនី។

July 27, 2023

យានកង់ពិសេសដំណើរការដោយអគ្គិសនី អាចបើកបរឆ្លងកាត់ស្ទើគ្រប់ឧបសគ្គនៅលើដី

ក្រុមហ៊ុន 18 Wheels ដែលមានទីស្នាក់ការនៅ Helsinki ប្រទេសហ្វាំងឡង់ បានបង្ហាញយានគំរូមួយប្រភេទដែលដំណើរការដោយថាមពលអគ្គិសនី និងមានកង់រហូតដល់ 18 គ្រាប់។

រចនារូបរាងពិសេសរបស់យាននេះ អនុញ្ញាតឱ្យវាធ្វើដំណើរក្នុងល្បឿនលឿននៅលើភូមិសាស្ត្រដែលមានឧបសគ្គកម្ពស់រហូតដល់ 20 សង់ទីម៉ែត្រ ដោយមិនត្រូវបន្ថយល្បឿន។ វាអាចរត់លើដើមឈើដែលផ្ដេកនៅលើដី ដុំថ្ម និងជណ្ដើរជាដើម។ នេះបើតាម New Atlas ចុះផ្សាយកាលពីថ្ងៃទី 25 កក្កដា 2023។

កង់នីមួយៗរបស់យានចម្លែកនេះប្រើប្រាស់ម៉ូទ័រអគ្គិសនីមួយគ្រឿង។ ដោយសារប្រព័ន្ធជើងក្រោមដ៏ពិសេស វាដំណើរការស្ទើរដូចទៅនឹងកង់របស់រថក្រោះ។ យាននេះត្រូវបានអភិវឌ្ឍឡើងដើម្បីធ្វើដំណើរលើភូមិសាស្ត្រដែលសម្បូរឧបសគ្គ និងមិនបង្កឱ្យមានការខូចខាតផ្ទៃដីដែលវាបានធ្វើដំណើរឆ្លងកាត់។

យានចម្លែកនេះត្រូវបានគេរៀបគម្រោងតាំងពីឆ្នាំ 2021 និងអភិវឌ្ឍកាលពីឆ្នាំ 2022 មុននឹងធ្វើការសាកល្បងនាពេលថ្មីៗនេះ ដូចដែលបានបង្ហាញនៅក្នុងវីដេអូខាងក្រោម។

ក្រុមអ្នកស្រាវជ្រាវកំពុងអភិវឌ្ឍកំណែគំរូទីពីរ ដែលគេជឿថា នឹងដោះស្រាយបញ្ហាដែលបានកើតឡើងនៅក្នុងការសាកល្បង។ កំណែគំរូទីពីរគ្រោងនឹងត្រូវបានផលិតបន្ទាប់ពីបានបញ្ចប់ការសាកល្បងនៅចុងរដូវក្ដៅឆ្នាំ2023៕

July 26, 2023

ទីក្រុងរបស់អង់គ្លេសជិតសាងសង់ប្រព័ន្ធថ្មផ្ទុកអគ្គិសនីធំជាងគេលើលោក

អាជ្ញាធរបានអនុម័តលើគម្រោងសាងសង់ប្រព័ន្ធថ្មផ្ទុកថាមពលអគ្គិសនីធំជាងគេលើពិភពលោក នៅឯរោងចក្រផលិតអគ្គិសនីចាស់មួយ ក្នុងទីក្រុង Manchester ប្រទេសអង់គ្លេស ដើម្បីរក្សាថាមពលអគ្គិសនីសម្រាប់ការផ្គត់ផ្គង់ដល់គ្រួសារចំនួន 36,000 គ្រួ នៅក្នុងរយៈពេលមួយសប្ដាហ៍។

ក្រុមហ៊ុនថាមពល Carlton Power នឹងត្រូវការស្វែងរកទុន 963 លានដុល្លារអាម៉េរិក ដើម្បីអនុវត្តគម្រោង និងជ្រើសរើសអ្នកផ្គត់ផ្គង់។ រោងចក្រថ្មផ្ទុកអគ្គិសនីគឺជាវិធីដែលឆ្លើយតបនឹងតម្រូវការប្រើប្រាស់អគ្គិសនីជាបន្តបន្ទាប់ ដោយសារតែអគ្គិសនីពីប្រភពនានាដែលងាយនឹងរអាក់រអួលកាន់តែមានច្រើនឡើងៗ ក្នុងនោះមានដូចជារោងចក្រផលិតអគ្គិសនីពីកម្លាំងខ្យល់ និងកម្ដៅព្រះអាទិត្យជាដើម។

ប្រព័ន្ធថ្មផ្ទុកអគ្គិសនីអាចទាញយកអគ្គិសនីមករក្សាទុកនៅក្នុងថ្ងៃដែលសម្បូរពន្លឺព្រះអាទិត្យ ឬខ្យល់ ដោយការចំណាយទាប ហើយក្រោយមកក៏ផ្គត់ផ្គង់នៅពេលចាំបាច់។ តាមគម្រោង មូលដ្ឋាននេះនឹងផ្គត់ផ្គង់អគ្គិសនី 2,080 ម៉េហ្គាវ៉ាត់ ដែលប្រហាក់ប្រហែលនឹងរោងចក្រអគ្គិសនីខ្នាតមធ្យម នៅក្នុងមួយម៉ោង។ បច្ចុប្បន្ន គម្រោងនេះទទួលបានការអនុញ្ញាតពីអាជ្ញាធររួចហើយ។

តាមផែនការ ដំណើរការសាងសង់ប្រព័ន្ធថ្មផ្ទុកអគ្គិសនីនេះនឹងចាប់ផ្ដើមនៅត្រីមាសទីមួយរបស់ឆ្នាំក្រោយ។ ប្រព័ន្ធនេះក៏នឹងដំណើរការពាណិជ្ជកម្មចាប់ពីត្រីមាសទីបួនឆ្នាំ 2025។

បច្ចុប្បន្ន ប្រទេសអង់គ្លេសចង់អភិវឌ្ឍបណ្ដាញផលិតអគ្គិសនីពីកម្លាំងខ្យល់លើសមុទ្រដែលមានថាមពល 50 ជីហ្គាវ៉ាត់នៅឆ្នាំ 2030។ ក៏ប៉ុន្តែ ពួកគេត្រូវការបច្ចេកវិទ្យាដែលមានស្ថិរភាព ដើម្បីរក្សាទុកអគ្គិសនីសម្រាប់ផ្គត់ផ្គង់ក្នុងពេលមិនមានខ្យល់។ ដូច្នេះ គម្រោងខាងលើពិតជាសមស្រប និងអាចឆ្លើយតបតាមតម្រូវការ៕

July 25, 2023

ចិនសាងសង់អគារគ្មានទំនាញផែនដីកម្ពស់រាប់សិបម៉ែត្រ

ក្រុមអ្នកជំនាញរបស់ប្រទេសចិន កំពុងតែសាងសង់មូលដ្ឋានថ្មីដើម្បីបម្រើដល់ការពិសោធដែលទាក់ទងនឹងដែនទំនាញផែនដី រួមចំណែកក្នុងការសិក្សាស្រាវជ្រាវទីអវកាស។

មូលដ្ឋានពិសោធន៍មីក្រូទំនាញជាមួយនឹងអេឡិចត្រូម៉ាញ៉េទិច (Microgravity Experiment Facility with Electromagnetic Launch – MEFEL) នៅទីក្រុងប៉េកាំង មានកម្ពស់ 40 ម៉ែត្រ ប្រើប្រាស់ម៉ាស៊ីនពិសេសដែលនាំវត្ថុឡើង-ចុះ និងទទួលបទពិសោធន៍នៃស្ថានភាពដែលស្ទើរតែមិនមានទំនាញផែនដីក្នុងរយៈពេល 4 វិនាទី។ នេះបើតាមការចុះផ្សាយរបស់ SCMP កាលពីថ្ងៃទី 20 កក្កដា 2023។

MEFEL អាចឱ្យធ្វើការពិសោធ 100 ដង/ថ្ងៃ និងចំណាយអគ្គិសនីប្រហែលតែ 1 គីឡូវ៉ាត់ម៉ោងប៉ុណ្ណោះសម្រាប់ការពិសោធមួយ។ វាក៏អាចបង្កើតកម្លាំងទំនាញស្រាលដើម្បីធ្វើត្រាប់តាមលក្ខខណ្ឌធម្មជាតិនៅលើព្រះចន្ទ និងភពអង្គារ។

កាលពីឆ្នាំ 2019 មូលដ្ឋានដំបូងដែលស្ថិតក្នុងប្រភេទ MEFEL ចាប់ផ្ដើមដំណើរការនៅប្រទេសអាល្លឺម៉ង់ និងមានឈ្មោះថា Einstein – Elevator។ អគារនេះមានកម្ពស់ 40 ម៉ែត្រ អាចឱ្យទទួលបទពិសោធន៍ស្ថានភាពគ្មានទំនាញប្រហែល 4 វិនាទី ហើយអាចធ្វើការពិសោធបាន 300 ដង/ថ្ងៃ។

ក្រុមអ្នកវិទ្យាសាស្ត្រចិន បានចាប់ផ្ដើមអភិវឌ្ឍ MEFEL តាំងពីឆ្នាំ 2017។ ពួកគេប្រើប្រាស់ម៉ាស៊ីនប្រវែង 3 ម៉ែត្រ ដើម្បីបង្កើតបរិស្ថានគ្មានទំនាញក្នុងរយៈពេលខ្លី។ នៅខាងក្នុង MEFEL ឈុតសម្រាប់ពិសោធន៍នឹងផ្ដល់បរិស្ថានមានទំនាញផែនដីស្មើនឹង 1/100,000 នៃកម្រិតទំនាញធម្មតានៅលើផែនដី ក្នុងរយៈពេល 4 វិនាទី។

ក្រុមវិស្វករចិន ក៏ពុងតែអភិវឌ្ឍ MEFEL ជំនាន់ថ្មី ដែលគ្រោងនឹងអាចបង្កើតស្ថានភាពគ្មានទំនាញឱ្យបានដល់ 20 វិនាទី និងទម្ងន់អតិបរមាសម្រាប់ការពិសោធ នឹងឡើងដល់ 500 គីឡូក្រាម៕

July 21, 2023

ទួរប៊ីនខ្យល់លើសមុទ្រធំជាងគេបង្អស់លើពិភពលោកចាប់ផ្ដើមដំណើរការ

ទួរប៊ីនខ្យល់លើសមុទ្រធំជាងគេបង្អស់លើពិភពលោកចាប់ផ្ដើមដំណើរការនៅក្នុងខេត្ត Fujian ភាគអាគ្នេយ៍របស់ប្រទេសចិន និងតភ្ជាប់ជាមួយនឹងបណ្ដាញអគ្គិសនីកាលពីថ្ងៃទី 19 កក្កដា ឆ្នាំ 2023។

ក្រុមហ៊ុន China Three Gorges Corporation បានតភ្ជាប់ទួរប៊ីនខ្យល់លើសមុទ្រ កម្លាំង 16 ម៉េហ្គាវ៉ាត់ (MW) ដំបូងលើពិភពលោក ទៅនឹងបណ្ដាញអគ្គិសនី។ ដោយមានអង្កត់ផ្ចិតរង្វិលជុំប្រវែង 260 ម៉ែត្រ ទួរប៊ីនខ្នាតយក្សនេះនឹងផ្គត់ផ្គង់អគ្គិសនីស្អាតដល់តម្រូវការរបស់មនុស្ស 36,000 គ្រួសារនៅប្រទេសចិន។

ទួរប៊ីនខ្យល់ដែលមានឈ្មោះថា MySE 16-260 និងត្រូវបានផលិតឡើងដោយក្រុមហ៊ុន MingYang Smart Energy គឺជាទួរប៊ីនធំបំផុតដែលបានតភ្ជាប់ជាមួយនឹងបណ្ដាញអគ្គិសនី។ ម៉ូទ័រផលិតអគ្គិសនីក្នុងស្នូលដែលដាក់លើបង្គោលទួរប៊ីនកម្ពស់ 152 ម៉ែត្រ មានទម្ងន់ 385 តោន។ ស្លាបកង្ហារនីមួយៗមានប្រវែង 123 ម៉ែត្រ និងទម្ងន់ 54 តោន។

នៅពេលវិលបានមួយជុំ ស្លាបកង្ហារបក់ក្នុងទំហំផ្ទៃក្រឡា 50,000 ម៉ែត្រការ៉េ ស្មើនឹងទីលានបាល់ទាត់ស្ដង់ដាចំនួន 7 បូកចូលគ្នា និងបញ្ចូលអគ្គិសនី 34.2 គីឡូវ៉ាត់ម៉ោងទៅក្នុងបណ្ដាញអគ្គិសនីរបស់ប្រទេសចិន។ ជារៀងរាល់ឆ្នាំ ទួរប៊ីននេះនឹងផ្គត់ផ្គង់អគ្គិសនីប្រហែល 66 ជីហ្គាវ៉ាត់ម៉ោង។

ទួរប៊ីនខ្យល់សម្រាប់ដាក់លើសមុទ្រនឹងមានទំហំធំជាងនេះ នាពេលខាងមុខ។ ក្រុមហ៊ុនសាងសង់កប៉ាល់ចិន ធ្លាប់ផលិតទួរប៊ីនខ្យល់ 18 MW កាលពីខែមករា ឆ្នាំ 2023 ហើយបន្ទាប់មកទៀត នឹងជាកំណែ 20 ម៉េហ្គាវ៉ាត់៕

July 21, 2023

ក្រុមហ៊ុនវៀតណាម សង់រោងចក្រតម្លៃ 4 ពាន់លានដុល្លារនៅអាម៉េរិក ក្នុងសប្ដាហ៍ក្រោយ

នេះនឹងក្លាយជារោងចក្រផលិតរថយន្តអគ្គិសនីដំបូងនៅ Carolina ខាងជើងរបស់ក្រុមហ៊ុនវៀតណាម VinFast ដែលនឹងផ្គត់ផ្គង់សម្រាប់ទីផ្សារអាម៉េរិកខាងជើង។

នៅថ្ងៃទី 19 កក្កដា 2023 នេះ VinFast បានប្រកាសបើកការដ្ឋានសាងសង់រោងចក្រផលិតរថយន្តអគ្គិសនីនៅក្នុងរដ្ឋ Carolina ខាងជើង របស់សហរដ្ឋអាម៉េរិក នៅថ្ងៃទី 28 កក្កដាខាងមុខ។ រោងចក្រនេះមានទីតាំងនៅក្នុងតំបន់ឧស្សាហកម្ម Triangle Innovation Point របស់ស្រុក Chatham ក្នុងរដ្ឋ Carolina ខាងជើង។ គម្រោងដែលស្ថិតនៅលើផ្ទៃដីប្រហែល 733 ហិកតានេះ គ្រោងនឹងផលិតរថយន្តអគ្គិសនីបាន 150,000 គ្រឿង/ឆ្នាំ នៅក្នុងដំណាក់កាលទីមួយ។

យោងតាមក្រុមហ៊ុន VinFast រោងចក្រខាងលើគ្រោងនឹងផ្ដើមការផលិតចាប់ពីឆ្នាំ 2025។ មុននោះ VinFast ក៏បានប្រកាសថា បានទទួលការអនុគ្រោះក្នុងតម្លៃ 1.2 ពាន់លានដុល្លារពីរដ្ឋបាលរដ្ឋ Carolina ខាងជើង, ទីក្រុង Sanford, តំបន់ Chatham និងមូលនិធិ Golden Leaf ផងដែរ សម្រាប់គម្រោងសាងសង់រោងចក្រនេះ។

នៅប្រទេសវៀតណាម VinFast បានប្រគល់រថយន្តអគ្គិសនីដល់ដៃអតិថិជនចំនួនជាង 11 ពាន់គ្រឿង នៅក្នុង 6 ខែដើមឆ្នាំនេះ ក្នុងនោះមាន 3,155 គ្រឿង ត្រូវបានប្រគល់ក្នុងខែមិថុនាកន្លងទៅ៕

July 19, 2023

ស្ថានីយថាមពលព្រះអាទិត្យអាចបាញ់បញ្ជូនអគ្គិសនីទៅឱ្យឋានព្រះចន្ទ

ក្រុមវិស្វកររបស់ប្រទេសស្វ៊ីស កំពុងរៀបគម្រោងសាងសង់ស្ថានីយផលិតអគ្គិសនីពីកម្ដៅព្រះអាទិត្យដែលអាចផ្គត់ផ្គង់អគ្គិសនីជាបន្តបន្ទាប់ទៅឱ្យមូលដ្ឋាននៅលើឋានព្រះចន្ទ ក្នុងទម្រង់រលកមីក្រូវ៉េវ។

ក្រុមវិស្វករនៅក្នុងក្រុមហ៊ុនហ៊ុនស្វ៊ីស Astrostrom បានបង្ហាញសេចក្ដីលំអិតអំពីស្ថានីយអគ្គិសនីព្រះចន្ទ – ផែនដីខ្នាតធំ (GE⊕-LPS)។ ស្ថានីយនេះរួមមានផ្ទាំងសូឡារាងអក្សរ V ជាច្រើនផ្ទាំង ត្រូវបានរៀបជារាងគូទខ្យងនៅក្នុងផ្ទៃក្រឡាមួយគីឡូម៉ែត្រការ៉េ ដែលអាចបាញ់បញ្ជូនថាមពលឡើងដល់ 23 ម៉េហ្គាវ៉ាត់ (MW) ទៅកាន់មូលដ្ឋានរបស់មនុស្សនៅលើផ្ទៃរបស់ឋានព្រះចន្ទ។

យោងតាមការស្រាវជ្រាវរបស់ក្រុមវិស្វករខាងលើ ទាំងស្ថានីយ GE⊕-LPS ទាំងផ្ទាំងសូឡា អាចត្រូវបានផលិតឡើងដោយប្រើប្រាស់វត្ថុធាតុដែលមាននៅលើឋានព្រះចន្ទ។

ស្ថានីយផលិតអគ្គិសនីនឹងត្រូវបានបង្កើតឡើងសម្រាប់អ្នកស្នាក់នៅយូរអង្វែង ហើយស្ថិតនៅក្នុងតំបន់ Lagrange ត្រង់ចន្លោះផែនដី និងព្រះចន្ទ ក្នុងរយៈកម្ពស់ 61,350 គីឡូម៉ែត្រពីផ្ទៃព្រះចន្ទ។

«នៅពេលគម្រោងដូច GE⊕-LPS បានបញ្ជាក់អំពីប្រសិទ្ធភាពនៃដំណើរការផលិត និងដំឡើងផ្កាយរណបថាមពលព្រះអាទិត្យ យើងនឹងអាចបង្កើនវិសាលភាពក្នុងការផលិតផ្កាយរណបថាមពលព្រះអាទិត្យពីវត្ថុធាតុដែលមាននៅលើឋានព្រះចន្ទ ដើម្បីផ្គត់ផ្គង់ដល់ភពផែនដី» Sanjay Vijendran ប្រធានគម្រោងស្រាវជ្រាវថាមពលព្រះអាទិត្យក្នុងទីអវកាស SOLARIS របស់អង្គការ ESA ឱ្យដឹងដូច្នេះ៕

July 19, 2023

ទួរប៊ីនខ្យល់កម្លាំង 15 MW នៅលើសមុទ្រ ផ្លាស់ទីទៅរកខ្យល់ដោយស្វ័យប្រវត្ត

ទួរប៊ីនខ្យល់របស់ X1 Wind មានទម្រដែលមានរូបរាងដូចសជី ឬពីរ៉ាមីត តូចលើធំក្រោម អមនឹងប្រព័ន្ធពោងអណ្ដែតលើទឹក អនុញ្ញាតឱ្យវាផ្លាស់ទីទៅកាន់កន្លែងមានខ្យល់បក់ ដូច្នេះវាអាចផលិតអគ្គិសនីស្ទើរតែមិនឈប់ឈរ។

ទម្រទួរប៊ីនខ្យល់ X1 Wind បំពាក់បច្ចេកវិទ្យា PivotBuoy ដែលក្នុងនោះ គ្រឹះរបស់វាតភ្ជាប់ជាមួយនឹងទីតាំងមួយដែលអនុញ្ញាតឱ្យទម្រផ្លាស់ទីទៅតាមទិសរបស់ខ្យល់។ ប្រព័ន្ធនេះដំណើរការបានល្អបំផុតនៅពេលវាបែរខ្នងដាក់ខ្យល់ដែលបក់មកពីខាងក្រោយ។ ប្រភេទទួរប៊ីនខ្យល់នេះជួយឱ្យវាមិនប្រឈមនឹងការប៉ះទង្គិចរវាងស្លាបកង្ហារ និងដងខ្លួន ព្រមទាំងកាត់បន្ថយការចំណាយក្នុងការផលិត និងដំឡើង ក៏ដូចជាមានប្រសិទ្ធភាពខ្ពស់ក្នុងការផលិតអគ្គិសនី។

កំណែដំបូងរបស់ X1 Wind មានឈ្មោះថា X30 ដែលត្រូវបានដាក់ពង្រាយ និងធ្វើតេស្តនៅប្រជុំកោះ Canary ប្រទេសអេស្ប៉ាញ។ គម្រោងខាងលើបានចាប់ផ្ដើមតាំងពីខែមេសាឆ្នាំ 2019 ហើយដំណើរការផលិតសម្រេចបានកាលពីខែវិច្ឆិកាឆ្នាំ 2020 ខណៈដែលការសាកល្បងប្រព័ន្ធអម និងការដំឡើងគ្រឹះ និងខ្សែកាប ត្រូវបានធ្វើឡើងរួចរាល់កាលពីពាក់កណ្ដាលឆ្នាំ 2022។

តាមផែនការ គម្រោងពាណិជ្ជកម្មរបស់ X1 Wind នឹងត្រូវបានធ្វើឡើងនៅលើតំបន់សមុទ្រមេឌីទែរ៉ាណេរបស់បារាំង នៅឆ្នាំ 2025។ នេះបើយោងតាមទំព័រ Design Boom។

July 18, 2023

Ford បញ្ចុះតម្លៃរថយន្ត F-150 Lightning ពេល «សង្គ្រាមរថយន្តអគ្គិសនី» កំពុងតានតឹង

កាលពីថ្ងៃទី 17 កក្កដា ក្រុមហ៊ុន Ford បានបញ្ចុះតម្លៃរថយន្តអគ្គិសនី F-150 Lightning (បញ្ចុះតម្លៃ 17% សម្រាប់កំណែស្ដង់ដា) ព្រោះតែចង់បង្កើនចំណែកទីផ្សាររបស់ខ្លួន នៅក្នុងទីផ្សារដែលត្រូវបានគ្រប់គ្រងដោយ Tesla។

Ford បានដំឡើងថ្លៃ Lightning កាលពីដើមឆ្នាំនេះ ហើយក្រោយមក ក្រុមហ៊ុននេះក៏ឱ្យដឹងថា ពួកគេអាចបញ្ចុះតម្លៃបន្ទាប់ពីការកែលំអនានាសម្រាប់រថយន្តនេះ។ ក្នុងត្រីមាសទីពីរ ចំនួនរថយន្តអគ្គិសនី Ford ដែលបានលក់ចេញ បានថយចុះ 2.8%។

ការបញ្ចុះតម្លៃរបស់ Ford កើតឡើងក្នុងគ្រាដែលការប្រកួតប្រជែកតម្លៃដែលបានចាប់ផ្ដើមដោយ Tesla កាលពីប៉ុន្មានខែមុន ធ្វើឱ្យរថយន្តអគ្គិសនីរបស់បណ្ដាក្រុមហ៊ុនចាស់ៗត្រូវគរលើគ្នានៅតាមទីតាំងចែកចាយ ដោយសារតែល្បឿននៃការលក់ចេញបានថមថយ។

បច្ចុប្បន្ន កំណែ Lightning Pro មានតម្លៃចាប់ពី 49,995 ដុល្លារអាម៉េរិក ទាបជាងបន្តិចបើធៀបនឹងតម្លៃ 59,974 ដុល្លារដែលបានលក់មុននោះ។ ចំណែកកំណែ Platinum លំដាប់ប្រណិតជាងនឹងមានតម្លៃ 91,995 ដុល្លារ។ ដោយឡែក ភាគហ៊ុនរបស់ Ford ក៏បានធ្លាក់ថ្លៃនៅសល់ 14.09 ដុល្លារ/ហ៊ុន នៅពេលបញ្ចប់ការជួញដូរកាលពីម្សិលមិញ៕

July 18, 2023

Tag: អគ្គិសនី