អគ្គិសនី - La Reine Media

ឥណ្ឌូណេស៊ីសម្ពោធដាក់ឱ្យប្រើប្រាស់ផ្លូវដែកល្បឿនលឿនដំបូងអាស៊ីអាគ្នេយ៍

ផ្លូវដែកល្បឿនលឿនដំបូងរបស់ប្រទេសឥណ្ឌូណេស៊ី ជិតបើកទ្វារទទួលអ្នកដំណើរ ដែលនេះនឹងជួយកាត់បន្ថយពេលវេលានៃការធ្វើដំណើររវាងទីក្រុងពីរធំជាងគេបង្អស់របស់ប្រទេសនេះ។

គម្រោងផ្លូវដែកដែលមានតម្លៃ 7.3 ពាន់លានដុល្លារអាម៉េរិកនេះនឹងត្រូវបានសម្ពោធដាក់ឱ្យដំណើរការក្នុងថ្ងៃទី 02 តុលា 2023 ក្រោយពីបានពន្យារពេលច្រើនលើក។ នេះគឺជាមួយផ្នែកនៃគំនិតផ្ដួចផ្ដើមហេដ្ឋារចនាសម្ព័ន្ធខ្សែក្រវាត់ និងផ្លូវ ដែលទទួលបានជំនួយភាគច្រើនពីបណ្ដាក្រុមហ៊ុនរដ្ឋចិន។

«យើងនឹងសម្ពោធនៅថ្ងៃទី 02 តុលា ដោយសារប្រធានាធិបតីជាប់រវល់នៅក្នុងថ្ងៃទី 01 តុលា» រដ្ឋមន្ត្រីក្រសួងគមនាគមន៍ឥណ្ឌូណេស៊ី Budi Karya Sumadi កាលពីថ្ងៃទី 29 កញ្ញា ថ្លែងដូច្នេះ។

ផ្លូវដែកសម្រាប់រថភ្លើងល្បឿនលឿនប្រវែង 138 គីឡូម៉ែត្រ និងមានឈ្មោះថា WHOOSH នេះ តភ្ជាប់រវាងរដ្ឋធានីហ្សាការតា និង Bandung នៅខេត្តជ្វាខាងលិច ដែលជាទីក្រុងធំជាងគេលំដាប់ទីពីររបស់ឥណ្ឌូណេស៊ី និងជាមជ្ឈមណ្ឌលសិល្បៈ វប្បធម៌ដ៏ធំរបស់ឥណ្ឌូណេស៊ី។

រថភ្លើងដែលរត់លើផ្លូវដែក WHOOSH ដំណើរការដោយអគ្គិសនី និងមានល្បឿនប្រហែល 350 គីឡូម៉ែត្រ/ម៉ោង នឹងជួយកាត់បន្ថយពេលវេលាក្នុងការធ្វើដំណើររវាង ហ្សាការតា និង Bandung ពីបីម៉ោងមកនៅក្រោមមួយម៉ោង។ WHOOSH ក៏ជាផ្លូវដែកល្បឿនលឿនដំបូងនៅតំបន់អាស៊ីអាគ្នេយ៍ផងដែរ។

គម្រោងខាងលើនេះត្រូវបានគ្រប់គ្រងដោយក្រុមហ៊ុនបណ្ដាក់ទុនរួម PT Kereta Cepat ឥណ្ឌូណេស៊ី – ចិន (PT KCIC)។ តំណាងក្រុមហ៊ុននេះក៏បានឱ្យដឹងថា ស្ថាប័នពាក់ព័ន្ធកំពុងចរចាអំពីការពង្រីកផ្លូវដែកល្បឿនលឿនទៅកាន់ Surabaya ដែលជាទីក្រុងកំពង់ផែធំរបស់ខេត្តជ្វាខាងកើត។

កិច្ចព្រមព្រៀងអភិវឌ្ឍផ្លូវរថភ្លើងល្បឿនលឿននៅឥណ្ឌូណេស៊ី ត្រូវបានចុះហត្ថលេខាកាលពីឆ្នាំ 2015 និងចាប់ផ្ដើមស្ថាបនាតាំងពីចុងឆ្នាំនោះ។ តាមផែនការដំបូង គម្រោងនេះគ្រោងនឹងត្រូវបានដាក់ឱ្យដំណើរការក្នុងឆ្នាំ 2019 ប៉ុន្តែត្រូវបានពន្យារពេលច្រើនលើកដោយសារតែបញ្ហាកូវីដ-19៕

October 2, 2023

យានស្រាវជ្រាវរបស់ឥណ្ឌាទើបតែរកឃើញធនធានដ៏មានតម្លៃលើឋានព្រះចន្ទ

យានអវកាសឥណ្ឌា ដែលទើបតែបានចុះចតលើឋានព្រះចន្ទកាលពីមួយខែមុន ប៉ុន្តែបានរួមចំណែកធំធេងនៅក្នុងវិស័យវិទ្យាសាស្ត្រ។

ក្រោយពីបេសកកម្ម Chadrayaan-3 របស់ប្រទេសឥណ្ឌា ទទួលបានជោគជ័យក្នុងការចុះចត ក្រុមអ្នកវិទ្យាសាស្ត្រប្រទេសនេះកំពុងតែមមាញឹកក្នុងការវិភាគទិន្នន័យដែលយានចុះចត Vikram និងយានស្រាវជ្រាវ Pragyan បានបញ្ជូនមកកាន់ផែនដីបន្ទាប់ពីធ្វើការលើឋានព្រះចន្ទបានមួយថ្ងៃ (មួយថ្ងៃព្រះចន្ទស្មើនឹង 14 ថ្ងៃលើផែនដី)។

មកដល់ពេលនេះ Pragyan បានរកឃើញអ្វីៗជាច្រើនដែលមានតម្លៃ ក្នុងនោះក៏មានដែក ទីតានីញ៉ូម អាលុយមីញ៉ូម និងពិសេសគឺ ស្ពាន់ធ័រ រួមនឹងកំហាប់របស់វា នៅក្នុងដីរបស់ព្រះចន្ទ។

មុននោះ អ្នកវិទ្យាសាស្ត្របានដឹងថា ស្ពាន់ព័រមាននៅក្នុងដី និងថ្មរបស់ព្រះចន្ទ ប៉ុន្តែមានកំហាប់ទាប។ យានរបស់ឥណ្ឌារកឃើញថា ស្ពាន់ធ័រមាននៅក្នុងដីព្រះចន្ទច្រើនជាងការរំពឹងទៅទៀត។

ស្ពាន់ធ័រលើឋានព្រះចន្ទគឺជាប្រភពធនធានដ៏មានតម្លៃចំពោះបេសកកម្មអវកាសរយៈពេលយូរ។ ស្ថាប័នអវកាសជាច្រើនកំពុងគិតដល់ការសាងសង់មូលដ្ឋានរបស់មនុស្សនៅលើឋានព្រះចន្ទ ក្នុងនោះក៏ត្រូវការស្ពាន់ធ័រជាចាំបាច់ផងដែរ។ ដោយសារមានស្ពាន់ធ័រលើឋានព្រះចន្ទស្រាប់ អ្នកអវកាសមិនបាច់វិលមកកាន់ផែនដីដើម្បីដឹកជញ្ជូនវត្ថុធាតុឡើងទៅកាន់ឋានព្រះចន្ទ។

អ្នកអវកាសអាចប្រើប្រាស់ស្ពាន់ធ័រដើម្បីផលិតផ្ទាំងសូឡា និងថ្មផ្ទុកថាមពលអគ្គិសនីដែលប្រើប្រាស់ស្ពាន់ធ័រ និងផលិតជាបេតុងសម្រាប់ការសាងសង់ជាដើម។

បេតុងស្ពាន់ធ័រល្អជាងបេតុងធម្មតាដែលពេញនិយមលើផែនដី។ អ្នកវិទ្យាសាស្ត្របកស្រាយថា បេតុងស្ពាន់ធ័រនឹងរឹងមកវិញ ហើយមាំខ្លាំង ដោយចំណាយពេលតែប៉ុន្មានម៉ោងប៉ុណ្ណោះក្រោយការប្រើប្រាស់ មិនមែនច្រើនសប្ដាហ៍ និងមានសមត្ថភាពទប់ទល់នឹងការសឹករេចរិលខ្ពស់ខ្លាំងជាងឆ្ងាយបើធៀបនឹងបេតុងធម្មតា។

ជាងនេះ ស្ពាន់ធ័រក៏មិនត្រូវការទឹកដូចបេតុងធម្មតា ដូច្នេះអ្នកអវកាសអាចសន្សំសំចៃទឹកដ៏មានតម្លៃទុកសម្រាប់បរិភោគ បង្កើតអុកស៊ីសែន និងផលិតជាឥន្ធនៈសម្រាប់រ៉ុក្កែតជាដើម៕

យានចុះចត Vikram និងយានស្រាវជ្រាវ Pragyan

September 27, 2023

ឥណ្ឌានឹងក្លាយជាមជ្ឈមណ្ឌលផលិតយានយន្តអគ្គិសនីនៅឆ្នាំ 2028

បើទោះកំពុងស្ថិតក្នុងដំណាក់កាលដំបូង ការកើនឡើងនៃចំនួនយានយន្តអគ្គិសនីដែលបានលក់ចេញបាននាំឱ្យការវិនិយោគទៅលើវិស័យផលិតយានយន្តអគ្គិសនីនៅប្រទេសឥណ្ឌាមានកាន់តែច្រើន ដែលគ្រោងនឹងសម្រេចបានមួយលានគ្រឿងក្នុងរង្វង់ 5 ឆ្នាំខាងមុខ។

ទំព័រសារព័ត៌មានសេដ្ឋកិច្ចដែលចេញផ្សាយដោយការិយាល័យពាណិជ្ជកម្ម និងឧស្សាហកម្ម PHD រួមនឹងក្រុមហ៊ុនប្រឹក្សា Avalon ឱ្យដឹងថា ចំនួនយានយន្តអគ្គិសនីនៅឥណ្ឌាអាចសម្រេចបាន 9.7 លានគ្រឿងនៅឆ្នាំ 2028 ក្នុងនោះ ទីផ្សារគ្រឿងបន្លាស់សម្រាប់យានយន្តអគ្គិសនីគ្រោងនឹងកើនពី 1.25 ពាន់លានដុល្លារអាម៉េរិកក្នុងឆ្នាំ 2023 ឡើងដល់ 13 ពាន់លានដុល្លារនៅឆ្នាំ 2028។

ទន្ទឹមនឹងទីផ្សារមួយដែលកំពុងរីកចម្រើន បណ្ដាគោលនយោបាយរបស់រដ្ឋាភិបាលឥណ្ឌា មានជាអាទិ៍ FAME II និងកម្មវិធីលើកទឹកចិត្តនានា ត្រូវបានរំពឹងថា នឹងធ្វើឱ្យវិស័យយានយន្តអគ្គិសនីនៅប្រទេសនេះអាចមានចំណែកក្នុងទីផ្សារប្រមាណ 30% នៅឆ្នាំ 2030។ ឥណ្ឌាក៏រំពឹងថា យានយន្តអគ្គិសនីនឹងមានចំណែក 80% ក្នុងទីផ្សារទោចក្រយានយន្ត និងត្រីចក្រយានយន្តនៅប៉ុន្មានឆ្នាំខាងមុខផងដែរ៕

September 26, 2023

VinFast ប្រគល់រថយន្តអគ្គិសនី 9,500 គ្រឿងជូនអតិថិជនក្នុងត្រីមាសទីពីរ

ការលក់មានការកើនឡើងខ្ពស់ក្នុងត្រីមាសទីពីរដោយសារតែការប្រគល់រថយន្តទៅឱ្យក្រុមហ៊ុនរថយន្តអគ្គិសនីឈ្នួល GSM។

VinFast Auto (VFS) ដែលជាសមាជិកមួយរបស់សាជីវកម្ម Vingroup (VIC) ទើបតែផ្ញើរបាយការណ៍ស្ដីពីស្ថានភាពរបស់ក្រុមហ៊ុនក្នុងត្រីមាសទីពីរ ជូនគណៈកម្មការមូលបត្រអាម៉េរិក (SEC)។

របាយការណ៍ខាងលើឱ្យដឹងថា ក្រុមហ៊ុនផលិតរថយន្តអគ្គិសនីវៀតណាម VinFast រកបានចំណូល 334.1 លានដុល្លារអាម៉េរិក ខ្ពស់ជាងបួនដងធៀបនឹងត្រីមាសដំបូងរបស់ឆ្នាំនេះ។ លទ្ធផលនេះកើតឡើងដោយសារការប្រគល់រថយន្តអគ្គិសនីជូនអតិថិជនបានជាង 9,500 គ្រឿង ច្រើនជាងប្រាំដងធៀបនឹងត្រីមាសទីមួយ។

របាយការណ៍ផ្ញើទៅកាន់ SEC ក៏ឱ្យដឹងថា អតិថិជនធំជាងគេបំផុតរបស់ VinFast គឺក្រុមហ៊ុន GSM។ GSM គឺជាក្រុមហ៊ុនរថយន្តអគ្គិសនី និងម៉ូតូអគ្គិសនីឈ្នួលរបស់ VinGroup ដែលទើបត្រូវបានមហាសេដ្ឋីវៀតណាម លោក ហ្វាម ញ៉ឹតវ៉ឿង (ស្ថាបនិករបស់ VinGroup) បង្កើតឡើងកាលពីដើមឆ្នាំ។ GSM បានទទួលរថយន្តអគ្គិសនីប្រហែល 7,100 គ្រឿងពី VinFast គិតត្រឹមចុងត្រីមាសទីពីរ។ មុននោះ GSM បានចុះកិច្ចព្រមព្រៀងទិញម៉ូតូអគ្គិសនី 200,000 គ្រឿង និងរថយន្តអគ្គិសនី 30,000 គ្រឿងពី VinFast៕

September 25, 2023

ថៃរំពឹងលើខ្ទង់វិនិយោគប្រាំពាន់លានដុល្លារពី Tesla, Google, Microsoft

កាលពីថ្ងៃទី 24 កញ្ញា Reuters ដកស្រង់សម្ដីនាយករដ្ឋមន្ត្រីថៃ Srettha Thavisin ដែលបានថ្លែងនៅបុរីនីវយ៉ក សហរដ្ឋអាម៉េរិក ឱ្យដឹងថា ប្រទេសថៃគ្រោងនឹងទទួលបានខ្ទង់វិនិយោគយ៉ាងតិច 5 ពាន់លានដុល្លារពីបណ្ដាក្រុមហ៊ុនអាម៉េរិក មានជាអាទិ៍ Tesla, Google និង Microsoft ជាដើម។

Reuters ឱ្យដឹងថា ក្នុងចំណោមក្រុមហ៊ុនដែលបានលើកឡើងនេះ Tesla នឹងពិចារណាលើការសាងសង់រោងចក្រផលិតរថយន្តអគ្គិសនី ខណៈ Microsoft និង Google អាចនឹងដាក់មជ្ឈមណ្ឌលទិន្នន័យរបស់ខ្លួននៅប្រទេសថៃ។

យោងតាមនាយករដ្ឋមន្ត្រីថៃដដែល ប្រភពទុនវិនិយោគថ្មីពីបរទេស នឹងដើរតួនាទីយ៉ាងសំខាន់ក្នុងការជំរុញកំណើនសេដ្ឋកិច្ចរបស់ថៃ ដែលកំពុងថមថយ ហើយគ្រោងនឹងមានកំណើនត្រឹមតែ 2.8% ប៉ុណ្ណោះក្នុងឆ្នាំនេះ។

រដ្ឋាភិបាលថ្មីរបស់ប្រទេសថៃ កំពុងតែបញ្ចេញសកម្មភាពយ៉ាងខ្លាំងក្លាដើម្បីបង្កើនភាពងាយស្រួលដល់ការវិនិយោគពីបរទេស។ ដើម្បីរក្សាតំណែងជាមជ្ឈមណ្ឌលដំឡើងរថយន្តធំជាងគេលំដាប់ទីបួននៅអាស៊ី ថៃបានលើកឡើងនូវអត្ថប្រយោជន៍ជាច្រើនដើម្បីទាក់ទាញអ្នកផលិតរថយន្តអគ្គិសនី និងថ្មផ្ទុកអគ្គិសនី ទន្ទឹមនឹងការបញ្ចុះអត្រាពន្ធសម្រាប់អ្នកទិញរថយន្តអគ្គិសនីក្នុងប្រទេស ក្នុងបំណងលើកទឹកចិត្តឱ្យមានការប្រើប្រាស់កាន់តែច្រើន។

ក្នុងអំឡុងពេលស្ថិតនៅសហរដ្ឋអាម៉េរិក នាយករដ្ឋមន្ត្រីថៃ លោក Srettha Thavisin ក៏បានចូលជួបនាយកប្រតិបត្តិរបស់ក្រុមហ៊ុន Tesla លោក Elon Musk ផងដែរ ដើម្បីពិភាក្សាអំពីបញ្ហានានានៅក្នុងវិស័យរថយន្តអគ្គិសនី៕

September 25, 2023

BYD Yangwang U8 បង្ហាញខ្លួនជាផ្លូវការ តម្លៃចាប់ពី 150,600 ដុល្លារអាម៉េរិក

Yangwang ដែលជាយីហោរថយន្តប្រណិតរបស់ក្រុមហ៊ុនចិន BYD ថ្ងៃនេះបានបង្ហាញជាផ្លូវការនូវរថយន្តអគ្គិសនីដំបូងរបស់ខ្លួននៅប្រទេសចិន ដែលមានតម្លៃចាប់ពី 150,600 ដុល្លារអាម៉េរិក ហើយការប្រគល់ទំនិញនឹងធ្វើឡើងចាប់ពីខែតុលាឆ្នាំនេះ។

រថយន្តអគ្គិសនី Yangwang U8 នេះមានបណ្ដោយប្រវែង 5,050 មម និងកម្ពស់ 1,930 មម ខណៈដែលប្រវែងបណ្ដោយជាមូលដ្ឋានគឺ 3,050 មម។

រថយន្តនេះបំពាក់ម៉ាស៊ីនចំនួនបួនដែលបង្កើតកម្លាំង 880 គីឡូវ៉ាត់ ប្រហាក់ប្រហែលនឹងកម្លាំង 1,200 សេះ។ ថ្មរបស់វាផ្ទុកថាមពលបាន 49.05 គីឡូវ៉ាត់ម៉ោង ជួយឱ្យរថយន្តបរបាន 180 គីឡូម៉ែត្រ និងអាចរត់បាន 1,000 គីឡូម៉ែត្រនៅពេលចាក់សាំង និងបញ្ចូលអគ្គិសនីមួយពេញ។

Yangwang បានដាក់ឱ្យបញ្ជាទិញជាមុនរថយន្តអគ្គិសនី U8 នេះ ចាប់ពីថ្ងៃទី 18 មេសា 2023 ជាថ្ងៃដំបូងនៃពិព័រណ៍រថយន្តសៀងហៃ។

យោងតាម CnEVPost ក្រុមហ៊ុន Yangwang ឱ្យដឹងថា នឹងបង្កើតហាងលក់ផ្ទាល់ជាង 90 កន្លែង ដែលគ្របដណ្ដប់ទីក្រុងជាង 40 នៅប្រទេសចិន នៅចុងឆ្នាំនេះ៕

September 21, 2023

ធ្វើតាមជនជាតិជប៉ុន BYD ក៏ដណ្ដើមបានចំណែកទីផ្សាររថយន្តមួយភាគធំនៅអាស៊ីអាគ្នេយ៍

ក្រុមហ៊ុនផលិតរថយន្តអគ្គិសនីចិន BYD (Build Your Dream) កំពុងតែស្ដែងឱ្យឃើញជោគជ័យមួយកម្រិតនៅក្នុងទីផ្សារអាស៊ីអាគ្នេយ៍ ដោយបានយកឈ្នះលើ Tesla ដើម្បីក្ដោបក្ដាប់ចំណែកទីផ្សាររថយន្តអគ្គិសនីជាង ¼ ដែលបានលក់ចេញនៅក្នុងតំបន់នេះ។

ទន្ទឹមនឹងតម្លៃដ៏ទាក់ទាញ ជោគជ័យដំបូងៗរបស់ BYD ត្រូវបានគេរកឃើញថា កើតចេញពីរូបមន្តសហការចែកចាយជាមួយនឹងបណ្ដាក្រុមហ៊ុនក្នុងស្រុក អនុញ្ញាតឱ្យក្រុមហ៊ុនចិនមួយនេះអាចពង្រីកទីផ្សារ ដឹងអំពីចំណូលចិត្តរបស់អ្នកប្រើប្រាស់ និងឆ្លងផុតការកំណត់នានារបស់បណ្ដារដ្ឋាភិបាល។ នេះបើតាមដៃគូសហការ ក៏ដូចជាអ្នកចែកចាយរបស់ BYD។

រូបមន្តដែល BYD អនុវត្តគឺដូចទៅនឹងវិធីដែលបណ្ដាក្រុមហ៊ុនជប៉ុនធ្លាប់បានអនុវត្តក្នុងប្រទេសមួយចំនួននៅអាស៊ីអាគ្នេយ៍កាលពីច្រើនទសវត្សរ៍កន្លង។ យុទ្ធសាស្ត្រខាងលើបាន និងកំពុងជួយឱ្យ BYD ដណ្ដើមបានចំណែកទីផ្សារយ៉ាងឆាប់រហ័ស ខុសពីរូបមន្តចែកចាយផ្ដាច់មុខរបស់ Tesla ថ្វីបើមានចំណុចអវិជ្ជមានខ្លះ។

«បច្ចុប្បន្ន BYD យកចិត្តទុកដាក់លើការអភិវឌ្ឍពាណិជ្ជសញ្ញាជាជាងអត្រាចំណេញ» Soumen Mandal អ្នកវិភាគជាន់ខ្ពស់របស់ Counterpoint Research ឱ្យដឹងដូច្នេះ និងបន្តថា «តាមរយៈការផ្ដល់ប្រាក់ចំណេញច្រើនដល់តំណាងចែកចាយនៅតាមបណ្ដាប្រទេស BYD អាចចិញ្ចឹមទំនុកចិត្ត និងភាពស្មោះត្រង់ បើកផ្លូវសម្រាប់ការពង្រីកទីផ្សារបន្ថែមទៀត»។

យោងតាម Counterpoint ក្រុមហ៊ុន BYD កាន់កាប់ចំណែកទីផ្សាររថយន្តខ្នាតតូចប្រមាណ 26% ប៉ុន្តែកំពុងរីកចម្រើនយ៉ាងខ្លាំងក្លានៅអាស៊ីអាគ្នេយ៍ ក្នុងត្រីមាសទីពីរ ឆ្នាំ 2023។

រថយន្តអគ្គិសនីមាន 6.4% ក្នុងចំណោមរថយន្តទេសចរណ៍នៅអាស៊ីអាគ្នេយ៍ក្នុងត្រីមាសទីពីរ កើនឡើងបើធៀបនឹង 3.8% ក្នុងត្រីមាសមុននោះ។ អាស៊ីអាគ្នេយ៍អាចក្លាយជាតំបន់សំខាន់ចំពោះបណ្ដាក្រុមហ៊ុនផលិតរថយន្តចិន បន្ទាប់ពីគណៈកម្មការអឺរ៉ុប កាលពីសប្ដាហ៍កន្លងបានប្រកាសឱ្យដឹងអំពីការស៊ើបអង្កេតមួយទាក់ទិននឹងការឧបត្ថម្ភដល់រថយន្តអគ្គិសនីរបស់ចិន៕

September 19, 2023

រថយន្តអគ្គិសនីអាចនឹងក្ដោបក្ដាប់ 2/3 នៃទីផ្សាររថយន្តនៅឆ្នាំ 2030

ការរីកចម្រើនដ៏ឆាប់រហ័សរបស់ទីផ្សារអឺរ៉ុប និងចិន នឹងជួយឱ្យការជួញដូររថយន្តអគ្គិសនីមានកំណើនខ្ពស់ខ្លាំងនៅចុងទសវត្សរ៍នេះ។

លទ្ធផលនៃការសិក្សាស្រាវជ្រាវថ្មីមួយរបស់វិទ្យាស្ថាន Rocky Mountain Institute (RMI) បានបង្ហាញថា ដោយសារតែតម្លៃថ្មផ្ទុកថាមពលថយចុះ រថយន្តអគ្គិសនីអាចនឹងមានតម្លៃស្មើនឹងរថយន្តប្រេងសាំងនៅទ្វីបអឺរ៉ុបចាប់ពីឆ្នាំ 2024 និងទីផ្សារអាម៉េរិកចាប់ពីឆ្នាំ 2026 ហើយនឹងក្ដោបក្ដាប់ 2/3 នៃចំនួនរថយន្តសរុបដែលបានលក់ចេញនៅឆ្នាំ 2030។

របាយការណ៍របស់ RMI បានព្យាករថា តម្លៃថ្មផ្ទុកថាមពលនឹងថយចុះពាក់កណ្ដាលនៅទសវត្សរ៍នេះ ដោយធ្លាប់ពី 151 ដុល្លារ/គីឡូវ៉ាត់ម៉ោងនៅឆ្នាំ 2022 ចុះមកនៅត្រឹមប្រហែល 60 – 90 ដុល្លារ/គីឡូវ៉ាត់ម៉ោង ដែលនឹងជួយឱ្យរថយន្តអគ្គិសនីធ្លាក់ថ្លៃមកស្មើនឹងរថយន្តប្រើប្រាស់ប្រេងសាំងនៅគ្រប់ទីផ្សារចាប់ពីឆ្នាំ 2030។

តាមធម្មតា ថ្មផ្ទុកថាមពលតែងតែកាន់កាប់ប្រហែល 40% នៃតម្លៃសរុបរបស់រថយន្តអគ្គិសនីមួយគ្រឿង។ RMI ឱ្យដឹងថា តម្លៃនេះកំពុងថយចុះបន្តិចម្ដងៗនៅពេលបណ្ដាក្រុមហ៊ុនផលិតរថយន្តនាំគ្នាវិនិយោគទៅលើគីមី វត្ថុធាតុ និងសបវ៉ែររបស់ថ្មផ្ទុកថាមពលប្រភេទថ្មី ដើម្បីបង្កើតបានរថយន្តអគ្គិសនីដែលមានប្រសិទ្ធភាពកាន់តែខ្ពស់។

លទ្ធផលនៃការសិក្សាស្រាវជ្រាវក្នុងគម្រោងសេដ្ឋសាស្ត្ររបស់សាកលវិទ្យាល័យ Exeter University បង្ហាញថា បរិមាណរថយន្តអគ្គិសនីដែលលក់ចេញនឹងកើនទៅតាមលេខគុណ។ យោងតាមការស្រាវជ្រាវនេះ រថយន្តអគ្គិសនីនឹងមានតម្លៃស្មើនឹងរថយន្តដំណើរការដោយឥន្ធនៈនៅឆ្នាំ 2024 នៅអឺរ៉ុប, ឆ្នាំ 2025 នៅប្រទេសចិន, 2026 នៅសហរដ្ឋអាម៉េរិក និង 2027 នៅប្រទេសឥណ្ឌា ចំពោះរថយន្តខ្នាតមធ្យម និងឆាប់ជាងនេះចំពោះរថយន្តខ្នាតតូច៕

September 16, 2023

ក្រុមហ៊ុនចិន GAC Aion នឹងផលិតរថយន្តអគ្គិសនីនៅប្រទេសថៃ

GAC Aion ជាយីហោរថយន្តអគ្គិសនីរបស់សាជីវកម្មរថយន្តក្វាងចូវ (Guangzhou Automobile Corporation – GAC) ដែលជាអ្នកផ្គត់ផ្គង់រថយន្តអគ្គិសនីធំជាងគេលំដាប់ទីពីររបស់ប្រទេសចិន មានគម្រោងចាប់ផ្ដើមដំឡើងរថយន្តអគ្គិសនីដំបូងៗរបស់ខ្លួននៅខែមិថុនា 2024។ ការផលិតរថយន្តអគ្គិសនីនេះនឹងធ្វើឡើងនៅរោងចក្ររបស់ GAC Aion ក្នុងច្រករបៀងសេដ្ឋកិច្ចភាគខាងកើត (EEC) របស់ប្រទេសថៃ។

នាយកប្រតិបត្តិរបស់ GAC Aion លោក Gu Huinan ឱ្យដឹងថា ក្រុមហ៊ុននេះគ្រោងនឹងផលិត Aion Y Plus ជារថយន្តអគ្គិសនីមួយប្រភេទដែលត្រូវបានបង្ហាញខ្លួននៅបាងកកកាលពីថ្ងៃទី 09 កញ្ញា 2023។ លោក Guinan និយាយថា ក្រុមហ៊ុនបានស្វែងយល់អំពី EEC និងជិតជ្រើសរើសខេត្តដើម្បីសាងសង់រោងចក្ររបស់ខ្លួន។

យោងតាម Bangkok Post ថៃគឺជាប្រទេសដំបូងដែលក្រុមហ៊ុនចិន GAC Aion ជ្រើសរើសជាទីតាំងដើម្បីវាយលុកទីផ្សារបរទេស។ លោក Huinan ដកស្រង់កត្តាសំខាន់បីដែលជាមូលហេតុនៅពីក្រោយការសម្រេចនេះ៖ រោងចក្រផលិតរថយន្តសំខាន់របស់អាស៊ាន ទីផ្សាររថយន្តអគ្គិសនីកំពុងរីកចម្រើន និងការជំរុញវិស័យរថយន្តអគ្គិសនីរបស់រាជរដ្ឋាភិបាល៕

September 12, 2023

ប្រទេសចិនក្លាយជាអ្នកនាំចេញរថយន្តធំជាងគេលើពិភពលោក

ក្នុង 6 ខែដើមឆ្នាំនេះ ប្រទេសចិនបាននាំចេញរថយន្តជាង 2.3 លានគ្រឿង ច្រើនជាងជប៉ុន និងក្លាយជាប្រទេសដែលនាំចេញរថយន្តច្រើនជាងគេបង្អស់លើពិភពលោក។

ក្នុងការធ្វើបច្ចុប្បន្នភាពនៃស្ថានភាពនាំចេញរថយន្ត សមាគមនៃបណ្ដាក្រុមហ៊ុននាំចេញរថយន្តនៅប្រទេសចិន បានដកស្រង់ទិន្នន័យពីអគ្គនាយកដ្ឋានគយរបស់ប្រទេសនេះ ឱ្យដឹងថា ក្នុងរយៈពេល 6 ខែដើមឆ្នាំ 2023 ប្រទេសចិនបាននាំចេញរថយន្តចំនួន 2.34 លានគ្រឿង កើន 76.9% បើធៀបនឹងដំណាក់កាលដូចគ្នាក្នុងឆ្នាំ 2022។

ដោយឡែក យោងតាមទិន្នន័យដែលបានប្រកាសដោយសមាគមនៃបណ្ដាក្រុមហ៊ុននាំចេញរថយន្តជប៉ុន តួលេខរថយន្តដែលបាននាំចេញរបស់ប្រទេសនេះក្នុងឆមាសទីមួយនៃឆ្នាំ 2023 មាន 2.02 លានគ្រឿង កើន 17% បើធៀបនឹងឆមាសទីមួយឆ្នាំ 2022។

នេះគឺជាលើកដំបូងហើយដែលតួលេខនៃការនាំចេញរថយន្តក្នុង 6 ខែដើមឆ្នាំ 2023 របស់ប្រទេសចិន មានចំនួនច្រើនជាងជប៉ុន និងឈរលំដាប់ទីមួយលើពិភពលោក។

ទិន្នន័យខាងលើក៏បានឱ្យដឹងថា មានមូលហេតុសំខាន់ពីរដែលធ្វើឱ្យការនាំចេញរថយន្តរបស់ប្រទេសចិនកើនឡើងខ្ពស់ខ្លាំងក្នុងឆ្នាំនេះ នោះគឺចំនួនរថយន្តដំណើរការដោយប្រេងសាំងដែលនាំចេញទៅកាន់ប្រទេសរុស្ស៊ីបានកើនឡើងគួរឱ្យចាប់អារម្មណ៍។ ទន្ទឹមនឹងនេះ រថយន្តអគ្គិសនីក៏ត្រូវបាននាំចេញទៅកាន់ទីផ្សារអឺរ៉ុប និងទីផ្សារអាស៊ីអាគ្នេយ៍ កាន់តែច្រើន៕

September 11, 2023

Tag: អគ្គិសនី